| Library / Tipiṭaka / តិបិដក • Tipiṭaka / កង្ខាវិតរណី-អភិនវ-ដីកា • Kaṅkhāvitaraṇī-abhinava-ṭīkā |
៧-១០. បដិពាហនាទិសិក្ខាបទវណ្ណនា
7-10. Paṭibāhanādisikkhāpadavaṇṇanā
អានិសំសំ ទស្សេត្វា បដិពាហន្តិយាតិ ‘‘ឯកិស្សា ឯកំ សាដកំ នប្បហោតិ, អាគមេថ តាវ, កតិបាហេន ឧប្បជ្ជិស្សតិ, តតោ ភាជេស្សាមា’’តិ (បាចិ. អដ្ឋ. ៩១៥) ឯវំ អានិសំសំ ទស្សេត្វា បដិពាហន្តិយា អនាបត្តិ។
Ānisaṃsaṃ dassetvā paṭibāhantiyāti ‘‘ekissā ekaṃ sāṭakaṃ nappahoti, āgametha tāva, katipāhena uppajjissati, tato bhājessāmā’’ti (pāci. aṭṭha. 915) evaṃ ānisaṃsaṃ dassetvā paṭibāhantiyā anāpatti.
អដ្ឋមនវមានិ ឧត្តានត្ថានេវ។
Aṭṭhamanavamāni uttānatthāneva.
សេសន្តិ ‘‘ធម្មិកេ វេមតិកាយា’’តិអាទិកំ អវសេសំ។ តត្ថ អានិសំសំ ទស្សេត្វា បដិពាហន្តិយាតិ ‘‘ភិក្ខុនិសង្ឃោ ជិណ្ណចីវរោ, កថិនានិសំសមូលកោ មហាលាភោ’’តិ (បាចិ. អដ្ឋ. ៩៣១) ឯវរូបំ អានិសំសំ ទស្សេត្វា បដិពាហន្តិយា អនាបត្តិ។
Sesanti ‘‘dhammike vematikāyā’’tiādikaṃ avasesaṃ. Tattha ānisaṃsaṃ dassetvā paṭibāhantiyāti ‘‘bhikkhunisaṅgho jiṇṇacīvaro, kathinānisaṃsamūlako mahālābho’’ti (pāci. aṭṭha. 931) evarūpaṃ ānisaṃsaṃ dassetvā paṭibāhantiyā anāpatti.
បដិពាហនាទិសិក្ខាបទវណ្ណនា និដ្ឋិតា។
Paṭibāhanādisikkhāpadavaṇṇanā niṭṭhitā.
នគ្គវគ្គោ តតិយោ។
Naggavaggo tatiyo.
