| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๗. สตฺตมวโคฺค
7. Sattamavaggo
(๖๙) ๗. ปถวี กมฺมวิปาโกติกถา
(69) 7. Pathavī kammavipākotikathā
๔๙๒. ปถวี กมฺมวิปาโกติ? อามนฺตาฯ สุขเวทนิยา ทุกฺขเวทนิยา อทุกฺขมสุขเวทนิยา, สุขาย เวทนาย สมฺปยุตฺตา, ทุกฺขาย เวทนาย สมฺปยุตฺตา, อทุกฺขมสุขาย เวทนาย สมฺปยุตฺตา, ผเสฺสน สมฺปยุตฺตา, เวทนาย สมฺปยุตฺตา, สญฺญาย สมฺปยุตฺตา, เจตนาย สมฺปยุตฺตา, จิเตฺตน สมฺปยุตฺตา, สารมฺมณา; อตฺถิ ตาย อาวฎฺฎนา 1 อาโภโค สมนฺนาหาโร มนสิกาโร เจตนา ปตฺถนา ปณิธีติ? น เหวํ วตฺตเพฺพ…เป.… นนุ น สุขเวทนิยา น ทุกฺขเวทนิยา น อทุกฺขมสุขเวทนิยา, น สุขาย เวทนาย สมฺปยุตฺตา, น ทุกฺขาย เวทนาย สมฺปยุตฺตา, น อทุกฺขมสุขาย เวทนาย สมฺปยุตฺตา, น ผเสฺสน สมฺปยุตฺตา, น เวทนาย สมฺปยุตฺตา, น สญฺญาย สมฺปยุตฺตา, น เจตนาย สมฺปยุตฺตา, น จิเตฺตน สมฺปยุตฺตา, อนารมฺมณา; นตฺถิ ตาย อาวฎฺฎนา อาโภโค สมนฺนาหาโร มนสิกาโร เจตนา ปตฺถนา ปณิธีติ? อามนฺตาฯ หญฺจิ น สุขเวทนิยา น ทุกฺขเวทนิยา…เป.… อนารมฺมณา; นตฺถิ ตาย อาวฎฺฎนา…เป.… ปณิธิ, โน จ วต เร วตฺตเพฺพ – ‘‘ปถวี กมฺมวิปาโก’’ติฯ
492. Pathavī kammavipākoti? Āmantā. Sukhavedaniyā dukkhavedaniyā adukkhamasukhavedaniyā, sukhāya vedanāya sampayuttā, dukkhāya vedanāya sampayuttā, adukkhamasukhāya vedanāya sampayuttā, phassena sampayuttā, vedanāya sampayuttā, saññāya sampayuttā, cetanāya sampayuttā, cittena sampayuttā, sārammaṇā; atthi tāya āvaṭṭanā 2 ābhogo samannāhāro manasikāro cetanā patthanā paṇidhīti? Na hevaṃ vattabbe…pe… nanu na sukhavedaniyā na dukkhavedaniyā na adukkhamasukhavedaniyā, na sukhāya vedanāya sampayuttā, na dukkhāya vedanāya sampayuttā, na adukkhamasukhāya vedanāya sampayuttā, na phassena sampayuttā, na vedanāya sampayuttā, na saññāya sampayuttā, na cetanāya sampayuttā, na cittena sampayuttā, anārammaṇā; natthi tāya āvaṭṭanā ābhogo samannāhāro manasikāro cetanā patthanā paṇidhīti? Āmantā. Hañci na sukhavedaniyā na dukkhavedaniyā…pe… anārammaṇā; natthi tāya āvaṭṭanā…pe… paṇidhi, no ca vata re vattabbe – ‘‘pathavī kammavipāko’’ti.
ผโสฺส กมฺมวิปาโก, ผโสฺส สุขเวทนิโย ทุกฺขเวทนิโย อทุกฺขมสุขเวทนิโย สุขาย เวทนาย สมฺปยุโตฺต ทุกฺขาย…เป.… อทุกฺขมสุขาย เวทนาย สมฺปยุโตฺต ผเสฺสน สมฺปยุโตฺต เวทนาย สมฺปยุโตฺต สญฺญาย สมฺปยุโตฺต เจตนาย สมฺปยุโตฺต จิเตฺตน สมฺปยุโตฺต สารมฺมโณ; อตฺถิ ตสฺส อาวฎฺฎนา…เป.… ปณิธีติ? อามนฺตาฯ ปถวี กมฺมวิปาโก, ปถวี สุขเวทนิยา ทุกฺขเวทนิยา อทุกฺขมสุขเวทนิยา สุขาย เวทนาย สมฺปยุตฺตา ทุกฺขาย…เป.… อทุกฺขมสุขาย เวทนาย สมฺปยุตฺตา ผเสฺสน สมฺปยุตฺตา เวทนาย สมฺปยุตฺตา สญฺญาย สมฺปยุตฺตา เจตนาย สมฺปยุตฺตา จิเตฺตน สมฺปยุตฺตา สารมฺมณา; อตฺถิ ตาย อาวฎฺฎนา อาโภโค สมนฺนาหาโร มนสิกาโร เจตนา ปตฺถนา ปณิธีติ? น เหวํ วตฺตเพฺพ …เป.… ปถวี กมฺมวิปาโก, ปถวี น สุขเวทนิยา น ทุกฺขเวทนิยา…เป.… อนารมฺมณา; นตฺถิ ตาย อาวฎฺฎนา…เป.… ปณิธีติ? อามนฺตาฯ ผโสฺส กมฺมวิปาโก, ผโสฺส น สุขเวทนิโย น ทุกฺขเวทนิโย …เป.… อนารมฺมโณ; นตฺถิ ตสฺส อาวฎฺฎนา…เป.… ปณิธีติ? น เหวํ วตฺตเพฺพ…เป.…ฯ
Phasso kammavipāko, phasso sukhavedaniyo dukkhavedaniyo adukkhamasukhavedaniyo sukhāya vedanāya sampayutto dukkhāya…pe… adukkhamasukhāya vedanāya sampayutto phassena sampayutto vedanāya sampayutto saññāya sampayutto cetanāya sampayutto cittena sampayutto sārammaṇo; atthi tassa āvaṭṭanā…pe… paṇidhīti? Āmantā. Pathavī kammavipāko, pathavī sukhavedaniyā dukkhavedaniyā adukkhamasukhavedaniyā sukhāya vedanāya sampayuttā dukkhāya…pe… adukkhamasukhāya vedanāya sampayuttā phassena sampayuttā vedanāya sampayuttā saññāya sampayuttā cetanāya sampayuttā cittena sampayuttā sārammaṇā; atthi tāya āvaṭṭanā ābhogo samannāhāro manasikāro cetanā patthanā paṇidhīti? Na hevaṃ vattabbe …pe… pathavī kammavipāko, pathavī na sukhavedaniyā na dukkhavedaniyā…pe… anārammaṇā; natthi tāya āvaṭṭanā…pe… paṇidhīti? Āmantā. Phasso kammavipāko, phasso na sukhavedaniyo na dukkhavedaniyo …pe… anārammaṇo; natthi tassa āvaṭṭanā…pe… paṇidhīti? Na hevaṃ vattabbe…pe….
ปถวี กมฺมวิปาโกติ? อามนฺตาฯ ปถวี ปคฺคหนิคฺคหุปคา เฉทนเภทนุปคาติ? อามนฺตา ฯ กมฺมวิปาโก ปคฺคหนิคฺคหุปโค เฉทนเภทนุปโคติ? น เหวํ วตฺตเพฺพ…เป.…ฯ
Pathavī kammavipākoti? Āmantā. Pathavī paggahaniggahupagā chedanabhedanupagāti? Āmantā . Kammavipāko paggahaniggahupago chedanabhedanupagoti? Na hevaṃ vattabbe…pe….
ลพฺภา ปถวี เกตุํ วิเกฺกตุํ อาฐเปตุํ โอจินิตุํ วิจินิตุนฺติ? อามนฺตาฯ ลพฺภา กมฺมวิปาโก เกตุํ วิเกฺกตุํ อาฐเปตุํ โอจินิตุํ วิจินิตุนฺติ? น เหวํ วตฺตเพฺพ…เป.…ฯ
Labbhā pathavī ketuṃ vikketuṃ āṭhapetuṃ ocinituṃ vicinitunti? Āmantā. Labbhā kammavipāko ketuṃ vikketuṃ āṭhapetuṃ ocinituṃ vicinitunti? Na hevaṃ vattabbe…pe….
๔๙๓. ปถวี ปเรสํ สาธารณาติ? อามนฺตาฯ กมฺมวิปาโก ปเรสํ สาธารโณติ? น เหวํ วตฺตเพฺพ…เป.…ฯ
493. Pathavī paresaṃ sādhāraṇāti? Āmantā. Kammavipāko paresaṃ sādhāraṇoti? Na hevaṃ vattabbe…pe….
กมฺมวิปาโก ปเรสํ สาธารโณติ? อามนฺตาฯ นนุ วุตฺตํ ภควตา –
Kammavipāko paresaṃ sādhāraṇoti? Āmantā. Nanu vuttaṃ bhagavatā –
‘‘อสาธารณมเญฺญสํ, อโจรหรโณ นิธิ;
‘‘Asādhāraṇamaññesaṃ, acoraharaṇo nidhi;
อเตฺถว สุตฺตโนฺตติ? อามนฺตาฯ เตน หิ น วตฺตพฺพํ – ‘‘กมฺมวิปาโก ปเรสํ สาธารโณ’’ติฯ
Attheva suttantoti? Āmantā. Tena hi na vattabbaṃ – ‘‘kammavipāko paresaṃ sādhāraṇo’’ti.
ปถวี กมฺมวิปาโกติ? อามนฺตาฯ ปฐมํ ปถวี สณฺฐาติ, ปจฺฉา สตฺตา อุปฺปชฺชนฺตีติ? อามนฺตาฯ ปฐมํ วิปาโก อุปฺปชฺชติ, ปจฺฉา วิปากปฎิลาภาย กมฺมํ กโรนฺตีติ? น เหวํ วตฺตเพฺพ…เป.…ฯ
Pathavī kammavipākoti? Āmantā. Paṭhamaṃ pathavī saṇṭhāti, pacchā sattā uppajjantīti? Āmantā. Paṭhamaṃ vipāko uppajjati, pacchā vipākapaṭilābhāya kammaṃ karontīti? Na hevaṃ vattabbe…pe….
ปถวี สพฺพสตฺตานํ กมฺมวิปาโกติ? อามนฺตา ฯ สเพฺพ สตฺตา ปถวิํ ปริภุญฺชนฺตีติ? น เหวํ วตฺตเพฺพ…เป.… สเพฺพ สตฺตา ปถวิํ ปริภุญฺชนฺตีติ? อามนฺตาฯ อตฺถิ เกจิ ปถวิํ อปริภุญฺชิตฺวา ปรินิพฺพายนฺตีติ? อามนฺตาฯ อตฺถิ เกจิ กมฺมวิปากํ อเขเปตฺวา ปรินิพฺพายนฺตีติ? น เหวํ วตฺตเพฺพ…เป.…ฯ
Pathavī sabbasattānaṃ kammavipākoti? Āmantā . Sabbe sattā pathaviṃ paribhuñjantīti? Na hevaṃ vattabbe…pe… sabbe sattā pathaviṃ paribhuñjantīti? Āmantā. Atthi keci pathaviṃ aparibhuñjitvā parinibbāyantīti? Āmantā. Atthi keci kammavipākaṃ akhepetvā parinibbāyantīti? Na hevaṃ vattabbe…pe….
ปถวี จกฺกวตฺติสตฺตสฺส กมฺมวิปาโกติ? อามนฺตาฯ อเญฺญ สตฺตา ปถวิํ ปริภุญฺชนฺตีติ? อามนฺตาฯ จกฺกวตฺติสตฺตสฺส กมฺมวิปากํ อเญฺญ สตฺตา ปริภุญฺชนฺตีติ? น เหวํ วตฺตเพฺพ…เป.… จกฺกวตฺติสตฺตสฺส กมฺมวิปากํ อเญฺญ สตฺตา ปริภุญฺชนฺตีติ? อามนฺตา ฯ จกฺกวตฺติสตฺตสฺส ผสฺสํ เวทนํ สญฺญํ เจตนํ จิตฺตํ สทฺธํ วีริยํ สติํ สมาธิํ ปญฺญํ อเญฺญ สตฺตา ปริภุญฺชนฺตีติ? น เหวํ วตฺตเพฺพ…เป.…ฯ
Pathavī cakkavattisattassa kammavipākoti? Āmantā. Aññe sattā pathaviṃ paribhuñjantīti? Āmantā. Cakkavattisattassa kammavipākaṃ aññe sattā paribhuñjantīti? Na hevaṃ vattabbe…pe… cakkavattisattassa kammavipākaṃ aññe sattā paribhuñjantīti? Āmantā . Cakkavattisattassa phassaṃ vedanaṃ saññaṃ cetanaṃ cittaṃ saddhaṃ vīriyaṃ satiṃ samādhiṃ paññaṃ aññe sattā paribhuñjantīti? Na hevaṃ vattabbe…pe….
๔๙๔. น วตฺตพฺพํ – ‘‘ปถวี กมฺมวิปาโก’’ติ? อามนฺตาฯ นนุ อตฺถิ อิสฺสริยสํวตฺตนิยํ กมฺมํ อธิปจฺจสํวตฺตนิยํ กมฺมนฺติ? อามนฺตาฯ หญฺจิ อตฺถิ อิสฺสริยสํวตฺตนิยํ กมฺมํ อธิปจฺจสํวตฺตนิยํ กมฺมํ, เตน วต เร วตฺตเพฺพ – ‘‘ปถวี กมฺมวิปาโก’’ติฯ
494. Na vattabbaṃ – ‘‘pathavī kammavipāko’’ti? Āmantā. Nanu atthi issariyasaṃvattaniyaṃ kammaṃ adhipaccasaṃvattaniyaṃ kammanti? Āmantā. Hañci atthi issariyasaṃvattaniyaṃ kammaṃ adhipaccasaṃvattaniyaṃ kammaṃ, tena vata re vattabbe – ‘‘pathavī kammavipāko’’ti.
ปถวี กมฺมวิปาโกติกถา นิฎฺฐิตาฯ
Pathavī kammavipākotikathā niṭṭhitā.
Footnotes:
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๗. ปถวีกมฺมวิปาโกติกถาวณฺณนา • 7. Pathavīkammavipākotikathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๗. ปถวีกมฺมวิปาโกติกถาวณฺณนา • 7. Pathavīkammavipākotikathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๗. ปถวีกมฺมวิปาโกติกถาวณฺณนา • 7. Pathavīkammavipākotikathāvaṇṇanā
