| Library / Tipiṭaka / তিপিটক • Tipiṭaka / ৰিমানৰত্থু-অট্ঠকথা • Vimānavatthu-aṭṭhakathā |
৮. পঠমসূচিৰিমানৰণ্ণনা
8. Paṭhamasūcivimānavaṇṇanā
উচ্চমিদং মণিথূণং ৰিমানন্তি সূচিৰিমানং। তস্স কা উপ্পত্তি? ভগৰা রাজগহে ৰিহরতি ৰেল়ুৰনে। তেন সমযেন আযস্মতো সারিপুত্তস্স চীৰরকম্মং কাতব্বং হোতি, অত্থো চ হোতি সূচিযা। সো রাজগহে পিণ্ডায চরন্তো কম্মারস্স গেহদ্ৰারে অট্ঠাসি। তং দিস্ৰা কম্মারো আহ ‘‘কেন, ভন্তে, অত্থো’’তি? ‘‘চীৰরকম্মং কাতব্বং অত্থি, সূচিযা অত্থো’’তি। কম্মারো পসন্নমানসো কতপরিযোসিতা দ্ৰে সূচিযো দত্ৰা ‘‘পুনপি, ভন্তে, সূচিযা অত্থে সতি মম আচিক্খেয্যাথা’’তি ৰত্ৰা পঞ্চপতিট্ঠিতেন ৰন্দি। থেরো তস্স অনুমোদনং কত্ৰা পক্কামি। সো অপরভাগে কালং কত্ৰা তাৰতিংসেসু উপ্পজ্জি। অথ আযস্মা মহামোগ্গল্লানো দেৰচারিকং চরন্তো তং দেৰপুত্তং ইমাহি গাথাহি পুচ্ছি –
Uccamidaṃmaṇithūṇaṃ vimānanti sūcivimānaṃ. Tassa kā uppatti? Bhagavā rājagahe viharati veḷuvane. Tena samayena āyasmato sāriputtassa cīvarakammaṃ kātabbaṃ hoti, attho ca hoti sūciyā. So rājagahe piṇḍāya caranto kammārassa gehadvāre aṭṭhāsi. Taṃ disvā kammāro āha ‘‘kena, bhante, attho’’ti? ‘‘Cīvarakammaṃ kātabbaṃ atthi, sūciyā attho’’ti. Kammāro pasannamānaso katapariyositā dve sūciyo datvā ‘‘punapi, bhante, sūciyā atthe sati mama ācikkheyyāthā’’ti vatvā pañcapatiṭṭhitena vandi. Thero tassa anumodanaṃ katvā pakkāmi. So aparabhāge kālaṃ katvā tāvatiṃsesu uppajji. Atha āyasmā mahāmoggallāno devacārikaṃ caranto taṃ devaputtaṃ imāhi gāthāhi pucchi –
৯৪৪.
944.
‘‘উচ্চমিদং মণিথূণং ৰিমানং…পে॰…
‘‘Uccamidaṃ maṇithūṇaṃ vimānaṃ…pe…
ৰণ্ণো চ তে সব্বদিসা পভাসতী’’তি॥
Vaṇṇo ca te sabbadisā pabhāsatī’’ti.
৯৪৮. ‘‘সো দেৰপুত্তো অত্তমনো…পে॰… যস্স কম্মস্সিদং ফলং’’॥
948. ‘‘So devaputto attamano…pe… yassa kammassidaṃ phalaṃ’’.
৯৪৯.
949.
‘‘যং দদাতি ন তং হোতি, যঞ্চেৰ দজ্জা তঞ্চেৰ সেয্যো।
‘‘Yaṃ dadāti na taṃ hoti, yañceva dajjā tañceva seyyo;
সূচি দিন্না সূচিমেৰ সেয্যো॥
Sūci dinnā sūcimeva seyyo.
৯৫০.
950.
‘‘তেন মেতাদিসো ৰণ্ণো…পে॰…
‘‘Tena metādiso vaṇṇo…pe…
ৰণ্ণো চ মে সব্বদিসা পভাসতী’’তি॥
Vaṇṇo ca me sabbadisā pabhāsatī’’ti.
৯৪৯. তত্থ যং দদাতীতি যাদিসং দেয্যধম্মং দদাতি। ন তং হোতীতি তস্স তাদিসমেৰ ফলং ন হোতি। অথ খো খেত্তসম্পত্তিযা চ চিত্তসম্পত্তিযা চ ততো ৰিপুলতরং উল়ারতরমেৰ ফলং হোতি। তস্মা যঞ্চেৰ দজ্জা তঞ্চেৰ সেয্যোতি যংকিঞ্চিদেৰ ৰিজ্জমানং দজ্জা দদেয্য, তঞ্চেৰ তদেৰ সেয্যো, যস্স কস্সচি অনৰজ্জস্স দেয্যধম্মস্স দানমেৰ সেয্যো, কস্মা? মযা হি সূচি দিন্না সূচিমেৰ সেয্যো, সূচিদানমেৰ ময্হং সেয্যং জাতং, যতো অযমীদিসী সম্পত্তি লদ্ধাতি অধিপ্পাযো।
949. Tattha yaṃ dadātīti yādisaṃ deyyadhammaṃ dadāti. Na taṃ hotīti tassa tādisameva phalaṃ na hoti. Atha kho khettasampattiyā ca cittasampattiyā ca tato vipulataraṃ uḷāratarameva phalaṃ hoti. Tasmā yañceva dajjā tañceva seyyoti yaṃkiñcideva vijjamānaṃ dajjā dadeyya, tañceva tadeva seyyo, yassa kassaci anavajjassa deyyadhammassa dānameva seyyo, kasmā? Mayā hi sūci dinnā sūcimeva seyyo, sūcidānameva mayhaṃ seyyaṃ jātaṃ, yato ayamīdisī sampatti laddhāti adhippāyo.
সূচিৰিমানৰণ্ণনা নিট্ঠিতা।
Sūcivimānavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / ৰিমানৰত্থুপাল়ি • Vimānavatthupāḷi / ৮. পঠমসূচিৰিমানৰত্থু • 8. Paṭhamasūcivimānavatthu
