| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
১. পঠমসুত্তন্তনিদ্দেসো
1. Paṭhamasuttantaniddeso
কথং দুক্খং তথট্ঠেন সচ্চং? চত্তারো দুক্খস্স দুক্খট্ঠা তথা অৰিতথা অনঞ্ঞথা। দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো – ইমে চত্তারো দুক্খস্স দুক্খট্ঠা তথা অৰিতথা অনঞ্ঞথা। এৰং দুক্খং তথট্ঠেন সচ্চং।
Kathaṃ dukkhaṃ tathaṭṭhena saccaṃ? Cattāro dukkhassa dukkhaṭṭhā tathā avitathā anaññathā. Dukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho – ime cattāro dukkhassa dukkhaṭṭhā tathā avitathā anaññathā. Evaṃ dukkhaṃ tathaṭṭhena saccaṃ.
কথং সমুদযো তথট্ঠেন সচ্চং? চত্তারো সমুদযস্স সমুদযট্ঠা তথা অৰিতথা অনঞ্ঞথা। সমুদযস্স আযূহনট্ঠো, নিদানট্ঠো, সংযোগট্ঠো পলিবোধট্ঠো – ইমে চত্তারো সমুদযস্স সমুদযট্ঠা তথা অৰিতথা অনঞ্ঞথা। এৰং সমুদযো তথট্ঠেন সচ্চং।
Kathaṃ samudayo tathaṭṭhena saccaṃ? Cattāro samudayassa samudayaṭṭhā tathā avitathā anaññathā. Samudayassa āyūhanaṭṭho, nidānaṭṭho, saṃyogaṭṭho palibodhaṭṭho – ime cattāro samudayassa samudayaṭṭhā tathā avitathā anaññathā. Evaṃ samudayo tathaṭṭhena saccaṃ.
কথং নিরোধো তথট্ঠেন সচ্চং? চত্তারো নিরোধস্স নিরোধট্ঠা তথা অৰিতথা অনঞ্ঞথা। নিরোধস্স নিস্সরণট্ঠো, ৰিৰেকট্ঠো, অসঙ্খতট্ঠো, অমতট্ঠো – ইমে চত্তারো নিরোধস্স নিরোধট্ঠা তথা অৰিতথা অনঞ্ঞথা। এৰং নিরোধো তথট্ঠেন সচ্চং।
Kathaṃ nirodho tathaṭṭhena saccaṃ? Cattāro nirodhassa nirodhaṭṭhā tathā avitathā anaññathā. Nirodhassa nissaraṇaṭṭho, vivekaṭṭho, asaṅkhataṭṭho, amataṭṭho – ime cattāro nirodhassa nirodhaṭṭhā tathā avitathā anaññathā. Evaṃ nirodho tathaṭṭhena saccaṃ.
কথং মগ্গো তথট্ঠেন সচ্চং? চত্তারো মগ্গস্স মগ্গট্ঠা তথা অৰিতথা অনঞ্ঞথা। মগ্গস্স নিয্যানট্ঠো, হেতুট্ঠো, দস্সনট্ঠো, আধিপতেয্যট্ঠো – ইমে চত্তারো মগ্গস্স মগ্গট্ঠা তথা অৰিতথা অনঞ্ঞথা। এৰং মগ্গো তথট্ঠেন সচ্চং।
Kathaṃ maggo tathaṭṭhena saccaṃ? Cattāro maggassa maggaṭṭhā tathā avitathā anaññathā. Maggassa niyyānaṭṭho, hetuṭṭho, dassanaṭṭho, ādhipateyyaṭṭho – ime cattāro maggassa maggaṭṭhā tathā avitathā anaññathā. Evaṃ maggo tathaṭṭhena saccaṃ.
৯. কতিহাকারেহি চত্তারি সচ্চানি একপ্পটিৰেধানি? চতূহাকারেহি চত্তারি সচ্চানি একপ্পটিৰেধানি। তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন – ইমেহি চতূহাকারেহি চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
9. Katihākārehi cattāri saccāni ekappaṭivedhāni? Catūhākārehi cattāri saccāni ekappaṭivedhāni. Tathaṭṭhena, anattaṭṭhena, saccaṭṭhena, paṭivedhaṭṭhena – imehi catūhākārehi cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
কথং তথট্ঠেন চত্তারি সচ্চানি একপ্পটিৰেধানি? চতূহাকারেহি তথট্ঠেন চত্তারি সচ্চানি একপ্পটিৰেধানি। দুক্খস্স দুক্খট্ঠো তথট্ঠো, সমুদযস্স সমুদযট্ঠো তথট্ঠো, নিরোধস্স নিরোধট্ঠো তথট্ঠো, মগ্গস্স মগ্গট্ঠো তথট্ঠো – ইমেহি চতূহাকারেহি তথট্ঠেন চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
Kathaṃ tathaṭṭhena cattāri saccāni ekappaṭivedhāni? Catūhākārehi tathaṭṭhena cattāri saccāni ekappaṭivedhāni. Dukkhassa dukkhaṭṭho tathaṭṭho, samudayassa samudayaṭṭho tathaṭṭho, nirodhassa nirodhaṭṭho tathaṭṭho, maggassa maggaṭṭho tathaṭṭho – imehi catūhākārehi tathaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
কথং অনত্তট্ঠেন চত্তারি সচ্চানি একপ্পটিৰেধানি? চতূহাকারেহি অনত্তট্ঠেন চত্তারি সচ্চানি একপ্পটিৰেধানি। দুক্খস্স দুক্খট্ঠো অনত্তট্ঠো, সমুদযস্স সমুদযট্ঠো অনত্তট্ঠো, নিরোধস্স নিরোধট্ঠো অনত্তট্ঠো, মগ্গস্স মগ্গট্ঠো অনত্তট্ঠো – ইমেহি চতূহাকারেহি অনত্তট্ঠেন চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
Kathaṃ anattaṭṭhena cattāri saccāni ekappaṭivedhāni? Catūhākārehi anattaṭṭhena cattāri saccāni ekappaṭivedhāni. Dukkhassa dukkhaṭṭho anattaṭṭho, samudayassa samudayaṭṭho anattaṭṭho, nirodhassa nirodhaṭṭho anattaṭṭho, maggassa maggaṭṭho anattaṭṭho – imehi catūhākārehi anattaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
কথং সচ্চট্ঠেন চত্তারি সচ্চানি একপ্পটিৰেধানি? চতূহাকারেহি সচ্চট্ঠেন চত্তারি সচ্চানি একপ্পটিৰেধানি। দুক্খস্স দুক্খট্ঠো সচ্চট্ঠো, সমুদযস্স সমুদযট্ঠো সচ্চট্ঠো, নিরোধস্স নিরোধট্ঠো সচ্চট্ঠো, মগ্গস্স মগ্গট্ঠো সচ্চট্ঠো – ইমেহি চতূহাকারেহি সচ্চট্ঠেন চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
Kathaṃ saccaṭṭhena cattāri saccāni ekappaṭivedhāni? Catūhākārehi saccaṭṭhena cattāri saccāni ekappaṭivedhāni. Dukkhassa dukkhaṭṭho saccaṭṭho, samudayassa samudayaṭṭho saccaṭṭho, nirodhassa nirodhaṭṭho saccaṭṭho, maggassa maggaṭṭho saccaṭṭho – imehi catūhākārehi saccaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
কথং পটিৰেধট্ঠেন চত্তারি সচ্চানি একপ্পটিৰেধানি? চতূহাকারেহি পটিৰেধট্ঠেন চত্তারি সচ্চানি একপ্পটিৰেধানি। দুক্খস্স দুক্খট্ঠো পটিৰেধট্ঠো, সমুদযস্স সমুদযট্ঠো পটিৰেধট্ঠো নিরোধস্স নিরোধট্ঠো পটিৰেধট্ঠো, মগ্গস্স মগ্গট্ঠো পটিৰেধট্ঠো – ইমেহি চতূহাকারেহি পটিৰেধট্ঠেন চত্তারি সচ্চানি একসঙ্গহিতানি যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
Kathaṃ paṭivedhaṭṭhena cattāri saccāni ekappaṭivedhāni? Catūhākārehi paṭivedhaṭṭhena cattāri saccāni ekappaṭivedhāni. Dukkhassa dukkhaṭṭho paṭivedhaṭṭho, samudayassa samudayaṭṭho paṭivedhaṭṭho nirodhassa nirodhaṭṭho paṭivedhaṭṭho, maggassa maggaṭṭho paṭivedhaṭṭho – imehi catūhākārehi paṭivedhaṭṭhena cattāri saccāni ekasaṅgahitāni yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
১০. কতিহাকারেহি চত্তারি সচ্চানি একপ্পটিৰেধানি? যং অনিচ্চং তং দুক্খং, যং দুক্খং তং অনিচ্চং, যং অনিচ্চঞ্চ দুক্খঞ্চ তং অনত্তা। যং অনিচ্চঞ্চ দুক্খঞ্চ অনত্তা চ তং তথং। যং অনিচ্চং চ দুক্খঞ্চ অনত্তা চ তথঞ্চ তং সচ্চং। যং অনিচ্চঞ্চ দুক্খঞ্চ অনত্তা চ তথঞ্চ সচ্চঞ্চ তং একসঙ্গহিতং। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
10. Katihākārehi cattāri saccāni ekappaṭivedhāni? Yaṃ aniccaṃ taṃ dukkhaṃ, yaṃ dukkhaṃ taṃ aniccaṃ, yaṃ aniccañca dukkhañca taṃ anattā. Yaṃ aniccañca dukkhañca anattā ca taṃ tathaṃ. Yaṃ aniccaṃ ca dukkhañca anattā ca tathañca taṃ saccaṃ. Yaṃ aniccañca dukkhañca anattā ca tathañca saccañca taṃ ekasaṅgahitaṃ. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
কতিহাকারেহি চত্তারি সচ্চানি একপ্পটিৰেধানি? নৰহাকারেহি চত্তারি সচ্চানি একপ্পটিৰেধানি। তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন, অভিঞ্ঞট্ঠেন, পরিঞ্ঞট্ঠেন, পহানট্ঠেন, ভাৰনট্ঠেন, সচ্ছিকিরিযট্ঠেন – ইমেহি নৰহাকারেহি চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
Katihākārehi cattāri saccāni ekappaṭivedhāni? Navahākārehi cattāri saccāni ekappaṭivedhāni. Tathaṭṭhena, anattaṭṭhena, saccaṭṭhena, paṭivedhaṭṭhena, abhiññaṭṭhena, pariññaṭṭhena, pahānaṭṭhena, bhāvanaṭṭhena, sacchikiriyaṭṭhena – imehi navahākārehi cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
কথং তথট্ঠেন চত্তারি সচ্চানি একপ্পটিৰেধানি? নৰহাকারেহি তথট্ঠেন চত্তারি সচ্চানি একপ্পটিৰেধানি। দুক্খস্স দুক্খট্ঠো তথট্ঠো, সমুদযস্স সমুদযট্ঠো তথট্ঠো, নিরোধস্স নিরোধট্ঠো তথট্ঠো, মগ্গস্স মগ্গট্ঠো তথট্ঠো, অভিঞ্ঞায অভিঞ্ঞট্ঠো তথট্ঠো, পরিঞ্ঞায পরিঞ্ঞট্ঠো তথট্ঠো, পহানস্স পহানট্ঠো তথট্ঠো, ভাৰনায ভাৰনট্ঠো তথট্ঠো, সচ্ছিকিরিযায সচ্ছিকিরিযট্ঠো তথট্ঠো – ইমেহি নৰহাকারেহি তথট্ঠেন চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
Kathaṃ tathaṭṭhena cattāri saccāni ekappaṭivedhāni? Navahākārehi tathaṭṭhena cattāri saccāni ekappaṭivedhāni. Dukkhassa dukkhaṭṭho tathaṭṭho, samudayassa samudayaṭṭho tathaṭṭho, nirodhassa nirodhaṭṭho tathaṭṭho, maggassa maggaṭṭho tathaṭṭho, abhiññāya abhiññaṭṭho tathaṭṭho, pariññāya pariññaṭṭho tathaṭṭho, pahānassa pahānaṭṭho tathaṭṭho, bhāvanāya bhāvanaṭṭho tathaṭṭho, sacchikiriyāya sacchikiriyaṭṭho tathaṭṭho – imehi navahākārehi tathaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
কথং অনত্তট্ঠেন… সচ্চট্ঠেন… পটিৰেধট্ঠেন চত্তারি সচ্চানি একপ্পটিৰেধানি? নৰহাকারেহি পটিৰেধট্ঠেন চত্তারি সচ্চানি একপ্পটিৰেধানি। দুক্খস্স দুক্খট্ঠো পটিৰেধট্ঠো, সমুদযস্স সমুদযট্ঠো পটিৰেধট্ঠো, নিরোধস্স নিরোধট্ঠো পটিৰেধট্ঠো, মগ্গস্স মগ্গট্ঠো পটিৰেধট্ঠো, অভিঞ্ঞায অভিঞ্ঞট্ঠো পটিৰেধট্ঠো, পরিঞ্ঞায পরিঞ্ঞট্ঠো পটিৰেধট্ঠো, পহানস্স পহানট্ঠো পটিৰেধট্ঠো, ভাৰনায ভাৰনট্ঠো পটিৰেধট্ঠো, সচ্ছিকিরিযায সচ্ছিকিরিযট্ঠো পটিৰেধট্ঠো – ইমেহি নৰহাকারেহি পটিৰেধট্ঠেন চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
Kathaṃ anattaṭṭhena… saccaṭṭhena… paṭivedhaṭṭhena cattāri saccāni ekappaṭivedhāni? Navahākārehi paṭivedhaṭṭhena cattāri saccāni ekappaṭivedhāni. Dukkhassa dukkhaṭṭho paṭivedhaṭṭho, samudayassa samudayaṭṭho paṭivedhaṭṭho, nirodhassa nirodhaṭṭho paṭivedhaṭṭho, maggassa maggaṭṭho paṭivedhaṭṭho, abhiññāya abhiññaṭṭho paṭivedhaṭṭho, pariññāya pariññaṭṭho paṭivedhaṭṭho, pahānassa pahānaṭṭho paṭivedhaṭṭho, bhāvanāya bhāvanaṭṭho paṭivedhaṭṭho, sacchikiriyāya sacchikiriyaṭṭho paṭivedhaṭṭho – imehi navahākārehi paṭivedhaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
১১. কতিহাকারেহি চত্তারি সচ্চানি একপ্পটিৰেধানি? দ্ৰাদসহি আকারেহি চত্তারি সচ্চানি একপ্পটিৰেধানি। তথট্ঠেন, অনত্তট্ঠেন, সচ্চট্ঠেন, পটিৰেধট্ঠেন, অভিজাননট্ঠেন, পরিজাননট্ঠেন, ধম্মট্ঠেন, তথট্ঠেন, ঞাতট্ঠেন, সচ্ছিকিরিযট্ঠেন, ফস্সনট্ঠেন, অভিসমযট্ঠেন – ইমেহি দ্ৰাদসহি আকারেহি চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
11. Katihākārehi cattāri saccāni ekappaṭivedhāni? Dvādasahi ākārehi cattāri saccāni ekappaṭivedhāni. Tathaṭṭhena, anattaṭṭhena, saccaṭṭhena, paṭivedhaṭṭhena, abhijānanaṭṭhena, parijānanaṭṭhena, dhammaṭṭhena, tathaṭṭhena, ñātaṭṭhena, sacchikiriyaṭṭhena, phassanaṭṭhena, abhisamayaṭṭhena – imehi dvādasahi ākārehi cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
কথং তথট্ঠেন চত্তারি সচ্চানি একপ্পটিৰেধানি? সোল়সহি আকারেহি তথট্ঠেন চত্তারি সচ্চানি একপ্পটিৰেধানি। দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো, তথট্ঠো; সমুদযস্স আযূহনট্ঠো, নিদানট্ঠো, সংযোগট্ঠো, পলিবোধট্ঠো তথট্ঠো; নিরোধস্স নিস্সরণট্ঠো, ৰিৰেকট্ঠো, অসঙ্খতট্ঠো, অমতট্ঠো তথট্ঠো; মগ্গস্স নিয্যানট্ঠো, হেতুট্ঠো, দস্সনট্ঠো, আধিপতেয্যট্ঠো তথট্ঠো – ইমেহি সোল়সহি আকারেহি তথট্ঠেন চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
Kathaṃ tathaṭṭhena cattāri saccāni ekappaṭivedhāni? Soḷasahi ākārehi tathaṭṭhena cattāri saccāni ekappaṭivedhāni. Dukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho, tathaṭṭho; samudayassa āyūhanaṭṭho, nidānaṭṭho, saṃyogaṭṭho, palibodhaṭṭho tathaṭṭho; nirodhassa nissaraṇaṭṭho, vivekaṭṭho, asaṅkhataṭṭho, amataṭṭho tathaṭṭho; maggassa niyyānaṭṭho, hetuṭṭho, dassanaṭṭho, ādhipateyyaṭṭho tathaṭṭho – imehi soḷasahi ākārehi tathaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
কথং অনত্তট্ঠেন…পে॰… সচ্চট্ঠেন… পটিৰেধট্ঠেন… অভিজাননট্ঠেন… পরিজাননট্ঠেন… ধম্মট্ঠেন… তথট্ঠেন… ঞাতট্ঠেন… সচ্ছিকিরিযট্ঠেন… ফস্সনট্ঠেন… অভিসমযট্ঠেন চত্তারি সচ্চানি একপ্পটিৰেধানি? সোল়সহি আকারেহি অভিসমযট্ঠেন চত্তারি সচ্চানি একপ্পটিৰেধানি। দুক্খস্স পীল়নট্ঠো, সঙ্খতট্ঠো, সন্তাপট্ঠো, ৰিপরিণামট্ঠো, অভিসমযট্ঠো; সমুদযস্স আযূহনট্ঠো, নিদানট্ঠো, সংযোগট্ঠো, পলিবোধট্ঠো, অভিসমযট্ঠো; নিরোধস্স নিস্সরণট্ঠো , ৰিৰেকট্ঠো, অসঙ্খতট্ঠো, অমতট্ঠো, অভিসমযট্ঠো; মগ্গস্স নিয্যানট্ঠো, হেতুট্ঠো, দস্সনট্ঠো, আধিপতেয্যট্ঠো, অভিসমযট্ঠো – ইমেহি সোল়সহি আকারেহি অভিসমযট্ঠেন চত্তারি সচ্চানি একসঙ্গহিতানি। যং একসঙ্গহিতং তং একত্তং। একত্তং একেন ঞাণেন পটিৰিজ্ঝতীতি – চত্তারি সচ্চানি একপ্পটিৰেধানি।
Kathaṃ anattaṭṭhena…pe… saccaṭṭhena… paṭivedhaṭṭhena… abhijānanaṭṭhena… parijānanaṭṭhena… dhammaṭṭhena… tathaṭṭhena… ñātaṭṭhena… sacchikiriyaṭṭhena… phassanaṭṭhena… abhisamayaṭṭhena cattāri saccāni ekappaṭivedhāni? Soḷasahi ākārehi abhisamayaṭṭhena cattāri saccāni ekappaṭivedhāni. Dukkhassa pīḷanaṭṭho, saṅkhataṭṭho, santāpaṭṭho, vipariṇāmaṭṭho, abhisamayaṭṭho; samudayassa āyūhanaṭṭho, nidānaṭṭho, saṃyogaṭṭho, palibodhaṭṭho, abhisamayaṭṭho; nirodhassa nissaraṇaṭṭho , vivekaṭṭho, asaṅkhataṭṭho, amataṭṭho, abhisamayaṭṭho; maggassa niyyānaṭṭho, hetuṭṭho, dassanaṭṭho, ādhipateyyaṭṭho, abhisamayaṭṭho – imehi soḷasahi ākārehi abhisamayaṭṭhena cattāri saccāni ekasaṅgahitāni. Yaṃ ekasaṅgahitaṃ taṃ ekattaṃ. Ekattaṃ ekena ñāṇena paṭivijjhatīti – cattāri saccāni ekappaṭivedhāni.
১২. সচ্চানং কতি লক্খণানি? সচ্চানং দ্ৰে লক্খণানি। সঙ্খতলক্খণঞ্চ, অসঙ্খতলক্খণঞ্চ – সচ্চানং ইমানি দ্ৰে লক্খণানি।
12. Saccānaṃ kati lakkhaṇāni? Saccānaṃ dve lakkhaṇāni. Saṅkhatalakkhaṇañca, asaṅkhatalakkhaṇañca – saccānaṃ imāni dve lakkhaṇāni.
সচ্চানং কতি লক্খণানি? সচ্চানং ছ লক্খণানি। সঙ্খতানং সচ্চানং উপ্পাদো পঞ্ঞাযতি, ৰযো পঞ্ঞাযতি, ঠিতানং অঞ্ঞথত্তং পঞ্ঞাযতি অসঙ্খতস্স সচ্চস্স ন উপ্পাদো পঞ্ঞাযতি , ন ৰযো পঞ্ঞাযতি, ন ঠিতস্স অঞ্ঞথত্তং পঞ্ঞাযতি – সচ্চানং ইমানি ছ লক্খণানি।
Saccānaṃ kati lakkhaṇāni? Saccānaṃ cha lakkhaṇāni. Saṅkhatānaṃ saccānaṃ uppādo paññāyati, vayo paññāyati, ṭhitānaṃ aññathattaṃ paññāyati asaṅkhatassa saccassa na uppādo paññāyati , na vayo paññāyati, na ṭhitassa aññathattaṃ paññāyati – saccānaṃ imāni cha lakkhaṇāni.
সচ্চানং কতি লক্খণানি? সচ্চানং দ্ৰাদস লক্খণানি। দুক্খসচ্চস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি; সমুদযসচ্চস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি; মগ্গসচ্চস্স উপ্পাদো পঞ্ঞাযতি, ৰযো পঞ্ঞাযতি, ঠিতস্স অঞ্ঞথত্তং পঞ্ঞাযতি; নিরোধসচ্চস্স ন উপ্পাদো পঞ্ঞাযতি, ন ৰযো পঞ্ঞাযতি, ন ঠিতস্স অঞ্ঞথত্তং পঞ্ঞাযতি – সচ্চানং ইমানি দ্ৰাদস লক্খণানি।
Saccānaṃ kati lakkhaṇāni? Saccānaṃ dvādasa lakkhaṇāni. Dukkhasaccassa uppādo paññāyati, vayo paññāyati, ṭhitassa aññathattaṃ paññāyati; samudayasaccassa uppādo paññāyati, vayo paññāyati, ṭhitassa aññathattaṃ paññāyati; maggasaccassa uppādo paññāyati, vayo paññāyati, ṭhitassa aññathattaṃ paññāyati; nirodhasaccassa na uppādo paññāyati, na vayo paññāyati, na ṭhitassa aññathattaṃ paññāyati – saccānaṃ imāni dvādasa lakkhaṇāni.
চতুন্নং সচ্চানং কতি কুসলা, কতি অকুসলা, কতি অব্যাকতা? সমুদযসচ্চং অকুসলং, মগ্গসচ্চং কুসলং , নিরোধসচ্চং অব্যাকতং। দুক্খসচ্চং সিযা কুসলং, সিযা অকুসলং, সিযা অব্যাকতং।
Catunnaṃ saccānaṃ kati kusalā, kati akusalā, kati abyākatā? Samudayasaccaṃ akusalaṃ, maggasaccaṃ kusalaṃ , nirodhasaccaṃ abyākataṃ. Dukkhasaccaṃ siyā kusalaṃ, siyā akusalaṃ, siyā abyākataṃ.
সিযা তীণি সচ্চানি একসচ্চেন সঙ্গহিতানি, একসচ্চং তীহি সচ্চেহি সঙ্গহিতং? ৰত্থুৰসেন পরিযাযেন সিযাতি। কথঞ্চ সিযা? যং দুক্খসচ্চং অকুসলং, সমুদযসচ্চং অকুসলং – এৰং অকুসলট্ঠেন দ্ৰে সচ্চানি একসচ্চেন সঙ্গহিতানি, একসচ্চং দ্ৰীহি সচ্চেহি সঙ্গহিতং। যং দুক্খসচ্চং কুসলং, মগ্গসচ্চং কুসলং – এৰং কুসলট্ঠেন দ্ৰে সচ্চানি একসচ্চেন সঙ্গহিতানি , একসচ্চং দ্ৰীহি সচ্চেহি সঙ্গহিতং। যং দুক্খসচ্চং অব্যাকতং, নিরোধসচ্চং অব্যাকতং – এৰং অব্যাকতট্ঠেন দ্ৰে সচ্চানি একসচ্চেন সঙ্গহিতানি, একসচ্চং দ্ৰীহি সচ্চেহি সঙ্গহিতং। এৰং সিযা তীণি সচ্চানি একসচ্চেন সঙ্গহিতানি, একসচ্চং তীহি সচ্চেহি সঙ্গহিতং ৰত্থুৰসেন পরিযাযেনাতি।
Siyā tīṇi saccāni ekasaccena saṅgahitāni, ekasaccaṃ tīhi saccehi saṅgahitaṃ? Vatthuvasena pariyāyena siyāti. Kathañca siyā? Yaṃ dukkhasaccaṃ akusalaṃ, samudayasaccaṃ akusalaṃ – evaṃ akusalaṭṭhena dve saccāni ekasaccena saṅgahitāni, ekasaccaṃ dvīhi saccehi saṅgahitaṃ. Yaṃ dukkhasaccaṃ kusalaṃ, maggasaccaṃ kusalaṃ – evaṃ kusalaṭṭhena dve saccāni ekasaccena saṅgahitāni , ekasaccaṃ dvīhi saccehi saṅgahitaṃ. Yaṃ dukkhasaccaṃ abyākataṃ, nirodhasaccaṃ abyākataṃ – evaṃ abyākataṭṭhena dve saccāni ekasaccena saṅgahitāni, ekasaccaṃ dvīhi saccehi saṅgahitaṃ. Evaṃ siyā tīṇi saccāni ekasaccena saṅgahitāni, ekasaccaṃ tīhi saccehi saṅgahitaṃ vatthuvasena pariyāyenāti.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ১. পঠমসুত্তন্তনিদ্দেসৰণ্ণনা • 1. Paṭhamasuttantaniddesavaṇṇanā
