| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
7. සත්‌තමවග්‌ගො
7. Sattamavaggo
(69) 7. පථවී කම්‌මවිපාකොතිකථා
(69) 7. Pathavī kammavipākotikathā
492. පථවී කම්‌මවිපාකොති? ආමන්‌තා. සුඛවෙදනියා දුක්‌ඛවෙදනියා අදුක්‌ඛමසුඛවෙදනියා, සුඛාය වෙදනාය සම්‌පයුත්‌තා, දුක්‌ඛාය වෙදනාය සම්‌පයුත්‌තා, අදුක්‌ඛමසුඛාය වෙදනාය සම්‌පයුත්‌තා, ඵස්‌සෙන සම්‌පයුත්‌තා, වෙදනාය සම්‌පයුත්‌තා, සඤ්‌ඤාය සම්‌පයුත්‌තා, චෙතනාය සම්‌පයුත්‌තා, චිත්‌තෙන සම්‌පයුත්‌තා, සාරම්‌මණා; අත්‌ථි තාය ආවට්‌ටනා 1 ආභොගො සමන්‌නාහාරො මනසිකාරො චෙතනා පත්‌ථනා පණිධීති? න හෙවං වත්‌තබ්‌බෙ…පෙ.… නනු න සුඛවෙදනියා න දුක්‌ඛවෙදනියා න අදුක්‌ඛමසුඛවෙදනියා, න සුඛාය වෙදනාය සම්‌පයුත්‌තා, න දුක්‌ඛාය වෙදනාය සම්‌පයුත්‌තා, න අදුක්‌ඛමසුඛාය වෙදනාය සම්‌පයුත්‌තා, න ඵස්‌සෙන සම්‌පයුත්‌තා, න වෙදනාය සම්‌පයුත්‌තා, න සඤ්‌ඤාය සම්‌පයුත්‌තා, න චෙතනාය සම්‌පයුත්‌තා, න චිත්‌තෙන සම්‌පයුත්‌තා, අනාරම්‌මණා; නත්‌ථි තාය ආවට්‌ටනා ආභොගො සමන්‌නාහාරො මනසිකාරො චෙතනා පත්‌ථනා පණිධීති? ආමන්‌තා. හඤ්‌චි න සුඛවෙදනියා න දුක්‌ඛවෙදනියා…පෙ.… අනාරම්‌මණා; නත්‌ථි තාය ආවට්‌ටනා…පෙ.… පණිධි, නො ච වත රෙ වත්‌තබ්‌බෙ – ‘‘පථවී කම්‌මවිපාකො’’ති.
492. Pathavī kammavipākoti? Āmantā. Sukhavedaniyā dukkhavedaniyā adukkhamasukhavedaniyā, sukhāya vedanāya sampayuttā, dukkhāya vedanāya sampayuttā, adukkhamasukhāya vedanāya sampayuttā, phassena sampayuttā, vedanāya sampayuttā, saññāya sampayuttā, cetanāya sampayuttā, cittena sampayuttā, sārammaṇā; atthi tāya āvaṭṭanā 2 ābhogo samannāhāro manasikāro cetanā patthanā paṇidhīti? Na hevaṃ vattabbe…pe… nanu na sukhavedaniyā na dukkhavedaniyā na adukkhamasukhavedaniyā, na sukhāya vedanāya sampayuttā, na dukkhāya vedanāya sampayuttā, na adukkhamasukhāya vedanāya sampayuttā, na phassena sampayuttā, na vedanāya sampayuttā, na saññāya sampayuttā, na cetanāya sampayuttā, na cittena sampayuttā, anārammaṇā; natthi tāya āvaṭṭanā ābhogo samannāhāro manasikāro cetanā patthanā paṇidhīti? Āmantā. Hañci na sukhavedaniyā na dukkhavedaniyā…pe… anārammaṇā; natthi tāya āvaṭṭanā…pe… paṇidhi, no ca vata re vattabbe – ‘‘pathavī kammavipāko’’ti.
ඵස්‌සො කම්‌මවිපාකො, ඵස්‌සො සුඛවෙදනියො දුක්‌ඛවෙදනියො අදුක්‌ඛමසුඛවෙදනියො සුඛාය වෙදනාය සම්‌පයුත්‌තො දුක්‌ඛාය…පෙ.… අදුක්‌ඛමසුඛාය වෙදනාය සම්‌පයුත්‌තො ඵස්‌සෙන සම්‌පයුත්‌තො වෙදනාය සම්‌පයුත්‌තො සඤ්‌ඤාය සම්‌පයුත්‌තො චෙතනාය සම්‌පයුත්‌තො චිත්‌තෙන සම්‌පයුත්‌තො සාරම්‌මණො; අත්‌ථි තස්‌ස ආවට්‌ටනා…පෙ.… පණිධීති? ආමන්‌තා. පථවී කම්‌මවිපාකො, පථවී සුඛවෙදනියා දුක්‌ඛවෙදනියා අදුක්‌ඛමසුඛවෙදනියා සුඛාය වෙදනාය සම්‌පයුත්‌තා දුක්‌ඛාය…පෙ.… අදුක්‌ඛමසුඛාය වෙදනාය සම්‌පයුත්‌තා ඵස්‌සෙන සම්‌පයුත්‌තා වෙදනාය සම්‌පයුත්‌තා සඤ්‌ඤාය සම්‌පයුත්‌තා චෙතනාය සම්‌පයුත්‌තා චිත්‌තෙන සම්‌පයුත්‌තා සාරම්‌මණා; අත්‌ථි තාය ආවට්‌ටනා ආභොගො සමන්‌නාහාරො මනසිකාරො චෙතනා පත්‌ථනා පණිධීති? න හෙවං වත්‌තබ්‌බෙ …පෙ.… පථවී කම්‌මවිපාකො, පථවී න සුඛවෙදනියා න දුක්‌ඛවෙදනියා…පෙ.… අනාරම්‌මණා; නත්‌ථි තාය ආවට්‌ටනා…පෙ.… පණිධීති? ආමන්‌තා. ඵස්‌සො කම්‌මවිපාකො, ඵස්‌සො න සුඛවෙදනියො න දුක්‌ඛවෙදනියො …පෙ.… අනාරම්‌මණො; නත්‌ථි තස්‌ස ආවට්‌ටනා…පෙ.… පණිධීති? න හෙවං වත්‌තබ්‌බෙ…පෙ.….
Phasso kammavipāko, phasso sukhavedaniyo dukkhavedaniyo adukkhamasukhavedaniyo sukhāya vedanāya sampayutto dukkhāya…pe… adukkhamasukhāya vedanāya sampayutto phassena sampayutto vedanāya sampayutto saññāya sampayutto cetanāya sampayutto cittena sampayutto sārammaṇo; atthi tassa āvaṭṭanā…pe… paṇidhīti? Āmantā. Pathavī kammavipāko, pathavī sukhavedaniyā dukkhavedaniyā adukkhamasukhavedaniyā sukhāya vedanāya sampayuttā dukkhāya…pe… adukkhamasukhāya vedanāya sampayuttā phassena sampayuttā vedanāya sampayuttā saññāya sampayuttā cetanāya sampayuttā cittena sampayuttā sārammaṇā; atthi tāya āvaṭṭanā ābhogo samannāhāro manasikāro cetanā patthanā paṇidhīti? Na hevaṃ vattabbe …pe… pathavī kammavipāko, pathavī na sukhavedaniyā na dukkhavedaniyā…pe… anārammaṇā; natthi tāya āvaṭṭanā…pe… paṇidhīti? Āmantā. Phasso kammavipāko, phasso na sukhavedaniyo na dukkhavedaniyo …pe… anārammaṇo; natthi tassa āvaṭṭanā…pe… paṇidhīti? Na hevaṃ vattabbe…pe….
පථවී කම්‌මවිපාකොති? ආමන්‌තා. පථවී පග්‌ගහනිග්‌ගහුපගා ඡෙදනභෙදනුපගාති? ආමන්‌තා . කම්‌මවිපාකො පග්‌ගහනිග්‌ගහුපගො ඡෙදනභෙදනුපගොති? න හෙවං වත්‌තබ්‌බෙ…පෙ.….
Pathavī kammavipākoti? Āmantā. Pathavī paggahaniggahupagā chedanabhedanupagāti? Āmantā . Kammavipāko paggahaniggahupago chedanabhedanupagoti? Na hevaṃ vattabbe…pe….
ලබ්‌භා පථවී කෙතුං වික්‌කෙතුං ආඨපෙතුං ඔචිනිතුං විචිනිතුන්‌ති? ආමන්‌තා. ලබ්‌භා කම්‌මවිපාකො කෙතුං වික්‌කෙතුං ආඨපෙතුං ඔචිනිතුං විචිනිතුන්‌ති? න හෙවං වත්‌තබ්‌බෙ…පෙ.….
Labbhā pathavī ketuṃ vikketuṃ āṭhapetuṃ ocinituṃ vicinitunti? Āmantā. Labbhā kammavipāko ketuṃ vikketuṃ āṭhapetuṃ ocinituṃ vicinitunti? Na hevaṃ vattabbe…pe….
493. පථවී පරෙසං සාධාරණාති? ආමන්‌තා. කම්‌මවිපාකො පරෙසං සාධාරණොති? න හෙවං වත්‌තබ්‌බෙ…පෙ.….
493. Pathavī paresaṃ sādhāraṇāti? Āmantā. Kammavipāko paresaṃ sādhāraṇoti? Na hevaṃ vattabbe…pe….
කම්‌මවිපාකො පරෙසං සාධාරණොති? ආමන්‌තා. නනු වුත්‌තං භගවතා –
Kammavipāko paresaṃ sādhāraṇoti? Āmantā. Nanu vuttaṃ bhagavatā –
‘‘අසාධාරණමඤ්‌ඤෙසං, අචොරහරණො නිධි;
‘‘Asādhāraṇamaññesaṃ, acoraharaṇo nidhi;
අත්‌ථෙව සුත්‌තන්‌තොති? ආමන්‌තා. තෙන හි න වත්‌තබ්‌බං – ‘‘කම්‌මවිපාකො පරෙසං සාධාරණො’’ති.
Attheva suttantoti? Āmantā. Tena hi na vattabbaṃ – ‘‘kammavipāko paresaṃ sādhāraṇo’’ti.
පථවී කම්‌මවිපාකොති? ආමන්‌තා. පඨමං පථවී සණ්‌ඨාති, පච්‌ඡා සත්‌තා උප්‌පජ්‌ජන්‌තීති? ආමන්‌තා. පඨමං විපාකො උප්‌පජ්‌ජති, පච්‌ඡා විපාකපටිලාභාය කම්‌මං කරොන්‌තීති? න හෙවං වත්‌තබ්‌බෙ…පෙ.….
Pathavī kammavipākoti? Āmantā. Paṭhamaṃ pathavī saṇṭhāti, pacchā sattā uppajjantīti? Āmantā. Paṭhamaṃ vipāko uppajjati, pacchā vipākapaṭilābhāya kammaṃ karontīti? Na hevaṃ vattabbe…pe….
පථවී සබ්‌බසත්‌තානං කම්‌මවිපාකොති? ආමන්‌තා . සබ්‌බෙ සත්‌තා පථවිං පරිභුඤ්‌ජන්‌තීති? න හෙවං වත්‌තබ්‌බෙ…පෙ.… සබ්‌බෙ සත්‌තා පථවිං පරිභුඤ්‌ජන්‌තීති? ආමන්‌තා. අත්‌ථි කෙචි පථවිං අපරිභුඤ්‌ජිත්‌වා පරිනිබ්‌බායන්‌තීති? ආමන්‌තා. අත්‌ථි කෙචි කම්‌මවිපාකං අඛෙපෙත්‌වා පරිනිබ්‌බායන්‌තීති? න හෙවං වත්‌තබ්‌බෙ…පෙ.….
Pathavī sabbasattānaṃ kammavipākoti? Āmantā . Sabbe sattā pathaviṃ paribhuñjantīti? Na hevaṃ vattabbe…pe… sabbe sattā pathaviṃ paribhuñjantīti? Āmantā. Atthi keci pathaviṃ aparibhuñjitvā parinibbāyantīti? Āmantā. Atthi keci kammavipākaṃ akhepetvā parinibbāyantīti? Na hevaṃ vattabbe…pe….
පථවී චක්‌කවත්‌තිසත්‌තස්‌ස කම්‌මවිපාකොති? ආමන්‌තා. අඤ්‌ඤෙ සත්‌තා පථවිං පරිභුඤ්‌ජන්‌තීති? ආමන්‌තා. චක්‌කවත්‌තිසත්‌තස්‌ස කම්‌මවිපාකං අඤ්‌ඤෙ සත්‌තා පරිභුඤ්‌ජන්‌තීති? න හෙවං වත්‌තබ්‌බෙ…පෙ.… චක්‌කවත්‌තිසත්‌තස්‌ස කම්‌මවිපාකං අඤ්‌ඤෙ සත්‌තා පරිභුඤ්‌ජන්‌තීති? ආමන්‌තා . චක්‌කවත්‌තිසත්‌තස්‌ස ඵස්‌සං වෙදනං සඤ්‌ඤං චෙතනං චිත්‌තං සද්‌ධං වීරියං සතිං සමාධිං පඤ්‌ඤං අඤ්‌ඤෙ සත්‌තා පරිභුඤ්‌ජන්‌තීති? න හෙවං වත්‌තබ්‌බෙ…පෙ.….
Pathavī cakkavattisattassa kammavipākoti? Āmantā. Aññe sattā pathaviṃ paribhuñjantīti? Āmantā. Cakkavattisattassa kammavipākaṃ aññe sattā paribhuñjantīti? Na hevaṃ vattabbe…pe… cakkavattisattassa kammavipākaṃ aññe sattā paribhuñjantīti? Āmantā . Cakkavattisattassa phassaṃ vedanaṃ saññaṃ cetanaṃ cittaṃ saddhaṃ vīriyaṃ satiṃ samādhiṃ paññaṃ aññe sattā paribhuñjantīti? Na hevaṃ vattabbe…pe….
494. න වත්‌තබ්‌බං – ‘‘පථවී කම්‌මවිපාකො’’ති? ආමන්‌තා. නනු අත්‌ථි ඉස්‌සරියසංවත්‌තනියං කම්‌මං අධිපච්‌චසංවත්‌තනියං කම්‌මන්‌ති? ආමන්‌තා. හඤ්‌චි අත්‌ථි ඉස්‌සරියසංවත්‌තනියං කම්‌මං අධිපච්‌චසංවත්‌තනියං කම්‌මං, තෙන වත රෙ වත්‌තබ්‌බෙ – ‘‘පථවී කම්‌මවිපාකො’’ති.
494. Na vattabbaṃ – ‘‘pathavī kammavipāko’’ti? Āmantā. Nanu atthi issariyasaṃvattaniyaṃ kammaṃ adhipaccasaṃvattaniyaṃ kammanti? Āmantā. Hañci atthi issariyasaṃvattaniyaṃ kammaṃ adhipaccasaṃvattaniyaṃ kammaṃ, tena vata re vattabbe – ‘‘pathavī kammavipāko’’ti.
පථවී කම්‌මවිපාකොතිකථා නිට්‌ඨිතා.
Pathavī kammavipākotikathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 7. පථවීකම්‌මවිපාකොතිකථාවණ්‌ණනා • 7. Pathavīkammavipākotikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 7. පථවීකම්‌මවිපාකොතිකථාවණ්‌ණනා • 7. Pathavīkammavipākotikathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 7. පථවීකම්‌මවිපාකොතිකථාවණ්‌ණනා • 7. Pathavīkammavipākotikathāvaṇṇanā
