| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. තතියපණ්‌ණාසකං
3. Tatiyapaṇṇāsakaṃ
(11) 1. වලාහකවග්‌ගො
(11) 1. Valāhakavaggo
1. පඨමවලාහකසුත්‌තං
1. Paṭhamavalāhakasuttaṃ
101. එවං මෙ සුතං – එකං සමයං භගවා සාවත්‌ථියං විහරති ජෙතවනෙ අනාථපිණ්‌ඩිකස්‌ස ආරාමෙ. තත්‍ර ඛො භගවා භික්‌ඛූ ආමන්‌තෙසි – ‘‘භික්‌ඛවො’’ති. ‘‘භදන්‌තෙ’’ති තෙ භික්‌ඛූ භගවතො පච්‌චස්‌සොසුං. භගවා එතදවොච –
101. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘චත්‌තාරොමෙ, භික්‌ඛවෙ, වලාහකා. කතමෙ චත්‌තාරො? ගජ්‌ජිතා නො වස්‌සිතා, වස්‌සිතා නො ගජ්‌ජිතා, නෙව ගජ්‌ජිතා නො වස්‌සිතා, ගජ්‌ජිතා ච වස්‌සිතා ච. ඉමෙ ඛො, භික්‌ඛවෙ, චත්‌තාරො වලාහකා. එවමෙවං ඛො, භික්‌ඛවෙ, චත්‌තාරො වලාහකූපමා 1 පුග්‌ගලා සන්‌තො සංවිජ්‌ජමානා ලොකස්‌මිං. කතමෙ චත්‌තාරො? ගජ්‌ජිතා නො වස්‌සිතා, වස්‌සිතා නො ගජ්‌ජිතා, නෙව ගජ්‌ජිතා නො වස්‌සිතා, ගජ්‌ජිතා ච වස්‌සිතා ච.
‘‘Cattārome, bhikkhave, valāhakā. Katame cattāro? Gajjitā no vassitā, vassitā no gajjitā, neva gajjitā no vassitā, gajjitā ca vassitā ca. Ime kho, bhikkhave, cattāro valāhakā. Evamevaṃ kho, bhikkhave, cattāro valāhakūpamā 2 puggalā santo saṃvijjamānā lokasmiṃ. Katame cattāro? Gajjitā no vassitā, vassitā no gajjitā, neva gajjitā no vassitā, gajjitā ca vassitā ca.
‘‘කථඤ්‌ච, භික්‌ඛවෙ, පුග්‌ගලො ගජ්‌ජිතා හොති නො වස්‌සිතා? ඉධ, භික්‌ඛවෙ, එකච්‌චො පුග්‌ගලො භාසිතා හොති, නො කත්‌තා. එවං ඛො, භික්‌ඛවෙ, පුග්‌ගලො ගජ්‌ජිතා හොති, නො වස්‌සිතා. සෙය්‍යථාපි සො, භික්‌ඛවෙ, වලාහකො ගජ්‌ජිතා, නො වස්‌සිතා; තථූපමාහං, භික්‌ඛවෙ, ඉමං පුග්‌ගලං වදාමි.
‘‘Kathañca, bhikkhave, puggalo gajjitā hoti no vassitā? Idha, bhikkhave, ekacco puggalo bhāsitā hoti, no kattā. Evaṃ kho, bhikkhave, puggalo gajjitā hoti, no vassitā. Seyyathāpi so, bhikkhave, valāhako gajjitā, no vassitā; tathūpamāhaṃ, bhikkhave, imaṃ puggalaṃ vadāmi.
‘‘කථඤ්‌ච, භික්‌ඛවෙ, පුග්‌ගලො වස්‌සිතා හොති, නො ගජ්‌ජිතා? ඉධ, භික්‌ඛවෙ, එකච්‌චො පුග්‌ගලො කත්‌තා හොති, නො භාසිතා. එවං ඛො, භික්‌ඛවෙ, පුග්‌ගලො වස්‌සිතා හොති, නො ගජ්‌ජිතා. සෙය්‍යථාපි සො, භික්‌ඛවෙ, වලාහකො වස්‌සිතා, නො ගජ්‌ජිතා; තථූපමාහං, භික්‌ඛවෙ , ඉමං පුග්‌ගලං වදාමි.
‘‘Kathañca, bhikkhave, puggalo vassitā hoti, no gajjitā? Idha, bhikkhave, ekacco puggalo kattā hoti, no bhāsitā. Evaṃ kho, bhikkhave, puggalo vassitā hoti, no gajjitā. Seyyathāpi so, bhikkhave, valāhako vassitā, no gajjitā; tathūpamāhaṃ, bhikkhave , imaṃ puggalaṃ vadāmi.
‘‘කථඤ්‌ච , භික්‌ඛවෙ, පුග්‌ගලො නෙව ගජ්‌ජිතා හොති, නො වස්‌සිතා? ඉධ, භික්‌ඛවෙ, එකච්‌චො පුග්‌ගලො නෙව භාසිතා හොති, නො කත්‌තා. එවං ඛො, භික්‌ඛවෙ, පුග්‌ගලො නෙව ගජ්‌ජිතා හොති, නො වස්‌සිතා. සෙය්‍යථාපි සො, භික්‌ඛවෙ, වලාහකො නෙව ගජ්‌ජිතා 3, නො වස්‌සිතා; තථූපමාහං, භික්‌ඛවෙ, ඉමං පුග්‌ගලං වදාමි.
‘‘Kathañca , bhikkhave, puggalo neva gajjitā hoti, no vassitā? Idha, bhikkhave, ekacco puggalo neva bhāsitā hoti, no kattā. Evaṃ kho, bhikkhave, puggalo neva gajjitā hoti, no vassitā. Seyyathāpi so, bhikkhave, valāhako neva gajjitā 4, no vassitā; tathūpamāhaṃ, bhikkhave, imaṃ puggalaṃ vadāmi.
‘‘කථඤ්‌ච, භික්‌ඛවෙ, පුග්‌ගලො ගජ්‌ජිතා ච හොති වස්‌සිතා ච? ඉධ, භික්‌ඛවෙ, එකච්‌චො පුග්‌ගලො භාසිතා ච හොති කත්‌තා ච. එවං ඛො, භික්‌ඛවෙ, පුග්‌ගලො ගජ්‌ජිතා ච හොති වස්‌සිතා ච. සෙය්‍යථාපි සො, භික්‌ඛවෙ, වලාහකො ගජ්‌ජිතා ච 5 වස්‌සිතා ච; තථූපමාහං, භික්‌ඛවෙ, ඉමං පුග්‌ගලං වදාමි. ඉමෙ ඛො, භික්‌ඛවෙ, චත්‌තාරො වලාහකූපමා පුග්‌ගලා සන්‌තො සංවිජ්‌ජමානා ලොකස්‌මි’’න්‌ති. පඨමං.
‘‘Kathañca, bhikkhave, puggalo gajjitā ca hoti vassitā ca? Idha, bhikkhave, ekacco puggalo bhāsitā ca hoti kattā ca. Evaṃ kho, bhikkhave, puggalo gajjitā ca hoti vassitā ca. Seyyathāpi so, bhikkhave, valāhako gajjitā ca 6 vassitā ca; tathūpamāhaṃ, bhikkhave, imaṃ puggalaṃ vadāmi. Ime kho, bhikkhave, cattāro valāhakūpamā puggalā santo saṃvijjamānā lokasmi’’nti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 1-2. වලාහකසුත්‌තද්‌වයවණ්‌ණනා • 1-2. Valāhakasuttadvayavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-2. වලාහකසුත්‌තද්‌වයවණ්‌ණනා • 1-2. Valāhakasuttadvayavaṇṇanā
