| Library / Tipiṭaka / तिपिटक • Tipiṭaka / सारत्थदीपनी-टीका • Sāratthadīpanī-ṭīkā |
८. पठमउपक्खटसिक्खापदवण्णना
8. Paṭhamaupakkhaṭasikkhāpadavaṇṇanā
५२७. अट्ठमे अपि मय्याति पाठेपि सोयेवत्थो। अय्याति पन बहुवचनेन आमन्तनं कतं।
527. Aṭṭhame api mayyāti pāṭhepi soyevattho. Ayyāti pana bahuvacanena āmantanaṃ kataṃ.
५२८-५२९. अपदिस्साति ‘‘इत्थन्नामस्स भिक्खुनो दस्सामी’’ति एवं अपदिसित्वा। पच्चयं कत्वाति कारणं कत्वा। उद्दिस्साति एत्थ यो कत्ताति ‘‘उद्दिस्सा’’ति इमिना वुत्तउद्दिसनकिरियाय यो कत्ता। चीवरं चेतापेन्ति परिवत्तेन्ति एतेनाति चीवरचेतापन्नं। न-कारागमं कत्वा चीवरचेतापन्नन्ति वुत्तं, ‘‘चीवरचेतापन’’न्तिपि पठन्ति। पचुरवोहारवसेनाति येभुय्यवोहारवसेन। येभुय्यवसेन हि घरसामिकं दट्ठुकामा तस्स घरं गच्छन्तीति तथेव बहुलं वोहारो। ब्यञ्जनमत्तमेवाति अत्थो नेतब्बो नत्थीति अधिप्पायो।
528-529.Apadissāti ‘‘itthannāmassa bhikkhuno dassāmī’’ti evaṃ apadisitvā. Paccayaṃ katvāti kāraṇaṃ katvā. Uddissāti ettha yo kattāti ‘‘uddissā’’ti iminā vuttauddisanakiriyāya yo kattā. Cīvaraṃ cetāpenti parivattenti etenāti cīvaracetāpannaṃ. Na-kārāgamaṃ katvā cīvaracetāpannanti vuttaṃ, ‘‘cīvaracetāpana’’ntipi paṭhanti. Pacuravohāravasenāti yebhuyyavohāravasena. Yebhuyyavasena hi gharasāmikaṃ daṭṭhukāmā tassa gharaṃ gacchantīti tatheva bahulaṃ vohāro. Byañjanamattamevāti attho netabbo natthīti adhippāyo.
५३१. समकेपि पन अनापत्तीति यदग्घनकं सो दातुकामो होति, तदग्घनके अनापत्ति मूलं वड्ढेत्वा अधिकविधानं अनापन्नत्ता। एत्थ च ‘‘दातुकामोम्ही’’ति अत्तनो सन्तिके अवुत्तेपि दातुकामतं सुत्वा यदग्घनकं सो दातुकामो होति, तदग्घनकं आहरापेतुं वट्टति। अग्घवड्ढनकञ्हि इदं सिक्खापदन्ति एत्थ अग्घवड्ढनं एतस्स अत्थीति अग्घवड्ढनकं, अग्घवड्ढनं सन्धाय इदं सिक्खापदं पञ्ञत्तन्ति अधिप्पायो। चीवरं देहीति सङ्घाटिआदीसु यंकिञ्चि चीवरं सन्धाय वदति। चीवरे भिय्योकम्यता, अञ्ञातकविञ्ञत्ति, ताय च पटिलाभोति इमानेत्थ तीणि अङ्गानि।
531.Samakepi pana anāpattīti yadagghanakaṃ so dātukāmo hoti, tadagghanake anāpatti mūlaṃ vaḍḍhetvā adhikavidhānaṃ anāpannattā. Ettha ca ‘‘dātukāmomhī’’ti attano santike avuttepi dātukāmataṃ sutvā yadagghanakaṃ so dātukāmo hoti, tadagghanakaṃ āharāpetuṃ vaṭṭati. Agghavaḍḍhanakañhi idaṃ sikkhāpadanti ettha agghavaḍḍhanaṃ etassa atthīti agghavaḍḍhanakaṃ, agghavaḍḍhanaṃ sandhāya idaṃ sikkhāpadaṃ paññattanti adhippāyo. Cīvaraṃ dehīti saṅghāṭiādīsu yaṃkiñci cīvaraṃ sandhāya vadati. Cīvare bhiyyokamyatā, aññātakaviññatti, tāya ca paṭilābhoti imānettha tīṇi aṅgāni.
पठमउपक्खटसिक्खापदवण्णना निट्ठिता।
Paṭhamaupakkhaṭasikkhāpadavaṇṇanā niṭṭhitā.
५३२. दुतियउपक्खटे वत्तब्बं नत्थि।
532. Dutiyaupakkhaṭe vattabbaṃ natthi.
Related texts:
तिपिटक (मूल) • Tipiṭaka (Mūla) / विनयपिटक • Vinayapiṭaka / महाविभङ्ग • Mahāvibhaṅga
८. उपक्खटसिक्खापदं • 8. Upakkhaṭasikkhāpadaṃ
९. दुतियउपक्खटसिक्खापदं • 9. Dutiyaupakkhaṭasikkhāpadaṃ
अट्ठकथा • Aṭṭhakathā / विनयपिटक (अट्ठकथा) • Vinayapiṭaka (aṭṭhakathā) / महाविभङ्ग-अट्ठकथा • Mahāvibhaṅga-aṭṭhakathā
८. पठमउपक्खटसिक्खापदवण्णना • 8. Paṭhamaupakkhaṭasikkhāpadavaṇṇanā
९. दुतियउपक्खटसिक्खापदवण्णना • 9. Dutiyaupakkhaṭasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / वजिरबुद्धि-टीका • Vajirabuddhi-ṭīkā
८. पठमउपक्खटसिक्खापदवण्णना • 8. Paṭhamaupakkhaṭasikkhāpadavaṇṇanā
९. दुतियउपक्खटसिक्खापदवण्णना • 9. Dutiyaupakkhaṭasikkhāpadavaṇṇanā
टीका • Tīkā / विनयपिटक (टीका) • Vinayapiṭaka (ṭīkā) / विमतिविनोदनी-टीका • Vimativinodanī-ṭīkā / ८. पठमउपक्खटसिक्खापदवण्णना • 8. Paṭhamaupakkhaṭasikkhāpadavaṇṇanā
