| Library / Tipiṭaka / তিপিটক • Tipiṭaka / মহাৰিভঙ্গ-অট্ঠকথা • Mahāvibhaṅga-aṭṭhakathā |
৮. পঠমউপক্খটসিক্খাপদৰণ্ণনা
8. Paṭhamaupakkhaṭasikkhāpadavaṇṇanā
৫২৭. তেন সমযেনাতি উপক্খটসিক্খাপদং। তত্থ অত্থাৰুসো মং সো উপট্ঠাকোতি আৰুসো, যং ত্ৰং ভণসি, অত্থি এৰরূপো সো মম উপট্ঠাকোতি অযমেত্থ অত্থো। অপি মেয্য এৰং হোতীতি অপি মে অয্য এৰং হোতি, অপি ময্যা এৰন্তিপি পাঠো।
527.Tenasamayenāti upakkhaṭasikkhāpadaṃ. Tattha atthāvuso maṃ so upaṭṭhākoti āvuso, yaṃ tvaṃ bhaṇasi, atthi evarūpo so mama upaṭṭhākoti ayamettha attho. Api meyya evaṃ hotīti api me ayya evaṃ hoti, api mayyā evantipi pāṭho.
৫২৮-৯. ভিক্খুং পনেৰ উদ্দিস্সাতি এত্থ উদ্দিস্সাতি অপদিস্স আরব্ভ। যস্মা পন যং উদ্দিস্স উপক্খটং হোতি, তং তস্সত্থায উপক্খটং নাম হোতি। তস্মাস্স পদভাজনে ‘‘ভিক্খুস্সত্থাযা’’তি ৰুত্তং।
528-9.Bhikkhuṃ paneva uddissāti ettha uddissāti apadissa ārabbha. Yasmā pana yaṃ uddissa upakkhaṭaṃ hoti, taṃ tassatthāya upakkhaṭaṃ nāma hoti. Tasmāssa padabhājane ‘‘bhikkhussatthāyā’’ti vuttaṃ.
ভিক্খুং আরম্মণং করিত্ৰাতি ভিক্খুং পচ্চযং কত্ৰা, যঞ্হি ভিক্খুং উদ্দিস্স উপক্খটং, তং নিযমেনেৰ ভিক্খুং পচ্চযং কত্ৰা উপক্খটং হোতি, তেন ৰুত্তং – ‘‘ভিক্খুং আরম্মণং করিত্ৰা’’তি। পচ্চযোপি হি ‘‘লভতি মারো আরম্মণ’’ন্তিআদীসু (সং॰ নি॰ ৪.২৪৩) আরম্মণন্তি আগতো। ইদানি ‘‘উদ্দিস্সা’’তি এত্থ যো কত্তা, তস্স আকারদস্সনত্থং ‘‘ভিক্খুং অচ্ছাদেতুকামো’’তি ৰুত্তং। ভিক্খুং অচ্ছাদেতুকামেন হি তেন তং উদ্দিস্স উপক্খটং, ন অঞ্ঞেন কারণেন। ইতি সো অচ্ছাদেতুকামো হোতি। তেন ৰুত্তং – ‘‘ভিক্খুং অচ্ছাদেতুকামো’’তি।
Bhikkhuṃ ārammaṇaṃ karitvāti bhikkhuṃ paccayaṃ katvā, yañhi bhikkhuṃ uddissa upakkhaṭaṃ, taṃ niyameneva bhikkhuṃ paccayaṃ katvā upakkhaṭaṃ hoti, tena vuttaṃ – ‘‘bhikkhuṃ ārammaṇaṃ karitvā’’ti. Paccayopi hi ‘‘labhati māro ārammaṇa’’ntiādīsu (saṃ. ni. 4.243) ārammaṇanti āgato. Idāni ‘‘uddissā’’ti ettha yo kattā, tassa ākāradassanatthaṃ ‘‘bhikkhuṃ acchādetukāmo’’ti vuttaṃ. Bhikkhuṃ acchādetukāmena hi tena taṃ uddissa upakkhaṭaṃ, na aññena kāraṇena. Iti so acchādetukāmo hoti. Tena vuttaṃ – ‘‘bhikkhuṃ acchādetukāmo’’ti.
অঞ্ঞাতকস্স গহপতিস্স ৰাতি অঞ্ঞাতকেন গহপতিনা ৰাতি অত্থো। করণত্থে হি ইদং সামিৰচনং। পদভাজনে পন ব্যঞ্জনং অৰিচারেত্ৰা অত্থমত্তমেৰ দস্সেতুং ‘‘অঞ্ঞাতকো নাম…পে॰… গহপতি নামা’’তিআদি ৰুত্তং।
Aññātakassagahapatissa vāti aññātakena gahapatinā vāti attho. Karaṇatthe hi idaṃ sāmivacanaṃ. Padabhājane pana byañjanaṃ avicāretvā atthamattameva dassetuṃ ‘‘aññātako nāma…pe… gahapati nāmā’’tiādi vuttaṃ.
চীৰরচেতাপন্নন্তি চীৰরমূলং, তং পন যস্মা হিরঞ্ঞাদীসু অঞ্ঞতরং হোতি, তস্মা পদভাজনে ‘‘হিরঞ্ঞং ৰা’’তিআদি ৰুত্তং। উপক্খটং হোতীতি সজ্জিতং হোতি, সংহরিত্ৰা ঠপিতং, যস্মা পন ‘‘হিরঞ্ঞং ৰা’’তিআদিনা ৰচনেনস্স উপক্খটভাৰো দস্সিতো হোতি, তস্মা ‘‘উপক্খটং নামা’’তি পদং উদ্ধরিত্ৰা ৰিসুং পদভাজনং ন ৰুত্তং। ইমিনাতি উপক্খটং সন্ধাযাহ, তেনেৰস্স পদভাজনে ‘‘পচ্চুপট্ঠিতেনা’’তি ৰুত্তং। যঞ্হি উপক্খটং সংহরিত্ৰা ঠপিতং, তং পচ্চুপট্ঠিতং হোতীতি। অচ্ছাদেস্সামীতি ৰোহারৰচনমেতং ‘‘ইত্থন্নামস্স ভিক্খুনো দস্সামী’’তি অযং পনেত্থ অত্থো। তেনেৰস্স পদভাজনেপি ‘‘দস্সামী’’তি ৰুত্তং।
Cīvaracetāpannanti cīvaramūlaṃ, taṃ pana yasmā hiraññādīsu aññataraṃ hoti, tasmā padabhājane ‘‘hiraññaṃ vā’’tiādi vuttaṃ. Upakkhaṭaṃ hotīti sajjitaṃ hoti, saṃharitvā ṭhapitaṃ, yasmā pana ‘‘hiraññaṃ vā’’tiādinā vacanenassa upakkhaṭabhāvo dassito hoti, tasmā ‘‘upakkhaṭaṃ nāmā’’ti padaṃ uddharitvā visuṃ padabhājanaṃ na vuttaṃ. Imināti upakkhaṭaṃ sandhāyāha, tenevassa padabhājane ‘‘paccupaṭṭhitenā’’ti vuttaṃ. Yañhi upakkhaṭaṃ saṃharitvā ṭhapitaṃ, taṃ paccupaṭṭhitaṃ hotīti. Acchādessāmīti vohāravacanametaṃ ‘‘itthannāmassa bhikkhuno dassāmī’’ti ayaṃ panettha attho. Tenevassa padabhājanepi ‘‘dassāmī’’ti vuttaṃ.
তত্র চে সো ভিক্খূতি যত্র সো গহপতি ৰা গহপতানী ৰা তত্র সো ভিক্খু পুব্বে অপ্পৰারিতো উপসঙ্কমিত্ৰা চীৰরে ৰিকপ্পং আপজ্জেয্য চেতি অযমেত্থ পদসম্বন্ধো। তত্থ উপসঙ্কমিত্ৰাতি ইমস্স গন্ত্ৰাতি ইমিনাৰ অত্থে সিদ্ধে পচুরৰোহারৰসেন ‘‘ঘর’’ন্তি ৰুত্তং। যত্র পন সো দাযকো তত্র গন্ত্ৰাতি অযমেৰেত্থ অত্থো, তস্মা পুনপি ৰুত্তং ‘‘যত্থ কত্থচি উপসঙ্কমিত্ৰা’’তি। ৰিকপ্পং আপজ্জেয্যাতি ৰিসিট্ঠকপ্পং অধিকৰিধানং আপজ্জেয্য, পদভাজনে পন যেনাকারেন ৰিকপ্পং আপন্নো হোতি তমেৰ দস্সেতুং ‘‘আযতং ৰা’’তিআদি ৰুত্তং। সাধূতি আযাচনে নিপাতো। ৰতাতি পরিৰিতক্কে। মন্তি অত্তানং নিদ্দিসতি। আযস্মাতি পরং আলপতি আমন্তেতি। যস্মা পনিদং সব্বং ব্যঞ্জনমত্তমেৰ, উত্তানত্থমেৰ, তস্মাস্স পদভাজনে অত্থো ন ৰুত্তো। কল্যাণকম্যতং উপাদাযাতি সুন্দরকামতং ৰিসিট্ঠকামতং চিত্তেন গহেত্ৰা, তস্স ‘‘আপজ্জেয্য চে’’তি ইমিনা সম্বন্ধো। যস্মা পন যো কল্যাণকম্যতং উপাদায আপজ্জতি, সো সাধত্থিকো মহগ্ঘত্থিকো হোতি, তস্মাস্স পদভাজনে ব্যঞ্জনং পহায অধিপ্পেতত্থমেৰ দস্সেতুং তদেৰ ৰচনং ৰুত্তং। যস্মা পন ন ইমস্স আপজ্জনমত্তেনেৰ আপত্তি সীসং এতি, তস্মা ‘‘তস্স ৰচনেনা’’তিআদি ৰুত্তং।
Tatra ce so bhikkhūti yatra so gahapati vā gahapatānī vā tatra so bhikkhu pubbe appavārito upasaṅkamitvā cīvare vikappaṃ āpajjeyya ceti ayamettha padasambandho. Tattha upasaṅkamitvāti imassa gantvāti imināva atthe siddhe pacuravohāravasena ‘‘ghara’’nti vuttaṃ. Yatra pana so dāyako tatra gantvāti ayamevettha attho, tasmā punapi vuttaṃ ‘‘yattha katthaci upasaṅkamitvā’’ti. Vikappaṃ āpajjeyyāti visiṭṭhakappaṃ adhikavidhānaṃ āpajjeyya, padabhājane pana yenākārena vikappaṃ āpanno hoti tameva dassetuṃ ‘‘āyataṃ vā’’tiādi vuttaṃ. Sādhūti āyācane nipāto. Vatāti parivitakke. Manti attānaṃ niddisati. Āyasmāti paraṃ ālapati āmanteti. Yasmā panidaṃ sabbaṃ byañjanamattameva, uttānatthameva, tasmāssa padabhājane attho na vutto. Kalyāṇakamyataṃ upādāyāti sundarakāmataṃ visiṭṭhakāmataṃ cittena gahetvā, tassa ‘‘āpajjeyya ce’’ti iminā sambandho. Yasmā pana yo kalyāṇakamyataṃ upādāya āpajjati, so sādhatthiko mahagghatthiko hoti, tasmāssa padabhājane byañjanaṃ pahāya adhippetatthameva dassetuṃ tadeva vacanaṃ vuttaṃ. Yasmā pana na imassa āpajjanamatteneva āpatti sīsaṃ eti, tasmā ‘‘tassa vacanenā’’tiādi vuttaṃ.
৫৩১. অনাপত্তি ঞাতকানন্তিআদীসু ঞাতকানং চীৰরে ৰিকপ্পং আপজ্জন্তস্স অনাপত্তীতি এৰমত্থো দট্ঠব্বো। মহগ্ঘং চেতাপেতুকামস্স অপ্পগ্ঘং চেতাপেতীতি গহপতিস্স ৰীসতিঅগ্ঘনকং চীৰরং চেতাপেতুকামস্স ‘‘অলং ময্হং এতেন, দসগ্ঘনকং ৰা অট্ঠগ্ঘনকং ৰা দেহী’’তি ৰদতি অনাপত্তি। অপ্পগ্ঘন্তি ইদঞ্চ অতিরেকনিৰারণত্থমেৰ ৰুত্তং, সমকেপি পন অনাপত্তি , তঞ্চ খো অগ্ঘৰসেনেৰ ন পমাণৰসেন, অগ্ঘৰড্ঢনকঞ্হি ইদং সিক্খাপদং। তস্মা যো ৰীসতিঅগ্ঘনকং অন্তরৰাসকং চেতাপেতুকামো , ‘‘তং এত্তকমেৰ মে অগ্ঘনকং চীৰরং দেহী’’তি ৰত্তুম্পি ৰট্টতি। সেসং উত্তানত্থমেৰ।
531.Anāpatti ñātakānantiādīsu ñātakānaṃ cīvare vikappaṃ āpajjantassa anāpattīti evamattho daṭṭhabbo. Mahagghaṃ cetāpetukāmassa appagghaṃ cetāpetīti gahapatissa vīsatiagghanakaṃ cīvaraṃ cetāpetukāmassa ‘‘alaṃ mayhaṃ etena, dasagghanakaṃ vā aṭṭhagghanakaṃ vā dehī’’ti vadati anāpatti. Appagghanti idañca atirekanivāraṇatthameva vuttaṃ, samakepi pana anāpatti , tañca kho agghavaseneva na pamāṇavasena, agghavaḍḍhanakañhi idaṃ sikkhāpadaṃ. Tasmā yo vīsatiagghanakaṃ antaravāsakaṃ cetāpetukāmo , ‘‘taṃ ettakameva me agghanakaṃ cīvaraṃ dehī’’ti vattumpi vaṭṭati. Sesaṃ uttānatthameva.
সমুট্ঠানাদীনিপি ততুত্তরিসিক্খাপদসদিসানেৰাতি।
Samuṭṭhānādīnipi tatuttarisikkhāpadasadisānevāti.
পঠমউপক্খটসিক্খাপদৰণ্ণনা নিট্ঠিতা।
Paṭhamaupakkhaṭasikkhāpadavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ৮. উপক্খটসিক্খাপদং • 8. Upakkhaṭasikkhāpadaṃ
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā / ৮. পঠমউপক্খটসিক্খাপদৰণ্ণনা • 8. Paṭhamaupakkhaṭasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ৮. পঠমউপক্খটসিক্খাপদৰণ্ণনা • 8. Paṭhamaupakkhaṭasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ৮. পঠমউপক্খটসিক্খাপদৰণ্ণনা • 8. Paṭhamaupakkhaṭasikkhāpadavaṇṇanā
