| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
2. විහාරවග්‌ගො
2. Vihāravaggo
1. පඨමවිහාරසුත්‌තං
1. Paṭhamavihārasuttaṃ
11. සාවත්‌ථිනිදානං . ‘‘ඉච්‌ඡාමහං, භික්‌ඛවෙ, අඩ්‌ඪමාසං පටිසල්‌ලියිතුං. නම්‌හි කෙනචි උපසඞ්‌කමිතබ්‌බො, අඤ්‌ඤත්‍ර එකෙන පිණ්‌ඩපාතනීහාරකෙනා’’ති. ‘‘එවං, භන්‌තෙ’’ති ඛො තෙ භික්‌ඛූ භගවතො පටිස්‌සුත්‌වා නාස්‌සුධ කොචි භගවන්‌තං උපසඞ්‌කමති, අඤ්‌ඤත්‍ර එකෙන පිණ්‌ඩපාතනීහාරකෙන.
11. Sāvatthinidānaṃ . ‘‘Icchāmahaṃ, bhikkhave, aḍḍhamāsaṃ paṭisalliyituṃ. Namhi kenaci upasaṅkamitabbo, aññatra ekena piṇḍapātanīhārakenā’’ti. ‘‘Evaṃ, bhante’’ti kho te bhikkhū bhagavato paṭissutvā nāssudha koci bhagavantaṃ upasaṅkamati, aññatra ekena piṇḍapātanīhārakena.
අථ ඛො භගවා තස්‌ස අඩ්‌ඪමාසස්‌ස අච්‌චයෙන පටිසල්‌ලානා වුට්‌ඨිතො භික්‌ඛූ ආමන්‌තෙසි – ‘‘යෙන ස්‌වාහං, භික්‌ඛවෙ, විහාරෙන පඨමාභිසම්‌බුද්‌ධො විහරාමි, තස්‌ස පදෙසෙන විහාසිං. සො එවං පජානාමි – ‘මිච්‌ඡාදිට්‌ඨිපච්‌චයාපි වෙදයිතං; සම්‌මාදිට්‌ඨිපච්‌චයාපි වෙදයිතං…පෙ.… මිච්‌ඡාසමාධිපච්‌චයාපි වෙදයිතං; සම්‌මාසමාධිපච්‌චයාපි වෙදයිතං; ඡන්‌දපච්‌චයාපි වෙදයිතං; විතක්‌කපච්‌චයාපි වෙදයිතං; සඤ්‌ඤාපච්‌චයාපි වෙදයිතං; ඡන්‌දො ච අවූපසන්‌තො හොති, විතක්‌කො ච අවූපසන්‌තො හොති, සඤ්‌ඤා ච අවූපසන්‌තා හොති, තප්‌පච්‌චයාපි වෙදයිතං; ඡන්‌දො ච වූපසන්‌තො හොති, විතක්‌කො ච වූපසන්‌තො හොති, සඤ්‌ඤා ච වූපසන්‌තා හොති, තප්‌පච්‌චයාපි වෙදයිතං; අප්‌පත්‌තස්‌ස පත්‌තියා අත්‌ථි ආයාමං 1, තස්‌මිම්‌පි ඨානෙ අනුප්‌පත්‌තෙ තප්‌පච්‌චයාපි වෙදයිත’’’න්‌ති. පඨමං.
Atha kho bhagavā tassa aḍḍhamāsassa accayena paṭisallānā vuṭṭhito bhikkhū āmantesi – ‘‘yena svāhaṃ, bhikkhave, vihārena paṭhamābhisambuddho viharāmi, tassa padesena vihāsiṃ. So evaṃ pajānāmi – ‘micchādiṭṭhipaccayāpi vedayitaṃ; sammādiṭṭhipaccayāpi vedayitaṃ…pe… micchāsamādhipaccayāpi vedayitaṃ; sammāsamādhipaccayāpi vedayitaṃ; chandapaccayāpi vedayitaṃ; vitakkapaccayāpi vedayitaṃ; saññāpaccayāpi vedayitaṃ; chando ca avūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ; chando ca vūpasanto hoti, vitakko ca vūpasanto hoti, saññā ca vūpasantā hoti, tappaccayāpi vedayitaṃ; appattassa pattiyā atthi āyāmaṃ 2, tasmimpi ṭhāne anuppatte tappaccayāpi vedayita’’’nti. Paṭhamaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 1. පඨමවිහාරසුත්‌තවණ්‌ණනා • 1. Paṭhamavihārasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 1. පඨමවිහාරසුත්‌තවණ්‌ණනා • 1. Paṭhamavihārasuttavaṇṇanā
