| Library / Tipiṭaka / д̇ибидага • Tipiṭaka / махаавибхан̇г̇а-адтагат̇аа • Mahāvibhaṅga-aṭṭhakathā |
8. батамаубагкадасигкаабад̣̇аван̣н̣анаа
8. Paṭhamaupakkhaṭasikkhāpadavaṇṇanā
527. д̇зна самаязнаад̇и убагкадасигкаабад̣̇ам̣. д̇ад̇т̇а ад̇т̇аавусо мам̣ со убадтаагод̇и аавусо, яам̣ д̇вам̣ бхан̣аси, ад̇т̇и зваруубо со мама убадтаагод̇и аяамзд̇т̇а ад̇т̇о. аби мзяяа звам̣ ход̇ийд̇и аби мз аяяа звам̣ ход̇и, аби маяяаа званд̇иби баато.
527.Tenasamayenāti upakkhaṭasikkhāpadaṃ. Tattha atthāvuso maṃ so upaṭṭhākoti āvuso, yaṃ tvaṃ bhaṇasi, atthi evarūpo so mama upaṭṭhākoti ayamettha attho. Api meyya evaṃ hotīti api me ayya evaṃ hoti, api mayyā evantipi pāṭho.
528-9. бхигкум̣ банзва уд̣̇д̣̇иссаад̇и зд̇т̇а уд̣̇д̣̇иссаад̇и абад̣̇исса аараб̣бха. яасмаа бана яам̣ уд̣̇д̣̇исса убагкадам̣ ход̇и, д̇ам̣ д̇ассад̇т̇ааяа убагкадам̣ наама ход̇и. д̇асмаасса бад̣̇абхааж̇анз ‘‘бхигкуссад̇т̇ааяаа’’д̇и вуд̇д̇ам̣.
528-9.Bhikkhuṃ paneva uddissāti ettha uddissāti apadissa ārabbha. Yasmā pana yaṃ uddissa upakkhaṭaṃ hoti, taṃ tassatthāya upakkhaṭaṃ nāma hoti. Tasmāssa padabhājane ‘‘bhikkhussatthāyā’’ti vuttaṃ.
бхигкум̣ аарамман̣ам̣ гарид̇ваад̇и бхигкум̣ бажжаяам̣ гад̇ваа, яан̃хи бхигкум̣ уд̣̇д̣̇исса убагкадам̣, д̇ам̣ нияамзнзва бхигкум̣ бажжаяам̣ гад̇ваа убагкадам̣ ход̇и, д̇зна вуд̇д̇ам̣ – ‘‘бхигкум̣ аарамман̣ам̣ гарид̇ваа’’д̇и. бажжаяоби хи ‘‘лабхад̇и мааро аарамман̣а’’нд̇иаад̣̇ийсу (сам̣. ни. 4.243) аарамман̣анд̇и ааг̇ад̇о. ид̣̇аани ‘‘уд̣̇д̣̇иссаа’’д̇и зд̇т̇а яо гад̇д̇аа, д̇асса аагаарад̣̇ассанад̇т̇ам̣ ‘‘бхигкум̣ ажчаад̣̇зд̇угаамо’’д̇и вуд̇д̇ам̣. бхигкум̣ ажчаад̣̇зд̇угаамзна хи д̇зна д̇ам̣ уд̣̇д̣̇исса убагкадам̣, на ан̃н̃зна гааран̣зна. ид̇и со ажчаад̣̇зд̇угаамо ход̇и. д̇зна вуд̇д̇ам̣ – ‘‘бхигкум̣ ажчаад̣̇зд̇угаамо’’д̇и.
Bhikkhuṃ ārammaṇaṃ karitvāti bhikkhuṃ paccayaṃ katvā, yañhi bhikkhuṃ uddissa upakkhaṭaṃ, taṃ niyameneva bhikkhuṃ paccayaṃ katvā upakkhaṭaṃ hoti, tena vuttaṃ – ‘‘bhikkhuṃ ārammaṇaṃ karitvā’’ti. Paccayopi hi ‘‘labhati māro ārammaṇa’’ntiādīsu (saṃ. ni. 4.243) ārammaṇanti āgato. Idāni ‘‘uddissā’’ti ettha yo kattā, tassa ākāradassanatthaṃ ‘‘bhikkhuṃ acchādetukāmo’’ti vuttaṃ. Bhikkhuṃ acchādetukāmena hi tena taṃ uddissa upakkhaṭaṃ, na aññena kāraṇena. Iti so acchādetukāmo hoti. Tena vuttaṃ – ‘‘bhikkhuṃ acchādetukāmo’’ti.
ан̃н̃аад̇агасса г̇ахабад̇исса ваад̇и ан̃н̃аад̇агзна г̇ахабад̇инаа ваад̇и ад̇т̇о. гаран̣ад̇т̇з хи ид̣̇ам̣ саамиважанам̣. бад̣̇абхааж̇анз бана б̣яан̃ж̇анам̣ авижаарзд̇ваа ад̇т̇амад̇д̇амзва д̣̇ассзд̇ум̣ ‘‘ан̃н̃аад̇аго наама…бз… г̇ахабад̇и наамаа’’д̇иаад̣̇и вуд̇д̇ам̣.
Aññātakassagahapatissa vāti aññātakena gahapatinā vāti attho. Karaṇatthe hi idaṃ sāmivacanaṃ. Padabhājane pana byañjanaṃ avicāretvā atthamattameva dassetuṃ ‘‘aññātako nāma…pe… gahapati nāmā’’tiādi vuttaṃ.
жийваражзд̇аабаннанд̇и жийварамуулам̣, д̇ам̣ бана яасмаа хиран̃н̃аад̣̇ийсу ан̃н̃ад̇арам̣ ход̇и, д̇асмаа бад̣̇абхааж̇анз ‘‘хиран̃н̃ам̣ ваа’’д̇иаад̣̇и вуд̇д̇ам̣. убагкадам̣ ход̇ийд̇и саж̇ж̇ид̇ам̣ ход̇и, сам̣харид̇ваа табид̇ам̣, яасмаа бана ‘‘хиран̃н̃ам̣ ваа’’д̇иаад̣̇инаа важанзнасса убагкадабхааво д̣̇ассид̇о ход̇и, д̇асмаа ‘‘убагкадам̣ наамаа’’д̇и бад̣̇ам̣ уд̣̇д̇харид̇ваа висум̣ бад̣̇абхааж̇анам̣ на вуд̇д̇ам̣. иминаад̇и убагкадам̣ санд̇хааяааха, д̇знзвасса бад̣̇абхааж̇анз ‘‘бажжубадтид̇знаа’’д̇и вуд̇д̇ам̣. яан̃хи убагкадам̣ сам̣харид̇ваа табид̇ам̣, д̇ам̣ бажжубадтид̇ам̣ ход̇ийд̇и. ажчаад̣̇зссаамийд̇и вохаараважанамзд̇ам̣ ‘‘ид̇т̇аннаамасса бхигкуно д̣̇ассаамий’’д̇и аяам̣ банзд̇т̇а ад̇т̇о. д̇знзвасса бад̣̇абхааж̇анзби ‘‘д̣̇ассаамий’’д̇и вуд̇д̇ам̣.
Cīvaracetāpannanti cīvaramūlaṃ, taṃ pana yasmā hiraññādīsu aññataraṃ hoti, tasmā padabhājane ‘‘hiraññaṃ vā’’tiādi vuttaṃ. Upakkhaṭaṃ hotīti sajjitaṃ hoti, saṃharitvā ṭhapitaṃ, yasmā pana ‘‘hiraññaṃ vā’’tiādinā vacanenassa upakkhaṭabhāvo dassito hoti, tasmā ‘‘upakkhaṭaṃ nāmā’’ti padaṃ uddharitvā visuṃ padabhājanaṃ na vuttaṃ. Imināti upakkhaṭaṃ sandhāyāha, tenevassa padabhājane ‘‘paccupaṭṭhitenā’’ti vuttaṃ. Yañhi upakkhaṭaṃ saṃharitvā ṭhapitaṃ, taṃ paccupaṭṭhitaṃ hotīti. Acchādessāmīti vohāravacanametaṃ ‘‘itthannāmassa bhikkhuno dassāmī’’ti ayaṃ panettha attho. Tenevassa padabhājanepi ‘‘dassāmī’’ti vuttaṃ.
д̇ад̇ра жз со бхигкууд̇и яад̇ра со г̇ахабад̇и ваа г̇ахабад̇ааний ваа д̇ад̇ра со бхигку буб̣б̣з аббаваарид̇о убасан̇гамид̇ваа жийварз вигаббам̣ аабаж̇ж̇зяяа жзд̇и аяамзд̇т̇а бад̣̇асамб̣анд̇хо. д̇ад̇т̇а убасан̇гамид̇ваад̇и имасса г̇анд̇ваад̇и иминаава ад̇т̇з сид̣̇д̇хз бажуравохааравасзна ‘‘гхара’’нд̇и вуд̇д̇ам̣. яад̇ра бана со д̣̇ааяаго д̇ад̇ра г̇анд̇ваад̇и аяамзвзд̇т̇а ад̇т̇о, д̇асмаа бунаби вуд̇д̇ам̣ ‘‘яад̇т̇а гад̇т̇ажи убасан̇гамид̇ваа’’д̇и. вигаббам̣ аабаж̇ж̇зяяаад̇и висидтагаббам̣ ад̇хигавид̇хаанам̣ аабаж̇ж̇зяяа, бад̣̇абхааж̇анз бана язнаагаарзна вигаббам̣ аабанно ход̇и д̇амзва д̣̇ассзд̇ум̣ ‘‘ааяад̇ам̣ ваа’’д̇иаад̣̇и вуд̇д̇ам̣. саад̇хууд̇и ааяаажанз нибаад̇о. вад̇аад̇и баривид̇аггз. манд̇и ад̇д̇аанам̣ нид̣̇д̣̇исад̇и. ааяасмаад̇и барам̣ аалабад̇и ааманд̇зд̇и. яасмаа банид̣̇ам̣ саб̣б̣ам̣ б̣яан̃ж̇анамад̇д̇амзва, уд̇д̇аанад̇т̇амзва, д̇асмаасса бад̣̇абхааж̇анз ад̇т̇о на вуд̇д̇о. галяаан̣агамяад̇ам̣ убаад̣̇ааяаад̇и сунд̣̇арагаамад̇ам̣ висидтагаамад̇ам̣ жид̇д̇зна г̇ахзд̇ваа, д̇асса ‘‘аабаж̇ж̇зяяа жз’’д̇и иминаа самб̣анд̇хо. яасмаа бана яо галяаан̣агамяад̇ам̣ убаад̣̇ааяа аабаж̇ж̇ад̇и, со саад̇хад̇т̇иго махаг̇гхад̇т̇иго ход̇и, д̇асмаасса бад̣̇абхааж̇анз б̣яан̃ж̇анам̣ бахааяа ад̇хиббзд̇ад̇т̇амзва д̣̇ассзд̇ум̣ д̇ад̣̇зва важанам̣ вуд̇д̇ам̣. яасмаа бана на имасса аабаж̇ж̇анамад̇д̇знзва аабад̇д̇и сийсам̣ зд̇и, д̇асмаа ‘‘д̇асса важанзнаа’’д̇иаад̣̇и вуд̇д̇ам̣.
Tatra ce so bhikkhūti yatra so gahapati vā gahapatānī vā tatra so bhikkhu pubbe appavārito upasaṅkamitvā cīvare vikappaṃ āpajjeyya ceti ayamettha padasambandho. Tattha upasaṅkamitvāti imassa gantvāti imināva atthe siddhe pacuravohāravasena ‘‘ghara’’nti vuttaṃ. Yatra pana so dāyako tatra gantvāti ayamevettha attho, tasmā punapi vuttaṃ ‘‘yattha katthaci upasaṅkamitvā’’ti. Vikappaṃ āpajjeyyāti visiṭṭhakappaṃ adhikavidhānaṃ āpajjeyya, padabhājane pana yenākārena vikappaṃ āpanno hoti tameva dassetuṃ ‘‘āyataṃ vā’’tiādi vuttaṃ. Sādhūti āyācane nipāto. Vatāti parivitakke. Manti attānaṃ niddisati. Āyasmāti paraṃ ālapati āmanteti. Yasmā panidaṃ sabbaṃ byañjanamattameva, uttānatthameva, tasmāssa padabhājane attho na vutto. Kalyāṇakamyataṃ upādāyāti sundarakāmataṃ visiṭṭhakāmataṃ cittena gahetvā, tassa ‘‘āpajjeyya ce’’ti iminā sambandho. Yasmā pana yo kalyāṇakamyataṃ upādāya āpajjati, so sādhatthiko mahagghatthiko hoti, tasmāssa padabhājane byañjanaṃ pahāya adhippetatthameva dassetuṃ tadeva vacanaṃ vuttaṃ. Yasmā pana na imassa āpajjanamatteneva āpatti sīsaṃ eti, tasmā ‘‘tassa vacanenā’’tiādi vuttaṃ.
531. анаабад̇д̇и н̃аад̇агаананд̇иаад̣̇ийсу н̃аад̇агаанам̣ жийварз вигаббам̣ аабаж̇ж̇анд̇асса анаабад̇д̇ийд̇и звамад̇т̇о д̣̇адтаб̣б̣о. махаг̇гхам̣ жзд̇аабзд̇угаамасса аббаг̇гхам̣ жзд̇аабзд̇ийд̇и г̇ахабад̇исса вийсад̇иаг̇гханагам̣ жийварам̣ жзд̇аабзд̇угаамасса ‘‘алам̣ маяхам̣ зд̇зна, д̣̇асаг̇гханагам̣ ваа адтаг̇гханагам̣ ваа д̣̇зхий’’д̇и вад̣̇ад̇и анаабад̇д̇и. аббаг̇гханд̇и ид̣̇ан̃жа ад̇ирзганивааран̣ад̇т̇амзва вуд̇д̇ам̣, самагзби бана анаабад̇д̇и , д̇ан̃жа ко аг̇гхавасзнзва на бамаан̣авасзна, аг̇гхавад̣дханаган̃хи ид̣̇ам̣ сигкаабад̣̇ам̣. д̇асмаа яо вийсад̇иаг̇гханагам̣ анд̇араваасагам̣ жзд̇аабзд̇угаамо , ‘‘д̇ам̣ зд̇д̇агамзва мз аг̇гханагам̣ жийварам̣ д̣̇зхий’’д̇и вад̇д̇умби ваддад̇и. сзсам̣ уд̇д̇аанад̇т̇амзва.
531.Anāpatti ñātakānantiādīsu ñātakānaṃ cīvare vikappaṃ āpajjantassa anāpattīti evamattho daṭṭhabbo. Mahagghaṃ cetāpetukāmassa appagghaṃ cetāpetīti gahapatissa vīsatiagghanakaṃ cīvaraṃ cetāpetukāmassa ‘‘alaṃ mayhaṃ etena, dasagghanakaṃ vā aṭṭhagghanakaṃ vā dehī’’ti vadati anāpatti. Appagghanti idañca atirekanivāraṇatthameva vuttaṃ, samakepi pana anāpatti , tañca kho agghavaseneva na pamāṇavasena, agghavaḍḍhanakañhi idaṃ sikkhāpadaṃ. Tasmā yo vīsatiagghanakaṃ antaravāsakaṃ cetāpetukāmo , ‘‘taṃ ettakameva me agghanakaṃ cīvaraṃ dehī’’ti vattumpi vaṭṭati. Sesaṃ uttānatthameva.
самудтаанаад̣̇ийниби д̇ад̇уд̇д̇арисигкаабад̣̇асад̣̇исаанзваад̇и.
Samuṭṭhānādīnipi tatuttarisikkhāpadasadisānevāti.
батамаубагкадасигкаабад̣̇аван̣н̣анаа нидтид̇аа.
Paṭhamaupakkhaṭasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 8. убагкадасигкаабад̣̇ам̣ • 8. Upakkhaṭasikkhāpadaṃ
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / 8. батамаубагкадасигкаабад̣̇аван̣н̣анаа • 8. Paṭhamaupakkhaṭasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 8. батамаубагкадасигкаабад̣̇аван̣н̣анаа • 8. Paṭhamaupakkhaṭasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 8. батамаубагкадасигкаабад̣̇аван̣н̣анаа • 8. Paṭhamaupakkhaṭasikkhāpadavaṇṇanā
