| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၈. ပဌမဥစ္စာရဆဍ္ဍနသိက္ခာပဒဝဏ္ဏနာ
8. Paṭhamauccārachaḍḍanasikkhāpadavaṇṇanā
တိရောကုဋ္ဋေတိ ဃရကုဋ္ဋသ္သ ပရဘာဂေ။ တိရောပာကာရေတိ ပရိက္ခေပပာကာရသ္သ တိရောဘာဂေ, တေ စ ခော ကုဋ္ဋပာကာရာ ဣဋ္ဌကသိလဒာရူနံ ဝသေန တိပ္ပကာရာတိ အာဟ ‘‘ယသ္သ ကသ္သစိ ကုဋ္ဋသ္သ ဝာ ပာကာရသ္သ ဝာ ပရတော’’တိ။ သဗ္ဗာနိပေတာနိ ဧကတော ဆဍ္ဍေန္တိယာတိ ဧတာနိ စတ္တာရိပိ ဝတ္ထူနိ ဧကတော ဆဍ္ဍေန္တိယာ။ ပာဋေက္ကံ ပန ဆဍ္ဍေန္တိယာ ဝတ္ထုဂဏနာယ အာပတ္တိယော။ အာဏတ္တိယမ္ပိ ဧသေဝ နယော။
Tirokuṭṭeti gharakuṭṭassa parabhāge. Tiropākāreti parikkhepapākārassa tirobhāge, te ca kho kuṭṭapākārā iṭṭhakasiladārūnaṃ vasena tippakārāti āha ‘‘yassa kassaci kuṭṭassa vā pākārassa vā parato’’ti. Sabbānipetāni ekato chaḍḍentiyāti etāni cattāripi vatthūni ekato chaḍḍentiyā. Pāṭekkaṃ pana chaḍḍentiyā vatthugaṇanāya āpattiyo. Āṇattiyampi eseva nayo.
ဘိက္ခုသ္သ ဒုက္ကဋန္တိ ဘိက္ခုသ္သ သဗ္ဗတ္ထ ဒုက္ကဋံ။
Bhikkhussa dukkaṭanti bhikkhussa sabbattha dukkaṭaṃ.
ပဌမဥစ္စာရဆဍ္ဍနသိက္ခာပဒဝဏ္ဏနာ နိဋ္ဌိတာ။
Paṭhamauccārachaḍḍanasikkhāpadavaṇṇanā niṭṭhitā.
