| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
৩. ততিযপণ্ণাসকং
3. Tatiyapaṇṇāsakaṃ
(১১) ১. ৰলাহকৰগ্গো
(11) 1. Valāhakavaggo
১. পঠমৰলাহকসুত্তং
1. Paṭhamavalāhakasuttaṃ
১০১. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তত্র খো ভগৰা ভিক্খূ আমন্তেসি – ‘‘ভিক্খৰো’’তি। ‘‘ভদন্তে’’তি তে ভিক্খূ ভগৰতো পচ্চস্সোসুং। ভগৰা এতদৰোচ –
101. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘চত্তারোমে, ভিক্খৰে, ৰলাহকা। কতমে চত্তারো? গজ্জিতা নো ৰস্সিতা, ৰস্সিতা নো গজ্জিতা, নেৰ গজ্জিতা নো ৰস্সিতা, গজ্জিতা চ ৰস্সিতা চ। ইমে খো, ভিক্খৰে, চত্তারো ৰলাহকা। এৰমেৰং খো, ভিক্খৰে, চত্তারো ৰলাহকূপমা 1 পুগ্গলা সন্তো সংৰিজ্জমানা লোকস্মিং। কতমে চত্তারো? গজ্জিতা নো ৰস্সিতা, ৰস্সিতা নো গজ্জিতা, নেৰ গজ্জিতা নো ৰস্সিতা, গজ্জিতা চ ৰস্সিতা চ।
‘‘Cattārome, bhikkhave, valāhakā. Katame cattāro? Gajjitā no vassitā, vassitā no gajjitā, neva gajjitā no vassitā, gajjitā ca vassitā ca. Ime kho, bhikkhave, cattāro valāhakā. Evamevaṃ kho, bhikkhave, cattāro valāhakūpamā 2 puggalā santo saṃvijjamānā lokasmiṃ. Katame cattāro? Gajjitā no vassitā, vassitā no gajjitā, neva gajjitā no vassitā, gajjitā ca vassitā ca.
‘‘কথঞ্চ, ভিক্খৰে, পুগ্গলো গজ্জিতা হোতি নো ৰস্সিতা? ইধ, ভিক্খৰে, একচ্চো পুগ্গলো ভাসিতা হোতি, নো কত্তা। এৰং খো, ভিক্খৰে, পুগ্গলো গজ্জিতা হোতি, নো ৰস্সিতা। সেয্যথাপি সো, ভিক্খৰে, ৰলাহকো গজ্জিতা, নো ৰস্সিতা; তথূপমাহং, ভিক্খৰে, ইমং পুগ্গলং ৰদামি।
‘‘Kathañca, bhikkhave, puggalo gajjitā hoti no vassitā? Idha, bhikkhave, ekacco puggalo bhāsitā hoti, no kattā. Evaṃ kho, bhikkhave, puggalo gajjitā hoti, no vassitā. Seyyathāpi so, bhikkhave, valāhako gajjitā, no vassitā; tathūpamāhaṃ, bhikkhave, imaṃ puggalaṃ vadāmi.
‘‘কথঞ্চ, ভিক্খৰে, পুগ্গলো ৰস্সিতা হোতি, নো গজ্জিতা? ইধ, ভিক্খৰে, একচ্চো পুগ্গলো কত্তা হোতি, নো ভাসিতা। এৰং খো, ভিক্খৰে, পুগ্গলো ৰস্সিতা হোতি, নো গজ্জিতা। সেয্যথাপি সো, ভিক্খৰে, ৰলাহকো ৰস্সিতা, নো গজ্জিতা; তথূপমাহং, ভিক্খৰে , ইমং পুগ্গলং ৰদামি।
‘‘Kathañca, bhikkhave, puggalo vassitā hoti, no gajjitā? Idha, bhikkhave, ekacco puggalo kattā hoti, no bhāsitā. Evaṃ kho, bhikkhave, puggalo vassitā hoti, no gajjitā. Seyyathāpi so, bhikkhave, valāhako vassitā, no gajjitā; tathūpamāhaṃ, bhikkhave , imaṃ puggalaṃ vadāmi.
‘‘কথঞ্চ , ভিক্খৰে, পুগ্গলো নেৰ গজ্জিতা হোতি, নো ৰস্সিতা? ইধ, ভিক্খৰে, একচ্চো পুগ্গলো নেৰ ভাসিতা হোতি, নো কত্তা। এৰং খো, ভিক্খৰে, পুগ্গলো নেৰ গজ্জিতা হোতি, নো ৰস্সিতা। সেয্যথাপি সো, ভিক্খৰে, ৰলাহকো নেৰ গজ্জিতা 3, নো ৰস্সিতা; তথূপমাহং, ভিক্খৰে, ইমং পুগ্গলং ৰদামি।
‘‘Kathañca , bhikkhave, puggalo neva gajjitā hoti, no vassitā? Idha, bhikkhave, ekacco puggalo neva bhāsitā hoti, no kattā. Evaṃ kho, bhikkhave, puggalo neva gajjitā hoti, no vassitā. Seyyathāpi so, bhikkhave, valāhako neva gajjitā 4, no vassitā; tathūpamāhaṃ, bhikkhave, imaṃ puggalaṃ vadāmi.
‘‘কথঞ্চ, ভিক্খৰে, পুগ্গলো গজ্জিতা চ হোতি ৰস্সিতা চ? ইধ, ভিক্খৰে, একচ্চো পুগ্গলো ভাসিতা চ হোতি কত্তা চ। এৰং খো, ভিক্খৰে, পুগ্গলো গজ্জিতা চ হোতি ৰস্সিতা চ। সেয্যথাপি সো, ভিক্খৰে, ৰলাহকো গজ্জিতা চ 5 ৰস্সিতা চ; তথূপমাহং, ভিক্খৰে, ইমং পুগ্গলং ৰদামি। ইমে খো, ভিক্খৰে, চত্তারো ৰলাহকূপমা পুগ্গলা সন্তো সংৰিজ্জমানা লোকস্মি’’ন্তি। পঠমং।
‘‘Kathañca, bhikkhave, puggalo gajjitā ca hoti vassitā ca? Idha, bhikkhave, ekacco puggalo bhāsitā ca hoti kattā ca. Evaṃ kho, bhikkhave, puggalo gajjitā ca hoti vassitā ca. Seyyathāpi so, bhikkhave, valāhako gajjitā ca 6 vassitā ca; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, cattāro valāhakūpamā puggalā santo saṃvijjamānā lokasmi’’nti. Paṭhamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ১-২. ৰলাহকসুত্তদ্ৰযৰণ্ণনা • 1-2. Valāhakasuttadvayavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ১-২. ৰলাহকসুত্তদ্ৰযৰণ্ণনা • 1-2. Valāhakasuttadvayavaṇṇanā
