Library / Tipiṭaka / ཏིཔིཊཀ • Tipiṭaka / དཱིགྷནིཀཱཡ • Dīghanikāya

༎ ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ༎

Namo tassa bhagavato arahato sammāsambuddhassa

དཱིགྷནིཀཱཡོ

Dīghanikāyo

པཱཐིཀཝགྒཔཱལི༹

Pāthikavaggapāḷi

༡. པཱཐིཀསུཏྟཾ

1. Pāthikasuttaṃ

སུནཀྑཏྟཝཏྠུ

Sunakkhattavatthu

༡. ཨེཝཾ མེ སུཏཾ – ཨེཀཾ སམཡཾ བྷགཝཱ མལླེསུ ཝིཧརཏི ཨནུཔིཡཾ ནཱམ ¹ མལླཱནཾ ནིགམོ། ཨཐ ཁོ བྷགཝཱ པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཨནུཔིཡཾ པིཎྜཱཡ པཱཝིསི། ཨཐ ཁོ བྷགཝཏོ ཨེཏདཧོསི – ‘‘ཨཏིཔྤགོ ཁོ ཏཱཝ ཨནུཔིཡཱཡཾ ² པིཎྜཱཡ ཙརིཏུཾ། ཡཾནཱུནཱཧཾ ཡེན བྷགྒཝགོཏྟསྶ པརིབྦཱཛཀསྶ ཨཱརཱམོ, ཡེན བྷགྒཝགོཏྟོ པརིབྦཱཛཀོ ཏེནུཔསངྐམེཡྻ’’ནྟི།

1. Evaṃ me sutaṃ – ekaṃ samayaṃ bhagavā mallesu viharati anupiyaṃ nāma ³ mallānaṃ nigamo. Atha kho bhagavā pubbaṇhasamayaṃ nivāsetvā pattacīvaramādāya anupiyaṃ piṇḍāya pāvisi. Atha kho bhagavato etadahosi – ‘‘atippago kho tāva anupiyāyaṃ ⁴ piṇḍāya carituṃ. Yaṃnūnāhaṃ yena bhaggavagottassa paribbājakassa ārāmo, yena bhaggavagotto paribbājako tenupasaṅkameyya’’nti.

༢. ཨཐ ཁོ བྷགཝཱ ཡེན བྷགྒཝགོཏྟསྶ པརིབྦཱཛཀསྶ ཨཱརཱམོ, ཡེན བྷགྒཝགོཏྟོ པརིབྦཱཛཀོ ཏེནུཔསངྐམི། ཨཐ ཁོ བྷགྒཝགོཏྟོ པརིབྦཱཛཀོ བྷགཝནྟཾ ཨེཏདཝོཙ – ‘‘ཨེཏུ ཁོ, བྷནྟེ, བྷགཝཱ། སྭཱགཏཾ, བྷནྟེ, བྷགཝཏོ། ཙིརསྶཾ ཁོ, བྷནྟེ, བྷགཝཱ ཨིམཾ པརིཡཱཡམཀཱསི ཡདིདཾ ཨིདྷཱགམནཱཡ། ནིསཱིདཏུ, བྷནྟེ, བྷགཝཱ, ཨིདམཱསནཾ པཉྙཏྟ’’ནྟི། ནིསཱིདི བྷགཝཱ པཉྙཏྟེ ཨཱསནེ། བྷགྒཝགོཏྟོཔི ཁོ པརིབྦཱཛཀོ ཨཉྙཏརཾ ནཱིཙཾ ཨཱསནཾ གཧེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ བྷགྒཝགོཏྟོ པརིབྦཱཛཀོ བྷགཝནྟཾ ཨེཏདཝོཙ – ‘‘པུརིམཱནི, བྷནྟེ, དིཝསཱནི པུརིམཏརཱནི སུནཀྑཏྟོ ལིཙྪཝིཔུཏྟོ ཡེནཱཧཾ ཏེནུཔསངྐམི; ཨུཔསངྐམིཏྭཱ མཾ ཨེཏདཝོཙ – ‘པཙྩཀྑཱཏོ དཱནི མཡཱ, བྷགྒཝ, བྷགཝཱ། ན དཱནཱཧཾ བྷགཝནྟཾ ཨུདྡིསྶ ཝིཧརཱམཱི’ཏི། ཀཙྩེཏཾ, བྷནྟེ, ཏཐེཝ, ཡཐཱ སུནཀྑཏྟོ ལིཙྪཝིཔུཏྟོ ཨཝཙཱ’’ཏི? ‘‘ཏཐེཝ ཁོ ཨེཏཾ, བྷགྒཝ, ཡཐཱ སུནཀྑཏྟོ ལིཙྪཝིཔུཏྟོ ཨཝཙ’’།

2. Atha kho bhagavā yena bhaggavagottassa paribbājakassa ārāmo, yena bhaggavagotto paribbājako tenupasaṅkami. Atha kho bhaggavagotto paribbājako bhagavantaṃ etadavoca – ‘‘etu kho, bhante, bhagavā. Svāgataṃ, bhante, bhagavato. Cirassaṃ kho, bhante, bhagavā imaṃ pariyāyamakāsi yadidaṃ idhāgamanāya. Nisīdatu, bhante, bhagavā, idamāsanaṃ paññatta’’nti. Nisīdi bhagavā paññatte āsane. Bhaggavagottopi kho paribbājako aññataraṃ nīcaṃ āsanaṃ gahetvā ekamantaṃ nisīdi. Ekamantaṃ nisinno kho bhaggavagotto paribbājako bhagavantaṃ etadavoca – ‘‘purimāni, bhante, divasāni purimatarāni sunakkhatto licchaviputto yenāhaṃ tenupasaṅkami; upasaṅkamitvā maṃ etadavoca – ‘paccakkhāto dāni mayā, bhaggava, bhagavā. Na dānāhaṃ bhagavantaṃ uddissa viharāmī’ti. Kaccetaṃ, bhante, tatheva, yathā sunakkhatto licchaviputto avacā’’ti? ‘‘Tatheva kho etaṃ, bhaggava, yathā sunakkhatto licchaviputto avaca’’.

༣. པུརིམཱནི, བྷགྒཝ, དིཝསཱནི པུརིམཏརཱནི སུནཀྑཏྟོ ལིཙྪཝིཔུཏྟོ ཡེནཱཧཾ ཏེནུཔསངྐམི; ཨུཔསངྐམིཏྭཱ མཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ, བྷགྒཝ, སུནཀྑཏྟོ ལིཙྪཝིཔུཏྟོ མཾ ཨེཏདཝོཙ – ‘པཙྩཀྑཱམི དཱནཱཧཾ, བྷནྟེ, བྷགཝནྟཾ། ན དཱནཱཧཾ, བྷནྟེ, བྷགཝནྟཾ ཨུདྡིསྶ ཝིཧརིསྶཱམཱི’ཏི། ‘ཨེཝཾ ཝུཏྟེ, ཨཧཾ, བྷགྒཝ, སུནཀྑཏྟཾ ལིཙྪཝིཔུཏྟཾ ཨེཏདཝོཙཾ – ‘ཨཔི ནུ ཏཱཧཾ, སུནཀྑཏྟ, ཨེཝཾ ཨཝཙཾ, ཨེཧི ཏྭཾ, སུནཀྑཏྟ, མམཾ ཨུདྡིསྶ ཝིཧརཱཧཱི’ཏི? ‘ནོ ཧེཏཾ, བྷནྟེ’། ‘ཏྭཾ ཝཱ པན མཾ ཨེཝཾ ཨཝཙ – ཨཧཾ, བྷནྟེ, བྷགཝནྟཾ ཨུདྡིསྶ ཝིཧརིསྶཱམཱི’ཏི? ‘ནོ ཧེཏཾ, བྷནྟེ’། ‘ཨིཏི ཀིར, སུནཀྑཏྟ, ནེཝཱཧཾ ཏཾ ཝདཱམི – ཨེཧི ཏྭཾ, སུནཀྑཏྟ, མམཾ ཨུདྡིསྶ ཝིཧརཱཧཱིཏི། ནཔི ཀིར མཾ ཏྭཾ ཝདེསི – ཨཧཾ, བྷནྟེ, བྷགཝནྟཾ ཨུདྡིསྶ ཝིཧརིསྶཱམཱིཏི། ཨེཝཾ སནྟེ, མོགྷཔུརིས, ཀོ སནྟོ ཀཾ པཙྩཱཙིཀྑསི? པསྶ, མོགྷཔུརིས, ཡཱཝཉྩ ⁵ ཏེ ཨིདཾ ཨཔརདྡྷ’ནྟི།

3. Purimāni, bhaggava, divasāni purimatarāni sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinno kho, bhaggava, sunakkhatto licchaviputto maṃ etadavoca – ‘paccakkhāmi dānāhaṃ, bhante, bhagavantaṃ. Na dānāhaṃ, bhante, bhagavantaṃ uddissa viharissāmī’ti. ‘Evaṃ vutte, ahaṃ, bhaggava, sunakkhattaṃ licchaviputtaṃ etadavocaṃ – ‘api nu tāhaṃ, sunakkhatta, evaṃ avacaṃ, ehi tvaṃ, sunakkhatta, mamaṃ uddissa viharāhī’ti? ‘No hetaṃ, bhante’. ‘Tvaṃ vā pana maṃ evaṃ avaca – ahaṃ, bhante, bhagavantaṃ uddissa viharissāmī’ti? ‘No hetaṃ, bhante’. ‘Iti kira, sunakkhatta, nevāhaṃ taṃ vadāmi – ehi tvaṃ, sunakkhatta, mamaṃ uddissa viharāhīti. Napi kira maṃ tvaṃ vadesi – ahaṃ, bhante, bhagavantaṃ uddissa viharissāmīti. Evaṃ sante, moghapurisa, ko santo kaṃ paccācikkhasi? Passa, moghapurisa, yāvañca ⁶ te idaṃ aparaddha’nti.

༤. ‘ན ཧི པན མེ, བྷནྟེ, བྷགཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརོཏཱི’ཏི། ‘ཨཔི ནུ ཏཱཧཾ, སུནཀྑཏྟ, ཨེཝཾ ཨཝཙཾ – ཨེཧི ཏྭཾ, སུནཀྑཏྟ, མམཾ ཨུདྡིསྶ ཝིཧརཱཧི, ཨཧཾ ཏེ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཱམཱི’ཏི? ‘ནོ ཧེཏཾ, བྷནྟེ’། ‘ཏྭཾ ཝཱ པན མཾ ཨེཝཾ ཨཝཙ – ཨཧཾ, བྷནྟེ, བྷགཝནྟཾ ཨུདྡིསྶ ཝིཧརིསྶཱམི, བྷགཝཱ མེ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཏཱི’ཏི? ‘ནོ ཧེཏཾ, བྷནྟེ’། ‘ཨིཏི ཀིར, སུནཀྑཏྟ, ནེཝཱཧཾ ཏཾ ཝདཱམི – ཨེཧི ཏྭཾ, སུནཀྑཏྟ, མམཾ ཨུདྡིསྶ ཝིཧརཱཧི, ཨཧཾ ཏེ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཱམཱི’ཏི; ནཔི ཀིར མཾ ཏྭཾ ཝདེསི – ཨཧཾ, བྷནྟེ, བྷགཝནྟཾ ཨུདྡིསྶ ཝིཧརིསྶཱམི, བྷགཝཱ མེ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཏཱི’ཏི། ཨེཝཾ སནྟེ, མོགྷཔུརིས , ཀོ སནྟོ ཀཾ པཙྩཱཙིཀྑསི? ཏཾ ཀིཾ མཉྙསི, སུནཀྑཏྟ, ཀཏེ ཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡེ ཨཀཏེ ཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡེ ཡསྶཏྠཱཡ མཡཱ དྷམྨོ དེསིཏོ སོ ནིཡྻཱཏི ཏཀྐརསྶ སམྨཱ དུཀྑཀྑཡཱཡཱ’ཏི? ‘ཀཏེ ཝཱ, བྷནྟེ, ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡེ ཨཀཏེ ཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡེ ཡསྶཏྠཱཡ བྷགཝཏཱ དྷམྨོ དེསིཏོ སོ ནིཡྻཱཏི ཏཀྐརསྶ སམྨཱ དུཀྑཀྑཡཱཡཱ’ཏི། ‘ཨིཏི ཀིར, སུནཀྑཏྟ, ཀཏེ ཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡེ, ཨཀཏེ ཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡེ, ཡསྶཏྠཱཡ མཡཱ དྷམྨོ དེསིཏོ, སོ ནིཡྻཱཏི ཏཀྐརསྶ སམྨཱ དུཀྑཀྑཡཱཡ། ཏཏྲ, སུནཀྑཏྟ, ཀིཾ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀཏཾ ཀརིསྶཏི? པསྶ, མོགྷཔུརིས, ཡཱཝཉྩ ཏེ ཨིདཾ ཨཔརདྡྷ’ནྟི།

4. ‘Na hi pana me, bhante, bhagavā uttarimanussadhammā iddhipāṭihāriyaṃ karotī’ti. ‘Api nu tāhaṃ, sunakkhatta, evaṃ avacaṃ – ehi tvaṃ, sunakkhatta, mamaṃ uddissa viharāhi, ahaṃ te uttarimanussadhammā iddhipāṭihāriyaṃ karissāmī’ti? ‘No hetaṃ, bhante’. ‘Tvaṃ vā pana maṃ evaṃ avaca – ahaṃ, bhante, bhagavantaṃ uddissa viharissāmi, bhagavā me uttarimanussadhammā iddhipāṭihāriyaṃ karissatī’ti? ‘No hetaṃ, bhante’. ‘Iti kira, sunakkhatta, nevāhaṃ taṃ vadāmi – ehi tvaṃ, sunakkhatta, mamaṃ uddissa viharāhi, ahaṃ te uttarimanussadhammā iddhipāṭihāriyaṃ karissāmī’ti; napi kira maṃ tvaṃ vadesi – ahaṃ, bhante, bhagavantaṃ uddissa viharissāmi, bhagavā me uttarimanussadhammā iddhipāṭihāriyaṃ karissatī’ti. Evaṃ sante, moghapurisa , ko santo kaṃ paccācikkhasi? Taṃ kiṃ maññasi, sunakkhatta, kate vā uttarimanussadhammā iddhipāṭihāriye akate vā uttarimanussadhammā iddhipāṭihāriye yassatthāya mayā dhammo desito so niyyāti takkarassa sammā dukkhakkhayāyā’ti? ‘Kate vā, bhante, uttarimanussadhammā iddhipāṭihāriye akate vā uttarimanussadhammā iddhipāṭihāriye yassatthāya bhagavatā dhammo desito so niyyāti takkarassa sammā dukkhakkhayāyā’ti. ‘Iti kira, sunakkhatta, kate vā uttarimanussadhammā iddhipāṭihāriye, akate vā uttarimanussadhammā iddhipāṭihāriye, yassatthāya mayā dhammo desito, so niyyāti takkarassa sammā dukkhakkhayāya. Tatra, sunakkhatta, kiṃ uttarimanussadhammā iddhipāṭihāriyaṃ kataṃ karissati? Passa, moghapurisa, yāvañca te idaṃ aparaddha’nti.

༥. ‘ན ཧི པན མེ, བྷནྟེ, བྷགཝཱ ཨགྒཉྙཾ པཉྙཔེཏཱི’ཏི ⁷? ‘ཨཔི ནུ ཏཱཧཾ, སུནཀྑཏྟ, ཨེཝཾ ཨཝཙཾ – ཨེཧི ཏྭཾ, སུནཀྑཏྟ, མམཾ ཨུདྡིསྶ ཝིཧརཱཧི, ཨཧཾ ཏེ ཨགྒཉྙཾ པཉྙཔེསྶཱམཱི’ཏི? ‘ནོ ཧེཏཾ, བྷནྟེ’། ‘ཏྭཾ ཝཱ པན མཾ ཨེཝཾ ཨཝཙ – ཨཧཾ, བྷནྟེ, བྷགཝནྟཾ ཨུདྡིསྶ ཝིཧརིསྶཱམི, བྷགཝཱ མེ ཨགྒཉྙཾ པཉྙཔེསྶཏཱི’ཏི? ‘ནོ ཧེཏཾ, བྷནྟེ’། ‘ཨིཏི ཀིར, སུནཀྑཏྟ, ནེཝཱཧཾ ཏཾ ཝདཱམི – ཨེཧི ཏྭཾ, སུནཀྑཏྟ, མམཾ ཨུདྡིསྶ ཝིཧརཱཧི, ཨཧཾ ཏེ ཨགྒཉྙཾ པཉྙཔེསྶཱམཱིཏི། ནཔི ཀིར མཾ ཏྭཾ ཝདེསི – ཨཧཾ, བྷནྟེ, བྷགཝནྟཾ ཨུདྡིསྶ ཝིཧརིསྶཱམི, བྷགཝཱ མེ ཨགྒཉྙཾ པཉྙཔེསྶཏཱི’ཏི། ཨེཝཾ སནྟེ, མོགྷཔུརིས, ཀོ སནྟོ ཀཾ པཙྩཱཙིཀྑསི? ཏཾ ཀིཾ མཉྙསི, སུནཀྑཏྟ, པཉྙཏྟེ ཝཱ ཨགྒཉྙེ, ཨཔཉྙཏྟེ ཝཱ ཨགྒཉྙེ, ཡསྶཏྠཱཡ མཡཱ དྷམྨོ དེསིཏོ, སོ ནིཡྻཱཏི ཏཀྐརསྶ སམྨཱ དུཀྑཀྑཡཱཡཱ’ཏི? ‘པཉྙཏྟེ ཝཱ, བྷནྟེ, ཨགྒཉྙེ, ཨཔཉྙཏྟེ ཝཱ ཨགྒཉྙེ, ཡསྶཏྠཱཡ བྷགཝཏཱ དྷམྨོ དེསིཏོ, སོ ནིཡྻཱཏི ཏཀྐརསྶ སམྨཱ དུཀྑཀྑཡཱཡཱ’ཏི། ‘ཨིཏི ཀིར, སུནཀྑཏྟ, པཉྙཏྟེ ཝཱ ཨགྒཉྙེ, ཨཔཉྙཏྟེ ཝཱ ཨགྒཉྙེ, ཡསྶཏྠཱཡ མཡཱ དྷམྨོ དེསིཏོ, སོ ནིཡྻཱཏི ཏཀྐརསྶ སམྨཱ དུཀྑཀྑཡཱཡ། ཏཏྲ, སུནཀྑཏྟ, ཀིཾ ཨགྒཉྙཾ པཉྙཏྟཾ ཀརིསྶཏི? པསྶ, མོགྷཔུརིས, ཡཱཝཉྩ ཏེ ཨིདཾ ཨཔརདྡྷཾ’།

5. ‘Na hi pana me, bhante, bhagavā aggaññaṃ paññapetī’ti ⁸? ‘Api nu tāhaṃ, sunakkhatta, evaṃ avacaṃ – ehi tvaṃ, sunakkhatta, mamaṃ uddissa viharāhi, ahaṃ te aggaññaṃ paññapessāmī’ti? ‘No hetaṃ, bhante’. ‘Tvaṃ vā pana maṃ evaṃ avaca – ahaṃ, bhante, bhagavantaṃ uddissa viharissāmi, bhagavā me aggaññaṃ paññapessatī’ti? ‘No hetaṃ, bhante’. ‘Iti kira, sunakkhatta, nevāhaṃ taṃ vadāmi – ehi tvaṃ, sunakkhatta, mamaṃ uddissa viharāhi, ahaṃ te aggaññaṃ paññapessāmīti. Napi kira maṃ tvaṃ vadesi – ahaṃ, bhante, bhagavantaṃ uddissa viharissāmi, bhagavā me aggaññaṃ paññapessatī’ti. Evaṃ sante, moghapurisa, ko santo kaṃ paccācikkhasi? Taṃ kiṃ maññasi, sunakkhatta, paññatte vā aggaññe, apaññatte vā aggaññe, yassatthāya mayā dhammo desito, so niyyāti takkarassa sammā dukkhakkhayāyā’ti? ‘Paññatte vā, bhante, aggaññe, apaññatte vā aggaññe, yassatthāya bhagavatā dhammo desito, so niyyāti takkarassa sammā dukkhakkhayāyā’ti. ‘Iti kira, sunakkhatta, paññatte vā aggaññe, apaññatte vā aggaññe, yassatthāya mayā dhammo desito, so niyyāti takkarassa sammā dukkhakkhayāya. Tatra, sunakkhatta, kiṃ aggaññaṃ paññattaṃ karissati? Passa, moghapurisa, yāvañca te idaṃ aparaddhaṃ’.

༦. ‘ཨནེཀཔརིཡཱཡེན ཁོ ཏེ, སུནཀྑཏྟ, མམ ཝཎྞོ བྷཱསིཏོ ཝཛྫིགཱམེ – ཨིཏིཔི སོ བྷགཝཱ ཨརཧཾ སམྨཱསམྦུདྡྷོ ཝིཛྫཱཙརཎསམྤནྣོ སུགཏོ ལོཀཝིདཱུ ཨནུཏྟརོ པུརིསདམྨསཱརཐི སཏྠཱ དེཝམནུསྶཱནཾ བུདྡྷོ བྷགཝཱཏི། ཨིཏི ཁོ ཏེ, སུནཀྑཏྟ, ཨནེཀཔརིཡཱཡེན མམ ཝཎྞོ བྷཱསིཏོ ཝཛྫིགཱམེ།

6. ‘Anekapariyāyena kho te, sunakkhatta, mama vaṇṇo bhāsito vajjigāme – itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti. Iti kho te, sunakkhatta, anekapariyāyena mama vaṇṇo bhāsito vajjigāme.

‘ཨནེཀཔརིཡཱཡེན ཁོ ཏེ, སུནཀྑཏྟ, དྷམྨསྶ ཝཎྞོ བྷཱསིཏོ ཝཛྫིགཱམེ – སྭཱཀྑཱཏོ བྷགཝཏཱ དྷམྨོ སནྡིཊྛིཀོ ཨཀཱལིཀོ ཨེཧིཔསྶིཀོ ཨོཔནེཡྻིཀོ པཙྩཏྟཾ ཝེདིཏབྦོ ཝིཉྙཱུཧཱིཏི། ཨིཏི ཁོ ཏེ, སུནཀྑཏྟ, ཨནེཀཔརིཡཱཡེན དྷམྨསྶ ཝཎྞོ བྷཱསིཏོ ཝཛྫིགཱམེ།

‘Anekapariyāyena kho te, sunakkhatta, dhammassa vaṇṇo bhāsito vajjigāme – svākkhāto bhagavatā dhammo sandiṭṭhiko akāliko ehipassiko opaneyyiko paccattaṃ veditabbo viññūhīti. Iti kho te, sunakkhatta, anekapariyāyena dhammassa vaṇṇo bhāsito vajjigāme.

‘ཨནེཀཔརིཡཱཡེན ཁོ ཏེ, སུནཀྑཏྟ, སངྒྷསྶ ཝཎྞོ བྷཱསིཏོ ཝཛྫིགཱམེ – སུཔྤཊིཔནྣོ བྷགཝཏོ སཱཝཀསངྒྷོ, ཨུཛུཔྤཊིཔནྣོ བྷགཝཏོ སཱཝཀསངྒྷོ, ཉཱཡཔྤཊིཔནྣོ བྷགཝཏོ སཱཝཀསངྒྷོ, སཱམཱིཙིཔྤཊིཔནྣོ བྷགཝཏོ སཱཝཀསངྒྷོ, ཡདིདཾ ཙཏྟཱརི པུརིསཡུགཱནི ཨཊྛ པུརིསཔུགྒལཱ, ཨེས བྷགཝཏོ སཱཝཀསངྒྷོ, ཨཱཧུནེཡྻོ པཱཧུནེཡྻོ དཀྑིཎེཡྻོ ཨཉྫལིཀརཎཱིཡོ ཨནུཏྟརཾ པུཉྙཀྑེཏྟཾ ལོཀསྶཱཏི། ཨིཏི ཁོ ཏེ, སུནཀྑཏྟ, ཨནེཀཔརིཡཱཡེན སངྒྷསྶ ཝཎྞོ བྷཱསིཏོ ཝཛྫིགཱམེ།

‘Anekapariyāyena kho te, sunakkhatta, saṅghassa vaṇṇo bhāsito vajjigāme – suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṃ cattāri purisayugāni aṭṭha purisapuggalā, esa bhagavato sāvakasaṅgho, āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassāti. Iti kho te, sunakkhatta, anekapariyāyena saṅghassa vaṇṇo bhāsito vajjigāme.

‘ཨཱརོཙཡཱམི ཁོ ཏེ, སུནཀྑཏྟ, པཊིཝེདཡཱམི ཁོ ཏེ, སུནཀྑཏྟ། བྷཝིསྶནྟི ཁོ ཏེ, སུནཀྑཏྟ, ཝཏྟཱརོ, ནོ ཝིསཧི སུནཀྑཏྟོ ལིཙྪཝིཔུཏྟོ སམཎེ གོཏམེ བྲཧྨཙརིཡཾ ཙརིཏུཾ, སོ ཨཝིསཧནྟོ སིཀྑཾ པཙྩཀྑཱཡ ཧཱིནཱཡཱཝཏྟོཏི། ཨིཏི ཁོ ཏེ, སུནཀྑཏྟ, བྷཝིསྶནྟི ཝཏྟཱརོ’ཏི།

‘Ārocayāmi kho te, sunakkhatta, paṭivedayāmi kho te, sunakkhatta. Bhavissanti kho te, sunakkhatta, vattāro, no visahi sunakkhatto licchaviputto samaṇe gotame brahmacariyaṃ carituṃ, so avisahanto sikkhaṃ paccakkhāya hīnāyāvattoti. Iti kho te, sunakkhatta, bhavissanti vattāro’ti.

ཨེཝཾ པི ཁོ, བྷགྒཝ, སུནཀྑཏྟོ ལིཙྪཝིཔུཏྟོ མཡཱ ཝུཙྩམཱནོ ཨཔཀྐམེཝ ཨིམསྨཱ དྷམྨཝིནཡཱ, ཡཐཱ ཏཾ ཨཱཔཱཡིཀོ ནེརཡིཀོ།

Evaṃ pi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṃ āpāyiko nerayiko.

ཀོརཀྑཏྟིཡཝཏྠུ

Korakkhattiyavatthu

༧. ‘‘ཨེཀམིདཱཧཾ, བྷགྒཝ, སམཡཾ ཐཱུལཱུསུ ⁹ ཝིཧརཱམི ཨུཏྟརཀཱ ནཱམ ཐཱུལཱུནཾ ནིགམོ། ཨཐ ཁྭཱཧཾ, བྷགྒཝ, པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ སུནཀྑཏྟེན ལིཙྪཝིཔུཏྟེན པཙྪཱསམཎེན ཨུཏྟརཀཾ པིཎྜཱཡ པཱཝིསིཾ། ཏེན ཁོ པན སམཡེན ཨཙེལོ ཀོརཀྑཏྟིཡོ ཀུཀྐུརཝཏིཀོ ཙཏུཀྐུཎྜིཀོ ¹⁰ ཚམཱནིཀིཎྞཾ བྷཀྑསཾ མུཁེནེཝ ཁཱདཏི, མུཁེནེཝ བྷུཉྫཏི། ཨདྡསཱ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཨཙེལཾ ཀོརཀྑཏྟིཡཾ ཀུཀྐུརཝཏིཀཾ ཙཏུཀྐུཎྜིཀཾ ཚམཱནིཀིཎྞཾ བྷཀྑསཾ མུཁེནེཝ ཁཱདནྟཾ མུཁེནེཝ བྷུཉྫནྟཾ། དིསྭཱནསྶ ཨེཏདཧོསི – ‘སཱདྷུརཱུཔོ ཝཏ, བྷོ, ཨཡཾ ¹¹ སམཎོ ཙཏུཀྐུཎྜིཀོ ཚམཱནིཀིཎྞཾ བྷཀྑསཾ མུཁེནེཝ ཁཱདཏི, མུཁེནེཝ བྷུཉྫཏཱི’ཏི།

7. ‘‘Ekamidāhaṃ, bhaggava, samayaṃ thūlūsu ¹² viharāmi uttarakā nāma thūlūnaṃ nigamo. Atha khvāhaṃ, bhaggava, pubbaṇhasamayaṃ nivāsetvā pattacīvaramādāya sunakkhattena licchaviputtena pacchāsamaṇena uttarakaṃ piṇḍāya pāvisiṃ. Tena kho pana samayena acelo korakkhattiyo kukkuravatiko catukkuṇḍiko ¹³ chamānikiṇṇaṃ bhakkhasaṃ mukheneva khādati, mukheneva bhuñjati. Addasā kho, bhaggava, sunakkhatto licchaviputto acelaṃ korakkhattiyaṃ kukkuravatikaṃ catukkuṇḍikaṃ chamānikiṇṇaṃ bhakkhasaṃ mukheneva khādantaṃ mukheneva bhuñjantaṃ. Disvānassa etadahosi – ‘sādhurūpo vata, bho, ayaṃ ¹⁴ samaṇo catukkuṇḍiko chamānikiṇṇaṃ bhakkhasaṃ mukheneva khādati, mukheneva bhuñjatī’ti.

‘‘ཨཐ ཁྭཱཧཾ, བྷགྒཝ, སུནཀྑཏྟསྶ ལིཙྪཝིཔུཏྟསྶ ཙེཏསཱ ཙེཏོཔརིཝིཏཀྐམཉྙཱཡ སུནཀྑཏྟཾ ལིཙྪཝིཔུཏྟཾ ཨེཏདཝོཙཾ – ‘ཏྭམྤི ནཱམ, མོགྷཔུརིས, སམཎོ སཀྱཔུཏྟིཡོ ¹⁵ པཊིཛཱནིསྶསཱི’ཏི! ‘ཀིཾ པན མཾ, བྷནྟེ, བྷགཝཱ ཨེཝམཱཧ – ‘ཏྭམྤི ནཱམ, མོགྷཔུརིས, སམཎོ སཀྱཔུཏྟིཡོ ¹⁶ པཊིཛཱནིསྶསཱི’ཏི? ‘ནནུ ཏེ, སུནཀྑཏྟ, ཨིམཾ ཨཙེལཾ ཀོརཀྑཏྟིཡཾ ཀུཀྐུརཝཏིཀཾ ཙཏུཀྐུཎྜིཀཾ ཚམཱནིཀིཎྞཾ བྷཀྑསཾ མུཁེནེཝ ཁཱདནྟཾ མུཁེནེཝ བྷུཉྫནྟཾ དིསྭཱན ཨེཏདཧོསི – སཱདྷུརཱུཔོ ཝཏ, བྷོ, ཨཡཾ སམཎོ ཙཏུཀྐུཎྜིཀོ ཚམཱནིཀིཎྞཾ བྷཀྑསཾ མུཁེནེཝ ཁཱདཏི, མུཁེནེཝ བྷུཉྫཏཱི’ཏི? ‘ཨེཝཾ, བྷནྟེ། ཀིཾ པན, བྷནྟེ, བྷགཝཱ ཨརཧཏྟསྶ མཙྪརཱཡཏཱི’ཏི? ‘ན ཁོ ཨཧཾ, མོགྷཔུརིས, ཨརཧཏྟསྶ མཙྪརཱཡཱམི། ཨཔི ཙ, ཏུཡ྄ཧེཝེཏཾ པཱཔཀཾ དིཊྛིགཏཾ ཨུཔྤནྣཾ, ཏཾ པཛཧ། མཱ ཏེ ཨཧོསི དཱིགྷརཏྟཾ ཨཧིཏཱཡ དུཀྑཱཡ། ཡཾ ཁོ པནེཏཾ, སུནཀྑཏྟ, མཉྙསི ཨཙེལཾ ཀོརཀྑཏྟིཡཾ – སཱདྷུརཱུཔོ ཨཡཾ སམཎོཏི ¹⁷། སོ སཏྟམཾ དིཝསཾ ཨལསཀེན ཀཱལངྐརིསྶཏི། ཀཱལངྐཏོ ¹⁸ ཙ ཀཱལཀཉྩིཀཱ ¹⁹ ནཱམ ཨསུརཱ སབྦནིཧཱིནོ ཨསུརཀཱཡོ, ཏཏྲ ཨུཔཔཛྫིསྶཏི། ཀཱལངྐཏཉྩ ནཾ བཱིརཎཏྠམྦཀེ སུསཱནེ ཚཌྜེསྶནྟི། ཨཱཀངྑམཱནོ ཙ ཏྭཾ, སུནཀྑཏྟ, ཨཙེལཾ ཀོརཀྑཏྟིཡཾ ཨུཔསངྐམིཏྭཱ པུཙྪེཡྻཱསི – ཛཱནཱསི, ཨཱཝུསོ ཀོརཀྑཏྟིཡ ²⁰, ཨཏྟནོ གཏིནྟི? ཋཱནཾ ཁོ པནེཏཾ, སུནཀྑཏྟ, ཝིཛྫཏི ཡཾ ཏེ ཨཙེལོ ཀོརཀྑཏྟིཡོ བྱཱཀརིསྶཏི – ཛཱནཱམི, ཨཱཝུསོ སུནཀྑཏྟ, ཨཏྟནོ གཏིཾ; ཀཱལཀཉྩིཀཱ ནཱམ ཨསུརཱ སབྦནིཧཱིནོ ཨསུརཀཱཡོ, ཏཏྲཱམྷི ཨུཔཔནྣོཏི།

‘‘Atha khvāhaṃ, bhaggava, sunakkhattassa licchaviputtassa cetasā cetoparivitakkamaññāya sunakkhattaṃ licchaviputtaṃ etadavocaṃ – ‘tvampi nāma, moghapurisa, samaṇo sakyaputtiyo ²¹ paṭijānissasī’ti! ‘Kiṃ pana maṃ, bhante, bhagavā evamāha – ‘tvampi nāma, moghapurisa, samaṇo sakyaputtiyo ²² paṭijānissasī’ti? ‘Nanu te, sunakkhatta, imaṃ acelaṃ korakkhattiyaṃ kukkuravatikaṃ catukkuṇḍikaṃ chamānikiṇṇaṃ bhakkhasaṃ mukheneva khādantaṃ mukheneva bhuñjantaṃ disvāna etadahosi – sādhurūpo vata, bho, ayaṃ samaṇo catukkuṇḍiko chamānikiṇṇaṃ bhakkhasaṃ mukheneva khādati, mukheneva bhuñjatī’ti? ‘Evaṃ, bhante. Kiṃ pana, bhante, bhagavā arahattassa maccharāyatī’ti? ‘Na kho ahaṃ, moghapurisa, arahattassa maccharāyāmi. Api ca, tuyhevetaṃ pāpakaṃ diṭṭhigataṃ uppannaṃ, taṃ pajaha. Mā te ahosi dīgharattaṃ ahitāya dukkhāya. Yaṃ kho panetaṃ, sunakkhatta, maññasi acelaṃ korakkhattiyaṃ – sādhurūpo ayaṃ samaṇoti ²³. So sattamaṃ divasaṃ alasakena kālaṅkarissati. Kālaṅkato ²⁴ ca kālakañcikā ²⁵ nāma asurā sabbanihīno asurakāyo, tatra upapajjissati. Kālaṅkatañca naṃ bīraṇatthambake susāne chaḍḍessanti. Ākaṅkhamāno ca tvaṃ, sunakkhatta, acelaṃ korakkhattiyaṃ upasaṅkamitvā puccheyyāsi – jānāsi, āvuso korakkhattiya ²⁶, attano gatinti? Ṭhānaṃ kho panetaṃ, sunakkhatta, vijjati yaṃ te acelo korakkhattiyo byākarissati – jānāmi, āvuso sunakkhatta, attano gatiṃ; kālakañcikā nāma asurā sabbanihīno asurakāyo, tatrāmhi upapannoti.

‘‘ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཡེན ཨཙེལོ ཀོརཀྑཏྟིཡོ ཏེནུཔསངྐམི; ཨུཔསངྐམིཏྭཱ ཨཙེལཾ ཀོརཀྑཏྟིཡཾ ཨེཏདཝོཙ – ‘བྱཱཀཏོ ཁོསི, ཨཱཝུསོ ཀོརཀྑཏྟིཡ, སམཎེན གོཏམེན – ཨཙེལོ ཀོརཀྑཏྟིཡོ སཏྟམཾ དིཝསཾ ཨལསཀེན ཀཱལངྐརིསྶཏི། ཀཱལངྐཏོ ཙ ཀཱལཀཉྩིཀཱ ནཱམ ཨསུརཱ སབྦནིཧཱིནོ ཨསུརཀཱཡོ , ཏཏྲ ཨུཔཔཛྫིསྶཏི། ཀཱལངྐཏཉྩ ནཾ བཱིརཎཏྠམྦཀེ སུསཱནེ ཚཌྜེསྶནྟཱི’ཏི། ཡེན ཏྭཾ, ཨཱཝུསོ ཀོརཀྑཏྟིཡ, མཏྟཾ མཏྟཉྩ བྷཏྟཾ བྷུཉྫེཡྻཱསི, མཏྟཾ མཏྟཉྩ པཱནཱིཡཾ པིཝེཡྻཱསི། ཡཐཱ སམཎསྶ གོཏམསྶ མིཙྪཱ ཨསྶ ཝཙན’ནྟི།

‘‘Atha kho, bhaggava, sunakkhatto licchaviputto yena acelo korakkhattiyo tenupasaṅkami; upasaṅkamitvā acelaṃ korakkhattiyaṃ etadavoca – ‘byākato khosi, āvuso korakkhattiya, samaṇena gotamena – acelo korakkhattiyo sattamaṃ divasaṃ alasakena kālaṅkarissati. Kālaṅkato ca kālakañcikā nāma asurā sabbanihīno asurakāyo , tatra upapajjissati. Kālaṅkatañca naṃ bīraṇatthambake susāne chaḍḍessantī’ti. Yena tvaṃ, āvuso korakkhattiya, mattaṃ mattañca bhattaṃ bhuñjeyyāsi, mattaṃ mattañca pānīyaṃ piveyyāsi. Yathā samaṇassa gotamassa micchā assa vacana’nti.

༨. ‘‘ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཨེཀདྭཱིཧིཀཱཡ སཏྟརཏྟིནྡིཝཱནི གཎེསི, ཡཐཱ ཏཾ ཏཐཱགཏསྶ ཨསདྡཧམཱནོ། ཨཐ ཁོ, བྷགྒཝ, ཨཙེལོ ཀོརཀྑཏྟིཡོ སཏྟམཾ དིཝསཾ ཨལསཀེན ཀཱལམཀཱསི། ཀཱལངྐཏོ ཙ ཀཱལཀཉྩིཀཱ ནཱམ ཨསུརཱ སབྦནིཧཱིནོ ཨསུརཀཱཡོ, ཏཏྲ ཨུཔཔཛྫི། ཀཱལངྐཏཉྩ ནཾ བཱིརཎཏྠམྦཀེ སུསཱནེ ཚཌྜེསུཾ།

8. ‘‘Atha kho, bhaggava, sunakkhatto licchaviputto ekadvīhikāya sattarattindivāni gaṇesi, yathā taṃ tathāgatassa asaddahamāno. Atha kho, bhaggava, acelo korakkhattiyo sattamaṃ divasaṃ alasakena kālamakāsi. Kālaṅkato ca kālakañcikā nāma asurā sabbanihīno asurakāyo, tatra upapajji. Kālaṅkatañca naṃ bīraṇatthambake susāne chaḍḍesuṃ.

༩. ‘‘ཨསྶོསི ཁོ, བྷགྒཝ, སུནཀྑཏྟོ ལིཙྪཝིཔུཏྟོ – ‘ཨཙེལོ ཀིར ཀོརཀྑཏྟིཡོ ཨལསཀེན ཀཱལངྐཏོ བཱིརཎཏྠམྦཀེ སུསཱནེ ཚཌྜིཏོ’ཏི། ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཡེན བཱིརཎཏྠམྦཀཾ སུསཱནཾ, ཡེན ཨཙེལོ ཀོརཀྑཏྟིཡོ ཏེནུཔསངྐམི; ཨུཔསངྐམིཏྭཱ ཨཙེལཾ ཀོརཀྑཏྟིཡཾ ཏིཀྑཏྟུཾ པཱཎིནཱ ཨཱཀོཊེསི – ‘ཛཱནཱསི, ཨཱཝུསོ ཀོརཀྑཏྟིཡ, ཨཏྟནོ གཏི’ནྟི? ཨཐ ཁོ, བྷགྒཝ, ཨཙེལོ ཀོརཀྑཏྟིཡོ པཱཎིནཱ པིཊྛིཾ པརིཔུཉྪནྟོ ཝུཊྛཱསི། ‘ཛཱནཱམི, ཨཱཝུསོ སུནཀྑཏྟ, ཨཏྟནོ གཏིཾ། ཀཱལཀཉྩིཀཱ ནཱམ ཨསུརཱ སབྦནིཧཱིནོ ཨསུརཀཱཡོ, ཏཏྲཱམྷི ཨུཔཔནྣོ’ཏི ཝཏྭཱ ཏཏྠེཝ ཨུཏྟཱནོ པཔཏི ²⁷།

9. ‘‘Assosi kho, bhaggava, sunakkhatto licchaviputto – ‘acelo kira korakkhattiyo alasakena kālaṅkato bīraṇatthambake susāne chaḍḍito’ti. Atha kho, bhaggava, sunakkhatto licchaviputto yena bīraṇatthambakaṃ susānaṃ, yena acelo korakkhattiyo tenupasaṅkami; upasaṅkamitvā acelaṃ korakkhattiyaṃ tikkhattuṃ pāṇinā ākoṭesi – ‘jānāsi, āvuso korakkhattiya, attano gati’nti? Atha kho, bhaggava, acelo korakkhattiyo pāṇinā piṭṭhiṃ paripuñchanto vuṭṭhāsi. ‘Jānāmi, āvuso sunakkhatta, attano gatiṃ. Kālakañcikā nāma asurā sabbanihīno asurakāyo, tatrāmhi upapanno’ti vatvā tattheva uttāno papati ²⁸.

༡༠. ‘‘ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཡེནཱཧཾ ཏེནུཔསངྐམི; ཨུཔསངྐམིཏྭཱ མཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཧཾ, བྷགྒཝ , སུནཀྑཏྟཾ ལིཙྪཝིཔུཏྟཾ ཨེཏདཝོཙཾ – ‘ཏཾ ཀིཾ མཉྙསི, སུནཀྑཏྟ, ཡཐེཝ ཏེ ཨཧཾ ཨཙེལཾ ཀོརཀྑཏྟིཡཾ ཨཱརབྦྷ བྱཱཀཱསིཾ, ཏཐེཝ ཏཾ ཝིཔཱཀཾ, ཨཉྙཐཱ ཝཱ’ཏི? ‘ཡཐེཝ མེ, བྷནྟེ, བྷགཝཱ ཨཙེལཾ ཀོརཀྑཏྟིཡཾ ཨཱརབྦྷ བྱཱཀཱསི, ཏཐེཝ ཏཾ ཝིཔཱཀཾ, ནོ ཨཉྙཐཱ’ཏི། ‘ཏཾ ཀིཾ མཉྙསི, སུནཀྑཏྟ, ཡདི ཨེཝཾ སནྟེ ཀཏཾ ཝཱ ཧོཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ, ཨཀཏཾ ཝཱཏི? ‘ཨདྡྷཱ ཁོ, བྷནྟེ, ཨེཝཾ སནྟེ ཀཏཾ ཧོཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ, ནོ ཨཀཏ’ནྟི། ‘ཨེཝམྤི ཁོ མཾ ཏྭཾ, མོགྷཔུརིས, ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརོནྟཾ ཨེཝཾ ཝདེསི – ན ཧི པན མེ, བྷནྟེ, བྷགཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརོཏཱིཏི། པསྶ, མོགྷཔུརིས, ཡཱཝཉྩ ཏེ ཨིདཾ ཨཔརདྡྷ’ནྟི། ‘‘ཨེཝམྤི ཁོ, བྷགྒཝ, སུནཀྑཏྟོ ལིཙྪཝིཔུཏྟོ མཡཱ ཝུཙྩམཱནོ ཨཔཀྐམེཝ ཨིམསྨཱ དྷམྨཝིནཡཱ, ཡཐཱ ཏཾ ཨཱཔཱཡིཀོ ནེརཡིཀོ།

10. ‘‘Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnaṃ kho ahaṃ, bhaggava , sunakkhattaṃ licchaviputtaṃ etadavocaṃ – ‘taṃ kiṃ maññasi, sunakkhatta, yatheva te ahaṃ acelaṃ korakkhattiyaṃ ārabbha byākāsiṃ, tatheva taṃ vipākaṃ, aññathā vā’ti? ‘Yatheva me, bhante, bhagavā acelaṃ korakkhattiyaṃ ārabbha byākāsi, tatheva taṃ vipākaṃ, no aññathā’ti. ‘Taṃ kiṃ maññasi, sunakkhatta, yadi evaṃ sante kataṃ vā hoti uttarimanussadhammā iddhipāṭihāriyaṃ, akataṃ vāti? ‘Addhā kho, bhante, evaṃ sante kataṃ hoti uttarimanussadhammā iddhipāṭihāriyaṃ, no akata’nti. ‘Evampi kho maṃ tvaṃ, moghapurisa, uttarimanussadhammā iddhipāṭihāriyaṃ karontaṃ evaṃ vadesi – na hi pana me, bhante, bhagavā uttarimanussadhammā iddhipāṭihāriyaṃ karotīti. Passa, moghapurisa, yāvañca te idaṃ aparaddha’nti. ‘‘Evampi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṃ āpāyiko nerayiko.

ཨཙེལཀལཱ༹རམཊྚཀཝཏྠུ

Acelakaḷāramaṭṭakavatthu

༡༡. ‘‘ཨེཀམིདཱཧཾ, བྷགྒཝ, སམཡཾ ཝེསཱལིཡཾ ཝིཧརཱམི མཧཱཝནེ ཀཱུཊཱགཱརསཱལཱཡཾ། ཏེན ཁོ པན སམཡེན ཨཙེལོ ཀལཱ༹རམཊྚཀོ ཝེསཱལིཡཾ པཊིཝསཏི ལཱབྷགྒཔྤཏྟོ ཙེཝ ཡསགྒཔྤཏྟོ ཙ ཝཛྫིགཱམེ། ཏསྶ སཏྟཝཏཔདཱནི ²⁹ སམཏྟཱནི སམཱདིནྣཱནི ཧོནྟི – ‘ཡཱཝཛཱིཝཾ ཨཙེལཀོ ཨསྶཾ, ན ཝཏྠཾ པརིདཧེཡྻཾ, ཡཱཝཛཱིཝཾ བྲཧྨཙཱརཱི ཨསྶཾ, ན མེཐུནཾ དྷམྨཾ པཊིསེཝེཡྻཾ, ཡཱཝཛཱིཝཾ སུརཱམཾསེནེཝ ཡཱཔེཡྻཾ, ན ཨོདནཀུམྨཱསཾ བྷུཉྫེཡྻཾ། པུརཏྠིམེན ཝེསཱལིཾ ཨུདེནཾ ནཱམ ཙེཏིཡཾ, ཏཾ ནཱཏིཀྐམེཡྻཾ, དཀྑིཎེན ཝེསཱལིཾ གོཏམཀཾ ནཱམ ཙེཏིཡཾ, ཏཾ ནཱཏིཀྐམེཡྻཾ, པཙྪིམེན ཝེསཱལིཾ སཏྟམྦཾ ནཱམ ཙེཏིཡཾ, ཏཾ ནཱཏིཀྐམེཡྻཾ, ཨུཏྟརེན ཝེསཱལིཾ བཧུཔུཏྟཾ ནཱམ ³⁰ ཙེཏིཡཾ ཏཾ ནཱཏིཀྐམེཡྻ’ནྟི། སོ ཨིམེསཾ སཏྟནྣཾ ཝཏཔདཱནཾ སམཱདཱནཧེཏུ ལཱབྷགྒཔྤཏྟོ ཙེཝ ཡསགྒཔྤཏྟོ ཙ ཝཛྫིགཱམེ།

11. ‘‘Ekamidāhaṃ, bhaggava, samayaṃ vesāliyaṃ viharāmi mahāvane kūṭāgārasālāyaṃ. Tena kho pana samayena acelo kaḷāramaṭṭako vesāliyaṃ paṭivasati lābhaggappatto ceva yasaggappatto ca vajjigāme. Tassa sattavatapadāni ³¹ samattāni samādinnāni honti – ‘yāvajīvaṃ acelako assaṃ, na vatthaṃ paridaheyyaṃ, yāvajīvaṃ brahmacārī assaṃ, na methunaṃ dhammaṃ paṭiseveyyaṃ, yāvajīvaṃ surāmaṃseneva yāpeyyaṃ, na odanakummāsaṃ bhuñjeyyaṃ. Puratthimena vesāliṃ udenaṃ nāma cetiyaṃ, taṃ nātikkameyyaṃ, dakkhiṇena vesāliṃ gotamakaṃ nāma cetiyaṃ, taṃ nātikkameyyaṃ, pacchimena vesāliṃ sattambaṃ nāma cetiyaṃ, taṃ nātikkameyyaṃ, uttarena vesāliṃ bahuputtaṃ nāma ³² cetiyaṃ taṃ nātikkameyya’nti. So imesaṃ sattannaṃ vatapadānaṃ samādānahetu lābhaggappatto ceva yasaggappatto ca vajjigāme.

༡༢. ‘‘ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཡེན ཨཙེལོ ཀལཱ༹རམཊྚཀོ ཏེནུཔསངྐམི; ཨུཔསངྐམིཏྭཱ ཨཙེལཾ ཀལཱ༹རམཊྚཀཾ པཉྷཾ ཨཔུཙྪི། ཏསྶ ཨཙེལོ ཀལཱ༹རམཊྚཀོ པཉྷཾ པུཊྛོ ན སམྤཱཡཱསི། ཨསམྤཱཡནྟོ ཀོཔཉྩ དོསཉྩ ཨཔྤཙྩཡཉྩ པཱཏྭཱཀཱསི། ཨཐ ཁོ, བྷགྒཝ, སུནཀྑཏྟསྶ ལིཙྪཝིཔུཏྟསྶ ཨེཏདཧོསི – ‘སཱདྷུརཱུཔཾ ཝཏ བྷོ ཨརཧནྟཾ སམཎཾ ཨཱསཱདིམྷསེ ³³། མཱ ཝཏ ནོ ཨཧོསི དཱིགྷརཏྟཾ ཨཧིཏཱཡ དུཀྑཱཡཱ’ཏི།

12. ‘‘Atha kho, bhaggava, sunakkhatto licchaviputto yena acelo kaḷāramaṭṭako tenupasaṅkami; upasaṅkamitvā acelaṃ kaḷāramaṭṭakaṃ pañhaṃ apucchi. Tassa acelo kaḷāramaṭṭako pañhaṃ puṭṭho na sampāyāsi. Asampāyanto kopañca dosañca appaccayañca pātvākāsi. Atha kho, bhaggava, sunakkhattassa licchaviputtassa etadahosi – ‘sādhurūpaṃ vata bho arahantaṃ samaṇaṃ āsādimhase ³⁴. Mā vata no ahosi dīgharattaṃ ahitāya dukkhāyā’ti.

༡༣. ‘‘ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཡེནཱཧཾ ཏེནུཔསངྐམི; ཨུཔསངྐམིཏྭཱ མཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཧཾ, བྷགྒཝ, སུནཀྑཏྟཾ ལིཙྪཝིཔུཏྟཾ ཨེཏདཝོཙཾ – ‘ཏྭམྤི ནཱམ, མོགྷཔུརིས, སམཎོ སཀྱཔུཏྟིཡོ པཊིཛཱནིསྶསཱི’ཏི! ‘ཀིཾ པན མཾ, བྷནྟེ, བྷགཝཱ ཨེཝམཱཧ – ཏྭམྤི ནཱམ, མོགྷཔུརིས, སམཎོ སཀྱཔུཏྟིཡོ པཊིཛཱནིསྶསཱི’ཏི? ‘ནནུ ཏྭཾ, སུནཀྑཏྟ, ཨཙེལཾ ཀལཱ༹རམཊྚཀཾ ཨུཔསངྐམིཏྭཱ པཉྷཾ ཨཔུཙྪི། ཏསྶ ཏེ ཨཙེལོ ཀལཱ༹རམཊྚཀོ པཉྷཾ པུཊྛོ ན སམྤཱཡཱསི། ཨསམྤཱཡནྟོ ཀོཔཉྩ དོསཉྩ ཨཔྤཙྩཡཉྩ པཱཏྭཱཀཱསི། ཏསྶ ཏེ ཨེཏདཧོསི – ‘‘སཱདྷུརཱུཔཾ ཝཏ, བྷོ, ཨརཧནྟཾ སམཎཾ ཨཱསཱདིམྷསེ། མཱ ཝཏ ནོ ཨཧོསི དཱིགྷརཏྟཾ ཨཧིཏཱཡ དུཀྑཱཡཱ’ཏི། ‘ཨེཝཾ, བྷནྟེ། ཀིཾ པན, བྷནྟེ, བྷགཝཱ ཨརཧཏྟསྶ མཙྪརཱཡཏཱི’ཏི? ‘ན ཁོ ཨཧཾ, མོགྷཔུརིས, ཨརཧཏྟསྶ མཙྪརཱཡཱམི, ཨཔི ཙ ཏུཡ྄ཧེཝེཏཾ པཱཔཀཾ དིཊྛིགཏཾ ཨུཔྤནྣཾ, ཏཾ པཛཧ། མཱ ཏེ ཨཧོསི དཱིགྷརཏྟཾ ཨཧིཏཱཡ དུཀྑཱཡ། ཡཾ ཁོ པནེཏཾ, སུནཀྑཏྟ, མཉྙསི ཨཙེལཾ ཀལཱ༹རམཊྚཀཾ – སཱདྷུརཱུཔོ ཨཡཾ ³⁵ སམཎོཏི, སོ ནཙིརསྶེཝ པརིཧིཏོ སཱནུཙཱརིཀོ ཝིཙརནྟོ ཨོདནཀུམྨཱསཾ བྷུཉྫམཱནོ སབྦཱནེཝ ཝེསཱལིཡཱནི ཙེཏིཡཱནི སམཏིཀྐམིཏྭཱ ཡསཱ ནིཧཱིནོ ³⁶ ཀཱལཾ ཀརིསྶཏཱི’ཏི།

13. ‘‘Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnaṃ kho ahaṃ, bhaggava, sunakkhattaṃ licchaviputtaṃ etadavocaṃ – ‘tvampi nāma, moghapurisa, samaṇo sakyaputtiyo paṭijānissasī’ti! ‘Kiṃ pana maṃ, bhante, bhagavā evamāha – tvampi nāma, moghapurisa, samaṇo sakyaputtiyo paṭijānissasī’ti? ‘Nanu tvaṃ, sunakkhatta, acelaṃ kaḷāramaṭṭakaṃ upasaṅkamitvā pañhaṃ apucchi. Tassa te acelo kaḷāramaṭṭako pañhaṃ puṭṭho na sampāyāsi. Asampāyanto kopañca dosañca appaccayañca pātvākāsi. Tassa te etadahosi – ‘‘sādhurūpaṃ vata, bho, arahantaṃ samaṇaṃ āsādimhase. Mā vata no ahosi dīgharattaṃ ahitāya dukkhāyā’ti. ‘Evaṃ, bhante. Kiṃ pana, bhante, bhagavā arahattassa maccharāyatī’ti? ‘Na kho ahaṃ, moghapurisa, arahattassa maccharāyāmi, api ca tuyhevetaṃ pāpakaṃ diṭṭhigataṃ uppannaṃ, taṃ pajaha. Mā te ahosi dīgharattaṃ ahitāya dukkhāya. Yaṃ kho panetaṃ, sunakkhatta, maññasi acelaṃ kaḷāramaṭṭakaṃ – sādhurūpo ayaṃ ³⁷ samaṇoti, so nacirasseva parihito sānucāriko vicaranto odanakummāsaṃ bhuñjamāno sabbāneva vesāliyāni cetiyāni samatikkamitvā yasā nihīno ³⁸ kālaṃ karissatī’ti.

‘‘‘ཨཐ ཁོ, བྷགྒཝ, ཨཙེལོ ཀལཱ༹རམཊྚཀོ ནཙིརསྶེཝ པརིཧིཏོ སཱནུཙཱརིཀོ ཝིཙརནྟོ ཨོདནཀུམྨཱསཾ བྷུཉྫམཱནོ སབྦཱནེཝ ཝེསཱལིཡཱནི ཙེཏིཡཱནི སམཏིཀྐམིཏྭཱ ཡསཱ ནིཧཱིནོ ཀཱལམཀཱསི།

‘‘‘Atha kho, bhaggava, acelo kaḷāramaṭṭako nacirasseva parihito sānucāriko vicaranto odanakummāsaṃ bhuñjamāno sabbāneva vesāliyāni cetiyāni samatikkamitvā yasā nihīno kālamakāsi.

༡༤. ‘‘ཨསྶོསི ཁོ, བྷགྒཝ, སུནཀྑཏྟོ ལིཙྪཝིཔུཏྟོ – ‘ཨཙེལོ ཀིར ཀལཱ༹རམཊྚཀོ པརིཧིཏོ སཱནུཙཱརིཀོ ཝིཙརནྟོ ཨོདནཀུམྨཱསཾ བྷུཉྫམཱནོ སབྦཱནེཝ ཝེསཱལིཡཱནི ཙེཏིཡཱནི སམཏིཀྐམིཏྭཱ ཡསཱ ནིཧཱིནོ ཀཱལངྐཏོ’ཏི། ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཡེནཱཧཾ ཏེནུཔསངྐམི; ཨུཔསངྐམིཏྭཱ མཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཧཾ, བྷགྒཝ, སུནཀྑཏྟཾ ལིཙྪཝིཔུཏྟཾ ཨེཏདཝོཙཾ – ‘ཏཾ ཀིཾ མཉྙསི, སུནཀྑཏྟ, ཡཐེཝ ཏེ ཨཧཾ ཨཙེལཾ ཀལཱ༹རམཊྚཀཾ ཨཱརབྦྷ བྱཱཀཱསིཾ, ཏཐེཝ ཏཾ ཝིཔཱཀཾ, ཨཉྙཐཱ ཝཱ’ཏི? ‘ཡཐེཝ མེ, བྷནྟེ, བྷགཝཱ ཨཙེལཾ ཀལཱ༹རམཊྚཀཾ ཨཱརབྦྷ བྱཱཀཱསི, ཏཐེཝ ཏཾ ཝིཔཱཀཾ, ནོ ཨཉྙཐཱ’ཏི། ‘ཏཾ ཀིཾ མཉྙསི, སུནཀྑཏྟ, ཡདི ཨེཝཾ སནྟེ ཀཏཾ ཝཱ ཧོཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཨཀཏཾ ཝཱ’ཏི? ‘ཨདྡྷཱ ཁོ, བྷནྟེ, ཨེཝཾ སནྟེ ཀཏཾ ཧོཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ, ནོ ཨཀཏ’ནྟི། ‘ཨེཝམྤི ཁོ མཾ ཏྭཾ, མོགྷཔུརིས, ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརོནྟཾ ཨེཝཾ ཝདེསི – ན ཧི པན མེ, བྷནྟེ, བྷགཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརོཏཱི’’ཏི། པསྶ, མོགྷཔུརིས, ཡཱཝཉྩ ཏེ ཨིདཾ ཨཔརདྡྷ’ནྟི། ‘‘ཨེཝ’མྤི ཁོ, བྷགྒཝ, སུནཀྑཏྟོ ལིཙྪཝིཔུཏྟོ མཡཱ ཝུཙྩམཱནོ ཨཔཀྐམེཝ ཨིམསྨཱ དྷམྨཝིནཡཱ, ཡཐཱ ཏཾ ཨཱཔཱཡིཀོ ནེརཡིཀོ།

14. ‘‘Assosi kho, bhaggava, sunakkhatto licchaviputto – ‘acelo kira kaḷāramaṭṭako parihito sānucāriko vicaranto odanakummāsaṃ bhuñjamāno sabbāneva vesāliyāni cetiyāni samatikkamitvā yasā nihīno kālaṅkato’ti. Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnaṃ kho ahaṃ, bhaggava, sunakkhattaṃ licchaviputtaṃ etadavocaṃ – ‘taṃ kiṃ maññasi, sunakkhatta, yatheva te ahaṃ acelaṃ kaḷāramaṭṭakaṃ ārabbha byākāsiṃ, tatheva taṃ vipākaṃ, aññathā vā’ti? ‘Yatheva me, bhante, bhagavā acelaṃ kaḷāramaṭṭakaṃ ārabbha byākāsi, tatheva taṃ vipākaṃ, no aññathā’ti. ‘Taṃ kiṃ maññasi, sunakkhatta, yadi evaṃ sante kataṃ vā hoti uttarimanussadhammā iddhipāṭihāriyaṃ akataṃ vā’ti? ‘Addhā kho, bhante, evaṃ sante kataṃ hoti uttarimanussadhammā iddhipāṭihāriyaṃ, no akata’nti. ‘Evampi kho maṃ tvaṃ, moghapurisa, uttarimanussadhammā iddhipāṭihāriyaṃ karontaṃ evaṃ vadesi – na hi pana me, bhante, bhagavā uttarimanussadhammā iddhipāṭihāriyaṃ karotī’’ti. Passa, moghapurisa, yāvañca te idaṃ aparaddha’nti. ‘‘Eva’mpi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṃ āpāyiko nerayiko.

ཨཙེལཔཱཐིཀཔུཏྟཝཏྠུ

Acelapāthikaputtavatthu

༡༥. ‘‘ཨེཀམིདཱཧཾ, བྷགྒཝ, སམཡཾ ཏཏྠེཝ ཝེསཱལིཡཾ ཝིཧརཱམི མཧཱཝནེ ཀཱུཊཱགཱརསཱལཱཡཾ། ཏེན ཁོ པན སམཡེན ཨཙེལོ པཱཐིཀཔུཏྟོ ³⁹ ཝེསཱལིཡཾ པཊིཝསཏི ལཱབྷགྒཔྤཏྟོ ཙེཝ ཡསགྒཔྤཏྟོ ཙ ཝཛྫིགཱམེ། སོ ཝེསཱལིཡཾ པརིསཏི ཨེཝཾ ཝཱཙཾ བྷཱསཏི – ‘སམཎོཔི གོཏམོ ཉཱཎཝཱདོ, ཨཧམྤི ཉཱཎཝཱདོ། ཉཱཎཝཱདོ ཁོ པན ཉཱཎཝཱདེན ཨརཧཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ དསྶེཏུཾ། སམཎོ གོཏམོ ཨུཔཌྜྷཔཐཾ ཨཱགཙྪེཡྻ, ཨཧམྤི ཨུཔཌྜྷཔཐཾ གཙྪེཡྻཾ། ཏེ ཏཏྠ ཨུབྷོཔི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརེཡྻཱམ། ཨེཀཾ ཙེ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཏི, དྭཱཧཾ ཀརིསྶཱམི། དྭེ ཙེ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཱནི ཀརིསྶཏི, ཙཏྟཱརཱཧཾ ཀརིསྶཱམི ། ཙཏྟཱརི ཙེ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཱནི ཀརིསྶཏི, ཨཊྛཱཧཾ ཀརིསྶཱམི། ཨིཏི ཡཱཝཏཀཾ ཡཱཝཏཀཾ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཏི, ཏདྡིགུཎཾ ཏདྡིགུཎཱཧཾ ཀརིསྶཱམཱི’ཏི།

15. ‘‘Ekamidāhaṃ, bhaggava, samayaṃ tattheva vesāliyaṃ viharāmi mahāvane kūṭāgārasālāyaṃ. Tena kho pana samayena acelo pāthikaputto ⁴⁰ vesāliyaṃ paṭivasati lābhaggappatto ceva yasaggappatto ca vajjigāme. So vesāliyaṃ parisati evaṃ vācaṃ bhāsati – ‘samaṇopi gotamo ñāṇavādo, ahampi ñāṇavādo. Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ. Samaṇo gotamo upaḍḍhapathaṃ āgaccheyya, ahampi upaḍḍhapathaṃ gaccheyyaṃ. Te tattha ubhopi uttarimanussadhammā iddhipāṭihāriyaṃ kareyyāma. Ekaṃ ce samaṇo gotamo uttarimanussadhammā iddhipāṭihāriyaṃ karissati, dvāhaṃ karissāmi. Dve ce samaṇo gotamo uttarimanussadhammā iddhipāṭihāriyāni karissati, cattārāhaṃ karissāmi . Cattāri ce samaṇo gotamo uttarimanussadhammā iddhipāṭihāriyāni karissati, aṭṭhāhaṃ karissāmi. Iti yāvatakaṃ yāvatakaṃ samaṇo gotamo uttarimanussadhammā iddhipāṭihāriyaṃ karissati, taddiguṇaṃ taddiguṇāhaṃ karissāmī’ti.

༡༦. ‘‘ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཡེནཱཧཾ ཏེནུཔསངྐམི; ཨུཔསངྐམིཏྭཱ མཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣོ ཁོ, བྷགྒཝ, སུནཀྑཏྟོ ལིཙྪཝིཔུཏྟོ མཾ ཨེཏདཝོཙ – ‘ཨཙེལོ, བྷནྟེ, པཱཐིཀཔུཏྟོ ཝེསཱལིཡཾ པཊིཝསཏི ལཱབྷགྒཔྤཏྟོ ཙེཝ ཡསགྒཔྤཏྟོ ཙ ཝཛྫིགཱམེ། སོ ཝེསཱལིཡཾ པརིསཏི ཨེཝཾ ཝཱཙཾ བྷཱསཏི – སམཎོཔི གོཏམོ ཉཱཎཝཱདོ, ཨཧམྤི ཉཱཎཝཱདོ། ཉཱཎཝཱདོ ཁོ པན ཉཱཎཝཱདེན ཨརཧཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ དསྶེཏུཾ། སམཎོ གོཏམོ ཨུཔཌྜྷཔཐཾ ཨཱགཙྪེཡྻ, ཨཧམྤི ཨུཔཌྜྷཔཐཾ གཙྪེཡྻཾ། ཏེ ཏཏྠ ཨུབྷོཔི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརེཡྻཱམ། ཨེཀཾ ཙེ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཏི, དྭཱཧཾ ཀརིསྶཱམི། དྭེ ཙེ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཱནི ཀརིསྶཏི, ཙཏྟཱརཱཧཾ ཀརིསྶཱམི། ཙཏྟཱརི ཙེ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཱནི ཀརིསྶཏི, ཨཊྛཱཧཾ ཀརིསྶཱམི། ཨིཏི ཡཱཝཏཀཾ ཡཱཝཏཀཾ སམཎོ གོཏམོ ཨུཏྟརི མནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཏི, ཏདྡིགུཎཾ ཏདྡིགུཎཱཧཾ ཀརིསྶཱམཱི’’ཏི།

16. ‘‘Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinno kho, bhaggava, sunakkhatto licchaviputto maṃ etadavoca – ‘acelo, bhante, pāthikaputto vesāliyaṃ paṭivasati lābhaggappatto ceva yasaggappatto ca vajjigāme. So vesāliyaṃ parisati evaṃ vācaṃ bhāsati – samaṇopi gotamo ñāṇavādo, ahampi ñāṇavādo. Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ. Samaṇo gotamo upaḍḍhapathaṃ āgaccheyya, ahampi upaḍḍhapathaṃ gaccheyyaṃ. Te tattha ubhopi uttarimanussadhammā iddhipāṭihāriyaṃ kareyyāma. Ekaṃ ce samaṇo gotamo uttarimanussadhammā iddhipāṭihāriyaṃ karissati, dvāhaṃ karissāmi. Dve ce samaṇo gotamo uttarimanussadhammā iddhipāṭihāriyāni karissati, cattārāhaṃ karissāmi. Cattāri ce samaṇo gotamo uttarimanussadhammā iddhipāṭihāriyāni karissati, aṭṭhāhaṃ karissāmi. Iti yāvatakaṃ yāvatakaṃ samaṇo gotamo uttari manussadhammā iddhipāṭihāriyaṃ karissati, taddiguṇaṃ taddiguṇāhaṃ karissāmī’’ti.

‘‘ཨེཝཾ ཝུཏྟེ, ཨཧཾ, བྷགྒཝ, སུནཀྑཏྟཾ ལིཙྪཝིཔུཏྟཾ ཨེཏདཝོཙཾ – ‘ཨབྷབྦོ ཁོ, སུནཀྑཏྟ, ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱ’ཏི།

‘‘Evaṃ vutte, ahaṃ, bhaggava, sunakkhattaṃ licchaviputtaṃ etadavocaṃ – ‘abhabbo kho, sunakkhatta, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

༡༧. ‘རཀྑཏེཏཾ, བྷནྟེ, བྷགཝཱ ཝཱཙཾ, རཀྑཏེཏཾ སུགཏོ ཝཱཙ’ནྟི། ‘ཀིཾ པན མཾ ཏྭཾ, སུནཀྑཏྟ, ཨེཝཾ ཝདེསི – རཀྑཏེཏཾ, བྷནྟེ, བྷགཝཱ ཝཱཙཾ, རཀྑཏེཏཾ སུགཏོ ཝཱཙ’ནྟི? ‘བྷགཝཏཱ ཙསྶ, བྷནྟེ, ཨེསཱ ཝཱཙཱ ཨེཀཾསེན ཨོདྷཱརིཏཱ ⁴¹ – ཨབྷབྦོ ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱཏི། ཨཙེལོ ཙ, བྷནྟེ, པཱཐིཀཔུཏྟོ ཝིརཱུཔརཱུཔེན བྷགཝཏོ སམྨུཁཱིབྷཱཝཾ ཨཱགཙྪེཡྻ, ཏདསྶ བྷགཝཏོ མུསཱ’ཏི།

17. ‘Rakkhatetaṃ, bhante, bhagavā vācaṃ, rakkhatetaṃ sugato vāca’nti. ‘Kiṃ pana maṃ tvaṃ, sunakkhatta, evaṃ vadesi – rakkhatetaṃ, bhante, bhagavā vācaṃ, rakkhatetaṃ sugato vāca’nti? ‘Bhagavatā cassa, bhante, esā vācā ekaṃsena odhāritā ⁴² – abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti. Acelo ca, bhante, pāthikaputto virūparūpena bhagavato sammukhībhāvaṃ āgaccheyya, tadassa bhagavato musā’ti.

༡༨. ‘ཨཔི ནུ, སུནཀྑཏྟ, ཏཐཱགཏོ ཏཾ ཝཱཙཾ བྷཱསེཡྻ ཡཱ སཱ ཝཱཙཱ དྭཡགཱམིནཱི’ཏི? ‘ཀིཾ པན, བྷནྟེ, བྷགཝཏཱ ཨཙེལོ པཱཐིཀཔུཏྟོ ཙེཏསཱ ཙེཏོ པརིཙྩ ཝིདིཏོ – ཨབྷབྦོ ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱ’ཏི?

18. ‘Api nu, sunakkhatta, tathāgato taṃ vācaṃ bhāseyya yā sā vācā dvayagāminī’ti? ‘Kiṃ pana, bhante, bhagavatā acelo pāthikaputto cetasā ceto paricca vidito – abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti?

‘ཨུདཱཧུ , དེཝཏཱ བྷགཝཏོ ཨེཏམཏྠཾ ཨཱརོཙེསུཾ – ཨབྷབྦོ, བྷནྟེ, ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ བྷགཝཏོ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱ’ཏི?

‘Udāhu , devatā bhagavato etamatthaṃ ārocesuṃ – abhabbo, bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti?

༡༩. ‘ཙེཏསཱ ཙེཏོ པརིཙྩ ཝིདིཏོ ཙེཝ མེ, སུནཀྑཏྟ , ཨཙེལོ པཱཐིཀཔུཏྟོ ཨབྷབྦོ ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱ’ཏི།

19. ‘Cetasā ceto paricca vidito ceva me, sunakkhatta , acelo pāthikaputto abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

‘དེཝཏཱཔི མེ ཨེཏམཏྠཾ ཨཱརོཙེསུཾ – ཨབྷབྦོ , བྷནྟེ, ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ བྷགཝཏོ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱ’ཏི།

‘Devatāpi me etamatthaṃ ārocesuṃ – abhabbo , bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

‘ཨཛིཏོཔི ནཱམ ལིཙྪཝཱིནཾ སེནཱཔཏི ཨདྷུནཱ ཀཱལངྐཏོ ཏཱཝཏིཾསཀཱཡཾ ཨུཔཔནྣོ། སོཔི མཾ ཨུཔསངྐམིཏྭཱ ཨེཝམཱརོཙེསི – ཨལཛྫཱི, བྷནྟེ, ཨཙེལོ པཱཐིཀཔུཏྟོ; མུསཱཝཱདཱི, བྷནྟེ, ཨཙེལོ པཱཐིཀཔུཏྟོ། མམྤི, བྷནྟེ, ཨཙེལོ པཱཐིཀཔུཏྟོ བྱཱཀཱསི ཝཛྫིགཱམེ – ཨཛིཏོ ལིཙྪཝཱིནཾ སེནཱཔཏི མཧཱནིརཡཾ ཨུཔཔནྣོཏི། ན ཁོ པནཱཧཾ, བྷནྟེ, མཧཱནིརཡཾ ཨུཔཔནྣོ; ཏཱཝཏིཾསཀཱཡམྷི ཨུཔཔནྣོ། ཨལཛྫཱི, བྷནྟེ, ཨཙེལོ པཱཐིཀཔུཏྟོ; མུསཱཝཱདཱི, བྷནྟེ, ཨཙེལོ པཱཐིཀཔུཏྟོ; ཨབྷབྦོ ཙ, བྷནྟེ, ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ བྷགཝཏོ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱ’ཏི།

‘Ajitopi nāma licchavīnaṃ senāpati adhunā kālaṅkato tāvatiṃsakāyaṃ upapanno. Sopi maṃ upasaṅkamitvā evamārocesi – alajjī, bhante, acelo pāthikaputto; musāvādī, bhante, acelo pāthikaputto. Mampi, bhante, acelo pāthikaputto byākāsi vajjigāme – ajito licchavīnaṃ senāpati mahānirayaṃ upapannoti. Na kho panāhaṃ, bhante, mahānirayaṃ upapanno; tāvatiṃsakāyamhi upapanno. Alajjī, bhante, acelo pāthikaputto; musāvādī, bhante, acelo pāthikaputto; abhabbo ca, bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

‘ཨིཏི ཁོ, སུནཀྑཏྟ, ཙེཏསཱ ཙེཏོ པརིཙྩ ཝིདིཏོ ཙེཝ མེ ཨཙེལོ པཱཐིཀཔུཏྟོ ཨབྷབྦོ ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱཏི། དེཝཏཱཔི མེ ཨེཏམཏྠཾ ཨཱརོཙེསུཾ – ཨབྷབྦོ, བྷནྟེ , ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ བྷགཝཏོ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱ’ཏི།

‘Iti kho, sunakkhatta, cetasā ceto paricca vidito ceva me acelo pāthikaputto abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti. Devatāpi me etamatthaṃ ārocesuṃ – abhabbo, bhante , acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

‘སོ ཁོ པནཱཧཾ, སུནཀྑཏྟ, ཝེསཱལིཡཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔྤཊིཀྐནྟོ ཡེན ཨཙེལསྶ པཱཐིཀཔུཏྟསྶ ཨཱརཱམོ ཏེནུཔསངྐམིསྶཱམི དིཝཱཝིཧཱརཱཡ། ཡསྶདཱནི ཏྭཾ, སུནཀྑཏྟ, ཨིཙྪསི, ཏསྶ ཨཱརོཙེཧཱི’ཏི།

‘So kho panāhaṃ, sunakkhatta, vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkamissāmi divāvihārāya. Yassadāni tvaṃ, sunakkhatta, icchasi, tassa ārocehī’ti.

ཨིདྡྷིཔཱཊིཧཱརིཡཀཐཱ

Iddhipāṭihāriyakathā

༢༠. ‘‘ཨཐ ཁྭཱཧཾ ⁴³, བྷགྒཝ, པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཝེསཱལིཾ པིཎྜཱཡ པཱཝིསིཾ། ཝེསཱལིཡཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔྤཊིཀྐནྟོ ཡེན ཨཙེལསྶ པཱཐིཀཔུཏྟསྶ ཨཱརཱམོ ཏེནུཔསངྐམིཾ དིཝཱཝིཧཱརཱཡ། ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཏརམཱནརཱུཔོ ཝེསཱལིཾ པཝིསིཏྭཱ ཡེན ཨབྷིཉྙཱཏཱ ཨབྷིཉྙཱཏཱ ལིཙྪཝཱི ཏེནུཔསངྐམི; ཨུཔསངྐམིཏྭཱ ཨབྷིཉྙཱཏེ ཨབྷིཉྙཱཏེ ལིཙྪཝཱི ཨེཏདཝོཙ – ‘ཨེསཱཝུསོ, བྷགཝཱ ཝེསཱལིཡཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔྤཊིཀྐནྟོ ཡེན ཨཙེལསྶ པཱཐིཀཔུཏྟསྶ ཨཱརཱམོ ཏེནུཔསངྐམི དིཝཱཝིཧཱརཱཡ། ཨབྷིཀྐམཐཱཡསྨནྟོ ཨབྷིཀྐམཐཱཡསྨནྟོ, སཱདྷུརཱུཔཱནཾ སམཎཱནཾ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ བྷཝིསྶཏཱི’ཏི ། ཨཐ ཁོ, བྷགྒཝ, ཨབྷིཉྙཱཏཱནཾ ཨབྷིཉྙཱཏཱནཾ ལིཙྪཝཱིནཾ ཨེཏདཧོསི – ‘སཱདྷུརཱུཔཱནཾ ཀིར, བྷོ, སམཎཱནཾ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ བྷཝིསྶཏི; ཧནྡ ཝཏ, བྷོ, གཙྪཱམཱ’ཏི། ཡེན ཙ ཨབྷིཉྙཱཏཱ ཨབྷིཉྙཱཏཱ བྲཱཧྨཎམཧཱསཱལཱ གཧཔཏིནེཙཡིཀཱ ནཱནཱཏིཏྠིཡཱ ⁴⁴ སམཎབྲཱཧྨཎཱ ཏེནུཔསངྐམི། ཨུཔསངྐམིཏྭཱ ཨབྷིཉྙཱཏེ ཨབྷིཉྙཱཏེ ནཱནཱཏིཏྠིཡེ ⁴⁵ སམཎབྲཱཧྨཎེ ཨེཏདཝོཙ – ‘ཨེསཱཝུསོ, བྷགཝཱ ཝེསཱལིཡཾ པིཎྜཱཡ ཙརིཏྭཱ པཙྪཱབྷཏྟཾ པིཎྜཔཱཏཔྤཊིཀྐནྟོ ཡེན ཨཙེལསྶ པཱཐིཀཔུཏྟསྶ ཨཱརཱམོ ཏེནུཔསངྐམི དིཝཱཝིཧཱརཱཡ། ཨབྷིཀྐམཐཱཡསྨནྟོ ཨབྷིཀྐམཐཱཡསྨནྟོ, སཱདྷུརཱུཔཱནཾ སམཎཱནཾ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ བྷཝིསྶཏཱི’ཏི། ཨཐ ཁོ, བྷགྒཝ, ཨབྷིཉྙཱཏཱནཾ ཨབྷིཉྙཱཏཱནཾ ནཱནཱཏིཏྠིཡཱནཾ སམཎབྲཱཧྨཎཱནཾ ཨེཏདཧོསི – ‘སཱདྷུརཱུཔཱནཾ ཀིར, བྷོ, སམཎཱནཾ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ བྷཝིསྶཏི; ཧནྡ ཝཏ, བྷོ, གཙྪཱམཱ’ཏི།

20. ‘‘Atha khvāhaṃ ⁴⁶, bhaggava, pubbaṇhasamayaṃ nivāsetvā pattacīvaramādāya vesāliṃ piṇḍāya pāvisiṃ. Vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkamiṃ divāvihārāya. Atha kho, bhaggava, sunakkhatto licchaviputto taramānarūpo vesāliṃ pavisitvā yena abhiññātā abhiññātā licchavī tenupasaṅkami; upasaṅkamitvā abhiññāte abhiññāte licchavī etadavoca – ‘esāvuso, bhagavā vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkami divāvihārāya. Abhikkamathāyasmanto abhikkamathāyasmanto, sādhurūpānaṃ samaṇānaṃ uttarimanussadhammā iddhipāṭihāriyaṃ bhavissatī’ti . Atha kho, bhaggava, abhiññātānaṃ abhiññātānaṃ licchavīnaṃ etadahosi – ‘sādhurūpānaṃ kira, bho, samaṇānaṃ uttarimanussadhammā iddhipāṭihāriyaṃ bhavissati; handa vata, bho, gacchāmā’ti. Yena ca abhiññātā abhiññātā brāhmaṇamahāsālā gahapatinecayikā nānātitthiyā ⁴⁷ samaṇabrāhmaṇā tenupasaṅkami. Upasaṅkamitvā abhiññāte abhiññāte nānātitthiye ⁴⁸ samaṇabrāhmaṇe etadavoca – ‘esāvuso, bhagavā vesāliyaṃ piṇḍāya caritvā pacchābhattaṃ piṇḍapātappaṭikkanto yena acelassa pāthikaputtassa ārāmo tenupasaṅkami divāvihārāya. Abhikkamathāyasmanto abhikkamathāyasmanto, sādhurūpānaṃ samaṇānaṃ uttarimanussadhammā iddhipāṭihāriyaṃ bhavissatī’ti. Atha kho, bhaggava, abhiññātānaṃ abhiññātānaṃ nānātitthiyānaṃ samaṇabrāhmaṇānaṃ etadahosi – ‘sādhurūpānaṃ kira, bho, samaṇānaṃ uttarimanussadhammā iddhipāṭihāriyaṃ bhavissati; handa vata, bho, gacchāmā’ti.

‘‘ཨཐ ཁོ, བྷགྒཝ, ཨབྷིཉྙཱཏཱ ཨབྷིཉྙཱཏཱ ལིཙྪཝཱི, ཨབྷིཉྙཱཏཱ ཨབྷིཉྙཱཏཱ ཙ བྲཱཧྨཎམཧཱསཱལཱ གཧཔཏིནེཙཡིཀཱ ནཱནཱཏིཏྠིཡཱ སམཎབྲཱཧྨཎཱ ཡེན ཨཙེལསྶ པཱཐིཀཔུཏྟསྶ ཨཱརཱམོ ཏེནུཔསངྐམིཾསུ། སཱ ཨེསཱ, བྷགྒཝ, པརིསཱ མཧཱ ཧོཏི ⁴⁹ ཨནེཀསཏཱ ཨནེཀསཧསྶཱ།

‘‘Atha kho, bhaggava, abhiññātā abhiññātā licchavī, abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā yena acelassa pāthikaputtassa ārāmo tenupasaṅkamiṃsu. Sā esā, bhaggava, parisā mahā hoti ⁵⁰ anekasatā anekasahassā.

༢༡. ‘‘ཨསྶོསི ཁོ, བྷགྒཝ, ཨཙེལོ པཱཐིཀཔུཏྟོ – ‘ཨབྷིཀྐནྟཱ ཀིར ཨབྷིཉྙཱཏཱ ཨབྷིཉྙཱཏཱ ལིཙྪཝཱི, ཨབྷིཀྐནྟཱ ཨབྷིཉྙཱཏཱ ཨབྷིཉྙཱཏཱ ཙ བྲཱཧྨཎམཧཱསཱལཱ གཧཔཏིནེཙཡིཀཱ ནཱནཱཏིཏྠིཡཱ སམཎབྲཱཧྨཎཱ། སམཎོཔི གོཏམོ མཡ྄ཧཾ ཨཱརཱམེ དིཝཱཝིཧཱརཾ ནིསིནྣོ’ཏི། སུཏྭཱནསྶ བྷཡཾ ཚམྦྷིཏཏྟཾ ལོམཧཾསོ ཨུདཔཱདི། ཨཐ ཁོ, བྷགྒཝ, ཨཙེལོ པཱཐིཀཔུཏྟོ བྷཱིཏོ སཾཝིགྒོ ལོམཧཊྛཛཱཏོ ཡེན ཏིནྡུཀཁཱཎུཔརིབྦཱཛཀཱརཱམོ ཏེནུཔསངྐམི།

21. ‘‘Assosi kho, bhaggava, acelo pāthikaputto – ‘abhikkantā kira abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo mayhaṃ ārāme divāvihāraṃ nisinno’ti. Sutvānassa bhayaṃ chambhitattaṃ lomahaṃso udapādi. Atha kho, bhaggava, acelo pāthikaputto bhīto saṃviggo lomahaṭṭhajāto yena tindukakhāṇuparibbājakārāmo tenupasaṅkami.

‘‘ཨསྶོསི ཁོ, བྷགྒཝ, སཱ པརིསཱ – ‘ཨཙེལོ ཀིར པཱཐིཀཔུཏྟོ བྷཱིཏོ སཾཝིགྒོ ལོམཧཊྛཛཱཏོ ཡེན ཏིནྡུཀཁཱཎུཔརིབྦཱཛཀཱརཱམོ ཏེནུཔསངྐནྟོ’ཏི ⁵¹། ཨཐ ཁོ, བྷགྒཝ, སཱ པརིསཱ ཨཉྙཏརཾ པུརིསཾ ཨཱམནྟེསི –

‘‘Assosi kho, bhaggava, sā parisā – ‘acelo kira pāthikaputto bhīto saṃviggo lomahaṭṭhajāto yena tindukakhāṇuparibbājakārāmo tenupasaṅkanto’ti ⁵². Atha kho, bhaggava, sā parisā aññataraṃ purisaṃ āmantesi –

‘ཨེཧི ཏྭཾ, བྷོ པུརིས, ཡེན ཏིནྡུཀཁཱཎུཔརིབྦཱཛཀཱརཱམོ, ཡེན ཨཙེལོ པཱཐིཀཔུཏྟོ ཏེནུཔསངྐམ། ཨུཔསངྐམིཏྭཱ ཨཙེལཾ པཱཐིཀཔུཏྟཾ ཨེཝཾ ཝདེཧི – ཨབྷིཀྐམཱཝུསོ, པཱཐིཀཔུཏྟ, ཨབྷིཀྐནྟཱ ཨབྷིཉྙཱཏཱ ཨབྷིཉྙཱཏཱ ལིཙྪཝཱི, ཨབྷིཀྐནྟཱ ཨབྷིཉྙཱཏཱ ཨབྷིཉྙཱཏཱ ཙ བྲཱཧྨཎམཧཱསཱལཱ གཧཔཏིནེཙཡིཀཱ ནཱནཱཏིཏྠིཡཱ སམཎབྲཱཧྨཎཱ, སམཎོཔི གོཏམོ ཨཱཡསྨཏོ ཨཱརཱམེ དིཝཱཝིཧཱརཾ ནིསིནྣོ; བྷཱསིཏཱ ཁོ པན ཏེ ཨེསཱ, ཨཱཝུསོ པཱཐིཀཔུཏྟ, ཝེསཱལིཡཾ པརིསཏི ཝཱཙཱ སམཎོཔི གོཏམོ ཉཱཎཝཱདོ, ཨཧམྤི ཉཱཎཝཱདོ། ཉཱཎཝཱདོ ཁོ པན ཉཱཎཝཱདེན ཨརཧཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ དསྶེཏུཾ། སམཎོ གོཏམོ ཨུཔཌྜྷཔཐཾ ཨཱགཙྪེཡྻ ཨཧམྤི ཨུཔཌྜྷཔཐཾ གཙྪེཡྻཾ། ཏེ ཏཏྠ ཨུབྷོཔི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརེཡྻཱམ། ཨེཀཾ ཙེ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཏི, དྭཱཧཾ ཀརིསྶཱམི། དྭེ ཙེ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཱནི ཀརིསྶཏི, ཙཏྟཱརཱཧཾ ཀརིསྶཱམི། ཙཏྟཱརི ཙེ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཱནི ཀརིསྶཏི , ཨཊྛཱཧཾ ཀརིསྶཱམི། ཨིཏི ཡཱཝཏཀཾ ཡཱཝཏཀཾ སམཎོ གོཏམོ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརིསྶཏི, ཏདྡིགུཎཾ ཏདྡིགུཎཱཧཾ ཀརིསྶཱམཱི’ཏི ཨབྷིཀྐམསྶེཝ ⁵³ ཁོ; ཨཱཝུསོ པཱཐིཀཔུཏྟ, ཨུཔཌྜྷཔཐཾ། སབྦཔཋམཾཡེཝ ཨཱགནྟྭཱ སམཎོ གོཏམོ ཨཱཡསྨཏོ ཨཱརཱམེ དིཝཱཝིཧཱརཾ ནིསིནྣོ’ཏི།

‘Ehi tvaṃ, bho purisa, yena tindukakhāṇuparibbājakārāmo, yena acelo pāthikaputto tenupasaṅkama. Upasaṅkamitvā acelaṃ pāthikaputtaṃ evaṃ vadehi – abhikkamāvuso, pāthikaputta, abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā, samaṇopi gotamo āyasmato ārāme divāvihāraṃ nisinno; bhāsitā kho pana te esā, āvuso pāthikaputta, vesāliyaṃ parisati vācā samaṇopi gotamo ñāṇavādo, ahampi ñāṇavādo. Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ. Samaṇo gotamo upaḍḍhapathaṃ āgaccheyya ahampi upaḍḍhapathaṃ gaccheyyaṃ. Te tattha ubhopi uttarimanussadhammā iddhipāṭihāriyaṃ kareyyāma. Ekaṃ ce samaṇo gotamo uttarimanussadhammā iddhipāṭihāriyaṃ karissati, dvāhaṃ karissāmi. Dve ce samaṇo gotamo uttarimanussadhammā iddhipāṭihāriyāni karissati, cattārāhaṃ karissāmi. Cattāri ce samaṇo gotamo uttarimanussadhammā iddhipāṭihāriyāni karissati , aṭṭhāhaṃ karissāmi. Iti yāvatakaṃ yāvatakaṃ samaṇo gotamo uttarimanussadhammā iddhipāṭihāriyaṃ karissati, taddiguṇaṃ taddiguṇāhaṃ karissāmī’ti abhikkamasseva ⁵⁴ kho; āvuso pāthikaputta, upaḍḍhapathaṃ. Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno’ti.

༢༢. ‘‘ཨེཝཾ, བྷོཏི ཁོ, བྷགྒཝ, སོ པུརིསོ ཏསྶཱ པརིསཱཡ པཊིསྶུཏྭཱ ཡེན ཏིནྡུཀཁཱཎུཔརིབྦཱཛཀཱརཱམོ, ཡེན ཨཙེལོ པཱཐིཀཔུཏྟོ ཏེནུཔསངྐམི། ཨུཔསངྐམིཏྭཱ ཨཙེལཾ པཱཐིཀཔུཏྟཾ ཨེཏདཝོཙ – ‘ཨབྷིཀྐམཱཝུསོ པཱཐིཀཔུཏྟ, ཨབྷིཀྐནྟཱ ཨབྷིཉྙཱཏཱ ཨབྷིཉྙཱཏཱ ལིཙྪཝཱི, ཨབྷིཀྐནྟཱ ཨབྷིཉྙཱཏཱ ཨབྷིཉྙཱཏཱ ཙ བྲཱཧྨཎམཧཱསཱལཱ གཧཔཏིནེཙཡིཀཱ ནཱནཱཏིཏྠིཡཱ སམཎབྲཱཧྨཎཱ། སམཎོཔི གོཏམོ ཨཱཡསྨཏོ ཨཱརཱམེ དིཝཱཝིཧཱརཾ ནིསིནྣོ། བྷཱསིཏཱ ཁོ པན ཏེ ཨེསཱ, ཨཱཝུསོ པཱཐིཀཔུཏྟ, ཝེསཱལིཡཾ པརིསཏི ཝཱཙཱ – སམཎོཔི གོཏམོ ཉཱཎཝཱདོ; ཨཧམྤི ཉཱཎཝཱདོ། ཉཱཎཝཱདོ ཁོ པན ཉཱཎཝཱདེན ཨརཧཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ དསྶེཏུཾ…པེ॰… ཏདྡིགུཎཾ ཏདྡིགུཎཱཧཾ ཀརིསྶཱམཱིཏི། ཨབྷིཀྐམསྶེཝ ཁོ, ཨཱཝུསོ པཱཐིཀཔུཏྟ, ཨུཔཌྜྷཔཐཾ། སབྦཔཋམཾཡེཝ ཨཱགནྟྭཱ སམཎོ གོཏམོ ཨཱཡསྨཏོ ཨཱརཱམེ དིཝཱཝིཧཱརཾ ནིསིནྣོ’ཏི།

22. ‘‘Evaṃ, bhoti kho, bhaggava, so puriso tassā parisāya paṭissutvā yena tindukakhāṇuparibbājakārāmo, yena acelo pāthikaputto tenupasaṅkami. Upasaṅkamitvā acelaṃ pāthikaputtaṃ etadavoca – ‘abhikkamāvuso pāthikaputta, abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo āyasmato ārāme divāvihāraṃ nisinno. Bhāsitā kho pana te esā, āvuso pāthikaputta, vesāliyaṃ parisati vācā – samaṇopi gotamo ñāṇavādo; ahampi ñāṇavādo. Ñāṇavādo kho pana ñāṇavādena arahati uttarimanussadhammā iddhipāṭihāriyaṃ dassetuṃ…pe… taddiguṇaṃ taddiguṇāhaṃ karissāmīti. Abhikkamasseva kho, āvuso pāthikaputta, upaḍḍhapathaṃ. Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno’ti.

‘‘ཨེཝཾ ཝུཏྟེ, བྷགྒཝ, ཨཙེལོ པཱཐིཀཔུཏྟོ ‘ཨཱཡཱམི ཨཱཝུསོ, ཨཱཡཱམི ཨཱཝུསོ’ཏི ཝཏྭཱ ཏཏྠེཝ སཾསཔྤཏི ⁵⁵, ན སཀྐོཏི ཨཱསནཱཔི ཝུཊྛཱཏུཾ། ཨཐ ཁོ སོ, བྷགྒཝ, པུརིསོ ཨཙེལཾ པཱཐིཀཔུཏྟཾ ཨེཏདཝོཙ – ‘ཀིཾ སུ ནཱམ ཏེ, ཨཱཝུསོ པཱཐིཀཔུཏྟ, པཱཝལཱ༹ སུ ནཱམ ཏེ པཱིཋཀསྨིཾ ཨལླཱིནཱ, པཱིཋཀཾ སུ ནཱམ ཏེ པཱཝལཱ༹སུ ཨལླཱིནཾ? ཨཱཡཱམི ཨཱཝུསོ, ཨཱཡཱམི ཨཱཝུསོཏི ཝཏྭཱ ཏཏྠེཝ སཾསཔྤསི, ན སཀྐོསི ཨཱསནཱཔི ཝུཊྛཱཏུ’ནྟི། ཨེཝམྤི ཁོ, བྷགྒཝ, ཝུཙྩམཱནོ ཨཙེལོ པཱཐིཀཔུཏྟོ ‘ཨཱཡཱམི ཨཱཝུསོ, ཨཱཡཱམི ཨཱཝུསོ’ཏི ཝཏྭཱ ཏཏྠེཝ སཾསཔྤཏི , ན སཀྐོཏི ཨཱསནཱཔི ཝུཊྛཱཏུཾ།

‘‘Evaṃ vutte, bhaggava, acelo pāthikaputto ‘āyāmi āvuso, āyāmi āvuso’ti vatvā tattheva saṃsappati ⁵⁶, na sakkoti āsanāpi vuṭṭhātuṃ. Atha kho so, bhaggava, puriso acelaṃ pāthikaputtaṃ etadavoca – ‘kiṃ su nāma te, āvuso pāthikaputta, pāvaḷā su nāma te pīṭhakasmiṃ allīnā, pīṭhakaṃ su nāma te pāvaḷāsu allīnaṃ? Āyāmi āvuso, āyāmi āvusoti vatvā tattheva saṃsappasi, na sakkosi āsanāpi vuṭṭhātu’nti. Evampi kho, bhaggava, vuccamāno acelo pāthikaputto ‘āyāmi āvuso, āyāmi āvuso’ti vatvā tattheva saṃsappati , na sakkoti āsanāpi vuṭṭhātuṃ.

༢༣. ‘‘ཡདཱ ཁོ སོ, བྷགྒཝ, པུརིསོ ཨཉྙཱསི – ‘པརཱབྷཱུཏརཱུཔོ ཨཡཾ ཨཙེལོ པཱཐིཀཔུཏྟོ། ཨཱཡཱམི ཨཱཝུསོ, ཨཱཡཱམི ཨཱཝུསོཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུ’ནྟི། ཨཐ ཏཾ པརིསཾ ཨཱགནྟྭཱ ཨེཝམཱརོཙེསི – ‘པརཱབྷཱུཏརཱུཔོ, བྷོ ⁵⁷, ཨཙེལོ པཱཐིཀཔུཏྟོ། ཨཱཡཱམི ཨཱཝུསོ, ཨཱཡཱམི ཨཱཝུསོཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུ’ནྟི། ཨེཝཾ ཝུཏྟེ, ཨཧཾ, བྷགྒཝ, ཏཾ པརིསཾ ཨེཏདཝོཙཾ – ‘ཨབྷབྦོ ཁོ, ཨཱཝུསོ, ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ‘ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻ’ནྟི, མུདྡྷཱཔི ཏསྶ ཝིཔཏེཡྻཱཏི།

23. ‘‘Yadā kho so, bhaggava, puriso aññāsi – ‘parābhūtarūpo ayaṃ acelo pāthikaputto. Āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti. Atha taṃ parisaṃ āgantvā evamārocesi – ‘parābhūtarūpo, bho ⁵⁸, acelo pāthikaputto. Āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti. Evaṃ vutte, ahaṃ, bhaggava, taṃ parisaṃ etadavocaṃ – ‘abhabbo kho, āvuso, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ‘ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyya’nti, muddhāpi tassa vipateyyāti.

པཋམབྷཱཎཝཱརོ ནིཊྛིཏོ།

Paṭhamabhāṇavāro niṭṭhito.

༢༤. ‘‘ཨཐ ཁོ, བྷགྒཝ, ཨཉྙཏརོ ལིཙྪཝིམཧཱམཏྟོ ཨུཊྛཱཡཱསནཱ ཏཾ པརིསཾ ཨེཏདཝོཙ – ‘ཏེན ཧི, བྷོ, མུཧུཏྟཾ ཏཱཝ ཨཱགམེཐ, ཡཱཝཱཧཾ གཙྪཱམི ⁵⁹། ཨཔྤེཝ ནཱམ ཨཧམྤི སཀྐུཎེཡྻཾ ཨཙེལཾ པཱཐིཀཔུཏྟཾ ཨིམཾ པརིསཾ ཨཱནེཏུ’ནྟི།

24. ‘‘Atha kho, bhaggava, aññataro licchavimahāmatto uṭṭhāyāsanā taṃ parisaṃ etadavoca – ‘tena hi, bho, muhuttaṃ tāva āgametha, yāvāhaṃ gacchāmi ⁶⁰. Appeva nāma ahampi sakkuṇeyyaṃ acelaṃ pāthikaputtaṃ imaṃ parisaṃ ānetu’nti.

‘‘ཨཐ ཁོ སོ, བྷགྒཝ, ལིཙྪཝིམཧཱམཏྟོ ཡེན ཏིནྡུཀཁཱཎུཔརིབྦཱཛཀཱརཱམོ, ཡེན ཨཙེལོ པཱཐིཀཔུཏྟོ ཏེནུཔསངྐམི། ཨུཔསངྐམིཏྭཱ ཨཙེལཾ པཱཐིཀཔུཏྟཾ ཨེཏདཝོཙ – ‘ཨབྷིཀྐམཱཝུསོ པཱཐིཀཔུཏྟ, ཨབྷིཀྐནྟཾ ཏེ སེཡྻོ, ཨབྷིཀྐནྟཱ ཨབྷིཉྙཱཏཱ ཨབྷིཉྙཱཏཱ ལིཙྪཝཱི, ཨབྷིཀྐནྟཱ ཨབྷིཉྙཱཏཱ ཨབྷིཉྙཱཏཱ ཙ བྲཱཧྨཎམཧཱསཱལཱ གཧཔཏིནེཙཡིཀཱ ནཱནཱཏིཏྠིཡཱ སམཎབྲཱཧྨཎཱ། སམཎོཔི གོཏམོ ཨཱཡསྨཏོ ཨཱརཱམེ དིཝཱཝིཧཱརཾ ནིསིནྣོ། བྷཱསིཏཱ ཁོ པན ཏེ ཨེསཱ, ཨཱཝུསོ པཱཐིཀཔུཏྟ, ཝེསཱལིཡཾ པརིསཏི ཝཱཙཱ – སམཎོཔི གོཏམོ ཉཱཎཝཱདོ…པེ॰… ཏདྡིགུཎཾ ཏདྡིགུཎཱཧཾ ཀརིསྶཱམཱིཏི། ཨབྷིཀྐམསྶེཝ ཁོ, ཨཱཝུསོ པཱཐིཀཔུཏྟ, ཨུཔཌྜྷཔཐཾ། སབྦཔཋམཾཡེཝ ཨཱགནྟྭཱ སམཎོ གོཏམོ ཨཱཡསྨཏོ ཨཱརཱམེ དིཝཱཝིཧཱརཾ ནིསིནྣོ། བྷཱསིཏཱ ཁོ པནེསཱ, ཨཱཝུསོ པཱཐིཀཔུཏྟ, སམཎེན གོཏམེན པརིསཏི ཝཱཙཱ – ཨབྷབྦོ ཁོ ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱཏི། ཨབྷིཀྐམཱཝུསོ པཱཐིཀཔུཏྟ, ཨབྷིཀྐམནེནེཝ ཏེ ཛཡཾ ཀརིསྶཱམ, སམཎསྶ གོཏམསྶ པརཱཛཡ’ནྟི།

‘‘Atha kho so, bhaggava, licchavimahāmatto yena tindukakhāṇuparibbājakārāmo, yena acelo pāthikaputto tenupasaṅkami. Upasaṅkamitvā acelaṃ pāthikaputtaṃ etadavoca – ‘abhikkamāvuso pāthikaputta, abhikkantaṃ te seyyo, abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo āyasmato ārāme divāvihāraṃ nisinno. Bhāsitā kho pana te esā, āvuso pāthikaputta, vesāliyaṃ parisati vācā – samaṇopi gotamo ñāṇavādo…pe… taddiguṇaṃ taddiguṇāhaṃ karissāmīti. Abhikkamasseva kho, āvuso pāthikaputta, upaḍḍhapathaṃ. Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno. Bhāsitā kho panesā, āvuso pāthikaputta, samaṇena gotamena parisati vācā – abhabbo kho acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti. Abhikkamāvuso pāthikaputta, abhikkamaneneva te jayaṃ karissāma, samaṇassa gotamassa parājaya’nti.

‘‘ཨེཝཾ ཝུཏྟེ, བྷགྒཝ, ཨཙེལོ པཱཐིཀཔུཏྟོ ‘ཨཱཡཱམི ཨཱཝུསོ, ཨཱཡཱམི ཨཱཝུསོ’ཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུཾ། ཨཐ ཁོ སོ, བྷགྒཝ, ལིཙྪཝིམཧཱམཏྟོ ཨཙེལཾ པཱཐིཀཔུཏྟཾ ཨེཏདཝོཙ – ‘ཀིཾ སུ ནཱམ ཏེ, ཨཱཝུསོ པཱཐིཀཔུཏྟ, པཱཝལཱ༹ སུ ནཱམ ཏེ པཱིཋཀསྨིཾ ཨལླཱིནཱ, པཱིཋཀཾ སུ ནཱམ ཏེ པཱཝལཱ༹སུ ཨལླཱིནཾ ? ཨཱཡཱམི ཨཱཝུསོ, ཨཱཡཱམི ཨཱཝུསོཏི ཝཏྭཱ ཏཏྠེཝ སཾསཔྤསི, ན སཀྐོསི ཨཱསནཱཔི ཝུཊྛཱཏུ’ནྟི ། ཨེཝམྤི ཁོ, བྷགྒཝ, ཝུཙྩམཱནོ ཨཙེལོ པཱཐིཀཔུཏྟོ ‘ཨཱཡཱམི ཨཱཝུསོ, ཨཱཡཱམི ཨཱཝུསོ’ཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུཾ།

‘‘Evaṃ vutte, bhaggava, acelo pāthikaputto ‘āyāmi āvuso, āyāmi āvuso’ti vatvā tattheva saṃsappati, na sakkoti āsanāpi vuṭṭhātuṃ. Atha kho so, bhaggava, licchavimahāmatto acelaṃ pāthikaputtaṃ etadavoca – ‘kiṃ su nāma te, āvuso pāthikaputta, pāvaḷā su nāma te pīṭhakasmiṃ allīnā, pīṭhakaṃ su nāma te pāvaḷāsu allīnaṃ ? Āyāmi āvuso, āyāmi āvusoti vatvā tattheva saṃsappasi, na sakkosi āsanāpi vuṭṭhātu’nti . Evampi kho, bhaggava, vuccamāno acelo pāthikaputto ‘āyāmi āvuso, āyāmi āvuso’ti vatvā tattheva saṃsappati, na sakkoti āsanāpi vuṭṭhātuṃ.

༢༥. ‘‘ཡདཱ ཁོ སོ, བྷགྒཝ, ལིཙྪཝིམཧཱམཏྟོ ཨཉྙཱསི – ‘པརཱབྷཱུཏརཱུཔོ ཨཡཾ ཨཙེལོ པཱཐིཀཔུཏྟོ ཨཱཡཱམི ཨཱཝུསོ, ཨཱཡཱམི ཨཱཝུསོཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུ’ནྟི། ཨཐ ཏཾ པརིསཾ ཨཱགནྟྭཱ ཨེཝམཱརོཙེསི – ‘པརཱབྷཱུཏརཱུཔོ, བྷོ ⁶¹, ཨཙེལོ པཱཐིཀཔུཏྟོ ཨཱཡཱམི ཨཱཝུསོ, ཨཱཡཱམི ཨཱཝུསོཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུ’ནྟི། ཨེཝཾ ཝུཏྟེ, ཨཧཾ, བྷགྒཝ, ཏཾ པརིསཾ ཨེཏདཝོཙཾ – ‘ཨབྷབྦོ ཁོ, ཨཱཝུསོ, ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻ། སཙེ པཱཡསྨནྟཱནཾ ལིཙྪཝཱིནཾ ཨེཝམསྶ – མཡཾ ཨཙེལཾ པཱཐིཀཔུཏྟཾ ཝརཏྟཱཧི ⁶² བནྡྷིཏྭཱ གོཡུགེཧི ཨཱཝིཉྪེཡྻཱམཱཏི ⁶³, ཏཱ ཝརཏྟཱ ཚིཛྫེཡྻུཾ པཱཐིཀཔུཏྟོ ཝཱ། ཨབྷབྦོ པན ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱ’ཏི།

25. ‘‘Yadā kho so, bhaggava, licchavimahāmatto aññāsi – ‘parābhūtarūpo ayaṃ acelo pāthikaputto āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti. Atha taṃ parisaṃ āgantvā evamārocesi – ‘parābhūtarūpo, bho ⁶⁴, acelo pāthikaputto āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti. Evaṃ vutte, ahaṃ, bhaggava, taṃ parisaṃ etadavocaṃ – ‘abhabbo kho, āvuso, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyya. Sace pāyasmantānaṃ licchavīnaṃ evamassa – mayaṃ acelaṃ pāthikaputtaṃ varattāhi ⁶⁵ bandhitvā goyugehi āviñcheyyāmāti ⁶⁶, tā varattā chijjeyyuṃ pāthikaputto vā. Abhabbo pana acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

༢༦. ‘‘ཨཐ ཁོ, བྷགྒཝ, ཛཱལིཡོ དཱརུཔཏྟིཀནྟེཝཱསཱི ཨུཊྛཱཡཱསནཱ ཏཾ པརིསཾ ཨེཏདཝོཙ – ‘ཏེན ཧི, བྷོ, མུཧུཏྟཾ ཏཱཝ ཨཱགམེཐ, ཡཱཝཱཧཾ གཙྪཱམི; ཨཔྤེཝ ནཱམ ཨཧམྤི སཀྐུཎེཡྻཾ ཨཙེལཾ པཱཐིཀཔུཏྟཾ ཨིམཾ པརིསཾ ཨཱནེཏུ’’ནྟི།

26. ‘‘Atha kho, bhaggava, jāliyo dārupattikantevāsī uṭṭhāyāsanā taṃ parisaṃ etadavoca – ‘tena hi, bho, muhuttaṃ tāva āgametha, yāvāhaṃ gacchāmi; appeva nāma ahampi sakkuṇeyyaṃ acelaṃ pāthikaputtaṃ imaṃ parisaṃ ānetu’’nti.

‘‘ཨཐ ཁོ, བྷགྒཝ, ཛཱལིཡོ དཱརུཔཏྟིཀནྟེཝཱསཱི ཡེན ཏིནྡུཀཁཱཎུཔརིབྦཱཛཀཱརཱམོ, ཡེན ཨཙེལོ པཱཐིཀཔུཏྟོ ཏེནུཔསངྐམི། ཨུཔསངྐམིཏྭཱ ཨཙེལཾ པཱཐིཀཔུཏྟཾ ཨེཏདཝོཙ – ‘ཨབྷིཀྐམཱཝུསོ པཱཐིཀཔུཏྟ, ཨབྷིཀྐནྟཾ ཏེ སེཡྻོ། ཨབྷིཀྐནྟཱ ཨབྷིཉྙཱཏཱ ཨབྷིཉྙཱཏཱ ལིཙྪཝཱི, ཨབྷིཀྐནྟཱ ཨབྷིཉྙཱཏཱ ཨབྷིཉྙཱཏཱ ཙ བྲཱཧྨཎམཧཱསཱལཱ གཧཔཏིནེཙཡིཀཱ ནཱནཱཏིཏྠིཡཱ སམཎབྲཱཧྨཎཱ། སམཎོཔི གོཏམོ ཨཱཡསྨཏོ ཨཱརཱམེ དིཝཱཝིཧཱརཾ ནིསིནྣོ། བྷཱསིཏཱ ཁོ པན ཏེ ཨེསཱ, ཨཱཝུསོ པཱཐིཀཔུཏྟ, ཝེསཱལིཡཾ པརིསཏི ཝཱཙཱ – སམཎོཔི གོཏམོ ཉཱཎཝཱདོ…པེ॰… ཏདྡིགུཎཾ ཏདྡིགུཎཱཧཾ ཀརིསྶཱམཱིཏི། ཨབྷིཀྐམསྶེཝ, ཁོ ཨཱཝུསོ པཱཐིཀཔུཏྟ, ཨུཔཌྜྷཔཐཾ། སབྦཔཋམཾཡེཝ ཨཱགནྟྭཱ སམཎོ གོཏམོ ཨཱཡསྨཏོ ཨཱརཱམེ དིཝཱཝིཧཱརཾ ནིསིནྣོ། བྷཱསིཏཱ ཁོ པནེསཱ, ཨཱཝུསོ པཱཐིཀཔུཏྟ, སམཎེན གོཏམེན པརིསཏི ཝཱཙཱ – ཨབྷབྦོ ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻ། སཙེ པཱཡསྨནྟཱནཾ ལིཙྪཝཱིནཾ ཨེཝམསྶ – མཡཾ ཨཙེལཾ པཱཐིཀཔུཏྟཾ ཝརཏྟཱཧི བནྡྷིཏྭཱ གོཡུགེཧི ཨཱཝིཉྪེཡྻཱམཱཏི། ཏཱ ཝརཏྟཱ ཚིཛྫེཡྻུཾ པཱཐིཀཔུཏྟོ ཝཱ། ཨབྷབྦོ པན ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ ཨཱགཙྪེཡྻནྟི, མུདྡྷཱཔི ཏསྶ ཝིཔཏེཡྻཱཏི། ཨབྷིཀྐམཱཝུསོ པཱཐིཀཔུཏྟ, ཨབྷིཀྐམནེནེཝ ཏེ ཛཡཾ ཀརིསྶཱམ, སམཎསྶ གོཏམསྶ པརཱཛཡ’ནྟི།

‘‘Atha kho, bhaggava, jāliyo dārupattikantevāsī yena tindukakhāṇuparibbājakārāmo, yena acelo pāthikaputto tenupasaṅkami. Upasaṅkamitvā acelaṃ pāthikaputtaṃ etadavoca – ‘abhikkamāvuso pāthikaputta, abhikkantaṃ te seyyo. Abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā. Samaṇopi gotamo āyasmato ārāme divāvihāraṃ nisinno. Bhāsitā kho pana te esā, āvuso pāthikaputta, vesāliyaṃ parisati vācā – samaṇopi gotamo ñāṇavādo…pe… taddiguṇaṃ taddiguṇāhaṃ karissāmīti. Abhikkamasseva, kho āvuso pāthikaputta, upaḍḍhapathaṃ. Sabbapaṭhamaṃyeva āgantvā samaṇo gotamo āyasmato ārāme divāvihāraṃ nisinno. Bhāsitā kho panesā, āvuso pāthikaputta, samaṇena gotamena parisati vācā – abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyya. Sace pāyasmantānaṃ licchavīnaṃ evamassa – mayaṃ acelaṃ pāthikaputtaṃ varattāhi bandhitvā goyugehi āviñcheyyāmāti. Tā varattā chijjeyyuṃ pāthikaputto vā. Abhabbo pana acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ āgaccheyyanti, muddhāpi tassa vipateyyāti. Abhikkamāvuso pāthikaputta, abhikkamaneneva te jayaṃ karissāma, samaṇassa gotamassa parājaya’nti.

‘‘ཨེཝཾ ཝུཏྟེ, བྷགྒཝ, ཨཙེལོ པཱཐིཀཔུཏྟོ ‘ཨཱཡཱམི ཨཱཝུསོ, ཨཱཡཱམི ཨཱཝུསོ’ཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུཾ། ཨཐ ཁོ, བྷགྒཝ, ཛཱལིཡོ དཱརུཔཏྟིཀནྟེཝཱསཱི ཨཙེལཾ པཱཐིཀཔུཏྟཾ ཨེཏདཝོཙ – ‘ཀིཾ སུ ནཱམ ཏེ, ཨཱཝུསོ པཱཐིཀཔུཏྟ, པཱཝལཱ༹ སུ ནཱམ ཏེ པཱིཋཀསྨིཾ ཨལླཱིནཱ, པཱིཋཀཾ སུ ནཱམ ཏེ པཱཝལཱ༹སུ ཨལླཱིནཾ? ཨཱཡཱམི ཨཱཝུསོ, ཨཱཡཱམི ཨཱཝུསོཏི ཝཏྭཱ ཏཏྠེཝ སཾསཔྤསི, ན སཀྐོསི ཨཱསནཱཔི ཝུཊྛཱཏུ’ནྟི། ཨེཝམྤི ཁོ, བྷགྒཝ, ཝུཙྩམཱནོ ཨཙེལོ པཱཐིཀཔུཏྟོ ‘‘ཨཱཡཱམི ཨཱཝུསོ, ཨཱཡཱམི ཨཱཝུསོ’’ཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུནྟི།

‘‘Evaṃ vutte, bhaggava, acelo pāthikaputto ‘āyāmi āvuso, āyāmi āvuso’ti vatvā tattheva saṃsappati, na sakkoti āsanāpi vuṭṭhātuṃ. Atha kho, bhaggava, jāliyo dārupattikantevāsī acelaṃ pāthikaputtaṃ etadavoca – ‘kiṃ su nāma te, āvuso pāthikaputta, pāvaḷā su nāma te pīṭhakasmiṃ allīnā, pīṭhakaṃ su nāma te pāvaḷāsu allīnaṃ? Āyāmi āvuso, āyāmi āvusoti vatvā tattheva saṃsappasi, na sakkosi āsanāpi vuṭṭhātu’nti. Evampi kho, bhaggava, vuccamāno acelo pāthikaputto ‘‘āyāmi āvuso, āyāmi āvuso’’ti vatvā tattheva saṃsappati, na sakkoti āsanāpi vuṭṭhātunti.

༢༧. ‘‘ཡདཱ ཁོ, བྷགྒཝ, ཛཱལིཡོ དཱརུཔཏྟིཀནྟེཝཱསཱི ཨཉྙཱསི – ‘པརཱབྷཱུཏརཱུཔོ ཨཡཾ ཨཙེལོ པཱཐིཀཔུཏྟོ ‘ཨཱཡཱམི ཨཱཝུསོ, ཨཱཡཱམི ཨཱཝུསོཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུ’ནྟི, ཨཐ ནཾ ཨེཏདཝོཙ –

27. ‘‘Yadā kho, bhaggava, jāliyo dārupattikantevāsī aññāsi – ‘parābhūtarūpo ayaṃ acelo pāthikaputto ‘āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti, atha naṃ etadavoca –

‘བྷཱུཏཔུབྦཾ, ཨཱཝུསོ པཱཐིཀཔུཏྟ, སཱིཧསྶ མིགརཉྙོ ཨེཏདཧོསི – ཡཾནཱུནཱཧཾ ཨཉྙཏརཾ ཝནསཎྜཾ ནིསྶཱཡ ཨཱསཡཾ ཀཔྤེཡྻཾ། ཏཏྲཱསཡཾ ཀཔྤེཏྭཱ སཱཡནྷསམཡཾ ཨཱསཡཱ ནིཀྑམེཡྻཾ, ཨཱསཡཱ ནིཀྑམིཏྭཱ ཝིཛམྦྷེཡྻཾ, ཝིཛམྦྷིཏྭཱ སམནྟཱ ཙཏུདྡིསཱ ཨནུཝིལོཀེཡྻཾ, སམནྟཱ ཙཏུདྡིསཱ ཨནུཝིལོཀེཏྭཱ ཏིཀྑཏྟུཾ སཱིཧནཱདཾ ནདེཡྻཾ, ཏིཀྑཏྟུཾ སཱིཧནཱདཾ ནདིཏྭཱ གོཙརཱཡ པཀྐམེཡྻཾ། སོ ཝརཾ ཝརཾ མིགསཾགྷེ ⁶⁷ ཝདྷིཏྭཱ མུདུམཾསཱནི མུདུམཾསཱནི བྷཀྑཡིཏྭཱ ཏམེཝ ཨཱསཡཾ ཨཛ྄ཛྷུཔེཡྻ’ནྟི།

‘Bhūtapubbaṃ, āvuso pāthikaputta, sīhassa migarañño etadahosi – yaṃnūnāhaṃ aññataraṃ vanasaṇḍaṃ nissāya āsayaṃ kappeyyaṃ. Tatrāsayaṃ kappetvā sāyanhasamayaṃ āsayā nikkhameyyaṃ, āsayā nikkhamitvā vijambheyyaṃ, vijambhitvā samantā catuddisā anuvilokeyyaṃ, samantā catuddisā anuviloketvā tikkhattuṃ sīhanādaṃ nadeyyaṃ, tikkhattuṃ sīhanādaṃ naditvā gocarāya pakkameyyaṃ. So varaṃ varaṃ migasaṃghe ⁶⁸ vadhitvā mudumaṃsāni mudumaṃsāni bhakkhayitvā tameva āsayaṃ ajjhupeyya’nti.

‘ཨཐ ཁོ, ཨཱཝུསོ, སོ སཱིཧོ མིགརཱཛཱ ཨཉྙཏརཾ ཝནསཎྜཾ ནིསྶཱཡ ཨཱསཡཾ ཀཔྤེསི། ཏཏྲཱསཡཾ ཀཔྤེཏྭཱ སཱཡནྷསམཡཾ ཨཱསཡཱ ནིཀྑམི, ཨཱསཡཱ ནིཀྑམིཏྭཱ ཝིཛམྦྷི, ཝིཛམྦྷིཏྭཱ སམནྟཱ ཙཏུདྡིསཱ ཨནུཝིལོཀེསི, སམནྟཱ ཙཏུདྡིསཱ ཨནུཝིལོཀེཏྭཱ ཏིཀྑཏྟུཾ སཱིཧནཱདཾ ནདི, ཏིཀྑཏྟུཾ སཱིཧནཱདཾ ནདིཏྭཱ གོཙརཱཡ པཀྐཱམི། སོ ཝརཾ ཝརཾ མིགསངྒྷེ ཝདྷིཏྭཱ མུདུམཾསཱནི མུདུམཾསཱནི བྷཀྑཡིཏྭཱ ཏམེཝ ཨཱསཡཾ ཨཛ྄ཛྷུཔེསི།

‘Atha kho, āvuso, so sīho migarājā aññataraṃ vanasaṇḍaṃ nissāya āsayaṃ kappesi. Tatrāsayaṃ kappetvā sāyanhasamayaṃ āsayā nikkhami, āsayā nikkhamitvā vijambhi, vijambhitvā samantā catuddisā anuvilokesi, samantā catuddisā anuviloketvā tikkhattuṃ sīhanādaṃ nadi, tikkhattuṃ sīhanādaṃ naditvā gocarāya pakkāmi. So varaṃ varaṃ migasaṅghe vadhitvā mudumaṃsāni mudumaṃsāni bhakkhayitvā tameva āsayaṃ ajjhupesi.

༢༨. ‘ཏསྶེཝ ཁོ, ཨཱཝུསོ པཱཐིཀཔུཏྟ, སཱིཧསྶ མིགརཉྙོ ཝིགྷཱསསཾཝཌྜྷོ ཛརསིངྒཱལོ ⁶⁹ དིཏྟོ ཙེཝ བལཝཱ ཙ། ཨཐ ཁོ, ཨཱཝུསོ, ཏསྶ ཛརསིངྒཱལསྶ ཨེཏདཧོསི – ཀོ ཙཱཧཾ, ཀོ སཱིཧོ མིགརཱཛཱ། ཡཾནཱུནཱཧམྤི ཨཉྙཏརཾ ཝནསཎྜཾ ནིསྶཱཡ ཨཱསཡཾ ཀཔྤེཡྻཾ། ཏཏྲཱསཡཾ ཀཔྤེཏྭཱ སཱཡནྷསམཡཾ ཨཱསཡཱ ནིཀྑམེཡྻཾ, ཨཱསཡཱ ནིཀྑམིཏྭཱ ཝིཛམྦྷེཡྻཾ, ཝིཛམྦྷིཏྭཱ སམནྟཱ ཙཏུདྡིསཱ ཨནུཝིལོཀེཡྻཾ, སམནྟཱ ཙཏུདྡིསཱ ཨནུཝིལོཀེཏྭཱ ཏིཀྑཏྟུཾ སཱིཧནཱདཾ ནདེཡྻཾ, ཏིཀྑཏྟུཾ སཱིཧནཱདཾ ནདིཏྭཱ གོཙརཱཡ པཀྐམེཡྻཾ། སོ ཝརཾ ཝརཾ མིགསངྒྷེ ཝདྷིཏྭཱ མུདུམཾསཱནི མུདུམཾསཱནི བྷཀྑཡིཏྭཱ ཏམེཝ ཨཱསཡཾ ཨཛ྄ཛྷུཔེཡྻ’ནྟི།

28. ‘Tasseva kho, āvuso pāthikaputta, sīhassa migarañño vighāsasaṃvaḍḍho jarasiṅgālo ⁷⁰ ditto ceva balavā ca. Atha kho, āvuso, tassa jarasiṅgālassa etadahosi – ko cāhaṃ, ko sīho migarājā. Yaṃnūnāhampi aññataraṃ vanasaṇḍaṃ nissāya āsayaṃ kappeyyaṃ. Tatrāsayaṃ kappetvā sāyanhasamayaṃ āsayā nikkhameyyaṃ, āsayā nikkhamitvā vijambheyyaṃ, vijambhitvā samantā catuddisā anuvilokeyyaṃ, samantā catuddisā anuviloketvā tikkhattuṃ sīhanādaṃ nadeyyaṃ, tikkhattuṃ sīhanādaṃ naditvā gocarāya pakkameyyaṃ. So varaṃ varaṃ migasaṅghe vadhitvā mudumaṃsāni mudumaṃsāni bhakkhayitvā tameva āsayaṃ ajjhupeyya’nti.

‘ཨཐ ཁོ སོ, ཨཱཝུསོ, ཛརསིངྒཱལོ ཨཉྙཏརཾ ཝནསཎྜཾ ནིསྶཱཡ ཨཱསཡཾ ཀཔྤེསི། ཏཏྲཱསཡཾ ཀཔྤེཏྭཱ སཱཡནྷསམཡཾ ཨཱསཡཱ ནིཀྑམི, ཨཱསཡཱ ནིཀྑམིཏྭཱ ཝིཛམྦྷི, ཝིཛམྦྷིཏྭཱ སམནྟཱ ཙཏུདྡིསཱ ཨནུཝིལོཀེསི, སམནྟཱ ཙཏུདྡིསཱ ཨནུཝིལོཀེཏྭཱ ཏིཀྑཏྟུཾ སཱིཧནཱདཾ ནདིསྶཱམཱིཏི སིངྒཱལཀཾཡེཝ ཨནདི བྷེརཎྜཀཾཡེཝ ⁷¹ ཨནདི, ཀེ ཙ ཚཝེ སིངྒཱལེ, ཀེ པན སཱིཧནཱདེཏི ⁷²།

‘Atha kho so, āvuso, jarasiṅgālo aññataraṃ vanasaṇḍaṃ nissāya āsayaṃ kappesi. Tatrāsayaṃ kappetvā sāyanhasamayaṃ āsayā nikkhami, āsayā nikkhamitvā vijambhi, vijambhitvā samantā catuddisā anuvilokesi, samantā catuddisā anuviloketvā tikkhattuṃ sīhanādaṃ nadissāmīti siṅgālakaṃyeva anadi bheraṇḍakaṃyeva ⁷³ anadi, ke ca chave siṅgāle, ke pana sīhanādeti ⁷⁴.

‘ཨེཝམེཝ ཁོ ཏྭཾ, ཨཱཝུསོ པཱཐིཀཔུཏྟ, སུགཏཱཔདཱནེསུ ཛཱིཝམཱནོ སུགཏཱཏིརིཏྟཱནི བྷུཉྫམཱནོ ཏཐཱགཏེ ཨརཧནྟེ སམྨཱསམྦུདྡྷེ ཨཱསཱདེཏབྦཾ མཉྙསི། ཀེ ཙ ཚཝེ པཱཐིཀཔུཏྟེ, ཀཱ ཙ ཏཐཱགཏཱནཾ ཨརཧནྟཱནཾ སམྨཱསམྦུདྡྷཱནཾ ཨཱསཱདནཱ’ཏི།

‘Evameva kho tvaṃ, āvuso pāthikaputta, sugatāpadānesu jīvamāno sugatātirittāni bhuñjamāno tathāgate arahante sammāsambuddhe āsādetabbaṃ maññasi. Ke ca chave pāthikaputte, kā ca tathāgatānaṃ arahantānaṃ sammāsambuddhānaṃ āsādanā’ti.

༢༩. ‘‘ཡཏོ ཁོ, བྷགྒཝ, ཛཱལིཡོ དཱརུཔཏྟིཀནྟེཝཱསཱི ཨིམིནཱ ཨོཔམྨེན ནེཝ ཨསཀྑི ཨཙེལཾ པཱཐིཀཔུཏྟཾ ཏམྷཱ ཨཱསནཱ ཙཱཝེཏུཾ། ཨཐ ནཾ ཨེཏདཝོཙ –

29. ‘‘Yato kho, bhaggava, jāliyo dārupattikantevāsī iminā opammena neva asakkhi acelaṃ pāthikaputtaṃ tamhā āsanā cāvetuṃ. Atha naṃ etadavoca –

‘སཱིཧོཏི ཨཏྟཱནཾ སམེཀྑིཡཱན,

‘Sīhoti attānaṃ samekkhiyāna,

ཨམཉྙི ཀོཏྠུ མིགརཱཛཱཧམསྨི།

Amaññi kotthu migarājāhamasmi;

ཏཐེཝ ⁷⁵ སོ སིངྒཱལཀཾ ཨནདི,

Tatheva ⁷⁶ so siṅgālakaṃ anadi,

ཀེ ཙ ཚཝེ སིངྒཱལེ ཀེ པན སཱིཧནཱདེ’ཏི༎

Ke ca chave siṅgāle ke pana sīhanāde’ti.

༣༠. ‘‘ཡཏོ ཁོ, བྷགྒཝ, ཛཱལིཡོ དཱརུཔཏྟིཀནྟེཝཱསཱི ཨིམིནཱཔི ཨོཔམྨེན ནེཝ ཨསཀྑི ཨཙེལཾ པཱཐིཀཔུཏྟཾ ཏམྷཱ ཨཱསནཱ ཙཱཝེཏུཾ། ཨཐ ནཾ ཨེཏདཝོཙ –

30. ‘‘Yato kho, bhaggava, jāliyo dārupattikantevāsī imināpi opammena neva asakkhi acelaṃ pāthikaputtaṃ tamhā āsanā cāvetuṃ. Atha naṃ etadavoca –

‘ཨཉྙཾ ཨནུཙངྐམནཾ, ཨཏྟཱནཾ ཝིགྷཱསེ སམེཀྑིཡ།

‘Aññaṃ anucaṅkamanaṃ, attānaṃ vighāse samekkhiya;

ཡཱཝ ཨཏྟཱནཾ ན པསྶཏི, ཀོཏྠུ ཏཱཝ བྱགྒྷོཏི མཉྙཏི༎

Yāva attānaṃ na passati, kotthu tāva byagghoti maññati.

ཏཐེཝ སོ སིངྒཱལཀཾ ཨནདི།

Tatheva so siṅgālakaṃ anadi;

ཀེ ཙ ཚཝེ སིངྒཱལེ ཀེ པན སཱིཧནཱདེ’ཏི༎

Ke ca chave siṅgāle ke pana sīhanāde’ti.

༣༡. ‘‘ཡཏོ ཁོ, བྷགྒཝ, ཛཱལིཡོ དཱརུཔཏྟིཀནྟེཝཱསཱི ཨིམིནཱཔི ཨོཔམྨེན ནེཝ ཨསཀྑི ཨཙེལཾ པཱཐིཀཔུཏྟཾ ཏམྷཱ ཨཱསནཱ ཙཱཝེཏུཾ། ཨཐ ནཾ ཨེཏདཝོཙ –

31. ‘‘Yato kho, bhaggava, jāliyo dārupattikantevāsī imināpi opammena neva asakkhi acelaṃ pāthikaputtaṃ tamhā āsanā cāvetuṃ. Atha naṃ etadavoca –

‘བྷུཏྭཱན བྷེཀེ ⁷⁷ ཁལམཱུསིཀཱཡོ,

‘Bhutvāna bheke ⁷⁸ khalamūsikāyo,

ཀཊསཱིསུ ཁིཏྟཱནི ཙ ཀོཎཔཱནི ⁷⁹།

Kaṭasīsu khittāni ca koṇapāni ⁸⁰;

མཧཱཝནེ སུཉྙཝནེ ཝིཝཌྜྷོ,

Mahāvane suññavane vivaḍḍho,

ཨམཉྙི ཀོཏྠུ མིགརཱཛཱཧམསྨི༎

Amaññi kotthu migarājāhamasmi.

ཏཐེཝ སོ སིངྒཱལཀཾ ཨནདི།

Tatheva so siṅgālakaṃ anadi;

ཀེ ཙ ཚཝེ སིངྒཱལེ ཀེ པན སཱིཧནཱདེ’ཏི༎

Ke ca chave siṅgāle ke pana sīhanāde’ti.

༣༢. ‘‘ཡཏོ ཁོ, བྷགྒཝ, ཛཱལིཡོ དཱརུཔཏྟིཀནྟེཝཱསཱི ཨིམིནཱཔི ཨོཔམྨེན ནེཝ ཨསཀྑི ཨཙེལཾ པཱཐིཀཔུཏྟཾ ཏམྷཱ ཨཱསནཱ ཙཱཝེཏུཾ། ཨཐ ཏཾ པརིསཾ ཨཱགནྟྭཱ ཨེཝམཱརོཙེསི – ‘པརཱབྷཱུཏརཱུཔོ, བྷོ, ཨཙེལོ པཱཐིཀཔུཏྟོ ཨཱཡཱམི ཨཱཝུསོ, ཨཱཡཱམི ཨཱཝུསོཏི ཝཏྭཱ ཏཏྠེཝ སཾསཔྤཏི, ན སཀྐོཏི ཨཱསནཱཔི ཝུཊྛཱཏུ’ནྟི།

32. ‘‘Yato kho, bhaggava, jāliyo dārupattikantevāsī imināpi opammena neva asakkhi acelaṃ pāthikaputtaṃ tamhā āsanā cāvetuṃ. Atha taṃ parisaṃ āgantvā evamārocesi – ‘parābhūtarūpo, bho, acelo pāthikaputto āyāmi āvuso, āyāmi āvusoti vatvā tattheva saṃsappati, na sakkoti āsanāpi vuṭṭhātu’nti.

༣༣. ‘‘ཨེཝཾ ཝུཏྟེ, ཨཧཾ, བྷགྒཝ, ཏཾ པརིསཾ ཨེཏདཝོཙཾ – ‘ཨབྷབྦོ ཁོ, ཨཱཝུསོ, ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻ། སཙེཔཱཡསྨནྟཱནཾ ལིཙྪཝཱིནཾ ཨེཝམསྶ – མཡཾ ཨཙེལཾ པཱཐིཀཔུཏྟཾ ཝརཏྟཱཧི བནྡྷིཏྭཱ ནཱགེཧི ⁸¹ ཨཱཝིཉྪེཡྻཱམཱཏི ། ཏཱ ཝརཏྟཱ ཚིཛྫེཡྻུཾ པཱཐིཀཔུཏྟོ ཝཱ། ཨབྷབྦོ པན ཨཙེལོ པཱཐིཀཔུཏྟོ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ མམ སམྨུཁཱིབྷཱཝཾ ཨཱགནྟུཾ། སཙེཔིསྶ ཨེཝམསྶ – ཨཧཾ ཏཾ ཝཱཙཾ ཨཔྤཧཱཡ ཏཾ ཙིཏྟཾ ཨཔྤཧཱཡ ཏཾ དིཊྛིཾ ཨཔྤཊིནིསྶཛྫིཏྭཱ སམཎསྶ གོཏམསྶ སམྨུཁཱིབྷཱཝཾ གཙྪེཡྻནྟི, མུདྡྷཱཔི ཏསྶ ཝིཔཏེཡྻཱ’ཏི།

33. ‘‘Evaṃ vutte, ahaṃ, bhaggava, taṃ parisaṃ etadavocaṃ – ‘abhabbo kho, āvuso, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyya. Sacepāyasmantānaṃ licchavīnaṃ evamassa – mayaṃ acelaṃ pāthikaputtaṃ varattāhi bandhitvā nāgehi ⁸² āviñcheyyāmāti . Tā varattā chijjeyyuṃ pāthikaputto vā. Abhabbo pana acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ. Sacepissa evamassa – ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti.

༣༤. ‘‘ཨཐ ཁྭཱཧཾ, བྷགྒཝ, ཏཾ པརིསཾ དྷམྨིཡཱ ཀཐཱཡ སནྡསྶེསིཾ སམཱདཔེསིཾ སམུཏྟེཛེསིཾ སམྤཧཾསེསིཾ, ཏཾ པརིསཾ དྷམྨིཡཱ ཀཐཱཡ སནྡསྶེཏྭཱ སམཱདཔེཏྭཱ སམུཏྟེཛེཏྭཱ སམྤཧཾསེཏྭཱ མཧཱབནྡྷནཱ མོཀྑཾ ཀརིཏྭཱ ཙཏུརཱསཱིཏིཔཱཎསཧསྶཱནི མཧཱཝིདུགྒཱ ཨུདྡྷརིཏྭཱ ཏེཛོདྷཱཏུཾ སམཱཔཛྫིཏྭཱ སཏྟཏཱལཾ ཝེཧཱསཾ ཨབྦྷུགྒནྟྭཱ ཨཉྙཾ སཏྟཏཱལམྤི ཨཙྩིཾ ⁸³ ཨབྷིནིམྨིནིཏྭཱ པཛྫལིཏྭཱ དྷཱུམཱཡིཏྭཱ ⁸⁴ མཧཱཝནེ ཀཱུཊཱགཱརསཱལཱཡཾ པཙྩུཊྛཱསིཾ།

34. ‘‘Atha khvāhaṃ, bhaggava, taṃ parisaṃ dhammiyā kathāya sandassesiṃ samādapesiṃ samuttejesiṃ sampahaṃsesiṃ, taṃ parisaṃ dhammiyā kathāya sandassetvā samādapetvā samuttejetvā sampahaṃsetvā mahābandhanā mokkhaṃ karitvā caturāsītipāṇasahassāni mahāviduggā uddharitvā tejodhātuṃ samāpajjitvā sattatālaṃ vehāsaṃ abbhuggantvā aññaṃ sattatālampi acciṃ ⁸⁵ abhinimminitvā pajjalitvā dhūmāyitvā ⁸⁶ mahāvane kūṭāgārasālāyaṃ paccuṭṭhāsiṃ.

༣༥. ‘‘ཨཐ ཁོ, བྷགྒཝ, སུནཀྑཏྟོ ལིཙྪཝིཔུཏྟོ ཡེནཱཧཾ ཏེནུཔསངྐམི; ཨུཔསངྐམིཏྭཱ མཾ ཨབྷིཝཱདེཏྭཱ ཨེཀམནྟཾ ནིསཱིདི། ཨེཀམནྟཾ ནིསིནྣཾ ཁོ ཨཧཾ, བྷགྒཝ, སུནཀྑཏྟཾ ལིཙྪཝིཔུཏྟཾ ཨེཏདཝོཙཾ – ‘ཏཾ ཀིཾ མཉྙསི, སུནཀྑཏྟ, ཡཐེཝ ཏེ ཨཧཾ ཨཙེལཾ པཱཐིཀཔུཏྟཾ ཨཱརབྦྷ བྱཱཀཱསིཾ, ཏཐེཝ ཏཾ ཝིཔཱཀཾ ཨཉྙཐཱ ཝཱ’ཏི? ‘ཡཐེཝ མེ, བྷནྟེ, བྷགཝཱ ཨཙེལཾ པཱཐིཀཔུཏྟཾ ཨཱརབྦྷ བྱཱཀཱསི, ཏཐེཝ ཏཾ ཝིཔཱཀཾ, ནོ ཨཉྙཐཱ’ཏི།

35. ‘‘Atha kho, bhaggava, sunakkhatto licchaviputto yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnaṃ kho ahaṃ, bhaggava, sunakkhattaṃ licchaviputtaṃ etadavocaṃ – ‘taṃ kiṃ maññasi, sunakkhatta, yatheva te ahaṃ acelaṃ pāthikaputtaṃ ārabbha byākāsiṃ, tatheva taṃ vipākaṃ aññathā vā’ti? ‘Yatheva me, bhante, bhagavā acelaṃ pāthikaputtaṃ ārabbha byākāsi, tatheva taṃ vipākaṃ, no aññathā’ti.

‘ཏཾ ཀིཾ མཉྙསི, སུནཀྑཏྟ, ཡདི ཨེཝཾ སནྟེ ཀཏཾ ཝཱ ཧོཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ, ཨཀཏཾ ཝཱ’ཏི? ‘ཨདྡྷཱ ཁོ, བྷནྟེ, ཨེཝཾ སནྟེ ཀཏཾ ཧོཏི ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ, ནོ ཨཀཏ’ནྟི། ‘ཨེཝམྤི ཁོ མཾ ཏྭཾ, མོགྷཔུརིས, ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརོནྟཾ ཨེཝཾ ཝདེསི – ན ཧི པན མེ, བྷནྟེ, བྷགཝཱ ཨུཏྟརིམནུསྶདྷམྨཱ ཨིདྡྷིཔཱཊིཧཱརིཡཾ ཀརོཏཱིཏི། པསྶ, མོགྷཔུརིས, ཡཱཝཉྩ ཏེ ཨིདཾ ཨཔརདྡྷཾ’ཏི།

‘Taṃ kiṃ maññasi, sunakkhatta, yadi evaṃ sante kataṃ vā hoti uttarimanussadhammā iddhipāṭihāriyaṃ, akataṃ vā’ti? ‘Addhā kho, bhante, evaṃ sante kataṃ hoti uttarimanussadhammā iddhipāṭihāriyaṃ, no akata’nti. ‘Evampi kho maṃ tvaṃ, moghapurisa, uttarimanussadhammā iddhipāṭihāriyaṃ karontaṃ evaṃ vadesi – na hi pana me, bhante, bhagavā uttarimanussadhammā iddhipāṭihāriyaṃ karotīti. Passa, moghapurisa, yāvañca te idaṃ aparaddhaṃ’ti.

‘‘ཨེཝམྤི ཁོ, བྷགྒཝ, སུནཀྑཏྟོ ལིཙྪཝིཔུཏྟོ མཡཱ ཝུཙྩམཱནོ ཨཔཀྐམེཝ ཨིམསྨཱ དྷམྨཝིནཡཱ, ཡཐཱ ཏཾ ཨཱཔཱཡིཀོ ནེརཡིཀོ།

‘‘Evampi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṃ āpāyiko nerayiko.

ཨགྒཉྙཔཉྙཏྟིཀཐཱ

Aggaññapaññattikathā

༣༦. ‘‘ཨགྒཉྙཉྩཱཧཾ, བྷགྒཝ, པཛཱནཱམི། ཏཉྩ པཛཱནཱམི ⁸⁷, ཏཏོ ཙ ཨུཏྟརིཏརཾ པཛཱནཱམི, ཏཉྩ པཛཱནཾ ⁸⁸ ན པརཱམསཱམི, ཨཔརཱམསཏོ ཙ མེ པཙྩཏྟཉྙེཝ ནིབྦུཏི ཝིདིཏཱ, ཡདབྷིཛཱནཾ ཏཐཱགཏོ ནོ ཨནཡཾ ཨཱཔཛྫཏི །

36. ‘‘Aggaññañcāhaṃ, bhaggava, pajānāmi. Tañca pajānāmi ⁸⁹, tato ca uttaritaraṃ pajānāmi, tañca pajānaṃ ⁹⁰ na parāmasāmi, aparāmasato ca me paccattaññeva nibbuti viditā, yadabhijānaṃ tathāgato no anayaṃ āpajjati .

༣༧. ‘‘སནྟི, བྷགྒཝ, ཨེཀེ སམཎབྲཱཧྨཎཱ ཨིསྶརཀུཏྟཾ བྲཧྨཀུཏྟཾ ཨཱཙརིཡཀཾ ཨགྒཉྙཾ པཉྙཔེནྟི། ཏྱཱཧཾ ཨུཔསངྐམིཏྭཱ ཨེཝཾ ཝདཱམི – ‘སཙྩཾ ཀིར ཏུམྷེ ཨཱཡསྨནྟོ ཨིསྶརཀུཏྟཾ བྲཧྨཀུཏྟཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི? ཏེ ཙ མེ ཨེཝཾ པུཊྛཱ, ‘ཨཱམོ’ཏི ⁹¹ པཊིཛཱནནྟི། ཏྱཱཧཾ ཨེཝཾ ཝདཱམི – ‘ཀཐཾཝིཧིཏཀཾ པན ⁹² ཏུམྷེ ཨཱཡསྨནྟོ ཨིསྶརཀུཏྟཾ བྲཧྨཀུཏྟཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི? ཏེ མཡཱ པུཊྛཱ ན སམྤཱཡནྟི, ཨསམྤཱཡནྟཱ མམཉྙེཝ པཊིཔུཙྪནྟི། ཏེསཱཧཾ པུཊྛོ བྱཱཀརོམི –

37. ‘‘Santi, bhaggava, eke samaṇabrāhmaṇā issarakuttaṃ brahmakuttaṃ ācariyakaṃ aggaññaṃ paññapenti. Tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto issarakuttaṃ brahmakuttaṃ ācariyakaṃ aggaññaṃ paññapethā’ti? Te ca me evaṃ puṭṭhā, ‘āmo’ti ⁹³ paṭijānanti. Tyāhaṃ evaṃ vadāmi – ‘kathaṃvihitakaṃ pana ⁹⁴ tumhe āyasmanto issarakuttaṃ brahmakuttaṃ ācariyakaṃ aggaññaṃ paññapethā’ti? Te mayā puṭṭhā na sampāyanti, asampāyantā mamaññeva paṭipucchanti. Tesāhaṃ puṭṭho byākaromi –

༣༨. ‘ཧོཏི ཁོ སོ, ཨཱཝུསོ, སམཡོ ཡཾ ཀདཱཙི ཀརཧཙི དཱིགྷསྶ ཨདྡྷུནོ ཨཙྩཡེན ཨཡཾ ལོཀོ སཾཝཊྚཏི། སཾཝཊྚམཱནེ ལོཀེ ཡེབྷུཡྻེན སཏྟཱ ཨཱབྷསྶརསཾཝཏྟནིཀཱ ཧོནྟི། ཏེ ཏཏྠ ཧོནྟི མནོམཡཱ པཱིཏིབྷཀྑཱ སཡཾཔབྷཱ ཨནྟལིཀྑཙརཱ སུབྷཊྛཱཡིནོ ཙིརཾ དཱིགྷམདྡྷཱནཾ ཏིཊྛནྟི།

38. ‘Hoti kho so, āvuso, samayo yaṃ kadāci karahaci dīghassa addhuno accayena ayaṃ loko saṃvaṭṭati. Saṃvaṭṭamāne loke yebhuyyena sattā ābhassarasaṃvattanikā honti. Te tattha honti manomayā pītibhakkhā sayaṃpabhā antalikkhacarā subhaṭṭhāyino ciraṃ dīghamaddhānaṃ tiṭṭhanti.

‘ཧོཏི ཁོ སོ, ཨཱཝུསོ, སམཡོ ཡཾ ཀདཱཙི ཀརཧཙི དཱིགྷསྶ ཨདྡྷུནོ ཨཙྩཡེན ཨཡཾ ལོཀོ ཝིཝཊྚཏི། ཝིཝཊྚམཱནེ ལོཀེ སུཉྙཾ བྲཧྨཝིམཱནཾ པཱཏུབྷཝཏི། ཨཐ ཁོ ⁹⁵ ཨཉྙཏརོ སཏྟོ ཨཱཡུཀྑཡཱ ཝཱ པུཉྙཀྑཡཱ ཝཱ ཨཱབྷསྶརཀཱཡཱ ཙཝིཏྭཱ སུཉྙཾ བྲཧྨཝིམཱནཾ ཨུཔཔཛྫཏི ། སོ ཏཏྠ ཧོཏི མནོམཡོ པཱིཏིབྷཀྑོ སཡཾཔབྷོ ཨནྟལིཀྑཙརོ སུབྷཊྛཱཡཱི, ཙིརཾ དཱིགྷམདྡྷཱནཾ ཏིཊྛཏི།

‘Hoti kho so, āvuso, samayo yaṃ kadāci karahaci dīghassa addhuno accayena ayaṃ loko vivaṭṭati. Vivaṭṭamāne loke suññaṃ brahmavimānaṃ pātubhavati. Atha kho ⁹⁶ aññataro satto āyukkhayā vā puññakkhayā vā ābhassarakāyā cavitvā suññaṃ brahmavimānaṃ upapajjati . So tattha hoti manomayo pītibhakkho sayaṃpabho antalikkhacaro subhaṭṭhāyī, ciraṃ dīghamaddhānaṃ tiṭṭhati.

‘ཏསྶ ཏཏྠ ཨེཀཀསྶ དཱིགྷརཏྟཾ ནིཝུསིཏཏྟཱ ཨནབྷིརཏི པརིཏསྶནཱ ཨུཔྤཛྫཏི – ཨཧོ ཝཏ ཨཉྙེཔི སཏྟཱ ཨིཏྠཏྟཾ ཨཱགཙྪེཡྻུནྟི། ཨཐ ཨཉྙེཔི སཏྟཱ ཨཱཡུཀྑཡཱ ཝཱ པུཉྙཀྑཡཱ ཝཱ ཨཱབྷསྶརཀཱཡཱ ཙཝིཏྭཱ བྲཧྨཝིམཱནཾ ཨུཔཔཛྫནྟི ཏསྶ སཏྟསྶ སཧབྱཏཾ། ཏེཔི ཏཏྠ ཧོནྟི མནོམཡཱ པཱིཏིབྷཀྑཱ སཡཾཔབྷཱ ཨནྟལིཀྑཙརཱ སུབྷཊྛཱཡིནོ, ཙིརཾ དཱིགྷམདྡྷཱནཾ ཏིཊྛནྟི།

‘Tassa tattha ekakassa dīgharattaṃ nivusitattā anabhirati paritassanā uppajjati – aho vata aññepi sattā itthattaṃ āgaccheyyunti. Atha aññepi sattā āyukkhayā vā puññakkhayā vā ābhassarakāyā cavitvā brahmavimānaṃ upapajjanti tassa sattassa sahabyataṃ. Tepi tattha honti manomayā pītibhakkhā sayaṃpabhā antalikkhacarā subhaṭṭhāyino, ciraṃ dīghamaddhānaṃ tiṭṭhanti.

༣༩. ‘ཏཏྲཱཝུསོ, ཡོ སོ སཏྟོ པཋམཾ ཨུཔཔནྣོ, ཏསྶ ཨེཝཾ ཧོཏི – ཨཧམསྨི བྲཧྨཱ མཧཱབྲཧྨཱ ཨབྷིབྷཱུ ཨནབྷིབྷཱུཏོ ཨཉྙདཏྠུདསོ ཝསཝཏྟཱི ཨིསྶརོ ཀཏྟཱ ནིམྨཱཏཱ སེཊྛོ སཛིཏཱ ⁹⁷ ཝསཱི པིཏཱ བྷཱུཏབྷབྱཱནཾ, མཡཱ ཨིམེ སཏྟཱ ནིམྨིཏཱ། ཏཾ ཀིསྶ ཧེཏུ? མམཉྷི པུབྦེ ཨེཏདཧོསི – ཨཧོ ཝཏ ཨཉྙེཔི སཏྟཱ ཨིཏྠཏྟཾ ཨཱགཙྪེཡྻུནྟི; ཨིཏི མམ ཙ མནོཔཎིདྷི། ཨིམེ ཙ སཏྟཱ ཨིཏྠཏྟཾ ཨཱགཏཱཏི།

39. ‘Tatrāvuso, yo so satto paṭhamaṃ upapanno, tassa evaṃ hoti – ahamasmi brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā ⁹⁸ vasī pitā bhūtabhabyānaṃ, mayā ime sattā nimmitā. Taṃ kissa hetu? Mamañhi pubbe etadahosi – aho vata aññepi sattā itthattaṃ āgaccheyyunti; iti mama ca manopaṇidhi. Ime ca sattā itthattaṃ āgatāti.

‘ཡེཔི ཏེ སཏྟཱ པཙྪཱ ཨུཔཔནྣཱ, ཏེསམྤི ཨེཝཾ ཧོཏི – ཨཡཾ ཁོ བྷཝཾ བྲཧྨཱ མཧཱབྲཧྨཱ ཨབྷིབྷཱུ ཨནབྷིབྷཱུཏོ ཨཉྙདཏྠུདསོ ཝསཝཏྟཱི ཨིསྶརོ ཀཏྟཱ ནིམྨཱཏཱ སེཊྛོ སཛིཏཱ ཝསཱི པིཏཱ བྷཱུཏབྷབྱཱནཾ; ཨིམིནཱ མཡཾ བྷོཏཱ བྲཧྨུནཱ ནིམྨིཏཱ། ཏཾ ཀིསྶ ཧེཏུ? ཨིམཉྷི མཡཾ ཨདྡསཱམ ཨིདྷ པཋམཾ ཨུཔཔནྣཾ; མཡཾ པནཱམྷ པཙྪཱ ཨུཔཔནྣཱཏི།

‘Yepi te sattā pacchā upapannā, tesampi evaṃ hoti – ayaṃ kho bhavaṃ brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṃ; iminā mayaṃ bhotā brahmunā nimmitā. Taṃ kissa hetu? Imañhi mayaṃ addasāma idha paṭhamaṃ upapannaṃ; mayaṃ panāmha pacchā upapannāti.

༤༠. ‘ཏཏྲཱཝུསོ , ཡོ སོ སཏྟོ པཋམཾ ཨུཔཔནྣོ, སོ དཱིགྷཱཡུཀཏརོ ཙ ཧོཏི ཝཎྞཝནྟཏརོ ཙ མཧེསཀྑཏརོ ཙ། ཡེ པན ཏེ སཏྟཱ པཙྪཱ ཨུཔཔནྣཱ, ཏེ ཨཔྤཱཡུཀཏརཱ ཙ ཧོནྟི དུབྦཎྞཏརཱ ཙ ཨཔྤེསཀྑཏརཱ ཙ།

40. ‘Tatrāvuso , yo so satto paṭhamaṃ upapanno, so dīghāyukataro ca hoti vaṇṇavantataro ca mahesakkhataro ca. Ye pana te sattā pacchā upapannā, te appāyukatarā ca honti dubbaṇṇatarā ca appesakkhatarā ca.

‘ཋཱནཾ ཁོ པནེཏཾ, ཨཱཝུསོ, ཝིཛྫཏི, ཡཾ ཨཉྙཏརོ སཏྟོ ཏམྷཱ ཀཱཡཱ ཙཝིཏྭཱ ཨིཏྠཏྟཾ ཨཱགཙྪཏི། ཨིཏྠཏྟཾ ཨཱགཏོ སམཱནོ ཨགཱརསྨཱ ཨནགཱརིཡཾ པབྦཛཏི། ཨགཱརསྨཱ ཨནགཱརིཡཾ པབྦཛིཏོ སམཱནོ ཨཱཏཔྤམནྭཱཡ པདྷཱནམནྭཱཡ ཨནུཡོགམནྭཱཡ ཨཔྤམཱདམནྭཱཡ སམྨཱམནསིཀཱརམནྭཱཡ ཏཐཱརཱུཔཾ ཙེཏོསམཱདྷིཾ ཕུསཏི, ཡཐཱསམཱཧིཏེ ཙིཏྟེ ཏཾ པུབྦེནིཝཱསཾ ཨནུསྶརཏི; ཏཏོ པརཾ ནཱནུསྶརཏི།

‘Ṭhānaṃ kho panetaṃ, āvuso, vijjati, yaṃ aññataro satto tamhā kāyā cavitvā itthattaṃ āgacchati. Itthattaṃ āgato samāno agārasmā anagāriyaṃ pabbajati. Agārasmā anagāriyaṃ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṃ cetosamādhiṃ phusati, yathāsamāhite citte taṃ pubbenivāsaṃ anussarati; tato paraṃ nānussarati.

‘སོ ཨེཝམཱཧ – ཡོ ཁོ སོ བྷཝཾ བྲཧྨཱ མཧཱབྲཧྨཱ ཨབྷིབྷཱུ ཨནབྷིབྷཱུཏོ ཨཉྙདཏྠུདསོ ཝསཝཏྟཱི ཨིསྶརོ ཀཏྟཱ ནིམྨཱཏཱ སེཊྛོ སཛིཏཱ ཝསཱི པིཏཱ བྷཱུཏབྷབྱཱནཾ, ཡེན མཡཾ བྷོཏཱ བྲཧྨུནཱ ནིམྨིཏཱ། སོ ནིཙྩོ དྷུཝོ ⁹⁹ སསྶཏོ ཨཝིཔརིཎཱམདྷམྨོ སསྶཏིསམཾ ཏཐེཝ ཋསྶཏི། ཡེ པན མཡཾ ཨཧུམྷཱ ཏེན བྷོཏཱ བྲཧྨུནཱ ནིམྨིཏཱ, ཏེ མཡཾ ཨནིཙྩཱ ཨདྡྷུཝཱ ¹⁰⁰ ཨཔྤཱཡུཀཱ ཙཝནདྷམྨཱ ཨིཏྠཏྟཾ ཨཱགཏཱ’ཏི། ཨེཝཾཝིཧིཏཀཾ ནོ ཏུམྷེ ཨཱཡསྨནྟོ ཨིསྶརཀུཏྟཾ བྲཧྨཀུཏྟཾ ཨཱཙརིཡཀཾ ཨགྒཉྙཾ པཉྙཔེཐཱཏི། ‘ཏེ ཨེཝམཱཧཾསུ – ཨེཝཾ ཁོ ནོ, ཨཱཝུསོ གོཏམ, སུཏཾ, ཡཐེཝཱཡསྨཱ གོཏམོ ཨཱཧཱ’ཏི། ‘‘ཨགྒཉྙཉྩཱཧཾ, བྷགྒཝ, པཛཱནཱམི། ཏཉྩ པཛཱནཱམི, ཏཏོ ཙ ཨུཏྟརིཏརཾ པཛཱནཱམི, ཏཉྩ པཛཱནཾ ན པརཱམསཱམི, ཨཔརཱམསཏོ ཙ མེ པཙྩཏྟཉྙེཝ ནིབྦུཏི ཝིདིཏཱ། ཡདབྷིཛཱནཾ ཏཐཱགཏོ ནོ ཨནཡཾ ཨཱཔཛྫཏི།

‘So evamāha – yo kho so bhavaṃ brahmā mahābrahmā abhibhū anabhibhūto aññadatthudaso vasavattī issaro kattā nimmātā seṭṭho sajitā vasī pitā bhūtabhabyānaṃ, yena mayaṃ bhotā brahmunā nimmitā. So nicco dhuvo ¹⁰¹ sassato avipariṇāmadhammo sassatisamaṃ tatheva ṭhassati. Ye pana mayaṃ ahumhā tena bhotā brahmunā nimmitā, te mayaṃ aniccā addhuvā ¹⁰² appāyukā cavanadhammā itthattaṃ āgatā’ti. Evaṃvihitakaṃ no tumhe āyasmanto issarakuttaṃ brahmakuttaṃ ācariyakaṃ aggaññaṃ paññapethāti. ‘Te evamāhaṃsu – evaṃ kho no, āvuso gotama, sutaṃ, yathevāyasmā gotamo āhā’ti. ‘‘Aggaññañcāhaṃ, bhaggava, pajānāmi. Tañca pajānāmi, tato ca uttaritaraṃ pajānāmi, tañca pajānaṃ na parāmasāmi, aparāmasato ca me paccattaññeva nibbuti viditā. Yadabhijānaṃ tathāgato no anayaṃ āpajjati.

༤༡. ‘‘སནྟི, བྷགྒཝ, ཨེཀེ སམཎབྲཱཧྨཎཱ ཁིཌྜཱཔདོསིཀཾ ཨཱཙརིཡཀཾ ཨགྒཉྙཾ པཉྙཔེནྟི། ཏྱཱཧཾ ཨུཔསངྐམིཏྭཱ ཨེཝཾ ཝདཱམི – ‘སཙྩཾ ཀིར ཏུམྷེ ཨཱཡསྨནྟོ ཁིཌྜཱཔདོསིཀཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི? ཏེ ཙ མེ ཨེཝཾ པུཊྛཱ ‘ཨཱམོ’ཏི པཊིཛཱནནྟི། ཏྱཱཧཾ ཨེཝཾ ཝདཱམི – ‘ཀཐཾཝིཧིཏཀཾ པན ཏུམྷེ ཨཱཡསྨནྟོ ཁིཌྜཱཔདོསིཀཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི? ཏེ མཡཱ པུཊྛཱ ན སམྤཱཡནྟི, ཨསམྤཱཡནྟཱ མམཉྙེཝ པཊིཔུཙྪནྟི, ཏེསཱཧཾ པུཊྛོ བྱཱཀརོམི –

41. ‘‘Santi, bhaggava, eke samaṇabrāhmaṇā khiḍḍāpadosikaṃ ācariyakaṃ aggaññaṃ paññapenti. Tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto khiḍḍāpadosikaṃ ācariyakaṃ aggaññaṃ paññapethā’ti? Te ca me evaṃ puṭṭhā ‘āmo’ti paṭijānanti. Tyāhaṃ evaṃ vadāmi – ‘kathaṃvihitakaṃ pana tumhe āyasmanto khiḍḍāpadosikaṃ ācariyakaṃ aggaññaṃ paññapethā’ti? Te mayā puṭṭhā na sampāyanti, asampāyantā mamaññeva paṭipucchanti, tesāhaṃ puṭṭho byākaromi –

༤༢. ‘སནྟཱཝུསོ, ཁིཌྜཱཔདོསིཀཱ ནཱམ དེཝཱ། ཏེ ཨཏིཝེལཾ ཧསྶཁིཌྜཱརཏིདྷམྨསམཱཔནྣཱ ¹⁰³ ཝིཧརནྟི། ཏེསཾ ཨཏིཝེལཾ ཧསྶཁིཌྜཱརཏིདྷམྨསམཱཔནྣཱནཾ ཝིཧརཏཾ སཏི སམྨུསྶཏི, སཏིཡཱ སམྨོསཱ ¹⁰⁴ ཏེ དེཝཱ ཏམྷཱ ཀཱཡཱ ཙཝནྟི།

42. ‘Santāvuso, khiḍḍāpadosikā nāma devā. Te ativelaṃ hassakhiḍḍāratidhammasamāpannā ¹⁰⁵ viharanti. Tesaṃ ativelaṃ hassakhiḍḍāratidhammasamāpannānaṃ viharataṃ sati sammussati, satiyā sammosā ¹⁰⁶ te devā tamhā kāyā cavanti.

‘ཋཱནཾ ཁོ པནེཏཾ, ཨཱཝུསོ, ཝིཛྫཏི, ཡཾ ཨཉྙཏརོ སཏྟོ ཏམྷཱ ཀཱཡཱ ཙཝིཏྭཱ ཨིཏྠཏྟཾ ཨཱགཙྪཏི, ཨིཏྠཏྟཾ ཨཱགཏོ སམཱནོ ཨགཱརསྨཱ ཨནགཱརིཡཾ པབྦཛཏི, ཨགཱརསྨཱ ཨནགཱརིཡཾ པབྦཛིཏོ སམཱནོ ཨཱཏཔྤམནྭཱཡ པདྷཱནམནྭཱཡ ཨནུཡོགམནྭཱཡ ཨཔྤམཱདམནྭཱཡ སམྨཱམནསིཀཱརམནྭཱཡ ཏཐཱརཱུཔཾ ཙེཏོསམཱདྷིཾ ཕུསཏི, ཡཐཱསམཱཧིཏེ ཙིཏྟེ ཏཾ པུབྦེནིཝཱསཾ ཨནུསྶརཏི; ཏཏོ པརཾ ནཱནུསྶརཏི།

‘Ṭhānaṃ kho panetaṃ, āvuso, vijjati, yaṃ aññataro satto tamhā kāyā cavitvā itthattaṃ āgacchati, itthattaṃ āgato samāno agārasmā anagāriyaṃ pabbajati, agārasmā anagāriyaṃ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṃ cetosamādhiṃ phusati, yathāsamāhite citte taṃ pubbenivāsaṃ anussarati; tato paraṃ nānussarati.

‘སོ ཨེཝམཱཧ – ཡེ ཁོ ཏེ བྷོནྟོ དེཝཱ ན ཁིཌྜཱཔདོསིཀཱ ཏེ ན ཨཏིཝེལཾ ཧསྶཁིཌྜཱརཏིདྷམྨསམཱཔནྣཱ ཝིཧརནྟི། ཏེསཾ ནཱཏིཝེལཾ ཧསྶཁིཌྜཱརཏིདྷམྨསམཱཔནྣཱནཾ ཝིཧརཏཾ སཏི ན སམྨུསྶཏི, སཏིཡཱ ཨསམྨོསཱ ཏེ དེཝཱ ཏམྷཱ ཀཱཡཱ ན ཙཝནྟི, ནིཙྩཱ དྷུཝཱ སསྶཏཱ ཨཝིཔརིཎཱམདྷམྨཱ སསྶཏིསམཾ ཏཐེཝ ཋསྶནྟི། ཡེ པན མཡཾ ཨཧུམྷཱ ཁིཌྜཱཔདོསིཀཱ ཏེ མཡཾ ཨཏིཝེལཾ ཧསྶཁིཌྜཱརཏིདྷམྨསམཱཔནྣཱ ཝིཧརིམྷཱ, ཏེསཾ ནོ ཨཏིཝེལཾ ཧསྶཁིཌྜཱརཏིདྷམྨསམཱཔནྣཱནཾ ཝིཧརཏཾ སཏི སམྨུསྶཏི, སཏིཡཱ སམྨོསཱ ཨེཝཾ ¹⁰⁷ མཡཾ ཏམྷཱ ཀཱཡཱ ཙུཏཱ, ཨནིཙྩཱ ཨདྡྷུཝཱ ཨཔྤཱཡུཀཱ ཙཝནདྷམྨཱ ཨིཏྠཏྟཾ ཨཱགཏཱཏི། ཨེཝཾཝིཧིཏཀཾ ནོ ཏུམྷེ ཨཱཡསྨནྟོ ཁིཌྜཱཔདོསིཀཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི། ‘ཏེ ཨེཝམཱཧཾསུ – ཨེཝཾ ཁོ ནོ, ཨཱཝུསོ གོཏམ, སུཏཾ, ཡཐེཝཱཡསྨཱ གོཏམོ ཨཱཧཱ’ཏི། ‘‘ཨགྒཉྙཉྩཱཧཾ, བྷགྒཝ, པཛཱནཱམི…པེ॰… ཡདབྷིཛཱནཾ ཏཐཱགཏོ ནོ ཨནཡཾ ཨཱཔཛྫཏི།

‘So evamāha – ye kho te bhonto devā na khiḍḍāpadosikā te na ativelaṃ hassakhiḍḍāratidhammasamāpannā viharanti. Tesaṃ nātivelaṃ hassakhiḍḍāratidhammasamāpannānaṃ viharataṃ sati na sammussati, satiyā asammosā te devā tamhā kāyā na cavanti, niccā dhuvā sassatā avipariṇāmadhammā sassatisamaṃ tatheva ṭhassanti. Ye pana mayaṃ ahumhā khiḍḍāpadosikā te mayaṃ ativelaṃ hassakhiḍḍāratidhammasamāpannā viharimhā, tesaṃ no ativelaṃ hassakhiḍḍāratidhammasamāpannānaṃ viharataṃ sati sammussati, satiyā sammosā evaṃ ¹⁰⁸ mayaṃ tamhā kāyā cutā, aniccā addhuvā appāyukā cavanadhammā itthattaṃ āgatāti. Evaṃvihitakaṃ no tumhe āyasmanto khiḍḍāpadosikaṃ ācariyakaṃ aggaññaṃ paññapethā’ti. ‘Te evamāhaṃsu – evaṃ kho no, āvuso gotama, sutaṃ, yathevāyasmā gotamo āhā’ti. ‘‘Aggaññañcāhaṃ, bhaggava, pajānāmi…pe… yadabhijānaṃ tathāgato no anayaṃ āpajjati.

༤༣. ‘‘སནྟི, བྷགྒཝ, ཨེཀེ སམཎབྲཱཧྨཎཱ མནོཔདོསིཀཾ ཨཱཙརིཡཀཾ ཨགྒཉྙཾ པཉྙཔེནྟི། ཏྱཱཧཾ ཨུཔསངྐམིཏྭཱ ཨེཝཾ ཝདཱམི – ‘སཙྩཾ ཀིར ཏུམྷེ ཨཱཡསྨནྟོ མནོཔདོསིཀཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི? ཏེ ཙ མེ ཨེཝཾ པུཊྛཱ ‘ཨཱམོ’ཏི པཊིཛཱནནྟི། ཏྱཱཧཾ ཨེཝཾ ཝདཱམི – ‘ཀཐཾཝིཧིཏཀཾ པན ཏུམྷེ ཨཱཡསྨནྟོ མནོཔདོསིཀཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི? ཏེ མཡཱ པུཊྛཱ ན སམྤཱཡནྟི, ཨསམྤཱཡནྟཱ མམཉྙེཝ པཊིཔུཙྪནྟི། ཏེསཱཧཾ པུཊྛོ བྱཱཀརོམི –

43. ‘‘Santi, bhaggava, eke samaṇabrāhmaṇā manopadosikaṃ ācariyakaṃ aggaññaṃ paññapenti. Tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto manopadosikaṃ ācariyakaṃ aggaññaṃ paññapethā’ti? Te ca me evaṃ puṭṭhā ‘āmo’ti paṭijānanti. Tyāhaṃ evaṃ vadāmi – ‘kathaṃvihitakaṃ pana tumhe āyasmanto manopadosikaṃ ācariyakaṃ aggaññaṃ paññapethā’ti? Te mayā puṭṭhā na sampāyanti, asampāyantā mamaññeva paṭipucchanti. Tesāhaṃ puṭṭho byākaromi –

༤༤. ‘སནྟཱཝུསོ, མནོཔདོསིཀཱ ནཱམ དེཝཱ། ཏེ ཨཏིཝེལཾ ཨཉྙམཉྙཾ ཨུཔནིཛ྄ཛྷཱཡནྟི། ཏེ ཨཏིཝེལཾ ཨཉྙམཉྙཾ ཨུཔནིཛ྄ཛྷཱཡནྟཱ ཨཉྙམཉྙམྷི ཙིཏྟཱནི པདཱུསེནྟི། ཏེ ཨཉྙམཉྙཾ པདུཊྛཙིཏྟཱ ཀིལནྟཀཱཡཱ ཀིལནྟཙིཏྟཱ། ཏེ དེཝཱ ཏམྷཱ ཀཱཡཱ ཙཝནྟི།

44. ‘Santāvuso, manopadosikā nāma devā. Te ativelaṃ aññamaññaṃ upanijjhāyanti. Te ativelaṃ aññamaññaṃ upanijjhāyantā aññamaññamhi cittāni padūsenti. Te aññamaññaṃ paduṭṭhacittā kilantakāyā kilantacittā. Te devā tamhā kāyā cavanti.

‘ཋཱནཾ ཁོ པནེཏཾ, ཨཱཝུསོ, ཝིཛྫཏི, ཡཾ ཨཉྙཏརོ སཏྟོ ཏམྷཱ ཀཱཡཱ ཙཝིཏྭཱ ཨིཏྠཏྟཾ ཨཱགཙྪཏི། ཨིཏྠཏྟཾ ཨཱགཏོ སམཱནོ ཨགཱརསྨཱ ཨནགཱརིཡཾ པབྦཛཏི། ཨགཱརསྨཱ ཨནགཱརིཡཾ པབྦཛིཏོ སམཱནོ ཨཱཏཔྤམནྭཱཡ པདྷཱནམནྭཱཡ ཨནུཡོགམནྭཱཡ ཨཔྤམཱདམནྭཱཡ སམྨཱམནསིཀཱརམནྭཱཡ ཏཐཱརཱུཔཾ ཙེཏོསམཱདྷིཾ ཕུསཏི, ཡཐཱསམཱཧིཏེ ཙིཏྟེ ཏཾ པུབྦེནིཝཱསཾ ཨནུསྶརཏི, ཏཏོ པརཾ ནཱནུསྶརཏི།

‘སོ ཨེཝམཱཧ – ཡེ ཁོ ཏེ བྷོནྟོ དེཝཱ ན མནོཔདོསིཀཱ ཏེ ནཱཏིཝེལཾ ཨཉྙམཉྙཾ ཨུཔནིཛ྄ཛྷཱཡནྟི། ཏེ ནཱཏིཝེལཾ ཨཉྙམཉྙཾ ཨུཔནིཛ྄ཛྷཱཡནྟཱ ཨཉྙམཉྙམྷི ཙིཏྟཱནི ནཔྤདཱུསེནྟི། ཏེ ཨཉྙམཉྙཾ ཨཔྤདུཊྛཙིཏྟཱ ཨཀིལནྟཀཱཡཱ ཨཀིལནྟཙིཏྟཱ། ཏེ དེཝཱ ཏམྷཱ ¹⁰⁹ ཀཱཡཱ ན ཙཝནྟི, ནིཙྩཱ དྷུཝཱ སསྶཏཱ ཨཝིཔརིཎཱམདྷམྨཱ སསྶཏིསམཾ ཏཐེཝ ཋསྶནྟི། ཡེ པན མཡཾ ཨཧུམྷཱ མནོཔདོསིཀཱ, ཏེ མཡཾ ཨཏིཝེལཾ ཨཉྙམཉྙཾ ཨུཔནིཛ྄ཛྷཱཡིམྷཱ། ཏེ མཡཾ ཨཏིཝེལཾ ཨཉྙམཉྙཾ ཨུཔནིཛ྄ཛྷཱཡནྟཱ ཨཉྙམཉྙམྷི ཙིཏྟཱནི པདཱུསིམྷཱ ¹¹⁰། ཏེ མཡཾ ཨཉྙམཉྙཾ པདུཊྛཙིཏྟཱ ཀིལནྟཀཱཡཱ ཀིལནྟཙིཏྟཱ། ཨེཝཾ མཡཾ ¹¹¹ ཏམྷཱ ཀཱཡཱ ཙུཏཱ, ཨནིཙྩཱ ཨདྡྷུཝཱ ཨཔྤཱཡུཀཱ ཙཝནདྷམྨཱ ཨིཏྠཏྟཾ ཨཱགཏཱཏི། ཨེཝཾཝིཧིཏཀཾ ནོ ཏུམྷེ ཨཱཡསྨནྟོ མནོཔདོསིཀཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི། ‘ཏེ ཨེཝམཱཧཾསུ – ཨེཝཾ ཁོ ནོ, ཨཱཝུསོ གོཏམ, སུཏཾ, ཡཐེཝཱཡསྨཱ གོཏམོ ཨཱཧཱ’ཏི། ‘‘ཨགྒཉྙཉྩཱཧཾ, བྷགྒཝ, པཛཱནཱམི…པེ॰… ཡདབྷིཛཱནཾ ཏཐཱགཏོ ནོ ཨནཡཾ ཨཱཔཛྫཏི།

‘So evamāha – ye kho te bhonto devā na manopadosikā te nātivelaṃ aññamaññaṃ upanijjhāyanti. Te nātivelaṃ aññamaññaṃ upanijjhāyantā aññamaññamhi cittāni nappadūsenti. Te aññamaññaṃ appaduṭṭhacittā akilantakāyā akilantacittā. Te devā tamhā ¹¹² kāyā na cavanti, niccā dhuvā sassatā avipariṇāmadhammā sassatisamaṃ tatheva ṭhassanti. Ye pana mayaṃ ahumhā manopadosikā, te mayaṃ ativelaṃ aññamaññaṃ upanijjhāyimhā. Te mayaṃ ativelaṃ aññamaññaṃ upanijjhāyantā aññamaññamhi cittāni padūsimhā ¹¹³. Te mayaṃ aññamaññaṃ paduṭṭhacittā kilantakāyā kilantacittā. Evaṃ mayaṃ ¹¹⁴ tamhā kāyā cutā, aniccā addhuvā appāyukā cavanadhammā itthattaṃ āgatāti. Evaṃvihitakaṃ no tumhe āyasmanto manopadosikaṃ ācariyakaṃ aggaññaṃ paññapethā’ti. ‘Te evamāhaṃsu – evaṃ kho no, āvuso gotama, sutaṃ, yathevāyasmā gotamo āhā’ti. ‘‘Aggaññañcāhaṃ, bhaggava, pajānāmi…pe… yadabhijānaṃ tathāgato no anayaṃ āpajjati.

༤༥. ‘‘སནྟི, བྷགྒཝ, ཨེཀེ སམཎབྲཱཧྨཎཱ ཨདྷིཙྩསམུཔྤནྣཾ ཨཱཙརིཡཀཾ ཨགྒཉྙཾ པཉྙཔེནྟི། ཏྱཱཧཾ ཨུཔསངྐམིཏྭཱ ཨེཝཾ ཝདཱམི – ‘སཙྩཾ ཀིར ཏུམྷེ ཨཱཡསྨནྟོ ཨདྷིཙྩསམུཔྤནྣཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི? ཏེ ཙ མེ ཨེཝཾ པུཊྛཱ ‘ཨཱམོ’ཏི པཊིཛཱནནྟི། ཏྱཱཧཾ ཨེཝཾ ཝདཱམི – ‘ཀཐཾཝིཧིཏཀཾ པན ཏུམྷེ ཨཱཡསྨནྟོ ཨདྷིཙྩསམུཔྤནྣཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི? ཏེ མཡཱ པུཊྛཱ ན སམྤཱཡནྟི, ཨསམྤཱཡནྟཱ མམཉྙེཝ པཊིཔུཙྪནྟི། ཏེསཱཧཾ པུཊྛོ བྱཱཀརོམི –

45. ‘‘Santi, bhaggava, eke samaṇabrāhmaṇā adhiccasamuppannaṃ ācariyakaṃ aggaññaṃ paññapenti. Tyāhaṃ upasaṅkamitvā evaṃ vadāmi – ‘saccaṃ kira tumhe āyasmanto adhiccasamuppannaṃ ācariyakaṃ aggaññaṃ paññapethā’ti? Te ca me evaṃ puṭṭhā ‘āmo’ti paṭijānanti. Tyāhaṃ evaṃ vadāmi – ‘kathaṃvihitakaṃ pana tumhe āyasmanto adhiccasamuppannaṃ ācariyakaṃ aggaññaṃ paññapethā’ti? Te mayā puṭṭhā na sampāyanti, asampāyantā mamaññeva paṭipucchanti. Tesāhaṃ puṭṭho byākaromi –

༤༦. ‘སནྟཱཝུསོ, ཨསཉྙསཏྟཱ ནཱམ དེཝཱ། སཉྙུཔྤཱདཱ ཙ པན ཏེ དེཝཱ ཏམྷཱ ཀཱཡཱ ཙཝནྟི།

46. ‘Santāvuso, asaññasattā nāma devā. Saññuppādā ca pana te devā tamhā kāyā cavanti.

‘ཋཱནཾ ཁོ པནེཏཾ, ཨཱཝུསོ, ཝིཛྫཏི། ཡཾ ཨཉྙཏརོ སཏྟོ ཏམྷཱ ཀཱཡཱ ཙཝིཏྭཱ ཨིཏྠཏྟཾ ཨཱགཙྪཏི། ཨིཏྠཏྟཾ ཨཱགཏོ སམཱནོ ཨགཱརསྨཱ ཨནགཱརིཡཾ པབྦཛཏི། ཨགཱརསྨཱ ཨནགཱརིཡཾ པབྦཛིཏོ སམཱནོ ཨཱཏཔྤམནྭཱཡ པདྷཱནམནྭཱཡ ཨནུཡོགམནྭཱཡ ཨཔྤམཱདམནྭཱཡ སམྨཱམནསིཀཱརམནྭཱཡ ཏཐཱརཱུཔཾ ཙེཏོསམཱདྷིཾ ཕུསཏི, ཡཐཱསམཱཧིཏེ ཙིཏྟེ ཏཾ ¹¹⁵ སཉྙུཔྤཱདཾ ཨནུསྶརཏི, ཏཏོ པརཾ ནཱནུསྶརཏི།

‘Ṭhānaṃ kho panetaṃ, āvuso, vijjati. Yaṃ aññataro satto tamhā kāyā cavitvā itthattaṃ āgacchati. Itthattaṃ āgato samāno agārasmā anagāriyaṃ pabbajati. Agārasmā anagāriyaṃ pabbajito samāno ātappamanvāya padhānamanvāya anuyogamanvāya appamādamanvāya sammāmanasikāramanvāya tathārūpaṃ cetosamādhiṃ phusati, yathāsamāhite citte taṃ ¹¹⁶ saññuppādaṃ anussarati, tato paraṃ nānussarati.

‘སོ ཨེཝམཱཧ – ཨདྷིཙྩསམུཔྤནྣོ ཨཏྟཱ ཙ ལོཀོ ཙ། ཏཾ ཀིསྶ ཧེཏུ? ཨཧཉྷི པུབྦེ ནཱཧོསིཾ, སོམྷི ཨེཏརཧི ཨཧུཏྭཱ སནྟཏཱཡ ¹¹⁷ པརིཎཏོཏི། ཨེཝཾཝིཧིཏཀཾ ནོ ཏུམྷེ ཨཱཡསྨནྟོ ཨདྷིཙྩསམུཔྤནྣཾ ཨཱཙརིཡཀཾ ཨགྒཉྙཾ པཉྙཔེཐཱ’ཏི? ‘ཏེ ཨེཝམཱཧཾསུ – ཨེཝཾ ཁོ ནོ, ཨཱཝུསོ གོཏམ, སུཏཾ ཡཐེཝཱཡསྨཱ གོཏམོ ཨཱཧཱ’ཏི། ‘‘ཨགྒཉྙཉྩཱཧཾ, བྷགྒཝ, པཛཱནཱམི ཏཉྩ པཛཱནཱམི, ཏཏོ ཙ ཨུཏྟརིཏརཾ པཛཱནཱམི, ཏཉྩ པཛཱནཾ ན པརཱམསཱམི, ཨཔརཱམསཏོ ཙ མེ པཙྩཏྟཉྙེཝ ནིབྦུཏི ཝིདིཏཱ། ཡདབྷིཛཱནཾ ཏཐཱགཏོ ནོ ཨནཡཾ ཨཱཔཛྫཏི།

‘So evamāha – adhiccasamuppanno attā ca loko ca. Taṃ kissa hetu? Ahañhi pubbe nāhosiṃ, somhi etarahi ahutvā santatāya ¹¹⁸ pariṇatoti. Evaṃvihitakaṃ no tumhe āyasmanto adhiccasamuppannaṃ ācariyakaṃ aggaññaṃ paññapethā’ti? ‘Te evamāhaṃsu – evaṃ kho no, āvuso gotama, sutaṃ yathevāyasmā gotamo āhā’ti. ‘‘Aggaññañcāhaṃ, bhaggava, pajānāmi tañca pajānāmi, tato ca uttaritaraṃ pajānāmi, tañca pajānaṃ na parāmasāmi, aparāmasato ca me paccattaññeva nibbuti viditā. Yadabhijānaṃ tathāgato no anayaṃ āpajjati.

༤༧. ‘‘ཨེཝཾཝཱདིཾ ཁོ མཾ, བྷགྒཝ, ཨེཝམཀྑཱཡིཾ ཨེཀེ སམཎབྲཱཧྨཎཱ ཨསཏཱ ཏུཙྪཱ མུསཱ ཨབྷཱུཏེན ཨབྦྷཱཙིཀྑནྟི – ‘ཝིཔརཱིཏོ སམཎོ གོཏམོ བྷིཀྑཝོ ཙ། སམཎོ གོཏམོ ཨེཝམཱཧ – ཡསྨིཾ སམཡེ སུབྷཾ ཝིམོཀྑཾ ཨུཔསམྤཛྫ ཝིཧརཏི, སབྦཾ ཏསྨིཾ སམཡེ ཨསུབྷནྟྭེཝ ¹¹⁹ པཛཱནཱཏཱི’ཏི ¹²⁰། ན ཁོ པནཱཧཾ, བྷགྒཝ, ཨེཝཾ ཝདཱམི – ‘ཡསྨིཾ སམཡེ སུབྷཾ ཝིམོཀྑཾ ཨུཔསམྤཛྫ ཝིཧརཏི, སབྦཾ ཏསྨིཾ སམཡེ ཨསུབྷནྟྭེཝ པཛཱནཱཏཱི’ཏི། ཨེཝཉྩ ཁྭཱཧཾ, བྷགྒཝ, ཝདཱམི – ‘ཡསྨིཾ སམཡེ སུབྷཾ ཝིམོཀྑཾ ཨུཔསམྤཛྫ ཝིཧརཏི, སུབྷནྟྭེཝ ཏསྨིཾ སམཡེ པཛཱནཱཏཱི’ཏི།

47. ‘‘Evaṃvādiṃ kho maṃ, bhaggava, evamakkhāyiṃ eke samaṇabrāhmaṇā asatā tucchā musā abhūtena abbhācikkhanti – ‘viparīto samaṇo gotamo bhikkhavo ca. Samaṇo gotamo evamāha – yasmiṃ samaye subhaṃ vimokkhaṃ upasampajja viharati, sabbaṃ tasmiṃ samaye asubhantveva ¹²¹ pajānātī’ti ¹²². Na kho panāhaṃ, bhaggava, evaṃ vadāmi – ‘yasmiṃ samaye subhaṃ vimokkhaṃ upasampajja viharati, sabbaṃ tasmiṃ samaye asubhantveva pajānātī’ti. Evañca khvāhaṃ, bhaggava, vadāmi – ‘yasmiṃ samaye subhaṃ vimokkhaṃ upasampajja viharati, subhantveva tasmiṃ samaye pajānātī’ti.

‘‘ཏེ ཙ, བྷནྟེ, ཝིཔརཱིཏཱ, ཡེ བྷགཝནྟཾ ཝིཔརཱིཏཏོ དཧནྟི བྷིཀྑཝོ ཙ། ཨེཝཾཔསནྣོ ཨཧཾ, བྷནྟེ, བྷགཝཏི། པཧོཏི མེ བྷགཝཱ ཏཐཱ དྷམྨཾ དེསེཏུཾ, ཡཐཱ ཨཧཾ སུབྷཾ ཝིམོཀྑཾ ཨུཔསམྤཛྫ ཝིཧརེཡྻ’’ནྟི།

‘‘Te ca, bhante, viparītā, ye bhagavantaṃ viparītato dahanti bhikkhavo ca. Evaṃpasanno ahaṃ, bhante, bhagavati. Pahoti me bhagavā tathā dhammaṃ desetuṃ, yathā ahaṃ subhaṃ vimokkhaṃ upasampajja vihareyya’’nti.

༤༨. ‘‘དུཀྐརཾ ཁོ ཨེཏཾ, བྷགྒཝ, ཏཡཱ ཨཉྙདིཊྛིཀེན ཨཉྙཁནྟིཀེན ཨཉྙརུཙིཀེན ཨཉྙཏྲཱཡོགེན ཨཉྙཏྲཱཙརིཡཀེན སུབྷཾ ཝིམོཀྑཾ ཨུཔསམྤཛྫ ཝིཧརིཏུཾ། ཨིངྒྷ ཏྭཾ, བྷགྒཝ, ཡོ ཙ ཏེ ཨཡཾ མཡི པསཱདོ, ཏམེཝ ཏྭཾ སཱདྷུཀམནུརཀྑཱ’’ཏི། ‘‘སཙེ ཏཾ, བྷནྟེ, མཡཱ དུཀྐརཾ ཨཉྙདིཊྛིཀེན ཨཉྙཁནྟིཀེན ཨཉྙརུཙིཀེན ཨཉྙཏྲཱཡོགེན ཨཉྙཏྲཱཙརིཡཀེན སུབྷཾ ཝིམོཀྑཾ ཨུཔསམྤཛྫ ཝིཧརིཏུཾ། ཡོ ཙ མེ ཨཡཾ, བྷནྟེ, བྷགཝཏི པསཱདོ, ཏམེཝཱཧཾ སཱདྷུཀམནུརཀྑིསྶཱམཱི’’ཏི། ཨིདམཝོཙ བྷགཝཱ། ཨཏྟམནོ བྷགྒཝགོཏྟོ པརིབྦཱཛཀོ བྷགཝཏོ བྷཱསིཏཾ ཨབྷིནནྡཱིཏི།

48. ‘‘Dukkaraṃ kho etaṃ, bhaggava, tayā aññadiṭṭhikena aññakhantikena aññarucikena aññatrāyogena aññatrācariyakena subhaṃ vimokkhaṃ upasampajja viharituṃ. Iṅgha tvaṃ, bhaggava, yo ca te ayaṃ mayi pasādo, tameva tvaṃ sādhukamanurakkhā’’ti. ‘‘Sace taṃ, bhante, mayā dukkaraṃ aññadiṭṭhikena aññakhantikena aññarucikena aññatrāyogena aññatrācariyakena subhaṃ vimokkhaṃ upasampajja viharituṃ. Yo ca me ayaṃ, bhante, bhagavati pasādo, tamevāhaṃ sādhukamanurakkhissāmī’’ti. Idamavoca bhagavā. Attamano bhaggavagotto paribbājako bhagavato bhāsitaṃ abhinandīti.

པཱཐིཀསུཏྟཾ ¹²³ ནིཊྛིཏཾ པཋམཾ།

Pāthikasuttaṃ ¹²⁴ niṭṭhitaṃ paṭhamaṃ.

Next: ༢. ཨུདུམྦརིཀསུཏྟཾ • 2. Udumbarikasuttaṃ

Footnotes:

1. ཨནུཔྤིཡཾ ནཱམ (སྱཱ॰)

2. ཨནུཔིཡཾ (ཀ॰)

3. anuppiyaṃ nāma (syā.)

4. anupiyaṃ (ka.)

5. ཡཱཝ ཙ (ཀ॰)

6. yāva ca (ka.)

7. པཉྙཱཔེཏཱིཏི (པཱི॰)

8. paññāpetīti (pī.)

9. བུམཱུསུ (སཱི॰ པཱི॰)

10. ཙཏུཀུཎྜིཀོ (སཱི॰ པཱི॰) ཙཏུཀོཎྜིཀོ (སྱཱ॰ ཀ॰)

11. ཨརཧཾ (སཱི॰ སྱཱ॰ པཱི॰)

12. bumūsu (sī. pī.)

13. catukuṇḍiko (sī. pī.) catukoṇḍiko (syā. ka.)

14. arahaṃ (sī. syā. pī.)

15. མོགྷཔུརིས སཀྱཔུཏྟིཡོ (སཱི॰ སྱཱ॰ པཱི॰)

16. མོགྷཔུརིས སཀྱཔུཏྟིཡོ (སཱི॰ སྱཱ॰ པཱི॰)

17. མཉྙསི ‘‘ཨཙེལོ ཀོརཁཏྟིཡོ སཱདྷུརཱུཔོ ཨརཧཾ སམཎོཏི’’ (སྱཱ॰)

18. ཀཱལཀཏོ (སཱི॰ སྱཱ॰ པཱི॰)

19. ཀཱལཀཉྫཱ (སཱི॰ པཱི॰), ཀཱལཀཉྫིཀཱ (སྱཱ॰)

20. ཨཙེལ ཀོརཁཏྟིཡ (ཀ॰)

21. moghapurisa sakyaputtiyo (sī. syā. pī.)

22. moghapurisa sakyaputtiyo (sī. syā. pī.)

23. maññasi ‘‘acelo korakhattiyo sādhurūpo arahaṃ samaṇoti’’ (syā.)

24. kālakato (sī. syā. pī.)

25. kālakañjā (sī. pī.), kālakañjikā (syā.)

26. acela korakhattiya (ka.)

27. པརིཔཏི (སྱཱ॰ ཀ॰)

28. paripati (syā. ka.)

29. སཏྟཝཏྟཔདཱནི (སྱཱ॰ པཱི॰)

30. བཧུཔུཏྟཀཾ ནཱམ (སྱཱ॰)

31. sattavattapadāni (syā. pī.)

32. bahuputtakaṃ nāma (syā.)

33. ཨསཱདིཡིམྷསེ (སྱཱ॰)

34. asādiyimhase (syā.)

35. ཨརཧཾ (སྱཱ॰)

36. ཡསཱནིཀིཎྞོ (ཀ॰)

37. arahaṃ (syā.)

38. yasānikiṇṇo (ka.)

39. པཱཊིཀཔུཏྟོ (སཱི॰ སྱཱ॰ པཱི॰)

40. pāṭikaputto (sī. syā. pī.)

41. ཨོཝཱདིཏཱ (ཀ॰)

42. ovāditā (ka.)

43. ཨཐ ཁོ སྭཱཧཾ (སྱཱ॰)

44. ནཱནཱཏིཏྠིཡ (སྱཱ॰)

45. ནཱནཱཏིཏྠིཡ (སྱཱ॰)

46. atha kho svāhaṃ (syā.)

47. nānātitthiya (syā.)

48. nānātitthiya (syā.)

49. པརིསཱ ཧོཏི (སཱི॰ སྱཱ॰ པཱི॰)

50. parisā hoti (sī. syā. pī.)

51. ཏེནུཔསངྐམནྟོ (སཱི॰ པཱི॰ ཀ॰)

52. tenupasaṅkamanto (sī. pī. ka.)

53. ཨབྷིཀྐམཡེཝ (སཱི॰ སྱཱ॰ པཱི॰)

54. abhikkamayeva (sī. syā. pī.)

55. སཾསབྦཏི (ཀ॰)

56. saṃsabbati (ka.)

57. པརཱབྷཱུཏརཱུཔོ བྷོ ཨཡཾ (སྱཱ॰ ཀ॰), པརཱབྷཱུཏརཱུཔོ (སཱི॰ པཱི॰)

58. parābhūtarūpo bho ayaṃ (syā. ka.), parābhūtarūpo (sī. pī.)

59. པཙྩཱགཙྪཱམི (?)

60. paccāgacchāmi (?)

61. པརཱབྷཱུཏརཱུཔོ (སཱི॰ པཱི॰), པརཱབྷཱུཏརཱུཔོ ཨཡཾ (སྱཱ॰)

62. ཡཱཧི ཝརཏྟཱཧི (སྱཱ॰ ཀ॰)

63. ཨཱཝིཉྫེཡྻཱམཱཏི (སྱཱ॰), ཨཱཝིཛ྄ཛྷེཡྻཱམཱཏི (སཱི॰ པཱི॰)

64. parābhūtarūpo (sī. pī.), parābhūtarūpo ayaṃ (syā.)

65. yāhi varattāhi (syā. ka.)

66. āviñjeyyāmāti (syā.), āvijjheyyāmāti (sī. pī.)

67. མིགསཾགྷཾ (སྱཱ॰ ཀ॰)

68. migasaṃghaṃ (syā. ka.)

69. ཛརསིགཱལོ (སཱི॰ སྱཱ॰ པཱི॰)

70. jarasigālo (sī. syā. pī.)

71. བྷེདཎྜཀཾཡེཝ (ཀ॰)

72. སཱིཧནཱདེ (?)

73. bhedaṇḍakaṃyeva (ka.)

74. sīhanāde (?)

75. ཏམེཝ (སྱཱ॰)

76. tameva (syā.)

77. བྷིངྒེ (ཀ॰)

78. bhiṅge (ka.)

79. ཀཱུཎཔཱནི (སྱཱ॰)

80. kūṇapāni (syā.)

81. གོཡུགེཧི (སབྦཏྠ) ཨཊྛཀཐཱ པསྶིཏབྦཱ

82. goyugehi (sabbattha) aṭṭhakathā passitabbā

83. ཨགྒིཾ (སྱཱ॰)

84. དྷཱུཔཱཡིཏྭཱ (སཱི॰ པཱི॰)

85. aggiṃ (syā.)

86. dhūpāyitvā (sī. pī.)

87. ‘‘ཏཉྩཔཛཱནཱམཱི’’ཏི ཨིདཾ སྱཱཔོཏྠཀེནཏྠི

88. པཛཱནནཾ (སྱཱ॰ ཀ॰) ཨཊྛཀཐཱསཾཝཎྞནཱ པསྶིཏབྦཱ

89. ‘‘tañcapajānāmī’’ti idaṃ syāpotthakenatthi

90. pajānanaṃ (syā. ka.) aṭṭhakathāsaṃvaṇṇanā passitabbā

91. ཨཱམཱཏི (སྱཱ॰)

92. ཀཐཾ ཝིཧིཏཀཾནོ པན (ཀ॰)

93. āmāti (syā.)

94. kathaṃ vihitakaṃno pana (ka.)

95. ཨཐ (སཱི॰ སྱཱ॰ པཱི॰)

96. atha (sī. syā. pī.)

97. སཉྫིཏཱ (སཱི॰ པཱི॰), སཛྫིཏཱ (སྱཱ॰ ཀཾ॰)

98. sañjitā (sī. pī.), sajjitā (syā. kaṃ.)

99. སསྶཏོ དཱིགྷཱཡུཀོ (སྱཱ॰ ཀ॰)

100. ཨདྡྷུཝཱ ཨསསྶཏཱ (སྱཱ॰ ཀ॰)

101. sassato dīghāyuko (syā. ka.)

102. addhuvā asassatā (syā. ka.)

103. ཧསཁིཌྜཱརཏིདྷམྨསམཱཔནྣཱ (ཀ॰)

104. སཏིཡཱ སམྨོསཱཡ (སྱཱ॰)

105. hasakhiḍḍāratidhammasamāpannā (ka.)

106. satiyā sammosāya (syā.)

107. སམྨོསཱ ཨེཝ (སཱི॰ པཱི॰) སམྨོསཱ ཏེ (སྱཱ॰ ཀ॰)

108. sammosā eva (sī. pī.) sammosā te (syā. ka.)

109. ཨཀིལནྟཙིཏྟཱ ཏམྷཱ (ཀ॰)

110. པདོསིཡིམྷཱ (སྱཱ॰), པདཱུསཡིམྷཱ (?)

111. ཀིལནྟཙིཏྟཱཨེཝ མཡཾ (སཱི॰ པཱི॰), ཀིལནྟཙིཏྟཱ (ཀ॰)

112. akilantacittā tamhā (ka.)

113. padosiyimhā (syā.), padūsayimhā (?)

114. kilantacittāeva mayaṃ (sī. pī.), kilantacittā (ka.)

115. ཨིདཾ པདཾ བྲཧྨཛཱལསུཏྟེ ན དིསྶཏི། ཨེཝཾ (པཱི॰ ཀ॰)

116. idaṃ padaṃ brahmajālasutte na dissati. evaṃ (pī. ka.)

117. སཏྟཀཱཡ (སཱི॰ པཱི॰), སཏྟཱཡ (ཀ॰ སཱི॰)

118. sattakāya (sī. pī.), sattāya (ka. sī.)

119. ཨསུབྷནྟེཝ (སཱི॰ སྱཱ॰ པཱི॰)

120. སཉྫཱནཱཏཱིཏི (སཱི॰ པཱི॰)

121. asubhanteva (sī. syā. pī.)

122. sañjānātīti (sī. pī.)

123. པཱཊིཀསུཏྟནྟཾ (སཱི॰ སྱཱ॰ ཀཾ॰ པཱི॰)

124. pāṭikasuttantaṃ (sī. syā. kaṃ. pī.)

Related texts:

ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / དཱིགྷ ནིཀཱཡ (ཨཊྛཀཐཱ) • Dīgha nikāya (aṭṭhakathā) / ༡. པཱཐིཀསུཏྟཝཎྞནཱ • 1. Pāthikasuttavaṇṇanā

ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / དཱིགྷནིཀཱཡ (ཊཱིཀཱ) • Dīghanikāya (ṭīkā) / ༡. པཱཐིཀསུཏྟཝཎྞནཱ • 1. Pāthikasuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact