| Library / Tipiṭaka / ತಿಪಿಟಕ • Tipiṭaka / ಕಙ್ಖಾವಿತರಣೀ-ಪುರಾಣ-ಟೀಕಾ • Kaṅkhāvitaraṇī-purāṇa-ṭīkā |
ಪಾಚಿತ್ತಿಯಕಣ್ಡಂ
Pācittiyakaṇḍaṃ
೧. ಪಠಮವಗ್ಗವಣ್ಣನಾ
1. Paṭhamavaggavaṇṇanā
ಪಠಮೇ ಹರಿತಪತ್ತವಣ್ಣೋ ಹರಿತಕೋ। ಚಾಪಲಸುಣಂ ಅಮಿಞ್ಜಕೋ। ಅಙ್ಕುರಮತ್ತಮೇವ ಹಿ ತಸ್ಸ ಹೋತಿ। ಪಲಣ್ಡುಕಾದಯೋ ಸಭಾವೇನೇವ ವಟ್ಟನ್ತಿ। ಸೂಪಸಮ್ಪಾಕಾದೀ ವಿನಾಪಿ ಅನ್ತಮಸೋ ಯಾಗುಭತ್ತೇಪಿ ಪಕ್ಖಿಪಿತುಂ ವಟ್ಟತೀತಿ ಲಿಖಿತಂ, ‘‘ಭಿಕ್ಖುನಿಯಾಪಿ ಗಿಲಾನಾಯ ಪುರೇಭತ್ತಮೇವ ಲಸುಣಂ ಕಪ್ಪತಿ, ನ ಅಗಿಲಾನಾಯಾ’’ತಿ ಅಭಯಗಿರೀನಂ ಉಗ್ಗಹೋತಿ।
Paṭhame haritapattavaṇṇo haritako. Cāpalasuṇaṃ amiñjako. Aṅkuramattameva hi tassa hoti. Palaṇḍukādayo sabhāveneva vaṭṭanti. Sūpasampākādī vināpi antamaso yāgubhattepi pakkhipituṃ vaṭṭatīti likhitaṃ, ‘‘bhikkhuniyāpi gilānāya purebhattameva lasuṇaṃ kappati, na agilānāyā’’ti abhayagirīnaṃ uggahoti.
ದುತಿಯೇ ಆಬಾಧಪಚ್ಚಯಾ ಭಿಕ್ಖುನಿಸಙ್ಘಂ ಆಪುಚ್ಛಿತ್ವಾ ಸಂಹರಾಪೇತುಂ ವಟ್ಟತಿ, ಭಿಕ್ಖುಸ್ಸ ಏತ್ಥ ಚ ಲಸುಣೇ ಚ ದುಕ್ಕಟಂ।
Dutiye ābādhapaccayā bhikkhunisaṅghaṃ āpucchitvā saṃharāpetuṃ vaṭṭati, bhikkhussa ettha ca lasuṇe ca dukkaṭaṃ.
ಸತ್ತಮೇ ‘‘ಸಮುಟ್ಠಾನಾದೀನಿ ಅದ್ಧಾನಮಗ್ಗಸಿಕ್ಖಾಪದಸದಿಸಾನೀ’’ತಿ ಪಾಠೋ।
Sattame ‘‘samuṭṭhānādīni addhānamaggasikkhāpadasadisānī’’ti pāṭho.
ನವಮೇ ಕುಟ್ಟೋ ನಾಮ ಘರಕುಟ್ಟೋ। ಪಾಕಾರೋ ನಾಮ ಪರಿಕ್ಖೇಪಪಾಕಾರೋ।
Navame kuṭṭo nāma gharakuṭṭo. Pākāro nāma parikkhepapākāro.
ಛಡ್ಡಿತಖೇತ್ತೇತಿ ಪುರಾಣಖೇತ್ತೇ। ಸಙ್ಘಸನ್ತಕೇ ಭಿಕ್ಖುಸ್ಸ ಛಡ್ಡೇತುಂ ವಟ್ಟತಿ ಸಙ್ಘಪರಿಯಾಪನ್ನತ್ತಾ। ಭಿಕ್ಖುನೀನಮ್ಪಿ ಸಙ್ಘಸನ್ತಕೇ ಭಿಕ್ಖುಸಙ್ಘಸನ್ತಕೇ ವುತ್ತನಯೇನೇವ ವಟ್ಟತಿ। ಏವಂ ಸನ್ತೇಪಿ ಸಾರುಪ್ಪವಸೇನ ಕಾತಬ್ಬನ್ತಿ ಲಿಖಿತಂ।
Chaḍḍitakhetteti purāṇakhette. Saṅghasantake bhikkhussa chaḍḍetuṃ vaṭṭati saṅghapariyāpannattā. Bhikkhunīnampi saṅghasantake bhikkhusaṅghasantake vuttanayeneva vaṭṭati. Evaṃ santepi sāruppavasena kātabbanti likhitaṃ.
ದಸಮೇ ‘‘ಸಯಂ ತಾನಿ ವತ್ಥೂನಿ ಕರೋನ್ತಿಯಾ’’ತಿಆದಿ ಇಧ ಸಿಕ್ಖಾಪದೇ ನತ್ಥಿ। ಕಸ್ಮಾ? ಏಳಕಲೋಮಸಮುಟ್ಠಾನತ್ತಾ। ಯದಿ ಏವಂ ಕಸ್ಮಾ ವುತ್ತನ್ತಿ ಚೇ? ಸುತ್ತಾನುಲೋಮಮಹಾಪದೇಸತೋ। ಯದಿ ನಚ್ಚಾದೀನಿ ಪಸ್ಸಿತುಂ ವಾ ಸುಣಿತುಂ ವಾ ನ ಲಭತಿ, ಪಗೇವ ಅತ್ತನಾ ಕಾತುನ್ತಿ ನಯತೋ ಲಬ್ಭಮಾನತ್ತಾ ವುತ್ತಂ। ಇತರಥಾ ಮಹಾಪದೇಸಾ ನಿರತ್ಥಕಾ ಸಿಯುಂ। ‘‘ಏವಂ ಅಞ್ಞತ್ಥಪಿ ನಯೋ ನೇತಬ್ಬೋ। ಸಮುಟ್ಠಾನಮ್ಪಿ ಇಧ ವುತ್ತಮೇವ ಅಗ್ಗಹೇತ್ವಾ ಛಸಮುಟ್ಠಾನವಸೇನ ಗಹೇತಬ್ಬ’’ನ್ತಿ ಆಚರಿಯಾ। ಇಧ ವುತ್ತಂ ಸಮುಟ್ಠಾನಂ ನಾಮ ಮೂಲಭೂತಸ್ಸ ಅನ್ತರಾ ವುತ್ತಾಪತ್ತಿಯಾ, ತಸ್ಮಾ ಏಳಕಲೋಮಸಮುಟ್ಠಾನಮೇವಾತಿ ಅಪರೇ। ಆರಾಮೇ ಠತ್ವಾತಿ ನ ಕೇವಲಂ ಠತ್ವಾ, ತತೋ ಗನ್ತ್ವಾ ಪನ ಸಬ್ಬಿರಿಯಾಪಥೇಹಿಪಿ ಲಭತಿ। ಆರಾಮೇ ಠಿತಾತಿ ಪನ ಆರಾಮಪರಿಯಾಪನ್ನಾತಿ ಅತ್ಥೋ। ಇತರಥಾ ನಿಸಿನ್ನಾಪಿ ನ ಲಭೇಯ್ಯಾತಿ।
Dasame ‘‘sayaṃ tāni vatthūni karontiyā’’tiādi idha sikkhāpade natthi. Kasmā? Eḷakalomasamuṭṭhānattā. Yadi evaṃ kasmā vuttanti ce? Suttānulomamahāpadesato. Yadi naccādīni passituṃ vā suṇituṃ vā na labhati, pageva attanā kātunti nayato labbhamānattā vuttaṃ. Itarathā mahāpadesā niratthakā siyuṃ. ‘‘Evaṃ aññatthapi nayo netabbo. Samuṭṭhānampi idha vuttameva aggahetvā chasamuṭṭhānavasena gahetabba’’nti ācariyā. Idha vuttaṃ samuṭṭhānaṃ nāma mūlabhūtassa antarā vuttāpattiyā, tasmā eḷakalomasamuṭṭhānamevāti apare. Ārāme ṭhatvāti na kevalaṃ ṭhatvā, tato gantvā pana sabbiriyāpathehipi labhati. Ārāme ṭhitāti pana ārāmapariyāpannāti attho. Itarathā nisinnāpi na labheyyāti.
ಪಠಮವಗ್ಗವಣ್ಣನಾ ನಿಟ್ಠಿತಾ।
Paṭhamavaggavaṇṇanā niṭṭhitā.
