| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
৩. গহপতিৰগ্গো
3. Gahapativaggo
১. পঠমউগ্গসুত্তৰণ্ণনা
1. Paṭhamauggasuttavaṇṇanā
২১. ততিযস্স পঠমে পঞ্ঞত্তে আসনে নিসীদীতি তস্স কির ঘরে পঞ্চন্নং ভিক্খুসতানং পঞ্চ আসনসতানি নিচ্চং পঞ্ঞত্তানেৰ হোন্তি, তেসু অঞ্ঞতরস্মিং আসনে নিসীদি। তং সুণাহীতি তে সুণাহি, তং ৰা অট্ঠৰিধং অচ্ছরিযধম্মং সুণাহি। চিত্তং পসীদীতি ‘‘বুদ্ধো নু খো ন বুদ্ধো নু খো’’তি ৰিতক্কমত্তম্পি ন উপ্পজ্জি, অযমেৰ বুদ্ধোতি চিত্তুপ্পাদো পসন্নো অনাৰিলো অহোসি। সকানি ৰা ঞাতিকুলানীতি অত্তনো যাপনমত্তং ধনং গহেত্ৰা ঞাতিঘরানি গচ্ছতু। কস্স ৰো দম্মীতি কতরপুরিসস্স তুম্হে দদামি, আরোচেথ মে অত্তনো অধিপ্পাযং। অপ্পটিৰিভত্তাতি ‘‘এত্তকং দস্সামি এত্তকং ন দস্সামি, ইদং দস্সামি ইদং ন দস্সামী’’তি চিত্তং উপ্পাদেন্তেন হি পটিৰিভত্তা নাম হোতি, ময্হং পন ন এৰং। অথ খো সঙ্ঘিকা ৰিয গণসন্তকা ৰিয চ সীলৰন্তেহি সদ্ধিং সাধারণাযেৰ। সক্কচ্চংযেৰ পযিরুপাসামীতি সহত্থা উপট্ঠহামি, চিত্তীকারেন উপসঙ্কমামি।
21. Tatiyassa paṭhame paññatte āsane nisīdīti tassa kira ghare pañcannaṃ bhikkhusatānaṃ pañca āsanasatāni niccaṃ paññattāneva honti, tesu aññatarasmiṃ āsane nisīdi. Taṃ suṇāhīti te suṇāhi, taṃ vā aṭṭhavidhaṃ acchariyadhammaṃ suṇāhi. Cittaṃ pasīdīti ‘‘buddho nu kho na buddho nu kho’’ti vitakkamattampi na uppajji, ayameva buddhoti cittuppādo pasanno anāvilo ahosi. Sakāni vā ñātikulānīti attano yāpanamattaṃ dhanaṃ gahetvā ñātigharāni gacchatu. Kassa vo dammīti katarapurisassa tumhe dadāmi, ārocetha me attano adhippāyaṃ. Appaṭivibhattāti ‘‘ettakaṃ dassāmi ettakaṃ na dassāmi, idaṃ dassāmi idaṃ na dassāmī’’ti cittaṃ uppādentena hi paṭivibhattā nāma hoti, mayhaṃ pana na evaṃ. Atha kho saṅghikā viya gaṇasantakā viya ca sīlavantehi saddhiṃ sādhāraṇāyeva. Sakkaccaṃyeva payirupāsāmīti sahatthā upaṭṭhahāmi, cittīkārena upasaṅkamāmi.
অনচ্ছরিযং খো পন মং, ভন্তেতি, ভন্তে, যং মং দেৰতা উপসঙ্কমিত্ৰা এৰং আরোচেন্তি, ইদং ন অচ্ছরিযং। যং পনাহং ততোনিদানং চিত্তস্স উণ্ণতিং নাভিজানামি, তং এৰ অচ্ছরিযন্তি ৰদতি। সাধু সাধু, ভিক্খূতি এত্থ কিঞ্চাপি ভিক্খুং আমন্তেতি, উপাসকস্সেৰ পন ৰেয্যাকরণসম্পহংসনে এস সাধুকারোতি ৰেদিতব্বো।
Anacchariyaṃ kho pana maṃ, bhanteti, bhante, yaṃ maṃ devatā upasaṅkamitvā evaṃ ārocenti, idaṃ na acchariyaṃ. Yaṃ panāhaṃ tatonidānaṃ cittassa uṇṇatiṃ nābhijānāmi, taṃ eva acchariyanti vadati. Sādhu sādhu, bhikkhūti ettha kiñcāpi bhikkhuṃ āmanteti, upāsakasseva pana veyyākaraṇasampahaṃsane esa sādhukāroti veditabbo.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ১. পঠমউগ্গসুত্তং • 1. Paṭhamauggasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-৭. পঠমউগ্গসুত্তাদিৰণ্ণনা • 1-7. Paṭhamauggasuttādivaṇṇanā
