| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
34. பத²வீனித்³தே³ஸவண்ணனா
34. Pathavīniddesavaṇṇanā
242. ஜாதாஜாதாதி து³விதா⁴தி ஜாதா பத²வீ அஜாதா பத²வீதி பத²வீ து³விதா⁴தி அத்தோ². இமினா ஜாதபத²விஞ்ச அஜாதபத²விஞ்ச த³ஸ்ஸேதி. தாஸங் விபா⁴க³ங் த³ஸ்ஸேதி ‘‘ஸுத்³தா⁴’’திஆதி³னா. ஸுத்³த⁴மத்திகபங்ஸுகா ச அத³ட்³டா⁴ ச ப³ஹுமத்திகபங்ஸுகா ச சாதுமாஸாதி⁴கோவட்ட²பங்ஸுமத்திகராஸி ச ஜாதா பத²வீதி ஸம்ப³ந்தோ⁴. மத்திகா ச பங்ஸு சாதி த்³வந்தோ³. ஸுத்³தா⁴ அப்பஸக்க²ராதி³தாய மத்திகா பங்ஸவோ யஸ்ஸாதி பா³ஹிரத்தோ². அத³ட்³டா⁴தி உத்³த⁴னபசனாதி³வஸேன ததா² ததா² அத³ட்³டா⁴. ஸா பன விஸுங் நத்தி², ஸுத்³த⁴மத்திகாதீ³ஸு அஞ்ஞதராவ வேதி³தப்³பா³. சத்தாரோ மாஸா, தேஹி ஸஹிதோ அதிரேகோ காலோ, தஸ்மிங் ஓவட்டோ²தி ஸமாஸோ. ஓவட்டோ²தி யேன கேனசி உத³கேன ஓவட்டோ². பு³தா⁴ பன ‘‘ஆகாஸதோ வுட்ட²உத³கேனேவ, ந அஞ்ஞத்த² பஹரித்வா பதிதபி³ந்து³னா’’தி வத³ந்தி, ‘‘ஓவட்டோ²’’தி ஸாமஞ்ஞேன வுத்தத்தா ச ‘‘பொக்க²ரணியா டி²ததனுகத்³த³மோ வட்டதி, ப³ஹலோ து ந வட்டதீ’’தி (பாசி॰ அட்ட²॰ 86) வுத்தத்தா ச ‘‘வினயவினிச்ச²யே ஸம்பத்தே க³ருகே டா²தப்³ப³’’ந்தி வினயலக்க²ணதோ ச ந தங் யுஜ்ஜதீதி அம்ஹாகங் க²ந்தி. பங்ஸுமத்திகானங் ராஸி பங்ஸுமத்திகராஸி. சது…பே॰… வட்டோ² பங்ஸுமத்திகராஸி யஸ்ஸாதி அஞ்ஞபத³த்தோ², கம்மதா⁴ரயோ வா.
242.Jātājātātiduvidhāti jātā pathavī ajātā pathavīti pathavī duvidhāti attho. Iminā jātapathaviñca ajātapathaviñca dasseti. Tāsaṃ vibhāgaṃ dasseti ‘‘suddhā’’tiādinā. Suddhamattikapaṃsukā ca adaḍḍhā ca bahumattikapaṃsukā ca cātumāsādhikovaṭṭhapaṃsumattikarāsi ca jātā pathavīti sambandho. Mattikā ca paṃsu cāti dvando. Suddhā appasakkharāditāya mattikā paṃsavo yassāti bāhirattho. Adaḍḍhāti uddhanapacanādivasena tathā tathā adaḍḍhā. Sā pana visuṃ natthi, suddhamattikādīsu aññatarāva veditabbā. Cattāro māsā, tehi sahito atireko kālo, tasmiṃ ovaṭṭhoti samāso. Ovaṭṭhoti yena kenaci udakena ovaṭṭho. Budhā pana ‘‘ākāsato vuṭṭhaudakeneva, na aññattha paharitvā patitabindunā’’ti vadanti, ‘‘ovaṭṭho’’ti sāmaññena vuttattā ca ‘‘pokkharaṇiyā ṭhitatanukaddamo vaṭṭati, bahalo tu na vaṭṭatī’’ti (pāci. aṭṭha. 86) vuttattā ca ‘‘vinayavinicchaye sampatte garuke ṭhātabba’’nti vinayalakkhaṇato ca na taṃ yujjatīti amhākaṃ khanti. Paṃsumattikānaṃ rāsi paṃsumattikarāsi. Catu…pe… vaṭṭho paṃsumattikarāsi yassāti aññapadattho, kammadhārayo vā.
243. வாலுகா ச த³ட்³டா⁴ ச யேபு⁴ய்யஸக்க²ராதி³மஹீபி ச சாதுமாஸோமவட்ட²கோ வுத்தராஸி ச து³தியா பூ⁴மீதி ஸம்ப³ந்தோ⁴ ஸக்க²ரா ச பாஸாணா ச மரும்பா³ ச கத²லா ச வாலுகா சாதி த்³வந்தோ³. ஸுத்³தா⁴ ஸக்க²ர…பே॰… வாலுகா யஸ்ஸாதி விக்³க³ஹோ. ஹத்த²முட்டி²னா க³ஹேதப்³ப³ப்பமாணா ஸக்க²ரா, ததோ உபரி பாஸாணா, கடஸக்க²ரா மரும்பா³, கபாலக²ண்டா³னி கத²லாதி வேதி³தப்³பா³. து³தியாதி அஜாதா. வுத்தராஸீதி வுத்தோ மத்திகபங்ஸுஸிரா.
243. Vālukā ca daḍḍhā ca yebhuyyasakkharādimahīpi ca cātumāsomavaṭṭhako vuttarāsi ca dutiyā bhūmīti sambandho sakkharā ca pāsāṇā ca marumbā ca kathalā ca vālukā cāti dvando. Suddhā sakkhara…pe… vālukā yassāti viggaho. Hatthamuṭṭhinā gahetabbappamāṇā sakkharā, tato upari pāsāṇā, kaṭasakkharā marumbā, kapālakhaṇḍāni kathalāti veditabbā. Dutiyāti ajātā. Vuttarāsīti vutto mattikapaṃsusirā.
244. கீதி³ஸீ யேபு⁴யுமத்திகாதீ³தி ஆஹ ‘‘த்³வே பா⁴கா³’’திஆதி³. யஸ்ஸ பூ⁴மியாதி யஸ்ஸா பூ⁴மியா. ஸேஸேஸுபீதி யேபு⁴ய்யபங்ஸுயேபு⁴ய்யஸக்க²ரயேபு⁴ய்யபாஸாணாதீ³ஸு.
244. Kīdisī yebhuyumattikādīti āha ‘‘dve bhāgā’’tiādi. Yassa bhūmiyāti yassā bhūmiyā. Sesesupīti yebhuyyapaṃsuyebhuyyasakkharayebhuyyapāsāṇādīsu.
245. ‘‘பாசித்தீ’’திஆதி³னா தத்த² வினிச்ச²யங் த³ஸ்ஸேதி. ஜாதே ஜாதஸஞ்ஞிஸ்ஸ க²ணனே பாசித்தீதி ஸம்ப³ந்தோ⁴. ஜாதேதி ஜாதே பூ⁴மிபா⁴கே³, லிங்க³விபல்லாஸோ வா, ஜாதாயாதி வுத்தங் ஹோதி. ஜாதே த்³வெள்ஹஸ்ஸ விமதிஸ்ஸ து³க்கடந்தி ஸம்ப³ந்தோ⁴. ஜாதே அஜாதஸஞ்ஞிஸ்ஸ அனாபத்தி. ததா² ஆணாபனே அனாபத்தீதி யோஜனா. அஜாதஸஞ்ஞிஸ்ஸாதி அஜாதாதி ஸஞ்ஞா அஜாதஸஞ்ஞா, ஸா அஸ்ஸ அத்தீ²தி அஜாதஸஞ்ஞீ, தஸ்ஸ.
245.‘‘Pācittī’’tiādinā tattha vinicchayaṃ dasseti. Jāte jātasaññissa khaṇane pācittīti sambandho. Jāteti jāte bhūmibhāge, liṅgavipallāso vā, jātāyāti vuttaṃ hoti. Jāte dveḷhassa vimatissa dukkaṭanti sambandho. Jāte ajātasaññissa anāpatti. Tathā āṇāpane anāpattīti yojanā. Ajātasaññissāti ajātāti saññā ajātasaññā, sā assa atthīti ajātasaññī, tassa.
246. ஏகாயாணத்தியா ஏகாதி ஸசே ஸகிங் ஆணத்தோ தி³வஸம்பி க²ணதி, ஆணாபகஸ்ஸ ஏகா ஏவ ஆபத்தீதி அத்தோ². வாசஸோ ஆபத்தீதி ஸம்ப³ந்தோ⁴. வாசஸோதி விச்சா²யங் ஸோ, வாசாய வாசாயாதி அத்தோ².
246.Ekāyāṇattiyā ekāti sace sakiṃ āṇatto divasampi khaṇati, āṇāpakassa ekā eva āpattīti attho. Vācaso āpattīti sambandho. Vācasoti vicchāyaṃ so, vācāya vācāyāti attho.
247. ‘‘இமங் டா²னங் க²ண வா’’திஆதி³னா யோஜேதப்³ப³ங். ‘‘எத்த² அக்³கி³ங் ஜாலேஹி வா’’தி யோஜனா . ‘‘வத்து’’ந்தி இத³ங் ‘‘ந வட்டதீ’’தி இமஸ்ஸ கத்துபத³வசனந்தி அத்தோ². அத² வா ‘‘இமங் டா²னங் க²ணா’’திஆதி³ப்பகாரோ வசனாய ந வட்டதீதி அத்தோ². நியமெத்வாதி இமினா ‘‘ஆவாடங் க²ண, கந்த³ங் க²ணா’’திஆதி³னா அனியமெத்வா வத்துங் வட்டதீதி தீ³பேதி.
247. ‘‘Imaṃ ṭhānaṃ khaṇa vā’’tiādinā yojetabbaṃ. ‘‘Ettha aggiṃ jālehi vā’’ti yojanā . ‘‘Vattu’’nti idaṃ ‘‘na vaṭṭatī’’ti imassa kattupadavacananti attho. Atha vā ‘‘imaṃ ṭhānaṃ khaṇā’’tiādippakāro vacanāya na vaṭṭatīti attho. Niyametvāti iminā ‘‘āvāṭaṃ khaṇa, kandaṃ khaṇā’’tiādinā aniyametvā vattuṃ vaṭṭatīti dīpeti.
248. ‘‘இமஸ்ஸ த²ம்ப⁴ஸ்ஸ ஆவாடங் ஜான வா, கப்பியங் கரோஹி வா’’தி ச ‘‘மத்திகங் ஜான வா, மத்திகங் ஆஹர வா, மத்திகங் கப்பியங் கரோஹி வா’’தி ச ஏதி³ஸங் வசனங் வட்டதீதி ஸம்ப³ந்தோ⁴. ஏதங் விய தி³ஸ்ஸதீதி ஏதி³ஸங், கிங் தங்? ‘‘மத்திகங் தே³ஹீ’’திஆதி³கங் உபமெய்யங். ‘‘மத்திகங் ஜானா’’திஆதி³கங் பன உபமானங், தேஸங் உபமானோபமெய்யானங் யா கப்பியஸங்கா²தா ஸமானத⁴ம்மதா, ஸா உபமா. ததா² ச வுத்தங் அம்ஹேஹி ஸுபோ³தா⁴லங்காரே ‘‘உபமானோபமெய்யானங், ஸத⁴ம்மத்தங் ஸியோபமா’’தி. அஞ்ஞதா² உபமானபூ⁴தஅக்க²ராவளிஸதி³ஸீயேவ, அக்க²ராவளி உபமெய்யங் ஸியா. வாக்யே விய-ஸத்³தோ³யேவ பன உபமானங் ஜோதேதீதி வேதி³தப்³ப³ங்.
248. ‘‘Imassa thambhassa āvāṭaṃ jāna vā, kappiyaṃ karohi vā’’ti ca ‘‘mattikaṃ jāna vā, mattikaṃ āhara vā, mattikaṃ kappiyaṃ karohi vā’’ti ca edisaṃ vacanaṃ vaṭṭatīti sambandho. Etaṃ viya dissatīti edisaṃ, kiṃ taṃ? ‘‘Mattikaṃ dehī’’tiādikaṃ upameyyaṃ. ‘‘Mattikaṃ jānā’’tiādikaṃ pana upamānaṃ, tesaṃ upamānopameyyānaṃ yā kappiyasaṅkhātā samānadhammatā, sā upamā. Tathā ca vuttaṃ amhehi subodhālaṅkāre ‘‘upamānopameyyānaṃ, sadhammattaṃ siyopamā’’ti. Aññathā upamānabhūtaakkharāvaḷisadisīyeva, akkharāvaḷi upameyyaṃ siyā. Vākye viya-saddoyeva pana upamānaṃ jotetīti veditabbaṃ.
249. பத²வியா அஸம்ப³த்³த⁴ங் ஸுக்க²கத்³த³மஆதி³கஞ்ச தனுகங் உஸ்ஸிஞ்சனீயகத்³த³மஞ்ச கோபேதுங் லப்³ப⁴ந்தி ஸம்ப³ந்தோ⁴. கத்³த³மஆதி³கந்தி எத்த² ஆதி³-ஸத்³தே³ன உத³கேன க³தட்டா²னே உத³கபப்படகோ நாம ஹோதி, யங் வாதப்பஹாரேன சலதி, தங் ஸங்க³ண்ஹாதி. உஸ்ஸிஞ்சனீயகத்³த³மந்தி க⁴டேஹி உஸ்ஸிஞ்சிதுங் ஸக்குணெய்யகத்³த³மங்.
249. Pathaviyā asambaddhaṃ sukkhakaddamaādikañca tanukaṃ ussiñcanīyakaddamañca kopetuṃ labbhanti sambandho. Kaddamaādikanti ettha ādi-saddena udakena gataṭṭhāne udakapappaṭako nāma hoti, yaṃ vātappahārena calati, taṃ saṅgaṇhāti. Ussiñcanīyakaddamanti ghaṭehi ussiñcituṃ sakkuṇeyyakaddamaṃ.
250. ‘‘சாதுமாஸாதி⁴கோவட்ட²ங் க³ண்டு³ப்பாத³’’ந்திஆதி³னா ஸம்ப³ந்தி⁴தப்³ப³ங். க³ண்ட³ங் பத²வியா க³ண்ட³ஸதி³ஸங் மத்திகராஸிங் உப்பாதெ³ந்தீதி க³ண்டு³ப்பாதா³. இத⁴ பன தேஹி உட்டா²பிதோ கூ³தோ² ‘‘க³ண்டு³ப்பாத³’’ந்தி நித்³தி³ட்டோ². பொத்த²கேஸு பன ‘‘க³ண்டு³ப்பாதோ³’’தி பாடோ² தி³ஸ்ஸதி. தங் ‘‘ந கோபயே’’தி எத்த² கம்மேன ப⁴விதப்³ப³ந்தி ந யுஜ்ஜதி. மூஸிகுக்கிரந்தி மூஸிகானங் உக்கிரோ க²ணித்வா ப³ஹி கதங் பங்ஸுராஸி மூஸிகுக்கிரோதி. லெட்³டா³தி³ந்தி எத்த² லெட்³டு³ந்தி கஸிதட்டா²னே நங்க³லச்சி²ன்னமத்திகாபிண்ட³ங். ஆதி³-ஸத்³தே³ன கா³வீனங் கு²ரச்சி²ன்னங் கத்³த³மங் ஸங்க³ண்ஹாதி.
250. ‘‘Cātumāsādhikovaṭṭhaṃ gaṇḍuppāda’’ntiādinā sambandhitabbaṃ. Gaṇḍaṃ pathaviyā gaṇḍasadisaṃ mattikarāsiṃ uppādentīti gaṇḍuppādā. Idha pana tehi uṭṭhāpito gūtho ‘‘gaṇḍuppāda’’nti niddiṭṭho. Potthakesu pana ‘‘gaṇḍuppādo’’ti pāṭho dissati. Taṃ ‘‘na kopaye’’ti ettha kammena bhavitabbanti na yujjati. Mūsikukkiranti mūsikānaṃ ukkiro khaṇitvā bahi kataṃ paṃsurāsi mūsikukkiroti. Leḍḍādinti ettha leḍḍunti kasitaṭṭhāne naṅgalacchinnamattikāpiṇḍaṃ. Ādi-saddena gāvīnaṃ khuracchinnaṃ kaddamaṃ saṅgaṇhāti.
251-2. உத³கஸந்திகே பதிதே வாபிஆதீ³னங் கூலே ச பாஸாணே லக்³கே³ ரஜே ச நவஸொண்டி³யா பதிதே ரஜே ச அப்³போ⁴காஸுட்டி²தே வம்மிகே ச மத்திகாகுட்டே ச ததா²தி ஸம்ப³ந்தோ⁴. ததா²தி இமினா கூலாதி³கே சாதுமாஸாதி⁴கோவட்ட²ங் வா ஸப்³ப³ங் ந கோபயேதி இத³ங் அதிதி³ஸதி. இட்ட²ககுட்டகோ வட்டதீதி ஆஹ ‘‘யேபு⁴ய்யா’’திஆதி³. யேபு⁴ய்யேன கத²லா எத்தா²தி யேபு⁴ய்யகத²லா, பூ⁴மி , திட்ட²தி எத்தா²தி டா²னங் , யேபு⁴ய்யகத²லாய டா²னங், தஸ்மிங். இட்ட²ககுட்டகோ யேபு⁴ய்யகத²லா விய ஹோதீதி அதி⁴ப்பாயோ. குட்டகங் கோபெந்தஸ்ஸ அனாபத்தீதி அதி⁴ப்பாயோ. இட்ட²காய கதோ குட்டகோதி ஸமாஸோ.
251-2. Udakasantike patite vāpiādīnaṃ kūle ca pāsāṇe lagge raje ca navasoṇḍiyā patite raje ca abbhokāsuṭṭhite vammike ca mattikākuṭṭe ca tathāti sambandho. Tathāti iminā kūlādike cātumāsādhikovaṭṭhaṃ vā sabbaṃ na kopayeti idaṃ atidisati. Iṭṭhakakuṭṭako vaṭṭatīti āha ‘‘yebhuyyā’’tiādi. Yebhuyyena kathalā etthāti yebhuyyakathalā, bhūmi , tiṭṭhati etthāti ṭhānaṃ, yebhuyyakathalāya ṭhānaṃ, tasmiṃ. Iṭṭhakakuṭṭako yebhuyyakathalā viya hotīti adhippāyo. Kuṭṭakaṃ kopentassa anāpattīti adhippāyo. Iṭṭhakāya kato kuṭṭakoti samāso.
253-5. ஸஞ்சாலெத்வா பூ⁴மிங் விகோபயங் த²ம்பா⁴தி³ங் க³ண்ஹிதுங் வாதி ஸம்ப³ந்தோ⁴. தத்த² விகோபயந்தி கரணத்தே² பச்சத்தவசனங், விகோபயதாதி அத்தோ². அஞ்ஞதா² கத²மெத்த² பட²மாபஸங்கோ³. பட²மா ஹி ‘‘ப⁴வ’’ந்தி வுத்தே ஸியா, ந ச ‘‘க³ண்ஹிது’’ந்திஆதீ³ஸு துங்-பச்சயேஹி வுத்தோ கோசி அத்தி², யதா³ பா⁴வே துங்-பச்சயோ, ததா³ ந கிஞ்சி வுத்தங் ஹோதீதி, ‘‘ந கப்பதீ’’தி பதா⁴னகிரியாயபி ஹெட்டா² வுத்தனயேன கத்தா அஞ்ஞோயேவாதி ஏவங் ஸப்³ப³த்த². ததியத்தே² து ஸதி இதோ சிதோ ஸஞ்சாலெத்வா பூ⁴மிங் விகோபயதா த²ம்பா⁴தி³ங் க³ண்ஹிதுங் ந கப்பதீதி அதீவ யுஜ்ஜதி. தா⁴ராயாதி பஸ்ஸாவதா⁴ராய. விஸமங் ஸமங் காதுங் ஸம்முஞ்ஜனீஹி க⁴ங்ஸிதுங் வாதி யோஜனா. விஸமந்தி விஸமட்டா²னங். ‘‘பத³ங் த³ஸ்ஸெஸ்ஸாமீ’’தி பூ⁴மிங் பி⁴ந்த³ந்தோ சங்கமிதுங் வாதி ஸம்ப³ந்தோ⁴. பி⁴ந்த³ந்தோதி பி⁴ந்த³தா. கண்டு³ரோகீ³ வா தடாதீ³ஸு அங்க³பச்சங்க³ங் க⁴ங்ஸிதுந்தி யோஜனா. கண்டு³ரோகீ³தி கண்டு³ரோகி³னா. ச-ஸத்³தோ³ அவதா⁴ரணே.
253-5. Sañcāletvā bhūmiṃ vikopayaṃ thambhādiṃ gaṇhituṃ vāti sambandho. Tattha vikopayanti karaṇatthe paccattavacanaṃ, vikopayatāti attho. Aññathā kathamettha paṭhamāpasaṅgo. Paṭhamā hi ‘‘bhava’’nti vutte siyā, na ca ‘‘gaṇhitu’’ntiādīsu tuṃ-paccayehi vutto koci atthi, yadā bhāve tuṃ-paccayo, tadā na kiñci vuttaṃ hotīti, ‘‘na kappatī’’ti padhānakiriyāyapi heṭṭhā vuttanayena kattā aññoyevāti evaṃ sabbattha. Tatiyatthe tu sati ito cito sañcāletvā bhūmiṃ vikopayatā thambhādiṃ gaṇhituṃ na kappatīti atīva yujjati. Dhārāyāti passāvadhārāya. Visamaṃ samaṃ kātuṃ sammuñjanīhi ghaṃsituṃ vāti yojanā. Visamanti visamaṭṭhānaṃ. ‘‘Padaṃ dassessāmī’’ti bhūmiṃ bhindanto caṅkamituṃ vāti sambandho. Bhindantoti bhindatā. Kaṇḍurogī vā taṭādīsu aṅgapaccaṅgaṃ ghaṃsitunti yojanā. Kaṇḍurogīti kaṇḍuroginā. Ca-saddo avadhāraṇe.
256-7. ஸுத்³த⁴சித்தஸ்ஸாதி பத²விபே⁴தா³தி⁴ப்பாயவிரஹேன பரிஸுத்³த⁴சித்தஸ்ஸ.
256-7.Suddhacittassāti pathavibhedādhippāyavirahena parisuddhacittassa.
258. அக்³கி³ஸ்ஸ அனுபாதா³னே கபாலே வா அனுபாதா³னாய இட்ட²காய வா அக்³கி³ங் பாதேதுங் வா அவஸே ஸதி பூ⁴மியங் பாதேதுங் வா லப்³ப⁴தேதி ஸம்ப³ந்தோ⁴. உபாதா³னங் இந்த⁴னங், ந உபாதா³னங் அனுபாதா³னங், தஸ்மிங். வஸோ பபு⁴த்தங். ‘‘வஸோ பபு⁴த்தே ஆயத்தே’’தி ஹி நிக⁴ண்டு³. ந வஸோ அவஸோ, தஸ்மிங் அபபு⁴த்தேதி அத்தோ². பதிதட்டா²னேயேவ உபாதா³னங் த³த்வா அக்³கி³ங் காதுங் வட்டதி. ஸுக்க²கா²ணுகஸுக்க²ருக்கா²தீ³ஸு ச அக்³கி³ங் தா³துங் ந வட்டதி. ஸசே பன ‘‘பத²விங் அப்பத்தமேவ நிப்³பா³பெத்வா க³மிஸ்ஸாமீ’’தி தே³தி, வட்டதி, பச்சா² நிப்³பா³பேதுங் ந ஸக்கோதி, அவிஸயத்தா அனாபத்தி. ‘‘பூ⁴மியங் பாதேஹீ’’தி ஏவம்பி வத்துங் ந வட்டதீதி.
258. Aggissa anupādāne kapāle vā anupādānāya iṭṭhakāya vā aggiṃ pātetuṃ vā avase sati bhūmiyaṃ pātetuṃ vā labbhateti sambandho. Upādānaṃ indhanaṃ, na upādānaṃ anupādānaṃ, tasmiṃ. Vaso pabhuttaṃ. ‘‘Vaso pabhutte āyatte’’ti hi nighaṇḍu. Na vaso avaso, tasmiṃ apabhutteti attho. Patitaṭṭhāneyeva upādānaṃ datvā aggiṃ kātuṃ vaṭṭati. Sukkhakhāṇukasukkharukkhādīsu ca aggiṃ dātuṃ na vaṭṭati. Sace pana ‘‘pathaviṃ appattameva nibbāpetvā gamissāmī’’ti deti, vaṭṭati, pacchā nibbāpetuṃ na sakkoti, avisayattā anāpatti. ‘‘Bhūmiyaṃ pātehī’’ti evampi vattuṃ na vaṭṭatīti.
பத²வீனித்³தே³ஸவண்ணனா நிட்டி²தா.
Pathavīniddesavaṇṇanā niṭṭhitā.
