| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-པུརཱཎ-ཊཱིཀཱ • Kaṅkhāvitaraṇī-purāṇa-ṭīkā |
པཱཙིཏྟིཡཀཎྜཾ
Pācittiyakaṇḍaṃ
༡. པཋམཝགྒཝཎྞནཱ
1. Paṭhamavaggavaṇṇanā
པཋམེ ཧརིཏཔཏྟཝཎྞོ ཧརིཏཀོ། ཙཱཔལསུཎཾ ཨམིཉྫཀོ། ཨངྐུརམཏྟམེཝ ཧི ཏསྶ ཧོཏི། པལཎྜུཀཱདཡོ སབྷཱཝེནེཝ ཝཊྚནྟི། སཱུཔསམྤཱཀཱདཱི ཝིནཱཔི ཨནྟམསོ ཡཱགུབྷཏྟེཔི པཀྑིཔིཏུཾ ཝཊྚཏཱིཏི ལིཁིཏཾ, ‘‘བྷིཀྑུནིཡཱཔི གིལཱནཱཡ པུརེབྷཏྟམེཝ ལསུཎཾ ཀཔྤཏི, ན ཨགིལཱནཱཡཱ’’ཏི ཨབྷཡགིརཱིནཾ ཨུགྒཧོཏི།
Paṭhame haritapattavaṇṇo haritako. Cāpalasuṇaṃ amiñjako. Aṅkuramattameva hi tassa hoti. Palaṇḍukādayo sabhāveneva vaṭṭanti. Sūpasampākādī vināpi antamaso yāgubhattepi pakkhipituṃ vaṭṭatīti likhitaṃ, ‘‘bhikkhuniyāpi gilānāya purebhattameva lasuṇaṃ kappati, na agilānāyā’’ti abhayagirīnaṃ uggahoti.
དུཏིཡེ ཨཱབཱདྷཔཙྩཡཱ བྷིཀྑུནིསངྒྷཾ ཨཱཔུཙྪིཏྭཱ སཾཧརཱཔེཏུཾ ཝཊྚཏི, བྷིཀྑུསྶ ཨེཏྠ ཙ ལསུཎེ ཙ དུཀྐཊཾ།
Dutiye ābādhapaccayā bhikkhunisaṅghaṃ āpucchitvā saṃharāpetuṃ vaṭṭati, bhikkhussa ettha ca lasuṇe ca dukkaṭaṃ.
སཏྟམེ ‘‘སམུཊྛཱནཱདཱིནི ཨདྡྷཱནམགྒསིཀྑཱཔདསདིསཱནཱི’’ཏི པཱཋོ།
Sattame ‘‘samuṭṭhānādīni addhānamaggasikkhāpadasadisānī’’ti pāṭho.
ནཝམེ ཀུཊྚོ ནཱམ གྷརཀུཊྚོ། པཱཀཱརོ ནཱམ པརིཀྑེཔཔཱཀཱརོ།
Navame kuṭṭo nāma gharakuṭṭo. Pākāro nāma parikkhepapākāro.
ཚཌྜིཏཁེཏྟེཏི པུརཱཎཁེཏྟེ། སངྒྷསནྟཀེ བྷིཀྑུསྶ ཚཌྜེཏུཾ ཝཊྚཏི སངྒྷཔརིཡཱཔནྣཏྟཱ། བྷིཀྑུནཱིནམྤི སངྒྷསནྟཀེ བྷིཀྑུསངྒྷསནྟཀེ ཝུཏྟནཡེནེཝ ཝཊྚཏི། ཨེཝཾ སནྟེཔི སཱརུཔྤཝསེན ཀཱཏབྦནྟི ལིཁིཏཾ།
Chaḍḍitakhetteti purāṇakhette. Saṅghasantake bhikkhussa chaḍḍetuṃ vaṭṭati saṅghapariyāpannattā. Bhikkhunīnampi saṅghasantake bhikkhusaṅghasantake vuttanayeneva vaṭṭati. Evaṃ santepi sāruppavasena kātabbanti likhitaṃ.
དསམེ ‘‘སཡཾ ཏཱནི ཝཏྠཱུནི ཀརོནྟིཡཱ’’ཏིཨཱདི ཨིདྷ སིཀྑཱཔདེ ནཏྠི། ཀསྨཱ? ཨེལ༹ཀལོམསམུཊྛཱནཏྟཱ། ཡདི ཨེཝཾ ཀསྨཱ ཝུཏྟནྟི ཙེ? སུཏྟཱནུལོམམཧཱཔདེསཏོ། ཡདི ནཙྩཱདཱིནི པསྶིཏུཾ ཝཱ སུཎིཏུཾ ཝཱ ན ལབྷཏི, པགེཝ ཨཏྟནཱ ཀཱཏུནྟི ནཡཏོ ལབྦྷམཱནཏྟཱ ཝུཏྟཾ། ཨིཏརཐཱ མཧཱཔདེསཱ ནིརཏྠཀཱ སིཡུཾ། ‘‘ཨེཝཾ ཨཉྙཏྠཔི ནཡོ ནེཏབྦོ། སམུཊྛཱནམྤི ཨིདྷ ཝུཏྟམེཝ ཨགྒཧེཏྭཱ ཚསམུཊྛཱནཝསེན གཧེཏབྦ’’ནྟི ཨཱཙརིཡཱ། ཨིདྷ ཝུཏྟཾ སམུཊྛཱནཾ ནཱམ མཱུལབྷཱུཏསྶ ཨནྟརཱ ཝུཏྟཱཔཏྟིཡཱ, ཏསྨཱ ཨེལ༹ཀལོམསམུཊྛཱནམེཝཱཏི ཨཔརེ། ཨཱརཱམེ ཋཏྭཱཏི ན ཀེཝལཾ ཋཏྭཱ, ཏཏོ གནྟྭཱ པན སབྦིརིཡཱཔཐེཧིཔི ལབྷཏི། ཨཱརཱམེ ཋིཏཱཏི པན ཨཱརཱམཔརིཡཱཔནྣཱཏི ཨཏྠོ། ཨིཏརཐཱ ནིསིནྣཱཔི ན ལབྷེཡྻཱཏི།
Dasame ‘‘sayaṃ tāni vatthūni karontiyā’’tiādi idha sikkhāpade natthi. Kasmā? Eḷakalomasamuṭṭhānattā. Yadi evaṃ kasmā vuttanti ce? Suttānulomamahāpadesato. Yadi naccādīni passituṃ vā suṇituṃ vā na labhati, pageva attanā kātunti nayato labbhamānattā vuttaṃ. Itarathā mahāpadesā niratthakā siyuṃ. ‘‘Evaṃ aññatthapi nayo netabbo. Samuṭṭhānampi idha vuttameva aggahetvā chasamuṭṭhānavasena gahetabba’’nti ācariyā. Idha vuttaṃ samuṭṭhānaṃ nāma mūlabhūtassa antarā vuttāpattiyā, tasmā eḷakalomasamuṭṭhānamevāti apare. Ārāme ṭhatvāti na kevalaṃ ṭhatvā, tato gantvā pana sabbiriyāpathehipi labhati. Ārāme ṭhitāti pana ārāmapariyāpannāti attho. Itarathā nisinnāpi na labheyyāti.
པཋམཝགྒཝཎྞནཱ ནིཊྛིཏཱ།
Paṭhamavaggavaṇṇanā niṭṭhitā.
