| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
34. பத²வீனித்³தே³ஸவண்ணனா
34. Pathavīniddesavaṇṇanā
242. ஜாதா (பாசி॰ 86; பாசி॰ அட்ட²॰ 86-88; கங்கா²॰ அட்ட²॰ பத²வீக²ணனஸிக்கா²பத³வண்ணனா) அஜாதாதி து³விதா⁴ பத²வீதி அத்தோ². இதா³னி தது³ப⁴யங் த³ஸ்ஸேதுங் ‘‘ஸுத்³த⁴மத்திகபங்ஸுகா’’திஆதி³மாஹ. தத்த² ஸுத்³த⁴மத்திகபங்ஸுகா ச அத³ட்³டா⁴ ச ப³ஹுமத்திகபங்ஸுகா ச சாதுமாஸாதி⁴கோவட்ட²பங்ஸுமத்திகராஸி ச ஜாதபத²வீதி ஸம்ப³ந்தோ⁴. எத்த² பன அத³ட்³டா⁴தி உத்³த⁴னபசனகும்ப⁴காராவாபபா⁴ஜனபசனாதி³வஸேன ததா² ததா² அத³ட்³டா⁴. அயங் பன விஸுங் நத்தி², ஸுத்³த⁴பங்ஸுஆதீ³ஸு அஞ்ஞதராவ வேதி³தப்³பா³. ஸுத்³த⁴பங்ஸு ஸுத்³த⁴மத்திகா யேபு⁴ய்யேனபங்ஸு யேபு⁴ய்யேனமத்திகா அதிரேகசாதுமாஸாதி⁴கோவட்ட²மத்திகாபங்ஸுபுஞ்ஜா ச அத³ட்³டா⁴ சாதி அயங் ஸப்³பா³பி ஜாதபத²வீதி வேதி³தப்³பா³.
242. Jātā (pāci. 86; pāci. aṭṭha. 86-88; kaṅkhā. aṭṭha. pathavīkhaṇanasikkhāpadavaṇṇanā) ajātāti duvidhā pathavīti attho. Idāni tadubhayaṃ dassetuṃ ‘‘suddhamattikapaṃsukā’’tiādimāha. Tattha suddhamattikapaṃsukā ca adaḍḍhā ca bahumattikapaṃsukā ca cātumāsādhikovaṭṭhapaṃsumattikarāsi ca jātapathavīti sambandho. Ettha pana adaḍḍhāti uddhanapacanakumbhakārāvāpabhājanapacanādivasena tathā tathā adaḍḍhā. Ayaṃ pana visuṃ natthi, suddhapaṃsuādīsu aññatarāva veditabbā. Suddhapaṃsu suddhamattikā yebhuyyenapaṃsu yebhuyyenamattikā atirekacātumāsādhikovaṭṭhamattikāpaṃsupuñjā ca adaḍḍhā cāti ayaṃ sabbāpi jātapathavīti veditabbā.
243. து³தியாதி அஜாதபத²வீதி அத்தோ². வுத்தராஸீதி மத்திகராஸி ச பங்ஸுராஸி ச சாதுமாஸோமவட்ட²கோ அஜாதபத²வீதி அத்தோ².
243.Dutiyāti ajātapathavīti attho. Vuttarāsīti mattikarāsi ca paṃsurāsi ca cātumāsomavaṭṭhako ajātapathavīti attho.
244. இதா³னி யேபு⁴ய்யேனமத்திகா யேபு⁴ய்யேனபங்ஸுகா யேபு⁴ய்யேனஸக்க²ராதி ஏவங் வுத்தாஸு கித்தாவதா யேபு⁴ய்யதா ஹோதீதி தங் த³ஸ்ஸேதுங் ‘‘த்³வே பா⁴கா³’’திஆதி³மாஹ. தத்த² தீஸு பா⁴கே³ஸு த்³வே பா⁴கா³ மத்திகா யஸ்ஸா பூ⁴மியா, ஏஸா யேபு⁴ய்யமத்திகாதி ஸம்ப³ந்தோ⁴. உபட்³ட⁴பங்ஸுஆத³யோபி கப்பியா ஏவ அகப்பியபா⁴க³ஸ்ஸ அனதிரேகதோ. ‘‘யேபு⁴ய்யேனமத்திகா யேபு⁴ய்யேனபங்ஸுகா’’தி (பாசி॰ 86) ஹி வுத்தங், ந ‘‘உபட்³ட⁴மத்திகா, உபட்³ட⁴பங்ஸுகா’’தி. ஸேஸேஸுபீதி யேபு⁴ய்யபங்ஸுகாதீ³ஸுபி.
244. Idāni yebhuyyenamattikā yebhuyyenapaṃsukā yebhuyyenasakkharāti evaṃ vuttāsu kittāvatā yebhuyyatā hotīti taṃ dassetuṃ ‘‘dve bhāgā’’tiādimāha. Tattha tīsu bhāgesu dve bhāgā mattikā yassā bhūmiyā, esā yebhuyyamattikāti sambandho. Upaḍḍhapaṃsuādayopi kappiyā eva akappiyabhāgassa anatirekato. ‘‘Yebhuyyenamattikā yebhuyyenapaṃsukā’’ti (pāci. 86) hi vuttaṃ, na ‘‘upaḍḍhamattikā, upaḍḍhapaṃsukā’’ti. Sesesupīti yebhuyyapaṃsukādīsupi.
245. ஜாதஸஞ்ஞிஸ்ஸ பாசித்தீதி ஸம்ப³ந்தோ⁴. த்³வெள்ஹஸ்ஸ விமதிஸ்ஸ து³க்கடங். ஜாதே அஜாதஸஞ்ஞிஸ்ஸ அனாபத்தி.
245. Jātasaññissa pācittīti sambandho. Dveḷhassa vimatissa dukkaṭaṃ. Jāte ajātasaññissa anāpatti.
246. ஏகாயாணத்தியா ஏகாதி ஸசே ஸகிங் ஆணத்தோ தி³வஸம்பி க²ணதி, ஆணாபகஸ்ஸ ஏகா ஏவாதி அத்தோ². வாசஸோதி வாசாய வாசாயாதி அத்தோ².
246.Ekāyāṇattiyā ekāti sace sakiṃ āṇatto divasampi khaṇati, āṇāpakassa ekā evāti attho. Vācasoti vācāya vācāyāti attho.
247. எத்த² ‘‘ஜாலேஹி அக்³கி³’’ந்தி வா வத்துங் ந வட்டதி. அனியமெத்வா பன ‘‘பொக்க²ரணிங் க²ண, பத²விங் க²ண, வாபிங் க²ண, ஆவாடங் க²ண, கந்த³ங் க²ணா’’தி வத்துங் வட்டதி.
247. Ettha ‘‘jālehi aggi’’nti vā vattuṃ na vaṭṭati. Aniyametvā pana ‘‘pokkharaṇiṃ khaṇa, pathaviṃ khaṇa, vāpiṃ khaṇa, āvāṭaṃ khaṇa, kandaṃ khaṇā’’ti vattuṃ vaṭṭati.
248. ஏதி³ஸந்தி எத்த² அஞ்ஞம்பி ஏவரூபங் கப்பியவோஹாரவசனங் வட்டதீதி அதி⁴ப்பாயோ.
248.Edisanti ettha aññampi evarūpaṃ kappiyavohāravacanaṃ vaṭṭatīti adhippāyo.
249. கோபேதுங் லப்³ப⁴ந்தி ஸம்ப³ந்தோ⁴, க⁴டாதீ³ஹி க³ஹேதுங் ஸக்குணெய்யகங் உஸ்ஸிஞ்சனீயகத்³த³மங்.
249. Kopetuṃ labbhanti sambandho, ghaṭādīhi gahetuṃ sakkuṇeyyakaṃ ussiñcanīyakaddamaṃ.
251-2. உத³கஸந்திகே பதிதேதி ஸம்ப³ந்தோ⁴. உத³கே பதிதங் பன ஸப்³ப³காலங் கப்பியமேவ, தஸ்மா அகப்பியங் த³ஸ்ஸேதுங் ‘‘உத³கஸந்திகே’’தி வுத்தங். பாஸாணே லக்³கே³ ரஜே ச நவஸொண்டி³யா பதிதே ரஜே சாதி ஸம்ப³ந்தோ⁴. அப்³போ⁴காஸுட்டி²தே வம்மிகே ச மத்திகாகுட்டே சாதி அத்தோ², ததா² ஏதேபி ஸப்³பே³ சாதுமாஸாதி⁴கோவட்டா² ந கோபேதப்³பா³தி அத்தோ².
251-2. Udakasantike patiteti sambandho. Udake patitaṃ pana sabbakālaṃ kappiyameva, tasmā akappiyaṃ dassetuṃ ‘‘udakasantike’’ti vuttaṃ. Pāsāṇe lagge raje ca navasoṇḍiyā patite raje cāti sambandho. Abbhokāsuṭṭhite vammike ca mattikākuṭṭe cāti attho, tathā etepi sabbe cātumāsādhikovaṭṭhā na kopetabbāti attho.
253-5. பூ⁴மிங் விகோபயங் த²ம்பா⁴தி³ங் க³ண்ஹிதுங் ந ச கப்பதீதி ஸம்ப³ந்தோ⁴. தா⁴ராயாதி பஸ்ஸாவதா⁴ராய. பத³ங் த³ஸ்ஸெஸ்ஸாமீதி ஸம்ப³ந்தோ⁴.
253-5. Bhūmiṃ vikopayaṃ thambhādiṃ gaṇhituṃ na ca kappatīti sambandho. Dhārāyāti passāvadhārāya. Padaṃ dassessāmīti sambandho.
257. ஸேகோதி ஸிஞ்சனங். பூ⁴மியா அல்லஹத்த²ங் ட²பெத்வாதி ஸம்ப³ந்தோ⁴.
257.Sekoti siñcanaṃ. Bhūmiyā allahatthaṃ ṭhapetvāti sambandho.
258. அவஸே ஸதீதி ஹத்த²தா³ஹாதீ³ஸு ஆபதா³ஸூதி அத்தோ². பத²வீவினிச்ச²யோ.
258.Avase satīti hatthadāhādīsu āpadāsūti attho. Pathavīvinicchayo.
பத²வீனித்³தே³ஸவண்ணனா நிட்டி²தா.
Pathavīniddesavaṇṇanā niṭṭhitā.
