| Library / Tipiṭaka / ತಿಪಿಟಕ • Tipiṭaka / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā |
೮. ಪಠಮಉಪಕ್ಖಟಸಿಕ್ಖಾಪದವಣ್ಣನಾ
8. Paṭhamaupakkhaṭasikkhāpadavaṇṇanā
೫೨೭. ಅಟ್ಠಮೇ ಅಪಿ ಮಯ್ಯಾತಿ ಪಾಠೇಪಿ ಸೋಯೇವತ್ಥೋ। ಅಯ್ಯಾತಿ ಪನ ಬಹುವಚನೇನ ಆಮನ್ತನಂ ಕತಂ।
527. Aṭṭhame api mayyāti pāṭhepi soyevattho. Ayyāti pana bahuvacanena āmantanaṃ kataṃ.
೫೨೮-೫೨೯. ಅಪದಿಸ್ಸಾತಿ ‘‘ಇತ್ಥನ್ನಾಮಸ್ಸ ಭಿಕ್ಖುನೋ ದಸ್ಸಾಮೀ’’ತಿ ಏವಂ ಅಪದಿಸಿತ್ವಾ। ಪಚ್ಚಯಂ ಕತ್ವಾತಿ ಕಾರಣಂ ಕತ್ವಾ। ಉದ್ದಿಸ್ಸಾತಿ ಏತ್ಥ ಯೋ ಕತ್ತಾತಿ ‘‘ಉದ್ದಿಸ್ಸಾ’’ತಿ ಇಮಿನಾ ವುತ್ತಉದ್ದಿಸನಕಿರಿಯಾಯ ಯೋ ಕತ್ತಾ। ಚೀವರಂ ಚೇತಾಪೇನ್ತಿ ಪರಿವತ್ತೇನ್ತಿ ಏತೇನಾತಿ ಚೀವರಚೇತಾಪನ್ನಂ। ನ-ಕಾರಾಗಮಂ ಕತ್ವಾ ಚೀವರಚೇತಾಪನ್ನನ್ತಿ ವುತ್ತಂ, ‘‘ಚೀವರಚೇತಾಪನ’’ನ್ತಿಪಿ ಪಠನ್ತಿ। ಪಚುರವೋಹಾರವಸೇನಾತಿ ಯೇಭುಯ್ಯವೋಹಾರವಸೇನ। ಯೇಭುಯ್ಯವಸೇನ ಹಿ ಘರಸಾಮಿಕಂ ದಟ್ಠುಕಾಮಾ ತಸ್ಸ ಘರಂ ಗಚ್ಛನ್ತೀತಿ ತಥೇವ ಬಹುಲಂ ವೋಹಾರೋ। ಬ್ಯಞ್ಜನಮತ್ತಮೇವಾತಿ ಅತ್ಥೋ ನೇತಬ್ಬೋ ನತ್ಥೀತಿ ಅಧಿಪ್ಪಾಯೋ।
528-529.Apadissāti ‘‘itthannāmassa bhikkhuno dassāmī’’ti evaṃ apadisitvā. Paccayaṃ katvāti kāraṇaṃ katvā. Uddissāti ettha yo kattāti ‘‘uddissā’’ti iminā vuttauddisanakiriyāya yo kattā. Cīvaraṃ cetāpenti parivattenti etenāti cīvaracetāpannaṃ. Na-kārāgamaṃ katvā cīvaracetāpannanti vuttaṃ, ‘‘cīvaracetāpana’’ntipi paṭhanti. Pacuravohāravasenāti yebhuyyavohāravasena. Yebhuyyavasena hi gharasāmikaṃ daṭṭhukāmā tassa gharaṃ gacchantīti tatheva bahulaṃ vohāro. Byañjanamattamevāti attho netabbo natthīti adhippāyo.
೫೩೧. ಸಮಕೇಪಿ ಪನ ಅನಾಪತ್ತೀತಿ ಯದಗ್ಘನಕಂ ಸೋ ದಾತುಕಾಮೋ ಹೋತಿ, ತದಗ್ಘನಕೇ ಅನಾಪತ್ತಿ ಮೂಲಂ ವಡ್ಢೇತ್ವಾ ಅಧಿಕವಿಧಾನಂ ಅನಾಪನ್ನತ್ತಾ। ಏತ್ಥ ಚ ‘‘ದಾತುಕಾಮೋಮ್ಹೀ’’ತಿ ಅತ್ತನೋ ಸನ್ತಿಕೇ ಅವುತ್ತೇಪಿ ದಾತುಕಾಮತಂ ಸುತ್ವಾ ಯದಗ್ಘನಕಂ ಸೋ ದಾತುಕಾಮೋ ಹೋತಿ, ತದಗ್ಘನಕಂ ಆಹರಾಪೇತುಂ ವಟ್ಟತಿ। ಅಗ್ಘವಡ್ಢನಕಞ್ಹಿ ಇದಂ ಸಿಕ್ಖಾಪದನ್ತಿ ಏತ್ಥ ಅಗ್ಘವಡ್ಢನಂ ಏತಸ್ಸ ಅತ್ಥೀತಿ ಅಗ್ಘವಡ್ಢನಕಂ, ಅಗ್ಘವಡ್ಢನಂ ಸನ್ಧಾಯ ಇದಂ ಸಿಕ್ಖಾಪದಂ ಪಞ್ಞತ್ತನ್ತಿ ಅಧಿಪ್ಪಾಯೋ। ಚೀವರಂ ದೇಹೀತಿ ಸಙ್ಘಾಟಿಆದೀಸು ಯಂಕಿಞ್ಚಿ ಚೀವರಂ ಸನ್ಧಾಯ ವದತಿ। ಚೀವರೇ ಭಿಯ್ಯೋಕಮ್ಯತಾ, ಅಞ್ಞಾತಕವಿಞ್ಞತ್ತಿ, ತಾಯ ಚ ಪಟಿಲಾಭೋತಿ ಇಮಾನೇತ್ಥ ತೀಣಿ ಅಙ್ಗಾನಿ।
531.Samakepi pana anāpattīti yadagghanakaṃ so dātukāmo hoti, tadagghanake anāpatti mūlaṃ vaḍḍhetvā adhikavidhānaṃ anāpannattā. Ettha ca ‘‘dātukāmomhī’’ti attano santike avuttepi dātukāmataṃ sutvā yadagghanakaṃ so dātukāmo hoti, tadagghanakaṃ āharāpetuṃ vaṭṭati. Agghavaḍḍhanakañhi idaṃ sikkhāpadanti ettha agghavaḍḍhanaṃ etassa atthīti agghavaḍḍhanakaṃ, agghavaḍḍhanaṃ sandhāya idaṃ sikkhāpadaṃ paññattanti adhippāyo. Cīvaraṃ dehīti saṅghāṭiādīsu yaṃkiñci cīvaraṃ sandhāya vadati. Cīvare bhiyyokamyatā, aññātakaviññatti, tāya ca paṭilābhoti imānettha tīṇi aṅgāni.
ಪಠಮಉಪಕ್ಖಟಸಿಕ್ಖಾಪದವಣ್ಣನಾ ನಿಟ್ಠಿತಾ।
Paṭhamaupakkhaṭasikkhāpadavaṇṇanā niṭṭhitā.
೫೩೨. ದುತಿಯಉಪಕ್ಖಟೇ ವತ್ತಬ್ಬಂ ನತ್ಥಿ।
532. Dutiyaupakkhaṭe vattabbaṃ natthi.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಿಭಙ್ಗ • Mahāvibhaṅga
೮. ಉಪಕ್ಖಟಸಿಕ್ಖಾಪದಂ • 8. Upakkhaṭasikkhāpadaṃ
೯. ದುತಿಯಉಪಕ್ಖಟಸಿಕ್ಖಾಪದಂ • 9. Dutiyaupakkhaṭasikkhāpadaṃ
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಿಭಙ್ಗ-ಅಟ್ಠಕಥಾ • Mahāvibhaṅga-aṭṭhakathā
೮. ಪಠಮಉಪಕ್ಖಟಸಿಕ್ಖಾಪದವಣ್ಣನಾ • 8. Paṭhamaupakkhaṭasikkhāpadavaṇṇanā
೯. ದುತಿಯಉಪಕ್ಖಟಸಿಕ್ಖಾಪದವಣ್ಣನಾ • 9. Dutiyaupakkhaṭasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā
೮. ಪಠಮಉಪಕ್ಖಟಸಿಕ್ಖಾಪದವಣ್ಣನಾ • 8. Paṭhamaupakkhaṭasikkhāpadavaṇṇanā
೯. ದುತಿಯಉಪಕ್ಖಟಸಿಕ್ಖಾಪದವಣ್ಣನಾ • 9. Dutiyaupakkhaṭasikkhāpadavaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ೮. ಪಠಮಉಪಕ್ಖಟಸಿಕ್ಖಾಪದವಣ್ಣನಾ • 8. Paṭhamaupakkhaṭasikkhāpadavaṇṇanā
