| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
7. பட²மததா²க³தஅச்ச²ரியஸுத்தவண்ணனா
7. Paṭhamatathāgataacchariyasuttavaṇṇanā
127. ஸத்தமே பாதுபா⁴வாதி பாதுபா⁴வேன. குச்சி²ங் ஓக்கமதீதி எத்த² குச்சி²ங் ஓக்கந்தோ ஹோதீதி அத்தோ². ஓக்கந்தே ஹி தஸ்மிங் ஏவங் ஹோதி, ந ஓக்கமமானே. அப்பமாணோதி வுட்³டி⁴ப்பமாணோ, விபுலோதி அத்தோ². உளாரோதி தஸ்ஸேவ வேவசனங். தே³வானங் தே³வானுபா⁴வந்தி எத்த² தே³வானங் அயமானுபா⁴வோ – நிவத்த²வத்த²ஸ்ஸ பபா⁴ த்³வாத³ஸ யோஜனானி ப²ரதி, ததா² ஸரீரஸ்ஸ, ததா² விமானஸ்ஸ, தங் அதிக்கமித்வாதி அத்தோ². லோகந்தரிகாதி திண்ணங் திண்ணங் சக்கவாளானங் அந்தரா ஏகேகோ லோகந்தரிகோ ஹோதி, திண்ணங் ஸகடசக்கானங் பத்தானங் வா அஞ்ஞமஞ்ஞங் ஆஹச்ச ட²பிதானங் மஜ்ஜே² ஓகாஸோ விய. ஸோ பன லோகந்தரிகனிரயோ பரிமாணதோ அட்ட²யோஜனஸஹஸ்ஸப்பமாணோ ஹோதி. அகா⁴தி நிச்சவிவடா. அஸங்வுதாதி ஹெட்டா²பி அப்பதிட்டா². அந்த⁴காராதி தமபூ⁴தா. அந்த⁴காரதிமிஸாதி சக்கு²விஞ்ஞாணுப்பத்தினிவாரணதோ அந்த⁴பா⁴வகரணதிமிஸாய ஸமன்னாக³தா. தத்த² கிர சக்கு²விஞ்ஞாணங் ந ஜாயதி. ஏவங்மஹித்³தி⁴கானந்தி சந்தி³மஸூரியா கிர ஏகப்பஹாரேனேவ தீஸு தீ³பேஸு பஞ்ஞாயந்தி, ஏவங்மஹித்³தி⁴கா. ஏகேகாய தி³ஸாய நவ நவ யோஜனஸதஸஹஸ்ஸானி அந்த⁴காரங் வித⁴மித்வா ஆலோகங் த³ஸ்ஸெந்தி, ஏவங்மஹானுபா⁴வா. ஆபா⁴ நானுபொ⁴ந்தீதி பபா⁴ நப்பஹொந்தி. தே கிர சக்கவாளபப்³ப³தஸ்ஸ வேமஜ்ஜே²ன சரந்தி சக்கவாளபப்³ப³தஞ்ச அதிக்கமித்வா லோகந்தரனிரயா. தஸ்மா தேஸங் தத்த² ஆபா⁴ நப்பஹொந்தி.
127. Sattame pātubhāvāti pātubhāvena. Kucchiṃ okkamatīti ettha kucchiṃ okkanto hotīti attho. Okkante hi tasmiṃ evaṃ hoti, na okkamamāne. Appamāṇoti vuḍḍhippamāṇo, vipuloti attho. Uḷāroti tasseva vevacanaṃ. Devānaṃ devānubhāvanti ettha devānaṃ ayamānubhāvo – nivatthavatthassa pabhā dvādasa yojanāni pharati, tathā sarīrassa, tathā vimānassa, taṃ atikkamitvāti attho. Lokantarikāti tiṇṇaṃ tiṇṇaṃ cakkavāḷānaṃ antarā ekeko lokantariko hoti, tiṇṇaṃ sakaṭacakkānaṃ pattānaṃ vā aññamaññaṃ āhacca ṭhapitānaṃ majjhe okāso viya. So pana lokantarikanirayo parimāṇato aṭṭhayojanasahassappamāṇo hoti. Aghāti niccavivaṭā. Asaṃvutāti heṭṭhāpi appatiṭṭhā. Andhakārāti tamabhūtā. Andhakāratimisāti cakkhuviññāṇuppattinivāraṇato andhabhāvakaraṇatimisāya samannāgatā. Tattha kira cakkhuviññāṇaṃ na jāyati. Evaṃmahiddhikānanti candimasūriyā kira ekappahāreneva tīsu dīpesu paññāyanti, evaṃmahiddhikā. Ekekāya disāya nava nava yojanasatasahassāni andhakāraṃ vidhamitvā ālokaṃ dassenti, evaṃmahānubhāvā. Ābhā nānubhontīti pabhā nappahonti. Te kira cakkavāḷapabbatassa vemajjhena caranti cakkavāḷapabbatañca atikkamitvā lokantaranirayā. Tasmā tesaṃ tattha ābhā nappahonti.
யேபி தத்த² ஸத்தாதி யேபி தஸ்மிங் லோகந்தரமஹானிரயே ஸத்தா உபபன்னா. கிங் பன கம்மங் கத்வா தத்த² உப்பஜ்ஜந்தீதி? பா⁴ரியங் தா³ருணங் மாதாபிதூனங் த⁴ம்மிகஸமணப்³ராஹ்மணானஞ்ச உபரி அபராத⁴ங், அஞ்ஞஞ்ச தி³வஸே தி³வஸே பாணவதா⁴தி³ஸாஹஸிககம்மங் கத்வா உப்பஜ்ஜந்தி தம்ப³பண்ணிதீ³பே அப⁴யசோரனாக³சோராத³யோ விய. தேஸங் அத்தபா⁴வோ திகா³வுதிகோ ஹோதி, வக்³கு³லீனங் விய தீ³க⁴னகா² ஹொந்தி. தே ருக்கே² வக்³கு³லியோ விய நகே²ஹி சக்கவாளபப்³ப³தபாதே³ லக்³க³ந்தி. யதா³ ஸங்ஸப்பந்தா அஞ்ஞமஞ்ஞஸ்ஸ ஹத்த²பாஸக³தா ஹொந்தி, அத² ‘‘ப⁴க்கோ² நோ லத்³தோ⁴’’தி மஞ்ஞமானா தத்த² ப்³யாவடா விபரிவத்தித்வா லோகஸந்தா⁴ரகஉத³கே பதந்தி, வாதே பஹரந்தேபி மது⁴கப²லானி விய சி²ஜ்ஜித்வா உத³கே பதந்தி, பதிதமத்தாவ அச்சந்தகா²ரே உத³கே பிட்ட²பிண்டி³ விய விலீயந்தி. அஞ்ஞேபி கிர போ⁴ ஸந்தி ஸத்தாதி போ⁴ யதா² மயங் மஹாது³க்க²ங் அனுப⁴வாம, ஏவங் அஞ்ஞேபி கிர ஸத்தா இத³ங் து³க்க²ங் அனுப⁴வனத்தா²ய இதூ⁴பபன்னாதி தங்தி³வஸங் பஸ்ஸந்தி. அயங் பன ஓபா⁴ஸோ ஏகயாகு³பானமத்தம்பி ந திட்ட²தி. யாவதா நித்³தா³யித்வா பபு³த்³தோ⁴ ஆரம்மணங் விபா⁴வேதி , தத்தகங் காலங் ஹோதி. தீ³க⁴பா⁴ணகா பன ‘‘அச்ச²ராஸங்கா⁴தமத்தமேவ விஜ்ஜுஓபா⁴ஸோ விய நிச்ச²ரித்வா கிங் இத³ந்தி ப⁴ணந்தானங்யேவ அந்தரதா⁴யதீ’’தி வத³ந்தி.
Yepi tattha sattāti yepi tasmiṃ lokantaramahāniraye sattā upapannā. Kiṃ pana kammaṃ katvā tattha uppajjantīti? Bhāriyaṃ dāruṇaṃ mātāpitūnaṃ dhammikasamaṇabrāhmaṇānañca upari aparādhaṃ, aññañca divase divase pāṇavadhādisāhasikakammaṃ katvā uppajjanti tambapaṇṇidīpe abhayacoranāgacorādayo viya. Tesaṃ attabhāvo tigāvutiko hoti, vaggulīnaṃ viya dīghanakhā honti. Te rukkhe vagguliyo viya nakhehi cakkavāḷapabbatapāde lagganti. Yadā saṃsappantā aññamaññassa hatthapāsagatā honti, atha ‘‘bhakkho no laddho’’ti maññamānā tattha byāvaṭā viparivattitvā lokasandhārakaudake patanti, vāte paharantepi madhukaphalāni viya chijjitvā udake patanti, patitamattāva accantakhāre udake piṭṭhapiṇḍi viya vilīyanti. Aññepi kira bho santi sattāti bho yathā mayaṃ mahādukkhaṃ anubhavāma, evaṃ aññepi kira sattā idaṃ dukkhaṃ anubhavanatthāya idhūpapannāti taṃdivasaṃ passanti. Ayaṃ pana obhāso ekayāgupānamattampi na tiṭṭhati. Yāvatā niddāyitvā pabuddho ārammaṇaṃ vibhāveti , tattakaṃ kālaṃ hoti. Dīghabhāṇakā pana ‘‘accharāsaṅghātamattameva vijjuobhāso viya niccharitvā kiṃ idanti bhaṇantānaṃyeva antaradhāyatī’’ti vadanti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. பட²மததா²க³தஅச்ச²ரியஸுத்தங் • 7. Paṭhamatathāgataacchariyasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 7. பட²மததா²க³தஅச்ச²ரியஸுத்தவண்ணனா • 7. Paṭhamatathāgataacchariyasuttavaṇṇanā
