| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
4. инд̣̇рияагат̇аа
4. Indriyakathā
1. батамасуд̇д̇анд̇анид̣̇д̣̇зсаван̣н̣анаа
1. Paṭhamasuttantaniddesavaṇṇanā
184. ид̣̇аани аанаабаанассад̇игат̇аананд̇арам̣ гат̇ид̇ааяа инд̣̇рияагат̇ааяа абуб̣б̣ад̇т̇аануван̣н̣анаа ануббад̇д̇аа. аяан̃хи инд̣̇рияагат̇аа аанаабаанассад̇ибхааванааяа убагаарагаанам̣ инд̣̇рияаанам̣ абхаавз аанаабаанассад̇ибхааванааяа абхаавад̇о д̇ад̣̇убагаарагаанам̣ инд̣̇рияаанам̣ висод̇ханаад̣̇ивид̇хид̣̇ассанад̇т̇ам̣ аанаабаанассад̇игат̇аананд̇арам̣ гат̇ид̇аад̇и д̇ан̃жа гат̇зд̇аб̣б̣ам̣ инд̣̇рияагат̇ам̣ ад̇д̇анаа бхаг̇авад̇о саммукаа суд̇ам̣ вин̃н̃аад̇аад̇хиббааяасуд̇д̇анд̇игад̣̇зсанам̣ буб̣б̣ан̇г̇амам̣ гад̇ваа д̇ад̣̇ад̇т̇аббагаасанавасзна гат̇зд̇угаамо батамам̣ д̇аава звам̣ мз суд̇анд̇иаад̣̇имааха.
184. Idāni ānāpānassatikathānantaraṃ kathitāya indriyakathāya apubbatthānuvaṇṇanā anuppattā. Ayañhi indriyakathā ānāpānassatibhāvanāya upakārakānaṃ indriyānaṃ abhāve ānāpānassatibhāvanāya abhāvato tadupakārakānaṃ indriyānaṃ visodhanādividhidassanatthaṃ ānāpānassatikathānantaraṃ kathitāti tañca kathetabbaṃ indriyakathaṃ attanā bhagavato sammukhā sutaṃ viññātādhippāyasuttantikadesanaṃ pubbaṅgamaṃ katvā tadatthappakāsanavasena kathetukāmo paṭhamaṃ tāva evaṃ me sutantiādimāha.
д̇ад̇т̇а званд̇и нибаад̇абад̣̇ам̣. мзд̇иаад̣̇ийни наамабад̣̇аани. вихарад̇ийд̇и зд̇т̇а ви-ид̇и убасаг̇г̇абад̣̇ам̣, харад̇ийд̇и аакяаад̇абад̣̇анд̇и иминаа д̇аава наязна бад̣̇авибхааг̇о взд̣̇ид̇аб̣б̣о.
Tattha evanti nipātapadaṃ. Metiādīni nāmapadāni. Viharatīti ettha vi-iti upasaggapadaṃ, haratīti ākhyātapadanti iminā tāva nayena padavibhāgo veditabbo.
ад̇т̇ад̇о бана убамуубад̣̇зсаг̇арахабасам̣санаагаараважанаг̇г̇ахан̣зсу звам̣-сад̣̇д̣̇о д̣̇иссад̇и нид̣̇ассанад̇т̇з жа авад̇хааран̣ад̇т̇з жа. ид̇ха бана звам̣сад̣̇д̣̇о аагаарад̇т̇з нид̣̇ассанад̇т̇з жа вин̃н̃уж̇анзна бавуд̇д̇о, д̇ат̇зва авад̇хааран̣ад̇т̇з жа.
Atthato pana upamūpadesagarahapasaṃsanākāravacanaggahaṇesu evaṃ-saddo dissati nidassanatthe ca avadhāraṇatthe ca. Idha pana evaṃsaddo ākāratthe nidassanatthe ca viññujanena pavutto, tatheva avadhāraṇatthe ca.
д̇ад̇т̇а аагаарад̇т̇зна звам̣сад̣̇д̣̇зна зд̇амад̇т̇ам̣ д̣̇ийбзд̇и – наанаанаяанибун̣аманзгаж̇жхаасаяасамудтаанам̣ ад̇т̇аб̣яан̃ж̇анасамбаннам̣ вивид̇хабаадихаарияам̣ д̇хаммад̇т̇ад̣̇зсанаабадивзд̇хаг̇амбхийрам̣ саб̣б̣асад̇д̇аанам̣ сагасагабхаасаануруубад̇о сод̇абат̇амааг̇ажчанд̇ам̣ д̇асса бхаг̇авад̇о важанам̣ саб̣б̣аббагаарзна го самад̇т̇о вин̃н̃аад̇ум̣, саб̣б̣ат̇аамзна бана сод̇угаамад̇ам̣ ж̇анзд̇вааби звам̣ мз суд̇ам̣, маяааби згзнаагаарзна суд̇анд̇и.
Tattha ākāratthena evaṃsaddena etamatthaṃ dīpeti – nānānayanipuṇamanekajjhāsayasamuṭṭhānaṃ atthabyañjanasampannaṃ vividhapāṭihāriyaṃ dhammatthadesanāpaṭivedhagambhīraṃ sabbasattānaṃ sakasakabhāsānurūpato sotapathamāgacchantaṃ tassa bhagavato vacanaṃ sabbappakārena ko samattho viññātuṃ, sabbathāmena pana sotukāmataṃ janetvāpi evaṃ me sutaṃ, mayāpi ekenākārena sutanti.
нид̣̇ассанад̇т̇зна ‘‘наахам̣ саяамбхуу, на маяаа ид̣̇ам̣ сажчигад̇а’’нд̇и ад̇д̇аанам̣ бариможзнд̇о ‘‘звам̣ мз суд̇ам̣, маяааби звам̣ суд̇а’’нд̇и ид̣̇аани вад̇д̇аб̣б̣ам̣ сагалам̣ суд̇д̇ам̣ нид̣̇ассзд̇и.
Nidassanatthena ‘‘nāhaṃ sayambhū, na mayā idaṃ sacchikata’’nti attānaṃ parimocento ‘‘evaṃ me sutaṃ, mayāpi evaṃ suta’’nti idāni vattabbaṃ sakalaṃ suttaṃ nidasseti.
авад̇хааран̣ад̇т̇зна т̇зро саарибуд̇д̇о ‘‘зд̇ад̣̇аг̇г̇ам̣, бхигкавз, мама саавагаанам̣ бхигкуунам̣ махаабан̃н̃аанам̣ яад̣̇ид̣̇ам̣ саарибуд̇д̇о’’д̇и (а. ни. 1.188-189), ‘‘наахам̣, бхигкавз, ан̃н̃ам̣ згабуг̇г̇аламби саманубассаами, яо звам̣ д̇ат̇ааг̇ад̇зна ануд̇д̇арам̣ д̇хаммажаггам̣ бавад̇д̇ид̇ам̣ саммад̣̇зва ануббавад̇д̇зд̇и яат̇аяид̣̇ам̣, бхигкавз, саарибуд̇д̇о. саарибуд̇д̇о, бхигкавз, д̇ат̇ааг̇ад̇зна ануд̇д̇арам̣ д̇хаммажаггам̣ бавад̇д̇ид̇ам̣ саммад̣̇зва ануббавад̇д̇зд̇ий’’д̇извамаад̣̇инаа (а. ни. 1.187) наязна бхаг̇авад̇аа басад̇т̇абхааваануруубам̣ ад̇д̇ано д̇хааран̣аб̣алам̣ д̣̇ассзнд̇о сад̇д̇аанам̣ сод̇угаамад̇ам̣ ж̇анзд̇и ‘‘звам̣ мз суд̇ам̣, д̇ан̃жа ко ад̇т̇ад̇о ваа б̣яан̃ж̇анад̇о ваа ануунаманад̇хигам̣, звамзва, на ан̃н̃ат̇аа д̣̇адтаб̣б̣а’’нд̇и.
Avadhāraṇatthena thero sāriputto ‘‘etadaggaṃ, bhikkhave, mama sāvakānaṃ bhikkhūnaṃ mahāpaññānaṃ yadidaṃ sāriputto’’ti (a. ni. 1.188-189), ‘‘nāhaṃ, bhikkhave, aññaṃ ekapuggalampi samanupassāmi, yo evaṃ tathāgatena anuttaraṃ dhammacakkaṃ pavattitaṃ sammadeva anuppavatteti yathayidaṃ, bhikkhave, sāriputto. Sāriputto, bhikkhave, tathāgatena anuttaraṃ dhammacakkaṃ pavattitaṃ sammadeva anuppavattetī’’tievamādinā (a. ni. 1.187) nayena bhagavatā pasatthabhāvānurūpaṃ attano dhāraṇabalaṃ dassento sattānaṃ sotukāmataṃ janeti ‘‘evaṃ me sutaṃ, tañca kho atthato vā byañjanato vā anūnamanadhikaṃ, evameva, na aññathā daṭṭhabba’’nti.
мзсад̣̇д̣̇о гаран̣асамбад̣̇аанасаамиад̇т̇зсу д̣̇иссад̇и. ид̇ха бана ‘‘маяаа суд̇ам̣, мама суд̇а’’нд̇и жа ад̇т̇ад̣̇ваяз яуж̇ж̇ад̇и.
Mesaddo karaṇasampadānasāmiatthesu dissati. Idha pana ‘‘mayā sutaṃ, mama suta’’nti ca atthadvaye yujjati.
суд̇анд̇и аяам̣сад̣̇д̣̇о саубасаг̇г̇о анубасаг̇г̇о жа виссуд̇аг̇аманагилиннаубажид̇аануяог̇асод̇авин̃н̃зяязсу д̣̇иссад̇и вин̃н̃аад̇зби жа сод̇ад̣̇ваараанусаарзна. ид̇ха банасса сод̇ад̣̇ваараанусаарзна убад̇хаарид̇анд̇и ваа убад̇хааран̣анд̇и ваа ад̇т̇о. мз-сад̣̇д̣̇асса хи маяаад̇иад̇т̇з сад̇и ‘‘звам̣ маяаа суд̇ам̣ сод̇ад̣̇ваараанусаарзна убад̇хаарид̇а’’нд̇и яуж̇ж̇ад̇и, мамаад̇иад̇т̇з сад̇и ‘‘звам̣ мама суд̇ам̣ сод̇ад̣̇ваараанусаарзна убад̇хааран̣а’’нд̇и яуж̇ж̇ад̇и.
Sutanti ayaṃsaddo saupasaggo anupasaggo ca vissutagamanakilinnaupacitaanuyogasotaviññeyyesu dissati viññātepi ca sotadvārānusārena. Idha panassa sotadvārānusārena upadhāritanti vā upadhāraṇanti vā attho. Me-saddassa hi mayātiatthe sati ‘‘evaṃ mayā sutaṃ sotadvārānusārena upadhārita’’nti yujjati, mamātiatthe sati ‘‘evaṃ mama sutaṃ sotadvārānusārena upadhāraṇa’’nti yujjati.
абижа ‘‘звам̣ мз суд̇а’’нд̇и ад̇д̇анаа уббаад̣̇ид̇абхаавам̣ аббадиж̇аананд̇о буримасаванам̣ виваранд̇о ‘‘саммукаа бадиг̇г̇ахид̇амид̣̇ам̣ маяаа д̇асса бхаг̇авад̇о жад̇увзсаараж̇ж̇ависаарад̣̇асса д̣̇асаб̣алад̇харасса аасабхадтаанадтааяино сийханаад̣̇анаад̣̇ино саб̣б̣асад̇д̇уд̇д̇амасса д̇хаммиссарасса д̇хаммарааж̇асса д̇хаммаад̇хибад̇ино д̇хаммад̣̇ийбасса д̇хаммасаран̣асса сад̣̇д̇хаммаваражаггавад̇д̇ино саммаасамб̣уд̣̇д̇хасса важанам̣, на зд̇т̇а ад̇т̇з ваа д̇хаммз ваа бад̣̇з ваа б̣яан̃ж̇анз ваа ган̇каа ваа вимад̇и ваа гаад̇аб̣б̣аа’’д̇и имасмим̣ д̇хаммз ассад̣̇д̇хияам̣ винаасзд̇и, сад̣̇д̇хаасамбад̣̇ам̣ уббаад̣̇зд̇ийд̇и. д̇знзд̇ам̣ вужжад̇и –
Apica ‘‘evaṃ me suta’’nti attanā uppāditabhāvaṃ appaṭijānanto purimasavanaṃ vivaranto ‘‘sammukhā paṭiggahitamidaṃ mayā tassa bhagavato catuvesārajjavisāradassa dasabaladharassa āsabhaṭṭhānaṭṭhāyino sīhanādanādino sabbasattuttamassa dhammissarassa dhammarājassa dhammādhipatino dhammadīpassa dhammasaraṇassa saddhammavaracakkavattino sammāsambuddhassa vacanaṃ, na ettha atthe vā dhamme vā pade vā byañjane vā kaṅkhā vā vimati vā kātabbā’’ti imasmiṃ dhamme assaddhiyaṃ vināseti, saddhāsampadaṃ uppādetīti. Tenetaṃ vuccati –
‘‘винаасаяад̇и ассад̣̇д̇хам̣, сад̣̇д̇хам̣ вад̣дхзд̇и саасанз;
‘‘Vināsayati assaddhaṃ, saddhaṃ vaḍḍheti sāsane;
звам̣ мз суд̇амижжзвам̣, вад̣̇ам̣ г̇од̇амасааваго’’д̇и.
Evaṃ me sutamiccevaṃ, vadaṃ gotamasāvako’’ti.
зганд̇и г̇ан̣анабарижчзд̣̇анид̣̇д̣̇зсо. самаяанд̇и барижчиннанид̣̇д̣̇зсо. згам̣ самаяанд̇и анияамид̇абарид̣̇ийбанам̣. д̇ад̇т̇а самаяасад̣̇д̣̇о –
Ekanti gaṇanaparicchedaniddeso. Samayanti paricchinnaniddeso. Ekaṃ samayanti aniyamitaparidīpanaṃ. Tattha samayasaddo –
самавааяз кан̣з гаалз, самуухз хзд̇уд̣̇идтису;
Samavāye khaṇe kāle, samūhe hetudiṭṭhisu;
бадилаабхз бахаанз жа, бадивзд̇хз жа д̣̇иссад̇и.
Paṭilābhe pahāne ca, paṭivedhe ca dissati.
ид̇ха банасса гаало ад̇т̇о. д̇зна сам̣важчарауд̇умаасад̣̇д̇хамаасарад̇д̇инд̣̇ивабуб̣б̣ан̣хамаж̇жханхигасааяанхабатама- маж̇жхимабажчимаяаамамухуд̇д̇аад̣̇ийсу гаалаббабхзд̣̇абхууд̇зсу самаязсу згам̣ самаяанд̇и д̣̇ийбзд̇и.
Idha panassa kālo attho. Tena saṃvaccharautumāsaddhamāsarattindivapubbaṇhamajjhanhikasāyanhapaṭhama- majjhimapacchimayāmamuhuttādīsu kālappabhedabhūtesu samayesu ekaṃ samayanti dīpeti.
д̇ад̇т̇а гин̃жааби зд̇зсу сам̣важчараад̣̇ийсу самаязсу яам̣ яам̣ суд̇д̇ам̣ яамхи яамхи сам̣важчарз уд̇умхи маасз багкз рад̇д̇ибхааг̇з д̣̇ивасабхааг̇з ваа вуд̇д̇ам̣, саб̣б̣ам̣ д̇ам̣ т̇зрасса сувид̣̇ид̇ам̣ сувавад̇т̇аабид̇ам̣ бан̃н̃ааяа. яасмаа бана ‘‘звам̣ мз суд̇ам̣ асугасам̣важчарз асугауд̇умхи асугамаасз асугабагкз асугарад̇д̇ибхааг̇з асугад̣̇ивасабхааг̇з ваа’’д̇и звам̣ вуд̇д̇з на саггаа сукзна д̇хаарзд̇ум̣ ваа уд̣̇д̣̇исид̇ум̣ ваа уд̣̇д̣̇исаабзд̇ум̣ ваа, б̣аху жа вад̇д̇аб̣б̣ам̣ ход̇и, д̇асмаа згзнзва бад̣̇зна д̇амад̇т̇ам̣ самод̇хаанзд̇ваа ‘‘згам̣ самаяа’’нд̇и ааха.
Tattha kiñcāpi etesu saṃvaccharādīsu samayesu yaṃ yaṃ suttaṃ yamhi yamhi saṃvacchare utumhi māse pakkhe rattibhāge divasabhāge vā vuttaṃ, sabbaṃ taṃ therassa suviditaṃ suvavatthāpitaṃ paññāya. Yasmā pana ‘‘evaṃ me sutaṃ asukasaṃvacchare asukautumhi asukamāse asukapakkhe asukarattibhāge asukadivasabhāge vā’’ti evaṃ vutte na sakkā sukhena dhāretuṃ vā uddisituṃ vā uddisāpetuṃ vā, bahu ca vattabbaṃ hoti, tasmā ekeneva padena tamatthaṃ samodhānetvā ‘‘ekaṃ samaya’’nti āha.
яз ваа имз г̇аб̣бхогганд̇исамаяо ж̇аад̇исамаяо сам̣взг̇асамаяо абхинигкаманасамаяо д̣̇уггарагааригасамаяо мааравиж̇аяасамаяо абхисамб̣од̇хисамаяо д̣̇идтад̇хаммасукавихаарасамаяо д̣̇зсанаасамаяо бариниб̣б̣аанасамаяод̇извамаад̣̇аяо бхаг̇авад̇о д̣̇звамануссзсу ад̇ивияа багаасаа анзгагаалаббабхзд̣̇аа зва самаяаа, д̇зсу самаязсу д̣̇зсанаасамаяасан̇каад̇ам̣ згам̣ самаяанд̇и д̣̇ийбзд̇и. яо жааяам̣ н̃аан̣агарун̣аагижжасамаязсу гарун̣аагижжасамаяо, ад̇д̇ахид̇абарахид̇абадибад̇д̇исамаязсу барахид̇абадибад̇д̇исамаяо, саннибад̇ид̇аанам̣ гаран̣ийяад̣̇ваяасамаязсу д̇хаммигат̇аасамаяо, д̣̇зсанаабадибад̇д̇исамаязсу д̣̇зсанаасамаяо, д̇зсуби самаязсу ан̃н̃ад̇арам̣ самаяам̣ санд̇хааяа ‘‘згам̣ самаяа’’нд̇и ааха.
Ye vā ime gabbhokkantisamayo jātisamayo saṃvegasamayo abhinikkhamanasamayo dukkarakārikasamayo māravijayasamayo abhisambodhisamayo diṭṭhadhammasukhavihārasamayo desanāsamayo parinibbānasamayotievamādayo bhagavato devamanussesu ativiya pakāsā anekakālappabhedā eva samayā, tesu samayesu desanāsamayasaṅkhātaṃ ekaṃ samayanti dīpeti. Yo cāyaṃ ñāṇakaruṇākiccasamayesu karuṇākiccasamayo, attahitaparahitapaṭipattisamayesu parahitapaṭipattisamayo, sannipatitānaṃ karaṇīyadvayasamayesu dhammikathāsamayo, desanāpaṭipattisamayesu desanāsamayo, tesupi samayesu aññataraṃ samayaṃ sandhāya ‘‘ekaṃ samaya’’nti āha.
яасмаа бана ‘‘згам̣ самаяа’’нд̇и ажжанд̇асам̣яог̇ад̇т̇о самбхавад̇и. яан̃хи самаяам̣ бхаг̇аваа имам̣ ан̃н̃ам̣ ваа суд̇д̇анд̇ам̣ д̣̇зсзси, ажжанд̇амзва д̇ам̣ самаяам̣ гарун̣аавихаарзна вихааси, д̇асмаа д̇ад̣̇ад̇т̇аж̇од̇анад̇т̇ам̣ ид̇ха убаяог̇аважананид̣̇д̣̇зсо гад̇од̇и.
Yasmā pana ‘‘ekaṃ samaya’’nti accantasaṃyogattho sambhavati. Yañhi samayaṃ bhagavā imaṃ aññaṃ vā suttantaṃ desesi, accantameva taṃ samayaṃ karuṇāvihārena vihāsi, tasmā tadatthajotanatthaṃ idha upayogavacananiddeso katoti.
д̇знзд̇ам̣ вужжад̇и –
Tenetaṃ vuccati –
‘‘д̇ам̣ д̇ам̣ ад̇т̇амабзгкид̇ваа, бхуммзна гаран̣зна жа;
‘‘Taṃ taṃ atthamapekkhitvā, bhummena karaṇena ca;
ан̃н̃ад̇ра самаяо вуд̇д̇о, убаяог̇зна со ид̇хаа’’д̇и.
Aññatra samayo vutto, upayogena so idhā’’ti.
бораан̣аа бана ван̣н̣аяанд̇и – ‘‘д̇асмим̣ самаяз’’д̇и ваа ‘‘д̇зна самаязнаа’’д̇и ваа ‘‘д̇ам̣ самаяа’’нд̇и ваа абхилаабамад̇д̇абхзд̣̇о зса, саб̣б̣ад̇т̇а бхуммамзвад̇т̇од̇и. д̇асмаа ‘‘згам̣ самаяа’’нд̇и вуд̇д̇зби ‘‘згасмим̣ самаяз’’д̇и ад̇т̇о взд̣̇ид̇аб̣б̣о.
Porāṇā pana vaṇṇayanti – ‘‘tasmiṃ samaye’’ti vā ‘‘tena samayenā’’ti vā ‘‘taṃ samaya’’nti vā abhilāpamattabhedo esa, sabbattha bhummamevatthoti. Tasmā ‘‘ekaṃ samaya’’nti vuttepi ‘‘ekasmiṃ samaye’’ti attho veditabbo.
бхаг̇аваад̇и г̇ару. г̇арун̃хи логз ‘‘бхаг̇аваа’’д̇и вад̣̇анд̇и. аяан̃жа саб̣б̣аг̇ун̣ависидтад̇ааяа саб̣б̣асад̇д̇аанам̣ г̇ару, д̇асмаа ‘‘бхаг̇аваа’’д̇и взд̣̇ид̇аб̣б̣о. бораан̣зхиби вуд̇д̇ам̣ –
Bhagavāti garu. Garuñhi loke ‘‘bhagavā’’ti vadanti. Ayañca sabbaguṇavisiṭṭhatāya sabbasattānaṃ garu, tasmā ‘‘bhagavā’’ti veditabbo. Porāṇehipi vuttaṃ –
‘‘бхаг̇аваад̇и важанам̣ сздтам̣, бхаг̇аваад̇и важанамуд̇д̇амам̣;
‘‘Bhagavāti vacanaṃ seṭṭhaṃ, bhagavāti vacanamuttamaṃ;
г̇ару г̇аараваяуд̇д̇о со, бхаг̇аваа д̇зна вужжад̇ий’’д̇и.
Garu gāravayutto so, bhagavā tena vuccatī’’ti.
абижа –
Apica –
‘‘бхааг̇яаваа бхаг̇г̇аваа яуд̇д̇о, бхаг̇зхи жа вибхад̇д̇аваа;
‘‘Bhāgyavā bhaggavā yutto, bhagehi ca vibhattavā;
бхад̇д̇аваа ванд̇аг̇амано, бхавзсу бхаг̇аваа д̇ад̇о’’д̇и. –
Bhattavā vantagamano, bhavesu bhagavā tato’’ti. –
имиссааби г̇аат̇ааяа васзна асса бад̣̇асса вид̇т̇аарад̇о ад̇т̇о взд̣̇ид̇аб̣б̣о. со жа висуд̣̇д̇химаг̇г̇з б̣уд̣̇д̇хаануссад̇инид̣̇д̣̇зсз (висуд̣̇д̇хи. 1.123 аад̣̇аяо) вуд̇д̇оязва.
Imissāpi gāthāya vasena assa padassa vitthārato attho veditabbo. So ca visuddhimagge buddhānussatiniddese (visuddhi. 1.123 ādayo) vuttoyeva.
зд̇д̇аавад̇аа жзд̇т̇а званд̇и важанзна д̣̇зсанаасамбад̇д̇им̣ нид̣̇д̣̇исад̇и, мз суд̇анд̇и саавагасамбад̇д̇им̣, згам̣ самаяанд̇и гааласамбад̇д̇им̣, бхаг̇аваад̇и д̣̇зсагасамбад̇д̇им̣.
Ettāvatā cettha evanti vacanena desanāsampattiṃ niddisati, me sutanti sāvakasampattiṃ, ekaṃ samayanti kālasampattiṃ, bhagavāti desakasampattiṃ.
саавад̇т̇ияанд̇и зд̇т̇а жа савад̇т̇асса исино ниваасадтаанабхууд̇аа наг̇арий саавад̇т̇ий, яат̇аа гааганд̣̇ий мааганд̣̇ийд̇и звам̣ д̇аава агкаражинд̇агаа. адтагат̇аажарияаа бана бхан̣анд̇и – яам̣ гин̃жи мануссаанам̣ убабхог̇абарибхог̇ам̣ саб̣б̣амзд̇т̇а ад̇т̇ийд̇и саавад̇т̇ий, сад̇т̇асамааяог̇з жа гим̣ бхан̣д̣амад̇т̇ийд̇и бужчид̇з саб̣б̣амад̇т̇ийд̇иби важанамубаад̣̇ааяа саавад̇т̇ий.
Sāvatthiyanti ettha ca savatthassa isino nivāsaṭṭhānabhūtā nagarī sāvatthī, yathā kākandī mākandīti evaṃ tāva akkharacintakā. Aṭṭhakathācariyā pana bhaṇanti – yaṃ kiñci manussānaṃ upabhogaparibhogaṃ sabbamettha atthīti sāvatthī, satthasamāyoge ca kiṃ bhaṇḍamatthīti pucchite sabbamatthītipi vacanamupādāya sāvatthī.
‘‘саб̣б̣ад̣̇аа саб̣б̣уубагаран̣ам̣, саавад̇т̇ияам̣ самохид̇ам̣;
‘‘Sabbadā sabbūpakaraṇaṃ, sāvatthiyaṃ samohitaṃ;
д̇асмаа саб̣б̣амубаад̣̇ааяа, саавад̇т̇ийд̇и бавужжад̇ий’’д̇и. –
Tasmā sabbamupādāya, sāvatthīti pavuccatī’’ti. –
д̇ассам̣ саавад̇т̇ияам̣. самийбад̇т̇з бхуммаважанам̣. вихарад̇ийд̇и ависзсзна ирияаабат̇ад̣̇иб̣б̣аб̣рахмаарияавихаарзсу ан̃н̃ад̇аравихаарасаман̇г̇ибарид̣̇ийбанамзд̇ам̣, ид̇ха бана таанаг̇аманаасанасаяанаббабхзд̣̇зсу ирияаабат̇зсу ан̃н̃ад̇араирияаабат̇асамааяог̇абарид̣̇ийбанам̣. д̇зна тид̇оби г̇ажчанд̇оби нисинноби саяааноби бхаг̇аваа ‘‘вихарад̇и’’жжзва взд̣̇ид̇аб̣б̣о. со хи бхаг̇аваа згам̣ ирияаабат̇аб̣аад̇ханам̣ ан̃н̃зна ирияаабат̇зна вижчинд̣̇ид̇ваа абарибад̇анд̇амад̇д̇абхаавам̣ харад̇и бавад̇д̇зд̇и, д̇асмаа ‘‘вихарад̇ий’’д̇и вужжад̇и.
Tassaṃ sāvatthiyaṃ. Samīpatthe bhummavacanaṃ. Viharatīti avisesena iriyāpathadibbabrahmaariyavihāresu aññataravihārasamaṅgiparidīpanametaṃ, idha pana ṭhānagamanāsanasayanappabhedesu iriyāpathesu aññatarairiyāpathasamāyogaparidīpanaṃ. Tena ṭhitopi gacchantopi nisinnopi sayānopi bhagavā ‘‘viharati’’cceva veditabbo. So hi bhagavā ekaṃ iriyāpathabādhanaṃ aññena iriyāpathena vicchinditvā aparipatantamattabhāvaṃ harati pavatteti, tasmā ‘‘viharatī’’ti vuccati.
ж̇зд̇аванзд̇и зд̇т̇а ад̇д̇ано бажжад̇т̇игаж̇анам̣ ж̇инаад̇ийд̇и ж̇зд̇о, ран̃н̃о ваа ад̇д̇ано бажжад̇т̇игаж̇анз ж̇ид̇з ж̇аад̇од̇и ж̇зд̇о, ман̇г̇алагамяад̇ааяа ваа д̇асса звам̣наамамзва гад̇анд̇и ж̇зд̇о, ванаяад̇ийд̇и ванам̣, ад̇д̇асамбад̣̇ааяа сад̇д̇аанам̣ бхад̇д̇им̣ гаарзд̇и, ад̇д̇ани синзхам̣ уббаад̣̇зд̇ийд̇и ад̇т̇о. вануд̇з ид̇и ваа ванам̣, наанаавид̇хагусумаг̇анд̇хасаммод̣̇амад̇д̇агогилаад̣̇ивихан̇г̇аабхируд̇зхи манд̣̇амааруд̇ажалид̇аругкасаакаавидабабаллавабалаасзхи ‘‘зт̇а мам̣ барибхун̃ж̇ат̇аа’’д̇и баан̣ино яаажад̇и вияаад̇и ад̇т̇о. ж̇зд̇асса ванам̣ ж̇зд̇аванам̣. д̇ан̃хи ж̇зд̇зна рааж̇агумаарзна робид̇ам̣ сам̣вад̣̇д̇хид̇ам̣ барибаалид̇ам̣, со жа д̇асса саамий ахоси, д̇асмаа ж̇зд̇авананд̇и вужжад̇и. д̇асмим̣ ж̇зд̇аванз. ванан̃жа наама робимам̣ саяам̣ж̇аад̇анд̇и д̣̇увид̇хам̣. ид̣̇ан̃жа взл̣уванаад̣̇ийни жа робимаани, анд̇хаванамахааванаад̣̇ийни саяам̣ж̇аад̇аани.
Jetavaneti ettha attano paccatthikajanaṃ jinātīti jeto, rañño vā attano paccatthikajane jite jātoti jeto, maṅgalakamyatāya vā tassa evaṃnāmameva katanti jeto, vanayatīti vanaṃ, attasampadāya sattānaṃ bhattiṃ kāreti, attani sinehaṃ uppādetīti attho. Vanute iti vā vanaṃ, nānāvidhakusumagandhasammodamattakokilādivihaṅgābhirutehi mandamārutacalitarukkhasākhāviṭapapallavapalāsehi ‘‘etha maṃ paribhuñjathā’’ti pāṇino yācati viyāti attho. Jetassa vanaṃ jetavanaṃ. Tañhi jetena rājakumārena ropitaṃ saṃvaddhitaṃ paripālitaṃ, so ca tassa sāmī ahosi, tasmā jetavananti vuccati. Tasmiṃ jetavane. Vanañca nāma ropimaṃ sayaṃjātanti duvidhaṃ. Idañca veḷuvanādīni ca ropimāni, andhavanamahāvanādīni sayaṃjātāni.
анаат̇абин̣д̣игасса аараамзд̇и суд̣̇ад̇д̇о наама со г̇ахабад̇и маад̇аабид̇уухи гад̇анаамавасзна. саб̣б̣агаамасамид̣̇д̇хад̇ааяа бана виг̇ад̇амажчзрад̇ааяа гарун̣аад̣̇иг̇ун̣асаман̇г̇ид̇ааяа жа нижжагаалам̣ анаат̇аанам̣ бин̣д̣амад̣̇ааси, д̇зна анаат̇абин̣д̣игод̇и сан̇кам̣ г̇ад̇о. аараманд̇и зд̇т̇а баан̣ино, висзсзна ваа баб̣б̣аж̇ид̇аад̇и аараамо, д̇асса бубпапалаад̣̇исобхааяа наад̇ид̣̇ууранажжаасаннад̇аад̣̇ибан̃жавид̇хасзнаасанан̇г̇асамбад̇д̇ияаа жа д̇ад̇о д̇ад̇о ааг̇амма раманд̇и абхираманд̇и, анугган̣тид̇аа худ̇ваа нивасанд̇ийд̇и ад̇т̇о. вуд̇д̇аббагаарааяа ваа самбад̇д̇ияаа д̇ад̇т̇а д̇ад̇т̇а г̇ад̇зби ад̇д̇ано аб̣бханд̇арам̣ аанзд̇ваа рамаабзд̇ийд̇и аараамо. со хи анаат̇абин̣д̣игзна г̇ахабад̇инаа ж̇зд̇асса рааж̇агумаарасса хад̇т̇ад̇о адтаарасахи хиран̃н̃агодийхи годисант̇арзна гийн̣ид̇ваа адтаарасахи хиран̃н̃агодийхи сзнаасанаани гаараабзд̇ваа адтаарасахи хиран̃н̃агодийхи вихаарамахам̣ нидтаабзд̇ваа звам̣ жад̇убан̃н̃аасахиран̃н̃агодибарижжааг̇зна б̣уд̣̇д̇хаббамукасса бхигкусан̇гхасса нияяаад̣̇ид̇о, д̇асмаа ‘‘анаат̇абин̣д̣игасса аараамо’’д̇и вужжад̇и. д̇асмим̣ анаат̇абин̣д̣игасса аараамз.
Anāthapiṇḍikassa ārāmeti sudatto nāma so gahapati mātāpitūhi katanāmavasena. Sabbakāmasamiddhatāya pana vigatamaccheratāya karuṇādiguṇasamaṅgitāya ca niccakālaṃ anāthānaṃ piṇḍamadāsi, tena anāthapiṇḍikoti saṅkhaṃ gato. Āramanti ettha pāṇino, visesena vā pabbajitāti ārāmo, tassa pupphaphalādisobhāya nātidūranaccāsannatādipañcavidhasenāsanaṅgasampattiyā ca tato tato āgamma ramanti abhiramanti, anukkaṇṭhitā hutvā nivasantīti attho. Vuttappakārāya vā sampattiyā tattha tattha gatepi attano abbhantaraṃ ānetvā ramāpetīti ārāmo. So hi anāthapiṇḍikena gahapatinā jetassa rājakumārassa hatthato aṭṭhārasahi hiraññakoṭīhi koṭisantharena kīṇitvā aṭṭhārasahi hiraññakoṭīhi senāsanāni kārāpetvā aṭṭhārasahi hiraññakoṭīhi vihāramahaṃ niṭṭhāpetvā evaṃ catupaññāsahiraññakoṭipariccāgena buddhappamukhassa bhikkhusaṅghassa niyyādito, tasmā ‘‘anāthapiṇḍikassa ārāmo’’ti vuccati. Tasmiṃ anāthapiṇḍikassa ārāme.
зд̇т̇а жа ‘‘ж̇зд̇аванз’’д̇иважанам̣ буримасаамибаригид̇д̇анам̣, ‘‘анаат̇абин̣д̣игасса аараамз’’д̇и бажчимасаамибаригид̇д̇анам̣. гимзд̇зсам̣ баригид̇д̇анз баяож̇ананд̇и? бун̃н̃агаамаанам̣ д̣̇идтаануг̇ад̇иаабаж̇ж̇анам̣. д̇ад̇т̇а хи д̣̇ваарагодтагабаасаад̣̇амаабанз бхуумивиггаяалад̣̇д̇хаа адтаараса хиран̃н̃агодияо анзгагодиаг̇гханагаа ругкаа жа ж̇зд̇асса барижжааг̇о, жад̇убан̃н̃ааса хиран̃н̃агодияо анаат̇абин̣д̣игасса . ид̇и д̇зсам̣ баригид̇д̇анзна звам̣ бун̃н̃агаамаа бун̃н̃аани гаронд̇ийд̇и д̣̇ассзнд̇о ааяасмаа саарибуд̇д̇о ан̃н̃зби бун̃н̃агаамз д̇зсам̣ д̣̇идтаануг̇ад̇иаабаж̇ж̇анз нияож̇зд̇и.
Ettha ca ‘‘jetavane’’tivacanaṃ purimasāmiparikittanaṃ, ‘‘anāthapiṇḍikassa ārāme’’ti pacchimasāmiparikittanaṃ. Kimetesaṃ parikittane payojananti? Puññakāmānaṃ diṭṭhānugatiāpajjanaṃ. Tattha hi dvārakoṭṭhakapāsādamāpane bhūmivikkayaladdhā aṭṭhārasa hiraññakoṭiyo anekakoṭiagghanakā rukkhā ca jetassa pariccāgo, catupaññāsa hiraññakoṭiyo anāthapiṇḍikassa . Iti tesaṃ parikittanena evaṃ puññakāmā puññāni karontīti dassento āyasmā sāriputto aññepi puññakāme tesaṃ diṭṭhānugatiāpajjane niyojeti.
д̇ад̇т̇а сияаа – яад̣̇и д̇аава бхаг̇аваа саавад̇т̇ияам̣ вихарад̇и, ‘‘ж̇зд̇аванз анаат̇абин̣д̣игасса аараамз’’д̇и на вад̇д̇аб̣б̣ам̣. ат̇а д̇ад̇т̇а вихарад̇и, ‘‘саавад̇т̇ияа’’нд̇и на вад̇д̇аб̣б̣ам̣. на хи саггаа убхаяад̇т̇а згам̣ самаяам̣ вихарид̇унд̇и. на ко банзд̇ам̣ звам̣ д̣̇адтаб̣б̣ам̣, нану авожумха ‘‘самийбад̇т̇з бхуммаважана’’нд̇и. д̇асмаа яат̇аа г̇ан̇г̇ааяамунаад̣̇ийнам̣ самийбз г̇ояуут̇аани жаранд̇аани ‘‘г̇ан̇г̇ааяа жаранд̇и, яамунааяа жаранд̇ий’’д̇и вужжанд̇и, звамид̇хааби яад̣̇ид̣̇ам̣ саавад̇т̇ияаа самийбз ж̇зд̇аванам̣ анаат̇абин̣д̣игасса аараамо, д̇ад̇т̇а вихаранд̇о вужжад̇и ‘‘саавад̇т̇ияам̣ вихарад̇и ж̇зд̇аванз анаат̇абин̣д̣игасса аараамз’’д̇и. г̇ожараг̇ааманид̣̇ассанад̇т̇ам̣ хисса саавад̇т̇иважанам̣, баб̣б̣аж̇ид̇аануруубаниваасадтаананид̣̇ассанад̇т̇ам̣ сзсаважанам̣.
Tattha siyā – yadi tāva bhagavā sāvatthiyaṃ viharati, ‘‘jetavane anāthapiṇḍikassa ārāme’’ti na vattabbaṃ. Atha tattha viharati, ‘‘sāvatthiya’’nti na vattabbaṃ. Na hi sakkā ubhayattha ekaṃ samayaṃ viharitunti. Na kho panetaṃ evaṃ daṭṭhabbaṃ, nanu avocumha ‘‘samīpatthe bhummavacana’’nti. Tasmā yathā gaṅgāyamunādīnaṃ samīpe goyūthāni carantāni ‘‘gaṅgāya caranti, yamunāya carantī’’ti vuccanti, evamidhāpi yadidaṃ sāvatthiyā samīpe jetavanaṃ anāthapiṇḍikassa ārāmo, tattha viharanto vuccati ‘‘sāvatthiyaṃ viharati jetavane anāthapiṇḍikassa ārāme’’ti. Gocaragāmanidassanatthaṃ hissa sāvatthivacanaṃ, pabbajitānurūpanivāsaṭṭhānanidassanatthaṃ sesavacanaṃ.
д̇ад̇т̇а саавад̇т̇игид̇д̇анзна ааяасмаа саарибуд̇д̇о бхаг̇авад̇о г̇ахадтаануг̇г̇ахагаран̣ам̣ д̣̇ассзд̇и, ж̇зд̇аванаад̣̇игид̇д̇анзна баб̣б̣аж̇ид̇аануг̇г̇ахагаран̣ам̣. д̇ат̇аа буримзна бажжаяаг̇г̇ахан̣ад̇о ад̇д̇агиламат̇аануяог̇авиваж̇ж̇анам̣, бажчимзна вад̇т̇угаамаббахаанад̇о гаамасукаллигаануяог̇авиваж̇ж̇ануубааяам̣. ат̇а ваа буримзна жа д̇хаммад̣̇зсанаабхияог̇ам̣, бажчимзна вивзгаад̇химуд̇д̇им̣. буримзна гарун̣ааяа убаг̇аманам̣, бажчимзна бан̃н̃ааяа абаг̇аманам̣. буримзна сад̇д̇аанам̣ хид̇асуканибпаад̣̇анаад̇химуд̇д̇ад̇ам̣, бажчимзна барахид̇асукагаран̣з нирубалзбад̇ам̣. буримзна д̇хаммигасукаабарижжааг̇анимид̇д̇ам̣ паасувихаарам̣, бажчимзна уд̇д̇аримануссад̇хаммаануяог̇анимид̇д̇ам̣. буримзна мануссаанам̣ убагаараб̣ахулад̇ам̣, бажчимзна д̣̇зваанам̣. буримзна логз ж̇аад̇асса логз сам̣вад̣̇д̇хабхаавам̣, бажчимзна логзна анубалид̇д̇ад̇ам̣. буримзна ‘‘згабуг̇г̇ало, бхигкавз, логз уббаж̇ж̇амаано уббаж̇ж̇ад̇и б̣ахуж̇анахид̇ааяа б̣ахуж̇анасукааяа логаанугамбааяа ад̇т̇ааяа хид̇ааяа сукааяа д̣̇звамануссаанам̣. гад̇амо згабуг̇г̇ало? д̇ат̇ааг̇ад̇о арахам̣ саммаасамб̣уд̣̇д̇хо’’д̇и (а. ни. 1.170) важанад̇о яад̣̇ад̇т̇ам̣ бхаг̇аваа уббанно, д̇ад̣̇ад̇т̇абарид̣̇ийбанам̣, бажчимзна яад̇т̇а уббанно, д̇ад̣̇ануруубавихаарабарид̣̇ийбанам̣. бхаг̇аваа хи батамам̣ лумб̣иниванз, д̣̇уд̇ияам̣ б̣од̇химан̣д̣зд̇и логияалогуд̇д̇арасса уббад̇д̇ияаа ванзязва уббанно, д̇знасса ванзязва вихаарам̣ д̣̇ассзд̇ийд̇и звамаад̣̇инаа наязнзд̇т̇а ад̇т̇аяож̇анаа взд̣̇ид̇аб̣б̣аа.
Tattha sāvatthikittanena āyasmā sāriputto bhagavato gahaṭṭhānuggahakaraṇaṃ dasseti, jetavanādikittanena pabbajitānuggahakaraṇaṃ. Tathā purimena paccayaggahaṇato attakilamathānuyogavivajjanaṃ, pacchimena vatthukāmappahānato kāmasukhallikānuyogavivajjanūpāyaṃ. Atha vā purimena ca dhammadesanābhiyogaṃ, pacchimena vivekādhimuttiṃ. Purimena karuṇāya upagamanaṃ, pacchimena paññāya apagamanaṃ. Purimena sattānaṃ hitasukhanipphādanādhimuttataṃ, pacchimena parahitasukhakaraṇe nirupalepataṃ. Purimena dhammikasukhāpariccāganimittaṃ phāsuvihāraṃ, pacchimena uttarimanussadhammānuyoganimittaṃ. Purimena manussānaṃ upakārabahulataṃ, pacchimena devānaṃ. Purimena loke jātassa loke saṃvaddhabhāvaṃ, pacchimena lokena anupalittataṃ. Purimena ‘‘ekapuggalo, bhikkhave, loke uppajjamāno uppajjati bahujanahitāya bahujanasukhāya lokānukampāya atthāya hitāya sukhāya devamanussānaṃ. Katamo ekapuggalo? Tathāgato arahaṃ sammāsambuddho’’ti (a. ni. 1.170) vacanato yadatthaṃ bhagavā uppanno, tadatthaparidīpanaṃ, pacchimena yattha uppanno, tadanurūpavihāraparidīpanaṃ. Bhagavā hi paṭhamaṃ lumbinivane, dutiyaṃ bodhimaṇḍeti lokiyalokuttarassa uppattiyā vaneyeva uppanno, tenassa vaneyeva vihāraṃ dassetīti evamādinā nayenettha atthayojanā veditabbā.
д̇ад̇раад̇и д̣̇зсагаалабарид̣̇ийбанам̣. д̇ан̃хи яам̣ самаяам̣ вихарад̇и, д̇ад̇ра самаяз, яасмин̃жа ж̇зд̇аванз вихарад̇и, д̇ад̇ра ж̇зд̇аванзд̇и д̣̇ийбзд̇и. бхаасид̇аб̣б̣аяуд̇д̇з ваа д̣̇зсагаалз д̣̇ийбзд̇и. на хи бхаг̇аваа аяуд̇д̇з д̣̇зсз гаалз ваа д̇хаммам̣ д̣̇зсзд̇и. ‘‘агаало ко д̇аава б̣аахияаа’’д̇иаад̣̇и (уд̣̇аа. 10) жзд̇т̇а саад̇хагам̣. код̇и бад̣̇абууран̣амад̇д̇з авад̇хааран̣ад̇т̇з аад̣̇игаалад̇т̇з ваа нибаад̇о. бхаг̇аваад̇и логаг̇аруд̣̇ийбанам̣. бхигкууд̇и гат̇аасаванаяуд̇д̇абуг̇г̇алаважанам̣. абижзд̇т̇а ‘‘бхигкагод̇и бхигку, бхигкаажарияам̣ аж̇жхубаг̇ад̇од̇и бхигкуу’’д̇иаад̣̇инаа (вибха. 510; баараа. 45) наязна важанад̇т̇о взд̣̇ид̇аб̣б̣о. ааманд̇зсийд̇и аалаби абхааси самб̣од̇хзси, аяамзд̇т̇а ад̇т̇о. ан̃н̃ад̇ра бана н̃аабанзби баггосанзби. бхигкавод̇и ааманд̇анаагаарад̣̇ийбанам̣. д̇зна д̇зсам̣ бхигкуунам̣ бхигканасийлад̇аабхигканад̇хаммад̇аабхигканзсаад̇хугаарид̇аад̣̇иг̇ун̣аяог̇асид̣̇д̇хзна важанзна хийнаад̇хигаж̇анасзвид̇ам̣ вуд̇д̇им̣ багаасзнд̇о уд̣̇д̇хад̇ад̣̇ийнабхааваниг̇г̇ахам̣ гарод̇и. ‘‘бхигкаво’’д̇и иминаа жа гарун̣аавибпаарасоммахад̣̇аяанаяананибаад̇абуб̣б̣ан̇г̇амзна важанзна д̇з ад̇д̇ано мукаабхимукз гаронд̇о д̇знзва гат̇зд̇угамяад̇аад̣̇ийбагзна важанзна нзсам̣ сод̇угамяад̇ам̣ ж̇анзд̇и. д̇знзва жа самб̣од̇ханад̇т̇зна важанзна саад̇хугасаванаманасигаарзби д̇з нияож̇зд̇и. саад̇хугасаванаманасигаарааяад̇д̇аа хи саасанасамбад̇д̇и.
Tatrāti desakālaparidīpanaṃ. Tañhi yaṃ samayaṃ viharati, tatra samaye, yasmiñca jetavane viharati, tatra jetavaneti dīpeti. Bhāsitabbayutte vā desakāle dīpeti. Na hi bhagavā ayutte dese kāle vā dhammaṃ deseti. ‘‘Akālo kho tāva bāhiyā’’tiādi (udā. 10) cettha sādhakaṃ. Khoti padapūraṇamatte avadhāraṇatthe ādikālatthe vā nipāto. Bhagavāti lokagarudīpanaṃ. Bhikkhūti kathāsavanayuttapuggalavacanaṃ. Apicettha ‘‘bhikkhakoti bhikkhu, bhikkhācariyaṃ ajjhupagatoti bhikkhū’’tiādinā (vibha. 510; pārā. 45) nayena vacanattho veditabbo. Āmantesīti ālapi abhāsi sambodhesi, ayamettha attho. Aññatra pana ñāpanepi pakkosanepi. Bhikkhavoti āmantanākāradīpanaṃ. Tena tesaṃ bhikkhūnaṃ bhikkhanasīlatābhikkhanadhammatābhikkhanesādhukāritādiguṇayogasiddhena vacanena hīnādhikajanasevitaṃ vuttiṃ pakāsento uddhatadīnabhāvaniggahaṃ karoti. ‘‘Bhikkhavo’’ti iminā ca karuṇāvipphārasommahadayanayananipātapubbaṅgamena vacanena te attano mukhābhimukhe karonto teneva kathetukamyatādīpakena vacanena nesaṃ sotukamyataṃ janeti. Teneva ca sambodhanatthena vacanena sādhukasavanamanasikārepi te niyojeti. Sādhukasavanamanasikārāyattā hi sāsanasampatti.
абарзсу д̣̇звамануссзсу виж̇ж̇амаанзсу гасмаа бхигкууязва ааманд̇зсийд̇и жз? ж̇здтасздтаасаннасад̣̇аасаннихид̇абхааж̇анабхаавад̇о. саб̣б̣абарисасаад̇хааран̣аа хи бхаг̇авад̇о д̇хаммад̣̇зсанаа. барисааяа жа ж̇здтаа бхигкуу батамуббаннад̇д̇аа, сздтаа анаг̇аарияабхаавам̣ аад̣̇им̣ гад̇ваа сад̇т̇у жарияаанувид̇хааяагад̇д̇аа сагаласаасанабадиг̇г̇аахагад̇д̇аа жа, аасаннаа д̇ад̇т̇а нисиннзсу сад̇т̇усаннигад̇д̇аа, сад̣̇аасаннихид̇аа сад̇т̇усанд̇игааважарад̇д̇аа, д̇хаммад̣̇зсанааяа жа д̇з зва бхааж̇анам̣ яат̇аанусидтам̣ бадибад̇д̇исаб̣бхаавад̇о.
Aparesu devamanussesu vijjamānesu kasmā bhikkhūyeva āmantesīti ce? Jeṭṭhaseṭṭhāsannasadāsannihitabhājanabhāvato. Sabbaparisasādhāraṇā hi bhagavato dhammadesanā. Parisāya ca jeṭṭhā bhikkhū paṭhamuppannattā, seṭṭhā anagāriyabhāvaṃ ādiṃ katvā satthu cariyānuvidhāyakattā sakalasāsanapaṭiggāhakattā ca, āsannā tattha nisinnesu satthusannikattā, sadāsannihitā satthusantikāvacarattā, dhammadesanāya ca te eva bhājanaṃ yathānusiṭṭhaṃ paṭipattisabbhāvato.
д̇ад̇т̇а сияаа – гимад̇т̇ам̣ бана бхаг̇аваа д̇хаммам̣ д̣̇зсзнд̇о батамам̣ бхигкуу ааманд̇зси, на д̇хаммамзва д̣̇зсзсийд̇и? сад̇иж̇ананад̇т̇ам̣. барисааяа хи бхигкуу ан̃н̃ам̣ жинд̇знд̇ааби вигкид̇д̇ажид̇д̇ааби д̇хаммам̣ бажжавзгканд̇ааби гаммадтаанам̣ манасигаронд̇ааби нисиннаа хонд̇и, д̇з анааманд̇зд̇ваа д̇хаммз д̣̇зсияамаанз ‘‘аяам̣ д̣̇зсанаа гим̣нид̣̇аанаа гим̣бажжаяаа гад̇амааяа ад̇т̇уббад̇д̇ияаа д̣̇зсид̇аа’’д̇и саллагкзд̇ум̣ асаггонд̇аа вигкзбам̣ аабаж̇ж̇зяяум̣, д̣̇уг̇г̇ахид̇ам̣ ваа г̇ан̣хзяяум̣ . д̇зна д̇зсам̣ сад̇иж̇ананад̇т̇ам̣ бхаг̇аваа батамам̣ ааманд̇зд̇ваа бажчаа д̇хаммам̣ д̣̇зсзд̇и.
Tattha siyā – kimatthaṃ pana bhagavā dhammaṃ desento paṭhamaṃ bhikkhū āmantesi, na dhammameva desesīti? Satijananatthaṃ. Parisāya hi bhikkhū aññaṃ cintentāpi vikkhittacittāpi dhammaṃ paccavekkhantāpi kammaṭṭhānaṃ manasikarontāpi nisinnā honti, te anāmantetvā dhamme desiyamāne ‘‘ayaṃ desanā kiṃnidānā kiṃpaccayā katamāya atthuppattiyā desitā’’ti sallakkhetuṃ asakkontā vikkhepaṃ āpajjeyyuṃ, duggahitaṃ vā gaṇheyyuṃ . Tena tesaṃ satijananatthaṃ bhagavā paṭhamaṃ āmantetvā pacchā dhammaṃ deseti.
бхад̣̇анд̇зд̇и г̇аарававажанамзд̇ам̣, сад̇т̇уно бадиважанад̣̇аанам̣ ваа. абижзд̇т̇а ‘‘бхигкаво’’д̇и вад̣̇амаано бхаг̇аваа д̇з бхигкуу аалабад̇и, ‘‘бхад̣̇анд̇з’’д̇и вад̣̇амаанаа д̇з бхаг̇аванд̇ам̣ бажжаалабанд̇и. д̇ат̇аа ‘‘бхигкаво’’д̇и бхаг̇аваа аабхаасад̇и, ‘‘бхад̣̇анд̇з’’д̇и д̇з бажжаабхаасанд̇и. ‘‘бхигкаво’’д̇и бадиважанам̣ д̣̇аабзд̇и, бхад̣̇анд̇зд̇и бадиважанам̣ д̣̇знд̇и. д̇з бхигкууд̇и яз бхаг̇аваа ааманд̇зси. бхаг̇авад̇о бажжассосунд̇и бхаг̇авад̇о ааманд̇анам̣ бадиассосум̣, абхимукаа худ̇ваа сун̣им̣су самбадижчим̣су бадиг̇г̇ахзсунд̇и ад̇т̇о. бхаг̇аваа зд̇ад̣̇авожаад̇и бхаг̇аваа зд̇ам̣ ид̣̇аани вад̇д̇аб̣б̣ам̣ сагаласуд̇д̇ам̣ авожа.
Bhadanteti gāravavacanametaṃ, satthuno paṭivacanadānaṃ vā. Apicettha ‘‘bhikkhavo’’ti vadamāno bhagavā te bhikkhū ālapati, ‘‘bhadante’’ti vadamānā te bhagavantaṃ paccālapanti. Tathā ‘‘bhikkhavo’’ti bhagavā ābhāsati, ‘‘bhadante’’ti te paccābhāsanti. ‘‘Bhikkhavo’’ti paṭivacanaṃ dāpeti, bhadanteti paṭivacanaṃ denti. Te bhikkhūti ye bhagavā āmantesi. Bhagavato paccassosunti bhagavato āmantanaṃ paṭiassosuṃ, abhimukhā hutvā suṇiṃsu sampaṭicchiṃsu paṭiggahesunti attho. Bhagavā etadavocāti bhagavā etaṃ idāni vattabbaṃ sakalasuttaṃ avoca.
зд̇д̇аавад̇аа жа яам̣ ааяасмад̇аа саарибуд̇д̇зна гамалагувалаяуж̇ж̇алавималасаад̣̇урасасалилааяа богкаран̣ияаа сукаавад̇аран̣ад̇т̇ам̣ ниммаласилаад̇аларажанавилаасасобаанам̣ виббагин̣н̣амуд̇д̇ааж̇ааласад̣̇исаваалигаагин̣н̣абан̣д̣арабхуумибхааг̇ам̣ д̇ид̇т̇ам̣ вияа, сувибхад̇д̇абхид̇д̇ивижид̇равзд̣̇игаабаригкид̇д̇асса нагкад̇д̇абат̇ам̣ пусид̇угаамад̇ааяа вияа, виж̇амбхид̇асамуссаяасса баасаад̣̇аварасса сукаарохан̣ад̇т̇ам̣ д̣̇анд̇амаяасан̣хамуд̣̇упалагаган̃жаналад̇аавинад̣̇д̇хаман̣иг̇ан̣аббабхаасамуд̣̇аяуж̇ж̇аласобхам̣ собаанам̣ вияа, суван̣н̣авалаяануубураад̣̇исан̇гхадданасад̣̇д̣̇асаммиссид̇агат̇ид̇ахасид̇амад̇хурассараг̇зхаж̇анавижарид̇асса ул̣аариссарияавибхавасобхид̇асса махаагхарасса сукаббавзсанад̇т̇ам̣ суван̣н̣араж̇ад̇аман̣имуд̇д̇аабаваал̣аад̣̇иж̇уд̇ивисад̣̇авиж̇ж̇од̇ид̇асуббад̇идтид̇ависаалад̣̇ваарагаваадам̣ махаад̣̇ваарам̣ вияа ад̇т̇аб̣яан̃ж̇анасамбаннасса б̣уд̣̇д̇хаанам̣ д̣̇зсанаан̃аан̣аг̇амбхийрабхаавасам̣суужагасса имасса суд̇д̇асса сукааваг̇аахан̣ад̇т̇ам̣ гаалад̣̇зсад̣̇зсагабарисаабад̣̇зсабадиман̣д̣ид̇ам̣ нид̣̇аанам̣ бхаасид̇ам̣, д̇асса ад̇т̇аван̣н̣анаа самад̇д̇аа.
Ettāvatā ca yaṃ āyasmatā sāriputtena kamalakuvalayujjalavimalasādurasasalilāya pokkharaṇiyā sukhāvataraṇatthaṃ nimmalasilātalaracanavilāsasopānaṃ vippakiṇṇamuttājālasadisavālikākiṇṇapaṇḍarabhūmibhāgaṃ titthaṃ viya, suvibhattabhittivicitravedikāparikkhittassa nakkhattapathaṃ phusitukāmatāya viya, vijambhitasamussayassa pāsādavarassa sukhārohaṇatthaṃ dantamayasaṇhamuduphalakakañcanalatāvinaddhamaṇigaṇappabhāsamudayujjalasobhaṃ sopānaṃ viya, suvaṇṇavalayanūpurādisaṅghaṭṭanasaddasammissitakathitahasitamadhurassaragehajanavicaritassa uḷārissariyavibhavasobhitassa mahāgharassa sukhappavesanatthaṃ suvaṇṇarajatamaṇimuttāpavāḷādijutivisadavijjotitasuppatiṭṭhitavisāladvārakavāṭaṃ mahādvāraṃ viya atthabyañjanasampannassa buddhānaṃ desanāñāṇagambhīrabhāvasaṃsūcakassa imassa suttassa sukhāvagāhaṇatthaṃ kāladesadesakaparisāpadesapaṭimaṇḍitaṃ nidānaṃ bhāsitaṃ, tassa atthavaṇṇanā samattā.
суд̇д̇анд̇з бан̃жаад̇и г̇ан̣анабарижчзд̣̇о. имаани инд̣̇рияаанийд̇и барижчиннад̇хамманид̣̇ассанам̣. инд̣̇рияадто хздтаа вуд̇д̇о.
Suttante pañcāti gaṇanaparicchedo. Imāni indriyānīti paricchinnadhammanidassanaṃ. Indriyaṭṭho heṭṭhā vutto.
185. ид̣̇аани имам̣ суд̇д̇анд̇ам̣ д̣̇ассзд̇ваа имасмим̣ суд̇д̇анд̇з вуд̇д̇аанам̣ инд̣̇рияаанам̣ висуд̣̇д̇хибхааванаавид̇хаанам̣ бхаавид̇ад̇д̇ам̣ бадиббассад̣̇д̇хин̃жа д̣̇ассзд̇угаамо имаани бан̃жинд̣̇рияаанийд̇иаад̣̇имааха. д̇ад̇т̇а висуж̇жханд̇ийд̇и висуд̣̇д̇хим̣ баабун̣анд̇и. ассад̣̇д̇хзд̇и д̇ийсу рад̇анзсу сад̣̇д̇хаавирахид̇з. сад̣̇д̇хзд̇и д̇ийсу рад̇анзсу сад̣̇д̇хаасамбаннз. сзвад̇од̇и жид̇д̇зна сзванд̇асса. бхаж̇ад̇од̇и убасан̇гаманд̇асса. баяирубаасад̇од̇и саггажжам̣ убанисийд̣̇анд̇асса. басаад̣̇анийяз суд̇д̇анд̇зд̇и басаад̣̇аж̇анагз рад̇анад̇д̇аяаг̇ун̣абадисам̣яуд̇д̇з суд̇д̇анд̇з. гусийд̇зд̇и гужчид̇зна аагаарзна сийд̣̇анд̇ийд̇и гусийд̣̇аа, гусийд̣̇аа зва гусийд̇аа. д̇з гусийд̇з. саммаббад̇хаанзд̇и жад̇угижжасаад̇хагавийрияабадисам̣яуд̇д̇асуд̇д̇анд̇з. мудтассад̇ийд̇и надтассад̇игз. сад̇ибадтаанзд̇и сад̇ибадтаанаад̇хигаарагз суд̇д̇анд̇з. жхаанавимогкзд̇и жад̇уд̇т̇аж̇жхаанаадтавимогкад̇ивид̇хавимогкаад̇хигаарагз суд̇д̇анд̇з. д̣̇уббан̃н̃зд̇и ниббан̃н̃з, бан̃н̃аабхаавад̇о ваа д̣̇удтаа бан̃н̃аа зд̇зсанд̇и д̣̇уббан̃н̃аа. д̇з д̣̇уббан̃н̃з. г̇амбхийран̃аан̣ажарияанд̇и жад̇усажжабадижжасамуббаад̣̇аад̣̇ибадисам̣яуд̇д̇з суд̇д̇анд̇з, н̃аан̣агат̇аасад̣̇исз ваа. суд̇д̇анд̇агканд̇хзд̇и суд̇д̇анд̇агодтаасз. ассад̣̇д̇хияанд̇иаад̣̇ийсу ассад̣̇д̇хияанд̇и ассад̣̇д̇хабхаавам̣. ассад̣̇д̇хияз аад̣̇ийнавад̣̇ассаавий ассад̣̇д̇хияам̣ баж̇аханд̇о сад̣̇д̇хинд̣̇рияам̣ бхаавзд̇и, сад̣̇д̇хинд̣̇рияз аанисам̣сад̣̇ассаавий сад̣̇д̇хинд̣̇рияам̣ бхаавзнд̇о ассад̣̇д̇хияам̣ баж̇ахад̇и. зса наяо сзсзсу. госаж̇ж̇анд̇и гусийд̇абхаавам̣. бамаад̣̇анд̇и сад̇ивиббаваасам̣. уд̣̇д̇хажжанд̇и уд̣̇д̇хад̇абхаавам̣, вигкзбанд̇и ад̇т̇о. бахийнад̇д̇аад̇и аббанаавасзна жхаанабаарибуурияаа бахийнад̇д̇аа. суббахийнад̇д̇аад̇и вудтаанаг̇ааминивасзна вибассанаабаарибуурияаа судту бахийнад̇д̇аа. бхаавид̇ам̣ ход̇и субхаавид̇анд̇и вуд̇д̇аггамзнзва яож̇зд̇аб̣б̣ам̣. вибассанааяа хи вибагкавасзна бахийнад̇д̇аа ‘‘суббахийнад̇д̇аа’’д̇и вад̇д̇ум̣ яуж̇ж̇ад̇и. д̇асмааязва жа ‘‘субхаавид̇а’’нд̇и, на д̇ат̇аа жхаанзна. яасмаа бана бахаад̇аб̣б̣аанам̣ бахаанзна бхааванаасид̣̇д̇хи, бхааванаасид̣̇д̇хияаа жа бахаад̇аб̣б̣аанам̣ бахаанасид̣̇д̇хи ход̇и, д̇асмаа яамагам̣ гад̇ваа нид̣̇д̣̇идтам̣.
185. Idāni imaṃ suttantaṃ dassetvā imasmiṃ suttante vuttānaṃ indriyānaṃ visuddhibhāvanāvidhānaṃ bhāvitattaṃ paṭippassaddhiñca dassetukāmo imāni pañcindriyānītiādimāha. Tattha visujjhantīti visuddhiṃ pāpuṇanti. Assaddheti tīsu ratanesu saddhāvirahite. Saddheti tīsu ratanesu saddhāsampanne. Sevatoti cittena sevantassa. Bhajatoti upasaṅkamantassa. Payirupāsatoti sakkaccaṃ upanisīdantassa. Pasādanīye suttanteti pasādajanake ratanattayaguṇapaṭisaṃyutte suttante. Kusīteti kucchitena ākārena sīdantīti kusīdā, kusīdā eva kusītā. Te kusīte. Sammappadhāneti catukiccasādhakavīriyapaṭisaṃyuttasuttante. Muṭṭhassatīti naṭṭhassatike. Satipaṭṭhāneti satipaṭṭhānādhikārake suttante. Jhānavimokkheti catutthajjhānaaṭṭhavimokkhatividhavimokkhādhikārake suttante. Duppaññeti nippaññe, paññābhāvato vā duṭṭhā paññā etesanti duppaññā. Te duppaññe. Gambhīrañāṇacariyanti catusaccapaṭiccasamuppādādipaṭisaṃyutte suttante, ñāṇakathāsadise vā. Suttantakkhandheti suttantakoṭṭhāse. Assaddhiyantiādīsu assaddhiyanti assaddhabhāvaṃ. Assaddhiye ādīnavadassāvī assaddhiyaṃ pajahanto saddhindriyaṃ bhāveti, saddhindriye ānisaṃsadassāvī saddhindriyaṃ bhāvento assaddhiyaṃ pajahati. Esa nayo sesesu. Kosajjanti kusītabhāvaṃ. Pamādanti sativippavāsaṃ. Uddhaccanti uddhatabhāvaṃ, vikkhepanti attho. Pahīnattāti appanāvasena jhānapāripūriyā pahīnattā. Suppahīnattāti vuṭṭhānagāminivasena vipassanāpāripūriyā suṭṭhu pahīnattā. Bhāvitaṃ hoti subhāvitanti vuttakkameneva yojetabbaṃ. Vipassanāya hi vipakkhavasena pahīnattā ‘‘suppahīnattā’’ti vattuṃ yujjati. Tasmāyeva ca ‘‘subhāvita’’nti, na tathā jhānena. Yasmā pana pahātabbānaṃ pahānena bhāvanāsiddhi, bhāvanāsiddhiyā ca pahātabbānaṃ pahānasiddhi hoti, tasmā yamakaṃ katvā niddiṭṭhaṃ.
186. бадиббассад̣̇д̇хиваарз бхаавид̇аани жзва хонд̇и субхаавид̇аани жаад̇и бхаавид̇аанам̣язва субхаавид̇ад̇аа. бадиббассад̣̇д̇хаани жа суббадиббассад̣̇д̇хаани жаад̇и бадиббассад̣̇д̇хаанам̣язва суббадиббассад̣̇д̇хад̇аа вуд̇д̇аа. палагкан̣з маг̇г̇агижжаниб̣б̣ад̇д̇ивасзна бхаавид̇ад̇аа бадиббассад̣̇д̇хад̇аа жа взд̣̇ид̇аб̣б̣аа. самужчзд̣̇ависуд̣̇д̇хияод̇и маг̇г̇ависуд̣̇д̇хияоязва. бадиббассад̣̇д̇хивисуд̣̇д̇хияод̇и палависуд̣̇д̇хияо зва.
186. Paṭippassaddhivāre bhāvitāni ceva honti subhāvitāni cāti bhāvitānaṃyeva subhāvitatā. Paṭippassaddhāni ca suppaṭippassaddhāni cāti paṭippassaddhānaṃyeva suppaṭippassaddhatā vuttā. Phalakkhaṇe maggakiccanibbattivasena bhāvitatā paṭippassaddhatā ca veditabbā. Samucchedavisuddhiyoti maggavisuddhiyoyeva. Paṭippassaddhivisuddhiyoti phalavisuddhiyo eva.
ид̣̇аани д̇ат̇аа вуд̇д̇авид̇хаанаани инд̣̇рияаани гаарагабуг̇г̇алавасзна яож̇зд̇ваа д̣̇ассзд̇ум̣ гад̇инам̣ буг̇г̇алаананд̇иаад̣̇имааха. д̇ад̇т̇а саванзна б̣уд̣̇д̇ход̇и саммаасамб̣уд̣̇д̇хад̇о д̇хаммагат̇аасаванзна жад̇усажжам̣ б̣уд̣̇д̇хаваа, н̃аад̇аваад̇и ад̇т̇о. ид̣̇ам̣ бхаавид̇инд̣̇рияабхаавасса гааран̣аважанам̣. бхааванаабхисамаяавасзна хи маг̇г̇асса б̣уд̣̇д̇хад̇д̇аа палагкан̣з бхаавид̇инд̣̇рияо ход̇и. адтаннамби арияаанам̣ д̇ат̇ааг̇ад̇асса саавагад̇д̇аа висзсзд̇ваа арахад̇д̇апаладтамзва д̣̇ассзнд̇о кийн̣аасавод̇и ааха. соязва хи саб̣б̣агижжанибпад̇д̇ияаа бхаавид̇инд̣̇рияод̇и вуд̇д̇о. ид̇арзби бана д̇ам̣д̇ам̣маг̇г̇агижжанибпад̇д̇ияаа барияааязна бхаавид̇инд̣̇рияаа зва. д̇асмаа зва жа жад̇уусу палагкан̣зсу ‘‘бан̃жинд̣̇рияаани бхаавид̇аани жзва хонд̇и субхаавид̇аани жаа’’д̇и вуд̇д̇ам̣. яасмаа бана д̇зсам̣ убаримаг̇г̇ад̇т̇ааяа инд̣̇рияабхааванаа ад̇т̇иязва, д̇асмаа д̇з на ниббарияааязна бхаавид̇инд̣̇рияаа. саяам̣ бхууд̇адтзнаад̇и анаажарияо худ̇ваа саяамзва арияааяа ж̇аад̇ияаа бхууд̇адтзна ж̇аад̇адтзна бхаг̇аваа. соби хи бхааванаасид̣̇д̇хивасзна палагкан̣з саяамбхуу наама ход̇и. звам̣ саяам̣ бхууд̇адтзна бхаавид̇инд̣̇рияо. аббамзяяадтзнаад̇и ананд̇аг̇ун̣аяог̇ад̇о бамаан̣зд̇ум̣ асаггун̣зяяадтзна. бхаг̇аваа палагкан̣з бхааванаасид̣̇д̇хид̇о аббамзяяод̇и. д̇асмааязва бхаавид̇инд̣̇рияо.
Idāni tathā vuttavidhānāni indriyāni kārakapuggalavasena yojetvā dassetuṃ katinaṃ puggalānantiādimāha. Tattha savanena buddhoti sammāsambuddhato dhammakathāsavanena catusaccaṃ buddhavā, ñātavāti attho. Idaṃ bhāvitindriyabhāvassa kāraṇavacanaṃ. Bhāvanābhisamayavasena hi maggassa buddhattā phalakkhaṇe bhāvitindriyo hoti. Aṭṭhannampi ariyānaṃ tathāgatassa sāvakattā visesetvā arahattaphalaṭṭhameva dassento khīṇāsavoti āha. Soyeva hi sabbakiccanipphattiyā bhāvitindriyoti vutto. Itarepi pana taṃtaṃmaggakiccanipphattiyā pariyāyena bhāvitindriyā eva. Tasmā eva ca catūsu phalakkhaṇesu ‘‘pañcindriyāni bhāvitāni ceva honti subhāvitāni cā’’ti vuttaṃ. Yasmā pana tesaṃ uparimaggatthāya indriyabhāvanā atthiyeva, tasmā te na nippariyāyena bhāvitindriyā. Sayaṃ bhūtaṭṭhenāti anācariyo hutvā sayameva ariyāya jātiyā bhūtaṭṭhena jātaṭṭhena bhagavā. Sopi hi bhāvanāsiddhivasena phalakkhaṇe sayambhū nāma hoti. Evaṃ sayaṃ bhūtaṭṭhena bhāvitindriyo. Appameyyaṭṭhenāti anantaguṇayogato pamāṇetuṃ asakkuṇeyyaṭṭhena. Bhagavā phalakkhaṇe bhāvanāsiddhito appameyyoti. Tasmāyeva bhāvitindriyo.
батамасуд̇д̇анд̇анид̣̇д̣̇зсаван̣н̣анаа нидтид̇аа.
Paṭhamasuttantaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 1. батамасуд̇д̇анд̇анид̣̇д̣̇зсо • 1. Paṭhamasuttantaniddeso
