| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
10. பத²வீக²ணனஸிக்கா²பத³வண்ணனா
10. Pathavīkhaṇanasikkhāpadavaṇṇanā
84-86. த³ஸமே ஏகிந்த்³ரியந்தி ‘‘காயிந்த்³ரியங் அத்தீ²’’தி மஞ்ஞமானா வத³ந்தி. முட்டி²ப்பமாணாதி முட்டி²னா ஸங்க³ஹேதப்³ப³ப்பமாணா. எத்த² கிஞ்சாபி யேபு⁴ய்யபங்ஸுங் அப்பபங்ஸுஞ்ச பத²விங் வத்வா உபட்³ட⁴பங்ஸுகா பத²வீ ந வுத்தா, ததா²பி பண்ணத்திவஜ்ஜஸிக்கா²பதே³ஸு ஸாவஸேஸபஞ்ஞத்தியாபி ஸம்ப⁴வதோ உபட்³ட⁴பங்ஸுகாயபி பத²வியா பாசித்தியமேவாதி க³ஹேதப்³ப³ங். கேசி பன ‘‘ஸப்³ப³ச்ச²ன்னாதீ³ஸு உபட்³டே⁴ து³க்கடஸ்ஸ வுத்தத்தா இதா⁴பி து³க்கடங் யுத்த’’ந்தி வத³ந்தி, தங் ந யுத்தங் பாசித்தியவத்து²கஞ்ச அனாபத்திவத்து²கஞ்ச து³வித⁴ங் பத²விங் ட²பெத்வா அஞ்ஞிஸ்ஸா து³க்கடவத்து²காய ததியாய பத²வியா அபா⁴வதோ. த்³வேயேவ ஹி பத²வியோ வுத்தா ‘‘ஜாதா ச பத²வீ அஜாதா ச பத²வீ’’தி. தஸ்மா த்³வீஸு அஞ்ஞதராய பத²வியா ப⁴விதப்³ப³ங், வினயவினிச்ச²யே ச ஸம்பத்தே க³ருகேயேவ டா²தப்³ப³த்தா ந ஸக்கா எத்த² அனாபத்தியா ப⁴விதுங். ஸப்³ப³ச்ச²ன்னாதீ³ஸு பன உபட்³டே⁴ து³க்கடங் யுத்தங் தத்த² தாதி³ஸஸ்ஸ து³க்கடவத்து²னோ ஸப்³பா⁴வா.
84-86. Dasame ekindriyanti ‘‘kāyindriyaṃ atthī’’ti maññamānā vadanti. Muṭṭhippamāṇāti muṭṭhinā saṅgahetabbappamāṇā. Ettha kiñcāpi yebhuyyapaṃsuṃ appapaṃsuñca pathaviṃ vatvā upaḍḍhapaṃsukā pathavī na vuttā, tathāpi paṇṇattivajjasikkhāpadesu sāvasesapaññattiyāpi sambhavato upaḍḍhapaṃsukāyapi pathaviyā pācittiyamevāti gahetabbaṃ. Keci pana ‘‘sabbacchannādīsu upaḍḍhe dukkaṭassa vuttattā idhāpi dukkaṭaṃ yutta’’nti vadanti, taṃ na yuttaṃ pācittiyavatthukañca anāpattivatthukañca duvidhaṃ pathaviṃ ṭhapetvā aññissā dukkaṭavatthukāya tatiyāya pathaviyā abhāvato. Dveyeva hi pathaviyo vuttā ‘‘jātā ca pathavī ajātā ca pathavī’’ti. Tasmā dvīsu aññatarāya pathaviyā bhavitabbaṃ, vinayavinicchaye ca sampatte garukeyeva ṭhātabbattā na sakkā ettha anāpattiyā bhavituṃ. Sabbacchannādīsu pana upaḍḍhe dukkaṭaṃ yuttaṃ tattha tādisassa dukkaṭavatthuno sabbhāvā.
‘‘பொக்க²ரணிங் க²ணா’’தி வத³தி, வட்டதீதி ‘‘இமஸ்மிங் ஓகாஸே’’தி அனியமெத்வா வுத்தத்தா வட்டதி. ‘‘இமங் வல்லிங் க²ணா’’தி வுத்தேபி பத²வீக²ணனங் ஸந்தா⁴ய பவத்தவோஹாரத்தா இமினாவ ஸிக்கா²பதே³ன ஆபத்தி, ந பூ⁴தகா³மபாதப்³யதாய. குடேஹீதி க⁴டேஹி. தனுககத்³த³மோதி உத³கமிஸ்ஸககத்³த³மோ. ஸோ ச உத³கக³திகத்தா வட்டதி. ஓமகசாதுமாஸந்தி ஊனசாதுமாஸங். ஓவட்ட²ந்தி தே³வேன ஓவட்ட²ங். அகதபப்³பா⁴ரேதி அவளஞ்ஜனட்டா²னத³ஸ்ஸனத்த²ங் வுத்தங். தாதி³ஸே ஹி வம்மிகஸ்ஸ ஸப்³பா⁴வோதி. மூஸிகுக்குரங் நாம மூஸிகாஹி க²ணித்வா ப³ஹி கதபங்ஸுராஸி. ஏஸேவ நயோதி ஓமகசாதுமாஸஓவட்டோ²யேவ வட்டதீதி அத்தோ².
‘‘Pokkharaṇiṃ khaṇā’’ti vadati, vaṭṭatīti ‘‘imasmiṃ okāse’’ti aniyametvā vuttattā vaṭṭati. ‘‘Imaṃ valliṃ khaṇā’’ti vuttepi pathavīkhaṇanaṃ sandhāya pavattavohārattā imināva sikkhāpadena āpatti, na bhūtagāmapātabyatāya. Kuṭehīti ghaṭehi. Tanukakaddamoti udakamissakakaddamo. So ca udakagatikattā vaṭṭati. Omakacātumāsanti ūnacātumāsaṃ. Ovaṭṭhanti devena ovaṭṭhaṃ. Akatapabbhāreti avaḷañjanaṭṭhānadassanatthaṃ vuttaṃ. Tādise hi vammikassa sabbhāvoti. Mūsikukkuraṃ nāma mūsikāhi khaṇitvā bahi katapaṃsurāsi. Eseva nayoti omakacātumāsaovaṭṭhoyeva vaṭṭatīti attho.
ஏகதி³வஸம்பி ந வட்டதீதி ஓவட்ட²ஏகதி³வஸாதிக்கந்தோபி விகோபேதுங் ந வட்டதி. ‘‘ஹெட்டா²பூ⁴மிஸம்ப³ந்தே⁴பி ச கோ³கண்டகே பூ⁴மிதோ சி²ந்தி³த்வா உத்³த⁴ங் டி²தத்தா அச்சுக்³க³தமத்த²கதோ சி²ந்தி³த்வா க³ஹேதுங் வட்டதீ’’தி வத³ந்தி. ஸகட்டா²னே அதிட்ட²மானங் கத்வா பாதே³ஹி மத்³தி³த்வா சி²ந்தி³த்வா ஆலோளிதகத்³த³மம்பி க³ஹேதுங் வட்டதி. ததோதி ததோ புராணஸேனாஸனதோ. இட்ட²கங் க³ண்ஹாமீதிஆதி³ ஸுத்³த⁴சித்தங் ஸந்தா⁴ய வுத்தங். உத³கேனாதி உஜுகங் ஆகாஸதோயேவ பதனகஉத³கேன. ‘‘ஸசே பன அஞ்ஞத்த² பஹரித்வா பதிதேன உத³கேன தேமிதங் ஹோதி, வட்டதீ’’தி வத³ந்தி. உச்சாலெத்வாதி உக்கி²பித்வா. தேன அபதே³ஸேனாதி தேன லேஸேன.
Ekadivasampi na vaṭṭatīti ovaṭṭhaekadivasātikkantopi vikopetuṃ na vaṭṭati. ‘‘Heṭṭhābhūmisambandhepi ca gokaṇṭake bhūmito chinditvā uddhaṃ ṭhitattā accuggatamatthakato chinditvā gahetuṃ vaṭṭatī’’ti vadanti. Sakaṭṭhāne atiṭṭhamānaṃ katvā pādehi madditvā chinditvā āloḷitakaddamampi gahetuṃ vaṭṭati. Tatoti tato purāṇasenāsanato. Iṭṭhakaṃ gaṇhāmītiādi suddhacittaṃ sandhāya vuttaṃ. Udakenāti ujukaṃ ākāsatoyeva patanakaudakena. ‘‘Sace pana aññattha paharitvā patitena udakena temitaṃ hoti, vaṭṭatī’’ti vadanti. Uccāletvāti ukkhipitvā. Tena apadesenāti tena lesena.
87-88. அவிஸயத்தா அனாபத்தீதி எத்த² ஸசேபி நிப்³பா³பேதுங் ஸக்கா ஹோதி, பட²மங் ஸுத்³த⁴சித்தேன தி³ன்னத்தா ‘‘த³ஹதூ’’தி ஸல்லக்கெ²த்வாபி திட்ட²தி, அனாபத்தி. ஓவட்ட²ங் ச²ன்னந்தி பட²மங் ஓவட்ட²ங் பச்சா² ச²ன்னங். ஸேஸங் உத்தானமேவ. ஜாதபத²வீ, பத²வீஸஞ்ஞிதா, க²ணனக²ணாபனானங் அஞ்ஞதரந்தி இமானி பனெத்த² தீணி அங்கா³னி.
87-88.Avisayattāanāpattīti ettha sacepi nibbāpetuṃ sakkā hoti, paṭhamaṃ suddhacittena dinnattā ‘‘dahatū’’ti sallakkhetvāpi tiṭṭhati, anāpatti. Ovaṭṭhaṃ channanti paṭhamaṃ ovaṭṭhaṃ pacchā channaṃ. Sesaṃ uttānameva. Jātapathavī, pathavīsaññitā, khaṇanakhaṇāpanānaṃ aññataranti imāni panettha tīṇi aṅgāni.
பத²வீக²ணனஸிக்கா²பத³வண்ணனா நிட்டி²தா.
Pathavīkhaṇanasikkhāpadavaṇṇanā niṭṭhitā.
நிட்டி²தோ முஸாவாத³வக்³கோ³ பட²மோ.
Niṭṭhito musāvādavaggo paṭhamo.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 10. பத²வீக²ணனஸிக்கா²பத³வண்ணனா • 10. Pathavīkhaṇanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 10. பத²வீக²ணனஸிக்கா²பத³வண்ணனா • 10. Pathavīkhaṇanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 10. பத²வீக²ணனஸிக்கா²பத³வண்ணனா • 10. Pathavīkhaṇanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 10. பத²வீக²ணனஸிக்கா²பத³ங் • 10. Pathavīkhaṇanasikkhāpadaṃ
