| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. ཝིཧཱརཝགྒོ
2. Vihāravaggo
༡. པཋམཝིཧཱརསུཏྟཾ
1. Paṭhamavihārasuttaṃ
༡༡. སཱཝཏྠིནིདཱནཾ ། ‘‘ཨིཙྪཱམཧཾ, བྷིཀྑཝེ, ཨཌྜྷམཱསཾ པཊིསལླིཡིཏུཾ། ནམྷི ཀེནཙི ཨུཔསངྐམིཏབྦོ, ཨཉྙཏྲ ཨེཀེན པིཎྜཔཱཏནཱིཧཱརཀེནཱ’’ཏི། ‘‘ཨེཝཾ, བྷནྟེ’’ཏི ཁོ ཏེ བྷིཀྑཱུ བྷགཝཏོ པཊིསྶུཏྭཱ ནཱསྶུདྷ ཀོཙི བྷགཝནྟཾ ཨུཔསངྐམཏི, ཨཉྙཏྲ ཨེཀེན པིཎྜཔཱཏནཱིཧཱརཀེན།
11. Sāvatthinidānaṃ . ‘‘Icchāmahaṃ, bhikkhave, aḍḍhamāsaṃ paṭisalliyituṃ. Namhi kenaci upasaṅkamitabbo, aññatra ekena piṇḍapātanīhārakenā’’ti. ‘‘Evaṃ, bhante’’ti kho te bhikkhū bhagavato paṭissutvā nāssudha koci bhagavantaṃ upasaṅkamati, aññatra ekena piṇḍapātanīhārakena.
ཨཐ ཁོ བྷགཝཱ ཏསྶ ཨཌྜྷམཱསསྶ ཨཙྩཡེན པཊིསལླཱནཱ ཝུཊྛིཏོ བྷིཀྑཱུ ཨཱམནྟེསི – ‘‘ཡེན སྭཱཧཾ, བྷིཀྑཝེ, ཝིཧཱརེན པཋམཱབྷིསམྦུདྡྷོ ཝིཧརཱམི, ཏསྶ པདེསེན ཝིཧཱསིཾ། སོ ཨེཝཾ པཛཱནཱམི – ‘མིཙྪཱདིཊྛིཔཙྩཡཱཔི ཝེདཡིཏཾ; སམྨཱདིཊྛིཔཙྩཡཱཔི ཝེདཡིཏཾ…པེ॰… མིཙྪཱསམཱདྷིཔཙྩཡཱཔི ཝེདཡིཏཾ; སམྨཱསམཱདྷིཔཙྩཡཱཔི ཝེདཡིཏཾ; ཚནྡཔཙྩཡཱཔི ཝེདཡིཏཾ; ཝིཏཀྐཔཙྩཡཱཔི ཝེདཡིཏཾ; སཉྙཱཔཙྩཡཱཔི ཝེདཡིཏཾ; ཚནྡོ ཙ ཨཝཱུཔསནྟོ ཧོཏི, ཝིཏཀྐོ ཙ ཨཝཱུཔསནྟོ ཧོཏི, སཉྙཱ ཙ ཨཝཱུཔསནྟཱ ཧོཏི, ཏཔྤཙྩཡཱཔི ཝེདཡིཏཾ; ཚནྡོ ཙ ཝཱུཔསནྟོ ཧོཏི, ཝིཏཀྐོ ཙ ཝཱུཔསནྟོ ཧོཏི, སཉྙཱ ཙ ཝཱུཔསནྟཱ ཧོཏི, ཏཔྤཙྩཡཱཔི ཝེདཡིཏཾ; ཨཔྤཏྟསྶ པཏྟིཡཱ ཨཏྠི ཨཱཡཱམཾ 1, ཏསྨིམྤི ཋཱནེ ཨནུཔྤཏྟེ ཏཔྤཙྩཡཱཔི ཝེདཡིཏ’’’ནྟི། པཋམཾ།
Atha kho bhagavā tassa aḍḍhamāsassa accayena paṭisallānā vuṭṭhito bhikkhū āmantesi – ‘‘yena svāhaṃ, bhikkhave, vihārena paṭhamābhisambuddho viharāmi, tassa padesena vihāsiṃ. So evaṃ pajānāmi – ‘micchādiṭṭhipaccayāpi vedayitaṃ; sammādiṭṭhipaccayāpi vedayitaṃ…pe… micchāsamādhipaccayāpi vedayitaṃ; sammāsamādhipaccayāpi vedayitaṃ; chandapaccayāpi vedayitaṃ; vitakkapaccayāpi vedayitaṃ; saññāpaccayāpi vedayitaṃ; chando ca avūpasanto hoti, vitakko ca avūpasanto hoti, saññā ca avūpasantā hoti, tappaccayāpi vedayitaṃ; chando ca vūpasanto hoti, vitakko ca vūpasanto hoti, saññā ca vūpasantā hoti, tappaccayāpi vedayitaṃ; appattassa pattiyā atthi āyāmaṃ 2, tasmimpi ṭhāne anuppatte tappaccayāpi vedayita’’’nti. Paṭhamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༡. པཋམཝིཧཱརསུཏྟཝཎྞནཱ • 1. Paṭhamavihārasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༡. པཋམཝིཧཱརསུཏྟཝཎྞནཱ • 1. Paṭhamavihārasuttavaṇṇanā
