| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. པཐཝཱིསུཏྟཾ
2. Pathavīsuttaṃ
༡༢༥. སཱཝཏྠིཡཾ ཝིཧརཏི…པེ॰… ‘‘ཨནམཏགྒོཡཾ, བྷིཀྑཝེ , སཾསཱརོ། པུབྦཱ ཀོཊི ན པཉྙཱཡཏི ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏཾ། སེཡྻཐཱཔི, བྷིཀྑཝེ, པུརིསོ ཨིམཾ མཧཱཔཐཝིཾ ཀོལཊྛིམཏྟཾ ཀོལཊྛིམཏྟཾ མཏྟིཀཱགུལི༹ཀཾ ཀརིཏྭཱ ནིཀྑིཔེཡྻ – ‘ཨཡཾ མེ པིཏཱ, ཏསྶ མེ པིཏུ ཨཡཾ པིཏཱ’ཏི, ཨཔརིཡཱདིནྣཱཝ བྷིཀྑཝེ, ཏསྶ པུརིསསྶ པིཏུཔིཏརོ ཨསྶུ, ཨཐཱཡཾ མཧཱཔཐཝཱི པརིཀྑཡཾ པརིཡཱདཱནཾ གཙྪེཡྻ ། ཏཾ ཀིསྶ ཧེཏུ? ཨནམཏགྒོཡཾ, བྷིཀྑཝེ, སཾསཱརོ། པུབྦཱ ཀོཊི ན པཉྙཱཡཏི ཨཝིཛྫཱནཱིཝརཎཱནཾ སཏྟཱནཾ ཏཎྷཱསཾཡོཛནཱནཾ སནྡྷཱཝཏཾ སཾསརཏཾ། ཨེཝཾ དཱིགྷརཏྟཾ ཝོ, བྷིཀྑཝེ, དུཀྑཾ པཙྩནུབྷཱུཏཾ ཏིབྦཾ པཙྩནུབྷཱུཏཾ བྱསནཾ པཙྩནུབྷཱུཏཾ, ཀཊསཱི ཝཌྜྷིཏཱ། ཡཱཝཉྩིདཾ, བྷིཀྑཝེ, ཨལམེཝ སབྦསངྑཱརེསུ ནིབྦིནྡིཏུཾ, ཨལཾ ཝིརཛྫིཏུཾ, ཨལཾ ཝིམུཙྩིཏུ’’ནྟི། དུཏིཡཾ།
125. Sāvatthiyaṃ viharati…pe… ‘‘anamataggoyaṃ, bhikkhave , saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Seyyathāpi, bhikkhave, puriso imaṃ mahāpathaviṃ kolaṭṭhimattaṃ kolaṭṭhimattaṃ mattikāguḷikaṃ karitvā nikkhipeyya – ‘ayaṃ me pitā, tassa me pitu ayaṃ pitā’ti, apariyādinnāva bhikkhave, tassa purisassa pitupitaro assu, athāyaṃ mahāpathavī parikkhayaṃ pariyādānaṃ gaccheyya . Taṃ kissa hetu? Anamataggoyaṃ, bhikkhave, saṃsāro. Pubbā koṭi na paññāyati avijjānīvaraṇānaṃ sattānaṃ taṇhāsaṃyojanānaṃ sandhāvataṃ saṃsarataṃ. Evaṃ dīgharattaṃ vo, bhikkhave, dukkhaṃ paccanubhūtaṃ tibbaṃ paccanubhūtaṃ byasanaṃ paccanubhūtaṃ, kaṭasī vaḍḍhitā. Yāvañcidaṃ, bhikkhave, alameva sabbasaṅkhāresu nibbindituṃ, alaṃ virajjituṃ, alaṃ vimuccitu’’nti. Dutiyaṃ.
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. པཐཝཱིསུཏྟཝཎྞནཱ • 2. Pathavīsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢. པཐཝཱིསུཏྟཝཎྞནཱ • 2. Pathavīsuttavaṇṇanā
