| Library / Tipiṭaka / তিপিটক • Tipiṭaka / ৰিনযালঙ্কার-টীকা • Vinayālaṅkāra-ṭīkā |
১৪. পথৰীখণনৰিনিচ্ছযকথা
14. Pathavīkhaṇanavinicchayakathā
৭২. এৰং দানৰিস্সাসগ্গাহলাভপরিণামনৰিনিচ্ছযং কথেত্ৰা ইদানি পথৰীৰিনিচ্ছযং কথেতুং ‘‘পথৰী’’ত্যাদিমাহ। তত্থ পত্থরতীতি পথৰী, প-পুব্ব থর সন্থরণেতি ধাতু, র-কারস্স ৰ-কারো, সসম্ভারপথৰী। তপ্পভেদমাহ ‘‘দ্ৰে পথৰী, জাতা চ পথৰী অজাতা চ পথৰী’’তি। তাসং ৰিসেসং দস্সেতুং ‘‘তত্থ জাতা নাম পথৰী’’ত্যাদিমাহ। তত্থ সুদ্ধপংসুকা…পে॰… যেভুয্যেনমত্তিকাপথৰী জাতা নাম পথৰী হোতি। ন কেৰলং সাযেৰ, অদড্ঢা পথৰীপি ‘‘জাতা পথৰী’’তি ৰুচ্চতি। ন কেৰলং ইমা দ্ৰেযেৰ, যোপি পংসুপুঞ্জো ৰা…পে॰… চাতুমাসং ওৰট্ঠো, সোপি ‘‘জাতা পথৰী’’তি ৰুচ্চতীতি যোজনা। ইতরত্রপি এসেৰ নযো।
72. Evaṃ dānavissāsaggāhalābhapariṇāmanavinicchayaṃ kathetvā idāni pathavīvinicchayaṃ kathetuṃ ‘‘pathavī’’tyādimāha. Tattha pattharatīti pathavī, pa-pubba thara santharaṇeti dhātu, ra-kārassa va-kāro, sasambhārapathavī. Tappabhedamāha ‘‘dve pathavī, jātā ca pathavī ajātā ca pathavī’’ti. Tāsaṃ visesaṃ dassetuṃ ‘‘tattha jātā nāma pathavī’’tyādimāha. Tattha suddhapaṃsukā…pe… yebhuyyenamattikāpathavī jātā nāma pathavī hoti. Na kevalaṃ sāyeva, adaḍḍhā pathavīpi ‘‘jātā pathavī’’ti vuccati. Na kevalaṃ imā dveyeva, yopi paṃsupuñjo vā…pe… cātumāsaṃ ovaṭṭho, sopi ‘‘jātā pathavī’’ti vuccatīti yojanā. Itaratrapi eseva nayo.
তত্থ সুদ্ধা পংসুকাযেৰ এত্থ পথৰিযা অত্থি, ন পাসাণাদযোতি সুদ্ধপংসুকা। তথা সুদ্ধমত্তিকা। অপ্পা পাসাণা এত্থাতি অপ্পপাসাণা। ইতরেসুপি এসেৰ নযো। যেভুয্যেন পংসুকা এত্থাতি যেভুয্যেনপংসুকা, অলুত্তসমাসোযং, তথা যেভুয্যেনমত্তিকা। তত্থ মুট্ঠিপ্পমাণতো উপরি পাসাণা। মুট্ঠিপ্পমাণা সক্খরা। কথলাতি কপালখণ্ডাদি। মরুম্পাতি কটসক্খরা। ৰালুকা ৰালুকাযেৰ। যেভুয্যেনপংসুকাতি এত্থ তীসু কোট্ঠাসেসু দ্ৰে কোট্ঠাসা পংসু, একো পাসাণাদীসু অঞ্ঞতরকোট্ঠাসো। অদড্ঢাপীতি উদ্ধনপত্তপচনকুম্ভকারাতপাদিৰসেন তথা তথা অদড্ঢা, সা পন ৰিসুং নত্থি, সুদ্ধপংসুআদীসু অঞ্ঞতরাৰাতি ৰেদিতব্বা। যেভুয্যেনসক্খরাতি বহুতরসক্খরা। হত্থিকুচ্ছিযং কির একং পচ্ছিপূরং আহরাপেত্ৰা দোণিযং ধোৰিত্ৰা পথৰিযা যেভুয্যেনসক্খরভাৰং ঞত্ৰা সযং ভিক্খূ পোক্খরণিং খণিংসূতি। যানি পন মজ্ঝে ‘‘অপ্পপংসুঅপ্পমত্তিকা’’তি দ্ৰে পদানি, তানি যেভুয্যেনপাসাণাদিপঞ্চকমেৰ পৰিসন্তি। তেসঞ্ঞেৰ হি দ্ৰিন্নং পভেদৰচনমেতং, যদিদং সুদ্ধপাসাণাদিআদি।
Tattha suddhā paṃsukāyeva ettha pathaviyā atthi, na pāsāṇādayoti suddhapaṃsukā. Tathā suddhamattikā. Appā pāsāṇā etthāti appapāsāṇā. Itaresupi eseva nayo. Yebhuyyena paṃsukā etthāti yebhuyyenapaṃsukā, aluttasamāsoyaṃ, tathā yebhuyyenamattikā. Tattha muṭṭhippamāṇato upari pāsāṇā. Muṭṭhippamāṇā sakkharā. Kathalāti kapālakhaṇḍādi. Marumpāti kaṭasakkharā. Vālukā vālukāyeva. Yebhuyyenapaṃsukāti ettha tīsu koṭṭhāsesu dve koṭṭhāsā paṃsu, eko pāsāṇādīsu aññatarakoṭṭhāso. Adaḍḍhāpīti uddhanapattapacanakumbhakārātapādivasena tathā tathā adaḍḍhā, sā pana visuṃ natthi, suddhapaṃsuādīsu aññatarāvāti veditabbā. Yebhuyyenasakkharāti bahutarasakkharā. Hatthikucchiyaṃ kira ekaṃ pacchipūraṃ āharāpetvā doṇiyaṃ dhovitvā pathaviyā yebhuyyenasakkharabhāvaṃ ñatvā sayaṃ bhikkhū pokkharaṇiṃ khaṇiṃsūti. Yāni pana majjhe ‘‘appapaṃsuappamattikā’’ti dve padāni, tāni yebhuyyenapāsāṇādipañcakameva pavisanti. Tesaññeva hi dvinnaṃ pabhedavacanametaṃ, yadidaṃ suddhapāsāṇādiādi.
এত্থ চ কিঞ্চাপি যেভুয্যেনপংসুং অপ্পপংসুঞ্চ পথৰিং ৰত্ৰা উপড্ঢপংসুকাপথৰী ন ৰুত্তা, তথাপি পণ্ণত্তিৰজ্জসিক্খাপদেসু সাৰসেসপঞ্ঞত্তিযাপি সম্ভৰতো উপড্ঢপংসুকাযপি পথৰিযা পাচিত্তিযমেৰাতি গহেতব্বং। কেচি পন ‘‘সব্বচ্ছন্নাদীসু উপড্ঢচ্ছন্নে দুক্কটস্স ৰুত্তত্তা ইধাপি দুক্কটং যুজ্জতী’’তি ৰদন্তি, তং ন যুত্তং পাচিত্তিযৰত্থুকঞ্চ অনাপত্তিৰত্থুকঞ্চ দুৰিধং পথৰিং ঠপেত্ৰা অঞ্ঞিস্সা দুক্কটৰত্থুকায ততিযায পথৰিযা অভাৰতো। দ্ৰেযেৰ হি পথৰিযো ৰুত্তা ‘‘জাতা চ পথৰী অজাতা চ পথৰী’’তি, তস্মা দ্ৰীসু অঞ্ঞতরায পথৰিযা ভৰিতব্বং। ৰিনযৰিনিচ্ছযে চ সম্পত্তে গরুকলহুকেসু গরুকেযেৰ ঠাতব্বত্তা ন সক্কা এত্থ অনাপত্তিযা ভৰিতুং। সব্বচ্ছন্নাদীসু পন উপড্ঢে দুক্কটং যুত্তং তত্থ তাদিসস্স দুক্কটৰত্থুনো সম্ভৰতো। ৰিমতিৰিনোদনিযম্পি (ৰি॰ ৰি॰ টী॰ পাচিত্তিয ২.৮৬) ‘‘অপ্পপংসুমত্তিকায পথৰিযা অনাপত্তিৰত্থুভাৰেন ৰুত্তত্তা উপড্ঢপংসুমত্তিকাযপি পাচিত্তিযমেৰাতি গহেতব্বং। ন হেতং দুক্কটৰত্থূতি সক্কা ৰত্তুং জাতাজাতৰিনিমুত্তায ততিযায পথৰিযা অভাৰতো’’তি ৰুত্তং।
Ettha ca kiñcāpi yebhuyyenapaṃsuṃ appapaṃsuñca pathaviṃ vatvā upaḍḍhapaṃsukāpathavī na vuttā, tathāpi paṇṇattivajjasikkhāpadesu sāvasesapaññattiyāpi sambhavato upaḍḍhapaṃsukāyapi pathaviyā pācittiyamevāti gahetabbaṃ. Keci pana ‘‘sabbacchannādīsu upaḍḍhacchanne dukkaṭassa vuttattā idhāpi dukkaṭaṃ yujjatī’’ti vadanti, taṃ na yuttaṃ pācittiyavatthukañca anāpattivatthukañca duvidhaṃ pathaviṃ ṭhapetvā aññissā dukkaṭavatthukāya tatiyāya pathaviyā abhāvato. Dveyeva hi pathaviyo vuttā ‘‘jātā ca pathavī ajātā ca pathavī’’ti, tasmā dvīsu aññatarāya pathaviyā bhavitabbaṃ. Vinayavinicchaye ca sampatte garukalahukesu garukeyeva ṭhātabbattā na sakkā ettha anāpattiyā bhavituṃ. Sabbacchannādīsu pana upaḍḍhe dukkaṭaṃ yuttaṃ tattha tādisassa dukkaṭavatthuno sambhavato. Vimativinodaniyampi (vi. vi. ṭī. pācittiya 2.86) ‘‘appapaṃsumattikāya pathaviyā anāpattivatthubhāvena vuttattā upaḍḍhapaṃsumattikāyapi pācittiyamevāti gahetabbaṃ. Na hetaṃ dukkaṭavatthūti sakkā vattuṃ jātājātavinimuttāya tatiyāya pathaviyā abhāvato’’ti vuttaṃ.
খণন্তস্স খণাপেন্তস্স ৰাতি অন্তমসো পাদঙ্গুট্ঠকেনপি সম্মজ্জনিসলাকাযপি সযং ৰা খণন্তস্স অঞ্ঞেন ৰা খণাপেন্তস্স। ‘‘পোক্খরণিং খণা’’তি ৰদতি, ৰট্টতীতি ‘‘ইমস্মিং ওকাসে’’তি অনিযমেত্ৰা ৰুত্তত্তা ৰট্টতি। ‘‘ইমং ৰল্লিং খণা’’তি ৰুত্তেপি পথৰিখণনং সন্ধায পৰত্তৰোহারত্তা ইমিনাৰ সিক্খাপদেন পাচিত্তিযং, ন ভূতগামসিক্খাপদেন, উভযম্পি সন্ধায ৰুত্তে পন দ্ৰেপি পাচিত্তিযানি হোন্তি।
Khaṇantassa khaṇāpentassa vāti antamaso pādaṅguṭṭhakenapi sammajjanisalākāyapi sayaṃ vā khaṇantassa aññena vā khaṇāpentassa. ‘‘Pokkharaṇiṃ khaṇā’’ti vadati, vaṭṭatīti ‘‘imasmiṃ okāse’’ti aniyametvā vuttattā vaṭṭati. ‘‘Imaṃ valliṃ khaṇā’’ti vuttepi pathavikhaṇanaṃ sandhāya pavattavohārattā imināva sikkhāpadena pācittiyaṃ, na bhūtagāmasikkhāpadena, ubhayampi sandhāya vutte pana dvepi pācittiyāni honti.
৭৩. কুটেহীতি ঘটেহি। তনুককদ্দমোতি উদকমিস্সককদ্দমো, সো চ উদকগতিকত্তা ৰট্টতি। উদকপপ্পটকোতি উদকে অন্তোভূমিযং পৰিট্ঠে তস্স উপরিভাগং ছাদেত্ৰা তনুকপংসু ৰা মত্তিকা ৰা পটলং হুত্ৰা পলৰমানা উট্ঠাতি, তস্মিং উদকে সুক্খেপি তং পটলং ৰাতেন চলমানং তিট্ঠতি, তং উদকপপ্পটকো নাম। ওমকচাতুমাসন্তি ঊনচাতুমাসং। ওৰট্ঠন্তি দেৰেন ওৰট্ঠং। অকতপব্ভারেতি অৰলঞ্জনট্ঠানদস্সনত্থং ৰুত্তং। তাদিসে হি ৰম্মিকস্স সব্ভাৰোতি। মূসিকুক্কুরং নাম মূসিকাহি খণিত্ৰা বহি কতপংসুরাসি।
73.Kuṭehīti ghaṭehi. Tanukakaddamoti udakamissakakaddamo, so ca udakagatikattā vaṭṭati. Udakapappaṭakoti udake antobhūmiyaṃ paviṭṭhe tassa uparibhāgaṃ chādetvā tanukapaṃsu vā mattikā vā paṭalaṃ hutvā palavamānā uṭṭhāti, tasmiṃ udake sukkhepi taṃ paṭalaṃ vātena calamānaṃ tiṭṭhati, taṃ udakapappaṭako nāma. Omakacātumāsanti ūnacātumāsaṃ. Ovaṭṭhanti devena ovaṭṭhaṃ. Akatapabbhāreti avalañjanaṭṭhānadassanatthaṃ vuttaṃ. Tādise hi vammikassa sabbhāvoti. Mūsikukkuraṃ nāma mūsikāhi khaṇitvā bahi katapaṃsurāsi.
এসেৰ নযোতি ওমকচাতুমাসং ওৰট্ঠোযেৰ ৰট্টতীতি অত্থো। একদিৰসম্পি ন ৰট্টতীতি ওৰট্ঠচাতুমাসতো একদিৰসাতিক্কন্তোপি ৰিকোপেতুং ন ৰট্টতি। হেট্ঠভূমিসম্বন্ধেপি চ গোকণ্টকে ভূমিতো ছিন্দিত্ৰা ছিন্দিত্ৰা উগ্গতত্তা অচ্চুগ্গতং মত্থকতো ছিন্দিতুং গহেতুঞ্চ ৰট্টতীতি ৰদন্তি। সকট্ঠানে অতিট্ঠমানং কত্ৰা পাদেহি মদ্দিত্ৰা আলোল়িতকদ্দমম্পি গহেতুং ৰট্টতি।
Esevanayoti omakacātumāsaṃ ovaṭṭhoyeva vaṭṭatīti attho. Ekadivasampi na vaṭṭatīti ovaṭṭhacātumāsato ekadivasātikkantopi vikopetuṃ na vaṭṭati. Heṭṭhabhūmisambandhepi ca gokaṇṭake bhūmito chinditvā chinditvā uggatattā accuggataṃ matthakato chindituṃ gahetuñca vaṭṭatīti vadanti. Sakaṭṭhāne atiṭṭhamānaṃ katvā pādehi madditvā āloḷitakaddamampi gahetuṃ vaṭṭati.
অচ্ছদনন্তিআদিনা ৰুত্তত্তা উজুকং আকাসতো পতিতৰস্সোদকেন ওৰট্ঠমেৰ জাতপথৰী হোতি, ন ছদনাদীসু পতিত্ৰা ততো পৰত্তউদকেন তিন্তন্তি ৰেদিতব্বং। ততোতি পুরাণসেনাসনতো। ইট্ঠকং গণ্হামীতিআদি সুদ্ধচিত্তং সন্ধায ৰুত্তং। ‘‘উদকেনাতি উজুকং আকাসতোযেৰ পতিতউদকেন। সচে পন অঞ্ঞত্থ পহরিত্ৰা পতিতেন উদকেন তেমিতং হোতি, ৰট্টতী’’তি ৰদন্তি। মণ্ডপত্থম্ভন্তি সাখামণ্ডপত্থম্ভং।
Acchadanantiādinā vuttattā ujukaṃ ākāsato patitavassodakena ovaṭṭhameva jātapathavī hoti, na chadanādīsu patitvā tato pavattaudakena tintanti veditabbaṃ. Tatoti purāṇasenāsanato. Iṭṭhakaṃ gaṇhāmītiādi suddhacittaṃ sandhāya vuttaṃ. ‘‘Udakenāti ujukaṃ ākāsatoyeva patitaudakena. Sace pana aññattha paharitvā patitena udakena temitaṃ hoti, vaṭṭatī’’ti vadanti. Maṇḍapatthambhanti sākhāmaṇḍapatthambhaṃ.
৭৪. উচ্চালেত্ৰাতি উক্খিপিত্ৰা। তেন অপদেসেনাতি তেন লেসেন। অৰিসযত্তা অনাপত্তীতি এত্থ সচেপি নিব্বাপেতুং সক্কা হোতি, পঠমং সুদ্ধচিত্তেন দিন্নত্তা দহতূতি সল্লক্খেত্ৰাপি তিট্ঠতি, অনাপত্তি। মহামত্তিকন্তি ভিত্তিলেপনং।
74.Uccāletvāti ukkhipitvā. Tena apadesenāti tena lesena. Avisayattā anāpattīti ettha sacepi nibbāpetuṃ sakkā hoti, paṭhamaṃ suddhacittena dinnattā dahatūti sallakkhetvāpi tiṭṭhati, anāpatti. Mahāmattikanti bhittilepanaṃ.
ইতি ৰিনযসঙ্গহসংৰণ্ণনাভূতে ৰিনযালঙ্কারে
Iti vinayasaṅgahasaṃvaṇṇanābhūte vinayālaṅkāre
পথৰীখণনৰিনিচ্ছযকথালঙ্কারো নাম
Pathavīkhaṇanavinicchayakathālaṅkāro nāma
চুদ্দসমো পরিচ্ছেদো।
Cuddasamo paricchedo.
