| Library / Tipiṭaka / তিপিটক • Tipiṭaka / সারত্থদীপনী-টীকা • Sāratthadīpanī-ṭīkā |
১০. পথৰীখণনসিক্খাপদৰণ্ণনা
10. Pathavīkhaṇanasikkhāpadavaṇṇanā
৮৪-৮৬. দসমে একিন্দ্রিযন্তি ‘‘কাযিন্দ্রিযং অত্থী’’তি মঞ্ঞমানা ৰদন্তি। মুট্ঠিপ্পমাণাতি মুট্ঠিনা সঙ্গহেতব্বপ্পমাণা। এত্থ কিঞ্চাপি যেভুয্যপংসুং অপ্পপংসুঞ্চ পথৰিং ৰত্ৰা উপড্ঢপংসুকা পথৰী ন ৰুত্তা, তথাপি পণ্ণত্তিৰজ্জসিক্খাপদেসু সাৰসেসপঞ্ঞত্তিযাপি সম্ভৰতো উপড্ঢপংসুকাযপি পথৰিযা পাচিত্তিযমেৰাতি গহেতব্বং। কেচি পন ‘‘সব্বচ্ছন্নাদীসু উপড্ঢে দুক্কটস্স ৰুত্তত্তা ইধাপি দুক্কটং যুত্ত’’ন্তি ৰদন্তি, তং ন যুত্তং পাচিত্তিযৰত্থুকঞ্চ অনাপত্তিৰত্থুকঞ্চ দুৰিধং পথৰিং ঠপেত্ৰা অঞ্ঞিস্সা দুক্কটৰত্থুকায ততিযায পথৰিযা অভাৰতো। দ্ৰেযেৰ হি পথৰিযো ৰুত্তা ‘‘জাতা চ পথৰী অজাতা চ পথৰী’’তি। তস্মা দ্ৰীসু অঞ্ঞতরায পথৰিযা ভৰিতব্বং, ৰিনযৰিনিচ্ছযে চ সম্পত্তে গরুকেযেৰ ঠাতব্বত্তা ন সক্কা এত্থ অনাপত্তিযা ভৰিতুং। সব্বচ্ছন্নাদীসু পন উপড্ঢে দুক্কটং যুত্তং তত্থ তাদিসস্স দুক্কটৰত্থুনো সব্ভাৰা।
84-86. Dasame ekindriyanti ‘‘kāyindriyaṃ atthī’’ti maññamānā vadanti. Muṭṭhippamāṇāti muṭṭhinā saṅgahetabbappamāṇā. Ettha kiñcāpi yebhuyyapaṃsuṃ appapaṃsuñca pathaviṃ vatvā upaḍḍhapaṃsukā pathavī na vuttā, tathāpi paṇṇattivajjasikkhāpadesu sāvasesapaññattiyāpi sambhavato upaḍḍhapaṃsukāyapi pathaviyā pācittiyamevāti gahetabbaṃ. Keci pana ‘‘sabbacchannādīsu upaḍḍhe dukkaṭassa vuttattā idhāpi dukkaṭaṃ yutta’’nti vadanti, taṃ na yuttaṃ pācittiyavatthukañca anāpattivatthukañca duvidhaṃ pathaviṃ ṭhapetvā aññissā dukkaṭavatthukāya tatiyāya pathaviyā abhāvato. Dveyeva hi pathaviyo vuttā ‘‘jātā ca pathavī ajātā ca pathavī’’ti. Tasmā dvīsu aññatarāya pathaviyā bhavitabbaṃ, vinayavinicchaye ca sampatte garukeyeva ṭhātabbattā na sakkā ettha anāpattiyā bhavituṃ. Sabbacchannādīsu pana upaḍḍhe dukkaṭaṃ yuttaṃ tattha tādisassa dukkaṭavatthuno sabbhāvā.
‘‘পোক্খরণিং খণা’’তি ৰদতি, ৰট্টতীতি ‘‘ইমস্মিং ওকাসে’’তি অনিযমেত্ৰা ৰুত্তত্তা ৰট্টতি। ‘‘ইমং ৰল্লিং খণা’’তি ৰুত্তেপি পথৰীখণনং সন্ধায পৰত্তৰোহারত্তা ইমিনাৰ সিক্খাপদেন আপত্তি, ন ভূতগামপাতব্যতায। কুটেহীতি ঘটেহি। তনুককদ্দমোতি উদকমিস্সককদ্দমো। সো চ উদকগতিকত্তা ৰট্টতি। ওমকচাতুমাসন্তি ঊনচাতুমাসং। ওৰট্ঠন্তি দেৰেন ওৰট্ঠং। অকতপব্ভারেতি অৰল়ঞ্জনট্ঠানদস্সনত্থং ৰুত্তং। তাদিসে হি ৰম্মিকস্স সব্ভাৰোতি। মূসিকুক্কুরং নাম মূসিকাহি খণিত্ৰা বহি কতপংসুরাসি। এসেৰ নযোতি ওমকচাতুমাসওৰট্ঠোযেৰ ৰট্টতীতি অত্থো।
‘‘Pokkharaṇiṃ khaṇā’’ti vadati, vaṭṭatīti ‘‘imasmiṃ okāse’’ti aniyametvā vuttattā vaṭṭati. ‘‘Imaṃ valliṃ khaṇā’’ti vuttepi pathavīkhaṇanaṃ sandhāya pavattavohārattā imināva sikkhāpadena āpatti, na bhūtagāmapātabyatāya. Kuṭehīti ghaṭehi. Tanukakaddamoti udakamissakakaddamo. So ca udakagatikattā vaṭṭati. Omakacātumāsanti ūnacātumāsaṃ. Ovaṭṭhanti devena ovaṭṭhaṃ. Akatapabbhāreti avaḷañjanaṭṭhānadassanatthaṃ vuttaṃ. Tādise hi vammikassa sabbhāvoti. Mūsikukkuraṃ nāma mūsikāhi khaṇitvā bahi katapaṃsurāsi. Eseva nayoti omakacātumāsaovaṭṭhoyeva vaṭṭatīti attho.
একদিৰসম্পি ন ৰট্টতীতি ওৰট্ঠএকদিৰসাতিক্কন্তোপি ৰিকোপেতুং ন ৰট্টতি। ‘‘হেট্ঠাভূমিসম্বন্ধেপি চ গোকণ্টকে ভূমিতো ছিন্দিত্ৰা উদ্ধং ঠিতত্তা অচ্চুগ্গতমত্থকতো ছিন্দিত্ৰা গহেতুং ৰট্টতী’’তি ৰদন্তি। সকট্ঠানে অতিট্ঠমানং কত্ৰা পাদেহি মদ্দিত্ৰা ছিন্দিত্ৰা আলোল়িতকদ্দমম্পি গহেতুং ৰট্টতি। ততোতি ততো পুরাণসেনাসনতো। ইট্ঠকং গণ্হামীতিআদি সুদ্ধচিত্তং সন্ধায ৰুত্তং। উদকেনাতি উজুকং আকাসতোযেৰ পতনকউদকেন। ‘‘সচে পন অঞ্ঞত্থ পহরিত্ৰা পতিতেন উদকেন তেমিতং হোতি, ৰট্টতী’’তি ৰদন্তি। উচ্চালেত্ৰাতি উক্খিপিত্ৰা। তেন অপদেসেনাতি তেন লেসেন।
Ekadivasampi na vaṭṭatīti ovaṭṭhaekadivasātikkantopi vikopetuṃ na vaṭṭati. ‘‘Heṭṭhābhūmisambandhepi ca gokaṇṭake bhūmito chinditvā uddhaṃ ṭhitattā accuggatamatthakato chinditvā gahetuṃ vaṭṭatī’’ti vadanti. Sakaṭṭhāne atiṭṭhamānaṃ katvā pādehi madditvā chinditvā āloḷitakaddamampi gahetuṃ vaṭṭati. Tatoti tato purāṇasenāsanato. Iṭṭhakaṃ gaṇhāmītiādi suddhacittaṃ sandhāya vuttaṃ. Udakenāti ujukaṃ ākāsatoyeva patanakaudakena. ‘‘Sace pana aññattha paharitvā patitena udakena temitaṃ hoti, vaṭṭatī’’ti vadanti. Uccāletvāti ukkhipitvā. Tena apadesenāti tena lesena.
৮৭-৮৮. অৰিসযত্তা অনাপত্তীতি এত্থ সচেপি নিব্বাপেতুং সক্কা হোতি, পঠমং সুদ্ধচিত্তেন দিন্নত্তা ‘‘দহতূ’’তি সল্লক্খেত্ৰাপি তিট্ঠতি, অনাপত্তি। ওৰট্ঠং ছন্নন্তি পঠমং ওৰট্ঠং পচ্ছা ছন্নং। সেসং উত্তানমেৰ। জাতপথৰী, পথৰীসঞ্ঞিতা, খণনখণাপনানং অঞ্ঞতরন্তি ইমানি পনেত্থ তীণি অঙ্গানি।
87-88.Avisayattāanāpattīti ettha sacepi nibbāpetuṃ sakkā hoti, paṭhamaṃ suddhacittena dinnattā ‘‘dahatū’’ti sallakkhetvāpi tiṭṭhati, anāpatti. Ovaṭṭhaṃ channanti paṭhamaṃ ovaṭṭhaṃ pacchā channaṃ. Sesaṃ uttānameva. Jātapathavī, pathavīsaññitā, khaṇanakhaṇāpanānaṃ aññataranti imāni panettha tīṇi aṅgāni.
পথৰীখণনসিক্খাপদৰণ্ণনা নিট্ঠিতা।
Pathavīkhaṇanasikkhāpadavaṇṇanā niṭṭhitā.
নিট্ঠিতো মুসাৰাদৰগ্গো পঠমো।
Niṭṭhito musāvādavaggo paṭhamo.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰিভঙ্গ • Mahāvibhaṅga / ১. মুসাৰাদৰগ্গো • 1. Musāvādavaggo
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā / ১০. পথৰীখণনসিক্খাপদৰণ্ণনা • 10. Pathavīkhaṇanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā / ১০. পথৰীখণনসিক্খাপদৰণ্ণনা • 10. Pathavīkhaṇanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / ১০. পথৰীখণনসিক্খাপদৰণ্ণনা • 10. Pathavīkhaṇanasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi / ১০. পথৰীখণনসিক্খাপদং • 10. Pathavīkhaṇanasikkhāpadaṃ
