| Library / Tipiṭaka / တိပိဋက • Tipiṭaka / ကင္ခာဝိတရဏီ-ပုရာဏ-ဋီကာ • Kaṅkhāvitaraṇī-purāṇa-ṭīkā |
ပာစိတ္တိယကဏ္ဍံ
Pācittiyakaṇḍaṃ
၁. ပဌမဝဂ္ဂဝဏ္ဏနာ
1. Paṭhamavaggavaṇṇanā
ပဌမေ ဟရိတပတ္တဝဏ္ဏော ဟရိတကော။ စာပလသုဏံ အမိဉ္ဇကော။ အင္ကုရမတ္တမေဝ ဟိ တသ္သ ဟောတိ။ ပလဏ္ဍုကာဒယော သဘာဝေနေဝ ဝဋ္ဋန္တိ။ သူပသမ္ပာကာဒီ ဝိနာပိ အန္တမသော ယာဂုဘတ္တေပိ ပက္ခိပိတုံ ဝဋ္ဋတီတိ လိခိတံ, ‘‘ဘိက္ခုနိယာပိ ဂိလာနာယ ပုရေဘတ္တမေဝ လသုဏံ ကပ္ပတိ, န အဂိလာနာယာ’’တိ အဘယဂိရီနံ ဥဂ္ဂဟောတိ။
Paṭhame haritapattavaṇṇo haritako. Cāpalasuṇaṃ amiñjako. Aṅkuramattameva hi tassa hoti. Palaṇḍukādayo sabhāveneva vaṭṭanti. Sūpasampākādī vināpi antamaso yāgubhattepi pakkhipituṃ vaṭṭatīti likhitaṃ, ‘‘bhikkhuniyāpi gilānāya purebhattameva lasuṇaṃ kappati, na agilānāyā’’ti abhayagirīnaṃ uggahoti.
ဒုတိယေ အာဗာဓပစ္စယာ ဘိက္ခုနိသင္ဃံ အာပုစ္ဆိတ္ဝာ သံဟရာပေတုံ ဝဋ္ဋတိ, ဘိက္ခုသ္သ ဧတ္ထ စ လသုဏေ စ ဒုက္ကဋံ။
Dutiye ābādhapaccayā bhikkhunisaṅghaṃ āpucchitvā saṃharāpetuṃ vaṭṭati, bhikkhussa ettha ca lasuṇe ca dukkaṭaṃ.
သတ္တမေ ‘‘သမုဋ္ဌာနာဒီနိ အဒ္ဓာနမဂ္ဂသိက္ခာပဒသဒိသာနီ’’တိ ပာဌော။
Sattame ‘‘samuṭṭhānādīni addhānamaggasikkhāpadasadisānī’’ti pāṭho.
နဝမေ ကုဋ္ဋော နာမ ဃရကုဋ္ဋော။ ပာကာရော နာမ ပရိက္ခေပပာကာရော။
Navame kuṭṭo nāma gharakuṭṭo. Pākāro nāma parikkhepapākāro.
ဆဍ္ဍိတခေတ္တေတိ ပုရာဏခေတ္တေ။ သင္ဃသန္တကေ ဘိက္ခုသ္သ ဆဍ္ဍေတုံ ဝဋ္ဋတိ သင္ဃပရိယာပန္နတ္တာ။ ဘိက္ခုနီနမ္ပိ သင္ဃသန္တကေ ဘိက္ခုသင္ဃသန္တကေ ဝုတ္တနယေနေဝ ဝဋ္ဋတိ။ ဧဝံ သန္တေပိ သာရုပ္ပဝသေန ကာတဗ္ဗန္တိ လိခိတံ။
Chaḍḍitakhetteti purāṇakhette. Saṅghasantake bhikkhussa chaḍḍetuṃ vaṭṭati saṅghapariyāpannattā. Bhikkhunīnampi saṅghasantake bhikkhusaṅghasantake vuttanayeneva vaṭṭati. Evaṃ santepi sāruppavasena kātabbanti likhitaṃ.
ဒသမေ ‘‘သယံ တာနိ ဝတ္ထူနိ ကရောန္တိယာ’’တိအာဒိ ဣဓ သိက္ခာပဒေ နတ္ထိ။ ကသ္မာ? ဧဠကလောမသမုဋ္ဌာနတ္တာ။ ယဒိ ဧဝံ ကသ္မာ ဝုတ္တန္တိ စေ? သုတ္တာနုလောမမဟာပဒေသတော။ ယဒိ နစ္စာဒီနိ ပသ္သိတုံ ဝာ သုဏိတုံ ဝာ န လဘတိ, ပဂေဝ အတ္တနာ ကာတုန္တိ နယတော လဗ္ဘမာနတ္တာ ဝုတ္တံ။ ဣတရထာ မဟာပဒေသာ နိရတ္ထကာ သိယုံ။ ‘‘ဧဝံ အညတ္ထပိ နယော နေတဗ္ဗော။ သမုဋ္ဌာနမ္ပိ ဣဓ ဝုတ္တမေဝ အဂ္ဂဟေတ္ဝာ ဆသမုဋ္ဌာနဝသေန ဂဟေတဗ္ဗ’’န္တိ အာစရိယာ။ ဣဓ ဝုတ္တံ သမုဋ္ဌာနံ နာမ မူလဘူတသ္သ အန္တရာ ဝုတ္တာပတ္တိယာ, တသ္မာ ဧဠကလောမသမုဋ္ဌာနမေဝာတိ အပရေ။ အာရာမေ ဌတ္ဝာတိ န ကေဝလံ ဌတ္ဝာ, တတော ဂန္တ္ဝာ ပန သဗ္ဗိရိယာပထေဟိပိ လဘတိ။ အာရာမေ ဌိတာတိ ပန အာရာမပရိယာပန္နာတိ အတ္ထော။ ဣတရထာ နိသိန္နာပိ န လဘေယ္ယာတိ။
Dasame ‘‘sayaṃ tāni vatthūni karontiyā’’tiādi idha sikkhāpade natthi. Kasmā? Eḷakalomasamuṭṭhānattā. Yadi evaṃ kasmā vuttanti ce? Suttānulomamahāpadesato. Yadi naccādīni passituṃ vā suṇituṃ vā na labhati, pageva attanā kātunti nayato labbhamānattā vuttaṃ. Itarathā mahāpadesā niratthakā siyuṃ. ‘‘Evaṃ aññatthapi nayo netabbo. Samuṭṭhānampi idha vuttameva aggahetvā chasamuṭṭhānavasena gahetabba’’nti ācariyā. Idha vuttaṃ samuṭṭhānaṃ nāma mūlabhūtassa antarā vuttāpattiyā, tasmā eḷakalomasamuṭṭhānamevāti apare. Ārāme ṭhatvāti na kevalaṃ ṭhatvā, tato gantvā pana sabbiriyāpathehipi labhati. Ārāme ṭhitāti pana ārāmapariyāpannāti attho. Itarathā nisinnāpi na labheyyāti.
ပဌမဝဂ္ဂဝဏ္ဏနာ နိဋ္ဌိတာ။
Paṭhamavaggavaṇṇanā niṭṭhitā.
