Library / Tipiṭaka / திபிடக • Tipiṭaka / தீ³க⁴னிகாய • Dīghanikāya

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ

Namo tassa bhagavato arahato sammāsambuddhassa

தீ³க⁴னிகாயோ

Dīghanikāyo

பாதி²கவக்³க³பாளி

Pāthikavaggapāḷi

1. பாதி²கஸுத்தங்

1. Pāthikasuttaṃ

ஸுனக்க²த்தவத்து²

Sunakkhattavatthu

1. ஏவங் மே ஸுதங் – ஏகங் ஸமயங் ப⁴க³வா மல்லேஸு விஹரதி அனுபியங் நாம ¹ மல்லானங் நிக³மோ. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய அனுபியங் பிண்டா³ய பாவிஸி. அத² கோ² ப⁴க³வதோ ஏதத³ஹோஸி – ‘‘அதிப்பகோ³ கோ² தாவ அனுபியாயங் ² பிண்டா³ய சரிதுங். யங்னூனாஹங் யேன ப⁴க்³க³வகொ³த்தஸ்ஸ பரிப்³பா³ஜகஸ்ஸ ஆராமோ, யேன ப⁴க்³க³வகொ³த்தோ பரிப்³பா³ஜகோ தேனுபஸங்கமெய்ய’’ந்தி.

1. Evaṃ me sutaṃ – ekaṃ samayaṃ bhagavā mallesu viharati anupiyaṃ nāma ³ mallānaṃ nigamo. Atha kho bhagavā pubbaṇhasamayaṃ nivāsetvā pattacīvaramādāya anupiyaṃ piṇḍāya pāvisi. Atha kho bhagavato etadahosi – ‘‘atippago kho tāva anupiyāyaṃ ⁴ piṇḍāya carituṃ. Yaṃnūnāhaṃ yena bhaggavagottassa paribbājakassa ārāmo, yena bhaggavagotto paribbājako tenupasaṅkameyya’’nti.

2. அத² கோ² ப⁴க³வா யேன ப⁴க்³க³வகொ³த்தஸ்ஸ பரிப்³பா³ஜகஸ்ஸ ஆராமோ, யேன ப⁴க்³க³வகொ³த்தோ பரிப்³பா³ஜகோ தேனுபஸங்கமி. அத² கோ² ப⁴க்³க³வகொ³த்தோ பரிப்³பா³ஜகோ ப⁴க³வந்தங் ஏதத³வோச – ‘‘ஏது கோ², ப⁴ந்தே, ப⁴க³வா. ஸ்வாக³தங், ப⁴ந்தே, ப⁴க³வதோ. சிரஸ்ஸங் கோ², ப⁴ந்தே, ப⁴க³வா இமங் பரியாயமகாஸி யதி³த³ங் இதா⁴க³மனாய. நிஸீத³து, ப⁴ந்தே, ப⁴க³வா, இத³மாஸனங் பஞ்ஞத்த’’ந்தி. நிஸீதி³ ப⁴க³வா பஞ்ஞத்தே ஆஸனே. ப⁴க்³க³வகொ³த்தோபி கோ² பரிப்³பா³ஜகோ அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³. ஏகமந்தங் நிஸின்னோ கோ² ப⁴க்³க³வகொ³த்தோ பரிப்³பா³ஜகோ ப⁴க³வந்தங் ஏதத³வோச – ‘‘புரிமானி, ப⁴ந்தே, தி³வஸானி புரிமதரானி ஸுனக்க²த்தோ லிச்ச²விபுத்தோ யேனாஹங் தேனுபஸங்கமி; உபஸங்கமித்வா மங் ஏதத³வோச – ‘பச்சக்கா²தோ தா³னி மயா, ப⁴க்³க³வ, ப⁴க³வா. ந தா³னாஹங் ப⁴க³வந்தங் உத்³தி³ஸ்ஸ விஹராமீ’தி. கச்சேதங், ப⁴ந்தே, ததே²வ, யதா² ஸுனக்க²த்தோ லிச்ச²விபுத்தோ அவசா’’தி? ‘‘ததே²வ கோ² ஏதங், ப⁴க்³க³வ, யதா² ஸுனக்க²த்தோ லிச்ச²விபுத்தோ அவச’’.

2. Atha kho bhagavā yena bhaggavagottassa paribbājakassa ārāmo, yena bhaggavagotto paribbājako tenupasaṅkami. Atha kho bhaggavagotto paribbājako bhagavantaṃ etadavoca – ‘‘etu kho, bhante, bhagavā. Svāgataṃ, bhante, bhagavato. Cirassaṃ kho, bhante, bhagavā imaṃ pariyāyamakāsi yadidaṃ idhāgamanāya. Nisīdatu, bhante, bhagavā, idamāsanaṃ paññatta’’nti. Nisīdi bhagavā paññatte āsane. Bhaggavagottopi kho paribbājako aññataraṃ nīcaṃ āsanaṃ gahetvā ekamantaṃ nisīdi. Ekamantaṃ nisinno kho bhaggavagotto paribbājako bhagavantaṃ etadavoca – ‘‘purimāni, bhante, divasāni purimatarāni sunakkhatto licchaviputto yenāhaṃ tenupasaṅkami; upasaṅkamitvā maṃ etadavoca – ‘paccakkhāto dāni mayā, bhaggava, bhagavā. Na dānāhaṃ bhagavantaṃ uddissa viharāmī’ti. Kaccetaṃ, bhante, tatheva, yathā sunakkhatto licchaviputto avacā’’ti? ‘‘Tatheva kho etaṃ, bhaggava, yathā sunakkhatto licchaviputto avaca’’.

3. புரிமானி, ப⁴க்³க³வ, தி³வஸானி புரிமதரானி ஸுனக்க²த்தோ லிச்ச²விபுத்தோ யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ², ப⁴க்³க³வ, ஸுனக்க²த்தோ லிச்ச²விபுத்தோ மங் ஏதத³வோச – ‘பச்சக்கா²மி தா³னாஹங், ப⁴ந்தே, ப⁴க³வந்தங். ந தா³னாஹங், ப⁴ந்தே, ப⁴க³வந்தங் உத்³தி³ஸ்ஸ விஹரிஸ்ஸாமீ’தி. ‘ஏவங் வுத்தே, அஹங், ப⁴க்³க³வ, ஸுனக்க²த்தங் லிச்ச²விபுத்தங் ஏதத³வோசங் – ‘அபி நு தாஹங், ஸுனக்க²த்த, ஏவங் அவசங், ஏஹி த்வங், ஸுனக்க²த்த, மமங் உத்³தி³ஸ்ஸ விஹராஹீ’தி? ‘நோ ஹேதங், ப⁴ந்தே’. ‘த்வங் வா பன மங் ஏவங் அவச – அஹங், ப⁴ந்தே, ப⁴க³வந்தங் உத்³தி³ஸ்ஸ விஹரிஸ்ஸாமீ’தி? ‘நோ ஹேதங், ப⁴ந்தே’. ‘இதி கிர, ஸுனக்க²த்த, நேவாஹங் தங் வதா³மி – ஏஹி த்வங், ஸுனக்க²த்த, மமங் உத்³தி³ஸ்ஸ விஹராஹீதி. நபி கிர மங் த்வங் வதே³ஸி – அஹங், ப⁴ந்தே, ப⁴க³வந்தங் உத்³தி³ஸ்ஸ விஹரிஸ்ஸாமீதி. ஏவங் ஸந்தே, மோக⁴புரிஸ, கோ ஸந்தோ கங் பச்சாசிக்க²ஸி? பஸ்ஸ, மோக⁴புரிஸ, யாவஞ்ச ⁵ தே இத³ங் அபரத்³த⁴’ந்தி.

3. Purimāni, bhaggava, divasāni purimatarāni sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinno kho, bhaggava, sunakkhatto licchaviputto maṃ etadavoca – ‘paccakkhāmi dānāhaṃ, bhante, bhagavantaṃ. Na dānāhaṃ, bhante, bhagavantaṃ uddissa viharissāmī’ti. ‘Evaṃ vutte, ahaṃ, bhaggava, sunakkhattaṃ licchaviputtaṃ etadavocaṃ – ‘api nu tāhaṃ, sunakkhatta, evaṃ avacaṃ, ehi tvaṃ, sunakkhatta, mamaṃ uddissa viharāhī’ti? ‘No hetaṃ, bhante’. ‘Tvaṃ vā pana maṃ evaṃ avaca – ahaṃ, bhante, bhagavantaṃ uddissa viharissāmī’ti? ‘No hetaṃ, bhante’. ‘Iti kira, sunakkhatta, nevāhaṃ taṃ vadāmi – ehi tvaṃ, sunakkhatta, mamaṃ uddissa viharāhīti. Napi kira maṃ tvaṃ vadesi – ahaṃ, bhante, bhagavantaṃ uddissa viharissāmīti. Evaṃ sante, moghapurisa, ko santo kaṃ paccācikkhasi? Passa, moghapurisa, yāvañca ⁶ te idaṃ aparaddha’nti.

4. ‘ந ஹி பன மே, ப⁴ந்தே, ப⁴க³வா உத்தரிமனுஸ்ஸத⁴ம்மா இத்³தி⁴பாடிஹாரியங் கரோதீ’தி. ‘அபி நு தாஹங், ஸுனக்க²த்த, ஏவங் அவசங் – ஏஹி த்வங், ஸுனக்க²த்த, மமங் உத்³தி³ஸ்ஸ விஹராஹி, அஹங் தே உத்தரிமனுஸ்ஸத⁴ம்மா இத்³தி⁴பாடிஹாரியங் கரிஸ்ஸாமீ’தி? ‘நோ ஹேதங், ப⁴ந்தே’. ‘த்வங் வா பன மங் ஏவங் அவச – அஹங், ப⁴ந்தே, ப⁴க³வந்தங் உத்³தி³ஸ்ஸ விஹரிஸ்ஸாமி, ப⁴க³வா மே உத்தரிமனுஸ்ஸத⁴ம்மா இத்³தி⁴பாடிஹாரியங் கரிஸ்ஸதீ’தி? ‘நோ ஹேதங், ப⁴ந்தே’. ‘இதி கிர, ஸுனக்க²த்த, நேவாஹங் தங் வதா³மி – ஏஹி த்வங், ஸுனக்க²த்த, மமங் உத்³தி³ஸ்ஸ விஹராஹி, அஹங் தே உத்தரிமனுஸ்ஸத⁴ம்மா இத்³தி⁴பாடிஹாரியங் கரிஸ்ஸாமீ’தி; நபி கிர மங் த்வங் வதே³ஸி – அஹங், ப⁴ந்தே, ப⁴க³வந்தங் உத்³தி³ஸ்ஸ விஹரிஸ்ஸாமி, ப⁴க³வா மே உத்தரிமனுஸ்ஸத⁴ம்மா இத்³தி⁴பாடிஹாரியங் கரிஸ்ஸதீ’தி. ஏவங் ஸந்தே, மோக⁴புரிஸ , கோ ஸந்தோ கங் பச்சாசிக்க²ஸி? தங் கிங் மஞ்ஞஸி, ஸுனக்க²த்த, கதே வா உத்தரிமனுஸ்ஸத⁴ம்மா இத்³தி⁴பாடிஹாரியே அகதே வா உத்தரிமனுஸ்ஸத⁴ம்மா இத்³தி⁴பாடிஹாரியே யஸ்ஸத்தா²ய மயா த⁴ம்மோ தே³ஸிதோ ஸோ நிய்யாதி தக்கரஸ்ஸ ஸம்மா து³க்க²க்க²யாயா’தி? ‘கதே வா, ப⁴ந்தே, உத்தரிமனுஸ்ஸத⁴ம்மா இத்³தி⁴பாடிஹாரியே அகதே வா உத்தரிமனுஸ்ஸத⁴ம்மா இத்³தி⁴பாடிஹாரியே யஸ்ஸத்தா²ய ப⁴க³வதா த⁴ம்மோ தே³ஸிதோ ஸோ நிய்யாதி தக்கரஸ்ஸ ஸம்மா து³க்க²க்க²யாயா’தி. ‘இதி கிர, ஸுனக்க²த்த, கதே வா உத்தரிமனுஸ்ஸத⁴ம்மா இத்³தி⁴பாடிஹாரியே, அகதே வா உத்தரிமனுஸ்ஸத⁴ம்மா இத்³தி⁴பாடிஹாரியே, யஸ்ஸத்தா²ய மயா த⁴ம்மோ தே³ஸிதோ, ஸோ நிய்யாதி தக்கரஸ்ஸ ஸம்மா து³க்க²க்க²யாய. தத்ர, ஸுனக்க²த்த, கிங் உத்தரிமனுஸ்ஸத⁴ம்மா இத்³தி⁴பாடிஹாரியங் கதங் கரிஸ்ஸதி? பஸ்ஸ, மோக⁴புரிஸ, யாவஞ்ச தே இத³ங் அபரத்³த⁴’ந்தி.

4. ‘Na hi pana me, bhante, bhagavā uttarimanussadhammā iddhipāṭihāriyaṃ karotī’ti. ‘Api nu tāhaṃ, sunakkhatta, evaṃ avacaṃ – ehi tvaṃ, sunakkhatta, mamaṃ uddissa viharāhi, ahaṃ te uttarimanussadhammā iddhipāṭihāriyaṃ karissāmī’ti? ‘No hetaṃ, bhante’. ‘Tvaṃ vā pana maṃ evaṃ avaca – ahaṃ, bhante, bhagavantaṃ uddissa viharissāmi, bhagavā me uttarimanussadhammā iddhipāṭihāriyaṃ karissatī’ti? ‘No hetaṃ, bhante’. ‘Iti kira, sunakkhatta, nevāhaṃ taṃ vadāmi – ehi tvaṃ, sunakkhatta, mamaṃ uddissa viharāhi, ahaṃ te uttarimanussadhammā iddhipāṭihāriyaṃ karissāmī’ti; napi kira maṃ tvaṃ vadesi – ahaṃ, bhante, bhagavantaṃ uddissa viharissāmi, bhagavā me uttarimanussadhammā iddhipāṭihāriyaṃ karissatī’ti. Evaṃ sante, moghapurisa , ko santo kaṃ paccācikkhasi? Taṃ kiṃ maññasi, sunakkhatta, kate vā uttarimanussadhammā iddhipāṭihāriye akate vā uttarimanussadhammā iddhipāṭihāriye yassatthāya mayā dhammo desito so niyyāti takkarassa sammā dukkhakkhayāyā’ti? ‘Kate vā, bhante, uttarimanussadhammā iddhipāṭihāriye akate vā uttarimanussadhammā iddhipāṭihāriye yassatthāya bhagavatā dhammo desito so niyyāti takkarassa sammā dukkhakkhayāyā’ti. ‘Iti kira, sunakkhatta, kate vā uttarimanussadhammā iddhipāṭihāriye, akate vā uttarimanussadhammā iddhipāṭihāriye, yassatthāya mayā dhammo desito, so niyyāti takkarassa sammā dukkhakkhayāya. Tatra, sunakkhatta, kiṃ uttarimanussadhammā iddhipāṭihāriyaṃ kataṃ karissati? Passa, moghapurisa, yāvañca te idaṃ aparaddha’nti.

5. ‘ந ஹி பன மே, ப⁴ந்தே, ப⁴க³வா அக்³க³ஞ்ஞங் பஞ்ஞபேதீ’தி ⁷? ‘அபி நு தாஹங், ஸுனக்க²த்த, ஏவங் அவசங் – ஏஹி த்வங், ஸுனக்க²த்த, மமங் உத்³தி³ஸ்ஸ விஹராஹி, அஹங் தே அக்³க³ஞ்ஞங் பஞ்ஞபெஸ்ஸாமீ’தி? ‘நோ ஹேதங், ப⁴ந்தே’. ‘த்வங் வா பன மங் ஏவங் அவச – அஹங், ப⁴ந்தே, ப⁴க³வந்தங் உத்³தி³ஸ்ஸ விஹரிஸ்ஸாமி, ப⁴க³வா மே அக்³க³ஞ்ஞங் பஞ்ஞபெஸ்ஸதீ’தி? ‘நோ ஹேதங், ப⁴ந்தே’. ‘இதி கிர, ஸுனக்க²த்த, நேவாஹங் தங் வதா³மி – ஏஹி த்வங், ஸுனக்க²த்த, மமங் உத்³தி³ஸ்ஸ விஹராஹி, அஹங் தே அக்³க³ஞ்ஞங் பஞ்ஞபெஸ்ஸாமீதி. நபி கிர மங் த்வங் வதே³ஸி – அஹங், ப⁴ந்தே, ப⁴க³வந்தங் உத்³தி³ஸ்ஸ விஹரிஸ்ஸாமி, ப⁴க³வா மே அக்³க³ஞ்ஞங் பஞ்ஞபெஸ்ஸதீ’தி. ஏவங் ஸந்தே, மோக⁴புரிஸ, கோ ஸந்தோ கங் பச்சாசிக்க²ஸி? தங் கிங் மஞ்ஞஸி, ஸுனக்க²த்த, பஞ்ஞத்தே வா அக்³க³ஞ்ஞே, அபஞ்ஞத்தே வா அக்³க³ஞ்ஞே, யஸ்ஸத்தா²ய மயா த⁴ம்மோ தே³ஸிதோ, ஸோ நிய்யாதி தக்கரஸ்ஸ ஸம்மா து³க்க²க்க²யாயா’தி? ‘பஞ்ஞத்தே வா, ப⁴ந்தே, அக்³க³ஞ்ஞே, அபஞ்ஞத்தே வா அக்³க³ஞ்ஞே, யஸ்ஸத்தா²ய ப⁴க³வதா த⁴ம்மோ தே³ஸிதோ, ஸோ நிய்யாதி தக்கரஸ்ஸ ஸம்மா து³க்க²க்க²யாயா’தி. ‘இதி கிர, ஸுனக்க²த்த, பஞ்ஞத்தே வா அக்³க³ஞ்ஞே, அபஞ்ஞத்தே வா அக்³க³ஞ்ஞே, யஸ்ஸத்தா²ய மயா த⁴ம்மோ தே³ஸிதோ, ஸோ நிய்யாதி தக்கரஸ்ஸ ஸம்மா து³க்க²க்க²யாய. தத்ர, ஸுனக்க²த்த, கிங் அக்³க³ஞ்ஞங் பஞ்ஞத்தங் கரிஸ்ஸதி? பஸ்ஸ, மோக⁴புரிஸ, யாவஞ்ச தே இத³ங் அபரத்³த⁴ங்’.

5. ‘Na hi pana me, bhante, bhagavā aggaññaṃ paññapetī’ti ⁸? ‘Api nu tāhaṃ, sunakkhatta, evaṃ avacaṃ – ehi tvaṃ, sunakkhatta, mamaṃ uddissa viharāhi, ahaṃ te aggaññaṃ paññapessāmī’ti? ‘No hetaṃ, bhante’. ‘Tvaṃ vā pana maṃ evaṃ avaca – ahaṃ, bhante, bhagavantaṃ uddissa viharissāmi, bhagavā me aggaññaṃ paññapessatī’ti? ‘No hetaṃ, bhante’. ‘Iti kira, sunakkhatta, nevāhaṃ taṃ vadāmi – ehi tvaṃ, sunakkhatta, mamaṃ uddissa viharāhi, ahaṃ te aggaññaṃ paññapessāmīti. Napi kira maṃ tvaṃ vadesi – ahaṃ, bhante, bhagavantaṃ uddissa viharissāmi, bhagavā me aggaññaṃ paññapessatī’ti. Evaṃ sante, moghapurisa, ko santo kaṃ paccācikkhasi? Taṃ kiṃ maññasi, sunakkhatta, paññatte vā aggaññe, apaññatte vā aggaññe, yassatthāya mayā dhammo desito, so niyyāti takkarassa sammā dukkhakkhayāyā’ti? ‘Paññatte vā, bhante, aggaññe, apaññatte vā aggaññe, yassatthāya bhagavatā dhammo desito, so niyyāti takkarassa sammā dukkhakkhayāyā’ti. ‘Iti kira, sunakkhatta, paññatte vā aggaññe, apaññatte vā aggaññe, yassatthāya mayā dhammo desito, so niyyāti takkarassa sammā dukkhakkhayāya. Tatra, sunakkhatta, kiṃ aggaññaṃ paññattaṃ karissati? Passa, moghapurisa, yāvañca te idaṃ aparaddhaṃ’.

6. ‘அனேகபரியாயேன கோ² தே, ஸுனக்க²த்த, மம வண்ணோ பா⁴ஸிதோ வஜ்ஜிகா³மே – இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. இதி கோ² தே, ஸுனக்க²த்த, அனேகபரியாயேன மம வண்ணோ பா⁴ஸிதோ வஜ்ஜிகா³மே.

6. ‘Anekapariyāyena kho te, sunakkhatta, mama vaṇṇo bhāsito vajjigāme – itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti. Iti kho te, sunakkhatta, anekapariyāyena mama vaṇṇo bhāsito vajjigāme.

‘அனேகபரியாயேன கோ² தே, ஸுனக்க²த்த, த⁴ம்மஸ்ஸ வண்ணோ பா⁴ஸிதோ வஜ்ஜிகா³மே – ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனெய்யிகோ பச்சத்தங் வேதி³தப்³போ³ விஞ்ஞூஹீதி. இதி கோ² தே, ஸுனக்க²த்த, அனேகபரியாயேன த⁴ம்மஸ்ஸ வண்ணோ பா⁴ஸிதோ வஜ்ஜிகா³மே.

‘Anekapariyāyena kho te, sunakkhatta, dhammassa vaṇṇo bhāsito vajjigāme – svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhīti. Iti kho te, sunakkhatta, anekapariyāyena dhammassa vaṇṇo bhāsito vajjigāme.

‘அனேகபரியாயேன கோ² தே, ஸுனக்க²த்த, ஸங்க⁴ஸ்ஸ வண்ணோ பா⁴ஸிதோ வஜ்ஜிகா³மே – ஸுப்படிபன்னோ ப⁴க³வதோ ஸாவகஸங்கோ⁴, உஜுப்படிபன்னோ ப⁴க³வதோ ஸாவகஸங்கோ⁴, ஞாயப்படிபன்னோ ப⁴க³வதோ ஸாவகஸங்கோ⁴, ஸாமீசிப்படிபன்னோ ப⁴க³வதோ ஸாவகஸங்கோ⁴, யதி³த³ங் சத்தாரி புரிஸயுகா³னி அட்ட² புரிஸபுக்³க³லா, ஏஸ ப⁴க³வதோ ஸாவகஸங்கோ⁴, ஆஹுனெய்யோ பாஹுனெய்யோ த³க்கி²ணெய்யோ அஞ்ஜலிகரணீயோ அனுத்தரங் புஞ்ஞக்கெ²த்தங் லோகஸ்ஸாதி. இதி கோ² தே, ஸுனக்க²த்த, அனேகபரியாயேன ஸங்க⁴ஸ்ஸ வண்ணோ பா⁴ஸிதோ வஜ்ஜிகா³மே.

‘Anekapariyāyena kho te, sunakkhatta, saṅghassa vaṇṇo bhāsito vajjigāme – suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṃ cattāri purisayugāni aṭṭha purisapuggalā, esa bhagavato sāvakasaṅgho, āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassāti. Iti kho te, sunakkhatta, anekapariyāyena saṅghassa vaṇṇo bhāsito vajjigāme.

‘ஆரோசயாமி கோ² தே, ஸுனக்க²த்த, படிவேத³யாமி கோ² தே, ஸுனக்க²த்த. ப⁴விஸ்ஸந்தி கோ² தே, ஸுனக்க²த்த, வத்தாரோ, நோ விஸஹி ஸுனக்க²த்தோ லிச்ச²விபுத்தோ ஸமணே கோ³தமே ப்³ரஹ்மசரியங் சரிதுங், ஸோ அவிஸஹந்தோ ஸிக்க²ங் பச்சக்கா²ய ஹீனாயாவத்தோதி. இதி கோ² தே, ஸுனக்க²த்த, ப⁴விஸ்ஸந்தி வத்தாரோ’தி.

‘Ārocayāmi kho te, sunakkhatta, paṭivedayāmi kho te, sunakkhatta. Bhavissanti kho te, sunakkhatta, vattāro, no visahi sunakkhatto licchaviputto samaṇe gotame brahmacariyaṃ carituṃ, so avisahanto sikkhaṃ paccakkhāya hīnāyāvattoti. Iti kho te, sunakkhatta, bhavissanti vattāro’ti.

ஏவங் பி கோ², ப⁴க்³க³வ, ஸுனக்க²த்தோ லிச்ச²விபுத்தோ மயா வுச்சமானோ அபக்கமேவ இமஸ்மா த⁴ம்மவினயா, யதா² தங் ஆபாயிகோ நேரயிகோ.

Evaṃ pi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṃ āpāyiko nerayiko.

கோரக்க²த்தியவத்து²

Korakkhattiyavatthu

7. ‘‘ஏகமிதா³ஹங், ப⁴க்³க³வ, ஸமயங் தூ²லூஸு ⁹ விஹராமி உத்தரகா நாம தூ²லூனங் நிக³மோ. அத² க்²வாஹங், ப⁴க்³க³வ, புப்³ப³ண்ஹஸமயங் நிவாஸெத்வா பத்தசீவரமாதா³ய ஸுனக்க²த்தேன லிச்ச²விபுத்தேன பச்சா²ஸமணேன உத்தரகங் பிண்டா³ய பாவிஸிங். தேன கோ² பன ஸமயேன அசேலோ கோரக்க²த்தியோ குக்குரவதிகோ சதுக்குண்டி³கோ ¹⁰ ச²மானிகிண்ணங் ப⁴க்க²ஸங் முகே²னேவ கா²த³தி, முகே²னேவ பு⁴ஞ்ஜதி. அத்³த³ஸா கோ², ப⁴க்³க³வ, ஸுனக்க²த்தோ லிச்ச²விபுத்தோ அசேலங் கோரக்க²த்தியங் குக்குரவதிகங் சதுக்குண்டி³கங் ச²மானிகிண்ணங் ப⁴க்க²ஸங் முகே²னேவ கா²த³ந்தங் முகே²னேவ பு⁴ஞ்ஜந்தங். தி³ஸ்வானஸ்ஸ ஏதத³ஹோஸி – ‘ஸாது⁴ரூபோ வத, போ⁴, அயங் ¹¹ ஸமணோ சதுக்குண்டி³கோ ச²மானிகிண்ணங் ப⁴க்க²ஸங் முகே²னேவ கா²த³தி, முகே²னேவ பு⁴ஞ்ஜதீ’தி.

7. ‘‘Ekamidāhaṃ, bhaggava, samayaṃ thūlūsu ¹² viharāmi uttarakā nāma thūlūnaṃ nigamo. Atha khvāhaṃ, bhaggava, pubbaṇhasamayaṃ nivāsetvā pattacīvaramādāya sunakkhattena licchaviputtena pacchāsamaṇena uttarakaṃ piṇḍāya pāvisiṃ. Tena kho pana samayena acelo korakkhattiyo kukkuravatiko catukkuṇḍiko ¹³ chamānikiṇṇaṃ bhakkhasaṃ mukheneva khādati, mukheneva bhuñjati. Addasā kho, bhaggava, sunakkhatto licchaviputto acelaṃ korakkhattiyaṃ kukkuravatikaṃ catukkuṇḍikaṃ chamānikiṇṇaṃ bhakkhasaṃ mukheneva khādantaṃ mukheneva bhuñjantaṃ. Disvānassa etadahosi – ‘sādhurūpo vata, bho, ayaṃ ¹⁴ samaṇo catukkuṇḍiko chamānikiṇṇaṃ bhakkhasaṃ mukheneva khādati, mukheneva bhuñjatī’ti.

‘‘அத² க்²வாஹங், ப⁴க்³க³வ, ஸுனக்க²த்தஸ்ஸ லிச்ச²விபுத்தஸ்ஸ சேதஸா சேதோபரிவிதக்கமஞ்ஞாய ஸுனக்க²த்தங் லிச்ச²விபுத்தங் ஏதத³வோசங் – ‘த்வம்பி நாம, மோக⁴புரிஸ, ஸமணோ ஸக்யபுத்தியோ ¹⁵ படிஜானிஸ்ஸஸீ’தி! ‘கிங் பன மங், ப⁴ந்தே, ப⁴க³வா ஏவமாஹ – ‘த்வம்பி நாம, மோக⁴புரிஸ, ஸமணோ ஸக்யபுத்தியோ ¹⁶ படிஜானிஸ்ஸஸீ’தி? ‘நனு தே, ஸுனக்க²த்த, இமங் அசேலங் கோரக்க²த்தியங் குக்குரவதிகங் சதுக்குண்டி³கங் ச²மானிகிண்ணங் ப⁴க்க²ஸங் முகே²னேவ கா²த³ந்தங் முகே²னேவ பு⁴ஞ்ஜந்தங் தி³ஸ்வான ஏதத³ஹோஸி – ஸாது⁴ரூபோ வத, போ⁴, அயங் ஸமணோ சதுக்குண்டி³கோ ச²மானிகிண்ணங் ப⁴க்க²ஸங் முகே²னேவ கா²த³தி, முகே²னேவ பு⁴ஞ்ஜதீ’தி? ‘ஏவங், ப⁴ந்தே. கிங் பன, ப⁴ந்தே, ப⁴க³வா அரஹத்தஸ்ஸ மச்ச²ராயதீ’தி? ‘ந கோ² அஹங், மோக⁴புரிஸ, அரஹத்தஸ்ஸ மச்ச²ராயாமி. அபி ச, துய்ஹேவேதங் பாபகங் தி³ட்டி²க³தங் உப்பன்னங், தங் பஜஹ. மா தே அஹோஸி தீ³க⁴ரத்தங் அஹிதாய து³க்கா²ய. யங் கோ² பனேதங், ஸுனக்க²த்த, மஞ்ஞஸி அசேலங் கோரக்க²த்தியங் – ஸாது⁴ரூபோ அயங் ஸமணோதி ¹⁷. ஸோ ஸத்தமங் தி³வஸங் அலஸகேன காலங்கரிஸ்ஸதி. காலங்கதோ ¹⁸ ச காலகஞ்சிகா ¹⁹ நாம அஸுரா ஸப்³ப³னிஹீனோ அஸுரகாயோ, தத்ர உபபஜ்ஜிஸ்ஸதி. காலங்கதஞ்ச நங் பீ³ரணத்த²ம்ப³கே ஸுஸானே ச²ட்³டெ³ஸ்ஸந்தி. ஆகங்க²மானோ ச த்வங், ஸுனக்க²த்த, அசேலங் கோரக்க²த்தியங் உபஸங்கமித்வா புச்செ²ய்யாஸி – ஜானாஸி, ஆவுஸோ கோரக்க²த்திய ²⁰, அத்தனோ க³திந்தி? டா²னங் கோ² பனேதங், ஸுனக்க²த்த, விஜ்ஜதி யங் தே அசேலோ கோரக்க²த்தியோ ப்³யாகரிஸ்ஸதி – ஜானாமி, ஆவுஸோ ஸுனக்க²த்த, அத்தனோ க³திங்; காலகஞ்சிகா நாம அஸுரா ஸப்³ப³னிஹீனோ அஸுரகாயோ, தத்ராம்ஹி உபபன்னோதி.

‘‘Atha khvāhaṃ, bhaggava, sunakkhattassa licchaviputtassa cetasā cetoparivitakkamaññāya sunakkhattaṃ licchaviputtaṃ etadavocaṃ – ‘tvampi nāma, moghapurisa, samaṇo sakyaputtiyo ²¹ paṭijānissasī’ti! ‘Kiṃ pana maṃ, bhante, bhagavā evamāha – ‘tvampi nāma, moghapurisa, samaṇo sakyaputtiyo ²² paṭijānissasī’ti? ‘Nanu te, sunakkhatta, imaṃ acelaṃ korakkhattiyaṃ kukkuravatikaṃ catukkuṇḍikaṃ chamānikiṇṇaṃ bhakkhasaṃ mukheneva khādantaṃ mukheneva bhuñjantaṃ disvāna etadahosi – sādhurūpo vata, bho, ayaṃ samaṇo catukkuṇḍiko chamānikiṇṇaṃ bhakkhasaṃ mukheneva khādati, mukheneva bhuñjatī’ti? ‘Evaṃ, bhante. Kiṃ pana, bhante, bhagavā arahattassa maccharāyatī’ti? ‘Na kho ahaṃ, moghapurisa, arahattassa maccharāyāmi. Api ca, tuyhevetaṃ pāpakaṃ diṭṭhigataṃ uppannaṃ, taṃ pajaha. Mā te ahosi dīgharattaṃ ahitāya dukkhāya. Yaṃ kho panetaṃ, sunakkhatta, maññasi acelaṃ korakkhattiyaṃ – sādhurūpo ayaṃ samaṇoti ²³. So sattamaṃ divasaṃ alasakena kālaṅkarissati. Kālaṅkato ²⁴ ca kālakañcikā ²⁵ nāma asurā sabbanihīno asurakāyo, tatra upapajjissati. Kālaṅkatañca naṃ bīraṇatthambake susāne chaḍḍessanti. Ākaṅkhamāno ca tvaṃ, sunakkhatta, acelaṃ korakkhattiyaṃ upasaṅkamitvā puccheyyāsi – jānāsi, āvuso korakkhattiya ²⁶, attano gatinti? Ṭhānaṃ kho panetaṃ, sunakkhatta, vijjati yaṃ te acelo korakkhattiyo byākarissati – jānāmi, āvuso sunakkhatta, attano gatiṃ; kālakañcikā nāma asurā sabbanihīno asurakāyo, tatrāmhi upapannoti.

‘‘அத² கோ², ப⁴க்³க³வ, ஸுனக்க²த்தோ லிச்ச²விபுத்தோ யேன அசேலோ கோரக்க²த்தியோ தேனுபஸங்கமி; உபஸங்கமித்வா அசேலங் கோரக்க²த்தியங் ஏதத³வோச – ‘ப்³யாகதோ கோ²ஸி, ஆவுஸோ கோரக்க²த்திய, ஸமணேன கோ³தமேன – அசேலோ கோரக்க²த்தியோ ஸத்தமங் தி³வஸங் அலஸகேன காலங்கரிஸ்ஸதி. காலங்கதோ ச காலகஞ்சிகா நாம அஸுரா ஸப்³ப³னிஹீனோ அஸுரகாயோ , தத்ர உபபஜ்ஜிஸ்ஸதி. காலங்கதஞ்ச நங் பீ³ரணத்த²ம்ப³கே ஸுஸானே ச²ட்³டெ³ஸ்ஸந்தீ’தி. யேன த்வங், ஆவுஸோ கோரக்க²த்திய, மத்தங் மத்தஞ்ச ப⁴த்தங் பு⁴ஞ்ஜெய்யாஸி, மத்தங் மத்தஞ்ச பானீயங் பிவெய்யாஸி. யதா² ஸமணஸ்ஸ கோ³தமஸ்ஸ மிச்சா² அஸ்ஸ வசன’ந்தி.

‘‘Atha kho, bhaggava, sunakkhatto licchaviputto yena acelo korakkhattiyo tenupasaṅkami; upasaṅkamitvā acelaṃ korakkhattiyaṃ etadavoca – ‘byākato khosi, āvuso korakkhattiya, samaṇena gotamena – acelo korakkhattiyo sattamaṃ divasaṃ alasakena kālaṅkarissati. Kālaṅkato ca kālakañcikā nāma asurā sabbanihīno asurakāyo , tatra upapajjissati. Kālaṅkatañca naṃ bīraṇatthambake susāne chaḍḍessantī’ti. Yena tvaṃ, āvuso korakkhattiya, mattaṃ mattañca bhattaṃ bhuñjeyyāsi, mattaṃ mattañca pānīyaṃ piveyyāsi. Yathā samaṇassa gotamassa micchā assa vacana’nti.

8. ‘‘அத² கோ², ப⁴க்³க³வ, ஸுனக்க²த்தோ லிச்ச²விபுத்தோ ஏகத்³வீஹிகாய ஸத்தரத்திந்தி³வானி க³ணேஸி, யதா² தங் ததா²க³தஸ்ஸ அஸத்³த³ஹமானோ. அத² கோ², ப⁴க்³க³வ, அசேலோ கோரக்க²த்தியோ ஸத்தமங் தி³வஸங் அலஸகேன காலமகாஸி. காலங்கதோ ச காலகஞ்சிகா நாம அஸுரா ஸப்³ப³னிஹீனோ அஸுரகாயோ, தத்ர உபபஜ்ஜி. காலங்கதஞ்ச நங் பீ³ரணத்த²ம்ப³கே ஸுஸானே ச²ட்³டே³ஸுங்.

8. ‘‘Atha kho, bhaggava, sunakkhatto licchaviputto ekadvīhikāya sattarattindivāni gaṇesi, yathā taṃ tathāgatassa asaddahamāno. Atha kho, bhaggava, acelo korakkhattiyo sattamaṃ divasaṃ alasakena kālamakāsi. Kālaṅkato ca kālakañcikā nāma asurā sabbanihīno asurakāyo, tatra upapajji. Kālaṅkatañca naṃ bīraṇatthambake susāne chaḍḍesuṃ.

9. ‘‘அஸ்ஸோஸி கோ², ப⁴க்³க³வ, ஸுனக்க²த்தோ லிச்ச²விபுத்தோ – ‘அசேலோ கிர கோரக்க²த்தியோ அலஸகேன காலங்கதோ பீ³ரணத்த²ம்ப³கே ஸுஸானே ச²ட்³டி³தோ’தி. அத² கோ², ப⁴க்³க³வ, ஸுனக்க²த்தோ லிச்ச²விபுத்தோ யேன பீ³ரணத்த²ம்ப³கங் ஸுஸானங், யேன அசேலோ கோரக்க²த்தியோ தேனுபஸங்கமி; உபஸங்கமித்வா அசேலங் கோரக்க²த்தியங் திக்க²த்துங் பாணினா ஆகோடேஸி – ‘ஜானாஸி, ஆவுஸோ கோரக்க²த்திய, அத்தனோ க³தி’ந்தி? அத² கோ², ப⁴க்³க³வ, அசேலோ கோரக்க²த்தியோ பாணினா பிட்டி²ங் பரிபுஞ்ச²ந்தோ வுட்டா²ஸி. ‘ஜானாமி, ஆவுஸோ ஸுனக்க²த்த, அத்தனோ க³திங். காலகஞ்சிகா நாம அஸுரா ஸப்³ப³னிஹீனோ அஸுரகாயோ, தத்ராம்ஹி உபபன்னோ’தி வத்வா தத்தே²வ உத்தானோ பபதி ²⁷.

9. ‘‘Assosi kho, bhaggava, sunakkhatto licchaviputto – ‘acelo kira korakkhattiyo alasakena kālaṅkato bīraṇatthambake susāne chaḍḍito’ti. Atha kho, bhaggava, sunakkhatto licchaviputto yena bīraṇatthambakaṃ susānaṃ, yena acelo korakkhattiyo tenupasaṅkami; upasaṅkamitvā acelaṃ korakkhattiyaṃ tikkhattuṃ pāṇinā ākoṭesi – ‘jānāsi, āvuso korakkhattiya, attano gati’nti? Atha kho, bhaggava, acelo korakkhattiyo pāṇinā piṭṭhiṃ paripuñchanto vuṭṭhāsi. ‘Jānāmi, āvuso sunakkhatta, attano gatiṃ. Kālakañcikā nāma asurā sabbanihīno asurakāyo, tatrāmhi upapanno’ti vatvā tattheva uttāno papati ²⁸.

10. ‘‘அத² கோ², ப⁴க்³க³வ, ஸுனக்க²த்தோ லிச்ச²விபுத்தோ யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² அஹங், ப⁴க்³க³வ , ஸுனக்க²த்தங் லிச்ச²விபுத்தங் ஏதத³வோசங் – ‘தங் கிங் மஞ்ஞஸி, ஸுனக்க²த்த, யதே²வ தே அஹங் அசேலங் கோரக்க²த்தியங் ஆரப்³ப⁴ ப்³யாகாஸிங், ததே²வ தங் விபாகங், அஞ்ஞதா² வா’தி? ‘யதே²வ மே, ப⁴ந்தே, ப⁴க³வா அசேலங் கோரக்க²த்தியங் ஆரப்³ப⁴ ப்³யாகாஸி, ததே²வ தங் விபாகங், நோ அஞ்ஞதா²’தி. ‘தங் கிங் மஞ்ஞஸி, ஸுனக்க²த்த, யதி³ ஏவங் ஸந்தே கதங் வா ஹோதி உத்தரிமனுஸ்ஸத⁴ம்மா இத்³தி⁴பாடிஹாரியங், அகதங் வாதி? ‘அத்³தா⁴ கோ², ப⁴ந்தே, ஏவங் ஸந்தே கதங் ஹோதி உத்தரிமனுஸ்ஸத⁴ம்மா இத்³தி⁴பாடிஹாரியங், நோ அகத’ந்தி. ‘ஏவம்பி கோ² மங் த்வங், மோக⁴புரிஸ, உத்தரிமனுஸ்ஸத⁴ம்மா இத்³தி⁴பாடிஹாரியங் கரொந்தங் ஏவங் வதே³ஸி – ந ஹி பன மே, ப⁴ந்தே, ப⁴க³வா உத்தரிமனுஸ்ஸத⁴ம்மா இத்³தி⁴பாடிஹாரியங் கரோதீதி. பஸ்ஸ, மோக⁴புரிஸ, யாவஞ்ச தே இத³ங் அபரத்³த⁴’ந்தி. ‘‘ஏவம்பி கோ², ப⁴க்³க³வ, ஸுனக்க²த்தோ லிச்ச²விபுத்தோ மயா வுச்சமானோ அபக்கமேவ இமஸ்மா த⁴ம்மவினயா, யதா² தங் ஆபாயிகோ நேரயிகோ.

10. ‘‘Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnaṃ kho ahaṃ, bhaggava , sunakkhattaṃ licchaviputtaṃ etadavocaṃ – ‘taṃ kiṃ maññasi, sunakkhatta, yatheva te ahaṃ acelaṃ korakkhattiyaṃ ārabbha byākāsiṃ, tatheva taṃ vipākaṃ, aññathā vā’ti? ‘Yatheva me, bhante, bhagavā acelaṃ korakkhattiyaṃ ārabbha byākāsi, tatheva taṃ vipākaṃ, no aññathā’ti. ‘Taṃ kiṃ maññasi, sunakkhatta, yadi evaṃ sante kataṃ vā hoti uttarimanussadhammā iddhipāṭihāriyaṃ, akataṃ vāti? ‘Addhā kho, bhante, evaṃ sante kataṃ hoti uttarimanussadhammā iddhipāṭihāriyaṃ, no akata’nti. ‘Evampi kho maṃ tvaṃ, moghapurisa, uttarimanussadhammā iddhipāṭihāriyaṃ karontaṃ evaṃ vadesi – na hi pana me, bhante, bhagavā uttarimanussadhammā iddhipāṭihāriyaṃ karotīti. Passa, moghapurisa, yāvañca te idaṃ aparaddha’nti. ‘‘Evampi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṃ āpāyiko nerayiko.

அசேலகளாரமட்டகவத்து²

Acelakaḷāramaṭṭakavatthu

11. ‘‘ஏகமிதா³ஹங், ப⁴க்³க³வ, ஸமயங் வேஸாலியங் விஹராமி மஹாவனே கூடாகா³ரஸாலாயங். தேன கோ² பன ஸமயேன அசேலோ களாரமட்டகோ வேஸாலியங் படிவஸதி லாப⁴க்³க³ப்பத்தோ சேவ யஸக்³க³ப்பத்தோ ச வஜ்ஜிகா³மே. தஸ்ஸ ஸத்தவதபதா³னி ²⁹ ஸமத்தானி ஸமாதி³ன்னானி ஹொந்தி – ‘யாவஜீவங் அசேலகோ அஸ்ஸங், ந வத்த²ங் பரித³ஹெய்யங், யாவஜீவங் ப்³ரஹ்மசாரீ அஸ்ஸங், ந மேது²னங் த⁴ம்மங் படிஸேவெய்யங், யாவஜீவங் ஸுராமங்ஸேனேவ யாபெய்யங், ந ஓத³னகும்மாஸங் பு⁴ஞ்ஜெய்யங். புரத்தி²மேன வேஸாலிங் உதே³னங் நாம சேதியங், தங் நாதிக்கமெய்யங், த³க்கி²ணேன வேஸாலிங் கோ³தமகங் நாம சேதியங், தங் நாதிக்கமெய்யங், பச்சி²மேன வேஸாலிங் ஸத்தம்ப³ங் நாம சேதியங், தங் நாதிக்கமெய்யங், உத்தரேன வேஸாலிங் ப³ஹுபுத்தங் நாம ³⁰ சேதியங் தங் நாதிக்கமெய்ய’ந்தி. ஸோ இமேஸங் ஸத்தன்னங் வதபதா³னங் ஸமாதா³னஹேது லாப⁴க்³க³ப்பத்தோ சேவ யஸக்³க³ப்பத்தோ ச வஜ்ஜிகா³மே.

11. ‘‘Ekamidāhaṃ, bhaggava, samayaṃ vesāliyaṃ viharāmi mahāvane kūṭāgārasālāyaṃ. Tena kho pana samayena acelo kaḷāramaṭṭako vesāliyaṃ paṭivasati lābhaggappatto ceva yasaggappatto ca vajjigāme. Tassa sattavatapadāni ³¹ samattāni samādinnāni honti – ‘yāvajīvaṃ acelako assaṃ, na vatthaṃ paridaheyyaṃ, yāvajīvaṃ brahmacārī assaṃ, na methunaṃ dhammaṃ paṭiseveyyaṃ, yāvajīvaṃ surāmaṃseneva yāpeyyaṃ, na odanakummāsaṃ bhuñjeyyaṃ. Puratthimena vesāliṃ udenaṃ nāma cetiyaṃ, taṃ nātikkameyyaṃ, dakkhiṇena vesāliṃ gotamakaṃ nāma cetiyaṃ, taṃ nātikkameyyaṃ, pacchimena vesāliṃ sattambaṃ nāma cetiyaṃ, taṃ nātikkameyyaṃ, uttarena vesāliṃ bahuputtaṃ nāma ³² cetiyaṃ taṃ nātikkameyya’nti. So imesaṃ sattannaṃ vatapadānaṃ samādānahetu lābhaggappatto ceva yasaggappatto ca vajjigāme.

12. ‘‘அத² கோ², ப⁴க்³க³வ, ஸுனக்க²த்தோ லிச்ச²விபுத்தோ யேன அசேலோ களாரமட்டகோ தேனுபஸங்கமி; உபஸங்கமித்வா அசேலங் களாரமட்டகங் பஞ்ஹங் அபுச்சி². தஸ்ஸ அசேலோ களாரமட்டகோ பஞ்ஹங் புட்டோ² ந ஸம்பாயாஸி. அஸம்பாயந்தோ கோபஞ்ச தோ³ஸஞ்ச அப்பச்சயஞ்ச பாத்வாகாஸி. அத² கோ², ப⁴க்³க³வ, ஸுனக்க²த்தஸ்ஸ லிச்ச²விபுத்தஸ்ஸ ஏதத³ஹோஸி – ‘ஸாது⁴ரூபங் வத போ⁴ அரஹந்தங் ஸமணங் ஆஸாதி³ம்ஹஸே ³³. மா வத நோ அஹோஸி தீ³க⁴ரத்தங் அஹிதாய து³க்கா²யா’தி.

12. ‘‘Atha kho, bhaggava, sunakkhatto licchaviputto yena acelo kaḷāramaṭṭako tenupasaṅkami; upasaṅkamitvā acelaṃ kaḷāramaṭṭakaṃ pañhaṃ apucchi. Tassa acelo kaḷāramaṭṭako pañhaṃ puṭṭho na sampāyāsi. Asampāyanto kopañca dosañca appaccayañca pātvākāsi. Atha kho, bhaggava, sunakkhattassa licchaviputtassa etadahosi – ‘sādhurūpaṃ vata bho arahantaṃ samaṇaṃ āsādimhase ³⁴. Mā vata no ahosi dīgharattaṃ ahitāya dukkhāyā’ti.

13. ‘‘அத² கோ², ப⁴க்³க³வ, ஸுனக்க²த்தோ லிச்ச²விபுத்தோ யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² அஹங், ப⁴க்³க³வ, ஸுனக்க²த்தங் லிச்ச²விபுத்தங் ஏதத³வோசங் – ‘த்வம்பி நாம, மோக⁴புரிஸ, ஸமணோ ஸக்யபுத்தியோ படிஜானிஸ்ஸஸீ’தி! ‘கிங் பன மங், ப⁴ந்தே, ப⁴க³வா ஏவமாஹ – த்வம்பி நாம, மோக⁴புரிஸ, ஸமணோ ஸக்யபுத்தியோ படிஜானிஸ்ஸஸீ’தி? ‘நனு த்வங், ஸுனக்க²த்த, அசேலங் களாரமட்டகங் உபஸங்கமித்வா பஞ்ஹங் அபுச்சி². தஸ்ஸ தே அசேலோ களாரமட்டகோ பஞ்ஹங் புட்டோ² ந ஸம்பாயாஸி. அஸம்பாயந்தோ கோபஞ்ச தோ³ஸஞ்ச அப்பச்சயஞ்ச பாத்வாகாஸி. தஸ்ஸ தே ஏதத³ஹோஸி – ‘‘ஸாது⁴ரூபங் வத, போ⁴, அரஹந்தங் ஸமணங் ஆஸாதி³ம்ஹஸே. மா வத நோ அஹோஸி தீ³க⁴ரத்தங் அஹிதாய து³க்கா²யா’தி. ‘ஏவங், ப⁴ந்தே. கிங் பன, ப⁴ந்தே, ப⁴க³வா அரஹத்தஸ்ஸ மச்ச²ராயதீ’தி? ‘ந கோ² அஹங், மோக⁴புரிஸ, அரஹத்தஸ்ஸ மச்ச²ராயாமி, அபி ச துய்ஹேவேதங் பாபகங் தி³ட்டி²க³தங் உப்பன்னங், தங் பஜஹ. மா தே அஹோஸி தீ³க⁴ரத்தங் அஹிதாய து³க்கா²ய. யங் கோ² பனேதங், ஸுனக்க²த்த, மஞ்ஞஸி அசேலங் களாரமட்டகங் – ஸாது⁴ரூபோ அயங் ³⁵ ஸமணோதி, ஸோ நசிரஸ்ஸேவ பரிஹிதோ ஸானுசாரிகோ விசரந்தோ ஓத³னகும்மாஸங் பு⁴ஞ்ஜமானோ ஸப்³பா³னேவ வேஸாலியானி சேதியானி ஸமதிக்கமித்வா யஸா நிஹீனோ ³⁶ காலங் கரிஸ்ஸதீ’தி.

13. ‘‘Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnaṃ kho ahaṃ, bhaggava, sunakkhattaṃ licchaviputtaṃ etadavocaṃ – ‘tvampi nāma, moghapurisa, samaṇo sakyaputtiyo paṭijānissasī’ti! ‘Kiṃ pana maṃ, bhante, bhagavā evamāha – tvampi nāma, moghapurisa, samaṇo sakyaputtiyo paṭijānissasī’ti? ‘Nanu tvaṃ, sunakkhatta, acelaṃ kaḷāramaṭṭakaṃ upasaṅkamitvā pañhaṃ apucchi. Tassa te acelo kaḷāramaṭṭako pañhaṃ puṭṭho na sampāyāsi. Asampāyanto kopañca dosañca appaccayañca pātvākāsi. Tassa te etadahosi – ‘‘sādhurūpaṃ vata, bho, arahantaṃ samaṇaṃ āsādimhase. Mā vata no ahosi dīgharattaṃ ahitāya dukkhāyā’ti. ‘Evaṃ, bhante. Kiṃ pana, bhante, bhagavā arahattassa maccharāyatī’ti? ‘Na kho ahaṃ, moghapurisa, arahattassa maccharāyāmi, api ca tuyhevetaṃ pāpakaṃ diṭṭhigataṃ uppannaṃ, taṃ pajaha. Mā te ahosi dīgharattaṃ ahitāya dukkhāya. Yaṃ kho panetaṃ, sunakkhatta, maññasi acelaṃ kaḷāramaṭṭakaṃ – sādhurūpo ayaṃ ³⁷ samaṇoti, so nacirasseva parihito sānucāriko vicaranto odanakummāsaṃ bhuñjamāno sabbāneva vesāliyāni cetiyāni samatikkamitvā yasā nihīno ³⁸ kālaṃ karissatī’ti.

‘‘‘அத² கோ², ப⁴க்³க³வ, அசேலோ களாரமட்டகோ நசிரஸ்ஸேவ பரிஹிதோ ஸானுசாரிகோ விசரந்தோ ஓத³னகும்மாஸங் பு⁴ஞ்ஜமானோ ஸப்³பா³னேவ வேஸாலியானி சேதியானி ஸமதிக்கமித்வா யஸா நிஹீனோ காலமகாஸி.

‘‘‘Atha kho, bhaggava, acelo kaḷāramaṭṭako nacirasseva parihito sānucāriko vicaranto odanakummāsaṃ bhuñjamāno sabbāneva vesāliyāni cetiyāni samatikkamitvā yasā nihīno kālamakāsi.

14. ‘‘அஸ்ஸோஸி கோ², ப⁴க்³க³வ, ஸுனக்க²த்தோ லிச்ச²விபுத்தோ – ‘அசேலோ கிர களாரமட்டகோ பரிஹிதோ ஸானுசாரிகோ விசரந்தோ ஓத³னகும்மாஸங் பு⁴ஞ்ஜமானோ ஸப்³பா³னேவ வேஸாலியானி சேதியானி ஸமதிக்கமித்வா யஸா நிஹீனோ காலங்கதோ’தி. அத² கோ², ப⁴க்³க³வ, ஸுனக்க²த்தோ லிச்ச²விபுத்தோ யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² அஹங், ப⁴க்³க³வ, ஸுனக்க²த்தங் லிச்ச²விபுத்தங் ஏதத³வோசங் – ‘தங் கிங் மஞ்ஞஸி, ஸுனக்க²த்த, யதே²வ தே அஹங் அசேலங் களாரமட்டகங் ஆரப்³ப⁴ ப்³யாகாஸிங், ததே²வ தங் விபாகங், அஞ்ஞதா² வா’தி? ‘யதே²வ மே, ப⁴ந்தே, ப⁴க³வா அசேலங் களாரமட்டகங் ஆரப்³ப⁴ ப்³யாகாஸி, ததே²வ தங் விபாகங், நோ அஞ்ஞதா²’தி. ‘தங் கிங் மஞ்ஞஸி, ஸுனக்க²த்த, யதி³ ஏவங் ஸந்தே கதங் வா ஹோதி உத்தரிமனுஸ்ஸத⁴ம்மா இத்³தி⁴பாடிஹாரியங் அகதங் வா’தி? ‘அத்³தா⁴ கோ², ப⁴ந்தே, ஏவங் ஸந்தே கதங் ஹோதி உத்தரிமனுஸ்ஸத⁴ம்மா இத்³தி⁴பாடிஹாரியங், நோ அகத’ந்தி. ‘ஏவம்பி கோ² மங் த்வங், மோக⁴புரிஸ, உத்தரிமனுஸ்ஸத⁴ம்மா இத்³தி⁴பாடிஹாரியங் கரொந்தங் ஏவங் வதே³ஸி – ந ஹி பன மே, ப⁴ந்தே, ப⁴க³வா உத்தரிமனுஸ்ஸத⁴ம்மா இத்³தி⁴பாடிஹாரியங் கரோதீ’’தி. பஸ்ஸ, மோக⁴புரிஸ, யாவஞ்ச தே இத³ங் அபரத்³த⁴’ந்தி. ‘‘ஏவ’ம்பி கோ², ப⁴க்³க³வ, ஸுனக்க²த்தோ லிச்ச²விபுத்தோ மயா வுச்சமானோ அபக்கமேவ இமஸ்மா த⁴ம்மவினயா, யதா² தங் ஆபாயிகோ நேரயிகோ.

14. ‘‘Assosi kho, bhaggava, sunakkhatto licchaviputto – ‘acelo kira kaḷāramaṭṭako parihito sānucāriko vicaranto odanakummāsaṃ bhuñjamāno sabbāneva vesāliyāni cetiyāni samatikkamitvā yasā nihīno kālaṅkato’ti. Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnaṃ kho ahaṃ, bhaggava, sunakkhattaṃ licchaviputtaṃ etadavocaṃ – ‘taṃ kiṃ maññasi, sunakkhatta, yatheva te ahaṃ acelaṃ kaḷāramaṭṭakaṃ ārabbha byākāsiṃ, tatheva taṃ vipākaṃ, aññathā vā’ti? ‘Yatheva me, bhante, bhagavā acelaṃ kaḷāramaṭṭakaṃ ārabbha byākāsi, tatheva taṃ vipākaṃ, no aññathā’ti. ‘Taṃ kiṃ maññasi, sunakkhatta, yadi evaṃ sante kataṃ vā hoti uttarimanussadhammā iddhipāṭihāriyaṃ akataṃ vā’ti? ‘Addhā kho, bhante, evaṃ sante kataṃ hoti uttarimanussadhammā iddhipāṭihāriyaṃ, no akata’nti. ‘Evampi kho maṃ tvaṃ, moghapurisa, uttarimanussadhammā iddhipāṭihāriyaṃ karontaṃ evaṃ vadesi – na hi pana me, bhante, bhagavā uttarimanussadhammā iddhipāṭihāriyaṃ karotī’’ti. Passa, moghapurisa, yāvañca te idaṃ aparaddha’nti. ‘‘Eva’mpi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṃ āpāyiko nerayiko.

அசேலபாதி²கபுத்தவத்து²

Acelapāthikaputtavatthu

15. ‘‘ஏகமிதா³ஹங், ப⁴க்³க³வ, ஸமயங் தத்தே²வ வேஸாலியங் விஹராமி மஹாவனே கூடாகா³ரஸாலாயங். தேன கோ² பன ஸமயேன அசேலோ பாதி²கபுத்தோ ³⁹ வேஸாலியங் படிவஸதி லாப⁴க்³க³ப்பத்தோ சேவ யஸக்³க³ப்பத்தோ ச வஜ்ஜிகா³மே. ஸோ வேஸாலியங் பரிஸதி ஏவங் வாசங் பா⁴ஸதி – ‘ஸமணோபி கோ³தமோ ஞாணவாதோ³, அஹம்பி ஞாணவாதோ³. ஞாணவாதோ³ கோ² பன ஞாணவாதே³ன அரஹதி உத்தரிமனுஸ்ஸத⁴ம்மா இத்³தி⁴பாடிஹாரியங் த³ஸ்ஸேதுங். ஸமணோ கோ³தமோ உபட்³ட⁴பத²ங் ஆக³ச்செ²ய்ய, அஹம்பி உபட்³ட⁴பத²ங் க³ச்செ²ய்யங். தே தத்த² உபோ⁴பி உத்தரிமனுஸ்ஸத⁴ம்மா இத்³தி⁴பாடிஹாரியங் கரெய்யாம. ஏகங் சே ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியங் கரிஸ்ஸதி, த்³வாஹங் கரிஸ்ஸாமி. த்³வே சே ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியானி கரிஸ்ஸதி, சத்தாராஹங் கரிஸ்ஸாமி . சத்தாரி சே ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியானி கரிஸ்ஸதி, அட்டா²ஹங் கரிஸ்ஸாமி. இதி யாவதகங் யாவதகங் ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியங் கரிஸ்ஸதி, தத்³தி³கு³ணங் தத்³தி³கு³ணாஹங் கரிஸ்ஸாமீ’தி.

15. ‘‘Ekamidāhaṃ, bhaggava, samayaṃ tattheva vesāliyaṃ viharāmi mahāvane kūṭāgārasālāyaṃ. Tena kho pana samayena acelo pāthikaputto ⁴⁰ vesāliyaṃ paṭivasati lābhaggappatto ceva yasaggappatto ca vajjigāme. So vesāliyaṃ parisati evaṃ vācaṃ bhāsati – ‘samaṇopi gotamo ñāṇavādo, ahampi ñāṇavādo. Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ. Samaṇo gotamo upaḍḍhapathaṃ āgaccheyya, ahampi upaḍḍhapathaṃ gaccheyyaṃ. Te tattha ubhopi uttarimanussadhammā iddhipāṭihāriyaṃ kareyyāma. Ekaṃ ce samaṇo gotamo uttarimanussadhammā iddhipāṭihāriyaṃ karissati, dvāhaṃ karissāmi. Dve ce samaṇo gotamo uttarimanussadhammā iddhipāṭihāriyāni karissati, cattārāhaṃ karissāmi . Cattāri ce samaṇo gotamo uttarimanussadhammā iddhipāṭihāriyāni karissati, aṭṭhāhaṃ karissāmi. Iti yāvatakaṃ yāvatakaṃ samaṇo gotamo uttarimanussadhammā iddhipāṭihāriyaṃ karissati, taddiguṇaṃ taddiguṇāhaṃ karissāmī’ti.

16. ‘‘அத² கோ², ப⁴க்³க³வ, ஸுனக்க²த்தோ லிச்ச²விபுத்தோ யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ², ப⁴க்³க³வ, ஸுனக்க²த்தோ லிச்ச²விபுத்தோ மங் ஏதத³வோச – ‘அசேலோ, ப⁴ந்தே, பாதி²கபுத்தோ வேஸாலியங் படிவஸதி லாப⁴க்³க³ப்பத்தோ சேவ யஸக்³க³ப்பத்தோ ச வஜ்ஜிகா³மே. ஸோ வேஸாலியங் பரிஸதி ஏவங் வாசங் பா⁴ஸதி – ஸமணோபி கோ³தமோ ஞாணவாதோ³, அஹம்பி ஞாணவாதோ³. ஞாணவாதோ³ கோ² பன ஞாணவாதே³ன அரஹதி உத்தரிமனுஸ்ஸத⁴ம்மா இத்³தி⁴பாடிஹாரியங் த³ஸ்ஸேதுங். ஸமணோ கோ³தமோ உபட்³ட⁴பத²ங் ஆக³ச்செ²ய்ய, அஹம்பி உபட்³ட⁴பத²ங் க³ச்செ²ய்யங். தே தத்த² உபோ⁴பி உத்தரிமனுஸ்ஸத⁴ம்மா இத்³தி⁴பாடிஹாரியங் கரெய்யாம. ஏகங் சே ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியங் கரிஸ்ஸதி, த்³வாஹங் கரிஸ்ஸாமி. த்³வே சே ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியானி கரிஸ்ஸதி, சத்தாராஹங் கரிஸ்ஸாமி. சத்தாரி சே ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியானி கரிஸ்ஸதி, அட்டா²ஹங் கரிஸ்ஸாமி. இதி யாவதகங் யாவதகங் ஸமணோ கோ³தமோ உத்தரி மனுஸ்ஸத⁴ம்மா இத்³தி⁴பாடிஹாரியங் கரிஸ்ஸதி, தத்³தி³கு³ணங் தத்³தி³கு³ணாஹங் கரிஸ்ஸாமீ’’தி.

16. ‘‘Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinno kho, bhaggava, sunakkhatto licchaviputto maṃ etadavoca – ‘acelo, bhante, pāthikaputto vesāliyaṃ paṭivasati lābhaggappatto ceva yasaggappatto ca vajjigāme. So vesāliyaṃ parisati evaṃ vācaṃ bhāsati – samaṇopi gotamo ñāṇavādo, ahampi ñāṇavādo. Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ. Samaṇo gotamo upaḍḍhapathaṃ āgaccheyya, ahampi upaḍḍhapathaṃ gaccheyyaṃ. Te tattha ubhopi uttarimanussadhammā iddhipāṭihāriyaṃ kareyyāma. Ekaṃ ce samaṇo gotamo uttarimanussadhammā iddhipāṭihāriyaṃ karissati, dvāhaṃ karissāmi. Dve ce samaṇo gotamo uttarimanussadhammā iddhipāṭihāriyāni karissati, cattārāhaṃ karissāmi. Cattāri ce samaṇo gotamo uttarimanussadhammā iddhipāṭihāriyāni karissati, aṭṭhāhaṃ karissāmi. Iti yāvatakaṃ yāvatakaṃ samaṇo gotamo uttari manussadhammā iddhipāṭihāriyaṃ karissati, taddiguṇaṃ taddiguṇāhaṃ karissāmī’’ti.

‘‘ஏவங் வுத்தே, அஹங், ப⁴க்³க³வ, ஸுனக்க²த்தங் லிச்ச²விபுத்தங் ஏதத³வோசங் – ‘அப⁴ப்³போ³ கோ², ஸுனக்க²த்த, அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யா’தி.

‘‘Evaṃ vutte, ahaṃ, bhaggava, sunakkhattaṃ licchaviputtaṃ etadavocaṃ – ‘abhabbo kho, sunakkhatta, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

17. ‘ரக்க²தேதங், ப⁴ந்தே, ப⁴க³வா வாசங், ரக்க²தேதங் ஸுக³தோ வாச’ந்தி. ‘கிங் பன மங் த்வங், ஸுனக்க²த்த, ஏவங் வதே³ஸி – ரக்க²தேதங், ப⁴ந்தே, ப⁴க³வா வாசங், ரக்க²தேதங் ஸுக³தோ வாச’ந்தி? ‘ப⁴க³வதா சஸ்ஸ, ப⁴ந்தே, ஏஸா வாசா ஏகங்ஸேன ஓதா⁴ரிதா ⁴¹ – அப⁴ப்³போ³ அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யாதி. அசேலோ ச, ப⁴ந்தே, பாதி²கபுத்தோ விரூபரூபேன ப⁴க³வதோ ஸம்முகீ²பா⁴வங் ஆக³ச்செ²ய்ய, தத³ஸ்ஸ ப⁴க³வதோ முஸா’தி.

17. ‘Rakkhatetaṃ, bhante, bhagavā vācaṃ, rakkhatetaṃ sugato vāca’nti. ‘Kiṃ pana maṃ tvaṃ, sunakkhatta, evaṃ vadesi – rakkhatetaṃ, bhante, bhagavā vācaṃ, rakkhatetaṃ sugato vāca’nti? ‘Bhagavatā cassa, bhante, esā vācā ekaṃsena odhāritā ⁴² – abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti. Acelo ca, bhante, pāthikaputto virūparūpena bhagavato sammukhībhāvaṃ āgaccheyya, tadassa bhagavato musā’ti.

18. ‘அபி நு, ஸுனக்க²த்த, ததா²க³தோ தங் வாசங் பா⁴ஸெய்ய யா ஸா வாசா த்³வயகா³மினீ’தி? ‘கிங் பன, ப⁴ந்தே, ப⁴க³வதா அசேலோ பாதி²கபுத்தோ சேதஸா சேதோ பரிச்ச விதி³தோ – அப⁴ப்³போ³ அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யா’தி?

18. ‘Api nu, sunakkhatta, tathāgato taṃ vācaṃ bhāseyya yā sā vācā dvayagāminī’ti? ‘Kiṃ pana, bhante, bhagavatā acelo pāthikaputto cetasā ceto paricca vidito – abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti?

‘உதா³ஹு , தே³வதா ப⁴க³வதோ ஏதமத்த²ங் ஆரோசேஸுங் – அப⁴ப்³போ³, ப⁴ந்தே, அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ப⁴க³வதோ ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யா’தி?

‘Udāhu , devatā bhagavato etamatthaṃ ārocesuṃ – abhabbo, bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti?

19. ‘சேதஸா சேதோ பரிச்ச விதி³தோ சேவ மே, ஸுனக்க²த்த , அசேலோ பாதி²கபுத்தோ அப⁴ப்³போ³ அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யா’தி.

19. ‘Cetasā ceto paricca vidito ceva me, sunakkhatta , acelo pāthikaputto abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

‘தே³வதாபி மே ஏதமத்த²ங் ஆரோசேஸுங் – அப⁴ப்³போ³ , ப⁴ந்தே, அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ப⁴க³வதோ ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யா’தி.

‘Devatāpi me etamatthaṃ ārocesuṃ – abhabbo , bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

‘அஜிதோபி நாம லிச்ச²வீனங் ஸேனாபதி அது⁴னா காலங்கதோ தாவதிங்ஸகாயங் உபபன்னோ. ஸோபி மங் உபஸங்கமித்வா ஏவமாரோசேஸி – அலஜ்ஜீ, ப⁴ந்தே, அசேலோ பாதி²கபுத்தோ; முஸாவாதீ³, ப⁴ந்தே, அசேலோ பாதி²கபுத்தோ. மம்பி, ப⁴ந்தே, அசேலோ பாதி²கபுத்தோ ப்³யாகாஸி வஜ்ஜிகா³மே – அஜிதோ லிச்ச²வீனங் ஸேனாபதி மஹானிரயங் உபபன்னோதி. ந கோ² பனாஹங், ப⁴ந்தே, மஹானிரயங் உபபன்னோ; தாவதிங்ஸகாயம்ஹி உபபன்னோ. அலஜ்ஜீ, ப⁴ந்தே, அசேலோ பாதி²கபுத்தோ; முஸாவாதீ³, ப⁴ந்தே, அசேலோ பாதி²கபுத்தோ; அப⁴ப்³போ³ ச, ப⁴ந்தே, அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ப⁴க³வதோ ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யா’தி.

‘Ajitopi nāma licchavīnaṃ senāpati adhunā kālaṅkato tāvatiṃsakāyaṃ upapanno. Sopi maṃ upasaṅkamitvā evamārocesi – alajjī, bhante, acelo pāthikaputto; musāvādī, bhante, acelo pāthikaputto. Mampi, bhante, acelo pāthikaputto byākāsi vajjigāme – ajito licchavīnaṃ senāpati mahānirayaṃ upapannoti. Na kho panāhaṃ, bhante, mahānirayaṃ upapanno; tāvatiṃsakāyamhi upapanno. Alajjī, bhante, acelo pāthikaputto; musāvādī, bhante, acelo pāthikaputto; abhabbo ca, bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

‘இதி கோ², ஸுனக்க²த்த, சேதஸா சேதோ பரிச்ச விதி³தோ சேவ மே அசேலோ பாதி²கபுத்தோ அப⁴ப்³போ³ அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யாதி. தே³வதாபி மே ஏதமத்த²ங் ஆரோசேஸுங் – அப⁴ப்³போ³, ப⁴ந்தே , அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ப⁴க³வதோ ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யா’தி.

‘Iti kho, sunakkhatta, cetasā ceto paricca vidito ceva me acelo pāthikaputto abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti. Devatāpi me etamatthaṃ ārocesuṃ – abhabbo, bhante , acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

‘ஸோ கோ² பனாஹங், ஸுனக்க²த்த, வேஸாலியங் பிண்டா³ய சரித்வா பச்சா²ப⁴த்தங் பிண்ட³பாதப்படிக்கந்தோ யேன அசேலஸ்ஸ பாதி²கபுத்தஸ்ஸ ஆராமோ தேனுபஸங்கமிஸ்ஸாமி தி³வாவிஹாராய. யஸ்ஸதா³னி த்வங், ஸுனக்க²த்த, இச்ச²ஸி, தஸ்ஸ ஆரோசேஹீ’தி.

‘So kho panāhaṃ, sunakkhatta, vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkamissāmi divāvihārāya. Yassadāni tvaṃ, sunakkhatta, icchasi, tassa ārocehī’ti.

இத்³தி⁴பாடிஹாரியகதா²

Iddhipāṭihāriyakathā

20. ‘‘அத² க்²வாஹங் ⁴³, ப⁴க்³க³வ, புப்³ப³ண்ஹஸமயங் நிவாஸெத்வா பத்தசீவரமாதா³ய வேஸாலிங் பிண்டா³ய பாவிஸிங். வேஸாலியங் பிண்டா³ய சரித்வா பச்சா²ப⁴த்தங் பிண்ட³பாதப்படிக்கந்தோ யேன அசேலஸ்ஸ பாதி²கபுத்தஸ்ஸ ஆராமோ தேனுபஸங்கமிங் தி³வாவிஹாராய. அத² கோ², ப⁴க்³க³வ, ஸுனக்க²த்தோ லிச்ச²விபுத்தோ தரமானரூபோ வேஸாலிங் பவிஸித்வா யேன அபி⁴ஞ்ஞாதா அபி⁴ஞ்ஞாதா லிச்ச²வீ தேனுபஸங்கமி; உபஸங்கமித்வா அபி⁴ஞ்ஞாதே அபி⁴ஞ்ஞாதே லிச்ச²வீ ஏதத³வோச – ‘ஏஸாவுஸோ, ப⁴க³வா வேஸாலியங் பிண்டா³ய சரித்வா பச்சா²ப⁴த்தங் பிண்ட³பாதப்படிக்கந்தோ யேன அசேலஸ்ஸ பாதி²கபுத்தஸ்ஸ ஆராமோ தேனுபஸங்கமி தி³வாவிஹாராய. அபி⁴க்கமதா²யஸ்மந்தோ அபி⁴க்கமதா²யஸ்மந்தோ, ஸாது⁴ரூபானங் ஸமணானங் உத்தரிமனுஸ்ஸத⁴ம்மா இத்³தி⁴பாடிஹாரியங் ப⁴விஸ்ஸதீ’தி . அத² கோ², ப⁴க்³க³வ, அபி⁴ஞ்ஞாதானங் அபி⁴ஞ்ஞாதானங் லிச்ச²வீனங் ஏதத³ஹோஸி – ‘ஸாது⁴ரூபானங் கிர, போ⁴, ஸமணானங் உத்தரிமனுஸ்ஸத⁴ம்மா இத்³தி⁴பாடிஹாரியங் ப⁴விஸ்ஸதி; ஹந்த³ வத, போ⁴, க³ச்சா²மா’தி. யேன ச அபி⁴ஞ்ஞாதா அபி⁴ஞ்ஞாதா ப்³ராஹ்மணமஹாஸாலா க³ஹபதினேசயிகா நானாதித்தி²யா ⁴⁴ ஸமணப்³ராஹ்மணா தேனுபஸங்கமி. உபஸங்கமித்வா அபி⁴ஞ்ஞாதே அபி⁴ஞ்ஞாதே நானாதித்தி²யே ⁴⁵ ஸமணப்³ராஹ்மணே ஏதத³வோச – ‘ஏஸாவுஸோ, ப⁴க³வா வேஸாலியங் பிண்டா³ய சரித்வா பச்சா²ப⁴த்தங் பிண்ட³பாதப்படிக்கந்தோ யேன அசேலஸ்ஸ பாதி²கபுத்தஸ்ஸ ஆராமோ தேனுபஸங்கமி தி³வாவிஹாராய. அபி⁴க்கமதா²யஸ்மந்தோ அபி⁴க்கமதா²யஸ்மந்தோ, ஸாது⁴ரூபானங் ஸமணானங் உத்தரிமனுஸ்ஸத⁴ம்மா இத்³தி⁴பாடிஹாரியங் ப⁴விஸ்ஸதீ’தி. அத² கோ², ப⁴க்³க³வ, அபி⁴ஞ்ஞாதானங் அபி⁴ஞ்ஞாதானங் நானாதித்தி²யானங் ஸமணப்³ராஹ்மணானங் ஏதத³ஹோஸி – ‘ஸாது⁴ரூபானங் கிர, போ⁴, ஸமணானங் உத்தரிமனுஸ்ஸத⁴ம்மா இத்³தி⁴பாடிஹாரியங் ப⁴விஸ்ஸதி; ஹந்த³ வத, போ⁴, க³ச்சா²மா’தி.

20. ‘‘Atha khvāhaṃ ⁴⁶, bhaggava, pubbaṇhasamayaṃ nivāsetvā pattacīvaramādāya vesāliṃ piṇḍāya pāvisiṃ. Vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkamiṃ divāvihārāya. Atha kho, bhaggava, sunakkhatto licchaviputto taramānarūpo vesāliṃ pavisitvā yena abhiññātā abhiññātā licchavī tenupasaṅkami; upasaṅkamitvā abhiññāte abhiññāte licchavī etadavoca – ‘esāvuso, bhagavā vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkami divāvihārāya. Abhikkamathāyasmanto abhikkamathāyasmanto, sādhurūpānaṃ samaṇānaṃ uttarimanussadhammā iddhipāṭihāriyaṃ bhavissatī’ti . Atha kho, bhaggava, abhiññātānaṃ abhiññātānaṃ licchavīnaṃ etadahosi – ‘sādhurūpānaṃ kira, bho, samaṇānaṃ uttarimanussadhammā iddhipāṭihāriyaṃ bhavissati; handa vata, bho, gacchāmā’ti. Yena ca abhiññātā abhiññātā brāhmaṇamahāsālā gahapatinecayikā nānātitthiyā ⁴⁷ samaṇabrāhmaṇā tenupasaṅkami. Upasaṅkamitvā abhiññāte abhiññāte nānātitthiye ⁴⁸ samaṇabrāhmaṇe etadavoca – ‘esāvuso, bhagavā vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkami divāvihārāya. Abhikkamathāyasmanto abhikkamathāyasmanto, sādhurūpānaṃ samaṇānaṃ uttarimanussadhammā iddhipāṭihāriyaṃ bhavissatī’ti. Atha kho, bhaggava, abhiññātānaṃ abhiññātānaṃ nānātitthiyānaṃ samaṇabrāhmaṇānaṃ etadahosi – ‘sādhurūpānaṃ kira, bho, samaṇānaṃ uttarimanussadhammā iddhipāṭihāriyaṃ bhavissati; handa vata, bho, gacchāmā’ti.

‘‘அத² கோ², ப⁴க்³க³வ, அபி⁴ஞ்ஞாதா அபி⁴ஞ்ஞாதா லிச்ச²வீ, அபி⁴ஞ்ஞாதா அபி⁴ஞ்ஞாதா ச ப்³ராஹ்மணமஹாஸாலா க³ஹபதினேசயிகா நானாதித்தி²யா ஸமணப்³ராஹ்மணா யேன அசேலஸ்ஸ பாதி²கபுத்தஸ்ஸ ஆராமோ தேனுபஸங்கமிங்ஸு. ஸா ஏஸா, ப⁴க்³க³வ, பரிஸா மஹா ஹோதி ⁴⁹ அனேகஸதா அனேகஸஹஸ்ஸா.

‘‘Atha kho, bhaggava, abhiññātā abhiññātā licchavī, abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā yena acelassa pāthikaputtassa ārāmo tenupasaṅkamiṃsu. Sā esā, bhaggava, parisā mahā hoti ⁵⁰ anekasatā anekasahassā.

21. ‘‘அஸ்ஸோஸி கோ², ப⁴க்³க³வ, அசேலோ பாதி²கபுத்தோ – ‘அபி⁴க்கந்தா கிர அபி⁴ஞ்ஞாதா அபி⁴ஞ்ஞாதா லிச்ச²வீ, அபி⁴க்கந்தா அபி⁴ஞ்ஞாதா அபி⁴ஞ்ஞாதா ச ப்³ராஹ்மணமஹாஸாலா க³ஹபதினேசயிகா நானாதித்தி²யா ஸமணப்³ராஹ்மணா. ஸமணோபி கோ³தமோ மய்ஹங் ஆராமே தி³வாவிஹாரங் நிஸின்னோ’தி. ஸுத்வானஸ்ஸ ப⁴யங் ச²ம்பி⁴தத்தங் லோமஹங்ஸோ உத³பாதி³. அத² கோ², ப⁴க்³க³வ, அசேலோ பாதி²கபுத்தோ பீ⁴தோ ஸங்விக்³கோ³ லோமஹட்ட²ஜாதோ யேன திந்து³ககா²ணுபரிப்³பா³ஜகாராமோ தேனுபஸங்கமி.

21. ‘‘Assosi kho, bhaggava, acelo pāthikaputto – ‘abhikkantā kira abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo mayhaṃ ārāme divāvihāraṃ nisinno’ti. Sutvānassa bhayaṃ chambhitattaṃ lomahaṃso udapādi. Atha kho, bhaggava, acelo pāthikaputto bhīto saṃviggo lomahaṭṭhajāto yena tindukakhāṇuparibbājakārāmo tenupasaṅkami.

‘‘அஸ்ஸோஸி கோ², ப⁴க்³க³வ, ஸா பரிஸா – ‘அசேலோ கிர பாதி²கபுத்தோ பீ⁴தோ ஸங்விக்³கோ³ லோமஹட்ட²ஜாதோ யேன திந்து³ககா²ணுபரிப்³பா³ஜகாராமோ தேனுபஸங்கந்தோ’தி ⁵¹. அத² கோ², ப⁴க்³க³வ, ஸா பரிஸா அஞ்ஞதரங் புரிஸங் ஆமந்தேஸி –

‘‘Assosi kho, bhaggava, sā parisā – ‘acelo kira pāthikaputto bhīto saṃviggo lomahaṭṭhajāto yena tindukakhāṇuparibbājakārāmo tenupasaṅkanto’ti ⁵². Atha kho, bhaggava, sā parisā aññataraṃ purisaṃ āmantesi –

‘ஏஹி த்வங், போ⁴ புரிஸ, யேன திந்து³ககா²ணுபரிப்³பா³ஜகாராமோ, யேன அசேலோ பாதி²கபுத்தோ தேனுபஸங்கம. உபஸங்கமித்வா அசேலங் பாதி²கபுத்தங் ஏவங் வதே³ஹி – அபி⁴க்கமாவுஸோ, பாதி²கபுத்த, அபி⁴க்கந்தா அபி⁴ஞ்ஞாதா அபி⁴ஞ்ஞாதா லிச்ச²வீ, அபி⁴க்கந்தா அபி⁴ஞ்ஞாதா அபி⁴ஞ்ஞாதா ச ப்³ராஹ்மணமஹாஸாலா க³ஹபதினேசயிகா நானாதித்தி²யா ஸமணப்³ராஹ்மணா, ஸமணோபி கோ³தமோ ஆயஸ்மதோ ஆராமே தி³வாவிஹாரங் நிஸின்னோ; பா⁴ஸிதா கோ² பன தே ஏஸா, ஆவுஸோ பாதி²கபுத்த, வேஸாலியங் பரிஸதி வாசா ஸமணோபி கோ³தமோ ஞாணவாதோ³, அஹம்பி ஞாணவாதோ³. ஞாணவாதோ³ கோ² பன ஞாணவாதே³ன அரஹதி உத்தரிமனுஸ்ஸத⁴ம்மா இத்³தி⁴பாடிஹாரியங் த³ஸ்ஸேதுங். ஸமணோ கோ³தமோ உபட்³ட⁴பத²ங் ஆக³ச்செ²ய்ய அஹம்பி உபட்³ட⁴பத²ங் க³ச்செ²ய்யங். தே தத்த² உபோ⁴பி உத்தரிமனுஸ்ஸத⁴ம்மா இத்³தி⁴பாடிஹாரியங் கரெய்யாம. ஏகங் சே ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியங் கரிஸ்ஸதி, த்³வாஹங் கரிஸ்ஸாமி. த்³வே சே ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியானி கரிஸ்ஸதி, சத்தாராஹங் கரிஸ்ஸாமி. சத்தாரி சே ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியானி கரிஸ்ஸதி , அட்டா²ஹங் கரிஸ்ஸாமி. இதி யாவதகங் யாவதகங் ஸமணோ கோ³தமோ உத்தரிமனுஸ்ஸத⁴ம்மா இத்³தி⁴பாடிஹாரியங் கரிஸ்ஸதி, தத்³தி³கு³ணங் தத்³தி³கு³ணாஹங் கரிஸ்ஸாமீ’தி அபி⁴க்கமஸ்ஸேவ ⁵³ கோ²; ஆவுஸோ பாதி²கபுத்த, உபட்³ட⁴பத²ங். ஸப்³ப³பட²மங்யேவ ஆக³ந்த்வா ஸமணோ கோ³தமோ ஆயஸ்மதோ ஆராமே தி³வாவிஹாரங் நிஸின்னோ’தி.

‘Ehi tvaṃ, bho purisa, yena tindukakhāṇuparibbājakārāmo, yena acelo pāthikaputto tenupasaṅkama. Upasaṅkamitvā acelaṃ pāthikaputtaṃ evaṃ vadehi – abhikkamāvuso, pāthikaputta, abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā, samaṇopi gotamo āyasmato ārāme divāvihāraṃ nisinno; bhāsitā kho pana te esā, āvuso pāthikaputta, vesāliyaṃ parisati vācā samaṇopi gotamo ñāṇavādo, ahampi ñāṇavādo. Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ. Samaṇo gotamo upaḍḍhapathaṃ āgaccheyya ahampi upaḍḍhapathaṃ gaccheyyaṃ. Te tattha ubhopi uttarimanussadhammā iddhipāṭihāriyaṃ kareyyāma. Ekaṃ ce samaṇo gotamo uttarimanussadhammā iddhipāṭihāriyaṃ karissati, dvāhaṃ karissāmi. Dve ce samaṇo gotamo uttarimanussadhammā iddhipāṭihāriyāni karissati, cattārāhaṃ karissāmi. Cattāri ce samaṇo gotamo uttarimanussadhammā iddhipāṭihāriyāni karissati , aṭṭhāhaṃ karissāmi. Iti yāvatakaṃ yāvatakaṃ samaṇo gotamo uttarimanussadhammā iddhipāṭihāriyaṃ karissati, taddiguṇaṃ taddiguṇāhaṃ karissāmī’ti abhikkamasseva ⁵⁴ kho; āvuso pāthikaputta, upaḍḍhapathaṃ. Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno’ti.

22. ‘‘ஏவங், போ⁴தி கோ², ப⁴க்³க³வ, ஸோ புரிஸோ தஸ்ஸா பரிஸாய படிஸ்ஸுத்வா யேன திந்து³ககா²ணுபரிப்³பா³ஜகாராமோ, யேன அசேலோ பாதி²கபுத்தோ தேனுபஸங்கமி. உபஸங்கமித்வா அசேலங் பாதி²கபுத்தங் ஏதத³வோச – ‘அபி⁴க்கமாவுஸோ பாதி²கபுத்த, அபி⁴க்கந்தா அபி⁴ஞ்ஞாதா அபி⁴ஞ்ஞாதா லிச்ச²வீ, அபி⁴க்கந்தா அபி⁴ஞ்ஞாதா அபி⁴ஞ்ஞாதா ச ப்³ராஹ்மணமஹாஸாலா க³ஹபதினேசயிகா நானாதித்தி²யா ஸமணப்³ராஹ்மணா. ஸமணோபி கோ³தமோ ஆயஸ்மதோ ஆராமே தி³வாவிஹாரங் நிஸின்னோ. பா⁴ஸிதா கோ² பன தே ஏஸா, ஆவுஸோ பாதி²கபுத்த, வேஸாலியங் பரிஸதி வாசா – ஸமணோபி கோ³தமோ ஞாணவாதோ³; அஹம்பி ஞாணவாதோ³. ஞாணவாதோ³ கோ² பன ஞாணவாதே³ன அரஹதி உத்தரிமனுஸ்ஸத⁴ம்மா இத்³தி⁴பாடிஹாரியங் த³ஸ்ஸேதுங்…பே॰… தத்³தி³கு³ணங் தத்³தி³கு³ணாஹங் கரிஸ்ஸாமீதி. அபி⁴க்கமஸ்ஸேவ கோ², ஆவுஸோ பாதி²கபுத்த, உபட்³ட⁴பத²ங். ஸப்³ப³பட²மங்யேவ ஆக³ந்த்வா ஸமணோ கோ³தமோ ஆயஸ்மதோ ஆராமே தி³வாவிஹாரங் நிஸின்னோ’தி.

22. ‘‘Evaṃ, bhoti kho, bhaggava, so puriso tassā parisāya paṭissutvā yena tindukakhāṇuparibbājakārāmo, yena acelo pāthikaputto tenupasaṅkami. Upasaṅkamitvā acelaṃ pāthikaputtaṃ etadavoca – ‘abhikkamāvuso pāthikaputta, abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo āyasmato ārāme divāvihāraṃ nisinno. Bhāsitā kho pana te esā, āvuso pāthikaputta, vesāliyaṃ parisati vācā – samaṇopi gotamo ñāṇavādo; ahampi ñāṇavādo. Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ…pe… taddiguṇaṃ taddiguṇāhaṃ karissāmīti. Abhikkamasseva kho, āvuso pāthikaputta, upaḍḍhapathaṃ. Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno’ti.

‘‘ஏவங் வுத்தே, ப⁴க்³க³வ, அசேலோ பாதி²கபுத்தோ ‘ஆயாமி ஆவுஸோ, ஆயாமி ஆவுஸோ’தி வத்வா தத்தே²வ ஸங்ஸப்பதி ⁵⁵, ந ஸக்கோதி ஆஸனாபி வுட்டா²துங். அத² கோ² ஸோ, ப⁴க்³க³வ, புரிஸோ அசேலங் பாதி²கபுத்தங் ஏதத³வோச – ‘கிங் ஸு நாம தே, ஆவுஸோ பாதி²கபுத்த, பாவளா ஸு நாம தே பீட²கஸ்மிங் அல்லீனா, பீட²கங் ஸு நாம தே பாவளாஸு அல்லீனங்? ஆயாமி ஆவுஸோ, ஆயாமி ஆவுஸோதி வத்வா தத்தே²வ ஸங்ஸப்பஸி, ந ஸக்கோஸி ஆஸனாபி வுட்டா²து’ந்தி. ஏவம்பி கோ², ப⁴க்³க³வ, வுச்சமானோ அசேலோ பாதி²கபுத்தோ ‘ஆயாமி ஆவுஸோ, ஆயாமி ஆவுஸோ’தி வத்வா தத்தே²வ ஸங்ஸப்பதி , ந ஸக்கோதி ஆஸனாபி வுட்டா²துங்.

‘‘Evaṃ vutte, bhaggava, acelo pāthikaputto ‘āyāmi āvuso, āyāmi āvuso’ti vatvā tattheva saṃsappati ⁵⁶, na sakkoti āsanāpi vuṭṭhātuṃ. Atha kho so, bhaggava, puriso acelaṃ pāthikaputtaṃ etadavoca – ‘kiṃ su nāma te, āvuso pāthikaputta, pāvaḷā su nāma te pīṭhakasmiṃ allīnā, pīṭhakaṃ su nāma te pāvaḷāsu allīnaṃ? Āyāmi āvuso, āyāmi āvusoti vatvā tattheva saṃsappasi, na sakkosi āsanāpi vuṭṭhātu’nti. Evampi kho, bhaggava, vuccamāno acelo pāthikaputto ‘āyāmi āvuso, āyāmi āvuso’ti vatvā tattheva saṃsappati , na sakkoti āsanāpi vuṭṭhātuṃ.

23. ‘‘யதா³ கோ² ஸோ, ப⁴க்³க³வ, புரிஸோ அஞ்ஞாஸி – ‘பராபூ⁴தரூபோ அயங் அசேலோ பாதி²கபுத்தோ. ஆயாமி ஆவுஸோ, ஆயாமி ஆவுஸோதி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²து’ந்தி. அத² தங் பரிஸங் ஆக³ந்த்வா ஏவமாரோசேஸி – ‘பராபூ⁴தரூபோ, போ⁴ ⁵⁷, அசேலோ பாதி²கபுத்தோ. ஆயாமி ஆவுஸோ, ஆயாமி ஆவுஸோதி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²து’ந்தி. ஏவங் வுத்தே, அஹங், ப⁴க்³க³வ, தங் பரிஸங் ஏதத³வோசங் – ‘அப⁴ப்³போ³ கோ², ஆவுஸோ, அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – ‘அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்ய’ந்தி, முத்³தா⁴பி தஸ்ஸ விபதெய்யாதி.

23. ‘‘Yadā kho so, bhaggava, puriso aññāsi – ‘parābhūtarūpo ayaṃ acelo pāthikaputto. Āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti. Atha taṃ parisaṃ āgantvā evamārocesi – ‘parābhūtarūpo, bho ⁵⁸, acelo pāthikaputto. Āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti. Evaṃ vutte, ahaṃ, bhaggava, taṃ parisaṃ etadavocaṃ – ‘abhabbo kho, āvuso, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ‘ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyya’nti, muddhāpi tassa vipateyyāti.

பட²மபா⁴ணவாரோ நிட்டி²தோ.

Paṭhamabhāṇavāro niṭṭhito.

24. ‘‘அத² கோ², ப⁴க்³க³வ, அஞ்ஞதரோ லிச்ச²விமஹாமத்தோ உட்டா²யாஸனா தங் பரிஸங் ஏதத³வோச – ‘தேன ஹி, போ⁴, முஹுத்தங் தாவ ஆக³மேத², யாவாஹங் க³ச்சா²மி ⁵⁹. அப்பேவ நாம அஹம்பி ஸக்குணெய்யங் அசேலங் பாதி²கபுத்தங் இமங் பரிஸங் ஆனேது’ந்தி.

24. ‘‘Atha kho, bhaggava, aññataro licchavimahāmatto uṭṭhāyāsanā taṃ parisaṃ etadavoca – ‘tena hi, bho, muhuttaṃ tāva āgametha, yāvāhaṃ gacchāmi ⁶⁰. Appeva nāma ahampi sakkuṇeyyaṃ acelaṃ pāthikaputtaṃ imaṃ parisaṃ ānetu’nti.

‘‘அத² கோ² ஸோ, ப⁴க்³க³வ, லிச்ச²விமஹாமத்தோ யேன திந்து³ககா²ணுபரிப்³பா³ஜகாராமோ, யேன அசேலோ பாதி²கபுத்தோ தேனுபஸங்கமி. உபஸங்கமித்வா அசேலங் பாதி²கபுத்தங் ஏதத³வோச – ‘அபி⁴க்கமாவுஸோ பாதி²கபுத்த, அபி⁴க்கந்தங் தே ஸெய்யோ, அபி⁴க்கந்தா அபி⁴ஞ்ஞாதா அபி⁴ஞ்ஞாதா லிச்ச²வீ, அபி⁴க்கந்தா அபி⁴ஞ்ஞாதா அபி⁴ஞ்ஞாதா ச ப்³ராஹ்மணமஹாஸாலா க³ஹபதினேசயிகா நானாதித்தி²யா ஸமணப்³ராஹ்மணா. ஸமணோபி கோ³தமோ ஆயஸ்மதோ ஆராமே தி³வாவிஹாரங் நிஸின்னோ. பா⁴ஸிதா கோ² பன தே ஏஸா, ஆவுஸோ பாதி²கபுத்த, வேஸாலியங் பரிஸதி வாசா – ஸமணோபி கோ³தமோ ஞாணவாதோ³…பே॰… தத்³தி³கு³ணங் தத்³தி³கு³ணாஹங் கரிஸ்ஸாமீதி. அபி⁴க்கமஸ்ஸேவ கோ², ஆவுஸோ பாதி²கபுத்த, உபட்³ட⁴பத²ங். ஸப்³ப³பட²மங்யேவ ஆக³ந்த்வா ஸமணோ கோ³தமோ ஆயஸ்மதோ ஆராமே தி³வாவிஹாரங் நிஸின்னோ. பா⁴ஸிதா கோ² பனேஸா, ஆவுஸோ பாதி²கபுத்த, ஸமணேன கோ³தமேன பரிஸதி வாசா – அப⁴ப்³போ³ கோ² அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யாதி. அபி⁴க்கமாவுஸோ பாதி²கபுத்த, அபி⁴க்கமனேனேவ தே ஜயங் கரிஸ்ஸாம, ஸமணஸ்ஸ கோ³தமஸ்ஸ பராஜய’ந்தி.

‘‘Atha kho so, bhaggava, licchavimahāmatto yena tindukakhāṇuparibbājakārāmo, yena acelo pāthikaputto tenupasaṅkami. Upasaṅkamitvā acelaṃ pāthikaputtaṃ etadavoca – ‘abhikkamāvuso pāthikaputta, abhikkantaṃ te seyyo, abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo āyasmato ārāme divāvihāraṃ nisinno. Bhāsitā kho pana te esā, āvuso pāthikaputta, vesāliyaṃ parisati vācā – samaṇopi gotamo ñāṇavādo…pe… taddiguṇaṃ taddiguṇāhaṃ karissāmīti. Abhikkamasseva kho, āvuso pāthikaputta, upaḍḍhapathaṃ. Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno. Bhāsitā kho panesā, āvuso pāthikaputta, samaṇena gotamena parisati vācā – abhabbo kho acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti. Abhikkamāvuso pāthikaputta, abhikkamaneneva te jayaṃ karissāma, samaṇassa gotamassa parājaya’nti.

‘‘ஏவங் வுத்தே, ப⁴க்³க³வ, அசேலோ பாதி²கபுத்தோ ‘ஆயாமி ஆவுஸோ, ஆயாமி ஆவுஸோ’தி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²துங். அத² கோ² ஸோ, ப⁴க்³க³வ, லிச்ச²விமஹாமத்தோ அசேலங் பாதி²கபுத்தங் ஏதத³வோச – ‘கிங் ஸு நாம தே, ஆவுஸோ பாதி²கபுத்த, பாவளா ஸு நாம தே பீட²கஸ்மிங் அல்லீனா, பீட²கங் ஸு நாம தே பாவளாஸு அல்லீனங் ? ஆயாமி ஆவுஸோ, ஆயாமி ஆவுஸோதி வத்வா தத்தே²வ ஸங்ஸப்பஸி, ந ஸக்கோஸி ஆஸனாபி வுட்டா²து’ந்தி . ஏவம்பி கோ², ப⁴க்³க³வ, வுச்சமானோ அசேலோ பாதி²கபுத்தோ ‘ஆயாமி ஆவுஸோ, ஆயாமி ஆவுஸோ’தி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²துங்.

‘‘Evaṃ vutte, bhaggava, acelo pāthikaputto ‘āyāmi āvuso, āyāmi āvuso’ti vatvā tattheva saṃsappati, na sakkoti āsanāpi vuṭṭhātuṃ. Atha kho so, bhaggava, licchavimahāmatto acelaṃ pāthikaputtaṃ etadavoca – ‘kiṃ su nāma te, āvuso pāthikaputta, pāvaḷā su nāma te pīṭhakasmiṃ allīnā, pīṭhakaṃ su nāma te pāvaḷāsu allīnaṃ ? Āyāmi āvuso, āyāmi āvusoti vatvā tattheva saṃsappasi, na sakkosi āsanāpi vuṭṭhātu’nti . Evampi kho, bhaggava, vuccamāno acelo pāthikaputto ‘āyāmi āvuso, āyāmi āvuso’ti vatvā tattheva saṃsappati, na sakkoti āsanāpi vuṭṭhātuṃ.

25. ‘‘யதா³ கோ² ஸோ, ப⁴க்³க³வ, லிச்ச²விமஹாமத்தோ அஞ்ஞாஸி – ‘பராபூ⁴தரூபோ அயங் அசேலோ பாதி²கபுத்தோ ஆயாமி ஆவுஸோ, ஆயாமி ஆவுஸோதி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²து’ந்தி. அத² தங் பரிஸங் ஆக³ந்த்வா ஏவமாரோசேஸி – ‘பராபூ⁴தரூபோ, போ⁴ ⁶¹, அசேலோ பாதி²கபுத்தோ ஆயாமி ஆவுஸோ, ஆயாமி ஆவுஸோதி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²து’ந்தி. ஏவங் வுத்தே, அஹங், ப⁴க்³க³வ, தங் பரிஸங் ஏதத³வோசங் – ‘அப⁴ப்³போ³ கோ², ஆவுஸோ, அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்ய. ஸசே பாயஸ்மந்தானங் லிச்ச²வீனங் ஏவமஸ்ஸ – மயங் அசேலங் பாதி²கபுத்தங் வரத்தாஹி ⁶² ப³ந்தி⁴த்வா கோ³யுகே³ஹி ஆவிஞ்செ²ய்யாமாதி ⁶³, தா வரத்தா சி²ஜ்ஜெய்யுங் பாதி²கபுத்தோ வா. அப⁴ப்³போ³ பன அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யா’தி.

25. ‘‘Yadā kho so, bhaggava, licchavimahāmatto aññāsi – ‘parābhūtarūpo ayaṃ acelo pāthikaputto āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti. Atha taṃ parisaṃ āgantvā evamārocesi – ‘parābhūtarūpo, bho ⁶⁴, acelo pāthikaputto āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti. Evaṃ vutte, ahaṃ, bhaggava, taṃ parisaṃ etadavocaṃ – ‘abhabbo kho, āvuso, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyya. Sace pāyasmantānaṃ licchavīnaṃ evamassa – mayaṃ acelaṃ pāthikaputtaṃ varattāhi ⁶⁵ bandhitvā goyugehi āviñcheyyāmāti ⁶⁶, tā varattā chijjeyyuṃ pāthikaputto vā. Abhabbo pana acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

26. ‘‘அத² கோ², ப⁴க்³க³வ, ஜாலியோ தா³ருபத்திகந்தேவாஸீ உட்டா²யாஸனா தங் பரிஸங் ஏதத³வோச – ‘தேன ஹி, போ⁴, முஹுத்தங் தாவ ஆக³மேத², யாவாஹங் க³ச்சா²மி; அப்பேவ நாம அஹம்பி ஸக்குணெய்யங் அசேலங் பாதி²கபுத்தங் இமங் பரிஸங் ஆனேது’’ந்தி.

26. ‘‘Atha kho, bhaggava, jāliyo dārupattikantevāsī uṭṭhāyāsanā taṃ parisaṃ etadavoca – ‘tena hi, bho, muhuttaṃ tāva āgametha, yāvāhaṃ gacchāmi; appeva nāma ahampi sakkuṇeyyaṃ acelaṃ pāthikaputtaṃ imaṃ parisaṃ ānetu’’nti.

‘‘அத² கோ², ப⁴க்³க³வ, ஜாலியோ தா³ருபத்திகந்தேவாஸீ யேன திந்து³ககா²ணுபரிப்³பா³ஜகாராமோ, யேன அசேலோ பாதி²கபுத்தோ தேனுபஸங்கமி. உபஸங்கமித்வா அசேலங் பாதி²கபுத்தங் ஏதத³வோச – ‘அபி⁴க்கமாவுஸோ பாதி²கபுத்த, அபி⁴க்கந்தங் தே ஸெய்யோ. அபி⁴க்கந்தா அபி⁴ஞ்ஞாதா அபி⁴ஞ்ஞாதா லிச்ச²வீ, அபி⁴க்கந்தா அபி⁴ஞ்ஞாதா அபி⁴ஞ்ஞாதா ச ப்³ராஹ்மணமஹாஸாலா க³ஹபதினேசயிகா நானாதித்தி²யா ஸமணப்³ராஹ்மணா. ஸமணோபி கோ³தமோ ஆயஸ்மதோ ஆராமே தி³வாவிஹாரங் நிஸின்னோ. பா⁴ஸிதா கோ² பன தே ஏஸா, ஆவுஸோ பாதி²கபுத்த, வேஸாலியங் பரிஸதி வாசா – ஸமணோபி கோ³தமோ ஞாணவாதோ³…பே॰… தத்³தி³கு³ணங் தத்³தி³கு³ணாஹங் கரிஸ்ஸாமீதி. அபி⁴க்கமஸ்ஸேவ, கோ² ஆவுஸோ பாதி²கபுத்த, உபட்³ட⁴பத²ங். ஸப்³ப³பட²மங்யேவ ஆக³ந்த்வா ஸமணோ கோ³தமோ ஆயஸ்மதோ ஆராமே தி³வாவிஹாரங் நிஸின்னோ. பா⁴ஸிதா கோ² பனேஸா, ஆவுஸோ பாதி²கபுத்த, ஸமணேன கோ³தமேன பரிஸதி வாசா – அப⁴ப்³போ³ அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்ய. ஸசே பாயஸ்மந்தானங் லிச்ச²வீனங் ஏவமஸ்ஸ – மயங் அசேலங் பாதி²கபுத்தங் வரத்தாஹி ப³ந்தி⁴த்வா கோ³யுகே³ஹி ஆவிஞ்செ²ய்யாமாதி. தா வரத்தா சி²ஜ்ஜெய்யுங் பாதி²கபுத்தோ வா. அப⁴ப்³போ³ பன அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் ஆக³ச்செ²ய்யந்தி, முத்³தா⁴பி தஸ்ஸ விபதெய்யாதி. அபி⁴க்கமாவுஸோ பாதி²கபுத்த, அபி⁴க்கமனேனேவ தே ஜயங் கரிஸ்ஸாம, ஸமணஸ்ஸ கோ³தமஸ்ஸ பராஜய’ந்தி.

‘‘Atha kho, bhaggava, jāliyo dārupattikantevāsī yena tindukakhāṇuparibbājakārāmo, yena acelo pāthikaputto tenupasaṅkami. Upasaṅkamitvā acelaṃ pāthikaputtaṃ etadavoca – ‘abhikkamāvuso pāthikaputta, abhikkantaṃ te seyyo. Abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo āyasmato ārāme divāvihāraṃ nisinno. Bhāsitā kho pana te esā, āvuso pāthikaputta, vesāliyaṃ parisati vācā – samaṇopi gotamo ñāṇavādo…pe… taddiguṇaṃ taddiguṇāhaṃ karissāmīti. Abhikkamasseva, kho āvuso pāthikaputta, upaḍḍhapathaṃ. Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno. Bhāsitā kho panesā, āvuso pāthikaputta, samaṇena gotamena parisati vācā – abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyya. Sace pāyasmantānaṃ licchavīnaṃ evamassa – mayaṃ acelaṃ pāthikaputtaṃ varattāhi bandhitvā goyugehi āviñcheyyāmāti. Tā varattā chijjeyyuṃ pāthikaputto vā. Abhabbo pana acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ āgaccheyyanti, muddhāpi tassa vipateyyāti. Abhikkamāvuso pāthikaputta, abhikkamaneneva te jayaṃ karissāma, samaṇassa gotamassa parājaya’nti.

‘‘ஏவங் வுத்தே, ப⁴க்³க³வ, அசேலோ பாதி²கபுத்தோ ‘ஆயாமி ஆவுஸோ, ஆயாமி ஆவுஸோ’தி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²துங். அத² கோ², ப⁴க்³க³வ, ஜாலியோ தா³ருபத்திகந்தேவாஸீ அசேலங் பாதி²கபுத்தங் ஏதத³வோச – ‘கிங் ஸு நாம தே, ஆவுஸோ பாதி²கபுத்த, பாவளா ஸு நாம தே பீட²கஸ்மிங் அல்லீனா, பீட²கங் ஸு நாம தே பாவளாஸு அல்லீனங்? ஆயாமி ஆவுஸோ, ஆயாமி ஆவுஸோதி வத்வா தத்தே²வ ஸங்ஸப்பஸி, ந ஸக்கோஸி ஆஸனாபி வுட்டா²து’ந்தி. ஏவம்பி கோ², ப⁴க்³க³வ, வுச்சமானோ அசேலோ பாதி²கபுத்தோ ‘‘ஆயாமி ஆவுஸோ, ஆயாமி ஆவுஸோ’’தி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²துந்தி.

‘‘Evaṃ vutte, bhaggava, acelo pāthikaputto ‘āyāmi āvuso, āyāmi āvuso’ti vatvā tattheva saṃsappati, na sakkoti āsanāpi vuṭṭhātuṃ. Atha kho, bhaggava, jāliyo dārupattikantevāsī acelaṃ pāthikaputtaṃ etadavoca – ‘kiṃ su nāma te, āvuso pāthikaputta, pāvaḷā su nāma te pīṭhakasmiṃ allīnā, pīṭhakaṃ su nāma te pāvaḷāsu allīnaṃ? Āyāmi āvuso, āyāmi āvusoti vatvā tattheva saṃsappasi, na sakkosi āsanāpi vuṭṭhātu’nti. Evampi kho, bhaggava, vuccamāno acelo pāthikaputto ‘‘āyāmi āvuso, āyāmi āvuso’’ti vatvā tattheva saṃsappati, na sakkoti āsanāpi vuṭṭhātunti.

27. ‘‘யதா³ கோ², ப⁴க்³க³வ, ஜாலியோ தா³ருபத்திகந்தேவாஸீ அஞ்ஞாஸி – ‘பராபூ⁴தரூபோ அயங் அசேலோ பாதி²கபுத்தோ ‘ஆயாமி ஆவுஸோ, ஆயாமி ஆவுஸோதி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²து’ந்தி, அத² நங் ஏதத³வோச –

27. ‘‘Yadā kho, bhaggava, jāliyo dārupattikantevāsī aññāsi – ‘parābhūtarūpo ayaṃ acelo pāthikaputto ‘āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti, atha naṃ etadavoca –

‘பூ⁴தபுப்³ப³ங், ஆவுஸோ பாதி²கபுத்த, ஸீஹஸ்ஸ மிக³ரஞ்ஞோ ஏதத³ஹோஸி – யங்னூனாஹங் அஞ்ஞதரங் வனஸண்ட³ங் நிஸ்ஸாய ஆஸயங் கப்பெய்யங். தத்ராஸயங் கப்பெத்வா ஸாயன்ஹஸமயங் ஆஸயா நிக்க²மெய்யங், ஆஸயா நிக்க²மித்வா விஜம்பெ⁴ய்யங், விஜம்பி⁴த்வா ஸமந்தா சதுத்³தி³ஸா அனுவிலோகெய்யங், ஸமந்தா சதுத்³தி³ஸா அனுவிலோகெத்வா திக்க²த்துங் ஸீஹனாத³ங் நதெ³ய்யங், திக்க²த்துங் ஸீஹனாத³ங் நதி³த்வா கோ³சராய பக்கமெய்யங். ஸோ வரங் வரங் மிக³ஸங்கே⁴ ⁶⁷ வதி⁴த்வா முது³மங்ஸானி முது³மங்ஸானி ப⁴க்க²யித்வா தமேவ ஆஸயங் அஜ்ஜு²பெய்ய’ந்தி.

‘Bhūtapubbaṃ, āvuso pāthikaputta, sīhassa migarañño etadahosi – yaṃnūnāhaṃ aññataraṃ vanasaṇḍaṃ nissāya āsayaṃ kappeyyaṃ. Tatrāsayaṃ kappetvā sāyanhasamayaṃ āsayā nikkhameyyaṃ, āsayā nikkhamitvā vijambheyyaṃ, vijambhitvā samantā catuddisā anuvilokeyyaṃ, samantā catuddisā anuviloketvā tikkhattuṃ sīhanādaṃ nadeyyaṃ, tikkhattuṃ sīhanādaṃ naditvā gocarāya pakkameyyaṃ. So varaṃ varaṃ migasaṃghe ⁶⁸ vadhitvā mudumaṃsāni mudumaṃsāni bhakkhayitvā tameva āsayaṃ ajjhupeyya’nti.

‘அத² கோ², ஆவுஸோ, ஸோ ஸீஹோ மிக³ராஜா அஞ்ஞதரங் வனஸண்ட³ங் நிஸ்ஸாய ஆஸயங் கப்பேஸி. தத்ராஸயங் கப்பெத்வா ஸாயன்ஹஸமயங் ஆஸயா நிக்க²மி, ஆஸயா நிக்க²மித்வா விஜம்பி⁴, விஜம்பி⁴த்வா ஸமந்தா சதுத்³தி³ஸா அனுவிலோகேஸி, ஸமந்தா சதுத்³தி³ஸா அனுவிலோகெத்வா திக்க²த்துங் ஸீஹனாத³ங் நதி³, திக்க²த்துங் ஸீஹனாத³ங் நதி³த்வா கோ³சராய பக்காமி. ஸோ வரங் வரங் மிக³ஸங்கே⁴ வதி⁴த்வா முது³மங்ஸானி முது³மங்ஸானி ப⁴க்க²யித்வா தமேவ ஆஸயங் அஜ்ஜு²பேஸி.

‘Atha kho, āvuso, so sīho migarājā aññataraṃ vanasaṇḍaṃ nissāya āsayaṃ kappesi. Tatrāsayaṃ kappetvā sāyanhasamayaṃ āsayā nikkhami, āsayā nikkhamitvā vijambhi, vijambhitvā samantā catuddisā anuvilokesi, samantā catuddisā anuviloketvā tikkhattuṃ sīhanādaṃ nadi, tikkhattuṃ sīhanādaṃ naditvā gocarāya pakkāmi. So varaṃ varaṃ migasaṅghe vadhitvā mudumaṃsāni mudumaṃsāni bhakkhayitvā tameva āsayaṃ ajjhupesi.

28. ‘தஸ்ஸேவ கோ², ஆவுஸோ பாதி²கபுத்த, ஸீஹஸ்ஸ மிக³ரஞ்ஞோ விகா⁴ஸஸங்வட்³டோ⁴ ஜரஸிங்கா³லோ ⁶⁹ தி³த்தோ சேவ ப³லவா ச. அத² கோ², ஆவுஸோ, தஸ்ஸ ஜரஸிங்கா³லஸ்ஸ ஏதத³ஹோஸி – கோ சாஹங், கோ ஸீஹோ மிக³ராஜா. யங்னூனாஹம்பி அஞ்ஞதரங் வனஸண்ட³ங் நிஸ்ஸாய ஆஸயங் கப்பெய்யங். தத்ராஸயங் கப்பெத்வா ஸாயன்ஹஸமயங் ஆஸயா நிக்க²மெய்யங், ஆஸயா நிக்க²மித்வா விஜம்பெ⁴ய்யங், விஜம்பி⁴த்வா ஸமந்தா சதுத்³தி³ஸா அனுவிலோகெய்யங், ஸமந்தா சதுத்³தி³ஸா அனுவிலோகெத்வா திக்க²த்துங் ஸீஹனாத³ங் நதெ³ய்யங், திக்க²த்துங் ஸீஹனாத³ங் நதி³த்வா கோ³சராய பக்கமெய்யங். ஸோ வரங் வரங் மிக³ஸங்கே⁴ வதி⁴த்வா முது³மங்ஸானி முது³மங்ஸானி ப⁴க்க²யித்வா தமேவ ஆஸயங் அஜ்ஜு²பெய்ய’ந்தி.

28. ‘Tasseva kho, āvuso pāthikaputta, sīhassa migarañño vighāsasaṃvaḍḍho jarasiṅgālo ⁷⁰ ditto ceva balavā ca. Atha kho, āvuso, tassa jarasiṅgālassa etadahosi – ko cāhaṃ, ko sīho migarājā. Yaṃnūnāhampi aññataraṃ vanasaṇḍaṃ nissāya āsayaṃ kappeyyaṃ. Tatrāsayaṃ kappetvā sāyanhasamayaṃ āsayā nikkhameyyaṃ, āsayā nikkhamitvā vijambheyyaṃ, vijambhitvā samantā catuddisā anuvilokeyyaṃ, samantā catuddisā anuviloketvā tikkhattuṃ sīhanādaṃ nadeyyaṃ, tikkhattuṃ sīhanādaṃ naditvā gocarāya pakkameyyaṃ. So varaṃ varaṃ migasaṅghe vadhitvā mudumaṃsāni mudumaṃsāni bhakkhayitvā tameva āsayaṃ ajjhupeyya’nti.

‘அத² கோ² ஸோ, ஆவுஸோ, ஜரஸிங்கா³லோ அஞ்ஞதரங் வனஸண்ட³ங் நிஸ்ஸாய ஆஸயங் கப்பேஸி. தத்ராஸயங் கப்பெத்வா ஸாயன்ஹஸமயங் ஆஸயா நிக்க²மி, ஆஸயா நிக்க²மித்வா விஜம்பி⁴, விஜம்பி⁴த்வா ஸமந்தா சதுத்³தி³ஸா அனுவிலோகேஸி, ஸமந்தா சதுத்³தி³ஸா அனுவிலோகெத்வா திக்க²த்துங் ஸீஹனாத³ங் நதி³ஸ்ஸாமீதி ஸிங்கா³லகங்யேவ அனதி³ பே⁴ரண்ட³கங்யேவ ⁷¹ அனதி³, கே ச ச²வே ஸிங்கா³லே, கே பன ஸீஹனாதே³தி ⁷².

‘Atha kho so, āvuso, jarasiṅgālo aññataraṃ vanasaṇḍaṃ nissāya āsayaṃ kappesi. Tatrāsayaṃ kappetvā sāyanhasamayaṃ āsayā nikkhami, āsayā nikkhamitvā vijambhi, vijambhitvā samantā catuddisā anuvilokesi, samantā catuddisā anuviloketvā tikkhattuṃ sīhanādaṃ nadissāmīti siṅgālakaṃyeva anadi bheraṇḍakaṃyeva ⁷³ anadi, ke ca chave siṅgāle, ke pana sīhanādeti ⁷⁴.

‘ஏவமேவ கோ² த்வங், ஆவுஸோ பாதி²கபுத்த, ஸுக³தாபதா³னேஸு ஜீவமானோ ஸுக³தாதிரித்தானி பு⁴ஞ்ஜமானோ ததா²க³தே அரஹந்தே ஸம்மாஸம்பு³த்³தே⁴ ஆஸாதே³தப்³ப³ங் மஞ்ஞஸி. கே ச ச²வே பாதி²கபுத்தே, கா ச ததா²க³தானங் அரஹந்தானங் ஸம்மாஸம்பு³த்³தா⁴னங் ஆஸாத³னா’தி.

‘Evameva kho tvaṃ, āvuso pāthikaputta, sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṃ maññasi. Ke ca chave pāthikaputte, kā ca tathāgatānaṃ arahantānaṃ sammāsambuddhānaṃ āsādanā’ti.

29. ‘‘யதோ கோ², ப⁴க்³க³வ, ஜாலியோ தா³ருபத்திகந்தேவாஸீ இமினா ஓபம்மேன நேவ அஸக்கி² அசேலங் பாதி²கபுத்தங் தம்ஹா ஆஸனா சாவேதுங். அத² நங் ஏதத³வோச –

29. ‘‘Yato kho, bhaggava, jāliyo dārupattikantevāsī iminā opammena neva asakkhi acelaṃ pāthikaputtaṃ tamhā āsanā cāvetuṃ. Atha naṃ etadavoca –

‘ஸீஹோதி அத்தானங் ஸமெக்கி²யான,

‘Sīhoti attānaṃ samekkhiyāna,

அமஞ்ஞி கொத்து² மிக³ராஜாஹமஸ்மி;

Amaññi kotthu migarājāhamasmi;

ததே²வ ⁷⁵ ஸோ ஸிங்கா³லகங் அனதி³,

Tatheva ⁷⁶ so siṅgālakaṃ anadi,

கே ச ச²வே ஸிங்கா³லே கே பன ஸீஹனாதே³’தி.

Ke ca chave siṅgāle ke pana sīhanāde’ti.

30. ‘‘யதோ கோ², ப⁴க்³க³வ, ஜாலியோ தா³ருபத்திகந்தேவாஸீ இமினாபி ஓபம்மேன நேவ அஸக்கி² அசேலங் பாதி²கபுத்தங் தம்ஹா ஆஸனா சாவேதுங். அத² நங் ஏதத³வோச –

30. ‘‘Yato kho, bhaggava, jāliyo dārupattikantevāsī imināpi opammena neva asakkhi acelaṃ pāthikaputtaṃ tamhā āsanā cāvetuṃ. Atha naṃ etadavoca –

‘அஞ்ஞங் அனுசங்கமனங், அத்தானங் விகா⁴ஸே ஸமெக்கி²ய;

‘Aññaṃ anucaṅkamanaṃ, attānaṃ vighāse samekkhiya;

யாவ அத்தானங் ந பஸ்ஸதி, கொத்து² தாவ ப்³யக்³கோ⁴தி மஞ்ஞதி.

Yāva attānaṃ na passati, kotthu tāva byagghoti maññati.

ததே²வ ஸோ ஸிங்கா³லகங் அனதி³;

Tatheva so siṅgālakaṃ anadi;

கே ச ச²வே ஸிங்கா³லே கே பன ஸீஹனாதே³’தி.

Ke ca chave siṅgāle ke pana sīhanāde’ti.

31. ‘‘யதோ கோ², ப⁴க்³க³வ, ஜாலியோ தா³ருபத்திகந்தேவாஸீ இமினாபி ஓபம்மேன நேவ அஸக்கி² அசேலங் பாதி²கபுத்தங் தம்ஹா ஆஸனா சாவேதுங். அத² நங் ஏதத³வோச –

31. ‘‘Yato kho, bhaggava, jāliyo dārupattikantevāsī imināpi opammena neva asakkhi acelaṃ pāthikaputtaṃ tamhā āsanā cāvetuṃ. Atha naṃ etadavoca –

‘பு⁴த்வான பே⁴கே ⁷⁷ க²லமூஸிகாயோ,

‘Bhutvāna bheke ⁷⁸ khalamūsikāyo,

கடஸீஸு கி²த்தானி ச கோணபானி ⁷⁹;

Kaṭasīsu khittāni ca koṇapāni ⁸⁰;

மஹாவனே ஸுஞ்ஞவனே விவட்³டோ⁴,

Mahāvane suññavane vivaḍḍho,

அமஞ்ஞி கொத்து² மிக³ராஜாஹமஸ்மி.

Amaññi kotthu migarājāhamasmi.

ததே²வ ஸோ ஸிங்கா³லகங் அனதி³;

Tatheva so siṅgālakaṃ anadi;

கே ச ச²வே ஸிங்கா³லே கே பன ஸீஹனாதே³’தி.

Ke ca chave siṅgāle ke pana sīhanāde’ti.

32. ‘‘யதோ கோ², ப⁴க்³க³வ, ஜாலியோ தா³ருபத்திகந்தேவாஸீ இமினாபி ஓபம்மேன நேவ அஸக்கி² அசேலங் பாதி²கபுத்தங் தம்ஹா ஆஸனா சாவேதுங். அத² தங் பரிஸங் ஆக³ந்த்வா ஏவமாரோசேஸி – ‘பராபூ⁴தரூபோ, போ⁴, அசேலோ பாதி²கபுத்தோ ஆயாமி ஆவுஸோ, ஆயாமி ஆவுஸோதி வத்வா தத்தே²வ ஸங்ஸப்பதி, ந ஸக்கோதி ஆஸனாபி வுட்டா²து’ந்தி.

32. ‘‘Yato kho, bhaggava, jāliyo dārupattikantevāsī imināpi opammena neva asakkhi acelaṃ pāthikaputtaṃ tamhā āsanā cāvetuṃ. Atha taṃ parisaṃ āgantvā evamārocesi – ‘parābhūtarūpo, bho, acelo pāthikaputto āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti.

33. ‘‘ஏவங் வுத்தே, அஹங், ப⁴க்³க³வ, தங் பரிஸங் ஏதத³வோசங் – ‘அப⁴ப்³போ³ கோ², ஆவுஸோ, அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்ய. ஸசேபாயஸ்மந்தானங் லிச்ச²வீனங் ஏவமஸ்ஸ – மயங் அசேலங் பாதி²கபுத்தங் வரத்தாஹி ப³ந்தி⁴த்வா நாகே³ஹி ⁸¹ ஆவிஞ்செ²ய்யாமாதி . தா வரத்தா சி²ஜ்ஜெய்யுங் பாதி²கபுத்தோ வா. அப⁴ப்³போ³ பன அசேலோ பாதி²கபுத்தோ தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா மம ஸம்முகீ²பா⁴வங் ஆக³ந்துங். ஸசேபிஸ்ஸ ஏவமஸ்ஸ – அஹங் தங் வாசங் அப்பஹாய தங் சித்தங் அப்பஹாய தங் தி³ட்டி²ங் அப்படினிஸ்ஸஜ்ஜித்வா ஸமணஸ்ஸ கோ³தமஸ்ஸ ஸம்முகீ²பா⁴வங் க³ச்செ²ய்யந்தி, முத்³தா⁴பி தஸ்ஸ விபதெய்யா’தி.

33. ‘‘Evaṃ vutte, ahaṃ, bhaggava, taṃ parisaṃ etadavocaṃ – ‘abhabbo kho, āvuso, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyya. Sacepāyasmantānaṃ licchavīnaṃ evamassa – mayaṃ acelaṃ pāthikaputtaṃ varattāhi bandhitvā nāgehi ⁸² āviñcheyyāmāti . Tā varattā chijjeyyuṃ pāthikaputto vā. Abhabbo pana acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

34. ‘‘அத² க்²வாஹங், ப⁴க்³க³வ, தங் பரிஸங் த⁴ம்மியா கதா²ய ஸந்த³ஸ்ஸேஸிங் ஸமாத³பேஸிங் ஸமுத்தேஜேஸிங் ஸம்பஹங்ஸேஸிங், தங் பரிஸங் த⁴ம்மியா கதா²ய ஸந்த³ஸ்ஸெத்வா ஸமாத³பெத்வா ஸமுத்தேஜெத்வா ஸம்பஹங்ஸெத்வா மஹாப³ந்த⁴னா மொக்க²ங் கரித்வா சதுராஸீதிபாணஸஹஸ்ஸானி மஹாவிது³க்³கா³ உத்³த⁴ரித்வா தேஜோதா⁴துங் ஸமாபஜ்ஜித்வா ஸத்ததாலங் வேஹாஸங் அப்³பு⁴க்³க³ந்த்வா அஞ்ஞங் ஸத்ததாலம்பி அச்சிங் ⁸³ அபி⁴னிம்மினித்வா பஜ்ஜலித்வா தூ⁴மாயித்வா ⁸⁴ மஹாவனே கூடாகா³ரஸாலாயங் பச்சுட்டா²ஸிங்.

34. ‘‘Atha khvāhaṃ, bhaggava, taṃ parisaṃ dhammiyā kathāya sandassesiṃ samādapesiṃ samuttejesiṃ sampahaṃsesiṃ, taṃ parisaṃ dhammiyā kathāya sandassetvā samādapetvā samuttejetvā sampahaṃsetvā mahābandhanā mokkhaṃ karitvā caturāsītipāṇasahassāni mahāviduggā uddharitvā tejodhātuṃ samāpajjitvā sattatālaṃ vehāsaṃ abbhuggantvā aññaṃ sattatālampi acciṃ ⁸⁵ abhinimminitvā pajjalitvā dhūmāyitvā ⁸⁶ mahāvane kūṭāgārasālāyaṃ paccuṭṭhāsiṃ.

35. ‘‘அத² கோ², ப⁴க்³க³வ, ஸுனக்க²த்தோ லிச்ச²விபுத்தோ யேனாஹங் தேனுபஸங்கமி; உபஸங்கமித்வா மங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னங் கோ² அஹங், ப⁴க்³க³வ, ஸுனக்க²த்தங் லிச்ச²விபுத்தங் ஏதத³வோசங் – ‘தங் கிங் மஞ்ஞஸி, ஸுனக்க²த்த, யதே²வ தே அஹங் அசேலங் பாதி²கபுத்தங் ஆரப்³ப⁴ ப்³யாகாஸிங், ததே²வ தங் விபாகங் அஞ்ஞதா² வா’தி? ‘யதே²வ மே, ப⁴ந்தே, ப⁴க³வா அசேலங் பாதி²கபுத்தங் ஆரப்³ப⁴ ப்³யாகாஸி, ததே²வ தங் விபாகங், நோ அஞ்ஞதா²’தி.

35. ‘‘Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnaṃ kho ahaṃ, bhaggava, sunakkhattaṃ licchaviputtaṃ etadavocaṃ – ‘taṃ kiṃ maññasi, sunakkhatta, yatheva te ahaṃ acelaṃ pāthikaputtaṃ ārabbha byākāsiṃ, tatheva taṃ vipākaṃ aññathā vā’ti? ‘Yatheva me, bhante, bhagavā acelaṃ pāthikaputtaṃ ārabbha byākāsi, tatheva taṃ vipākaṃ, no aññathā’ti.

‘தங் கிங் மஞ்ஞஸி, ஸுனக்க²த்த, யதி³ ஏவங் ஸந்தே கதங் வா ஹோதி உத்தரிமனுஸ்ஸத⁴ம்மா இத்³தி⁴பாடிஹாரியங், அகதங் வா’தி? ‘அத்³தா⁴ கோ², ப⁴ந்தே, ஏவங் ஸந்தே கதங் ஹோதி உத்தரிமனுஸ்ஸத⁴ம்மா இத்³தி⁴பாடிஹாரியங், நோ அகத’ந்தி. ‘ஏவம்பி கோ² மங் த்வங், மோக⁴புரிஸ, உத்தரிமனுஸ்ஸத⁴ம்மா இத்³தி⁴பாடிஹாரியங் கரொந்தங் ஏவங் வதே³ஸி – ந ஹி பன மே, ப⁴ந்தே, ப⁴க³வா உத்தரிமனுஸ்ஸத⁴ம்மா இத்³தி⁴பாடிஹாரியங் கரோதீதி. பஸ்ஸ, மோக⁴புரிஸ, யாவஞ்ச தே இத³ங் அபரத்³த⁴ங்’தி.

‘Taṃ kiṃ maññasi, sunakkhatta, yadi evaṃ sante kataṃ vā hoti uttarimanussadhammā iddhipāṭihāriyaṃ, akataṃ vā’ti? ‘Addhā kho, bhante, evaṃ sante kataṃ hoti uttarimanussadhammā iddhipāṭihāriyaṃ, no akata’nti. ‘Evampi kho maṃ tvaṃ, moghapurisa, uttarimanussadhammā iddhipāṭihāriyaṃ karontaṃ evaṃ vadesi – na hi pana me, bhante, bhagavā uttarimanussadhammā iddhipāṭihāriyaṃ karotīti. Passa, moghapurisa, yāvañca te idaṃ aparaddhaṃ’ti.

‘‘ஏவம்பி கோ², ப⁴க்³க³வ, ஸுனக்க²த்தோ லிச்ச²விபுத்தோ மயா வுச்சமானோ அபக்கமேவ இமஸ்மா த⁴ம்மவினயா, யதா² தங் ஆபாயிகோ நேரயிகோ.

‘‘Evampi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṃ āpāyiko nerayiko.

அக்³க³ஞ்ஞபஞ்ஞத்திகதா²

Aggaññapaññattikathā

36. ‘‘அக்³க³ஞ்ஞஞ்சாஹங், ப⁴க்³க³வ, பஜானாமி. தஞ்ச பஜானாமி ⁸⁷, ததோ ச உத்தரிதரங் பஜானாமி, தஞ்ச பஜானங் ⁸⁸ ந பராமஸாமி, அபராமஸதோ ச மே பச்சத்தஞ்ஞேவ நிப்³பு³தி விதி³தா, யத³பி⁴ஜானங் ததா²க³தோ நோ அனயங் ஆபஜ்ஜதி .

36. ‘‘Aggaññañcāhaṃ, bhaggava, pajānāmi. Tañca pajānāmi ⁸⁹, tato ca uttaritaraṃ pajānāmi, tañca pajānaṃ ⁹⁰ na parāmasāmi, aparāmasato ca me paccattaññeva nibbuti viditā, yadabhijānaṃ tathāgato no anayaṃ āpajjati .

37. ‘‘ஸந்தி, ப⁴க்³க³வ, ஏகே ஸமணப்³ராஹ்மணா இஸ்ஸரகுத்தங் ப்³ரஹ்மகுத்தங் ஆசரியகங் அக்³க³ஞ்ஞங் பஞ்ஞபெந்தி. த்யாஹங் உபஸங்கமித்வா ஏவங் வதா³மி – ‘ஸச்சங் கிர தும்ஹே ஆயஸ்மந்தோ இஸ்ஸரகுத்தங் ப்³ரஹ்மகுத்தங் ஆசரியகங் அக்³க³ஞ்ஞங் பஞ்ஞபேதா²’தி? தே ச மே ஏவங் புட்டா², ‘ஆமோ’தி ⁹¹ படிஜானந்தி. த்யாஹங் ஏவங் வதா³மி – ‘கத²ங்விஹிதகங் பன ⁹² தும்ஹே ஆயஸ்மந்தோ இஸ்ஸரகுத்தங் ப்³ரஹ்மகுத்தங் ஆசரியகங் அக்³க³ஞ்ஞங் பஞ்ஞபேதா²’தி? தே மயா புட்டா² ந ஸம்பாயந்தி, அஸம்பாயந்தா மமஞ்ஞேவ படிபுச்ச²ந்தி. தேஸாஹங் புட்டோ² ப்³யாகரோமி –

37. ‘‘Santi, bhaggava, eke samaṇabrāhmaṇā issarakuttaṃ brahmakuttaṃ ācariyakaṃ aggaññaṃ paññapenti. Tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto issarakuttaṃ brahmakuttaṃ ācariyakaṃ aggaññaṃ paññapethā’ti? Te ca me evaṃ puṭṭhā, ‘āmo’ti ⁹³ paṭijānanti. Tyāhaṃ evaṃ vadāmi – ‘kathaṃvihitakaṃ pana ⁹⁴ tumhe āyasmanto issarakuttaṃ brahmakuttaṃ ācariyakaṃ aggaññaṃ paññapethā’ti? Te mayā puṭṭhā na sampāyanti, asampāyantā mamaññeva paṭipucchanti. Tesāhaṃ puṭṭho byākaromi –

38. ‘ஹோதி கோ² ஸோ, ஆவுஸோ, ஸமயோ யங் கதா³சி கரஹசி தீ³க⁴ஸ்ஸ அத்³து⁴னோ அச்சயேன அயங் லோகோ ஸங்வட்டதி. ஸங்வட்டமானே லோகே யேபு⁴ய்யேன ஸத்தா ஆப⁴ஸ்ஸரஸங்வத்தனிகா ஹொந்தி. தே தத்த² ஹொந்தி மனோமயா பீதிப⁴க்கா² ஸயங்பபா⁴ அந்தலிக்க²சரா ஸுப⁴ட்டா²யினோ சிரங் தீ³க⁴மத்³தா⁴னங் திட்ட²ந்தி.

38. ‘Hoti kho so, āvuso, samayo yaṃ kadāci karahaci dīghassa addhuno accayena ayaṃ loko saṃvaṭṭati. Saṃvaṭṭamāne loke yebhuyyena sattā ābhassarasaṃvattanikā honti. Te tattha honti manomayā pītibhakkhā sayaṃpabhā antalikkhacarā subhaṭṭhāyino ciraṃ dīghamaddhānaṃ tiṭṭhanti.

‘ஹோதி கோ² ஸோ, ஆவுஸோ, ஸமயோ யங் கதா³சி கரஹசி தீ³க⁴ஸ்ஸ அத்³து⁴னோ அச்சயேன அயங் லோகோ விவட்டதி. விவட்டமானே லோகே ஸுஞ்ஞங் ப்³ரஹ்மவிமானங் பாதுப⁴வதி. அத² கோ² ⁹⁵ அஞ்ஞதரோ ஸத்தோ ஆயுக்க²யா வா புஞ்ஞக்க²யா வா ஆப⁴ஸ்ஸரகாயா சவித்வா ஸுஞ்ஞங் ப்³ரஹ்மவிமானங் உபபஜ்ஜதி . ஸோ தத்த² ஹோதி மனோமயோ பீதிப⁴க்கோ² ஸயங்பபோ⁴ அந்தலிக்க²சரோ ஸுப⁴ட்டா²யீ, சிரங் தீ³க⁴மத்³தா⁴னங் திட்ட²தி.

‘Hoti kho so, āvuso, samayo yaṃ kadāci karahaci dīghassa addhuno accayena ayaṃ loko vivaṭṭati. Vivaṭṭamāne loke suññaṃ brahmavimānaṃ pātubhavati. Atha kho ⁹⁶ aññataro satto āyukkhayā vā puññakkhayā vā ābhassarakāyā cavitvā suññaṃ brahmavimānaṃ upapajjati . So tattha hoti manomayo pītibhakkho sayaṃpabho antalikkhacaro subhaṭṭhāyī, ciraṃ dīghamaddhānaṃ tiṭṭhati.

‘தஸ்ஸ தத்த² ஏககஸ்ஸ தீ³க⁴ரத்தங் நிவுஸிதத்தா அனபி⁴ரதி பரிதஸ்ஸனா உப்பஜ்ஜதி – அஹோ வத அஞ்ஞேபி ஸத்தா இத்த²த்தங் ஆக³ச்செ²ய்யுந்தி. அத² அஞ்ஞேபி ஸத்தா ஆயுக்க²யா வா புஞ்ஞக்க²யா வா ஆப⁴ஸ்ஸரகாயா சவித்வா ப்³ரஹ்மவிமானங் உபபஜ்ஜந்தி தஸ்ஸ ஸத்தஸ்ஸ ஸஹப்³யதங். தேபி தத்த² ஹொந்தி மனோமயா பீதிப⁴க்கா² ஸயங்பபா⁴ அந்தலிக்க²சரா ஸுப⁴ட்டா²யினோ, சிரங் தீ³க⁴மத்³தா⁴னங் திட்ட²ந்தி.

‘Tassa tattha ekakassa dīgharattaṃ nivusitattā anabhirati paritassanā uppajjati – aho vata aññepi sattā itthattaṃ āgaccheyyunti. Atha aññepi sattā āyukkhayā vā puññakkhayā vā ābhassarakāyā cavitvā brahmavimānaṃ upapajjanti tassa sattassa sahabyataṃ. Tepi tattha honti manomayā pītibhakkhā sayaṃpabhā antalikkhacarā subhaṭṭhāyino, ciraṃ dīghamaddhānaṃ tiṭṭhanti.

39. ‘தத்ராவுஸோ, யோ ஸோ ஸத்தோ பட²மங் உபபன்னோ, தஸ்ஸ ஏவங் ஹோதி – அஹமஸ்மி ப்³ரஹ்மா மஹாப்³ரஹ்மா அபி⁴பூ⁴ அனபி⁴பூ⁴தோ அஞ்ஞத³த்து²த³ஸோ வஸவத்தீ இஸ்ஸரோ கத்தா நிம்மாதா ஸெட்டோ² ஸஜிதா ⁹⁷ வஸீ பிதா பூ⁴தப⁴ப்³யானங், மயா இமே ஸத்தா நிம்மிதா. தங் கிஸ்ஸ ஹேது? மமஞ்ஹி புப்³பே³ ஏதத³ஹோஸி – அஹோ வத அஞ்ஞேபி ஸத்தா இத்த²த்தங் ஆக³ச்செ²ய்யுந்தி; இதி மம ச மனோபணிதி⁴. இமே ச ஸத்தா இத்த²த்தங் ஆக³தாதி.

39. ‘Tatrāvuso, yo so satto paṭhamaṃ upapanno, tassa evaṃ hoti – ahamasmi brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā ⁹⁸ vasī pitā bhūtabhabyānaṃ, mayā ime sattā nimmitā. Taṃ kissa hetu? Mamañhi pubbe etadahosi – aho vata aññepi sattā itthattaṃ āgaccheyyunti; iti mama ca manopaṇidhi. Ime ca sattā itthattaṃ āgatāti.

‘யேபி தே ஸத்தா பச்சா² உபபன்னா, தேஸம்பி ஏவங் ஹோதி – அயங் கோ² ப⁴வங் ப்³ரஹ்மா மஹாப்³ரஹ்மா அபி⁴பூ⁴ அனபி⁴பூ⁴தோ அஞ்ஞத³த்து²த³ஸோ வஸவத்தீ இஸ்ஸரோ கத்தா நிம்மாதா ஸெட்டோ² ஸஜிதா வஸீ பிதா பூ⁴தப⁴ப்³யானங்; இமினா மயங் போ⁴தா ப்³ரஹ்முனா நிம்மிதா. தங் கிஸ்ஸ ஹேது? இமஞ்ஹி மயங் அத்³த³ஸாம இத⁴ பட²மங் உபபன்னங்; மயங் பனாம்ஹ பச்சா² உபபன்னாதி.

‘Yepi te sattā pacchā upapannā, tesampi evaṃ hoti – ayaṃ kho bhavaṃ brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṃ; iminā mayaṃ bhotā brahmunā nimmitā. Taṃ kissa hetu? Imañhi mayaṃ addasāma idha paṭhamaṃ upapannaṃ; mayaṃ panāmha pacchā upapannāti.

40. ‘தத்ராவுஸோ , யோ ஸோ ஸத்தோ பட²மங் உபபன்னோ, ஸோ தீ³கா⁴யுகதரோ ச ஹோதி வண்ணவந்ததரோ ச மஹேஸக்க²தரோ ச. யே பன தே ஸத்தா பச்சா² உபபன்னா, தே அப்பாயுகதரா ச ஹொந்தி து³ப்³ப³ண்ணதரா ச அப்பேஸக்க²தரா ச.

40. ‘Tatrāvuso , yo so satto paṭhamaṃ upapanno, so dīghāyukataro ca hoti vaṇṇavantataro ca mahesakkhataro ca. Ye pana te sattā pacchā upapannā, te appāyukatarā ca honti dubbaṇṇatarā ca appesakkhatarā ca.

‘டா²னங் கோ² பனேதங், ஆவுஸோ, விஜ்ஜதி, யங் அஞ்ஞதரோ ஸத்தோ தம்ஹா காயா சவித்வா இத்த²த்தங் ஆக³ச்ச²தி. இத்த²த்தங் ஆக³தோ ஸமானோ அகா³ரஸ்மா அனகா³ரியங் பப்³ப³ஜதி. அகா³ரஸ்மா அனகா³ரியங் பப்³ப³ஜிதோ ஸமானோ ஆதப்பமன்வாய பதா⁴னமன்வாய அனுயோக³மன்வாய அப்பமாத³மன்வாய ஸம்மாமனஸிகாரமன்வாய ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே தங் புப்³பே³னிவாஸங் அனுஸ்ஸரதி; ததோ பரங் நானுஸ்ஸரதி.

‘Ṭhānaṃ kho panetaṃ, āvuso, vijjati, yaṃ aññataro satto tamhā kāyā cavitvā itthattaṃ āgacchati. Itthattaṃ āgato samāno agārasmā anagāriyaṃ pabbajati. Agārasmā anagāriyaṃ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṃ cetosamādhiṃ phusati, yathāsamāhite citte taṃ pubbenivāsaṃ anussarati; tato paraṃ nānussarati.

‘ஸோ ஏவமாஹ – யோ கோ² ஸோ ப⁴வங் ப்³ரஹ்மா மஹாப்³ரஹ்மா அபி⁴பூ⁴ அனபி⁴பூ⁴தோ அஞ்ஞத³த்து²த³ஸோ வஸவத்தீ இஸ்ஸரோ கத்தா நிம்மாதா ஸெட்டோ² ஸஜிதா வஸீ பிதா பூ⁴தப⁴ப்³யானங், யேன மயங் போ⁴தா ப்³ரஹ்முனா நிம்மிதா. ஸோ நிச்சோ து⁴வோ ⁹⁹ ஸஸ்ஸதோ அவிபரிணாமத⁴ம்மோ ஸஸ்ஸதிஸமங் ததே²வ ட²ஸ்ஸதி. யே பன மயங் அஹும்ஹா தேன போ⁴தா ப்³ரஹ்முனா நிம்மிதா, தே மயங் அனிச்சா அத்³து⁴வா ¹⁰⁰ அப்பாயுகா சவனத⁴ம்மா இத்த²த்தங் ஆக³தா’தி. ஏவங்விஹிதகங் நோ தும்ஹே ஆயஸ்மந்தோ இஸ்ஸரகுத்தங் ப்³ரஹ்மகுத்தங் ஆசரியகங் அக்³க³ஞ்ஞங் பஞ்ஞபேதா²தி. ‘தே ஏவமாஹங்ஸு – ஏவங் கோ² நோ, ஆவுஸோ கோ³தம, ஸுதங், யதே²வாயஸ்மா கோ³தமோ ஆஹா’தி. ‘‘அக்³க³ஞ்ஞஞ்சாஹங், ப⁴க்³க³வ, பஜானாமி. தஞ்ச பஜானாமி, ததோ ச உத்தரிதரங் பஜானாமி, தஞ்ச பஜானங் ந பராமஸாமி, அபராமஸதோ ச மே பச்சத்தஞ்ஞேவ நிப்³பு³தி விதி³தா. யத³பி⁴ஜானங் ததா²க³தோ நோ அனயங் ஆபஜ்ஜதி.

‘So evamāha – yo kho so bhavaṃ brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṃ, yena mayaṃ bhotā brahmunā nimmitā. So nicco dhuvo ¹⁰¹ sassato avipariṇāmadhammo sassatisamaṃ tatheva ṭhassati. Ye pana mayaṃ ahumhā tena bhotā brahmunā nimmitā, te mayaṃ aniccā addhuvā ¹⁰² appāyukā cavanadhammā itthattaṃ āgatā’ti. Evaṃvihitakaṃ no tumhe āyasmanto issarakuttaṃ brahmakuttaṃ ācariyakaṃ aggaññaṃ paññapethāti. ‘Te evamāhaṃsu – evaṃ kho no, āvuso gotama, sutaṃ, yathevāyasmā gotamo āhā’ti. ‘‘Aggaññañcāhaṃ, bhaggava, pajānāmi. Tañca pajānāmi, tato ca uttaritaraṃ pajānāmi, tañca pajānaṃ na parāmasāmi, aparāmasato ca me paccattaññeva nibbuti viditā. Yadabhijānaṃ tathāgato no anayaṃ āpajjati.

41. ‘‘ஸந்தி, ப⁴க்³க³வ, ஏகே ஸமணப்³ராஹ்மணா கி²ட்³டா³பதோ³ஸிகங் ஆசரியகங் அக்³க³ஞ்ஞங் பஞ்ஞபெந்தி. த்யாஹங் உபஸங்கமித்வா ஏவங் வதா³மி – ‘ஸச்சங் கிர தும்ஹே ஆயஸ்மந்தோ கி²ட்³டா³பதோ³ஸிகங் ஆசரியகங் அக்³க³ஞ்ஞங் பஞ்ஞபேதா²’தி? தே ச மே ஏவங் புட்டா² ‘ஆமோ’தி படிஜானந்தி. த்யாஹங் ஏவங் வதா³மி – ‘கத²ங்விஹிதகங் பன தும்ஹே ஆயஸ்மந்தோ கி²ட்³டா³பதோ³ஸிகங் ஆசரியகங் அக்³க³ஞ்ஞங் பஞ்ஞபேதா²’தி? தே மயா புட்டா² ந ஸம்பாயந்தி, அஸம்பாயந்தா மமஞ்ஞேவ படிபுச்ச²ந்தி, தேஸாஹங் புட்டோ² ப்³யாகரோமி –

41. ‘‘Santi, bhaggava, eke samaṇabrāhmaṇā khiḍḍāpadosikaṃ ācariyakaṃ aggaññaṃ paññapenti. Tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto khiḍḍāpadosikaṃ ācariyakaṃ aggaññaṃ paññapethā’ti? Te ca me evaṃ puṭṭhā ‘āmo’ti paṭijānanti. Tyāhaṃ evaṃ vadāmi – ‘kathaṃvihitakaṃ pana tumhe āyasmanto khiḍḍāpadosikaṃ ācariyakaṃ aggaññaṃ paññapethā’ti? Te mayā puṭṭhā na sampāyanti, asampāyantā mamaññeva paṭipucchanti, tesāhaṃ puṭṭho byākaromi –

42. ‘ஸந்தாவுஸோ, கி²ட்³டா³பதோ³ஸிகா நாம தே³வா. தே அதிவேலங் ஹஸ்ஸகி²ட்³டா³ரதித⁴ம்மஸமாபன்னா ¹⁰³ விஹரந்தி. தேஸங் அதிவேலங் ஹஸ்ஸகி²ட்³டா³ரதித⁴ம்மஸமாபன்னானங் விஹரதங் ஸதி ஸம்முஸ்ஸதி, ஸதியா ஸம்மோஸா ¹⁰⁴ தே தே³வா தம்ஹா காயா சவந்தி.

42. ‘Santāvuso, khiḍḍāpadosikā nāma devā. Te ativelaṃ hassakhiḍḍāratidhammasamāpannā ¹⁰⁵ viharanti. Tesaṃ ativelaṃ hassakhiḍḍāratidhammasamāpannānaṃ viharataṃ sati sammussati, satiyā sammosā ¹⁰⁶ te devā tamhā kāyā cavanti.

‘டா²னங் கோ² பனேதங், ஆவுஸோ, விஜ்ஜதி, யங் அஞ்ஞதரோ ஸத்தோ தம்ஹா காயா சவித்வா இத்த²த்தங் ஆக³ச்ச²தி, இத்த²த்தங் ஆக³தோ ஸமானோ அகா³ரஸ்மா அனகா³ரியங் பப்³ப³ஜதி, அகா³ரஸ்மா அனகா³ரியங் பப்³ப³ஜிதோ ஸமானோ ஆதப்பமன்வாய பதா⁴னமன்வாய அனுயோக³மன்வாய அப்பமாத³மன்வாய ஸம்மாமனஸிகாரமன்வாய ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே தங் புப்³பே³னிவாஸங் அனுஸ்ஸரதி; ததோ பரங் நானுஸ்ஸரதி.

‘Ṭhānaṃ kho panetaṃ, āvuso, vijjati, yaṃ aññataro satto tamhā kāyā cavitvā itthattaṃ āgacchati, itthattaṃ āgato samāno agārasmā anagāriyaṃ pabbajati, agārasmā anagāriyaṃ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṃ cetosamādhiṃ phusati, yathāsamāhite citte taṃ pubbenivāsaṃ anussarati; tato paraṃ nānussarati.

‘ஸோ ஏவமாஹ – யே கோ² தே பொ⁴ந்தோ தே³வா ந கி²ட்³டா³பதோ³ஸிகா தே ந அதிவேலங் ஹஸ்ஸகி²ட்³டா³ரதித⁴ம்மஸமாபன்னா விஹரந்தி. தேஸங் நாதிவேலங் ஹஸ்ஸகி²ட்³டா³ரதித⁴ம்மஸமாபன்னானங் விஹரதங் ஸதி ந ஸம்முஸ்ஸதி, ஸதியா அஸம்மோஸா தே தே³வா தம்ஹா காயா ந சவந்தி, நிச்சா து⁴வா ஸஸ்ஸதா அவிபரிணாமத⁴ம்மா ஸஸ்ஸதிஸமங் ததே²வ ட²ஸ்ஸந்தி. யே பன மயங் அஹும்ஹா கி²ட்³டா³பதோ³ஸிகா தே மயங் அதிவேலங் ஹஸ்ஸகி²ட்³டா³ரதித⁴ம்மஸமாபன்னா விஹரிம்ஹா, தேஸங் நோ அதிவேலங் ஹஸ்ஸகி²ட்³டா³ரதித⁴ம்மஸமாபன்னானங் விஹரதங் ஸதி ஸம்முஸ்ஸதி, ஸதியா ஸம்மோஸா ஏவங் ¹⁰⁷ மயங் தம்ஹா காயா சுதா, அனிச்சா அத்³து⁴வா அப்பாயுகா சவனத⁴ம்மா இத்த²த்தங் ஆக³தாதி. ஏவங்விஹிதகங் நோ தும்ஹே ஆயஸ்மந்தோ கி²ட்³டா³பதோ³ஸிகங் ஆசரியகங் அக்³க³ஞ்ஞங் பஞ்ஞபேதா²’தி. ‘தே ஏவமாஹங்ஸு – ஏவங் கோ² நோ, ஆவுஸோ கோ³தம, ஸுதங், யதே²வாயஸ்மா கோ³தமோ ஆஹா’தி. ‘‘அக்³க³ஞ்ஞஞ்சாஹங், ப⁴க்³க³வ, பஜானாமி…பே॰… யத³பி⁴ஜானங் ததா²க³தோ நோ அனயங் ஆபஜ்ஜதி.

‘So evamāha – ye kho te bhonto devā na khiḍḍāpadosikā te na ativelaṃ hassakhiḍḍāratidhammasamāpannā viharanti. Tesaṃ nātivelaṃ hassakhiḍḍāratidhammasamāpannānaṃ viharataṃ sati na sammussati, satiyā asammosā te devā tamhā kāyā na cavanti, niccā dhuvā sassatā avipariṇāmadhammā sassatisamaṃ tatheva ṭhassanti. Ye pana mayaṃ ahumhā khiḍḍāpadosikā te mayaṃ ativelaṃ hassakhiḍḍāratidhammasamāpannā viharimhā, tesaṃ no ativelaṃ hassakhiḍḍāratidhammasamāpannānaṃ viharataṃ sati sammussati, satiyā sammosā evaṃ ¹⁰⁸ mayaṃ tamhā kāyā cutā, aniccā addhuvā appāyukā cavanadhammā itthattaṃ āgatāti. Evaṃvihitakaṃ no tumhe āyasmanto khiḍḍāpadosikaṃ ācariyakaṃ aggaññaṃ paññapethā’ti. ‘Te evamāhaṃsu – evaṃ kho no, āvuso gotama, sutaṃ, yathevāyasmā gotamo āhā’ti. ‘‘Aggaññañcāhaṃ, bhaggava, pajānāmi…pe… yadabhijānaṃ tathāgato no anayaṃ āpajjati.

43. ‘‘ஸந்தி, ப⁴க்³க³வ, ஏகே ஸமணப்³ராஹ்மணா மனோபதோ³ஸிகங் ஆசரியகங் அக்³க³ஞ்ஞங் பஞ்ஞபெந்தி. த்யாஹங் உபஸங்கமித்வா ஏவங் வதா³மி – ‘ஸச்சங் கிர தும்ஹே ஆயஸ்மந்தோ மனோபதோ³ஸிகங் ஆசரியகங் அக்³க³ஞ்ஞங் பஞ்ஞபேதா²’தி? தே ச மே ஏவங் புட்டா² ‘ஆமோ’தி படிஜானந்தி. த்யாஹங் ஏவங் வதா³மி – ‘கத²ங்விஹிதகங் பன தும்ஹே ஆயஸ்மந்தோ மனோபதோ³ஸிகங் ஆசரியகங் அக்³க³ஞ்ஞங் பஞ்ஞபேதா²’தி? தே மயா புட்டா² ந ஸம்பாயந்தி, அஸம்பாயந்தா மமஞ்ஞேவ படிபுச்ச²ந்தி. தேஸாஹங் புட்டோ² ப்³யாகரோமி –

43. ‘‘Santi, bhaggava, eke samaṇabrāhmaṇā manopadosikaṃ ācariyakaṃ aggaññaṃ paññapenti. Tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto manopadosikaṃ ācariyakaṃ aggaññaṃ paññapethā’ti? Te ca me evaṃ puṭṭhā ‘āmo’ti paṭijānanti. Tyāhaṃ evaṃ vadāmi – ‘kathaṃvihitakaṃ pana tumhe āyasmanto manopadosikaṃ ācariyakaṃ aggaññaṃ paññapethā’ti? Te mayā puṭṭhā na sampāyanti, asampāyantā mamaññeva paṭipucchanti. Tesāhaṃ puṭṭho byākaromi –

44. ‘ஸந்தாவுஸோ, மனோபதோ³ஸிகா நாம தே³வா. தே அதிவேலங் அஞ்ஞமஞ்ஞங் உபனிஜ்ஜா²யந்தி. தே அதிவேலங் அஞ்ஞமஞ்ஞங் உபனிஜ்ஜா²யந்தா அஞ்ஞமஞ்ஞம்ஹி சித்தானி பதூ³ஸெந்தி. தே அஞ்ஞமஞ்ஞங் பது³ட்ட²சித்தா கிலந்தகாயா கிலந்தசித்தா. தே தே³வா தம்ஹா காயா சவந்தி.

44. ‘Santāvuso, manopadosikā nāma devā. Te ativelaṃ aññamaññaṃ upanijjhāyanti. Te ativelaṃ aññamaññaṃ upanijjhāyantā aññamaññamhi cittāni padūsenti. Te aññamaññaṃ paduṭṭhacittā kilantakāyā kilantacittā. Te devā tamhā kāyā cavanti.

‘டா²னங் கோ² பனேதங், ஆவுஸோ, விஜ்ஜதி, யங் அஞ்ஞதரோ ஸத்தோ தம்ஹா காயா சவித்வா இத்த²த்தங் ஆக³ச்ச²தி. இத்த²த்தங் ஆக³தோ ஸமானோ அகா³ரஸ்மா அனகா³ரியங் பப்³ப³ஜதி. அகா³ரஸ்மா அனகா³ரியங் பப்³ப³ஜிதோ ஸமானோ ஆதப்பமன்வாய பதா⁴னமன்வாய அனுயோக³மன்வாய அப்பமாத³மன்வாய ஸம்மாமனஸிகாரமன்வாய ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே தங் புப்³பே³னிவாஸங் அனுஸ்ஸரதி, ததோ பரங் நானுஸ்ஸரதி.

‘ஸோ ஏவமாஹ – யே கோ² தே பொ⁴ந்தோ தே³வா ந மனோபதோ³ஸிகா தே நாதிவேலங் அஞ்ஞமஞ்ஞங் உபனிஜ்ஜா²யந்தி. தே நாதிவேலங் அஞ்ஞமஞ்ஞங் உபனிஜ்ஜா²யந்தா அஞ்ஞமஞ்ஞம்ஹி சித்தானி நப்பதூ³ஸெந்தி. தே அஞ்ஞமஞ்ஞங் அப்பது³ட்ட²சித்தா அகிலந்தகாயா அகிலந்தசித்தா. தே தே³வா தம்ஹா ¹⁰⁹ காயா ந சவந்தி, நிச்சா து⁴வா ஸஸ்ஸதா அவிபரிணாமத⁴ம்மா ஸஸ்ஸதிஸமங் ததே²வ ட²ஸ்ஸந்தி. யே பன மயங் அஹும்ஹா மனோபதோ³ஸிகா, தே மயங் அதிவேலங் அஞ்ஞமஞ்ஞங் உபனிஜ்ஜா²யிம்ஹா. தே மயங் அதிவேலங் அஞ்ஞமஞ்ஞங் உபனிஜ்ஜா²யந்தா அஞ்ஞமஞ்ஞம்ஹி சித்தானி பதூ³ஸிம்ஹா ¹¹⁰. தே மயங் அஞ்ஞமஞ்ஞங் பது³ட்ட²சித்தா கிலந்தகாயா கிலந்தசித்தா. ஏவங் மயங் ¹¹¹ தம்ஹா காயா சுதா, அனிச்சா அத்³து⁴வா அப்பாயுகா சவனத⁴ம்மா இத்த²த்தங் ஆக³தாதி. ஏவங்விஹிதகங் நோ தும்ஹே ஆயஸ்மந்தோ மனோபதோ³ஸிகங் ஆசரியகங் அக்³க³ஞ்ஞங் பஞ்ஞபேதா²’தி. ‘தே ஏவமாஹங்ஸு – ஏவங் கோ² நோ, ஆவுஸோ கோ³தம, ஸுதங், யதே²வாயஸ்மா கோ³தமோ ஆஹா’தி. ‘‘அக்³க³ஞ்ஞஞ்சாஹங், ப⁴க்³க³வ, பஜானாமி…பே॰… யத³பி⁴ஜானங் ததா²க³தோ நோ அனயங் ஆபஜ்ஜதி.

‘So evamāha – ye kho te bhonto devā na manopadosikā te nātivelaṃ aññamaññaṃ upanijjhāyanti. Te nātivelaṃ aññamaññaṃ upanijjhāyantā aññamaññamhi cittāni nappadūsenti. Te aññamaññaṃ appaduṭṭhacittā akilantakāyā akilantacittā. Te devā tamhā ¹¹² kāyā na cavanti, niccā dhuvā sassatā avipariṇāmadhammā sassatisamaṃ tatheva ṭhassanti. Ye pana mayaṃ ahumhā manopadosikā, te mayaṃ ativelaṃ aññamaññaṃ upanijjhāyimhā. Te mayaṃ ativelaṃ aññamaññaṃ upanijjhāyantā aññamaññamhi cittāni padūsimhā ¹¹³. Te mayaṃ aññamaññaṃ paduṭṭhacittā kilantakāyā kilantacittā. Evaṃ mayaṃ ¹¹⁴ tamhā kāyā cutā, aniccā addhuvā appāyukā cavanadhammā itthattaṃ āgatāti. Evaṃvihitakaṃ no tumhe āyasmanto manopadosikaṃ ācariyakaṃ aggaññaṃ paññapethā’ti. ‘Te evamāhaṃsu – evaṃ kho no, āvuso gotama, sutaṃ, yathevāyasmā gotamo āhā’ti. ‘‘Aggaññañcāhaṃ, bhaggava, pajānāmi…pe… yadabhijānaṃ tathāgato no anayaṃ āpajjati.

45. ‘‘ஸந்தி, ப⁴க்³க³வ, ஏகே ஸமணப்³ராஹ்மணா அதி⁴ச்சஸமுப்பன்னங் ஆசரியகங் அக்³க³ஞ்ஞங் பஞ்ஞபெந்தி. த்யாஹங் உபஸங்கமித்வா ஏவங் வதா³மி – ‘ஸச்சங் கிர தும்ஹே ஆயஸ்மந்தோ அதி⁴ச்சஸமுப்பன்னங் ஆசரியகங் அக்³க³ஞ்ஞங் பஞ்ஞபேதா²’தி? தே ச மே ஏவங் புட்டா² ‘ஆமோ’தி படிஜானந்தி. த்யாஹங் ஏவங் வதா³மி – ‘கத²ங்விஹிதகங் பன தும்ஹே ஆயஸ்மந்தோ அதி⁴ச்சஸமுப்பன்னங் ஆசரியகங் அக்³க³ஞ்ஞங் பஞ்ஞபேதா²’தி? தே மயா புட்டா² ந ஸம்பாயந்தி, அஸம்பாயந்தா மமஞ்ஞேவ படிபுச்ச²ந்தி. தேஸாஹங் புட்டோ² ப்³யாகரோமி –

45. ‘‘Santi, bhaggava, eke samaṇabrāhmaṇā adhiccasamuppannaṃ ācariyakaṃ aggaññaṃ paññapenti. Tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto adhiccasamuppannaṃ ācariyakaṃ aggaññaṃ paññapethā’ti? Te ca me evaṃ puṭṭhā ‘āmo’ti paṭijānanti. Tyāhaṃ evaṃ vadāmi – ‘kathaṃvihitakaṃ pana tumhe āyasmanto adhiccasamuppannaṃ ācariyakaṃ aggaññaṃ paññapethā’ti? Te mayā puṭṭhā na sampāyanti, asampāyantā mamaññeva paṭipucchanti. Tesāhaṃ puṭṭho byākaromi –

46. ‘ஸந்தாவுஸோ, அஸஞ்ஞஸத்தா நாம தே³வா. ஸஞ்ஞுப்பாதா³ ச பன தே தே³வா தம்ஹா காயா சவந்தி.

46. ‘Santāvuso, asaññasattā nāma devā. Saññuppādā ca pana te devā tamhā kāyā cavanti.

‘டா²னங் கோ² பனேதங், ஆவுஸோ, விஜ்ஜதி. யங் அஞ்ஞதரோ ஸத்தோ தம்ஹா காயா சவித்வா இத்த²த்தங் ஆக³ச்ச²தி. இத்த²த்தங் ஆக³தோ ஸமானோ அகா³ரஸ்மா அனகா³ரியங் பப்³ப³ஜதி. அகா³ரஸ்மா அனகா³ரியங் பப்³ப³ஜிதோ ஸமானோ ஆதப்பமன்வாய பதா⁴னமன்வாய அனுயோக³மன்வாய அப்பமாத³மன்வாய ஸம்மாமனஸிகாரமன்வாய ததா²ரூபங் சேதோஸமாதி⁴ங் பு²ஸதி, யதா²ஸமாஹிதே சித்தே தங் ¹¹⁵ ஸஞ்ஞுப்பாத³ங் அனுஸ்ஸரதி, ததோ பரங் நானுஸ்ஸரதி.

‘Ṭhānaṃ kho panetaṃ, āvuso, vijjati. Yaṃ aññataro satto tamhā kāyā cavitvā itthattaṃ āgacchati. Itthattaṃ āgato samāno agārasmā anagāriyaṃ pabbajati. Agārasmā anagāriyaṃ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṃ cetosamādhiṃ phusati, yathāsamāhite citte taṃ ¹¹⁶ saññuppādaṃ anussarati, tato paraṃ nānussarati.

‘ஸோ ஏவமாஹ – அதி⁴ச்சஸமுப்பன்னோ அத்தா ச லோகோ ச. தங் கிஸ்ஸ ஹேது? அஹஞ்ஹி புப்³பே³ நாஹோஸிங், ஸொம்ஹி ஏதரஹி அஹுத்வா ஸந்ததாய ¹¹⁷ பரிணதோதி. ஏவங்விஹிதகங் நோ தும்ஹே ஆயஸ்மந்தோ அதி⁴ச்சஸமுப்பன்னங் ஆசரியகங் அக்³க³ஞ்ஞங் பஞ்ஞபேதா²’தி? ‘தே ஏவமாஹங்ஸு – ஏவங் கோ² நோ, ஆவுஸோ கோ³தம, ஸுதங் யதே²வாயஸ்மா கோ³தமோ ஆஹா’தி. ‘‘அக்³க³ஞ்ஞஞ்சாஹங், ப⁴க்³க³வ, பஜானாமி தஞ்ச பஜானாமி, ததோ ச உத்தரிதரங் பஜானாமி, தஞ்ச பஜானங் ந பராமஸாமி, அபராமஸதோ ச மே பச்சத்தஞ்ஞேவ நிப்³பு³தி விதி³தா. யத³பி⁴ஜானங் ததா²க³தோ நோ அனயங் ஆபஜ்ஜதி.

‘So evamāha – adhiccasamuppanno attā ca loko ca. Taṃ kissa hetu? Ahañhi pubbe nāhosiṃ, somhi etarahi ahutvā santatāya ¹¹⁸ pariṇatoti. Evaṃvihitakaṃ no tumhe āyasmanto adhiccasamuppannaṃ ācariyakaṃ aggaññaṃ paññapethā’ti? ‘Te evamāhaṃsu – evaṃ kho no, āvuso gotama, sutaṃ yathevāyasmā gotamo āhā’ti. ‘‘Aggaññañcāhaṃ, bhaggava, pajānāmi tañca pajānāmi, tato ca uttaritaraṃ pajānāmi, tañca pajānaṃ na parāmasāmi, aparāmasato ca me paccattaññeva nibbuti viditā. Yadabhijānaṃ tathāgato no anayaṃ āpajjati.

47. ‘‘ஏவங்வாதி³ங் கோ² மங், ப⁴க்³க³வ, ஏவமக்கா²யிங் ஏகே ஸமணப்³ராஹ்மணா அஸதா துச்சா² முஸா அபூ⁴தேன அப்³பா⁴சிக்க²ந்தி – ‘விபரீதோ ஸமணோ கோ³தமோ பி⁴க்க²வோ ச. ஸமணோ கோ³தமோ ஏவமாஹ – யஸ்மிங் ஸமயே ஸுப⁴ங் விமொக்க²ங் உபஸம்பஜ்ஜ விஹரதி, ஸப்³ப³ங் தஸ்மிங் ஸமயே அஸுப⁴ந்த்வேவ ¹¹⁹ பஜானாதீ’தி ¹²⁰. ந கோ² பனாஹங், ப⁴க்³க³வ, ஏவங் வதா³மி – ‘யஸ்மிங் ஸமயே ஸுப⁴ங் விமொக்க²ங் உபஸம்பஜ்ஜ விஹரதி, ஸப்³ப³ங் தஸ்மிங் ஸமயே அஸுப⁴ந்த்வேவ பஜானாதீ’தி. ஏவஞ்ச க்²வாஹங், ப⁴க்³க³வ, வதா³மி – ‘யஸ்மிங் ஸமயே ஸுப⁴ங் விமொக்க²ங் உபஸம்பஜ்ஜ விஹரதி, ஸுப⁴ந்த்வேவ தஸ்மிங் ஸமயே பஜானாதீ’தி.

47. ‘‘Evaṃvādiṃ kho maṃ, bhaggava, evamakkhāyiṃ eke samaṇabrāhmaṇā asatā tucchā musā abhūtena abbhācikkhanti – ‘viparīto samaṇo gotamo bhikkhavo ca. Samaṇo gotamo evamāha – yasmiṃ samaye subhaṃ vimokkhaṃ upasampajja viharati, sabbaṃ tasmiṃ samaye asubhantveva ¹²¹ pajānātī’ti ¹²². Na kho panāhaṃ, bhaggava, evaṃ vadāmi – ‘yasmiṃ samaye subhaṃ vimokkhaṃ upasampajja viharati, sabbaṃ tasmiṃ samaye asubhantveva pajānātī’ti. Evañca khvāhaṃ, bhaggava, vadāmi – ‘yasmiṃ samaye subhaṃ vimokkhaṃ upasampajja viharati, subhantveva tasmiṃ samaye pajānātī’ti.

‘‘தே ச, ப⁴ந்தே, விபரீதா, யே ப⁴க³வந்தங் விபரீததோ த³ஹந்தி பி⁴க்க²வோ ச. ஏவங்பஸன்னோ அஹங், ப⁴ந்தே, ப⁴க³வதி. பஹோதி மே ப⁴க³வா ததா² த⁴ம்மங் தே³ஸேதுங், யதா² அஹங் ஸுப⁴ங் விமொக்க²ங் உபஸம்பஜ்ஜ விஹரெய்ய’’ந்தி.

‘‘Te ca, bhante, viparītā, ye bhagavantaṃ viparītato dahanti bhikkhavo ca. Evaṃpasanno ahaṃ, bhante, bhagavati. Pahoti me bhagavā tathā dhammaṃ desetuṃ, yathā ahaṃ subhaṃ vimokkhaṃ upasampajja vihareyya’’nti.

48. ‘‘து³க்கரங் கோ² ஏதங், ப⁴க்³க³வ, தயா அஞ்ஞதி³ட்டி²கேன அஞ்ஞக²ந்திகேன அஞ்ஞருசிகேன அஞ்ஞத்ராயோகே³ன அஞ்ஞத்ராசரியகேன ஸுப⁴ங் விமொக்க²ங் உபஸம்பஜ்ஜ விஹரிதுங். இங்க⁴ த்வங், ப⁴க்³க³வ, யோ ச தே அயங் மயி பஸாதோ³, தமேவ த்வங் ஸாது⁴கமனுரக்கா²’’தி. ‘‘ஸசே தங், ப⁴ந்தே, மயா து³க்கரங் அஞ்ஞதி³ட்டி²கேன அஞ்ஞக²ந்திகேன அஞ்ஞருசிகேன அஞ்ஞத்ராயோகே³ன அஞ்ஞத்ராசரியகேன ஸுப⁴ங் விமொக்க²ங் உபஸம்பஜ்ஜ விஹரிதுங். யோ ச மே அயங், ப⁴ந்தே, ப⁴க³வதி பஸாதோ³, தமேவாஹங் ஸாது⁴கமனுரக்கி²ஸ்ஸாமீ’’தி. இத³மவோச ப⁴க³வா. அத்தமனோ ப⁴க்³க³வகொ³த்தோ பரிப்³பா³ஜகோ ப⁴க³வதோ பா⁴ஸிதங் அபி⁴னந்தீ³தி.

48. ‘‘Dukkaraṃ kho etaṃ, bhaggava, tayā aññadiṭṭhikena aññakhantikena aññarucikena aññatrāyogena aññatrācariyakena subhaṃ vimokkhaṃ upasampajja viharituṃ. Iṅgha tvaṃ, bhaggava, yo ca te ayaṃ mayi pasādo, tameva tvaṃ sādhukamanurakkhā’’ti. ‘‘Sace taṃ, bhante, mayā dukkaraṃ aññadiṭṭhikena aññakhantikena aññarucikena aññatrāyogena aññatrācariyakena subhaṃ vimokkhaṃ upasampajja viharituṃ. Yo ca me ayaṃ, bhante, bhagavati pasādo, tamevāhaṃ sādhukamanurakkhissāmī’’ti. Idamavoca bhagavā. Attamano bhaggavagotto paribbājako bhagavato bhāsitaṃ abhinandīti.

பாதி²கஸுத்தங் ¹²³ நிட்டி²தங் பட²மங்.

Pāthikasuttaṃ ¹²⁴ niṭṭhitaṃ paṭhamaṃ.

Next: 2. உது³ம்ப³ரிகஸுத்தங் • 2. Udumbarikasuttaṃ

Footnotes:

1. அனுப்பியங் நாம (ஸ்யா॰)

2. அனுபியங் (க॰)

3. anuppiyaṃ nāma (syā.)

4. anupiyaṃ (ka.)

5. யாவ ச (க॰)

6. yāva ca (ka.)

7. பஞ்ஞாபேதீதி (பீ॰)

8. paññāpetīti (pī.)

9. பு³மூஸு (ஸீ॰ பீ॰)

10. சதுகுண்டி³கோ (ஸீ॰ பீ॰) சதுகொண்டி³கோ (ஸ்யா॰ க॰)

11. அரஹங் (ஸீ॰ ஸ்யா॰ பீ॰)

12. bumūsu (sī. pī.)

13. catukuṇḍiko (sī. pī.) catukoṇḍiko (syā. ka.)

14. arahaṃ (sī. syā. pī.)

15. மோக⁴புரிஸ ஸக்யபுத்தியோ (ஸீ॰ ஸ்யா॰ பீ॰)

16. மோக⁴புரிஸ ஸக்யபுத்தியோ (ஸீ॰ ஸ்யா॰ பீ॰)

17. மஞ்ஞஸி ‘‘அசேலோ கோரக²த்தியோ ஸாது⁴ரூபோ அரஹங் ஸமணோதி’’ (ஸ்யா॰)

18. காலகதோ (ஸீ॰ ஸ்யா॰ பீ॰)

19. காலகஞ்ஜா (ஸீ॰ பீ॰), காலகஞ்ஜிகா (ஸ்யா॰)

20. அசேல கோரக²த்திய (க॰)

21. moghapurisa sakyaputtiyo (sī. syā. pī.)

22. moghapurisa sakyaputtiyo (sī. syā. pī.)

23. maññasi ‘‘acelo korakhattiyo sādhurūpo arahaṃ samaṇoti’’ (syā.)

24. kālakato (sī. syā. pī.)

25. kālakañjā (sī. pī.), kālakañjikā (syā.)

26. acela korakhattiya (ka.)

27. பரிபதி (ஸ்யா॰ க॰)

28. paripati (syā. ka.)

29. ஸத்தவத்தபதா³னி (ஸ்யா॰ பீ॰)

30. ப³ஹுபுத்தகங் நாம (ஸ்யா॰)

31. sattavattapadāni (syā. pī.)

32. bahuputtakaṃ nāma (syā.)

33. அஸாதி³யிம்ஹஸே (ஸ்யா॰)

34. asādiyimhase (syā.)

35. அரஹங் (ஸ்யா॰)

36. யஸானிகிண்ணோ (க॰)

37. arahaṃ (syā.)

38. yasānikiṇṇo (ka.)

39. பாடிகபுத்தோ (ஸீ॰ ஸ்யா॰ பீ॰)

40. pāṭikaputto (sī. syā. pī.)

41. ஓவாதி³தா (க॰)

42. ovāditā (ka.)

43. அத² கோ² ஸ்வாஹங் (ஸ்யா॰)

44. நானாதித்தி²ய (ஸ்யா॰)

45. நானாதித்தி²ய (ஸ்யா॰)

46. atha kho svāhaṃ (syā.)

47. nānātitthiya (syā.)

48. nānātitthiya (syā.)

49. பரிஸா ஹோதி (ஸீ॰ ஸ்யா॰ பீ॰)

50. parisā hoti (sī. syā. pī.)

51. தேனுபஸங்கமந்தோ (ஸீ॰ பீ॰ க॰)

52. tenupasaṅkamanto (sī. pī. ka.)

53. அபி⁴க்கமயேவ (ஸீ॰ ஸ்யா॰ பீ॰)

54. abhikkamayeva (sī. syā. pī.)

55. ஸங்ஸப்³ப³தி (க॰)

56. saṃsabbati (ka.)

57. பராபூ⁴தரூபோ போ⁴ அயங் (ஸ்யா॰ க॰), பராபூ⁴தரூபோ (ஸீ॰ பீ॰)

58. parābhūtarūpo bho ayaṃ (syā. ka.), parābhūtarūpo (sī. pī.)

59. பச்சாக³ச்சா²மி (?)

60. paccāgacchāmi (?)

61. பராபூ⁴தரூபோ (ஸீ॰ பீ॰), பராபூ⁴தரூபோ அயங் (ஸ்யா॰)

62. யாஹி வரத்தாஹி (ஸ்யா॰ க॰)

63. ஆவிஞ்ஜெய்யாமாதி (ஸ்யா॰), ஆவிஜ்ஜெ²ய்யாமாதி (ஸீ॰ பீ॰)

64. parābhūtarūpo (sī. pī.), parābhūtarūpo ayaṃ (syā.)

65. yāhi varattāhi (syā. ka.)

66. āviñjeyyāmāti (syā.), āvijjheyyāmāti (sī. pī.)

67. மிக³ஸங்க⁴ங் (ஸ்யா॰ க॰)

68. migasaṃghaṃ (syā. ka.)

69. ஜரஸிகா³லோ (ஸீ॰ ஸ்யா॰ பீ॰)

70. jarasigālo (sī. syā. pī.)

71. பே⁴த³ண்ட³கங்யேவ (க॰)

72. ஸீஹனாதே³ (?)

73. bhedaṇḍakaṃyeva (ka.)

74. sīhanāde (?)

75. தமேவ (ஸ்யா॰)

76. tameva (syā.)

77. பி⁴ங்கே³ (க॰)

78. bhiṅge (ka.)

79. கூணபானி (ஸ்யா॰)

80. kūṇapāni (syā.)

81. கோ³யுகே³ஹி (ஸப்³ப³த்த²) அட்ட²கதா² பஸ்ஸிதப்³பா³

82. goyugehi (sabbattha) aṭṭhakathā passitabbā

83. அக்³கி³ங் (ஸ்யா॰)

84. தூ⁴பாயித்வா (ஸீ॰ பீ॰)

85. aggiṃ (syā.)

86. dhūpāyitvā (sī. pī.)

87. ‘‘தஞ்சபஜானாமீ’’தி இத³ங் ஸ்யாபொத்த²கேனத்தி²

88. பஜானநங் (ஸ்யா॰ க॰) அட்ட²கதா²ஸங்வண்ணனா பஸ்ஸிதப்³பா³

89. ‘‘tañcapajānāmī’’ti idaṃ syāpotthakenatthi

90. pajānanaṃ (syā. ka.) aṭṭhakathāsaṃvaṇṇanā passitabbā

91. ஆமாதி (ஸ்யா॰)

92. கத²ங் விஹிதகங்னோ பன (க॰)

93. āmāti (syā.)

94. kathaṃ vihitakaṃno pana (ka.)

95. அத² (ஸீ॰ ஸ்யா॰ பீ॰)

96. atha (sī. syā. pī.)

97. ஸஞ்ஜிதா (ஸீ॰ பீ॰), ஸஜ்ஜிதா (ஸ்யா॰ கங்॰)

98. sañjitā (sī. pī.), sajjitā (syā. kaṃ.)

99. ஸஸ்ஸதோ தீ³கா⁴யுகோ (ஸ்யா॰ க॰)

100. அத்³து⁴வா அஸஸ்ஸதா (ஸ்யா॰ க॰)

101. sassato dīghāyuko (syā. ka.)

102. addhuvā asassatā (syā. ka.)

103. ஹஸகி²ட்³டா³ரதித⁴ம்மஸமாபன்னா (க॰)

104. ஸதியா ஸம்மோஸாய (ஸ்யா॰)

105. hasakhiḍḍāratidhammasamāpannā (ka.)

106. satiyā sammosāya (syā.)

107. ஸம்மோஸா ஏவ (ஸீ॰ பீ॰) ஸம்மோஸா தே (ஸ்யா॰ க॰)

108. sammosā eva (sī. pī.) sammosā te (syā. ka.)

109. அகிலந்தசித்தா தம்ஹா (க॰)

110. பதோ³ஸியிம்ஹா (ஸ்யா॰), பதூ³ஸயிம்ஹா (?)

111. கிலந்தசித்தாஏவ மயங் (ஸீ॰ பீ॰), கிலந்தசித்தா (க॰)

112. akilantacittā tamhā (ka.)

113. padosiyimhā (syā.), padūsayimhā (?)

114. kilantacittāeva mayaṃ (sī. pī.), kilantacittā (ka.)

115. இத³ங் பத³ங் ப்³ரஹ்மஜாலஸுத்தே ந தி³ஸ்ஸதி. ஏவங் (பீ॰ க॰)

116. idaṃ padaṃ brahmajālasutte na dissati. evaṃ (pī. ka.)

117. ஸத்தகாய (ஸீ॰ பீ॰), ஸத்தாய (க॰ ஸீ॰)

118. sattakāya (sī. pī.), sattāya (ka. sī.)

119. அஸுப⁴ந்தேவ (ஸீ॰ ஸ்யா॰ பீ॰)

120. ஸஞ்ஜானாதீதி (ஸீ॰ பீ॰)

121. asubhanteva (sī. syā. pī.)

122. sañjānātīti (sī. pī.)

123. பாடிகஸுத்தந்தங் (ஸீ॰ ஸ்யா॰ கங்॰ பீ॰)

124. pāṭikasuttantaṃ (sī. syā. kaṃ. pī.)

Related texts:

அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / தீ³க⁴ நிகாய (அட்ட²கதா²) • Dīgha nikāya (aṭṭhakathā) / 1. பாதி²கஸுத்தவண்ணனா • 1. Pāthikasuttavaṇṇanā

டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 1. பாதி²கஸுத்தவண்ணனா • 1. Pāthikasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact