| Library / Tipiṭaka / തിപിടക • Tipiṭaka / സംയുത്തനികായ (ടീകാ) • Saṃyuttanikāya (ṭīkā) |
൯. പഠമസുക്കാസുത്തവണ്ണനാ
9. Paṭhamasukkāsuttavaṇṇanā
൨൪൩. രഥികന്തി രച്ഛം. ഗഹേത്വാതി ഗന്ത്വാ. സിങ്ഘാടകന്തി അഞ്ഞത്ഥ തികോണാ രച്ഛാ വുച്ചതി. ഇധ പന ‘‘ചതുക്ക’’ന്തി വുത്തം. ‘‘മധുപീകാ’’തി ഏത്ഥ മധു-സദ്ദേന മധുവിസേസോ വുച്ചതീതി ആഹ ‘‘ഗന്ധമധുപാനം പീതാ വിയാ’’തി. സാമഞ്ഞജോതനാ ഹി വിസേസേ തിട്ഠതീതി ഗന്ധമധൂതി ച അതിവിയ മധുരോ മദനിയോ ഏകോ മധുവിസേസോ. തേനാഹ ‘‘അസഞ്ഞീ ഹുത്വാ സയതേവാ’’തി.
243.Rathikanti racchaṃ. Gahetvāti gantvā. Siṅghāṭakanti aññattha tikoṇā racchā vuccati. Idha pana ‘‘catukka’’nti vuttaṃ. ‘‘Madhupīkā’’ti ettha madhu-saddena madhuviseso vuccatīti āha ‘‘gandhamadhupānaṃ pītā viyā’’ti. Sāmaññajotanā hi visese tiṭṭhatīti gandhamadhūti ca ativiya madhuro madaniyo eko madhuviseso. Tenāha ‘‘asaññī hutvā sayatevā’’ti.
ന പടിവാനീയം ന അപനേതബ്ബന്തി അപ്പടിവാനീയം. തേനാഹ ‘‘ബാഹിരകഞ്ഹീ’’തിആദി. യം കിഞ്ചി സന്തപണീതഭാവാവഹം ന സേചനന്തി അസേചനകം. തതോ ഏവ അനാസിത്തകം. ഓജവന്തന്തി ബഹുസമ്മതഓജവന്തസദിസതായ ഓജവന്തം. തേനാഹ ‘‘യഥാ ഹീ’’തിആദി. ധമ്മതായാതി അത്തനോ സഭാവേനേവ. മധുരോ ഇട്ഠോ. പിവന്തീ വിയാതി സുക്കായ ഭിക്ഖുനിയാ ഉപനീയമാനം സദ്ധമ്മാമതരസം അത്തനോ സോതഞ്ജലിം പൂരേത്വാ ഓദഹന്തീവ. വലാഹകതോ ആഗതം വലാഹകം.
Na paṭivānīyaṃ na apanetabbanti appaṭivānīyaṃ. Tenāha ‘‘bāhirakañhī’’tiādi. Yaṃ kiñci santapaṇītabhāvāvahaṃ na secananti asecanakaṃ. Tato eva anāsittakaṃ. Ojavantanti bahusammataojavantasadisatāya ojavantaṃ. Tenāha ‘‘yathā hī’’tiādi. Dhammatāyāti attano sabhāveneva. Madhuro iṭṭho. Pivantī viyāti sukkāya bhikkhuniyā upanīyamānaṃ saddhammāmatarasaṃ attano sotañjaliṃ pūretvā odahantīva. Valāhakato āgataṃ valāhakaṃ.
പഠമസുക്കാസുത്തവണ്ണനാ നിട്ഠിതാ.
Paṭhamasukkāsuttavaṇṇanā niṭṭhitā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / സംയുത്തനികായ • Saṃyuttanikāya / ൯. പഠമസുക്കാസുത്തം • 9. Paṭhamasukkāsuttaṃ
അട്ഠകഥാ • Aṭṭhakathā / സുത്തപിടക (അട്ഠകഥാ) • Suttapiṭaka (aṭṭhakathā) / സംയുത്തനികായ (അട്ഠകഥാ) • Saṃyuttanikāya (aṭṭhakathā) / ൯. പഠമസുക്കാസുത്തവണ്ണനാ • 9. Paṭhamasukkāsuttavaṇṇanā
