| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. பட²மஸுக்காஸுத்தவண்ணனா
9. Paṭhamasukkāsuttavaṇṇanā
243. நவமே ரதி²காய ரதி²கந்தி ஏகங் ரதி²கங் க³ஹெத்வா ததோ அபரங் க³ச்ச²ந்தோ ரதி²காய ரதி²கங் உபஸங்கமந்தோ நாம ஹோதி. ஸிங்கா⁴டகேபி ஏஸேவ நயோ. எத்த² ச ரதி²காதி ரச்சா². ஸிங்கா⁴டகந்தி சதுக்கங். கிங் மே கதாதி கிங் இமே கதா? கிங் கரொந்தீதி அத்தோ². மது⁴பீதாவ ஸேயரேதி க³ந்த⁴மது⁴பானங் பீதா விய ஸயந்தி. க³ந்த⁴மது⁴பானங் பீதோ கிர ஸீஸங் உக்கி²பிதுங் ந ஸக்கோதி, அஸஞ்ஞீ ஹுத்வா ஸயதேவ. தஸ்மா ஏவமாஹ.
243. Navame rathikāya rathikanti ekaṃ rathikaṃ gahetvā tato aparaṃ gacchanto rathikāya rathikaṃ upasaṅkamanto nāma hoti. Siṅghāṭakepi eseva nayo. Ettha ca rathikāti racchā. Siṅghāṭakanti catukkaṃ. Kiṃ me katāti kiṃ ime katā? Kiṃ karontīti attho. Madhupītāvaseyareti gandhamadhupānaṃ pītā viya sayanti. Gandhamadhupānaṃ pīto kira sīsaṃ ukkhipituṃ na sakkoti, asaññī hutvā sayateva. Tasmā evamāha.
தஞ்ச பன அப்படிவானீயந்தி தஞ்ச பன த⁴ம்மங் அப்படிவானீயங் தே³ஸேதி. பா³ஹிரகஞ்ஹி ஸுமது⁴ரம்பி போ⁴ஜனங் புனப்புனங் பு⁴ஞ்ஜந்தஸ்ஸ ந ருச்சதி, ‘‘அபனேத², கிங் இமினா’’தி? படிவானேதப்³ப³ங் அபனேதப்³ப³ங் ஹோதி, ந ஏவமயங் த⁴ம்மோ. இமங் ஹி த⁴ம்மங் பண்டி³தா வஸ்ஸஸதம்பி வஸ்ஸஸஹஸ்ஸம்பி ஸுணந்தா தித்திங் ந க³ச்ச²ந்தி. தேனாஹ ‘‘அப்படிவானீய’’ந்தி. அஸேசனகமோஜவந்தி அனாஸித்தகங் ஓஜவந்தங். யதா² ஹி பா³ஹிரானி அஸம்பி⁴ன்னபாயாஸாதீ³னிபி ஸப்பிமது⁴ஸக்க²ராஹி ஆஸித்தானி யோஜிதானேவ மது⁴ரானி ஓஜவந்தானி ஹொந்தி, ந ஏவமயங் த⁴ம்மோ. அயங் ஹி அத்தனோ த⁴ம்மதாய மது⁴ரோ சேவ ஓஜவா ச, ந அஞ்ஞேன உபஸித்தோ. தேனாஹ ‘‘அஸேசனகமோஜவ’’ந்தி. பிவந்தி மஞ்ஞே ஸப்பஞ்ஞாதி பண்டி³தபுரிஸா பிவந்தி விய. வலாஹகமேவ பந்த²கூ³தி வலாஹகந்தரதோ நிக்க²ந்தஉத³கங் க⁴ம்மாபி⁴தத்தா பதி²கா விய. நவமங்.
Tañca pana appaṭivānīyanti tañca pana dhammaṃ appaṭivānīyaṃ deseti. Bāhirakañhi sumadhurampi bhojanaṃ punappunaṃ bhuñjantassa na ruccati, ‘‘apanetha, kiṃ iminā’’ti? Paṭivānetabbaṃ apanetabbaṃ hoti, na evamayaṃ dhammo. Imaṃ hi dhammaṃ paṇḍitā vassasatampi vassasahassampi suṇantā tittiṃ na gacchanti. Tenāha ‘‘appaṭivānīya’’nti. Asecanakamojavanti anāsittakaṃ ojavantaṃ. Yathā hi bāhirāni asambhinnapāyāsādīnipi sappimadhusakkharāhi āsittāni yojitāneva madhurāni ojavantāni honti, na evamayaṃ dhammo. Ayaṃ hi attano dhammatāya madhuro ceva ojavā ca, na aññena upasitto. Tenāha ‘‘asecanakamojava’’nti. Pivanti maññe sappaññāti paṇḍitapurisā pivanti viya. Valāhakameva panthagūti valāhakantarato nikkhantaudakaṃ ghammābhitattā pathikā viya. Navamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. பட²மஸுக்காஸுத்தங் • 9. Paṭhamasukkāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. பட²மஸுக்காஸுத்தவண்ணனா • 9. Paṭhamasukkāsuttavaṇṇanā
