| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
14. பத²வீக²ணனவினிச்ச²யகதா²
14. Pathavīkhaṇanavinicchayakathā
72. ஏவங் தா³னவிஸ்ஸாஸக்³கா³ஹலாப⁴பரிணாமனவினிச்ச²யங் கதெ²த்வா இதா³னி பத²வீவினிச்ச²யங் கதே²துங் ‘‘பத²வீ’’த்யாதி³மாஹ. தத்த² பத்த²ரதீதி பத²வீ, ப-புப்³ப³ த²ர ஸந்த²ரணேதி தா⁴து, ர-காரஸ்ஸ வ-காரோ, ஸஸம்பா⁴ரபத²வீ. தப்பபே⁴த³மாஹ ‘‘த்³வே பத²வீ, ஜாதா ச பத²வீ அஜாதா ச பத²வீ’’தி. தாஸங் விஸேஸங் த³ஸ்ஸேதுங் ‘‘தத்த² ஜாதா நாம பத²வீ’’த்யாதி³மாஹ. தத்த² ஸுத்³த⁴பங்ஸுகா…பே॰… யேபு⁴ய்யேனமத்திகாபத²வீ ஜாதா நாம பத²வீ ஹோதி. ந கேவலங் ஸாயேவ, அத³ட்³டா⁴ பத²வீபி ‘‘ஜாதா பத²வீ’’தி வுச்சதி. ந கேவலங் இமா த்³வேயேவ, யோபி பங்ஸுபுஞ்ஜோ வா…பே॰… சாதுமாஸங் ஓவட்டோ², ஸோபி ‘‘ஜாதா பத²வீ’’தி வுச்சதீதி யோஜனா. இதரத்ரபி ஏஸேவ நயோ.
72. Evaṃ dānavissāsaggāhalābhapariṇāmanavinicchayaṃ kathetvā idāni pathavīvinicchayaṃ kathetuṃ ‘‘pathavī’’tyādimāha. Tattha pattharatīti pathavī, pa-pubba thara santharaṇeti dhātu, ra-kārassa va-kāro, sasambhārapathavī. Tappabhedamāha ‘‘dve pathavī, jātā ca pathavī ajātā ca pathavī’’ti. Tāsaṃ visesaṃ dassetuṃ ‘‘tattha jātā nāma pathavī’’tyādimāha. Tattha suddhapaṃsukā…pe… yebhuyyenamattikāpathavī jātā nāma pathavī hoti. Na kevalaṃ sāyeva, adaḍḍhā pathavīpi ‘‘jātā pathavī’’ti vuccati. Na kevalaṃ imā dveyeva, yopi paṃsupuñjo vā…pe… cātumāsaṃ ovaṭṭho, sopi ‘‘jātā pathavī’’ti vuccatīti yojanā. Itaratrapi eseva nayo.
தத்த² ஸுத்³தா⁴ பங்ஸுகாயேவ எத்த² பத²வியா அத்தி², ந பாஸாணாத³யோதி ஸுத்³த⁴பங்ஸுகா. ததா² ஸுத்³த⁴மத்திகா. அப்பா பாஸாணா எத்தா²தி அப்பபாஸாணா. இதரேஸுபி ஏஸேவ நயோ. யேபு⁴ய்யேன பங்ஸுகா எத்தா²தி யேபு⁴ய்யேனபங்ஸுகா, அலுத்தஸமாஸோயங், ததா² யேபு⁴ய்யேனமத்திகா. தத்த² முட்டி²ப்பமாணதோ உபரி பாஸாணா. முட்டி²ப்பமாணா ஸக்க²ரா. கத²லாதி கபாலக²ண்டா³தி³. மரும்பாதி கடஸக்க²ரா. வாலுகா வாலுகாயேவ. யேபு⁴ய்யேனபங்ஸுகாதி எத்த² தீஸு கொட்டா²ஸேஸு த்³வே கொட்டா²ஸா பங்ஸு, ஏகோ பாஸாணாதீ³ஸு அஞ்ஞதரகொட்டா²ஸோ. அத³ட்³டா⁴பீதி உத்³த⁴னபத்தபசனகும்ப⁴காராதபாதி³வஸேன ததா² ததா² அத³ட்³டா⁴, ஸா பன விஸுங் நத்தி², ஸுத்³த⁴பங்ஸுஆதீ³ஸு அஞ்ஞதராவாதி வேதி³தப்³பா³. யேபு⁴ய்யேனஸக்க²ராதி ப³ஹுதரஸக்க²ரா. ஹத்தி²குச்சி²யங் கிர ஏகங் பச்சி²பூரங் ஆஹராபெத்வா தோ³ணியங் தோ⁴வித்வா பத²வியா யேபு⁴ய்யேனஸக்க²ரபா⁴வங் ஞத்வா ஸயங் பி⁴க்கூ² பொக்க²ரணிங் க²ணிங்ஸூதி. யானி பன மஜ்ஜே² ‘‘அப்பபங்ஸுஅப்பமத்திகா’’தி த்³வே பதா³னி, தானி யேபு⁴ய்யேனபாஸாணாதி³பஞ்சகமேவ பவிஸந்தி. தேஸஞ்ஞேவ ஹி த்³வின்னங் பபே⁴த³வசனமேதங், யதி³த³ங் ஸுத்³த⁴பாஸாணாதி³ஆதி³.
Tattha suddhā paṃsukāyeva ettha pathaviyā atthi, na pāsāṇādayoti suddhapaṃsukā. Tathā suddhamattikā. Appā pāsāṇā etthāti appapāsāṇā. Itaresupi eseva nayo. Yebhuyyena paṃsukā etthāti yebhuyyenapaṃsukā, aluttasamāsoyaṃ, tathā yebhuyyenamattikā. Tattha muṭṭhippamāṇato upari pāsāṇā. Muṭṭhippamāṇā sakkharā. Kathalāti kapālakhaṇḍādi. Marumpāti kaṭasakkharā. Vālukā vālukāyeva. Yebhuyyenapaṃsukāti ettha tīsu koṭṭhāsesu dve koṭṭhāsā paṃsu, eko pāsāṇādīsu aññatarakoṭṭhāso. Adaḍḍhāpīti uddhanapattapacanakumbhakārātapādivasena tathā tathā adaḍḍhā, sā pana visuṃ natthi, suddhapaṃsuādīsu aññatarāvāti veditabbā. Yebhuyyenasakkharāti bahutarasakkharā. Hatthikucchiyaṃ kira ekaṃ pacchipūraṃ āharāpetvā doṇiyaṃ dhovitvā pathaviyā yebhuyyenasakkharabhāvaṃ ñatvā sayaṃ bhikkhū pokkharaṇiṃ khaṇiṃsūti. Yāni pana majjhe ‘‘appapaṃsuappamattikā’’ti dve padāni, tāni yebhuyyenapāsāṇādipañcakameva pavisanti. Tesaññeva hi dvinnaṃ pabhedavacanametaṃ, yadidaṃ suddhapāsāṇādiādi.
எத்த² ச கிஞ்சாபி யேபு⁴ய்யேனபங்ஸுங் அப்பபங்ஸுஞ்ச பத²விங் வத்வா உபட்³ட⁴பங்ஸுகாபத²வீ ந வுத்தா, ததா²பி பண்ணத்திவஜ்ஜஸிக்கா²பதே³ஸு ஸாவஸேஸபஞ்ஞத்தியாபி ஸம்ப⁴வதோ உபட்³ட⁴பங்ஸுகாயபி பத²வியா பாசித்தியமேவாதி க³ஹேதப்³ப³ங். கேசி பன ‘‘ஸப்³ப³ச்ச²ன்னாதீ³ஸு உபட்³ட⁴ச்ச²ன்னே து³க்கடஸ்ஸ வுத்தத்தா இதா⁴பி து³க்கடங் யுஜ்ஜதீ’’தி வத³ந்தி, தங் ந யுத்தங் பாசித்தியவத்து²கஞ்ச அனாபத்திவத்து²கஞ்ச து³வித⁴ங் பத²விங் ட²பெத்வா அஞ்ஞிஸ்ஸா து³க்கடவத்து²காய ததியாய பத²வியா அபா⁴வதோ. த்³வேயேவ ஹி பத²வியோ வுத்தா ‘‘ஜாதா ச பத²வீ அஜாதா ச பத²வீ’’தி, தஸ்மா த்³வீஸு அஞ்ஞதராய பத²வியா ப⁴விதப்³ப³ங். வினயவினிச்ச²யே ச ஸம்பத்தே க³ருகலஹுகேஸு க³ருகேயேவ டா²தப்³ப³த்தா ந ஸக்கா எத்த² அனாபத்தியா ப⁴விதுங். ஸப்³ப³ச்ச²ன்னாதீ³ஸு பன உபட்³டே⁴ து³க்கடங் யுத்தங் தத்த² தாதி³ஸஸ்ஸ து³க்கடவத்து²னோ ஸம்ப⁴வதோ. விமதிவினோத³னியம்பி (வி॰ வி॰ டீ॰ பாசித்திய 2.86) ‘‘அப்பபங்ஸுமத்திகாய பத²வியா அனாபத்திவத்து²பா⁴வேன வுத்தத்தா உபட்³ட⁴பங்ஸுமத்திகாயபி பாசித்தியமேவாதி க³ஹேதப்³ப³ங். ந ஹேதங் து³க்கடவத்தூ²தி ஸக்கா வத்துங் ஜாதாஜாதவினிமுத்தாய ததியாய பத²வியா அபா⁴வதோ’’தி வுத்தங்.
Ettha ca kiñcāpi yebhuyyenapaṃsuṃ appapaṃsuñca pathaviṃ vatvā upaḍḍhapaṃsukāpathavī na vuttā, tathāpi paṇṇattivajjasikkhāpadesu sāvasesapaññattiyāpi sambhavato upaḍḍhapaṃsukāyapi pathaviyā pācittiyamevāti gahetabbaṃ. Keci pana ‘‘sabbacchannādīsu upaḍḍhacchanne dukkaṭassa vuttattā idhāpi dukkaṭaṃ yujjatī’’ti vadanti, taṃ na yuttaṃ pācittiyavatthukañca anāpattivatthukañca duvidhaṃ pathaviṃ ṭhapetvā aññissā dukkaṭavatthukāya tatiyāya pathaviyā abhāvato. Dveyeva hi pathaviyo vuttā ‘‘jātā ca pathavī ajātā ca pathavī’’ti, tasmā dvīsu aññatarāya pathaviyā bhavitabbaṃ. Vinayavinicchaye ca sampatte garukalahukesu garukeyeva ṭhātabbattā na sakkā ettha anāpattiyā bhavituṃ. Sabbacchannādīsu pana upaḍḍhe dukkaṭaṃ yuttaṃ tattha tādisassa dukkaṭavatthuno sambhavato. Vimativinodaniyampi (vi. vi. ṭī. pācittiya 2.86) ‘‘appapaṃsumattikāya pathaviyā anāpattivatthubhāvena vuttattā upaḍḍhapaṃsumattikāyapi pācittiyamevāti gahetabbaṃ. Na hetaṃ dukkaṭavatthūti sakkā vattuṃ jātājātavinimuttāya tatiyāya pathaviyā abhāvato’’ti vuttaṃ.
க²ணந்தஸ்ஸ க²ணாபெந்தஸ்ஸ வாதி அந்தமஸோ பாத³ங்கு³ட்ட²கேனபி ஸம்மஜ்ஜனிஸலாகாயபி ஸயங் வா க²ணந்தஸ்ஸ அஞ்ஞேன வா க²ணாபெந்தஸ்ஸ. ‘‘பொக்க²ரணிங் க²ணா’’தி வத³தி, வட்டதீதி ‘‘இமஸ்மிங் ஓகாஸே’’தி அனியமெத்வா வுத்தத்தா வட்டதி. ‘‘இமங் வல்லிங் க²ணா’’தி வுத்தேபி பத²விக²ணனங் ஸந்தா⁴ய பவத்தவோஹாரத்தா இமினாவ ஸிக்கா²பதே³ன பாசித்தியங், ந பூ⁴தகா³மஸிக்கா²பதே³ன, உப⁴யம்பி ஸந்தா⁴ய வுத்தே பன த்³வேபி பாசித்தியானி ஹொந்தி.
Khaṇantassa khaṇāpentassa vāti antamaso pādaṅguṭṭhakenapi sammajjanisalākāyapi sayaṃ vā khaṇantassa aññena vā khaṇāpentassa. ‘‘Pokkharaṇiṃ khaṇā’’ti vadati, vaṭṭatīti ‘‘imasmiṃ okāse’’ti aniyametvā vuttattā vaṭṭati. ‘‘Imaṃ valliṃ khaṇā’’ti vuttepi pathavikhaṇanaṃ sandhāya pavattavohārattā imināva sikkhāpadena pācittiyaṃ, na bhūtagāmasikkhāpadena, ubhayampi sandhāya vutte pana dvepi pācittiyāni honti.
73. குடேஹீதி க⁴டேஹி. தனுககத்³த³மோதி உத³கமிஸ்ஸககத்³த³மோ, ஸோ ச உத³கக³திகத்தா வட்டதி. உத³கபப்படகோதி உத³கே அந்தோபூ⁴மியங் பவிட்டே² தஸ்ஸ உபரிபா⁴க³ங் சா²தெ³த்வா தனுகபங்ஸு வா மத்திகா வா படலங் ஹுத்வா பலவமானா உட்டா²தி, தஸ்மிங் உத³கே ஸுக்கே²பி தங் படலங் வாதேன சலமானங் திட்ட²தி, தங் உத³கபப்படகோ நாம. ஓமகசாதுமாஸந்தி ஊனசாதுமாஸங். ஓவட்ட²ந்தி தே³வேன ஓவட்ட²ங். அகதபப்³பா⁴ரேதி அவலஞ்ஜனட்டா²னத³ஸ்ஸனத்த²ங் வுத்தங். தாதி³ஸே ஹி வம்மிகஸ்ஸ ஸப்³பா⁴வோதி. மூஸிகுக்குரங் நாம மூஸிகாஹி க²ணித்வா ப³ஹி கதபங்ஸுராஸி.
73.Kuṭehīti ghaṭehi. Tanukakaddamoti udakamissakakaddamo, so ca udakagatikattā vaṭṭati. Udakapappaṭakoti udake antobhūmiyaṃ paviṭṭhe tassa uparibhāgaṃ chādetvā tanukapaṃsu vā mattikā vā paṭalaṃ hutvā palavamānā uṭṭhāti, tasmiṃ udake sukkhepi taṃ paṭalaṃ vātena calamānaṃ tiṭṭhati, taṃ udakapappaṭako nāma. Omakacātumāsanti ūnacātumāsaṃ. Ovaṭṭhanti devena ovaṭṭhaṃ. Akatapabbhāreti avalañjanaṭṭhānadassanatthaṃ vuttaṃ. Tādise hi vammikassa sabbhāvoti. Mūsikukkuraṃ nāma mūsikāhi khaṇitvā bahi katapaṃsurāsi.
ஏஸேவ நயோதி ஓமகசாதுமாஸங் ஓவட்டோ²யேவ வட்டதீதி அத்தோ². ஏகதி³வஸம்பி ந வட்டதீதி ஓவட்ட²சாதுமாஸதோ ஏகதி³வஸாதிக்கந்தோபி விகோபேதுங் ந வட்டதி. ஹெட்ட²பூ⁴மிஸம்ப³ந்தே⁴பி ச கோ³கண்டகே பூ⁴மிதோ சி²ந்தி³த்வா சி²ந்தி³த்வா உக்³க³தத்தா அச்சுக்³க³தங் மத்த²கதோ சி²ந்தி³துங் க³ஹேதுஞ்ச வட்டதீதி வத³ந்தி. ஸகட்டா²னே அதிட்ட²மானங் கத்வா பாதே³ஹி மத்³தி³த்வா ஆலோளிதகத்³த³மம்பி க³ஹேதுங் வட்டதி.
Esevanayoti omakacātumāsaṃ ovaṭṭhoyeva vaṭṭatīti attho. Ekadivasampi na vaṭṭatīti ovaṭṭhacātumāsato ekadivasātikkantopi vikopetuṃ na vaṭṭati. Heṭṭhabhūmisambandhepi ca gokaṇṭake bhūmito chinditvā chinditvā uggatattā accuggataṃ matthakato chindituṃ gahetuñca vaṭṭatīti vadanti. Sakaṭṭhāne atiṭṭhamānaṃ katvā pādehi madditvā āloḷitakaddamampi gahetuṃ vaṭṭati.
அச்ச²த³னந்திஆதி³னா வுத்தத்தா உஜுகங் ஆகாஸதோ பதிதவஸ்ஸோத³கேன ஓவட்ட²மேவ ஜாதபத²வீ ஹோதி, ந ச²த³னாதீ³ஸு பதித்வா ததோ பவத்தஉத³கேன திந்தந்தி வேதி³தப்³ப³ங். ததோதி புராணஸேனாஸனதோ. இட்ட²கங் க³ண்ஹாமீதிஆதி³ ஸுத்³த⁴சித்தங் ஸந்தா⁴ய வுத்தங். ‘‘உத³கேனாதி உஜுகங் ஆகாஸதோயேவ பதிதஉத³கேன. ஸசே பன அஞ்ஞத்த² பஹரித்வா பதிதேன உத³கேன தேமிதங் ஹோதி, வட்டதீ’’தி வத³ந்தி. மண்ட³பத்த²ம்ப⁴ந்தி ஸாகா²மண்ட³பத்த²ம்ப⁴ங்.
Acchadanantiādinā vuttattā ujukaṃ ākāsato patitavassodakena ovaṭṭhameva jātapathavī hoti, na chadanādīsu patitvā tato pavattaudakena tintanti veditabbaṃ. Tatoti purāṇasenāsanato. Iṭṭhakaṃ gaṇhāmītiādi suddhacittaṃ sandhāya vuttaṃ. ‘‘Udakenāti ujukaṃ ākāsatoyeva patitaudakena. Sace pana aññattha paharitvā patitena udakena temitaṃ hoti, vaṭṭatī’’ti vadanti. Maṇḍapatthambhanti sākhāmaṇḍapatthambhaṃ.
74. உச்சாலெத்வாதி உக்கி²பித்வா. தேன அபதே³ஸேனாதி தேன லேஸேன. அவிஸயத்தா அனாபத்தீதி எத்த² ஸசேபி நிப்³பா³பேதுங் ஸக்கா ஹோதி, பட²மங் ஸுத்³த⁴சித்தேன தி³ன்னத்தா த³ஹதூதி ஸல்லக்கெ²த்வாபி திட்ட²தி, அனாபத்தி. மஹாமத்திகந்தி பி⁴த்திலேபனங்.
74.Uccāletvāti ukkhipitvā. Tena apadesenāti tena lesena. Avisayattā anāpattīti ettha sacepi nibbāpetuṃ sakkā hoti, paṭhamaṃ suddhacittena dinnattā dahatūti sallakkhetvāpi tiṭṭhati, anāpatti. Mahāmattikanti bhittilepanaṃ.
இதி வினயஸங்க³ஹஸங்வண்ணனாபூ⁴தே வினயாலங்காரே
Iti vinayasaṅgahasaṃvaṇṇanābhūte vinayālaṅkāre
பத²வீக²ணனவினிச்ச²யகதா²லங்காரோ நாம
Pathavīkhaṇanavinicchayakathālaṅkāro nāma
சுத்³த³ஸமோ பரிச்சே²தோ³.
Cuddasamo paricchedo.
