| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
3. ගහපතිවග්‌ගො
3. Gahapativaggo
1. පඨමඋග්‌ගසුත්‌තවණ්‌ණනා
1. Paṭhamauggasuttavaṇṇanā
21. තතියස්‌ස පඨමෙ පඤ්‌ඤත්‌තෙ ආසනෙ නිසීදීති තස්‌ස කිර ඝරෙ පඤ්‌චන්‌නං භික්‌ඛුසතානං පඤ්‌ච ආසනසතානි නිච්‌චං පඤ්‌ඤත්‌තානෙව හොන්‌ති, තෙසු අඤ්‌ඤතරස්‌මිං ආසනෙ නිසීදි. තං සුණාහීති තෙ සුණාහි, තං වා අට්‌ඨවිධං අච්‌ඡරියධම්‌මං සුණාහි. චිත්‌තං පසීදීති ‘‘බුද්‌ධො නු ඛො න බුද්‌ධො නු ඛො’’ති විතක්‌කමත්‌තම්‌පි න උප්‌පජ්‌ජි, අයමෙව බුද්‌ධොති චිත්‌තුප්‌පාදො පසන්‌නො අනාවිලො අහොසි. සකානි වා ඤාතිකුලානීති අත්‌තනො යාපනමත්‌තං ධනං ගහෙත්‌වා ඤාතිඝරානි ගච්‌ඡතු. කස්‌ස වො දම්‌මීති කතරපුරිසස්‌ස තුම්‌හෙ දදාමි, ආරොචෙථ මෙ අත්‌තනො අධිප්‌පායං. අප්‌පටිවිභත්‌තාති ‘‘එත්‌තකං දස්‌සාමි එත්‌තකං න දස්‌සාමි, ඉදං දස්‌සාමි ඉදං න දස්‌සාමී’’ති චිත්‌තං උප්‌පාදෙන්‌තෙන හි පටිවිභත්‌තා නාම හොති, මය්‌හං පන න එවං. අථ ඛො සඞ්‌ඝිකා විය ගණසන්‌තකා විය ච සීලවන්‌තෙහි සද්‌ධිං සාධාරණායෙව. සක්‌කච්‌චංයෙව පයිරුපාසාමීති සහත්‌ථා උපට්‌ඨහාමි, චිත්‌තීකාරෙන උපසඞ්‌කමාමි.
21. Tatiyassa paṭhame paññatte āsane nisīdīti tassa kira ghare pañcannaṃ bhikkhusatānaṃ pañca āsanasatāni niccaṃ paññattāneva honti, tesu aññatarasmiṃ āsane nisīdi. Taṃ suṇāhīti te suṇāhi, taṃ vā aṭṭhavidhaṃ acchariyadhammaṃ suṇāhi. Cittaṃ pasīdīti ‘‘buddho nu kho na buddho nu kho’’ti vitakkamattampi na uppajji, ayameva buddhoti cittuppādo pasanno anāvilo ahosi. Sakāni vā ñātikulānīti attano yāpanamattaṃ dhanaṃ gahetvā ñātigharāni gacchatu. Kassa vo dammīti katarapurisassa tumhe dadāmi, ārocetha me attano adhippāyaṃ. Appaṭivibhattāti ‘‘ettakaṃ dassāmi ettakaṃ na dassāmi, idaṃ dassāmi idaṃ na dassāmī’’ti cittaṃ uppādentena hi paṭivibhattā nāma hoti, mayhaṃ pana na evaṃ. Atha kho saṅghikā viya gaṇasantakā viya ca sīlavantehi saddhiṃ sādhāraṇāyeva. Sakkaccaṃyeva payirupāsāmīti sahatthā upaṭṭhahāmi, cittīkārena upasaṅkamāmi.
අනච්‌ඡරියං ඛො පන මං, භන්‌තෙති, භන්‌තෙ, යං මං දෙවතා උපසඞ්‌කමිත්‌වා එවං ආරොචෙන්‌ති, ඉදං න අච්‌ඡරියං. යං පනාහං තතොනිදානං චිත්‌තස්‌ස උණ්‌ණතිං නාභිජානාමි, තං එව අච්‌ඡරියන්‌ති වදති. සාධු සාධු, භික්‌ඛූති එත්‌ථ කිඤ්‌චාපි භික්‌ඛුං ආමන්‌තෙති, උපාසකස්‌සෙව පන වෙය්‍යාකරණසම්‌පහංසනෙ එස සාධුකාරොති වෙදිතබ්‌බො.
Anacchariyaṃ kho pana maṃ, bhanteti, bhante, yaṃ maṃ devatā upasaṅkamitvā evaṃ ārocenti, idaṃ na acchariyaṃ. Yaṃ panāhaṃ tatonidānaṃ cittassa uṇṇatiṃ nābhijānāmi, taṃ eva acchariyanti vadati. Sādhu sādhu, bhikkhūti ettha kiñcāpi bhikkhuṃ āmanteti, upāsakasseva pana veyyākaraṇasampahaṃsane esa sādhukāroti veditabbo.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 1. පඨමඋග්‌ගසුත්‌තං • 1. Paṭhamauggasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-7. පඨමඋග්‌ගසුත්‌තාදිවණ්‌ණනා • 1-7. Paṭhamauggasuttādivaṇṇanā
