| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
10. பத²வீக²ணனஸிக்கா²பத³ங்
10. Pathavīkhaṇanasikkhāpadaṃ
86. த³ஸமே ப⁴க³வா த³ஸ்ஸேதீதி யோஜனா. எத்தா²தி பத²வியங். தத்தா²தி தேஸு பாஸாணாதீ³ஸு. முட்டி²ப்பமாணதோதி க²டகபமாணதோ. ஸாதி அத³ட்³ட⁴பத²வீ. ஹத்தி²குச்சி²யந்தி ஏவங்னாமகே டா²னே. ஏகபச்சி²பூரங் பத²விந்தி ஸம்ப³ந்தோ⁴. தேஸங்யேவாதி அப்பபங்ஸுஅப்பமத்திகாபதா³னங் ஏவ. ஹீதி ஸச்சங், யஸ்மா வா. ஏதந்தி யேபு⁴ய்யேனபாஸாணாதி³பஞ்சகங். தந்தி குஸீதங். ஆணாபெத்வாதி எத்த² ‘‘ஆண பேஸனே’’தி தா⁴துபாடே²ஸு வுத்தத்தா ஆணதா⁴துயேவ பேஸனஸங்கா²தங் ஹெத்வத்த²ங் வத³தி, ந ணாபேபச்சயோ, ஸோ பன தா⁴த்வத்தே²யேவ வத்ததி. ந ஹி தஸ்ஸ விஸுங் வுத்தோ அபி⁴தெ⁴ய்யோ அத்தி² தா⁴த்வத்த²தோ அஞ்ஞஸ்ஸ அபி⁴தெ⁴ய்யஸ்ஸாபா⁴வா. தாவாதி பட²மங் பாளிமுத்தகவினிச்ச²யஸ்ஸ, ததோ வா.
86. Dasame bhagavā dassetīti yojanā. Etthāti pathaviyaṃ. Tatthāti tesu pāsāṇādīsu. Muṭṭhippamāṇatoti khaṭakapamāṇato. Sāti adaḍḍhapathavī. Hatthikucchiyanti evaṃnāmake ṭhāne. Ekapacchipūraṃ pathavinti sambandho. Tesaṃyevāti appapaṃsuappamattikāpadānaṃ eva. Hīti saccaṃ, yasmā vā. Etanti yebhuyyenapāsāṇādipañcakaṃ. Tanti kusītaṃ. Āṇāpetvāti ettha ‘‘āṇa pesane’’ti dhātupāṭhesu vuttattā āṇadhātuyeva pesanasaṅkhātaṃ hetvatthaṃ vadati, na ṇāpepaccayo, so pana dhātvattheyeva vattati. Na hi tassa visuṃ vutto abhidheyyo atthi dhātvatthato aññassa abhidheyyassābhāvā. Tāvāti paṭhamaṃ pāḷimuttakavinicchayassa, tato vā.
பொக்க²ரங் பது³மங் நேதீதி பொக்க²ரணீ. ‘‘ஸோதெ⁴ந்தேஹீ’’தி பத³ங் ‘‘உஸ்ஸிஞ்சிதுங் அபனேது’’ந்தி பதே³ஸு பா⁴வகத்தா. யோதி ‘‘தனுகத்³த³மோ’’தி பதே³ன யோஜேதப்³போ³. யோ தனுகத்³த³மோதி ஹி அத்தோ². குடேஹீதி க⁴டேஹி. உஸ்ஸிஞ்சிதுந்தி உக்கி²பித்வா, உத்³த⁴ரித்வா வா ஸிஞ்சிதுங். தத்ராதி ஸுக்க²கத்³த³மே, ‘‘யோ’’தி பதே³ அவயவீஆதா⁴ரோ. யோதி ஸுக்க²கத்³த³மோ.
Pokkharaṃ padumaṃ netīti pokkharaṇī. ‘‘Sodhentehī’’ti padaṃ ‘‘ussiñcituṃ apanetu’’nti padesu bhāvakattā. Yoti ‘‘tanukaddamo’’ti padena yojetabbo. Yo tanukaddamoti hi attho. Kuṭehīti ghaṭehi. Ussiñcitunti ukkhipitvā, uddharitvā vā siñcituṃ. Tatrāti sukkhakaddame, ‘‘yo’’ti pade avayavīādhāro. Yoti sukkhakaddamo.
தடந்தி கூலங். உத³கஸாமந்தாதி உத³கஸ்ஸ ஸமீபே. ஓமகசதுமாஸந்தி சதுமாஸதோ ஊனகங். ஓவட்ட²ந்தி தே³வேன ஓவஸ்ஸிதங் ஹோதி ஸசேதி யோஜனா. பததீதி தடங் பததி. உத³கேயேவாதி பகதிஉத³கேயேவ. உத³கஸ்ஸாதி வஸ்ஸோத³கஸ்ஸ. தத்தா²தி பாஸாணபிட்டி²யங். பட²மமேவாதி ஸொண்டி³க²ணனதோ பட²மங் ஏவ. உத³கே பரியாதி³ண்ணேதி உத³கே ஸுக்கே². பச்சா²தி உத³கபூரதோ பச்சா². தத்தா²தி ஸொண்டி³யங். உத³கேயேவாதி மூலஉத³கேயேவ. உத³கந்தி ஆக³ந்துகஉத³கங். அல்லீயதீதி பிட்டி²பாஸாணே லக்³க³தி. தம்பீதி ஸுகு²மரஜம்பி. அகதபப்³பா⁴ரேதி வளஞ்ஜேன அகதே பப்³பா⁴ரே. உபசிகாஹி வமீயதி, க⁴ரகோ³ளிகாத³யோ வா ஸத்தே வமதீதி வம்மிகோ.
Taṭanti kūlaṃ. Udakasāmantāti udakassa samīpe. Omakacatumāsanti catumāsato ūnakaṃ. Ovaṭṭhanti devena ovassitaṃ hoti saceti yojanā. Patatīti taṭaṃ patati. Udakeyevāti pakatiudakeyeva. Udakassāti vassodakassa. Tatthāti pāsāṇapiṭṭhiyaṃ. Paṭhamamevāti soṇḍikhaṇanato paṭhamaṃ eva. Udake pariyādiṇṇeti udake sukkhe. Pacchāti udakapūrato pacchā. Tatthāti soṇḍiyaṃ. Udakeyevāti mūlaudakeyeva. Udakanti āgantukaudakaṃ. Allīyatīti piṭṭhipāsāṇe laggati. Tampīti sukhumarajampi. Akatapabbhāreti vaḷañjena akate pabbhāre. Upacikāhi vamīyati, gharagoḷikādayo vā satte vamatīti vammiko.
கா³வீனங் கு²ரோ கண்டகஸதி³ஸத்தா கோ³கண்டகோ நாம, தேன சி²ன்னோ கத்³த³மோ ‘‘கோ³கண்டகோ’’தி வுச்சதி. அச்ச²த³னங் வா வினட்ட²ச்ச²த³னங் வா புராணஸேனாஸனங் ஹோதீதி யோஜனா. ததோதி புராணஸேனாஸனதோ, க³ண்ஹிதுங் வட்டதீதி ஸம்ப³ந்தோ⁴. அவஸேஸந்தி வினட்ட²ச்ச²த³னதோ. அவஸேஸங் இட்ட²கங் க³ண்ஹாமி இதி ஸஞ்ஞாயாதி யோஜேதப்³போ³. தேனாதி இட்ட²காதி³னா. யா யாதி மத்திகா. அதிந்தாதி அனல்லா, அகிலின்னாதி அத்தோ².
Gāvīnaṃ khuro kaṇṭakasadisattā gokaṇṭako nāma, tena chinno kaddamo ‘‘gokaṇṭako’’ti vuccati. Acchadanaṃ vā vinaṭṭhacchadanaṃ vā purāṇasenāsanaṃ hotīti yojanā. Tatoti purāṇasenāsanato, gaṇhituṃ vaṭṭatīti sambandho. Avasesanti vinaṭṭhacchadanato. Avasesaṃ iṭṭhakaṃ gaṇhāmi iti saññāyāti yojetabbo. Tenāti iṭṭhakādinā. Yā yāti mattikā. Atintāti anallā, akilinnāti attho.
தஸ்மிந்தி மத்திகாபுஞ்ஜே. ஸப்³போ³தி ஸகலோ மத்திகாபுஞ்ஜோ. அஸ்ஸாதி மத்திகாபுஞ்ஜஸ்ஸ. ‘‘கப்பியகாரகேஹீ’’தி பத³ங் ‘‘அபனாமெத்வா’’தி பதே³ காரிதகம்மங். கஸ்மா வட்டதீதி ஆஹ ‘‘உத³கேனா’’திஆதி³. ஹீதி ஸச்சங், யஸ்மா வா.
Tasminti mattikāpuñje. Sabboti sakalo mattikāpuñjo. Assāti mattikāpuñjassa. ‘‘Kappiyakārakehī’’ti padaṃ ‘‘apanāmetvā’’ti pade kāritakammaṃ. Kasmā vaṭṭatīti āha ‘‘udakenā’’tiādi. Hīti saccaṃ, yasmā vā.
தத்தா²தி மத்திகாபாகாரே. அஞ்ஞம்பீதி மண்ட³பத²ம்ப⁴தோ அஞ்ஞம்பி. தேன அபதே³ஸேனாதி தேன பாஸாணாதி³பவட்டனலேஸேன.
Tatthāti mattikāpākāre. Aññampīti maṇḍapathambhato aññampi. Tena apadesenāti tena pāsāṇādipavaṭṭanalesena.
பஸ்ஸாவதா⁴ராயாதி முத்தஸோதாய. கத்தரயட்டி²யாதி கத்தரத³ண்டே³ன. எத்த² ஹி கத்தரயதி அங்க³பச்சங்கா³னங் ஸிதி²லபா⁴வேன ஸிதி²லோ ஹுத்வா ப⁴வதீதி கத்வா கத்தரோ வுச்சதி ஜிண்ணமனுஸ்ஸோ, தேன ஏகந்ததோ க³ஹேதப்³ப³த்தா கத்தரேன க³ஹிதா யட்டி², கத்தரஸ்ஸ யட்டீ²தி வா கத்வா கத்தரயட்டி² வுச்சதி கத்தரத³ண்டோ³. த³ந்தஜபட²மக்க²ரேன ஸஜ்ஜா²யிதப்³போ³. வீரியஸம்பக்³க³ஹணத்த²ந்தி வீரியஸ்ஸ ஸுட்டு² பக்³க³ண்ஹனத்த²ங், வீரியஸ்ஸ உக்கி²பனத்த²ந்தி அத்தோ². கேசி பி⁴க்கூ²தி யோஜனா.
Passāvadhārāyāti muttasotāya. Kattarayaṭṭhiyāti kattaradaṇḍena. Ettha hi kattarayati aṅgapaccaṅgānaṃ sithilabhāvena sithilo hutvā bhavatīti katvā kattaro vuccati jiṇṇamanusso, tena ekantato gahetabbattā kattarena gahitā yaṭṭhi, kattarassa yaṭṭhīti vā katvā kattarayaṭṭhi vuccati kattaradaṇḍo. Dantajapaṭhamakkharena sajjhāyitabbo. Vīriyasampaggahaṇatthanti vīriyassa suṭṭhu paggaṇhanatthaṃ, vīriyassa ukkhipanatthanti attho. Keci bhikkhūti yojanā.
87. தத்ராபீதி இட்ட²ககபாலாதீ³ஸுபி. ஹீதி ஸச்சங். தேஸங் அனுபாதா³னத்தாதி தேஸங் இட்ட²காதீ³னங் அக்³கி³ஸ்ஸ அனிந்த⁴னத்தா. ஹீதி ஸச்சங், யஸ்மாவா. தானீதி இட்ட²காதீ³னி. அவிஸயத்தாதி ஆபத்தியா அனோகாஸத்தா. திணுக்கந்தி திணமயங் உக்கங். தத்தே²வாதி மஹாபச்சரியங் ஏவ. அரீயதி அக்³கி³னிப்பா²த³னத்த²ங் க⁴ங்ஸீயதி எத்தா²தி அரணீ, ஹெட்டா² நிமந்த²னீயதா³ரு. ஸஹ த⁴னுனா ஏதி பவத்ததீதி ஸஹிதோ, உபரி நிமந்த²னதா³ரு. அரணீ ச ஸஹிதோ ச அரணீஸஹிதோ, தேன அக்³கி³ங் நிப்³ப³த்தெத்வாதி யோஜனா. யதா² கரியமானே ந ட³ய்ஹதி, ததா² கரோஹீதி ஸம்ப³ந்தோ⁴.
87.Tatrāpīti iṭṭhakakapālādīsupi. Hīti saccaṃ. Tesaṃ anupādānattāti tesaṃ iṭṭhakādīnaṃ aggissa anindhanattā. Hīti saccaṃ, yasmāvā. Tānīti iṭṭhakādīni. Avisayattāti āpattiyā anokāsattā. Tiṇukkanti tiṇamayaṃ ukkaṃ. Tatthevāti mahāpaccariyaṃ eva. Arīyati agginipphādanatthaṃ ghaṃsīyati etthāti araṇī, heṭṭhā nimanthanīyadāru. Saha dhanunā eti pavattatīti sahito, upari nimanthanadāru. Araṇī ca sahito ca araṇīsahito, tena aggiṃ nibbattetvāti yojanā. Yathā kariyamāne na ḍayhati, tathā karohīti sambandho.
88. ஆவாடங் ஜானாதி ஆவாடங் காதுங், க²ணிதுங் வா ஜானாஹீதி அத்தோ². ‘‘ஏவங் மஹாமத்திகங் ஜான, து²ஸமத்திகங் ஜானா’’தி எத்தா²பி யதா²லாப⁴ங் ஸம்பதா³னவாசகபத³ங் அஜ்ஜா²ஹரித்வா யோஜனா காதப்³பா³. ஸாதி பத²வீ. தேனாதி பவட்டனாதி³னாதி. த³ஸமங்.
88.Āvāṭaṃjānāti āvāṭaṃ kātuṃ, khaṇituṃ vā jānāhīti attho. ‘‘Evaṃ mahāmattikaṃ jāna, thusamattikaṃ jānā’’ti etthāpi yathālābhaṃ sampadānavācakapadaṃ ajjhāharitvā yojanā kātabbā. Sāti pathavī. Tenāti pavaṭṭanādināti. Dasamaṃ.
முஸாவாத³வக்³கோ³ பட²மோ.
Musāvādavaggo paṭhamo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. பத²வீக²ணனஸிக்கா²பத³வண்ணனா • 10. Pathavīkhaṇanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 10. பத²வீக²ணனஸிக்கா²பத³வண்ணனா • 10. Pathavīkhaṇanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. பத²வீக²ணனஸிக்கா²பத³வண்ணனா • 10. Pathavīkhaṇanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. பத²வீக²ணனஸிக்கா²பத³வண்ணனா • 10. Pathavīkhaṇanasikkhāpadavaṇṇanā
