| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
9. பட²மவிப⁴ங்க³ஸுத்தங்
9. Paṭhamavibhaṅgasuttaṃ
479. ‘‘பஞ்சிமானி, பி⁴க்க²வே, இந்த்³ரியானி. கதமானி பஞ்ச? ஸத்³தி⁴ந்த்³ரியங்…பே॰… பஞ்ஞிந்த்³ரியங். கதமஞ்ச, பி⁴க்க²வே, ஸத்³தி⁴ந்த்³ரியங்? இத⁴, பி⁴க்க²வே, அரியஸாவகோ ஸத்³தோ⁴ ஹோதி, ஸத்³த³ஹதி ததா²க³தஸ்ஸ போ³தி⁴ங் – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி – இத³ங் வுச்சதி, பி⁴க்க²வே, ஸத்³தி⁴ந்த்³ரியங்.
479. ‘‘Pañcimāni, bhikkhave, indriyāni. Katamāni pañca? Saddhindriyaṃ…pe… paññindriyaṃ. Katamañca, bhikkhave, saddhindriyaṃ? Idha, bhikkhave, ariyasāvako saddho hoti, saddahati tathāgatassa bodhiṃ – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti – idaṃ vuccati, bhikkhave, saddhindriyaṃ.
‘‘கதமஞ்ச, பி⁴க்க²வே, வீரியிந்த்³ரியங்? இத⁴, பி⁴க்க²வே, அரியஸாவகோ ஆரத்³த⁴வீரியோ விஹரதி அகுஸலானங் த⁴ம்மானங் பஹானாய, குஸலானங் த⁴ம்மானங் உபஸம்பதா³ய, தா²மவா த³ள்ஹபரக்கமோ அனிக்கி²த்தது⁴ரோ குஸலேஸு த⁴ம்மேஸு – இத³ங் வுச்சதி, பி⁴க்க²வே, வீரியிந்த்³ரியங்.
‘‘Katamañca, bhikkhave, vīriyindriyaṃ? Idha, bhikkhave, ariyasāvako āraddhavīriyo viharati akusalānaṃ dhammānaṃ pahānāya, kusalānaṃ dhammānaṃ upasampadāya, thāmavā daḷhaparakkamo anikkhittadhuro kusalesu dhammesu – idaṃ vuccati, bhikkhave, vīriyindriyaṃ.
‘‘கதமஞ்ச, பி⁴க்க²வே, ஸதிந்த்³ரியங்? இத⁴, பி⁴க்க²வே, அரியஸாவகோ ஸதிமா ஹோதி பரமேன ஸதினேபக்கேன ஸமன்னாக³தோ சிரகதம்பி சிரபா⁴ஸிதம்பி ஸரிதா அனுஸ்ஸரிதா – இத³ங் வுச்சதி, பி⁴க்க²வே, ஸதிந்த்³ரியங்.
‘‘Katamañca, bhikkhave, satindriyaṃ? Idha, bhikkhave, ariyasāvako satimā hoti paramena satinepakkena samannāgato cirakatampi cirabhāsitampi saritā anussaritā – idaṃ vuccati, bhikkhave, satindriyaṃ.
‘‘கதமஞ்ச, பி⁴க்க²வே, ஸமாதி⁴ந்த்³ரியங்? இத⁴, பி⁴க்க²வே, அரியஸாவகோ வொஸ்ஸக்³கா³ரம்மணங் கரித்வா லப⁴தி ஸமாதி⁴ங், லப⁴தி சித்தஸ்ஸ ஏகக்³க³தங் – இத³ங் வுச்சதி, பி⁴க்க²வே, ஸமாதி⁴ந்த்³ரியங்.
‘‘Katamañca, bhikkhave, samādhindriyaṃ? Idha, bhikkhave, ariyasāvako vossaggārammaṇaṃ karitvā labhati samādhiṃ, labhati cittassa ekaggataṃ – idaṃ vuccati, bhikkhave, samādhindriyaṃ.
‘‘கதமஞ்ச, பி⁴க்க²வே, பஞ்ஞிந்த்³ரியங்? இத⁴, பி⁴க்க²வே, அரியஸாவகோ பஞ்ஞவா ஹோதி உத³யத்த²கா³மினியா பஞ்ஞாய ஸமன்னாக³தோ அரியாய நிப்³பே³தி⁴காய, ஸம்மா து³க்க²க்க²யகா³மினியா – இத³ங் வுச்சதி, பி⁴க்க²வே, பஞ்ஞிந்த்³ரியங். இமானி கோ², பி⁴க்க²வே, பஞ்சிந்த்³ரியானீ’’தி. நவமங்.
‘‘Katamañca, bhikkhave, paññindriyaṃ? Idha, bhikkhave, ariyasāvako paññavā hoti udayatthagāminiyā paññāya samannāgato ariyāya nibbedhikāya, sammā dukkhakkhayagāminiyā – idaṃ vuccati, bhikkhave, paññindriyaṃ. Imāni kho, bhikkhave, pañcindriyānī’’ti. Navamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 9-10. பட²மவிப⁴ங்க³ஸுத்தாதி³வண்ணனா • 9-10. Paṭhamavibhaṅgasuttādivaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9-10. பட²மவிப⁴ங்க³ஸுத்தாதி³வண்ணனா • 9-10. Paṭhamavibhaṅgasuttādivaṇṇanā
