| Library / Tipiṭaka / তিপিটক • Tipiṭaka / কঙ্খাৰিতরণী-পুরাণ-টীকা • Kaṅkhāvitaraṇī-purāṇa-ṭīkā |
পাচিত্তিযকণ্ডং
Pācittiyakaṇḍaṃ
১. পঠমৰগ্গৰণ্ণনা
1. Paṭhamavaggavaṇṇanā
পঠমে হরিতপত্তৰণ্ণো হরিতকো। চাপলসুণং অমিঞ্জকো। অঙ্কুরমত্তমেৰ হি তস্স হোতি। পলণ্ডুকাদযো সভাৰেনেৰ ৰট্টন্তি। সূপসম্পাকাদী ৰিনাপি অন্তমসো যাগুভত্তেপি পক্খিপিতুং ৰট্টতীতি লিখিতং, ‘‘ভিক্খুনিযাপি গিলানায পুরেভত্তমেৰ লসুণং কপ্পতি, ন অগিলানাযা’’তি অভযগিরীনং উগ্গহোতি।
Paṭhame haritapattavaṇṇo haritako. Cāpalasuṇaṃ amiñjako. Aṅkuramattameva hi tassa hoti. Palaṇḍukādayo sabhāveneva vaṭṭanti. Sūpasampākādī vināpi antamaso yāgubhattepi pakkhipituṃ vaṭṭatīti likhitaṃ, ‘‘bhikkhuniyāpi gilānāya purebhattameva lasuṇaṃ kappati, na agilānāyā’’ti abhayagirīnaṃ uggahoti.
দুতিযে আবাধপচ্চযা ভিক্খুনিসঙ্ঘং আপুচ্ছিত্ৰা সংহরাপেতুং ৰট্টতি, ভিক্খুস্স এত্থ চ লসুণে চ দুক্কটং।
Dutiye ābādhapaccayā bhikkhunisaṅghaṃ āpucchitvā saṃharāpetuṃ vaṭṭati, bhikkhussa ettha ca lasuṇe ca dukkaṭaṃ.
সত্তমে ‘‘সমুট্ঠানাদীনি অদ্ধানমগ্গসিক্খাপদসদিসানী’’তি পাঠো।
Sattame ‘‘samuṭṭhānādīni addhānamaggasikkhāpadasadisānī’’ti pāṭho.
নৰমে কুট্টো নাম ঘরকুট্টো। পাকারো নাম পরিক্খেপপাকারো।
Navame kuṭṭo nāma gharakuṭṭo. Pākāro nāma parikkhepapākāro.
ছড্ডিতখেত্তেতি পুরাণখেত্তে। সঙ্ঘসন্তকে ভিক্খুস্স ছড্ডেতুং ৰট্টতি সঙ্ঘপরিযাপন্নত্তা। ভিক্খুনীনম্পি সঙ্ঘসন্তকে ভিক্খুসঙ্ঘসন্তকে ৰুত্তনযেনেৰ ৰট্টতি। এৰং সন্তেপি সারুপ্পৰসেন কাতব্বন্তি লিখিতং।
Chaḍḍitakhetteti purāṇakhette. Saṅghasantake bhikkhussa chaḍḍetuṃ vaṭṭati saṅghapariyāpannattā. Bhikkhunīnampi saṅghasantake bhikkhusaṅghasantake vuttanayeneva vaṭṭati. Evaṃ santepi sāruppavasena kātabbanti likhitaṃ.
দসমে ‘‘সযং তানি ৰত্থূনি করোন্তিযা’’তিআদি ইধ সিক্খাপদে নত্থি। কস্মা? এল়কলোমসমুট্ঠানত্তা। যদি এৰং কস্মা ৰুত্তন্তি চে? সুত্তানুলোমমহাপদেসতো। যদি নচ্চাদীনি পস্সিতুং ৰা সুণিতুং ৰা ন লভতি, পগেৰ অত্তনা কাতুন্তি নযতো লব্ভমানত্তা ৰুত্তং। ইতরথা মহাপদেসা নিরত্থকা সিযুং। ‘‘এৰং অঞ্ঞত্থপি নযো নেতব্বো। সমুট্ঠানম্পি ইধ ৰুত্তমেৰ অগ্গহেত্ৰা ছসমুট্ঠানৰসেন গহেতব্ব’’ন্তি আচরিযা। ইধ ৰুত্তং সমুট্ঠানং নাম মূলভূতস্স অন্তরা ৰুত্তাপত্তিযা, তস্মা এল়কলোমসমুট্ঠানমেৰাতি অপরে। আরামে ঠত্ৰাতি ন কেৰলং ঠত্ৰা, ততো গন্ত্ৰা পন সব্বিরিযাপথেহিপি লভতি। আরামে ঠিতাতি পন আরামপরিযাপন্নাতি অত্থো। ইতরথা নিসিন্নাপি ন লভেয্যাতি।
Dasame ‘‘sayaṃ tāni vatthūni karontiyā’’tiādi idha sikkhāpade natthi. Kasmā? Eḷakalomasamuṭṭhānattā. Yadi evaṃ kasmā vuttanti ce? Suttānulomamahāpadesato. Yadi naccādīni passituṃ vā suṇituṃ vā na labhati, pageva attanā kātunti nayato labbhamānattā vuttaṃ. Itarathā mahāpadesā niratthakā siyuṃ. ‘‘Evaṃ aññatthapi nayo netabbo. Samuṭṭhānampi idha vuttameva aggahetvā chasamuṭṭhānavasena gahetabba’’nti ācariyā. Idha vuttaṃ samuṭṭhānaṃ nāma mūlabhūtassa antarā vuttāpattiyā, tasmā eḷakalomasamuṭṭhānamevāti apare. Ārāme ṭhatvāti na kevalaṃ ṭhatvā, tato gantvā pana sabbiriyāpathehipi labhati. Ārāme ṭhitāti pana ārāmapariyāpannāti attho. Itarathā nisinnāpi na labheyyāti.
পঠমৰগ্গৰণ্ণনা নিট্ঠিতা।
Paṭhamavaggavaṇṇanā niṭṭhitā.
