| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) |
༥-༧. པཋམཝིཏྠཱརསུཏྟཱདིཝཎྞནཱ
5-7. Paṭhamavitthārasuttādivaṇṇanā
༤༨༥-༤༨༧. པཉྩམེ ཏཏོ མུདུཏརེཧཱིཏི ཝིཔསྶནཱཝསེན ནིསྶཀྐཾ ཝེདིཏབྦཾ། པརིཔུཎྞཱནི ཧི པཉྩིནྡྲིཡཱནི ཨརཧཏྟམགྒསྶ ཝིཔསྶནིནྡྲིཡཱནི ཧོནྟི, ཏཏོ མུདུཏརཱནི ཨནྟརཱཔརིནིབྦཱཡིསྶ ཝིཔསྶནིནྡྲིཡཱནི, ཏཏོ མུདུཏརཱནི ཨུཔཧཙྩཔརིནིབྦཱཡིསྶ, ཏཏོ མུདུཏརཱནི ཨསངྑཱརཔརིནིབྦཱཡིསྶ, ཏཏོ མུདུཏརཱནི སསངྑཱརཔརིནིབྦཱཡིསྶ, ཏཏོ མུདུཏརཱནི ཨུདྡྷཾསོཏཨཀནིཊྛགཱམིསྶ ཝིཔསྶནིནྡྲིཡཱནི ནཱམ ཧོནྟི།
485-487. Pañcame tato mudutarehīti vipassanāvasena nissakkaṃ veditabbaṃ. Paripuṇṇāni hi pañcindriyāni arahattamaggassa vipassanindriyāni honti, tato mudutarāni antarāparinibbāyissa vipassanindriyāni, tato mudutarāni upahaccaparinibbāyissa, tato mudutarāni asaṅkhāraparinibbāyissa, tato mudutarāni sasaṅkhāraparinibbāyissa, tato mudutarāni uddhaṃsotaakaniṭṭhagāmissa vipassanindriyāni nāma honti.
ཨིམསྨིཾ པན ཋཱནེ ཨརཧཏྟམགྒེཡེཝ ཋཏྭཱ པཉྩ ནིསྶཀྐཱནི ནཱིཧརིཏབྦཱནི། ཨརཧཏྟམགྒསྶ ཧི ཝིཔསྶནིནྡྲིཡེཧི མུདུཏརཱནི པཋམཨནྟརཱཔརིནིབྦཱཡིསྶ ཝིཔསྶནིནྡྲིཡཱནི, ཏཏོ མུདུཏརཱནི དུཏིཡཨནྟརཱཔརིནིབྦཱཡིསྶ, ཏཏོ མུདུཏརཱནི ཏཏིཡཨནྟརཱཔརིནིབྦཱཡིསྶ, ཏཏོ མུདུཏརཱནི ཨུཔཧཙྩཔརིནིབྦཱཡིསྶ, ཏཏོ མུདུཏརཱནི ཨུདྡྷཾསོཏཨཀནིཊྛགཱམིསྶ ཝིཔསྶནིནྡྲིཡཱནི། ཨསངྑཱརཔརིནིབྦཱཡིསྶ སསངྑཱརཔརིནིབྦཱཡིནོཔི ཨེཏེཝ པཉྩ ཛནཱ།
Imasmiṃ pana ṭhāne arahattamaggeyeva ṭhatvā pañca nissakkāni nīharitabbāni. Arahattamaggassa hi vipassanindriyehi mudutarāni paṭhamaantarāparinibbāyissa vipassanindriyāni, tato mudutarāni dutiyaantarāparinibbāyissa, tato mudutarāni tatiyaantarāparinibbāyissa, tato mudutarāni upahaccaparinibbāyissa, tato mudutarāni uddhaṃsotaakaniṭṭhagāmissa vipassanindriyāni. Asaṅkhāraparinibbāyissa sasaṅkhāraparinibbāyinopi eteva pañca janā.
ཨིདཱནི ཏཱིཎི ནིསྶཀྐཱནི། སཀདཱགཱམིམགྒསྶ ཧི ཨིནྡྲིཡེཧི མུདུཏརཱནི སོཏཱཔཏྟིམགྒིནྡྲིཡཱནི, སོཏཱཔཏྟིམགྒེཡེཝ ཨིནྡྲིཡེཧི མུདུཏརཱནི དྷམྨཱནུསཱརིམགྒིནྡྲིཡཱནི། ཏེཧིཔི མུདུཏརཱནི སདྡྷཱནུསཱརིམགྒིནྡྲིཡཱནི། ཚཊྛསཏྟམཱནི ཝུཏྟནཡཱནེཝ། ཨིམེསུ པན ཏཱིསུཔི སུཏྟེསུ པུབྦབྷཱགཝིཔསྶནིནྡྲིཡཱནེཝ ཀཐིཏཱནི།
Idāni tīṇi nissakkāni. Sakadāgāmimaggassa hi indriyehi mudutarāni sotāpattimaggindriyāni, sotāpattimaggeyeva indriyehi mudutarāni dhammānusārimaggindriyāni. Tehipi mudutarāni saddhānusārimaggindriyāni. Chaṭṭhasattamāni vuttanayāneva. Imesu pana tīsupi suttesu pubbabhāgavipassanindriyāneva kathitāni.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / སཾཡུཏྟནིཀཱཡ • Saṃyuttanikāya
༥. པཋམཝིཏྠཱརསུཏྟཾ • 5. Paṭhamavitthārasuttaṃ
༦. དུཏིཡཝིཏྠཱརསུཏྟཾ • 6. Dutiyavitthārasuttaṃ
༧. ཏཏིཡཝིཏྠཱརསུཏྟཾ • 7. Tatiyavitthārasuttaṃ
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༥-༧. པཋམཝིཏྠཱརསུཏྟཱདིཝཎྞནཱ • 5-7. Paṭhamavitthārasuttādivaṇṇanā
