| Library / Tipiṭaka / ཏིཔིཊཀ • Tipiṭaka / ཝིམཱནཝཏྠུཔཱལི༹ • Vimānavatthupāḷi |
༡༣. པཋམསུཎིསཱཝིམཱནཝཏྠུ
13. Paṭhamasuṇisāvimānavatthu
༡༠༨.
108.
‘‘ཨབྷིཀྐནྟེན ཝཎྞེན, ཡཱ ཏྭཾ ཏིཊྛསི དེཝཏེ།
‘‘Abhikkantena vaṇṇena, yā tvaṃ tiṭṭhasi devate;
ཨོབྷཱསེནྟཱི དིསཱ སབྦཱ, ཨོསདྷཱི ཝིཡ ཏཱརཀཱ༎
Obhāsentī disā sabbā, osadhī viya tārakā.
༡༠༩.
109.
‘‘ཀེན ཏེཏཱདིསོ ཝཎྞོ, ཀེན ཏེ ཨིདྷ མིཛ྄ཛྷཏི།
‘‘Kena tetādiso vaṇṇo, kena te idha mijjhati;
ཨུཔྤཛྫནྟི ཙ ཏེ བྷོགཱ, ཡེ ཀེཙི མནསོ པིཡཱ༎
Uppajjanti ca te bhogā, ye keci manaso piyā.
༡༡༠.
110.
‘‘པུཙྪཱམི ཏཾ དེཝི མཧཱནུབྷཱཝེ, མནུསྶབྷཱུཏཱ ཀིམཀཱསི པུཉྙཾ།
‘‘Pucchāmi taṃ devi mahānubhāve, manussabhūtā kimakāsi puññaṃ;
ཀེནཱསི ཨེཝཾ ཛལིཏཱནུབྷཱཝཱ, ཝཎྞོ ཙ ཏེ སབྦདིསཱ པབྷཱསཏཱི’’ཏི༎
Kenāsi evaṃ jalitānubhāvā, vaṇṇo ca te sabbadisā pabhāsatī’’ti.
༡༡༡.
111.
སཱ དེཝཏཱ ཨཏྟམནཱ, མོགྒལླཱནེན པུཙྪིཏཱ།
Sā devatā attamanā, moggallānena pucchitā;
པཉྷཾ པུཊྛཱ ཝིཡཱཀཱསི, ཡསྶ ཀམྨསྶིདཾ ཕལཾ༎
Pañhaṃ puṭṭhā viyākāsi, yassa kammassidaṃ phalaṃ.
༡༡༢.
112.
‘‘ཨཧཾ མནུསྶེསུ མནུསྶབྷཱུཏཱ, སུཎིསཱ ཨཧོསིཾ སསུརསྶ གེཧེ 1༎
‘‘Ahaṃ manussesu manussabhūtā, suṇisā ahosiṃ sasurassa gehe 2.
༡༡༣.
113.
‘‘ཨདྡསཾ ཝིརཛཾ བྷིཀྑུཾ, ཝིཔྤསནྣམནཱཝིལཾ།
‘‘Addasaṃ virajaṃ bhikkhuṃ, vippasannamanāvilaṃ;
ཏསྶ ཨདཱསཧཾ པཱུཝཾ, པསནྣཱ སེཧི པཱཎིབྷི།
Tassa adāsahaṃ pūvaṃ, pasannā sehi pāṇibhi;
བྷཱགཌྜྷབྷཱགཾ དཏྭཱན, མོདཱམི ནནྡནེ ཝནེ༎
Bhāgaḍḍhabhāgaṃ datvāna, modāmi nandane vane.
༡༡༤.
114.
‘‘ཏེན མེཏཱདིསོ ཝཎྞོ, ཏེན མེ ཨིདྷ མིཛ྄ཛྷཏི།
‘‘Tena metādiso vaṇṇo, tena me idha mijjhati;
ཨུཔྤཛྫནྟི ཙ མེ བྷོགཱ, ཡེ ཀེཙི མནསོ པིཡཱ༎
Uppajjanti ca me bhogā, ye keci manaso piyā.
༡༡༥.
115.
‘‘ཨཀྑཱམི ཏེ བྷིཀྑུ མཧཱནུབྷཱཝ, མནུསྶབྷཱུཏཱ ཡམཀཱསི པུཉྙཾ།
‘‘Akkhāmi te bhikkhu mahānubhāva, manussabhūtā yamakāsi puññaṃ;
ཏེནམྷི ཨེཝཾ ཛལིཏཱནུབྷཱཝཱ, ཝཎྞོ ཙ མེ སབྦདིསཱ པབྷཱསཏཱི’’ཏི༎
Tenamhi evaṃ jalitānubhāvā, vaṇṇo ca me sabbadisā pabhāsatī’’ti.
པཋམསུཎིསཱཝིམཱནཾ ཏེརསམཾ།
Paṭhamasuṇisāvimānaṃ terasamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཁུདྡཀནིཀཱཡ (ཨཊྛཀཐཱ) • Khuddakanikāya (aṭṭhakathā) / ཝིམཱནཝཏྠུ-ཨཊྛཀཐཱ • Vimānavatthu-aṭṭhakathā / ༡༣. པཋམསུཎིསཱཝིམཱནཝཎྞནཱ • 13. Paṭhamasuṇisāvimānavaṇṇanā
