| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. පඨමසොවචස්‌සතාසුත්‌තං
3. Paṭhamasovacassatāsuttaṃ
34. ‘‘ඉමං , භික්‌ඛවෙ, රත්‌තිං අඤ්‌ඤතරා දෙවතා…පෙ.… මං එතදවොච – ‘සත්‌තිමෙ, භන්‌තෙ, ධම්‌මා භික්‌ඛුනො අපරිහානාය සංවත්‌තන්‌ති. කතමෙ සත්‌ත? සත්‌ථුගාරවතා, ධම්‌මගාරවතා, සඞ්‌ඝගාරවතා, සික්‌ඛාගාරවතා, සමාධිගාරවතා, සොවචස්‌සතා, කල්‍යාණමිත්‌තතා. ඉමෙ ඛො, භන්‌තෙ, සත්‌ත ධම්‌මා භික්‌ඛුනො අපරිහානාය සංවත්‌තන්‌තී’ති. ඉදමවොච, භික්‌ඛවෙ , සා දෙවතා. ඉදං වත්‌වා මං අභිවාදෙත්‌වා පදක්‌ඛිණං කත්‌වා තත්‌ථෙවන්‌තරධායී’’ති.
34. ‘‘Imaṃ , bhikkhave, rattiṃ aññatarā devatā…pe… maṃ etadavoca – ‘sattime, bhante, dhammā bhikkhuno aparihānāya saṃvattanti. Katame satta? Satthugāravatā, dhammagāravatā, saṅghagāravatā, sikkhāgāravatā, samādhigāravatā, sovacassatā, kalyāṇamittatā. Ime kho, bhante, satta dhammā bhikkhuno aparihānāya saṃvattantī’ti. Idamavoca, bhikkhave , sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyī’’ti.
‘‘සත්‌ථුගරු ධම්‌මගරු, සඞ්‌ඝෙ ච තිබ්‌බගාරවො;
‘‘Satthugaru dhammagaru, saṅghe ca tibbagāravo;
සමාධිගරු ආතාපී, සික්‌ඛාය තිබ්‌බගාරවො.
Samādhigaru ātāpī, sikkhāya tibbagāravo.
‘‘කල්‍යාණමිත්‌තො සුවචො, සප්‌පතිස්‌සො සගාරවො;
‘‘Kalyāṇamitto suvaco, sappatisso sagāravo;
අභබ්‌බො පරිහානාය, නිබ්‌බානස්‌සෙව සන්‌තිකෙ’’ති. තතියං;
Abhabbo parihānāya, nibbānasseva santike’’ti. tatiyaṃ;
