| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. பத²வீஸுத்தங்
2. Pathavīsuttaṃ
125. ஸாவத்தி²யங் விஹரதி…பே॰… ‘‘அனமதக்³கோ³யங், பி⁴க்க²வே , ஸங்ஸாரோ. புப்³பா³ கோடி ந பஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங். ஸெய்யதா²பி, பி⁴க்க²வே, புரிஸோ இமங் மஹாபத²விங் கோலட்டி²மத்தங் கோலட்டி²மத்தங் மத்திகாகு³ளிகங் கரித்வா நிக்கி²பெய்ய – ‘அயங் மே பிதா, தஸ்ஸ மே பிது அயங் பிதா’தி, அபரியாதி³ன்னாவ பி⁴க்க²வே, தஸ்ஸ புரிஸஸ்ஸ பிதுபிதரோ அஸ்ஸு, அதா²யங் மஹாபத²வீ பரிக்க²யங் பரியாதா³னங் க³ச்செ²ய்ய . தங் கிஸ்ஸ ஹேது? அனமதக்³கோ³யங், பி⁴க்க²வே, ஸங்ஸாரோ. புப்³பா³ கோடி ந பஞ்ஞாயதி அவிஜ்ஜானீவரணானங் ஸத்தானங் தண்ஹாஸங்யோஜனானங் ஸந்தா⁴வதங் ஸங்ஸரதங். ஏவங் தீ³க⁴ரத்தங் வோ, பி⁴க்க²வே, து³க்க²ங் பச்சனுபூ⁴தங் திப்³ப³ங் பச்சனுபூ⁴தங் ப்³யஸனங் பச்சனுபூ⁴தங், கடஸீ வட்³டி⁴தா. யாவஞ்சித³ங், பி⁴க்க²வே, அலமேவ ஸப்³ப³ஸங்கா²ரேஸு நிப்³பி³ந்தி³துங், அலங் விரஜ்ஜிதுங், அலங் விமுச்சிது’’ந்தி. து³தியங்.
125. Sāvatthiyaṃ viharati…pe… ‘‘anamataggoyaṃ, bhikkhave , saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Seyyathāpi, bhikkhave, puriso imaṃ mahāpathaviṃ kolaṭṭhimattaṃ kolaṭṭhimattaṃ mattikāguḷikaṃ karitvā nikkhipeyya – ‘ayaṃ me pitā, tassa me pitu ayaṃ pitā’ti, apariyādinnāva bhikkhave, tassa purisassa pitupitaro assu, athāyaṃ mahāpathavī parikkhayaṃ pariyādānaṃ gaccheyya . Taṃ kissa hetu? Anamataggoyaṃ, bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Evaṃ dīgharattaṃ vo, bhikkhave, dukkhaṃ paccanubhūtaṃ tibbaṃ paccanubhūtaṃ byasanaṃ paccanubhūtaṃ, kaṭasī vaḍḍhitā. Yāvañcidaṃ, bhikkhave, alameva sabbasaṅkhāresu nibbindituṃ, alaṃ virajjituṃ, alaṃ vimuccitu’’nti. Dutiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. பத²வீஸுத்தவண்ணனா • 2. Pathavīsuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. பத²வீஸுத்தவண்ணனா • 2. Pathavīsuttavaṇṇanā
