| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
3. உருவேலவக்³கோ³
3. Uruvelavaggo
1. பட²மஉருவேலஸுத்தவண்ணனா
1. Paṭhamauruvelasuttavaṇṇanā
21. ததியஸ்ஸ பட²மே மஹாவேலா விய மஹாவேலா, விபுலவாலிகபுஞ்ஜதாய மஹந்தோ வேலாதடோ வியாதி அத்தோ². தேனாஹ ‘‘மஹாவாலிகராஸீதி அத்தோ²’’தி. உரு, மரு, ஸிகதா, வாலுகா, வண்ணு, வாலிகாதி இமே ஸத்³தா³ ஸமானத்தா², ப்³யஞ்ஜனமேவ நானங். தேனாஹ ‘‘உரூதி வாலிகா வுச்சதீ’’தி.
21. Tatiyassa paṭhame mahāvelā viya mahāvelā, vipulavālikapuñjatāya mahanto velātaṭo viyāti attho. Tenāha ‘‘mahāvālikarāsīti attho’’ti. Uru, maru, sikatā, vālukā, vaṇṇu, vālikāti ime saddā samānatthā, byañjanameva nānaṃ. Tenāha ‘‘urūti vālikā vuccatī’’ti.
நஜ்ஜாதி நத³தி ஸத்³தா³யதீதி நதீ³, தஸ்ஸா நஜ்ஜா, நதி³யா நின்னகா³யாதி அத்தோ². நேரஞ்ஜராயாதி ‘‘நேலஞ்ஜலாயா’’தி வத்தப்³பே³ ல-காரஸ்ஸ ர-காரங் கத்வா ‘‘நேரஞ்ஜராயா’’தி வுத்தங், கத்³த³மஸேவாலபணகாதி³தோ³ஸரஹிதஸலிலாயாதி அத்தோ². கேசி ‘‘நீலங்-ஜலாயாதி வத்தப்³பே³ நேரஞ்ஜராயா’’தி வத³ந்தி. நாமமேவ வா ஏதங் தஸ்ஸா நதி³யாதி வேதி³தப்³ப³ங். தஸ்ஸா நதி³யா தீரே யத்த² ப⁴க³வா விஹாஸி, தங் த³ஸ்ஸேதுங் ‘‘அஜபாலனிக்³ரோதே⁴’’தி வுத்தங். கஸ்மா பனாயங் அஜபாலனிக்³ரோதோ⁴ நாம ஜாதோதி ஆஹ ‘‘தஸ்ஸா’’திஆதி³. கேசி பன ‘‘யஸ்மா தத்த² வேதே³ ஸஜ்ஜா²யிதுங் அஸமத்தா² மஹல்லகப்³ராஹ்மணா பாகாரபரிக்கே²பயுத்தானி நிவேஸனானி கத்வா ஸப்³பே³ வஸிங்ஸு, தஸ்மாஸ்ஸ அஜபாலனிக்³ரோதோ⁴தி நாமங் ஜாத’’ந்தி வத³ந்தி . தத்ராயங் வசனத்தோ² – ந ஜபந்தீதி அஜபா, மந்தானங் அனஜ்ஜா²யகாதி அத்தோ². அஜபாலந்தி ஆதி³யந்தி நிவாஸங் எத்தா²தி அஜபாலோதி. அபரே பன வத³ந்தி ‘‘யஸ்மா மஜ்ஜ²ன்ஹிகஸமயே அந்தோபவிட்டே² அஜே அத்தனோ சா²யாய பாலேதி ரக்க²தி, தஸ்மா ‘அஜபாலோ’திஸ்ஸ நாமங் ருள்ஹ’’ந்தி. ஸப்³ப³த்தா²பி நாமமேதங் தஸ்ஸ ருக்க²ஸ்ஸ.
Najjāti nadati saddāyatīti nadī, tassā najjā, nadiyā ninnagāyāti attho. Nerañjarāyāti ‘‘nelañjalāyā’’ti vattabbe la-kārassa ra-kāraṃ katvā ‘‘nerañjarāyā’’ti vuttaṃ, kaddamasevālapaṇakādidosarahitasalilāyāti attho. Keci ‘‘nīlaṃ-jalāyāti vattabbe nerañjarāyā’’ti vadanti. Nāmameva vā etaṃ tassā nadiyāti veditabbaṃ. Tassā nadiyā tīre yattha bhagavā vihāsi, taṃ dassetuṃ ‘‘ajapālanigrodhe’’ti vuttaṃ. Kasmā panāyaṃ ajapālanigrodho nāma jātoti āha ‘‘tassā’’tiādi. Keci pana ‘‘yasmā tattha vede sajjhāyituṃ asamatthā mahallakabrāhmaṇā pākāraparikkhepayuttāni nivesanāni katvā sabbe vasiṃsu, tasmāssa ajapālanigrodhoti nāmaṃ jāta’’nti vadanti . Tatrāyaṃ vacanattho – na japantīti ajapā, mantānaṃ anajjhāyakāti attho. Ajapālanti ādiyanti nivāsaṃ etthāti ajapāloti. Apare pana vadanti ‘‘yasmā majjhanhikasamaye antopaviṭṭhe aje attano chāyāya pāleti rakkhati, tasmā ‘ajapālo’tissa nāmaṃ ruḷha’’nti. Sabbatthāpi nāmametaṃ tassa rukkhassa.
பட²மாபி⁴ஸம்பு³த்³தோ⁴தி பட²மங் அபி⁴ஸம்பு³த்³தோ⁴, அனுனாஸிகலோபேனாயங் நித்³தே³ஸோ. தேனேவாஹ ‘‘ஸம்பு³த்³தோ⁴ ஹுத்வா பட²மமேவா’’தி. பட²மந்தி ச பா⁴வனபுங்ஸகனித்³தே³ஸோ, தஸ்மா அபி⁴ஸம்பு³த்³தோ⁴ ஹுத்வா பட²மங் அஜபாலனிக்³ரோதே⁴ விஹராமீதி ஏவமெத்த² ஸம்ப³ந்தோ⁴ வேதி³தப்³போ³. அயங் விதக்கோதி அயங் ‘‘கின்னு க்²வாஹங்…பே॰… விஹரெய்ய’’ந்தி ஏவங் பவத்தவிதக்கோ. ஹத்தீ² ச வானரோ ச தித்திரோ ச ஹத்தி²வானரதித்திரா.
Paṭhamābhisambuddhoti paṭhamaṃ abhisambuddho, anunāsikalopenāyaṃ niddeso. Tenevāha ‘‘sambuddho hutvā paṭhamamevā’’ti. Paṭhamanti ca bhāvanapuṃsakaniddeso, tasmā abhisambuddho hutvā paṭhamaṃ ajapālanigrodhe viharāmīti evamettha sambandho veditabbo. Ayaṃ vitakkoti ayaṃ ‘‘kinnu khvāhaṃ…pe… vihareyya’’nti evaṃ pavattavitakko. Hatthī ca vānaro ca tittiro ca hatthivānaratittirā.
யே வுத்³த⁴மபசாயந்தீதி ஜாதிவுத்³தோ⁴, வயோவுத்³தோ⁴, கு³ணவுத்³தோ⁴தி தயோ வுத்³தா⁴. தேஸு ஜாதிஸம்பன்னோ ஜாதிவுத்³தோ⁴ நாம, வயே டி²தோ வயோவுத்³தோ⁴ நாம, கு³ணஸம்பன்னோ கு³ணவுத்³தோ⁴ நாம. தேஸு கு³ணஸம்பன்னோ வயோவுத்³தோ⁴ இமஸ்மிங் டா²னே வுத்³தோ⁴தி அதி⁴ப்பேதோ. அபசாயந்தீதி ஜெட்டா²பசாயிகாகம்மேன பூஜெந்தி. த⁴ம்மஸ்ஸ கோவிதா³தி ஜெட்டா²பசாயனத⁴ம்மஸ்ஸ கோவிதா³ குஸலா. தி³ட்டே²வ த⁴ம்மேதி இமஸ்மிங்யேவ அத்தபா⁴வே. பாஸங்ஸாதி பஸங்ஸாரஹா. ஸம்பராயே ச ஸுக்³க³தீதி ஸம்பரேதப்³பே³ இமங் லோகங் ஹித்வா க³ந்தப்³பே³ பரலோகேபி தேஸங் ஸுக³தியேவ. அயங் பனெத்த² பிண்ட³த்தோ² – க²த்தியா வா ஹொந்து ப்³ராஹ்மணா வா வெஸ்ஸா வா ஸுத்³தா³ வா க³ஹட்டா² வா பப்³ப³ஜிதா வா திரச்சா²னக³தா வா, யே கேசி ஸத்தா ஜெட்டா²பசிதிகம்மேன ஸீலாதி³கு³ணஸம்பன்னானங் வயோவுத்³தா⁴னங் அபசிதிங் கரொந்தி, தே இமஸ்மிஞ்ச அத்தபா⁴வே ஜெட்டா²பசிதிகாரகாதி பஸங்ஸங் வண்ணனங் தோ²மனங் லப⁴ந்தி, காயஸ்ஸ ச பே⁴தா³ ஸக்³கே³ நிப்³ப³த்தந்தீதி.
Ye vuddhamapacāyantīti jātivuddho, vayovuddho, guṇavuddhoti tayo vuddhā. Tesu jātisampanno jātivuddho nāma, vaye ṭhito vayovuddho nāma, guṇasampanno guṇavuddho nāma. Tesu guṇasampanno vayovuddho imasmiṃ ṭhāne vuddhoti adhippeto. Apacāyantīti jeṭṭhāpacāyikākammena pūjenti. Dhammassa kovidāti jeṭṭhāpacāyanadhammassa kovidā kusalā. Diṭṭheva dhammeti imasmiṃyeva attabhāve. Pāsaṃsāti pasaṃsārahā. Samparāye ca suggatīti samparetabbe imaṃ lokaṃ hitvā gantabbe paralokepi tesaṃ sugatiyeva. Ayaṃ panettha piṇḍattho – khattiyā vā hontu brāhmaṇā vā vessā vā suddā vā gahaṭṭhā vā pabbajitā vā tiracchānagatā vā, ye keci sattā jeṭṭhāpacitikammena sīlādiguṇasampannānaṃ vayovuddhānaṃ apacitiṃ karonti, te imasmiñca attabhāve jeṭṭhāpacitikārakāti pasaṃsaṃ vaṇṇanaṃ thomanaṃ labhanti, kāyassa ca bhedā sagge nibbattantīti.
அஞ்ஞஸ்மிந்தி பரஸ்மிங். அத்தா ந ஹோதீதி அஞ்ஞோ, பரோ. ஸோ பனெத்த² ந யோ கோசி அதி⁴ப்பேதோ, அத² கோ² க³ருட்டா²னியோ. தேனாஹ ‘‘கஞ்சி க³ருட்டா²னே அட்ட²பெத்வா’’தி. பதிஸ்ஸதி க³ருனோ ஆணங் ஸம்படிச்ச²தீதி பதிஸ்ஸோ, ந பதிஸ்ஸோ அப்பதிஸ்ஸோ, பதிஸ்ஸயரஹிதோ, க³ருபஸ்ஸயரஹிதோதி அத்தோ².
Aññasminti parasmiṃ. Attā na hotīti añño, paro. So panettha na yo koci adhippeto, atha kho garuṭṭhāniyo. Tenāha ‘‘kañci garuṭṭhāne aṭṭhapetvā’’ti. Patissati garuno āṇaṃ sampaṭicchatīti patisso, na patisso appatisso, patissayarahito, garupassayarahitoti attho.
ஸதே³வகேதி அவயவேன விக்³க³ஹோ ஸமுதா³யோ ஸமாஸத்தோ². ஸதே³வகக்³க³ஹணேன பஞ்சகாமாவசரதே³வக்³க³ஹணங் பாரிஸேஸஞாயேன இதரேஸங் பத³ந்தரேஹி ஸங்க³ஹிதத்தா. ஸமாரகக்³க³ஹணேன ச²ட்ட²காமாவசரதே³வக்³க³ஹணங் பச்சாஸத்திஞாயேன. தத்த² ஹி மாரோ ஜாதோ தன்னிவாஸீ ச ஹோதி. ஸப்³ரஹ்மகவசனேன ப்³ரஹ்மகாயிகாதி³ப்³ரஹ்மக்³க³ஹணங் பச்சாஸத்திஞாயேனேவ. ஸஸ்ஸமணப்³ராஹ்மணியா பஜாயாதி ஸாஸனஸ்ஸ பச்சத்தி²கஸமணப்³ராஹ்மணக்³க³ஹணங். நித³ஸ்ஸனமத்தஞ்சேதங் அபச்சத்தி²கானங் அஸமிதாபா³ஹிதபாபானஞ்ச ஸமணப்³ராஹ்மணானங் தேனேவ வசனேன க³ஹிதத்தா. காமங் ‘‘ஸதே³வகே’’திஆதி³விஸேஸனானங் வஸேன ஸத்தவிஸயோ லோகஸத்³தோ³தி விஞ்ஞாயதி துல்யயோக³விஸயத்தா தேஸங், ‘‘ஸலோமகோ ஸபக்க²கோ’’திஆதீ³ஸு பன அதுல்யயோகே³ அயங் ஸமாஸோ லப்³ப⁴தீதி ப்³யபி⁴சாரத³ஸ்ஸனதோ பஜாக³ஹணந்தி பஜாவசனேன ஸத்தலோகக்³க³ஹணங்.
Sadevaketi avayavena viggaho samudāyo samāsattho. Sadevakaggahaṇena pañcakāmāvacaradevaggahaṇaṃ pārisesañāyena itaresaṃ padantarehi saṅgahitattā. Samārakaggahaṇena chaṭṭhakāmāvacaradevaggahaṇaṃ paccāsattiñāyena. Tattha hi māro jāto tannivāsī ca hoti. Sabrahmakavacanena brahmakāyikādibrahmaggahaṇaṃ paccāsattiñāyeneva. Sassamaṇabrāhmaṇiyā pajāyāti sāsanassa paccatthikasamaṇabrāhmaṇaggahaṇaṃ. Nidassanamattañcetaṃ apaccatthikānaṃ asamitābāhitapāpānañca samaṇabrāhmaṇānaṃ teneva vacanena gahitattā. Kāmaṃ ‘‘sadevake’’tiādivisesanānaṃ vasena sattavisayo lokasaddoti viññāyati tulyayogavisayattā tesaṃ, ‘‘salomako sapakkhako’’tiādīsu pana atulyayoge ayaṃ samāso labbhatīti byabhicāradassanato pajāgahaṇanti pajāvacanena sattalokaggahaṇaṃ.
தே³வபா⁴வஸாமஞ்ஞேன மாரப்³ரஹ்மேஸு க³ஹிதேஸுபி இதரேஹி தேஸங் லப்³ப⁴மானவிஸேஸத³ஸ்ஸனத்த²ங் விஸுங் க³ஹணந்தி த³ஸ்ஸெந்தோ ‘‘மாரோ நாமா’’திஆதி³மாஹ. மாரோ ப்³ரஹ்மானம்பி விசக்கு²கம்மாய பஹோதீதி ஆஹ ‘‘ஸப்³பே³ஸ’’ந்தி. உபரீதி உபரிபா⁴கே³. ப்³ரஹ்மாதி த³ஸஸஹஸ்ஸிப்³ரஹ்மானங் ஸந்தா⁴யாஹ. ததா² சாஹ ‘‘த³ஸஹி அங்கு³லீஹீ’’திஆதி³. இத⁴ தீ³க⁴னிகாயாத³யோ விய பா³ஹிரகானம்பி க³ந்த²னிகாயோ லப்³ப⁴தீதி ஆஹ ‘‘ஏகனிகாயாதி³வஸேனா’’தி. வத்து²விஜ்ஜாதீ³தி ஆதி³-ஸத்³தே³ன விஜ்ஜாட்டா²னானி ஸங்க³ய்ஹந்தி. யதா²ஸகங் கம்மகிலேஸேஹி பஜாதத்தா நிப்³ப³த்தத்தா பஜா, ஸத்தனிகாயோ, தஸ்ஸா பஜாய. ஸதே³வமனுஸ்ஸாயாதி வா இமினா ஸம்முதிதே³வக்³க³ஹணங் தத³வஸிட்ட²மனுஸ்ஸலோகக்³க³ஹணஞ்ச த³ட்ட²ப்³ப³ங்.
Devabhāvasāmaññena mārabrahmesu gahitesupi itarehi tesaṃ labbhamānavisesadassanatthaṃ visuṃ gahaṇanti dassento ‘‘māro nāmā’’tiādimāha. Māro brahmānampi vicakkhukammāya pahotīti āha ‘‘sabbesa’’nti. Uparīti uparibhāge. Brahmāti dasasahassibrahmānaṃ sandhāyāha. Tathā cāha ‘‘dasahi aṅgulīhī’’tiādi. Idha dīghanikāyādayo viya bāhirakānampi ganthanikāyo labbhatīti āha ‘‘ekanikāyādivasenā’’ti. Vatthuvijjādīti ādi-saddena vijjāṭṭhānāni saṅgayhanti. Yathāsakaṃ kammakilesehi pajātattā nibbattattā pajā, sattanikāyo, tassā pajāya. Sadevamanussāyāti vā iminā sammutidevaggahaṇaṃ tadavasiṭṭhamanussalokaggahaṇañca daṭṭhabbaṃ.
ஏவங் பா⁴க³ஸோ லோகங் க³ஹெத்வா யோஜனங் த³ஸ்ஸெத்வா இதா³னி அபா⁴க³ஸோ லோகங் க³ஹெத்வா யோஜனங் த³ஸ்ஸேதுங் ‘‘அபிசெத்தா²’’திஆதி³ வுத்தங். லோகவஸேன வுத்தானி ‘‘லோகீயந்தி எத்த² கம்மங் கம்மப²லானீ’’தி கத்வா. பஜாவஸேன ‘‘ஹேதுபச்சயேஹி பஜாதா’’தி கத்வா. ஸீலஸம்பன்னதரந்தி எத்த² பரிபுண்ணஸம்பன்னதா அதி⁴ப்பேதா ‘‘ஸம்பன்னங் ஸாலிகேதா³ர’’ந்திஆதீ³ஸு (ஜா॰ 1.14.1) விய. தேனாஹ ‘‘அதி⁴கதரந்தி அத்தோ²’’தி. பரிபுண்ணஞ்ஹி அதி⁴கதரந்தி வத்துங் அரஹதி. காரணந்தி யுத்திங். அத்த²ந்தி அவிபரீதத்த²ங். வட்³டி⁴ந்தி அதிவட்³டி⁴னிமித்தங்.
Evaṃ bhāgaso lokaṃ gahetvā yojanaṃ dassetvā idāni abhāgaso lokaṃ gahetvā yojanaṃ dassetuṃ ‘‘apicetthā’’tiādi vuttaṃ. Lokavasena vuttāni ‘‘lokīyanti ettha kammaṃ kammaphalānī’’ti katvā. Pajāvasena ‘‘hetupaccayehi pajātā’’ti katvā. Sīlasampannataranti ettha paripuṇṇasampannatā adhippetā ‘‘sampannaṃ sālikedāra’’ntiādīsu (jā. 1.14.1) viya. Tenāha ‘‘adhikataranti attho’’ti. Paripuṇṇañhi adhikataranti vattuṃ arahati. Kāraṇanti yuttiṃ. Atthanti aviparītatthaṃ. Vaḍḍhinti ativaḍḍhinimittaṃ.
இமினா வசனேனாதி இமஸ்மிங் ஸுத்தே அனந்தரங் வுத்தவசனேன. ந கேவலங் இமினாவ, ஸுத்தந்தரம்பி ஆனெத்வா படிபா³ஹிதப்³போ³தி த³ஸ்ஸெந்தோ ‘‘ந மே ஆசரியோ அத்தீ²’’திஆதி³மாஹ. தத்த² ந மே ஆசரியோ அத்தீ²தி லோகுத்தரத⁴ம்மே மய்ஹங் ஆசரியோ நாம நத்தி². கிஞ்சாபி லோகியத⁴ம்மானம்பி யாதி³ஸோ லோகனாத²ஸ்ஸ அதி⁴க³மோ, ந தாதி³ஸோ அதி⁴க³மோ பரூபதே³ஸோ அத்தி². லோகுத்தரத⁴ம்மே பனஸ்ஸ லேஸோபி நத்தி². நத்தி² மே படிபுக்³க³லோதி மய்ஹங் ஸீலாதீ³ஹி கு³ணேஹி படினிதி⁴பூ⁴தோ புக்³க³லோ நாம நத்தி². ஸரந்தி கரணே ஏதங் பச்சத்தவசனந்தி ஆஹ ‘‘ஸரந்தேனா’’தி, ஸரந்தி வா ஸரணஹேது சாதி அத்தோ².
Imināvacanenāti imasmiṃ sutte anantaraṃ vuttavacanena. Na kevalaṃ imināva, suttantarampi ānetvā paṭibāhitabboti dassento ‘‘na me ācariyo atthī’’tiādimāha. Tattha na me ācariyo atthīti lokuttaradhamme mayhaṃ ācariyo nāma natthi. Kiñcāpi lokiyadhammānampi yādiso lokanāthassa adhigamo, na tādiso adhigamo parūpadeso atthi. Lokuttaradhamme panassa lesopi natthi. Natthi me paṭipuggaloti mayhaṃ sīlādīhi guṇehi paṭinidhibhūto puggalo nāma natthi. Saranti karaṇe etaṃ paccattavacananti āha ‘‘sarantenā’’ti, saranti vā saraṇahetu cāti attho.
யதோதி பு⁴ம்மத்தே² தோஸத்³தோ³தி ஆஹ ‘‘யஸ்மிங் காலே’’தி. ரத்தியோ ஜானந்தீதி ரத்தஞ்ஞூ, அத்தனோ பப்³ப³ஜிததி³வஸதோ பட்டா²ய ப³ஹூ ரத்தியோ ஜானந்தி, சிரபப்³ப³ஜிதாதி வுத்தங் ஹோதி. ரத்தஞ்ஞூனங் மஹந்தபா⁴வோ ரத்தஞ்ஞுமஹந்தங். பா⁴வப்பதா⁴னோ ஏஸ நித்³தே³ஸோ. ‘‘ரத்தஞ்ஞுமஹத்த’’ந்தி வா பாடோ². ஏஸ நயோ ஸேஸேஸுபி. தே²ரனவமஜ்ஜி²மானங் வஸேன விபுலபா⁴வோ வேபுல்லமஹந்தங். ஸிக்க²த்தயஸங்க³ஹிதஸ்ஸ ஸாஸனப்³ரஹ்மசரியஸ்ஸ ஜா²னாபி⁴ஞ்ஞாதி³வஸேன விபுலபா⁴வோ ப்³ரஹ்மசரியமஹந்தங். விஸிட்ட²ஸ்ஸ பச்சயலாப⁴ஸ்ஸ விபுலபா⁴வோ லாப⁴க்³க³மஹந்தங். சதுப்³பி³தே⁴ன மஹந்தேனாதி சதுப்³பி³தே⁴ன மஹந்தபா⁴வேன. மஹாபஜாபதியா து³ஸ்ஸயுக³தா³னகாலேதி ப⁴க³வதோ ஸங்கே⁴ கா³ரவஸ்ஸ பாகடகாலத³ஸ்ஸனமத்தங். ந ஹி ப⁴க³வா ததோ புப்³பே³ ஸங்கே⁴ கா³ரவரஹிதோ விஹாஸி.
Yatoti bhummatthe tosaddoti āha ‘‘yasmiṃ kāle’’ti. Rattiyo jānantīti rattaññū, attano pabbajitadivasato paṭṭhāya bahū rattiyo jānanti, cirapabbajitāti vuttaṃ hoti. Rattaññūnaṃ mahantabhāvo rattaññumahantaṃ. Bhāvappadhāno esa niddeso. ‘‘Rattaññumahatta’’nti vā pāṭho. Esa nayo sesesupi. Theranavamajjhimānaṃ vasena vipulabhāvo vepullamahantaṃ. Sikkhattayasaṅgahitassa sāsanabrahmacariyassa jhānābhiññādivasena vipulabhāvo brahmacariyamahantaṃ. Visiṭṭhassa paccayalābhassa vipulabhāvo lābhaggamahantaṃ. Catubbidhena mahantenāti catubbidhena mahantabhāvena. Mahāpajāpatiyā dussayugadānakāleti bhagavato saṅghe gāravassa pākaṭakāladassanamattaṃ. Na hi bhagavā tato pubbe saṅghe gāravarahito vihāsi.
பட²மஉருவேலஸுத்தவண்ணனா நிட்டி²தா.
Paṭhamauruvelasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. பட²மஉருவேலஸுத்தங் • 1. Paṭhamauruvelasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 1. பட²மஉருவேலஸுத்தவண்ணனா • 1. Paṭhamauruvelasuttavaṇṇanā
