| Library / Tipiṭaka / ཏིཔིཊཀ • Tipiṭaka / ཀངྑཱཝིཏརཎཱི-ཨབྷིནཝ-ཊཱིཀཱ • Kaṅkhāvitaraṇī-abhinava-ṭīkā |
༡༠. པཐཝཱིཁཎནསིཀྑཱཔདཝཎྞནཱ
10. Pathavīkhaṇanasikkhāpadavaṇṇanā
པཱསཱཎསཀྑརཀཐལམརུམྦཝཱལུཀཱདཱིསཱུཏི ཨེཏྠ མུཊྛིཔྤམཱཎཏོ ཨུཔརི པཱསཱཎཱཏི ཝེདིཏབྦཱ། མུཊྛིཔྤམཱཎཱ སཀྑརཱ། ཀཐལཱཏི ཀཔཱལཁཎྜཱནི། མརུམྦཱཏི ཀཊསཀྑརཱ། ཝཱལུཀཱ ཝཱལིཀཱཡེཝ། ཨཉྙཏརསྶ ཏཏིཡབྷཱགོ ཧོཏཱིཏི ཏཏིཡོ བྷཱགོ ཧོཏི། ཨིདཾ ཝུཏྟཾ ཧོཏི – ཡཏོ པཾསུཾ ཝཱ མཏྟིཀཾ ཝཱ ཨཱཧརཱཔེཏྭཱ ཝིསུཾ ཝིསུཾ ཀཏེ དྭེ ཀོཊྛཱསཱ པཾསུ ཝཱ མཏྟིཀཱ ཝཱ ཨེཀོ པཱསཱཎཱདཱིསུ ཨཉྙཏརོ ཧོཏི, ཨཡཾ མིསྶཀཔཐཝཱི ནཱམཱཏི། ཨོཝཊྛོ ནཱམ དེཝེན ཨོཝཊྛོ (པཱཙི॰ ༨༦)། ཝུཏྟནྟི པདབྷཱཛནིཡཾ, སཱིཧལ༹ཊྛཀཐཱཡམེཝ ཝཱ ཝུཏྟཾ ། ཨདྷིཀཏརཔཱསཱཎཱདིམིསྶཱཏི ཨདྷིཀཏརཔཱསཱཎཱདཱིཧི མིསྶཱ, ཨདཌྜྷཱཔི ཝུཏྟཔྤམཱཎཏོ ཨདྷིཀཏརཔཱསཱཎཱདིམིསྶཱཏི ཨདྷིཔྤཱཡོ། ཝཱ-སདྡོ ཨཝུཏྟཝིཀཔྤཏྠོ, ཏེན ཨཱུནཀཙཏུམཱསོཝཊྛཔཐཝིཾ སངྒཎྷཱཏི། སུདྡྷཔཱསཱཎཱདིབྷེདཱཡཱཏི སུདྡྷཱ པཱསཱཎཱ ཨེཏྠཱཏི སུདྡྷཔཱསཱཎཱ, སཱ ཨཱདི ཡསྶ བྷེདསྶ སོ སུདྡྷཔཱསཱཎཱདི། ཨཱདི-སདྡེན སུདྡྷསཀྑརཱདཱིནཾ གཧཎཾ། སུདྡྷཔཱསཱཎཱདིབྷེདོ ཡསྶཱ སཱ སུདྡྷཔཱསཱཎཱདིབྷེདཱ, ཏཱཡ སུདྡྷཔཱསཱཎཱདིབྷེདཱཡ, སུདྡྷཔཱསཱཎཱདིཔྤཀཱརཱཡཱཏི ཨཏྠོ།
Pāsāṇasakkharakathalamarumbavālukādīsūti ettha muṭṭhippamāṇato upari pāsāṇāti veditabbā. Muṭṭhippamāṇā sakkharā. Kathalāti kapālakhaṇḍāni. Marumbāti kaṭasakkharā. Vālukā vālikāyeva. Aññatarassa tatiyabhāgo hotīti tatiyo bhāgo hoti. Idaṃ vuttaṃ hoti – yato paṃsuṃ vā mattikaṃ vā āharāpetvā visuṃ visuṃ kate dve koṭṭhāsā paṃsu vā mattikā vā eko pāsāṇādīsu aññataro hoti, ayaṃ missakapathavī nāmāti. Ovaṭṭho nāma devena ovaṭṭho (pāci. 86). Vuttanti padabhājaniyaṃ, sīhaḷaṭṭhakathāyameva vā vuttaṃ . Adhikatarapāsāṇādimissāti adhikatarapāsāṇādīhi missā, adaḍḍhāpi vuttappamāṇato adhikatarapāsāṇādimissāti adhippāyo. Vā-saddo avuttavikappattho, tena ūnakacatumāsovaṭṭhapathaviṃ saṅgaṇhāti. Suddhapāsāṇādibhedāyāti suddhā pāsāṇā etthāti suddhapāsāṇā, sā ādi yassa bhedassa so suddhapāsāṇādi. Ādi-saddena suddhasakkharādīnaṃ gahaṇaṃ. Suddhapāsāṇādibhedo yassā sā suddhapāsāṇādibhedā, tāya suddhapāsāṇādibhedāya, suddhapāsāṇādippakārāyāti attho.
སཡཾ ཁཎཏཱིཏི ཨེཏྠ ཡོ ཨནྟམསོ པཱདངྒུཊྛཀེནཔི ཁཎཏི, ཨུདཀམྤི ཚཌྜེནྟོ བྷིནྡཏི, པཱདངྒུཊྛཀེནཔི ཝིལིཁཏི, པཏྟམྤི པཙནྟོ དཧཏི, སོ སབྦོ ཁཎཏིཡེཝཱཏི ཝེདིཏབྦོ། ཏེནཱཧ ‘‘ཁཎནབྷེདནཝིལེཁནཔཙནཱདཱིཧི ཝིཀོཔེཏཱིཏི། པཏྟཾ པཙནྟེན (པཱཙི॰ ཨཊྛ॰ ༨༧) ཧི པུབྦེ པཀྐཊྛཱནེཡེཝ པཙིཏབྦོ། ཨདཌྜྷཱཡ པཐཝིཡཱ ཨགྒིཾ ཋཔེཏུཾ ན ཝཊྚཏི། པཏྟཔཙནཀཔཱལསྶ པན ཨུཔརི ཨགྒིཾ ཋཔེཏུཾ ཝཊྚཏི། དཱརཱུནཾ ཨུཔརི ཋཔེཏི, སོ ཨགྒི ཏཱནི དཧནྟོ གནྟྭཱ པཐཝིཾ དཧཏི, ན ཝཊྚཏི། ཨིཊྛཀཔཱསཱཎཱདཱིསུཔི ཨེསེཝ ནཡོ། ཏཏྲཱཔི ཧི ཨིཊྛཀཱདཱིནཾཡེཝ ཨུཔརི ཋཔེཏུཾ ཝཊྚཏི། ཀསྨཱ? ཏེསཾ ཨནུཔཱདཱནཏྟཱ། ན ཧི ཏཱནི ཨགྒིསྶ ཨུཔཱདཱནསངྑཾ གཙྪནྟི། སུཀྑཁཱཎུརུཀྑཱདཱིསུཔི ཨགྒིཾ དཱཏུཾ ན ཝཊྚཏི། སཙེ པན ‘‘པཐཝིཾ ཨཔཏྟམེཝ ནིབྦཱཔེཏྭཱ གམིསྶཱམཱི’’ཏི དེཏི, ཝཊྚཏི། པཙྪཱ ནིབྦཱཔེཏུཾ ན སཀྐོཏི, ཨཝིསཡཏྟཱ ཨནཱཔཏྟི། ཝུཏྟནཡེནེཝཱཏི ‘‘ཁཎནབྷེདནཝིལིཁནཔཙནཱདཱིཧཱི’’ཏི ཝུཏྟེནེཝ ནཡེན། ནིཡམེཏྭཱཏི སནྣིཊྛཱནཾ ཀཏྭཱ། ཨིཏརོཏི ཨཱཎཱཔཀོ།
Sayaṃ khaṇatīti ettha yo antamaso pādaṅguṭṭhakenapi khaṇati, udakampi chaḍḍento bhindati, pādaṅguṭṭhakenapi vilikhati, pattampi pacanto dahati, so sabbo khaṇatiyevāti veditabbo. Tenāha ‘‘khaṇanabhedanavilekhanapacanādīhi vikopetīti. Pattaṃ pacantena (pāci. aṭṭha. 87) hi pubbe pakkaṭṭhāneyeva pacitabbo. Adaḍḍhāya pathaviyā aggiṃ ṭhapetuṃ na vaṭṭati. Pattapacanakapālassa pana upari aggiṃ ṭhapetuṃ vaṭṭati. Dārūnaṃ upari ṭhapeti, so aggi tāni dahanto gantvā pathaviṃ dahati, na vaṭṭati. Iṭṭhakapāsāṇādīsupi eseva nayo. Tatrāpi hi iṭṭhakādīnaṃyeva upari ṭhapetuṃ vaṭṭati. Kasmā? Tesaṃ anupādānattā. Na hi tāni aggissa upādānasaṅkhaṃ gacchanti. Sukkhakhāṇurukkhādīsupi aggiṃ dātuṃ na vaṭṭati. Sace pana ‘‘pathaviṃ apattameva nibbāpetvā gamissāmī’’ti deti, vaṭṭati. Pacchā nibbāpetuṃ na sakkoti, avisayattā anāpatti. Vuttanayenevāti ‘‘khaṇanabhedanavilikhanapacanādīhī’’ti vutteneva nayena. Niyametvāti sanniṭṭhānaṃ katvā. Itaroti āṇāpako.
‘‘པོཀྑརཎིཾ ཁཎཱ’’ཏི (པཱཙི॰ ཨཊྛ॰ ༨༦) ཝདཏི, ཝཊྚཏི། ཁཏཱཡེཝ པོཀྑརཎཱི ནཱམ ཧོཏི, ཏསྨཱ ཨཡཾ ཀཔྤིཡཝོཧཱརོ། ཨེས ནཡོ ‘‘ཝཱཔིཾ, ཏལཱ༹ཀཾ, ཨཱཝཱཊཾ ཁཎཱ’’ཏིཨཱདཱིསུཔི། ‘‘ཨིམཾ ཨོཀཱསཾ ཁཎ, ཨིམསྨིཾ ཨོཀཱསེ པོཀྑརཎིཾ ཁཎཱ’’ཏི པན ཝཏྟུཾ ན ཝཊྚཏི། ‘‘ཀནྡཾ ཁཎ མཱུལཾ ཁཎཱ’’ཏི ཨནིཡམེཏྭཱ ཝཏྟུཾ ཝཊྚཏི། ‘‘ཨིམཾ ཝལླིཾ ཁཎ, ཨིམསྨིཾ ཨོཀཱསེ ཀནྡཾ ཝཱ མཱུལཾ ཝཱ ཁཎཱ’’ཏི ཝཏྟུཾ ན ཝཊྚཏི། ཏེནཱཧ ‘‘ཨོཀཱསཾ ཨནིཡམེཏྭཱ…པེ॰… བྷཎནྟསྶཱ’’ཏི། ཨཱཏཔེན སུཀྑཀདྡམོ ཙ ཕལཏི, ཏཏྲ ཡོ ཧེཊྛཱ པཐཝིཡཱ ཨསམྦདྡྷོ, ཏམེཝ ཨཔནེཏུཾ ཝཊྚཏི། ཨེས ནཡོ གོཀཎྚཀེཔི ། ཏེནཱཧ ‘‘ཨཱཏཔེན…པེ॰… ཨསམྦདྡྷ’’ནྟི། ཏཏྠ གོཀཎྚཀོ (པཱཙི॰ ཨཊྛ॰ ༨༦) ནཱམ གཱཝཱིནཾ ཁུརཙྪིནྣཀདྡམོ ཝུཙྩཏི། སཙེ པན ཧེཊྛིམཏལེན བྷཱུམིསམྦནྡྷོ, ཝིཀོཔེཏུཾ ན ཝཊྚཏི། བྷིཛྫིཏྭཱ པཏིཏནདིཏཊནྟི བྷིཛྫིཏྭཱ ནདིསཱམནྟཱ པཏིཏཾ ཨོམཀཙཱཏུམཱསཾ ཨོཝཊྛཾ ནདིཏཊཾ། སཙེ པན བྷིཛྫིཏྭཱ ཨུདཀེཡེཝ པཀཏི, དེཝེ ཨཏིརེཀཙཱཏུམཱསཾ ཨོཝཊྛེཔི ཨུདཀེཡེཝ ཨུདཀསྶ པཏིཏཏྟཱ ཝཊྚཏི། མཧནྟམྤི ནངྒལཙྪིནྣམཏྟིཀཱཔིཎྜནྟི མཧནྟམྤི ཀསིཏཊྛཱནེ ཧེཊྛཱ པཐཝིཡཱ ཨསམྦདྡྷཾ ནངྒལཙྪིནྣམཏྟིཀཱཔིཎྜཾ། ཨེཝམཱདིསདྡེན ཀཱུཊཱསིཉྩནཡོགྒཏནུཀཀདྡམཱདཱིནཾ གཧཎཾ། ཨསཉྩིཙྩ རུཀྑཱདིཔཝཊྚནེན བྷིནྡནྟསྶཱཏི པཱསཱཎརུཀྑཱདཱིནི ཝཱ པཝཊྚེནྟསྶ, ཀཏྟརདཎྜེན ཝཱ ཨཱཧཙྩ ཨཱཧཙྩ གཙྪནྟསྶ པཐཝཱི བྷིཛྫཏི, སཱ ‘‘ཏེན བྷིནྡིསྶཱམཱི’’ཏི ཨེཝཾ སཉྩིཙྩ ཨབྷིནྣཏྟཱ ཨསཉྩིཙྩ བྷིནྣཱ ནཱམ ཧོཏི, ཨིཏི ཨསཉྩིཙྩ རུཀྑཱདིཔྤཝཊྚནེན བྷིནྡནྟསྶ ཨནཱཔཏྟི། ཨསཏིཡཱ པཱདངྒུཊྛཀཱདཱིཧི ཝིལིཁནྟསྶཱཏི ཡོ ཨཉྙཝིཧིཏོ ཀེནཙི སདྡྷིཾ ཀིཉྩི ཀཐེནྟོ པཱདངྒུཊྛཀེན ཝཱ ཀཏྟརཡཊྛིཡཱ ཝཱ པཐཝིཾ ཝིལིཁནྟོ ཏིཊྛཏི, ཏསྶ ཨེཝཾ ཨསཏིཡཱ པཱདངྒུཊྛཀཱདཱིཧི ཝིལིཁནྟསྶ ཨནཱཔཏྟི།
‘‘Pokkharaṇiṃ khaṇā’’ti (pāci. aṭṭha. 86) vadati, vaṭṭati. Khatāyeva pokkharaṇī nāma hoti, tasmā ayaṃ kappiyavohāro. Esa nayo ‘‘vāpiṃ, taḷākaṃ, āvāṭaṃ khaṇā’’tiādīsupi. ‘‘Imaṃ okāsaṃ khaṇa, imasmiṃ okāse pokkharaṇiṃ khaṇā’’ti pana vattuṃ na vaṭṭati. ‘‘Kandaṃ khaṇa mūlaṃ khaṇā’’ti aniyametvā vattuṃ vaṭṭati. ‘‘Imaṃ valliṃ khaṇa, imasmiṃ okāse kandaṃ vā mūlaṃ vā khaṇā’’ti vattuṃ na vaṭṭati. Tenāha ‘‘okāsaṃ aniyametvā…pe… bhaṇantassā’’ti. Ātapena sukkhakaddamo ca phalati, tatra yo heṭṭhā pathaviyā asambaddho, tameva apanetuṃ vaṭṭati. Esa nayo gokaṇṭakepi . Tenāha ‘‘ātapena…pe… asambaddha’’nti. Tattha gokaṇṭako (pāci. aṭṭha. 86) nāma gāvīnaṃ khuracchinnakaddamo vuccati. Sace pana heṭṭhimatalena bhūmisambandho, vikopetuṃ na vaṭṭati. Bhijjitvā patitanaditaṭanti bhijjitvā nadisāmantā patitaṃ omakacātumāsaṃ ovaṭṭhaṃ naditaṭaṃ. Sace pana bhijjitvā udakeyeva pakati, deve atirekacātumāsaṃ ovaṭṭhepi udakeyeva udakassa patitattā vaṭṭati. Mahantampi naṅgalacchinnamattikāpiṇḍanti mahantampi kasitaṭṭhāne heṭṭhā pathaviyā asambaddhaṃ naṅgalacchinnamattikāpiṇḍaṃ. Evamādisaddena kūṭāsiñcanayoggatanukakaddamādīnaṃ gahaṇaṃ. Asañcicca rukkhādipavaṭṭanena bhindantassāti pāsāṇarukkhādīni vā pavaṭṭentassa, kattaradaṇḍena vā āhacca āhacca gacchantassa pathavī bhijjati, sā ‘‘tena bhindissāmī’’ti evaṃ sañcicca abhinnattā asañcicca bhinnā nāma hoti, iti asañcicca rukkhādippavaṭṭanena bhindantassa anāpatti. Asatiyā pādaṅguṭṭhakādīhi vilikhantassāti yo aññavihito kenaci saddhiṃ kiñci kathento pādaṅguṭṭhakena vā kattarayaṭṭhiyā vā pathaviṃ vilikhanto tiṭṭhati, tassa evaṃ asatiyā pādaṅguṭṭhakādīhi vilikhantassa anāpatti.
པཐཝཱིཁཎནསིཀྑཱཔདཝཎྞནཱ ནིཊྛིཏཱ།
Pathavīkhaṇanasikkhāpadavaṇṇanā niṭṭhitā.
མུསཱཝཱདཝགྒོ པཋམོ།
Musāvādavaggo paṭhamo.
