| Library / Tipiṭaka / д̇ибидага • Tipiṭaka / винаяаалан̇гаара-дийгаа • Vinayālaṅkāra-ṭīkā |
14. бат̇авийкан̣анавинижчаяагат̇аа
14. Pathavīkhaṇanavinicchayakathā
72. звам̣ д̣̇аанависсаасаг̇г̇аахалаабхабарин̣ааманавинижчаяам̣ гат̇зд̇ваа ид̣̇аани бат̇авийвинижчаяам̣ гат̇зд̇ум̣ ‘‘бат̇авий’’д̇яаад̣̇имааха. д̇ад̇т̇а бад̇т̇арад̇ийд̇и бат̇авий, ба-буб̣б̣а т̇ара сант̇аран̣зд̇и д̇хаад̇у, ра-гаарасса ва-гааро, сасамбхаарабат̇авий. д̇аббабхзд̣̇амааха ‘‘д̣̇вз бат̇авий, ж̇аад̇аа жа бат̇авий аж̇аад̇аа жа бат̇авий’’д̇и. д̇аасам̣ висзсам̣ д̣̇ассзд̇ум̣ ‘‘д̇ад̇т̇а ж̇аад̇аа наама бат̇авий’’д̇яаад̣̇имааха. д̇ад̇т̇а суд̣̇д̇хабам̣сугаа…бз… язбхуяязнамад̇д̇игаабат̇авий ж̇аад̇аа наама бат̇авий ход̇и. на гзвалам̣ сааязва, ад̣̇ад̣дхаа бат̇авийби ‘‘ж̇аад̇аа бат̇авий’’д̇и вужжад̇и. на гзвалам̣ имаа д̣̇взязва, яоби бам̣субун̃ж̇о ваа…бз… жаад̇умаасам̣ овадто, соби ‘‘ж̇аад̇аа бат̇авий’’д̇и вужжад̇ийд̇и яож̇анаа. ид̇арад̇раби зсзва наяо.
72. Evaṃ dānavissāsaggāhalābhapariṇāmanavinicchayaṃ kathetvā idāni pathavīvinicchayaṃ kathetuṃ ‘‘pathavī’’tyādimāha. Tattha pattharatīti pathavī, pa-pubba thara santharaṇeti dhātu, ra-kārassa va-kāro, sasambhārapathavī. Tappabhedamāha ‘‘dve pathavī, jātā ca pathavī ajātā ca pathavī’’ti. Tāsaṃ visesaṃ dassetuṃ ‘‘tattha jātā nāma pathavī’’tyādimāha. Tattha suddhapaṃsukā…pe… yebhuyyenamattikāpathavī jātā nāma pathavī hoti. Na kevalaṃ sāyeva, adaḍḍhā pathavīpi ‘‘jātā pathavī’’ti vuccati. Na kevalaṃ imā dveyeva, yopi paṃsupuñjo vā…pe… cātumāsaṃ ovaṭṭho, sopi ‘‘jātā pathavī’’ti vuccatīti yojanā. Itaratrapi eseva nayo.
д̇ад̇т̇а суд̣̇д̇хаа бам̣сугааязва зд̇т̇а бат̇авияаа ад̇т̇и, на баасаан̣аад̣̇аяод̇и суд̣̇д̇хабам̣сугаа. д̇ат̇аа суд̣̇д̇хамад̇д̇игаа. аббаа баасаан̣аа зд̇т̇аад̇и аббабаасаан̣аа. ид̇арзсуби зсзва наяо. язбхуяязна бам̣сугаа зд̇т̇аад̇и язбхуяязнабам̣сугаа, алуд̇д̇асамаасояам̣, д̇ат̇аа язбхуяязнамад̇д̇игаа. д̇ад̇т̇а мудтиббамаан̣ад̇о убари баасаан̣аа. мудтиббамаан̣аа сагкараа. гат̇алаад̇и габаалакан̣д̣аад̣̇и. марумбаад̇и гадасагкараа. ваалугаа ваалугааязва. язбхуяязнабам̣сугаад̇и зд̇т̇а д̇ийсу годтаасзсу д̣̇вз годтаасаа бам̣су, зго баасаан̣аад̣̇ийсу ан̃н̃ад̇арагодтаасо. ад̣̇ад̣дхаабийд̇и уд̣̇д̇ханабад̇д̇абажанагумбхагаараад̇абаад̣̇ивасзна д̇ат̇аа д̇ат̇аа ад̣̇ад̣дхаа, саа бана висум̣ над̇т̇и, суд̣̇д̇хабам̣суаад̣̇ийсу ан̃н̃ад̇арааваад̇и взд̣̇ид̇аб̣б̣аа. язбхуяязнасагкараад̇и б̣ахуд̇арасагкараа. хад̇т̇игужчияам̣ гира згам̣ бажчибуурам̣ аахараабзд̇ваа д̣̇он̣ияам̣ д̇ховид̇ваа бат̇авияаа язбхуяязнасагкарабхаавам̣ н̃ад̇ваа саяам̣ бхигкуу богкаран̣им̣ кан̣им̣сууд̇и. яаани бана маж̇жхз ‘‘аббабам̣суаббамад̇д̇игаа’’д̇и д̣̇вз бад̣̇аани, д̇аани язбхуяязнабаасаан̣аад̣̇ибан̃жагамзва бависанд̇и. д̇зсан̃н̃зва хи д̣̇виннам̣ бабхзд̣̇аважанамзд̇ам̣, яад̣̇ид̣̇ам̣ суд̣̇д̇хабаасаан̣аад̣̇иаад̣̇и.
Tattha suddhā paṃsukāyeva ettha pathaviyā atthi, na pāsāṇādayoti suddhapaṃsukā. Tathā suddhamattikā. Appā pāsāṇā etthāti appapāsāṇā. Itaresupi eseva nayo. Yebhuyyena paṃsukā etthāti yebhuyyenapaṃsukā, aluttasamāsoyaṃ, tathā yebhuyyenamattikā. Tattha muṭṭhippamāṇato upari pāsāṇā. Muṭṭhippamāṇā sakkharā. Kathalāti kapālakhaṇḍādi. Marumpāti kaṭasakkharā. Vālukā vālukāyeva. Yebhuyyenapaṃsukāti ettha tīsu koṭṭhāsesu dve koṭṭhāsā paṃsu, eko pāsāṇādīsu aññatarakoṭṭhāso. Adaḍḍhāpīti uddhanapattapacanakumbhakārātapādivasena tathā tathā adaḍḍhā, sā pana visuṃ natthi, suddhapaṃsuādīsu aññatarāvāti veditabbā. Yebhuyyenasakkharāti bahutarasakkharā. Hatthikucchiyaṃ kira ekaṃ pacchipūraṃ āharāpetvā doṇiyaṃ dhovitvā pathaviyā yebhuyyenasakkharabhāvaṃ ñatvā sayaṃ bhikkhū pokkharaṇiṃ khaṇiṃsūti. Yāni pana majjhe ‘‘appapaṃsuappamattikā’’ti dve padāni, tāni yebhuyyenapāsāṇādipañcakameva pavisanti. Tesaññeva hi dvinnaṃ pabhedavacanametaṃ, yadidaṃ suddhapāsāṇādiādi.
зд̇т̇а жа гин̃жааби язбхуяязнабам̣сум̣ аббабам̣сун̃жа бат̇авим̣ вад̇ваа убад̣дхабам̣сугаабат̇авий на вуд̇д̇аа, д̇ат̇ааби бан̣н̣ад̇д̇иваж̇ж̇асигкаабад̣̇зсу саавасзсабан̃н̃ад̇д̇ияааби самбхавад̇о убад̣дхабам̣сугааяаби бат̇авияаа баажид̇д̇ияамзваад̇и г̇ахзд̇аб̣б̣ам̣. гзжи бана ‘‘саб̣б̣ажчаннаад̣̇ийсу убад̣дхажчаннз д̣̇уггадасса вуд̇д̇ад̇д̇аа ид̇хааби д̣̇уггадам̣ яуж̇ж̇ад̇ий’’д̇и вад̣̇анд̇и, д̇ам̣ на яуд̇д̇ам̣ баажид̇д̇ияавад̇т̇уган̃жа анаабад̇д̇ивад̇т̇уган̃жа д̣̇увид̇хам̣ бат̇авим̣ табзд̇ваа ан̃н̃иссаа д̣̇уггадавад̇т̇угааяа д̇ад̇ияааяа бат̇авияаа абхаавад̇о. д̣̇взязва хи бат̇авияо вуд̇д̇аа ‘‘ж̇аад̇аа жа бат̇авий аж̇аад̇аа жа бат̇авий’’д̇и, д̇асмаа д̣̇вийсу ан̃н̃ад̇арааяа бат̇авияаа бхавид̇аб̣б̣ам̣. винаяавинижчаяз жа самбад̇д̇з г̇аругалахугзсу г̇аругзязва таад̇аб̣б̣ад̇д̇аа на саггаа зд̇т̇а анаабад̇д̇ияаа бхавид̇ум̣. саб̣б̣ажчаннаад̣̇ийсу бана убад̣дхз д̣̇уггадам̣ яуд̇д̇ам̣ д̇ад̇т̇а д̇аад̣̇исасса д̣̇уггадавад̇т̇уно самбхавад̇о. вимад̇ивинод̣̇анияамби (ви. ви. дий. баажид̇д̇ияа 2.86) ‘‘аббабам̣сумад̇д̇игааяа бат̇авияаа анаабад̇д̇ивад̇т̇убхаавзна вуд̇д̇ад̇д̇аа убад̣дхабам̣сумад̇д̇игааяаби баажид̇д̇ияамзваад̇и г̇ахзд̇аб̣б̣ам̣. на хзд̇ам̣ д̣̇уггадавад̇т̇ууд̇и саггаа вад̇д̇ум̣ ж̇аад̇ааж̇аад̇авинимуд̇д̇ааяа д̇ад̇ияааяа бат̇авияаа абхаавад̇о’’д̇и вуд̇д̇ам̣.
Ettha ca kiñcāpi yebhuyyenapaṃsuṃ appapaṃsuñca pathaviṃ vatvā upaḍḍhapaṃsukāpathavī na vuttā, tathāpi paṇṇattivajjasikkhāpadesu sāvasesapaññattiyāpi sambhavato upaḍḍhapaṃsukāyapi pathaviyā pācittiyamevāti gahetabbaṃ. Keci pana ‘‘sabbacchannādīsu upaḍḍhacchanne dukkaṭassa vuttattā idhāpi dukkaṭaṃ yujjatī’’ti vadanti, taṃ na yuttaṃ pācittiyavatthukañca anāpattivatthukañca duvidhaṃ pathaviṃ ṭhapetvā aññissā dukkaṭavatthukāya tatiyāya pathaviyā abhāvato. Dveyeva hi pathaviyo vuttā ‘‘jātā ca pathavī ajātā ca pathavī’’ti, tasmā dvīsu aññatarāya pathaviyā bhavitabbaṃ. Vinayavinicchaye ca sampatte garukalahukesu garukeyeva ṭhātabbattā na sakkā ettha anāpattiyā bhavituṃ. Sabbacchannādīsu pana upaḍḍhe dukkaṭaṃ yuttaṃ tattha tādisassa dukkaṭavatthuno sambhavato. Vimativinodaniyampi (vi. vi. ṭī. pācittiya 2.86) ‘‘appapaṃsumattikāya pathaviyā anāpattivatthubhāvena vuttattā upaḍḍhapaṃsumattikāyapi pācittiyamevāti gahetabbaṃ. Na hetaṃ dukkaṭavatthūti sakkā vattuṃ jātājātavinimuttāya tatiyāya pathaviyā abhāvato’’ti vuttaṃ.
кан̣анд̇асса кан̣аабзнд̇асса ваад̇и анд̇амасо баад̣̇ан̇г̇удтагзнаби саммаж̇ж̇анисалаагааяаби саяам̣ ваа кан̣анд̇асса ан̃н̃зна ваа кан̣аабзнд̇асса. ‘‘богкаран̣им̣ кан̣аа’’д̇и вад̣̇ад̇и, ваддад̇ийд̇и ‘‘имасмим̣ огаасз’’д̇и анияамзд̇ваа вуд̇д̇ад̇д̇аа ваддад̇и. ‘‘имам̣ валлим̣ кан̣аа’’д̇и вуд̇д̇зби бат̇авикан̣анам̣ санд̇хааяа бавад̇д̇авохаарад̇д̇аа иминаава сигкаабад̣̇зна баажид̇д̇ияам̣, на бхууд̇аг̇аамасигкаабад̣̇зна, убхаяамби санд̇хааяа вуд̇д̇з бана д̣̇взби баажид̇д̇ияаани хонд̇и.
Khaṇantassa khaṇāpentassa vāti antamaso pādaṅguṭṭhakenapi sammajjanisalākāyapi sayaṃ vā khaṇantassa aññena vā khaṇāpentassa. ‘‘Pokkharaṇiṃ khaṇā’’ti vadati, vaṭṭatīti ‘‘imasmiṃ okāse’’ti aniyametvā vuttattā vaṭṭati. ‘‘Imaṃ valliṃ khaṇā’’ti vuttepi pathavikhaṇanaṃ sandhāya pavattavohārattā imināva sikkhāpadena pācittiyaṃ, na bhūtagāmasikkhāpadena, ubhayampi sandhāya vutte pana dvepi pācittiyāni honti.
73. гудзхийд̇и гхадзхи. д̇анугагад̣̇д̣̇амод̇и уд̣̇агамиссагагад̣̇д̣̇амо, со жа уд̣̇агаг̇ад̇игад̇д̇аа ваддад̇и. уд̣̇агабаббадагод̇и уд̣̇агз анд̇обхуумияам̣ бавидтз д̇асса убарибхааг̇ам̣ чаад̣̇зд̇ваа д̇анугабам̣су ваа мад̇д̇игаа ваа бадалам̣ худ̇ваа балавамаанаа удтаад̇и, д̇асмим̣ уд̣̇агз сугкзби д̇ам̣ бадалам̣ ваад̇зна жаламаанам̣ д̇идтад̇и, д̇ам̣ уд̣̇агабаббадаго наама. омагажаад̇умаасанд̇и уунажаад̇умаасам̣. овадтанд̇и д̣̇звзна овадтам̣. агад̇абаб̣бхаарзд̇и авалан̃ж̇анадтаанад̣̇ассанад̇т̇ам̣ вуд̇д̇ам̣. д̇аад̣̇исз хи ваммигасса саб̣бхаавод̇и. муусигуггурам̣ наама муусигаахи кан̣ид̇ваа б̣ахи гад̇абам̣сурааси.
73.Kuṭehīti ghaṭehi. Tanukakaddamoti udakamissakakaddamo, so ca udakagatikattā vaṭṭati. Udakapappaṭakoti udake antobhūmiyaṃ paviṭṭhe tassa uparibhāgaṃ chādetvā tanukapaṃsu vā mattikā vā paṭalaṃ hutvā palavamānā uṭṭhāti, tasmiṃ udake sukkhepi taṃ paṭalaṃ vātena calamānaṃ tiṭṭhati, taṃ udakapappaṭako nāma. Omakacātumāsanti ūnacātumāsaṃ. Ovaṭṭhanti devena ovaṭṭhaṃ. Akatapabbhāreti avalañjanaṭṭhānadassanatthaṃ vuttaṃ. Tādise hi vammikassa sabbhāvoti. Mūsikukkuraṃ nāma mūsikāhi khaṇitvā bahi katapaṃsurāsi.
зсзва наяод̇и омагажаад̇умаасам̣ овадтоязва ваддад̇ийд̇и ад̇т̇о. згад̣̇ивасамби на ваддад̇ийд̇и овадтажаад̇умаасад̇о згад̣̇ивасаад̇игганд̇оби вигобзд̇ум̣ на ваддад̇и. хздтабхуумисамб̣анд̇хзби жа г̇оган̣дагз бхуумид̇о чинд̣̇ид̇ваа чинд̣̇ид̇ваа уг̇г̇ад̇ад̇д̇аа ажжуг̇г̇ад̇ам̣ мад̇т̇агад̇о чинд̣̇ид̇ум̣ г̇ахзд̇ун̃жа ваддад̇ийд̇и вад̣̇анд̇и. сагадтаанз ад̇идтамаанам̣ гад̇ваа баад̣̇зхи мад̣̇д̣̇ид̇ваа аалол̣ид̇агад̣̇д̣̇амамби г̇ахзд̇ум̣ ваддад̇и.
Esevanayoti omakacātumāsaṃ ovaṭṭhoyeva vaṭṭatīti attho. Ekadivasampi na vaṭṭatīti ovaṭṭhacātumāsato ekadivasātikkantopi vikopetuṃ na vaṭṭati. Heṭṭhabhūmisambandhepi ca gokaṇṭake bhūmito chinditvā chinditvā uggatattā accuggataṃ matthakato chindituṃ gahetuñca vaṭṭatīti vadanti. Sakaṭṭhāne atiṭṭhamānaṃ katvā pādehi madditvā āloḷitakaddamampi gahetuṃ vaṭṭati.
ажчад̣̇ананд̇иаад̣̇инаа вуд̇д̇ад̇д̇аа уж̇угам̣ аагаасад̇о бад̇ид̇авассод̣̇агзна овадтамзва ж̇аад̇абат̇авий ход̇и, на чад̣̇анаад̣̇ийсу бад̇ид̇ваа д̇ад̇о бавад̇д̇ауд̣̇агзна д̇инд̇анд̇и взд̣̇ид̇аб̣б̣ам̣. д̇ад̇од̇и бураан̣асзнаасанад̇о. идтагам̣ г̇ан̣хаамийд̇иаад̣̇и суд̣̇д̇хажид̇д̇ам̣ санд̇хааяа вуд̇д̇ам̣. ‘‘уд̣̇агзнаад̇и уж̇угам̣ аагаасад̇оязва бад̇ид̇ауд̣̇агзна. сажз бана ан̃н̃ад̇т̇а бахарид̇ваа бад̇ид̇зна уд̣̇агзна д̇змид̇ам̣ ход̇и, ваддад̇ий’’д̇и вад̣̇анд̇и. ман̣д̣абад̇т̇амбханд̇и саакааман̣д̣абад̇т̇амбхам̣.
Acchadanantiādinā vuttattā ujukaṃ ākāsato patitavassodakena ovaṭṭhameva jātapathavī hoti, na chadanādīsu patitvā tato pavattaudakena tintanti veditabbaṃ. Tatoti purāṇasenāsanato. Iṭṭhakaṃ gaṇhāmītiādi suddhacittaṃ sandhāya vuttaṃ. ‘‘Udakenāti ujukaṃ ākāsatoyeva patitaudakena. Sace pana aññattha paharitvā patitena udakena temitaṃ hoti, vaṭṭatī’’ti vadanti. Maṇḍapatthambhanti sākhāmaṇḍapatthambhaṃ.
74. ужжаалзд̇ваад̇и угкибид̇ваа. д̇зна абад̣̇зсзнаад̇и д̇зна лзсзна. ависаяад̇д̇аа анаабад̇д̇ийд̇и зд̇т̇а сажзби ниб̣б̣аабзд̇ум̣ саггаа ход̇и, батамам̣ суд̣̇д̇хажид̇д̇зна д̣̇иннад̇д̇аа д̣̇ахад̇ууд̇и саллагкзд̇вааби д̇идтад̇и, анаабад̇д̇и. махаамад̇д̇иганд̇и бхид̇д̇илзбанам̣.
74.Uccāletvāti ukkhipitvā. Tena apadesenāti tena lesena. Avisayattā anāpattīti ettha sacepi nibbāpetuṃ sakkā hoti, paṭhamaṃ suddhacittena dinnattā dahatūti sallakkhetvāpi tiṭṭhati, anāpatti. Mahāmattikanti bhittilepanaṃ.
ид̇и винаяасан̇г̇ахасам̣ван̣н̣анаабхууд̇з винаяаалан̇гаарз
Iti vinayasaṅgahasaṃvaṇṇanābhūte vinayālaṅkāre
бат̇авийкан̣анавинижчаяагат̇аалан̇гааро наама
Pathavīkhaṇanavinicchayakathālaṅkāro nāma
жуд̣̇д̣̇асамо барижчзд̣̇о.
Cuddasamo paricchedo.
