| Library / Tipiṭaka / ติปิฎก • Tipiṭaka / องฺคุตฺตรนิกาย (ฎีกา) • Aṅguttaranikāya (ṭīkā) |
๒. ปฎิภานสุตฺตวณฺณนา
2. Paṭibhānasuttavaṇṇanā
๑๓๒. ทุติเย ปฎิภานํ วุจฺจติ ญาณมฺปิ ญาณสฺส อุปฎฺฐิตวจนมฺปิ, ตํ อิธ อธิเปฺปตํ, อตฺถยุตฺตํ การณยุตฺตญฺจ ปฎิภานมสฺสาติ ยุตฺตปฺปฎิภาโนฯ ปุจฺฉานนฺตรเมว สีฆํ พฺยากาตุํ อสมตฺถตาย โนมุตฺตปฺปฎิภานมสฺสาติ โนมุตฺตปฺปฎิภาโนฯ อิมินา นเยน เสสา เวทิตพฺพาฯ เอตฺถ ปน ปฐโม กญฺจิ กาลํ วีมํสิตฺวา ยุตฺตเมว เปกฺขติ ติปิฎกจูฬนาคเตฺถโร วิยฯ โส ปน ปญฺหํ ปุโฎฺฐ ปริคฺคเหตฺวา ยุตฺตปฺปตฺตการณเมว กเถติฯ ทุติโย ปุจฺฉานนฺตรเมว เยน วา เตน วา วจเนน ปฎิพาหติ, วีมํสิตฺวาปิ จ ยุตฺตํ น ปเกฺขติ จตุนิกายิกปิณฺฑติสฺสเตฺถโร วิยฯ โส ปน ปญฺหํ ปุโฎฺฐ ปญฺหปริโยสานมฺปิ นาคเมติ, ยํ วา ตํ วา กเถติเยว, วจนตฺถํ ปนสฺส วีมํสิยมานํ กตฺถจิ น ลคติฯ ตติโย ปุจฺฉาสมกาลเมว ยุตฺตํ เปกฺขติ, ตํขณํเยว จ นํ พฺยากโรติ ติปิฎกจูฬาภยเตฺถโร วิยฯ โส ปน ปญฺหํ ปุโฎฺฐ สีฆเมว กเถติ, ยุตฺตปฺปตฺตการโณ จ โหติฯ จตุโตฺถ ปุโฎฺฐ สมาโน เนว ยุตฺตํ เปกฺขติ, น เยน วา เตน วา ปฎิพาหิตุํ สโกฺกติ, ติพฺพนฺธการนิมุโคฺค วิย โหติ ลาฬุทายิเตฺถโร วิยฯ
132. Dutiye paṭibhānaṃ vuccati ñāṇampi ñāṇassa upaṭṭhitavacanampi, taṃ idha adhippetaṃ, atthayuttaṃ kāraṇayuttañca paṭibhānamassāti yuttappaṭibhāno. Pucchānantarameva sīghaṃ byākātuṃ asamatthatāya nomuttappaṭibhānamassāti nomuttappaṭibhāno. Iminā nayena sesā veditabbā. Ettha pana paṭhamo kañci kālaṃ vīmaṃsitvā yuttameva pekkhati tipiṭakacūḷanāgatthero viya. So pana pañhaṃ puṭṭho pariggahetvā yuttappattakāraṇameva katheti. Dutiyo pucchānantarameva yena vā tena vā vacanena paṭibāhati, vīmaṃsitvāpi ca yuttaṃ na pakkheti catunikāyikapiṇḍatissatthero viya. So pana pañhaṃ puṭṭho pañhapariyosānampi nāgameti, yaṃ vā taṃ vā kathetiyeva, vacanatthaṃ panassa vīmaṃsiyamānaṃ katthaci na lagati. Tatiyo pucchāsamakālameva yuttaṃ pekkhati, taṃkhaṇaṃyeva ca naṃ byākaroti tipiṭakacūḷābhayatthero viya. So pana pañhaṃ puṭṭho sīghameva katheti, yuttappattakāraṇo ca hoti. Catuttho puṭṭho samāno neva yuttaṃ pekkhati, na yena vā tena vā paṭibāhituṃ sakkoti, tibbandhakāranimuggo viya hoti lāḷudāyitthero viya.
ปฎิภานสุตฺตวณฺณนา นิฎฺฐิตาฯ
Paṭibhānasuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๒. ปฎิภานสุตฺตํ • 2. Paṭibhānasuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๒. ปฎิภานสุตฺตวณฺณนา • 2. Paṭibhānasuttavaṇṇanā
