| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. පඨමඋපනිසාසුත්‌තං
3. Paṭhamaupanisāsuttaṃ
3. 1 ‘‘දුස්‌සීලස්‌ස, භික්‌ඛවෙ, සීලවිපන්‌නස්‌ස හතූපනිසො හොති අවිප්‌පටිසාරො. අවිප්‌පටිසාරෙ අසති අවිප්‌පටිසාරවිපන්‌නස්‌ස හතූපනිසං හොති පාමොජ්‌ජං. පාමොජ්‌ජෙ අසති පාමොජ්‌ජවිපන්‌නස්‌ස හතූපනිසා හොති පීති. පීතියා අසති පීතිවිපන්‌නස්‌ස හතූපනිසා හොති පස්‌සද්‌ධි. පස්‌සද්‌ධියා අසති පස්‌සද්‌ධිවිපන්‌නස්‌ස හතූපනිසං හොති සුඛං. සුඛෙ අසති සුඛවිපන්‌නස්‌ස හතූපනිසො හොති සම්‌මාසමාධි. සම්‌මාසමාධිම්‌හි අසති සම්‌මාසමාධිවිපන්‌නස්‌ස හතූපනිසං හොති යථාභූතඤාණදස්‌සනං. යථාභූතඤාණදස්‌සනෙ අසති යථාභූතඤාණදස්‌සනවිපන්‌නස්‌ස හතූපනිසා හොති නිබ්‌බිදා. නිබ්‌බිදාය අසති නිබ්‌බිදාවිපන්‌නස්‌ස හතූපනිසො හොති විරාගො. විරාගෙ අසති විරාගවිපන්‌නස්‌ස හතූපනිසං හොති විමුත්‌තිඤාණදස්‌සනං.
3.2 ‘‘Dussīlassa, bhikkhave, sīlavipannassa hatūpaniso hoti avippaṭisāro. Avippaṭisāre asati avippaṭisāravipannassa hatūpanisaṃ hoti pāmojjaṃ. Pāmojje asati pāmojjavipannassa hatūpanisā hoti pīti. Pītiyā asati pītivipannassa hatūpanisā hoti passaddhi. Passaddhiyā asati passaddhivipannassa hatūpanisaṃ hoti sukhaṃ. Sukhe asati sukhavipannassa hatūpaniso hoti sammāsamādhi. Sammāsamādhimhi asati sammāsamādhivipannassa hatūpanisaṃ hoti yathābhūtañāṇadassanaṃ. Yathābhūtañāṇadassane asati yathābhūtañāṇadassanavipannassa hatūpanisā hoti nibbidā. Nibbidāya asati nibbidāvipannassa hatūpaniso hoti virāgo. Virāge asati virāgavipannassa hatūpanisaṃ hoti vimuttiñāṇadassanaṃ.
‘‘සෙය්‍යථාපි, භික්‌ඛවෙ, රුක්‌ඛො සාඛාපලාසවිපන්‌නො. තස්‌ස පපටිකාපි න පාරිපූරිං ගච්‌ඡති, තචොපි… ඵෙග්‌ගුපි… සාරොපි න පාරිපූරිං ගච්‌ඡති. එවමෙවං ඛො, භික්‌ඛවෙ, දුස්‌සීලස්‌ස සීලවිපන්‌නස්‌ස හතූපනිසො හොති අවිප්‌පටිසාරො, අවිප්‌පටිසාරෙ අසති අවිප්‌පටිසාරවිපන්‌නස්‌ස හතූපනිසං හොති පාමොජ්‌ජං…පෙ.… විමුත්‌තිඤාණදස්‌සනං.
‘‘Seyyathāpi, bhikkhave, rukkho sākhāpalāsavipanno. Tassa papaṭikāpi na pāripūriṃ gacchati, tacopi… pheggupi… sāropi na pāripūriṃ gacchati. Evamevaṃ kho, bhikkhave, dussīlassa sīlavipannassa hatūpaniso hoti avippaṭisāro, avippaṭisāre asati avippaṭisāravipannassa hatūpanisaṃ hoti pāmojjaṃ…pe… vimuttiñāṇadassanaṃ.
‘‘සීලවතො, භික්‌ඛවෙ, සීලසම්‌පන්‌නස්‌ස උපනිසසම්‌පන්‌නො හොති අවිප්‌පටිසාරො, අවිප්‌පටිසාරෙ සති අවිප්‌පටිසාරසම්‌පන්‌නස්‌ස උපනිසසම්‌පන්‌නං හොති පාමොජ්‌ජං, පාමොජ්‌ජෙ සති පාමොජ්‌ජසම්‌පන්‌නස්‌ස උපනිසසම්‌පන්‌නා හොති පීති, පීතියා සති පීතිසම්‌පන්‌නස්‌ස උපනිසසම්‌පන්‌නා හොති පස්‌සද්‌ධි, පස්‌සද්‌ධියා සති පස්‌සද්‌ධිසම්‌පන්‌නස්‌ස උපනිසසම්‌පන්‌නං හොති සුඛං, සුඛෙ සති සුඛසම්‌පන්‌නස්‌ස උපනිසසම්‌පන්‌නො හොති සම්‌මාසමාධි, සම්‌මාසමාධිම්‌හි සති සම්‌මාසමාධිසම්‌පන්‌නස්‌ස උපනිසසම්‌පන්‌නං හොති යථාභූතඤාණදස්‌සනං, යථාභූතඤාණදස්‌සනෙ සති යථාභූතඤාණදස්‌සනසම්‌පන්‌නස්‌ස උපනිසසම්‌පන්‌නා හොති නිබ්‌බිදා, නිබ්‌බිදාය සති නිබ්‌බිදාසම්‌පන්‌නස්‌ස උපනිසසම්‌පන්‌නො හොති විරාගො, විරාගෙ සති විරාගසම්‌පන්‌නස්‌ස උපනිසසම්‌පන්‌නං හොති විමුත්‌තිඤාණදස්‌සනං.
‘‘Sīlavato, bhikkhave, sīlasampannassa upanisasampanno hoti avippaṭisāro, avippaṭisāre sati avippaṭisārasampannassa upanisasampannaṃ hoti pāmojjaṃ, pāmojje sati pāmojjasampannassa upanisasampannā hoti pīti, pītiyā sati pītisampannassa upanisasampannā hoti passaddhi, passaddhiyā sati passaddhisampannassa upanisasampannaṃ hoti sukhaṃ, sukhe sati sukhasampannassa upanisasampanno hoti sammāsamādhi, sammāsamādhimhi sati sammāsamādhisampannassa upanisasampannaṃ hoti yathābhūtañāṇadassanaṃ, yathābhūtañāṇadassane sati yathābhūtañāṇadassanasampannassa upanisasampannā hoti nibbidā, nibbidāya sati nibbidāsampannassa upanisasampanno hoti virāgo, virāge sati virāgasampannassa upanisasampannaṃ hoti vimuttiñāṇadassanaṃ.
‘‘සෙය්‍යථාපි, භික්‌ඛවෙ, රුක්‌ඛො සාඛාපලාසසම්‌පන්‌නො. තස්‌ස පපටිකාපි පාරිපූරිං ගච්‌ඡති, තචොපි… ඵෙග්‌ගුපි… සාරොපි පාරිපූරිං ගච්‌ඡති. එවමෙවං ඛො, භික්‌ඛවෙ, සීලවතො සීලසම්‌පන්‌නස්‌ස උපනිසසම්‌පන්‌නො හොති අවිප්‌පටිසාරො, අවිප්‌පටිසාරෙ සති අවිප්‌පටිසාරසම්‌පන්‌නස්‌ස උපනිසසම්‌පන්‌නං හොති…පෙ.… විමුත්‌තිඤාණදස්‌සන’’න්‌ති. තතියං.
‘‘Seyyathāpi, bhikkhave, rukkho sākhāpalāsasampanno. Tassa papaṭikāpi pāripūriṃ gacchati, tacopi… pheggupi… sāropi pāripūriṃ gacchati. Evamevaṃ kho, bhikkhave, sīlavato sīlasampannassa upanisasampanno hoti avippaṭisāro, avippaṭisāre sati avippaṭisārasampannassa upanisasampannaṃ hoti…pe… vimuttiñāṇadassana’’nti. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-6. කිමත්‌ථියසුත්‌තාදිවණ්‌ණනා • 1-6. Kimatthiyasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-10. කිමත්‌ථියසුත්‌තාදිවණ්‌ණනා • 1-10. Kimatthiyasuttādivaṇṇanā
