| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
7. பட²மவேரஸுத்தவண்ணனா
7. Paṭhamaverasuttavaṇṇanā
27. ஸத்தமே (ஸங்॰ நி॰ டீ॰ 2.241) யதோதி யஸ்மிங் காலே. அயஞ்ஹி தோ-ஸத்³தோ³ தா³-ஸத்³தோ³ விய இத⁴ காலவிஸயோ, யதா³தி வுத்தங் ஹோதி. ப⁴யானி வேரானீதி பீ⁴யதே ப⁴யங், ப⁴யேன யோகா³, பா⁴யிதப்³பே³ன வா ப⁴யங் ஏவ வேரப்பஸவட்டே²ன வேரந்தி ச லத்³த⁴னாமா சேதனாத³யோ. பாணாதிபாதாத³யோ ஹி யஸ்ஸ பவத்தந்தி, யஞ்ச உத்³தி³ஸ்ஸ பவத்தீயந்தி, உப⁴யேஸஞ்ச வேராவஹா, ததோ ஏவ சேதே பா⁴யிதப்³பா³ வேரஸஞ்ஜனகா நாமாதி. ஸோதஸ்ஸ அரியமக்³க³ஸ்ஸ ஆதி³தோ பஜ்ஜனங் படிபத்தி அதி⁴க³மோ ஸோதாபத்தி. தத³த்தா²ய தத்த² பதிட்டி²தஸ்ஸ ச அங்கா³னி ஸோதாபத்தியங்கா³னி. து³வித⁴ஞ்ஹி (ஸங்॰ நி॰ அட்ட²॰ 2.2.41) ஸோதாபத்தியங்க³ங் ஸோதாபத்திஅத்தா²ய ச அங்க³ங் காரணங், யங் ஸோதாபத்திமக்³க³ப்படிலாப⁴தோ புப்³ப³பா⁴கே³ ஸோதாபத்திப்படிலாபா⁴ய ஸங்வத்ததி, ‘‘ஸப்புரிஸஸங்ஸேவோ ஸத்³த⁴ம்மஸ்ஸவனங் யோனிஸோமனஸிகாரோ த⁴ம்மானுத⁴ம்மபடிபத்தீ’’தி (தீ³॰ நி॰ 3.311) ஏவங் ஆக³தங். படிலத்³த⁴கு³ணஸ்ஸ ச ஸோதாபத்திங் பத்வா டி²தஸ்ஸ அங்க³ங், யங் ‘‘ஸோதாபன்னஸ்ஸ அங்க³’’ந்திபி வுச்சதி ‘‘ஸோதாபன்னோ அங்கீ³யதி ஞாயதி ஏதேனா’’தி கத்வா, பு³த்³தே⁴ அவேச்சப்பஸாதா³தீ³னங் ஏதங் அதி⁴வசனங். இத³மிதா⁴தி⁴ப்பேதங்.
27. Sattame (saṃ. ni. ṭī. 2.241) yatoti yasmiṃ kāle. Ayañhi to-saddo dā-saddo viya idha kālavisayo, yadāti vuttaṃ hoti. Bhayāni verānīti bhīyate bhayaṃ, bhayena yogā, bhāyitabbena vā bhayaṃ eva verappasavaṭṭhena veranti ca laddhanāmā cetanādayo. Pāṇātipātādayo hi yassa pavattanti, yañca uddissa pavattīyanti, ubhayesañca verāvahā, tato eva cete bhāyitabbā verasañjanakā nāmāti. Sotassa ariyamaggassa ādito pajjanaṃ paṭipatti adhigamo sotāpatti. Tadatthāya tattha patiṭṭhitassa ca aṅgāni sotāpattiyaṅgāni. Duvidhañhi (saṃ. ni. aṭṭha. 2.2.41) sotāpattiyaṅgaṃ sotāpattiatthāya ca aṅgaṃ kāraṇaṃ, yaṃ sotāpattimaggappaṭilābhato pubbabhāge sotāpattippaṭilābhāya saṃvattati, ‘‘sappurisasaṃsevo saddhammassavanaṃ yonisomanasikāro dhammānudhammapaṭipattī’’ti (dī. ni. 3.311) evaṃ āgataṃ. Paṭiladdhaguṇassa ca sotāpattiṃ patvā ṭhitassa aṅgaṃ, yaṃ ‘‘sotāpannassa aṅga’’ntipi vuccati ‘‘sotāpanno aṅgīyati ñāyati etenā’’ti katvā, buddhe aveccappasādādīnaṃ etaṃ adhivacanaṃ. Idamidhādhippetaṃ.
கீ²ணனிரயோதிஆதீ³ஸு ஆயதிங் தத்த² அனுப்பஜ்ஜனதாய கீ²ணோ நிரயோ மய்ஹதி, ஸோ அஹங் கீ²ணனிரயோ. ஏஸ நயோ ஸப்³ப³த்த². ஸோதாபன்னோதி மக்³க³ஸோதங் ஆபன்னோ. அவினிபாதத⁴ம்மோதி ந வினிபாதஸபா⁴வோ. நியதோதி பட²மமக்³க³ஸங்கா²தேன ஸம்மத்தனியாமேன நியதோ. ஸம்போ³தி⁴பராயணோதி உபரிமக்³க³த்தயஸங்கா²தோ ஸம்போ³தி⁴ பரங் அயனங் மய்ஹந்தி ஸோஹங் ஸம்போ³தி⁴பராயணோ, ஸம்போ³தி⁴ங் அவஸ்ஸங் அபி⁴ஸம்பு³ஜ்ஜ²னகோதி அத்தோ².
Khīṇanirayotiādīsu āyatiṃ tattha anuppajjanatāya khīṇo nirayo mayhati, so ahaṃ khīṇanirayo. Esa nayo sabbattha. Sotāpannoti maggasotaṃ āpanno. Avinipātadhammoti na vinipātasabhāvo. Niyatoti paṭhamamaggasaṅkhātena sammattaniyāmena niyato. Sambodhiparāyaṇoti uparimaggattayasaṅkhāto sambodhi paraṃ ayanaṃ mayhanti sohaṃ sambodhiparāyaṇo, sambodhiṃ avassaṃ abhisambujjhanakoti attho.
பாணாதிபாதபச்சயாதி பாணாதிபாதகம்மஸ்ஸ கரணஹேது. ப⁴யங் வேரந்தி அத்த²தோ ஏகங். வேரங் வுச்சதி விரோதோ⁴, ததே³வ பா⁴யிதப்³ப³தோ ‘‘ப⁴ய’’ந்தி வுச்சதி. தஞ்ச பனேதங் து³வித⁴ங் ஹோதி – பா³ஹிரங், அஜ்ஜ²த்திகந்தி. ஏகேன ஹி ஏகஸ்ஸ பிதா மாரிதோ ஹோதி. ஸோ சிந்தேதி ‘‘ஏதேன கிர மே பிதா மாரிதோ, அஹம்பி தங்யேவ மாரெஸ்ஸாமீ’’தி நிஸிதங் ஸத்த²ங் ஆதா³ய சரதி. யா தஸ்ஸ அப்³ப⁴ந்தரே உப்பன்னா வேரசேதனா, இத³ங் பா³ஹிரங் வேரங் நாம தஸ்ஸ வேரஸ்ஸ மூலபூ⁴ததோ வேரகாரகபுக்³க³லதோ ப³ஹிபா⁴வத்தா. யா பன இதரஸ்ஸ ‘‘அயங் கிர மங் மாரெஸ்ஸாமீதி சரதி, அஹமேவ நங் பட²மதரங் மாரெஸ்ஸாமீ’’தி சேதனா உப்பஜ்ஜதி, இத³ங் அஜ்ஜ²த்திகங் வேரங் நாம. இத³ங் தாவ உப⁴யம்பி தி³ட்ட²த⁴ம்மிகமேவ. யா பன தங் நிரயே உப்பன்னங் தி³ஸ்வா ‘‘ஏதங் பஹரிஸ்ஸாமீ’’தி ஜலிதங் அயமுக்³க³ரங் க³ண்ஹந்தஸ்ஸ நிரயபாலஸ்ஸ சேதனா உப்பஜ்ஜதி, இத³மஸ்ஸ ஸம்பராயிகங் பா³ஹிரங் வேரங். யா சஸ்ஸ ‘‘அயங் நித்³தோ³ஸங் மங் பஹரிஸ்ஸாமீதி ஆக³ச்ச²தி, அஹமேவ நங் பட²மதரங் பஹரிஸ்ஸாமீ’’தி சேதனா உப்பஜ்ஜதி, இத³மஸ்ஸ ஸம்பராயிகங் அஜ்ஜ²த்தங் வேரங். யங் பனேதங் பா³ஹிரங் வேரங், தங் அட்ட²கதா²ஸு ‘‘புக்³க³லவேர’’ந்தி வுச்சதி. து³க்க²ங் தோ³மனஸ்ஸந்தி அத்த²தோ ஏகமேவ. யதா² செத்த², ஏவங் ஸேஸேஸுபி ‘‘இமினா மம ப⁴ண்ட³ங் ஹடங், மய்ஹங் தா³ரேஸு சாரித்தங் ஆபன்னங், முஸா வத்வா அத்தோ² ப⁴க்³கோ³, ஸுராமத³மத்தேன இத³ங் நாம கத’’ந்திஆதி³னா நயேன வேரப்பவத்தி வேதி³தப்³பா³.
Pāṇātipātapaccayāti pāṇātipātakammassa karaṇahetu. Bhayaṃ veranti atthato ekaṃ. Veraṃ vuccati virodho, tadeva bhāyitabbato ‘‘bhaya’’nti vuccati. Tañca panetaṃ duvidhaṃ hoti – bāhiraṃ, ajjhattikanti. Ekena hi ekassa pitā mārito hoti. So cinteti ‘‘etena kira me pitā mārito, ahampi taṃyeva māressāmī’’ti nisitaṃ satthaṃ ādāya carati. Yā tassa abbhantare uppannā veracetanā, idaṃ bāhiraṃ veraṃ nāma tassa verassa mūlabhūtato verakārakapuggalato bahibhāvattā. Yā pana itarassa ‘‘ayaṃ kira maṃ māressāmīti carati, ahameva naṃ paṭhamataraṃ māressāmī’’ti cetanā uppajjati, idaṃ ajjhattikaṃ veraṃ nāma. Idaṃ tāva ubhayampi diṭṭhadhammikameva. Yā pana taṃ niraye uppannaṃ disvā ‘‘etaṃ paharissāmī’’ti jalitaṃ ayamuggaraṃ gaṇhantassa nirayapālassa cetanā uppajjati, idamassa samparāyikaṃ bāhiraṃ veraṃ. Yā cassa ‘‘ayaṃ niddosaṃ maṃ paharissāmīti āgacchati, ahameva naṃ paṭhamataraṃ paharissāmī’’ti cetanā uppajjati, idamassa samparāyikaṃ ajjhattaṃ veraṃ. Yaṃ panetaṃ bāhiraṃ veraṃ, taṃ aṭṭhakathāsu ‘‘puggalavera’’nti vuccati. Dukkhaṃ domanassanti atthato ekameva. Yathā cettha, evaṃ sesesupi ‘‘iminā mama bhaṇḍaṃ haṭaṃ, mayhaṃ dāresu cārittaṃ āpannaṃ, musā vatvā attho bhaggo, surāmadamattena idaṃ nāma kata’’ntiādinā nayena verappavatti veditabbā.
அவேச்சப்பஸாதே³னாதி அதி⁴க³தேன அசலப்பஸாதே³ன. அரியகந்தேஹீதி பஞ்சஹி ஸீலேஹி. தானி ஹி அரியானங் கந்தானி பியானி ப⁴வந்தி, ப⁴வந்தரக³தாபி அரியா தானி ந விஜஹந்தி, தஸ்மா ‘‘அரியகந்தானீ’’தி வுச்சந்தி. ஸேஸமெத்த² யங் வத்தப்³ப³ங் ஸியா, தங் ஸப்³ப³ங் விஸுத்³தி⁴மக்³கே³ அனுஸ்ஸதினித்³தே³ஸே வுத்தந்தி வேதி³தப்³ப³ங்.
Aveccappasādenāti adhigatena acalappasādena. Ariyakantehīti pañcahi sīlehi. Tāni hi ariyānaṃ kantāni piyāni bhavanti, bhavantaragatāpi ariyā tāni na vijahanti, tasmā ‘‘ariyakantānī’’ti vuccanti. Sesamettha yaṃ vattabbaṃ siyā, taṃ sabbaṃ visuddhimagge anussatiniddese vuttanti veditabbaṃ.
பட²மவேரஸுத்தவண்ணனா நிட்டி²தா.
Paṭhamaverasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 7. பட²மவேரஸுத்தங் • 7. Paṭhamaverasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 7-8. வேரஸுத்தத்³வயவண்ணனா • 7-8. Verasuttadvayavaṇṇanā
