| Library / Tipiṭaka / ತಿಪಿಟಕ • Tipiṭaka / ವಿಮಾನವತ್ಥು-ಅಟ್ಠಕಥಾ • Vimānavatthu-aṭṭhakathā |
೮. ಪಠಮಸೂಚಿವಿಮಾನವಣ್ಣನಾ
8. Paṭhamasūcivimānavaṇṇanā
ಉಚ್ಚಮಿದಂ ಮಣಿಥೂಣಂ ವಿಮಾನನ್ತಿ ಸೂಚಿವಿಮಾನಂ। ತಸ್ಸ ಕಾ ಉಪ್ಪತ್ತಿ? ಭಗವಾ ರಾಜಗಹೇ ವಿಹರತಿ ವೇಳುವನೇ। ತೇನ ಸಮಯೇನ ಆಯಸ್ಮತೋ ಸಾರಿಪುತ್ತಸ್ಸ ಚೀವರಕಮ್ಮಂ ಕಾತಬ್ಬಂ ಹೋತಿ, ಅತ್ಥೋ ಚ ಹೋತಿ ಸೂಚಿಯಾ। ಸೋ ರಾಜಗಹೇ ಪಿಣ್ಡಾಯ ಚರನ್ತೋ ಕಮ್ಮಾರಸ್ಸ ಗೇಹದ್ವಾರೇ ಅಟ್ಠಾಸಿ। ತಂ ದಿಸ್ವಾ ಕಮ್ಮಾರೋ ಆಹ ‘‘ಕೇನ, ಭನ್ತೇ, ಅತ್ಥೋ’’ತಿ? ‘‘ಚೀವರಕಮ್ಮಂ ಕಾತಬ್ಬಂ ಅತ್ಥಿ, ಸೂಚಿಯಾ ಅತ್ಥೋ’’ತಿ। ಕಮ್ಮಾರೋ ಪಸನ್ನಮಾನಸೋ ಕತಪರಿಯೋಸಿತಾ ದ್ವೇ ಸೂಚಿಯೋ ದತ್ವಾ ‘‘ಪುನಪಿ, ಭನ್ತೇ, ಸೂಚಿಯಾ ಅತ್ಥೇ ಸತಿ ಮಮ ಆಚಿಕ್ಖೇಯ್ಯಾಥಾ’’ತಿ ವತ್ವಾ ಪಞ್ಚಪತಿಟ್ಠಿತೇನ ವನ್ದಿ। ಥೇರೋ ತಸ್ಸ ಅನುಮೋದನಂ ಕತ್ವಾ ಪಕ್ಕಾಮಿ। ಸೋ ಅಪರಭಾಗೇ ಕಾಲಂ ಕತ್ವಾ ತಾವತಿಂಸೇಸು ಉಪ್ಪಜ್ಜಿ। ಅಥ ಆಯಸ್ಮಾ ಮಹಾಮೋಗ್ಗಲ್ಲಾನೋ ದೇವಚಾರಿಕಂ ಚರನ್ತೋ ತಂ ದೇವಪುತ್ತಂ ಇಮಾಹಿ ಗಾಥಾಹಿ ಪುಚ್ಛಿ –
Uccamidaṃmaṇithūṇaṃ vimānanti sūcivimānaṃ. Tassa kā uppatti? Bhagavā rājagahe viharati veḷuvane. Tena samayena āyasmato sāriputtassa cīvarakammaṃ kātabbaṃ hoti, attho ca hoti sūciyā. So rājagahe piṇḍāya caranto kammārassa gehadvāre aṭṭhāsi. Taṃ disvā kammāro āha ‘‘kena, bhante, attho’’ti? ‘‘Cīvarakammaṃ kātabbaṃ atthi, sūciyā attho’’ti. Kammāro pasannamānaso katapariyositā dve sūciyo datvā ‘‘punapi, bhante, sūciyā atthe sati mama ācikkheyyāthā’’ti vatvā pañcapatiṭṭhitena vandi. Thero tassa anumodanaṃ katvā pakkāmi. So aparabhāge kālaṃ katvā tāvatiṃsesu uppajji. Atha āyasmā mahāmoggallāno devacārikaṃ caranto taṃ devaputtaṃ imāhi gāthāhi pucchi –
೯೪೪.
944.
‘‘ಉಚ್ಚಮಿದಂ ಮಣಿಥೂಣಂ ವಿಮಾನಂ…ಪೇ॰…
‘‘Uccamidaṃ maṇithūṇaṃ vimānaṃ…pe…
ವಣ್ಣೋ ಚ ತೇ ಸಬ್ಬದಿಸಾ ಪಭಾಸತೀ’’ತಿ॥
Vaṇṇo ca te sabbadisā pabhāsatī’’ti.
೯೪೮. ‘‘ಸೋ ದೇವಪುತ್ತೋ ಅತ್ತಮನೋ…ಪೇ॰… ಯಸ್ಸ ಕಮ್ಮಸ್ಸಿದಂ ಫಲಂ’’॥
948. ‘‘So devaputto attamano…pe… yassa kammassidaṃ phalaṃ’’.
೯೪೯.
949.
‘‘ಯಂ ದದಾತಿ ನ ತಂ ಹೋತಿ, ಯಞ್ಚೇವ ದಜ್ಜಾ ತಞ್ಚೇವ ಸೇಯ್ಯೋ।
‘‘Yaṃ dadāti na taṃ hoti, yañceva dajjā tañceva seyyo;
ಸೂಚಿ ದಿನ್ನಾ ಸೂಚಿಮೇವ ಸೇಯ್ಯೋ॥
Sūci dinnā sūcimeva seyyo.
೯೫೦.
950.
‘‘ತೇನ ಮೇತಾದಿಸೋ ವಣ್ಣೋ…ಪೇ॰…
‘‘Tena metādiso vaṇṇo…pe…
ವಣ್ಣೋ ಚ ಮೇ ಸಬ್ಬದಿಸಾ ಪಭಾಸತೀ’’ತಿ॥
Vaṇṇo ca me sabbadisā pabhāsatī’’ti.
೯೪೯. ತತ್ಥ ಯಂ ದದಾತೀತಿ ಯಾದಿಸಂ ದೇಯ್ಯಧಮ್ಮಂ ದದಾತಿ। ನ ತಂ ಹೋತೀತಿ ತಸ್ಸ ತಾದಿಸಮೇವ ಫಲಂ ನ ಹೋತಿ। ಅಥ ಖೋ ಖೇತ್ತಸಮ್ಪತ್ತಿಯಾ ಚ ಚಿತ್ತಸಮ್ಪತ್ತಿಯಾ ಚ ತತೋ ವಿಪುಲತರಂ ಉಳಾರತರಮೇವ ಫಲಂ ಹೋತಿ। ತಸ್ಮಾ ಯಞ್ಚೇವ ದಜ್ಜಾ ತಞ್ಚೇವ ಸೇಯ್ಯೋತಿ ಯಂಕಿಞ್ಚಿದೇವ ವಿಜ್ಜಮಾನಂ ದಜ್ಜಾ ದದೇಯ್ಯ, ತಞ್ಚೇವ ತದೇವ ಸೇಯ್ಯೋ, ಯಸ್ಸ ಕಸ್ಸಚಿ ಅನವಜ್ಜಸ್ಸ ದೇಯ್ಯಧಮ್ಮಸ್ಸ ದಾನಮೇವ ಸೇಯ್ಯೋ, ಕಸ್ಮಾ? ಮಯಾ ಹಿ ಸೂಚಿ ದಿನ್ನಾ ಸೂಚಿಮೇವ ಸೇಯ್ಯೋ, ಸೂಚಿದಾನಮೇವ ಮಯ್ಹಂ ಸೇಯ್ಯಂ ಜಾತಂ, ಯತೋ ಅಯಮೀದಿಸೀ ಸಮ್ಪತ್ತಿ ಲದ್ಧಾತಿ ಅಧಿಪ್ಪಾಯೋ।
949. Tattha yaṃ dadātīti yādisaṃ deyyadhammaṃ dadāti. Na taṃ hotīti tassa tādisameva phalaṃ na hoti. Atha kho khettasampattiyā ca cittasampattiyā ca tato vipulataraṃ uḷāratarameva phalaṃ hoti. Tasmā yañceva dajjā tañceva seyyoti yaṃkiñcideva vijjamānaṃ dajjā dadeyya, tañceva tadeva seyyo, yassa kassaci anavajjassa deyyadhammassa dānameva seyyo, kasmā? Mayā hi sūci dinnā sūcimeva seyyo, sūcidānameva mayhaṃ seyyaṃ jātaṃ, yato ayamīdisī sampatti laddhāti adhippāyo.
ಸೂಚಿವಿಮಾನವಣ್ಣನಾ ನಿಟ್ಠಿತಾ।
Sūcivimānavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ವಿಮಾನವತ್ಥುಪಾಳಿ • Vimānavatthupāḷi / ೮. ಪಠಮಸೂಚಿವಿಮಾನವತ್ಥು • 8. Paṭhamasūcivimānavatthu
