| Library / Tipiṭaka / ཏིཔིཊཀ • Tipiṭaka / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā |
༧. པཐཝཱིཀམྨཝིཔཱཀོཏིཀཐཱཝཎྞནཱ
7. Pathavīkammavipākotikathāvaṇṇanā
༤༩༢. ཕསྶོ སུཁཝེདནཱིཡཱདིབྷེདོ ཧོཏཱིཏི ཕསྶེན སབྦམྤི ཀམྨཝིཔཱཀཾ དསྶེཏྭཱ པུན ཨཏྟཝཛྫེཧི སམྤཡོགདསྶནཏྠཾ ‘‘སོ ཙ སཉྙཱདཡོ ཙཱ’’ཏིཨཱདི ཝུཏྟཾ། ཨཏྠི ཙ ནེསནྟི སཱཝཛྫནེ ཙཀྑུཝིཉྙཱཎཱདིསཧཛཱཏདྷམྨེ སནྡྷཱཡ ཝུཏྟཾ། ཡོ ཏཏྠ ཨིཊྛཝིཔཱཀོ, ཏསྶ པཏྠནཱཏི ཨིཊྛཝིཔཱཀེ ཨེཝ པཏྠནཾ ཀཏྭཱ ཀམྨཾ ཀརོནྟཱིཏི ཀམྨཱུཔནིསྶཡབྷཱུཏམེཝ པཏྠནཾ དསྶེཏི, པཙྩུཔྤནྣཝེདནཱཔཙྩཡཾ ཝཱ ཏཎྷཾ ཨུཔཱདཱནཱདིནིབྦཏྟནཝསེན དུཀྑསྶ པབྷཱཝིཏཾ། མཱུལཏཎྷཱཏི པཙྩུཔྤནྣཝིཔཱཀཝཊྚནིབྦཏྟཀཀམྨསྶ ཨུཔནིསྶཡབྷཱུཏཾ པུརིམཏཎྷཾ, ཀམྨསཧཱཡཾ ཝཱ ཝིཔཱཀསྶ ཨུཔནིསྶཡབྷཱུཏཾ།
492. Phassosukhavedanīyādibhedo hotīti phassena sabbampi kammavipākaṃ dassetvā puna attavajjehi sampayogadassanatthaṃ ‘‘so ca saññādayo cā’’tiādi vuttaṃ. Atthi ca nesanti sāvajjane cakkhuviññāṇādisahajātadhamme sandhāya vuttaṃ. Yo tattha iṭṭhavipāko, tassa patthanāti iṭṭhavipāke eva patthanaṃ katvā kammaṃ karontīti kammūpanissayabhūtameva patthanaṃ dasseti, paccuppannavedanāpaccayaṃ vā taṇhaṃ upādānādinibbattanavasena dukkhassa pabhāvitaṃ. Mūlataṇhāti paccuppannavipākavaṭṭanibbattakakammassa upanissayabhūtaṃ purimataṇhaṃ, kammasahāyaṃ vā vipākassa upanissayabhūtaṃ.
༤༩༣. སཀསམཡཝསེན ཙ ཙོདནཱཡ པཡུཛྫམཱནཏཾ དསྶེཏུཾ ‘‘ཏེསཉྩ ལདྡྷིཡཱ’’ཏིཨཱདིམཱཧ།
493. Sakasamayavasena ca codanāya payujjamānataṃ dassetuṃ ‘‘tesañca laddhiyā’’tiādimāha.
༤༩༤. པཊིལཱབྷཝསེནཱཏི ཀམྨེ སཏི པཐཝིཡཱདཱིནཾ པཊིལཱབྷོ ཧོཏཱིཏི ཀམྨཾ ཏཾསཾཝཏྟནིཀཾ ནཱམ ཧོཏཱིཏི དསྶེཏི།
494. Paṭilābhavasenāti kamme sati pathaviyādīnaṃ paṭilābho hotīti kammaṃ taṃsaṃvattanikaṃ nāma hotīti dasseti.
པཐཝཱིཀམྨཝིཔཱཀོཏིཀཐཱཝཎྞནཱ ནིཊྛིཏཱ།
Pathavīkammavipākotikathāvaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༦༩) ༧. པཐཝཱི ཀམྨཝིཔཱཀོཏིཀཐཱ • (69) 7. Pathavī kammavipākotikathā
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༧. པཐཝཱིཀམྨཝིཔཱཀོཏིཀཐཱཝཎྞནཱ • 7. Pathavīkammavipākotikathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༧. པཐཝཱིཀམྨཝིཔཱཀོཏིཀཐཱཝཎྞནཱ • 7. Pathavīkammavipākotikathāvaṇṇanā
