| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. படிபா⁴னஸுத்தவண்ணனா
2. Paṭibhānasuttavaṇṇanā
132. து³தியே படிபா⁴னங் வுச்சதி ஞாணம்பி ஞாணஸ்ஸ உபட்டி²தவசனம்பி, தங் இத⁴ அதி⁴ப்பேதங், அத்த²யுத்தங் காரணயுத்தஞ்ச படிபா⁴னமஸ்ஸாதி யுத்தப்படிபா⁴னோ. புச்சா²னந்தரமேவ ஸீக⁴ங் ப்³யாகாதுங் அஸமத்த²தாய நோமுத்தப்படிபா⁴னமஸ்ஸாதி நோமுத்தப்படிபா⁴னோ. இமினா நயேன ஸேஸா வேதி³தப்³பா³. எத்த² பன பட²மோ கஞ்சி காலங் வீமங்ஸித்வா யுத்தமேவ பெக்க²தி திபிடகசூளனாக³த்தே²ரோ விய. ஸோ பன பஞ்ஹங் புட்டோ² பரிக்³க³ஹெத்வா யுத்தப்பத்தகாரணமேவ கதே²தி. து³தியோ புச்சா²னந்தரமேவ யேன வா தேன வா வசனேன படிபா³ஹதி, வீமங்ஸித்வாபி ச யுத்தங் ந பக்கே²தி சதுனிகாயிகபிண்ட³திஸ்ஸத்தே²ரோ விய. ஸோ பன பஞ்ஹங் புட்டோ² பஞ்ஹபரியோஸானம்பி நாக³மேதி, யங் வா தங் வா கதே²தியேவ, வசனத்த²ங் பனஸ்ஸ வீமங்ஸியமானங் கத்த²சி ந லக³தி. ததியோ புச்சா²ஸமகாலமேவ யுத்தங் பெக்க²தி, தங்க²ணங்யேவ ச நங் ப்³யாகரோதி திபிடகசூளாப⁴யத்தே²ரோ விய. ஸோ பன பஞ்ஹங் புட்டோ² ஸீக⁴மேவ கதே²தி, யுத்தப்பத்தகாரணோ ச ஹோதி. சதுத்தோ² புட்டோ² ஸமானோ நேவ யுத்தங் பெக்க²தி, ந யேன வா தேன வா படிபா³ஹிதுங் ஸக்கோதி, திப்³ப³ந்த⁴காரனிமுக்³கோ³ விய ஹோதி லாளுதா³யித்தே²ரோ விய.
132. Dutiye paṭibhānaṃ vuccati ñāṇampi ñāṇassa upaṭṭhitavacanampi, taṃ idha adhippetaṃ, atthayuttaṃ kāraṇayuttañca paṭibhānamassāti yuttappaṭibhāno. Pucchānantarameva sīghaṃ byākātuṃ asamatthatāya nomuttappaṭibhānamassāti nomuttappaṭibhāno. Iminā nayena sesā veditabbā. Ettha pana paṭhamo kañci kālaṃ vīmaṃsitvā yuttameva pekkhati tipiṭakacūḷanāgatthero viya. So pana pañhaṃ puṭṭho pariggahetvā yuttappattakāraṇameva katheti. Dutiyo pucchānantarameva yena vā tena vā vacanena paṭibāhati, vīmaṃsitvāpi ca yuttaṃ na pakkheti catunikāyikapiṇḍatissatthero viya. So pana pañhaṃ puṭṭho pañhapariyosānampi nāgameti, yaṃ vā taṃ vā kathetiyeva, vacanatthaṃ panassa vīmaṃsiyamānaṃ katthaci na lagati. Tatiyo pucchāsamakālameva yuttaṃ pekkhati, taṃkhaṇaṃyeva ca naṃ byākaroti tipiṭakacūḷābhayatthero viya. So pana pañhaṃ puṭṭho sīghameva katheti, yuttappattakāraṇo ca hoti. Catuttho puṭṭho samāno neva yuttaṃ pekkhati, na yena vā tena vā paṭibāhituṃ sakkoti, tibbandhakāranimuggo viya hoti lāḷudāyitthero viya.
படிபா⁴னஸுத்தவண்ணனா நிட்டி²தா.
Paṭibhānasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. படிபா⁴னஸுத்தங் • 2. Paṭibhānasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. படிபா⁴னஸுத்தவண்ணனா • 2. Paṭibhānasuttavaṇṇanā
