| Library / Tipiṭaka / តិបិដក • Tipiṭaka / កថាវត្ថុបាឡិ • Kathāvatthupāḷi |
៧. សត្តមវគ្គោ
7. Sattamavaggo
(៦៩) ៧. បថវី កម្មវិបាកោតិកថា
(69) 7. Pathavī kammavipākotikathā
៤៩២. បថវី កម្មវិបាកោតិ? អាមន្តា។ សុខវេទនិយា ទុក្ខវេទនិយា អទុក្ខមសុខវេទនិយា, សុខាយ វេទនាយ សម្បយុត្តា, ទុក្ខាយ វេទនាយ សម្បយុត្តា, អទុក្ខមសុខាយ វេទនាយ សម្បយុត្តា, ផស្សេន សម្បយុត្តា, វេទនាយ សម្បយុត្តា, សញ្ញាយ សម្បយុត្តា, ចេតនាយ សម្បយុត្តា, ចិត្តេន សម្បយុត្តា, សារម្មណា; អត្ថិ តាយ អាវដ្ដនា 1 អាភោគោ សមន្នាហារោ មនសិការោ ចេតនា បត្ថនា បណិធីតិ? ន ហេវំ វត្តព្ពេ…បេ.… ននុ ន សុខវេទនិយា ន ទុក្ខវេទនិយា ន អទុក្ខមសុខវេទនិយា, ន សុខាយ វេទនាយ សម្បយុត្តា, ន ទុក្ខាយ វេទនាយ សម្បយុត្តា, ន អទុក្ខមសុខាយ វេទនាយ សម្បយុត្តា, ន ផស្សេន សម្បយុត្តា, ន វេទនាយ សម្បយុត្តា, ន សញ្ញាយ សម្បយុត្តា, ន ចេតនាយ សម្បយុត្តា, ន ចិត្តេន សម្បយុត្តា, អនារម្មណា; នត្ថិ តាយ អាវដ្ដនា អាភោគោ សមន្នាហារោ មនសិការោ ចេតនា បត្ថនា បណិធីតិ? អាមន្តា។ ហញ្ចិ ន សុខវេទនិយា ន ទុក្ខវេទនិយា…បេ.… អនារម្មណា; នត្ថិ តាយ អាវដ្ដនា…បេ.… បណិធិ, នោ ច វត រេ វត្តព្ពេ – ‘‘បថវី កម្មវិបាកោ’’តិ។
492. Pathavī kammavipākoti? Āmantā. Sukhavedaniyā dukkhavedaniyā adukkhamasukhavedaniyā, sukhāya vedanāya sampayuttā, dukkhāya vedanāya sampayuttā, adukkhamasukhāya vedanāya sampayuttā, phassena sampayuttā, vedanāya sampayuttā, saññāya sampayuttā, cetanāya sampayuttā, cittena sampayuttā, sārammaṇā; atthi tāya āvaṭṭanā 2 ābhogo samannāhāro manasikāro cetanā patthanā paṇidhīti? Na hevaṃ vattabbe…pe… nanu na sukhavedaniyā na dukkhavedaniyā na adukkhamasukhavedaniyā, na sukhāya vedanāya sampayuttā, na dukkhāya vedanāya sampayuttā, na adukkhamasukhāya vedanāya sampayuttā, na phassena sampayuttā, na vedanāya sampayuttā, na saññāya sampayuttā, na cetanāya sampayuttā, na cittena sampayuttā, anārammaṇā; natthi tāya āvaṭṭanā ābhogo samannāhāro manasikāro cetanā patthanā paṇidhīti? Āmantā. Hañci na sukhavedaniyā na dukkhavedaniyā…pe… anārammaṇā; natthi tāya āvaṭṭanā…pe… paṇidhi, no ca vata re vattabbe – ‘‘pathavī kammavipāko’’ti.
ផស្សោ កម្មវិបាកោ, ផស្សោ សុខវេទនិយោ ទុក្ខវេទនិយោ អទុក្ខមសុខវេទនិយោ សុខាយ វេទនាយ សម្បយុត្តោ ទុក្ខាយ…បេ.… អទុក្ខមសុខាយ វេទនាយ សម្បយុត្តោ ផស្សេន សម្បយុត្តោ វេទនាយ សម្បយុត្តោ សញ្ញាយ សម្បយុត្តោ ចេតនាយ សម្បយុត្តោ ចិត្តេន សម្បយុត្តោ សារម្មណោ; អត្ថិ តស្ស អាវដ្ដនា…បេ.… បណិធីតិ? អាមន្តា។ បថវី កម្មវិបាកោ, បថវី សុខវេទនិយា ទុក្ខវេទនិយា អទុក្ខមសុខវេទនិយា សុខាយ វេទនាយ សម្បយុត្តា ទុក្ខាយ…បេ.… អទុក្ខមសុខាយ វេទនាយ សម្បយុត្តា ផស្សេន សម្បយុត្តា វេទនាយ សម្បយុត្តា សញ្ញាយ សម្បយុត្តា ចេតនាយ សម្បយុត្តា ចិត្តេន សម្បយុត្តា សារម្មណា; អត្ថិ តាយ អាវដ្ដនា អាភោគោ សមន្នាហារោ មនសិការោ ចេតនា បត្ថនា បណិធីតិ? ន ហេវំ វត្តព្ពេ …បេ.… បថវី កម្មវិបាកោ, បថវី ន សុខវេទនិយា ន ទុក្ខវេទនិយា…បេ.… អនារម្មណា; នត្ថិ តាយ អាវដ្ដនា…បេ.… បណិធីតិ? អាមន្តា។ ផស្សោ កម្មវិបាកោ, ផស្សោ ន សុខវេទនិយោ ន ទុក្ខវេទនិយោ …បេ.… អនារម្មណោ; នត្ថិ តស្ស អាវដ្ដនា…បេ.… បណិធីតិ? ន ហេវំ វត្តព្ពេ…បេ.…។
Phasso kammavipāko, phasso sukhavedaniyo dukkhavedaniyo adukkhamasukhavedaniyo sukhāya vedanāya sampayutto dukkhāya…pe… adukkhamasukhāya vedanāya sampayutto phassena sampayutto vedanāya sampayutto saññāya sampayutto cetanāya sampayutto cittena sampayutto sārammaṇo; atthi tassa āvaṭṭanā…pe… paṇidhīti? Āmantā. Pathavī kammavipāko, pathavī sukhavedaniyā dukkhavedaniyā adukkhamasukhavedaniyā sukhāya vedanāya sampayuttā dukkhāya…pe… adukkhamasukhāya vedanāya sampayuttā phassena sampayuttā vedanāya sampayuttā saññāya sampayuttā cetanāya sampayuttā cittena sampayuttā sārammaṇā; atthi tāya āvaṭṭanā ābhogo samannāhāro manasikāro cetanā patthanā paṇidhīti? Na hevaṃ vattabbe …pe… pathavī kammavipāko, pathavī na sukhavedaniyā na dukkhavedaniyā…pe… anārammaṇā; natthi tāya āvaṭṭanā…pe… paṇidhīti? Āmantā. Phasso kammavipāko, phasso na sukhavedaniyo na dukkhavedaniyo …pe… anārammaṇo; natthi tassa āvaṭṭanā…pe… paṇidhīti? Na hevaṃ vattabbe…pe….
បថវី កម្មវិបាកោតិ? អាមន្តា។ បថវី បគ្គហនិគ្គហុបគា ឆេទនភេទនុបគាតិ? អាមន្តា ។ កម្មវិបាកោ បគ្គហនិគ្គហុបគោ ឆេទនភេទនុបគោតិ? ន ហេវំ វត្តព្ពេ…បេ.…។
Pathavī kammavipākoti? Āmantā. Pathavī paggahaniggahupagā chedanabhedanupagāti? Āmantā . Kammavipāko paggahaniggahupago chedanabhedanupagoti? Na hevaṃ vattabbe…pe….
លព្ភា បថវី កេតុំ វិក្កេតុំ អាឋបេតុំ ឱចិនិតុំ វិចិនិតុន្តិ? អាមន្តា។ លព្ភា កម្មវិបាកោ កេតុំ វិក្កេតុំ អាឋបេតុំ ឱចិនិតុំ វិចិនិតុន្តិ? ន ហេវំ វត្តព្ពេ…បេ.…។
Labbhā pathavī ketuṃ vikketuṃ āṭhapetuṃ ocinituṃ vicinitunti? Āmantā. Labbhā kammavipāko ketuṃ vikketuṃ āṭhapetuṃ ocinituṃ vicinitunti? Na hevaṃ vattabbe…pe….
៤៩៣. បថវី បរេសំ សាធារណាតិ? អាមន្តា។ កម្មវិបាកោ បរេសំ សាធារណោតិ? ន ហេវំ វត្តព្ពេ…បេ.…។
493. Pathavī paresaṃ sādhāraṇāti? Āmantā. Kammavipāko paresaṃ sādhāraṇoti? Na hevaṃ vattabbe…pe….
កម្មវិបាកោ បរេសំ សាធារណោតិ? អាមន្តា។ ននុ វុត្តំ ភគវតា –
Kammavipāko paresaṃ sādhāraṇoti? Āmantā. Nanu vuttaṃ bhagavatā –
‘‘អសាធារណមញ្ញេសំ, អចោរហរណោ និធិ;
‘‘Asādhāraṇamaññesaṃ, acoraharaṇo nidhi;
អត្ថេវ សុត្តន្តោតិ? អាមន្តា។ តេន ហិ ន វត្តព្ពំ – ‘‘កម្មវិបាកោ បរេសំ សាធារណោ’’តិ។
Attheva suttantoti? Āmantā. Tena hi na vattabbaṃ – ‘‘kammavipāko paresaṃ sādhāraṇo’’ti.
បថវី កម្មវិបាកោតិ? អាមន្តា។ បឋមំ បថវី សណ្ឋាតិ, បច្ឆា សត្តា ឧប្បជ្ជន្តីតិ? អាមន្តា។ បឋមំ វិបាកោ ឧប្បជ្ជតិ, បច្ឆា វិបាកបដិលាភាយ កម្មំ ករោន្តីតិ? ន ហេវំ វត្តព្ពេ…បេ.…។
Pathavī kammavipākoti? Āmantā. Paṭhamaṃ pathavī saṇṭhāti, pacchā sattā uppajjantīti? Āmantā. Paṭhamaṃ vipāko uppajjati, pacchā vipākapaṭilābhāya kammaṃ karontīti? Na hevaṃ vattabbe…pe….
បថវី សព្ពសត្តានំ កម្មវិបាកោតិ? អាមន្តា ។ សព្ពេ សត្តា បថវិំ បរិភុញ្ជន្តីតិ? ន ហេវំ វត្តព្ពេ…បេ.… សព្ពេ សត្តា បថវិំ បរិភុញ្ជន្តីតិ? អាមន្តា។ អត្ថិ កេចិ បថវិំ អបរិភុញ្ជិត្វា បរិនិព្ពាយន្តីតិ? អាមន្តា។ អត្ថិ កេចិ កម្មវិបាកំ អខេបេត្វា បរិនិព្ពាយន្តីតិ? ន ហេវំ វត្តព្ពេ…បេ.…។
Pathavī sabbasattānaṃ kammavipākoti? Āmantā . Sabbe sattā pathaviṃ paribhuñjantīti? Na hevaṃ vattabbe…pe… sabbe sattā pathaviṃ paribhuñjantīti? Āmantā. Atthi keci pathaviṃ aparibhuñjitvā parinibbāyantīti? Āmantā. Atthi keci kammavipākaṃ akhepetvā parinibbāyantīti? Na hevaṃ vattabbe…pe….
បថវី ចក្កវត្តិសត្តស្ស កម្មវិបាកោតិ? អាមន្តា។ អញ្ញេ សត្តា បថវិំ បរិភុញ្ជន្តីតិ? អាមន្តា។ ចក្កវត្តិសត្តស្ស កម្មវិបាកំ អញ្ញេ សត្តា បរិភុញ្ជន្តីតិ? ន ហេវំ វត្តព្ពេ…បេ.… ចក្កវត្តិសត្តស្ស កម្មវិបាកំ អញ្ញេ សត្តា បរិភុញ្ជន្តីតិ? អាមន្តា ។ ចក្កវត្តិសត្តស្ស ផស្សំ វេទនំ សញ្ញំ ចេតនំ ចិត្តំ សទ្ធំ វីរិយំ សតិំ សមាធិំ បញ្ញំ អញ្ញេ សត្តា បរិភុញ្ជន្តីតិ? ន ហេវំ វត្តព្ពេ…បេ.…។
Pathavī cakkavattisattassa kammavipākoti? Āmantā. Aññe sattā pathaviṃ paribhuñjantīti? Āmantā. Cakkavattisattassa kammavipākaṃ aññe sattā paribhuñjantīti? Na hevaṃ vattabbe…pe… cakkavattisattassa kammavipākaṃ aññe sattā paribhuñjantīti? Āmantā . Cakkavattisattassa phassaṃ vedanaṃ saññaṃ cetanaṃ cittaṃ saddhaṃ vīriyaṃ satiṃ samādhiṃ paññaṃ aññe sattā paribhuñjantīti? Na hevaṃ vattabbe…pe….
៤៩៤. ន វត្តព្ពំ – ‘‘បថវី កម្មវិបាកោ’’តិ? អាមន្តា។ ននុ អត្ថិ ឥស្សរិយសំវត្តនិយំ កម្មំ អធិបច្ចសំវត្តនិយំ កម្មន្តិ? អាមន្តា។ ហញ្ចិ អត្ថិ ឥស្សរិយសំវត្តនិយំ កម្មំ អធិបច្ចសំវត្តនិយំ កម្មំ, តេន វត រេ វត្តព្ពេ – ‘‘បថវី កម្មវិបាកោ’’តិ។
494. Na vattabbaṃ – ‘‘pathavī kammavipāko’’ti? Āmantā. Nanu atthi issariyasaṃvattaniyaṃ kammaṃ adhipaccasaṃvattaniyaṃ kammanti? Āmantā. Hañci atthi issariyasaṃvattaniyaṃ kammaṃ adhipaccasaṃvattaniyaṃ kammaṃ, tena vata re vattabbe – ‘‘pathavī kammavipāko’’ti.
បថវី កម្មវិបាកោតិកថា និដ្ឋិតា។
Pathavī kammavipākotikathā niṭṭhitā.
Footnotes:
Related texts:
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៧. បថវីកម្មវិបាកោតិកថាវណ្ណនា • 7. Pathavīkammavipākotikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-មូលដីកា • Pañcapakaraṇa-mūlaṭīkā / ៧. បថវីកម្មវិបាកោតិកថាវណ្ណនា • 7. Pathavīkammavipākotikathāvaṇṇanā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៧. បថវីកម្មវិបាកោតិកថាវណ្ណនា • 7. Pathavīkammavipākotikathāvaṇṇanā
