| Library / Tipiṭaka / තිපිටක • Tipiṭaka / විමතිවිනොදනී-ටීකා • Vimativinodanī-ṭīkā |
10. පථවීඛණනසික්‌ඛාපදවණ්‌ණනා
10. Pathavīkhaṇanasikkhāpadavaṇṇanā
86. දසමෙ අප්‌පපංසුමත්‌තිකාය පථවියා අනාපත්‌තිවත්‌ථුභාවෙන වුත්‌තත්‌තා උපඩ්‌ඪපංසුමත්‌තිකායපි පාචිත්‌තියමෙවාති ගහෙතබ්‌බං. න හෙතං දුක්‌කටවත්‌ථූති සක්‌කා වත්‌තුං ජාතාජාතවිනිමුත්‌තාය තතියපථවියා අභාවතො.
86. Dasame appapaṃsumattikāya pathaviyā anāpattivatthubhāvena vuttattā upaḍḍhapaṃsumattikāyapi pācittiyamevāti gahetabbaṃ. Na hetaṃ dukkaṭavatthūti sakkā vattuṃ jātājātavinimuttāya tatiyapathaviyā abhāvato.
වට්‌ටතීති ඉමස්‌මිං ඨානෙ පොක්‌ඛරණිං ඛණාති ඔකාසස්‌ස අනියමිතත්‌තා වට්‌ටති. ඉමං වල්‌ලිං ඛණාති පථවීඛණනං සන්‌ධාය වුත්‌තත්‌තා ඉමිනාව සික්‌ඛාපදෙන ආපත්‌ති, න භූතගාමසික්‌ඛාපදෙන. උභයම්‌පි සන්‌ධාය වුත්‌තෙ පන ද්‌වෙපි පාචිත්‌තියා හොන්‌ති. උදකපප්‌පටකොති උදකෙ අන්‌තොභූමියං පවිට්‌ඨෙ තස්‌ස උපරිභාගං ඡාදෙත්‌වා තනුකපංසු වා මත්‌තිකා වා පටලං හුත්‌වා පතමානා තිට්‌ඨති, තස්‌මිං උදකෙ සුක්‌ඛෙපි තං පටලං වාතෙන චලමානා තිට්‌ඨති, තං උදකපප්‌පටකො නාම.
Vaṭṭatīti imasmiṃ ṭhāne pokkharaṇiṃ khaṇāti okāsassa aniyamitattā vaṭṭati. Imaṃ valliṃ khaṇāti pathavīkhaṇanaṃ sandhāya vuttattā imināva sikkhāpadena āpatti, na bhūtagāmasikkhāpadena. Ubhayampi sandhāya vutte pana dvepi pācittiyā honti. Udakapappaṭakoti udake antobhūmiyaṃ paviṭṭhe tassa uparibhāgaṃ chādetvā tanukapaṃsu vā mattikā vā paṭalaṃ hutvā patamānā tiṭṭhati, tasmiṃ udake sukkhepi taṃ paṭalaṃ vātena calamānā tiṭṭhati, taṃ udakapappaṭako nāma.
අකතපබ්‌භාරෙති අවළඤ්‌ජනට්‌ඨානදස්‌සනත්‌ථං වුත්‌තං. තාදිසෙ එව හි වම්‌මිකස්‌ස සම්‌භවොති. මූසිකුක්‌කරං නාම මූසිකාහි ඛනිත්‌වා බහි කතපංසුරාසි. අච්‌ඡදනන්‌තිආදිවුත්‌තත්‌තා උජුකං ආකාසතො පතිතවස්‌සොදකෙන ඔවට්‌ඨමෙව ජාතපථවී හොති, න ඡදනාදීසු පතිත්‌වා තතො පවත්‌තඋදකෙන තින්‌තන්‌ති වෙදිතබ්‌බං. මණ්‌ඩපත්‌ථම්‌භන්‌ති සාඛාමණ්‌ඩපත්‌ථම්‌භං. උච්‌චාලෙත්‌වාති උක්‌ඛිපිත්‌වා. තතොති පුරාණසෙනාසනතො.
Akatapabbhāreti avaḷañjanaṭṭhānadassanatthaṃ vuttaṃ. Tādise eva hi vammikassa sambhavoti. Mūsikukkaraṃ nāma mūsikāhi khanitvā bahi katapaṃsurāsi. Acchadanantiādivuttattā ujukaṃ ākāsato patitavassodakena ovaṭṭhameva jātapathavī hoti, na chadanādīsu patitvā tato pavattaudakena tintanti veditabbaṃ. Maṇḍapatthambhanti sākhāmaṇḍapatthambhaṃ. Uccāletvāti ukkhipitvā. Tatoti purāṇasenāsanato.
88. මහාමත්‌තිකන්‌ති භිත්‌තිලෙපනං. ජාතපථවිතා, තථාසඤ්‌ඤිතා, ඛණනඛණාපනානං අඤ්‌ඤතරන්‌ති ඉමානෙත්‌ථ තීණි අඞ්‌ගානි.
88.Mahāmattikanti bhittilepanaṃ. Jātapathavitā, tathāsaññitā, khaṇanakhaṇāpanānaṃ aññataranti imānettha tīṇi aṅgāni.
පථවීඛණනසික්‌ඛාපදවණ්‌ණනා නිට්‌ඨිතා.
Pathavīkhaṇanasikkhāpadavaṇṇanā niṭṭhitā.
නිට්‌ඨිතො මුසාවාදවග්‌ගො පඨමො.
Niṭṭhito musāvādavaggo paṭhamo.
Related texts:
තිපිටක (මූල) • Tipiṭaka (Mūla) / විනයපිටක • Vinayapiṭaka / මහාවිභඞ්‌ග • Mahāvibhaṅga / 1. මුසාවාදවග්‌ගො • 1. Musāvādavaggo
අට්‌ඨකථා • Aṭṭhakathā / විනයපිටක (අට්‌ඨකථා) • Vinayapiṭaka (aṭṭhakathā) / මහාවිභඞ්‌ග-අට්‌ඨකථා • Mahāvibhaṅga-aṭṭhakathā / 10. පථවීඛණනසික්‌ඛාපදවණ්‌ණනා • 10. Pathavīkhaṇanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / සාරත්‌ථදීපනී-ටීකා • Sāratthadīpanī-ṭīkā / 10. පථවීඛණනසික්‌ඛාපදවණ්‌ණනා • 10. Pathavīkhaṇanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / 10. පථවීඛණනසික්‌ඛාපදවණ්‌ණනා • 10. Pathavīkhaṇanasikkhāpadavaṇṇanā
ටීකා • Tīkā / විනයපිටක (ටීකා) • Vinayapiṭaka (ṭīkā) / පාචිත්‍යාදියොජනාපාළි • Pācityādiyojanāpāḷi / 10. පථවීඛණනසික්‌ඛාපදං • 10. Pathavīkhaṇanasikkhāpadaṃ
